dwar il-mandat għat-trilogu dwar l-Abbozz ta’ Baġit 2013

(2012/2016(BUD))

Il-Parlament Ewropew,

–   wara li kkunsidra l-abbozz ta’ baġit għas-sena finanzjarja 2013, li l-Kummissjoni adottat fil-25 ta’ April 2012 (SEC(2012)270),

–   wara li kkunsidra l-Ftehim Interistituzzjonali tas-17 ta' Mejju 2006 bejn il-Parlament Ewropew, il-Kunsill u l-Kummissjoni dwar id-dixxiplina baġitarja u l-amministrazzjoni finanzjarja soda (FII),

–   wara li kkunsidra l-Artikolu 314 tat-Trattat dwar il-Funzjonament tal-Unjoni Ewropea,

–   wara li kkunsidra r-riżoluzzjoni tiegħu tal-14 ta' Marzu 2012 dwar il-linji gwida ġenerali għat-tħejjija tal-baġit 2013,

–   wara li kkunsidra l-konklużjonijiet tal-Kunsill tal-21 ta’ Frar 2012 dwar il-linji gwida tal-baġit għall-2013,

–   wara li kkunsidra t-Titolu II, Kapitolu 7 tar-Regoli ta’ Proċedura tiegħu,

–   wara li kkunsidra l-konklużjonijiet tal-laqgħa interistituzzjonali dwar il-pagamenti tat-30 ta’ Mejju 2012,

–   wara li kkunsidra r-rapport tal-Kumitat għall-Baġits u l-opinjonijiet tal-Kumitat għall-Affarijiet Barranin, tal-Kumitat għall-Iżvilupp, tal-Kumitat għall-Kummerċ Internazzjonali, tal-Kumitat għall-Kontroll tal-Baġit, tal-Kumitat għall-Impjiegi u l-Affarijiet Soċjali, tal-Kumitat għall-Industrija, ir-Riċerka u l-Enerġija, tal-Kumitat għall-Iżvilupp Reġjonali, tal-Kumitat għall-Agrikoltura u l-Iżvilupp Rurali, tal-Kumitat għal-Libertajiet Ċivili, il-Ġustizzja u l-Intern, tal-Kumitat għall-Affarijiet Kostituzzjonali u tal-Kumitat għad-Drittijiet tan-Nisa u l-Ugwaljanza bejn is-Sessi, kif ukoll l-ittra tal-Kumitat għas-Sajd (A7-0215/2012),

Abbozz tal-baġit 2013 – valutazzjoni ġenerali

1.  Ifakkar li l-Parlament, fir-riżoluzzjoni tiegħu tal-14 ta’ Marzu 2012, qiegħed fil-qalba tal-prijoritajiet tiegħu l-promozzjoni tat-tkabbir u l-impjiegi, bi qbil mal-istrateġija Ewropa 2020, filwaqt li għamel l-argument b’mod partikolari favur il-konċentrazzjoni tar-riżorsi f’politiki u programmi li jirriżulta li jkunu strumentali għall-ilħiq ta’ dawk l-objettivi, partikolarment b’appoġġ tal-SMEs u ż-żgħażagħ; jilqa’ l-fatt li l-abbozz ta’ baġit għall-2013 tal-Kummissjoni jimxi fl-istess direzzjoni f’dak li jirrigwarda prijoritajiet identifikati li għandom jissaħħu;

2.  Jagħraf ir-restrizzjonijiet ekonomiċi u baġitarji persistenti fil-livell nazzjonali, kif ukoll il-ħtieġa ta’ konsolidazzjoni fiskali; itenni l-konvinzjoni tiegħu, madankollu, li l-baġit tal-UE jirrappreżenta strument komuni u effikaċi ta’ investiment u solidarjetà, li huwa partikolarment meħtieġ fil-preżent biex jiskatta t-tkabbir ekonomiku, il-kompetittività u l-ħolqien tal-impjiegi fis-27 Stat Membru; jenfasizza li, minkejja d-daqs limitat tiegħu, li ma jisboqx 2 % tal-infiq pubbliku totali fl-Unjoni, il-baġit tal-UE kellu impatt ekonomiku reali u sal-lum irnexxielu jikkomplementa l-politiki ta’ rkupru tal-Istati Membri;

3.  Biħsiebu, għaldaqstant, jiddefendi bil-qawwa livell adegwat ta’ riżorsi għall-baġit tas-sena d-dieħla, kif definit fl-abbozz ta’ baġit, u jopponi kwalunkwe tentattiv ta' tnaqqis tar-riżorsi, speċjalment għal politiki li jġibu t-tkabbir u l-impjiegi; jemmen li l-baġit tal-UE, li ma jistax ikun f’defiċit, m’għandux jisfa vittma ta’ politiki ekonomiċi li ma rnexxewx fil-livell nazzjonali; jirrimarka li, fl-2012, bosta Stati Membri qed ikabbru d-daqs tal-baġits nazzjonali tagħhom;

4.  Huwa konvint li, partikolarment f’perjodu ta’ kriżi, ir-responsabbiltà finanzjarja għandha importanza mill-akbar; jemmen, għaldaqstant, li r-riżorsi jeħtieġ li jiġu kkonċentrati f’dawk l-oqsma fejn il-baġit tal-UE jista’ jġib valur miżjud, filwaqt li jistgħu jitnaqqsu minn setturi li qed jesperjenzaw dewmien mhux ġustifikat u assorbiment baxx, bil-ħsieb li jsir iffrankar f'linji fejn irriżultaw problemi fl-implimentazzjoni; iqis li jista' jsir iffrankar reali billi jiġu identifikati sovrappożizzjonijiet u ineffiċjenzi fil-linji baġitarji; fuq din il-bażi, biħsiebu jidentifika, flimkien mal-kumitati speċjalizzati tiegħu, prijoritajiet sew pożittivi kif ukoll negattivi għall-2013; jitlob lill-Kummissjoni, għal dan il-għan, tagħti liż-żewġ fergħat tal-awtorità baġitarja informazzjoni pronta, regolari u sħiħa dwar l-implimentazzjoni - abbażi ta' indikaturi mira ta' prestazzjoni - tad-diversi programmi u inizjattivi u tivvalutahom f'paragun mal-impenji politiċi tal-UE;

5.  Jinnota li l-abbozz ta’ baġit tal-UE għall-2013 propost mill-Kummissjoni jammonta għal EUR 150.931.7 miljun f’approprjazzjonijiet ta’ impenn (AI) (jiġifieri +2 % mqabbla mal-baġit 2012) u EUR 137.924.4 miljun f’approprjazzjonijiet ta’ pagament (AP) (jiġifieri +6.8 % mqabbla mal-Baġit 2012); jirrimarka li dawn l-ammonti rispettivament jirrappreżentaw 1.13 % u 1.03 % tal-Introjtu Nazzjonali Gross (ING) tal-UE previst għall-2013; ifakkar li l-Qafas Finanzjarju Multiannwali (QFM) jipprovdi limiti ta’ EUR 152 502 miljun għall-AI u EUR 143 911 miljun għall-AP, bi prezzijiet kurrenti; jindika d-diskrepanza kontinwa bejn il-livelli ta’ approprjazzjonijiet ta’ impenn u ta’ pagament li se tirriżulta f’iktar żieda fir-reste-à-liquider (RAL);

6.  Jifhem li l-Kummissjoni fi, tmiem il-perjodu ta’ programmar, l-aċċent qed tqiegħdu fuq in-naħa tal-pagamenti, minħabba li biħsiebha tipprovdi soluzzjoni wkoll għal-livell dejjem jikber tar-RALs; filwaqt li jikkondividi dan l-approċċ, huwa partikolarment imħasseb dwar l-iffriżar propost tal-approprjazzjonijiet ta’ impenn fil-livell tar-rata stmata tal-inflazzjoni għas-sena d-dieħla; jenfasizza l-importanza tal-impenji għad-determinazzjoni tal-prijoritajiet politiċi u b’hekk għall-iżgurar li l-investiment meħtieġ eventwalment isir biex jagħti spinta lit-tkabbir u l-impjiegi; biħsiebu janalizza bir-reqqa jekk dan il-livell ta' impenji hux se jippermetti l-implimentazzjoni xierqa ta' politiki ewlenin tal-UE; huwa tal-opinjoni li anke jekk l-iffriżar tal-approprjazzjonijiet ta’ impenn jista' jiġi ppreżentat mill-Kummissjoni u mill-Istati membri bħala soluzzjoni parzjali għall-problema tar-RALs, ma jistax jitqies bħala strateġija aċċettabbli il-livell tar-RALs jinżamm taħt kontroll;

7.  Iqis iż-żieda proposta ta’ 6.8 % fl-AP mqabbla mal-2012 bħala risposta inizjali għat-talba tal-Parlament għal baġit responsabbli u realistiku; jinnota li ż-żidiet fil-pagamenti huma kkonċentrati fl-oqsma tal-kompetittività u l-koeżjoni, minħabba l-livell ogħla ta' talbiet mistenni għal proġetti operattivi f’dawn l-oqsma; japprova bis-sħiħ din iż-żieda, li hija r-riżultat mhux biss ta' impenji tal-imgħoddi li jeħtieġ li jkunu onorati imma wkoll tal-implimentazzjoni reali ta’ programmi, li mistennija tilħaq livell tajjeb ta’ attività fl-aħħar sena tal-QFM kurrenti; jitlob lill-Kummissjoni tivverifika mal-Istati Membri li d-domandi stmati tagħhom għal żidiet fil-pagamenti huma eżatti u realistiċi;

8.  Jibqa’ xettiku, madankollu, dwar jekk il-livell propost ta’ approprjazzjonijiet ta’ pagament fl-2013 hux se jkun adegwat biex ikopri l-ħtiġijiet reali għas-sena d-dieħla, speċjalment fl-Intestaturi 1b u 2; se jimmonitorja b’attenzjoni s-sitwazzjoni tal-pagamenti matul l-2012, filwaqt li jagħti attenzjoni partikolari għat-trasferimenti u r-riallokazzjonijiet kollha proposti; iwissi wkoll li l-livell insuffiċjenti tal-pagamenti għall-2012 flimkien mal-livell propost mill-Kummissjoni għall-2013 jista’ ma jkunx biżżejjed biex jonora t-talbiet li qed jiġu indirizzati lill-Kummissjoni, u jista’ mbagħad iwassal għal biljuni f’diżimpenji fil-politika ta' koeżjoni weħidha; jenfasizza li l-proposta kurrenti l-livell globali ta’ pagamenti għall-perjodu 2007-2013 iġġibu għal EUR 859.4 biljun, jiġifieri madwar EUR 66 biljun anqas mil-livelli massimi maqbula tal-QFM;

9.  Ifakkar li diġà fl-2011, il-Kummissjoni ma setgħetx tħallas numru sinifikanti ta’ talbiet leġittimi, partikolarment fil-qasam tal-politika ta’ koeżjoni; jinnota li dawk it-talbiet ukoll se jkun jeħtieġ li jkunu koperti mill-baġit 2012, li diġà qed iġarrab nuqqas ta’ fondi bħala konsegwenza taż-żieda limitata fl-approprjazzjonijiet ta’ pagament minħabba l-pożizzjoni tal-Kunsill matul il-proċedura baġitarja tas-sena li għaddiet; jitlob lill-Kummissjoni, għaldaqstant, tfassal abbozz ta’ baġit emendatorju malajr kemm jista’ jkun, biex issewwi din is-sitwazzjoni u tevita li pagamenti tal-2012 jgħaddu fuq is-sena ta’ wara, peress li dan joħloq livell mhux sostenibbli ta’ pagamenti għall-2013; jerġa’ jitlob lill-Kummissjoni u lill-Kunsill sabiex jaħdmu b’mod kostruttiv, flimkien mal-Parlament, sabiex tiġi evitata ripetizzjoni ta’ din is-sitwazzjoni f’ċikli tal-baġit futuri billi tittejjeb l-eżattezza tal-previżjoni u billi jiftiehmu dwar estimi realistiċi tal-baġit;

10. Jiddeplora r-riluttanza tal-Presidenza tal-Kunsill li jieħu sehem fil-laqgħa politika interistituzzjonali dwar il-pagamenti li l-Parlament ippropona bħala segwitu għall-konċiljazzjoni baġitarja tas-sena li għaddiet; iqis din l-imġiba bħala tentattiv irresponsabbli sabiex tiġi injorata l-kwistjoni tan-nuqqas tal-ħruġ tal-pagamenti u l-kwistjoni tar-RAL; iqis li laqgħa bħal din tkun il-pjattaforma ideali biex iż-żewġ fergħat tal-awtorità baġitarja jilħqu fehim komuni – qabel il-pożizzjonijiet rispettivi tagħhom dwar l-abbozz ta’ baġit – dwar id-dejta disponibbli rigward l-implimentazzjoni u l-kapaċità ta’ assorbiment u biex jagħmlu stima korretta tal-ħtiġijiet ta’ pagament għall-2012 u l-2013; ifakkar li approprjazzjonijiet ta’ pagament proposti mill-Kummissjoni fl-abbozz ta’ baġit tagħha huma bbażati fuq l-estimi li saru mill-Istati Membri stess; huwa konvint, għalhekk, li kwalunkwe dubji jew bdil fl-opinjoni - kif espressi minn ċerti delegazzjonijiet tal-Kunsill - dwar iċ-ċifri u l-kalkoli tal-Kummissjoni jeħtieġ li jiġu kkomunikati, eżaminati u ċċarati mill-aktar fis possibbli, biex ma jsirux impediment għall-ilħiq ta’ ftehim fil-konċiljazzjoni ta’ din is-sena;

11. Jenfasizza li, skont id-data riċenti ppreżentata mill-Kummissjoni fil-laqgħa interistituzzjonali dwar il-pagamenti li seħħet fit-30 ta’ Mejju 2012, kwalunkwe tnaqqis fil-livell tal-approprjazzjonijiet ta’ pagament taħt il-livell tal-proposta tal-Kummissjoni jwassal ukoll għal tnaqqis ulterjuri fl-impenji pendenti (RALs), li fi tmiem l-2011 diġà kienu laħqu l-ogħla livell li qatt kellhom sa dakinhar, jiġifieri EUR 207 biljun; itenni l-appell tiegħu, għaldaqstant, li l-Kunsill jaġixxi b’mod responsabbli u joqgħod lura milli jagħmel tnaqqisiet artifiċjali billi jiddeċiedi dwar livell globali tal-pagamenti a priori, bla ma jqis il-valutazzjoni tal-ħtiġijiet reali għall-ilħiq tal-objettivi u l-impenji maqbula tal-UE; jitlob lill-Kunsill, fil-każ li dan iseħħ, biex jidentifika u jiġġustifika b’mod ċar u pubbliku liema programmi u proġetti tal-UE għandhom jiddewmu jew jitwaqqgħu għalkollox;

12. Jirrimarka li, skont l-istima tal-Kummissjoni, kollox ma’ kollox 43.7 % tal-Abbozz ta’ Baġit għall-2013 (jiġifieri EUR 64.5 biljun) huwa allokat għall-objettivi tal-Ewropa 2020, li jirrappreżenta żieda ta’ 0.2 % meta mqabbel mal-baġit 2012; japprezza l-fatt li għall-ewwel darba l-linji baġitarji u l-programmi li jikkontribwixxu għal dawn l-objettivi huma identifikabbli biċ-ċar fl-abbozz ta’ baġit;

13. Jieħu nota tal-marġni kumplessiv ta’ EUR 2.4 biljun f’AI fl-Abbozz ta’ Baġit 2013, u huwa determinat li jutilizzah bis-sħiħ – flimkien mal-mekkaniżmi l-oħra ta’ flessibbiltà previsti mill-FII – kull meta jkun hemm bżonn biex jiffinanzja l-objettivi u l-prijoritajiet li joħorġu minn impenji u deċiżjonijiet politiċi kondiviżi, jiġifieri dawk tal-istrateġija Ewropa 2020;

14. Jinnota li, minbarra n-nefqa amministrattiva, ma ddaħħlu l-ebda approprjazzjonijiet fl-abbozz ta' baġit għall-adeżjoni tal-Kroazja f'Lulju 2013; jistenna li r-reviżjoni tal-QFM prevista mill-Punt 29 tal-IIA tiġi adottata malajr, u jitlob lill-Kummissjoni tressaq il-proposta tagħha permezz ta' baġit emendatorju għall-approprjazzjonijiet addizzjonali korrispondenti malli l-Att ta' Adeżjoni jiġi rratifikat mill-Istati Membri kollha; ifakkar li kwalunkwe rekwiżiti finanzjarji ġodda għandhom jiġu ffinanzjati b’fondi ġodda aktar milli b'ridistribuzzjonijiet għat-tieni parti tal-2013;

15. Ifakkar li l-baġit annwali għall-2013 se jkun l-aħħar wieħed fil-QFM kurrenti, iżda jtenni li l-livelli massimi tal-QFM għall-2013, kif miftiehem fl-IIA tas-17 ta’ Mejju 2006, se jibqgħu r-referenza għal mill-inqas il-livelli massimi tal-qafas finanzjarju għall-2014 jekk ma jintlaħaqx qbil, skont id-dispożizzjonijiet tal-punt 30 tal-IIA tas-17 ta’ Mejju 2006;

Intestatura 1a

16. Jieħu nota tal-proposta tal-Kummissjoni għal żieda ta’ impenji f’din l-Intestatura b’4.1 % (għal EUR 16.032 miljun) meta mqabbla mal-baġit 2012; jinnota li l-proposta għal AI taħt il-possibbiltajiet tal-ipprogrammar finanzjarju (jiġifieri TEN-T, EIT, Progress) tħalli marġni ogħla ta’ EUR 90.9 miljun imqabbel mal-EUR 47.7 miljun previst fl-ipprogrammar finanzjarju; jieħu pjaċir jara li l-ogħla żidiet fl-AI huma kkonċentrati fl-Intestatura 1a, fejn tqiegħdu l-parti l-kbira tal-politiki u programmi li jiskattaw it-tkabbir, il-kompetittività u l-impjiegi, u li dawn jirriflettu l-prijoritajiet li l-Parlament enfasizza għall-2013;

17. Jilqa’, b’mod partikolari, iż-żidiet għall-programmi FP7-EC (+6.1%), CIP (+7.3 %) u TEN-T (+6.4 %), li huma fost dawk li l-aktar jikkontribwixxu għall-ilħiq tal-objettivi tal-Ewropa 2020; jiddispjaċih, madankollu, li bl-ammonti proposti mill-Kummissjoni, żewġ programmi emblematiċi bħalma huma l-FP7 u t-TEN-T fil-fatt se jallokaw anqas AI milli kien previst fil-bażijiet legali tagħhom (FP: EUR -258.8 miljun u TEN-T: EUR -122.5 miljun) għall-aħħar sena tal-QFM kurrenti; jiddispjaċih ukoll li l-proposta mill-Kummissjoni ma tipprovdix għall-implimentazzjoni sħiħa tal-Programm Enerġija Intelliġenti-Ewropa;

18. Iqis li ż-żieda sostanzjali fil-pagamenti, bi 17,8 % (għal EUR 13 552 miljun) meta mqabbla mal-Baġit 2012 hija stima realistika tal-pagamenti meħtieġa taħt din l-Intestatura, b’mod partikolari biex tkopri t-talbiet tas-sena d-dieħla għal proġetti ta’ riċerka li jirriżultaw minn obbligi kuntrattwali tal-Unjoni; iqis il-livell ta’ pagamenti propost mill-Kummissjoni bħala dak minimu meħtieġ taħt l-Intestatura 1a;

19. Jieħu nota tar-raġunament adottat mill-Kummissjoni hija u tippropni tnaqqisiet meta mqabbla mal-ipprogrammar finanzjarju, li wasslu, fil-fehma tagħha, għall-identifikazzjoni ta’ ffrankar potenzjali fi ħdan il-linji sottoimplimentati ta’ – fost l-oħrajn – FP7, TEN-T, Marco Polo, Progress, il-programm statistiku, id-Dwana u Fiscalis; huwa determinat li janalizza bir-reqqa l-prestazzjoni f’kull wieħed minn dawn il-programmi biex jivverifika kemm huma f’lokhom it-tnaqqisiet proposti u jeskludi impatti negattivi fuq il-programmi kkonċernati;

20. Ifakkar fid-Dikjarazzjoni Konġunta tal-1 ta’ Diċembru 2011 dwar il-finanzjament tal-kosts addizzjonali tal-programm ITER għall-2012-2013, fejn il-Parlament, il-Kunsill u l-Kummissjoni jaqblu wkoll li fil-proċedura tal-Baġit 2013 jagħmlu disponibbli EUR 360 miljun f’AI “b'użu sħiħ tad-dispożizzjonijiet stabbiliti fir-Regolament Finanzjarju u fl-FII tas-17 ta' Mejju 2006, bl-esklużjoni ta' kwalunkwe reviżjoni ulterjuri tal-QFM relata mal-ITER”; huwa mħasseb li l-Kummissjoni tipproponi li dan l-ammont addizzjonali tiffinanzjah biss permezz ta’ riallokazzjoni mil-linji tal-programm FP7, kontra l-pożizzjoni li l-Parlament ilu jħaddan dwar din il-kwistjoni; jieħu kont bis-sħiħ tal-asserzjoni tal-Kummisjsoni li dan l-ammont joħroġ minn iffrankar fil-prestazzjoni tal-FP7, u li dawk it-tnaqqisiet fil-linji amministrattivi mhumiex se jagħmlu ħsara lill-operat tal-programm; biħsiebu jeżamina din l-asserzjoni aktar, kif ukoll jesplora mezzi oħra disponibbli skont l-FII u r-Regolament Finanzjarju għal dan il-għan;

21. Jenfasizza l-ħtieġa għal livell adegwat ta’ persunal għall-Enerġija tal-Fużjoni (F4E), l-Impriża Konġunta Ewropea għall-ITER, sabiex tiġi żgurata ġestjoni bir-reqqa u l-implimentazzjoni tajba tal-kontribut tal-UE għall-proġett tal-ITER; huwa mħasseb dwar il-livell attwali tal-persunal kif propost mill-Kummissjoni;

22. Jirrikonoxxi r-rwol fundamentali tal-SMEs bħala l-muturi tal-ekonomija tal-EU u l-ħallieqa ta’ 85 % tal-impjiegi ġġenerati f’dawn l-aħħar għaxar snin; ifakkar fid-diffikultajiet tradizzjonalment iffaċċjati mill-SMEs biex jiksbu aċċess għas-swieq finanzjarji għal proġetti ta’ riċerka u inovazzjoni, diffikultajiet li l-kriżi finanzjarja attwali issa kompliet tkabbarhom; huwa konvint li l-baġit tal-UE għandu jikkontribwixxi biex jegħleb dan il-falliment tas-suq, billi jiffaċilita l-aċċess ta’ SMEs innovattivi għad-dejn u għall-finanzjament azzjonarju u jilqa’ l-proposta riċenti tal-Kummissjoni li tinħoloq sezzjoni speċjali għall-SMEs taħt l-RSFF eżistenti; jappoġġa, barra minn hekk, iż-żieda proposta għall-istrumenti finanzjarji taħt il-programm CIP-EIP (b’EUR 14.7 miljun), bi qbil mal-prestazzjoni pożittiva tagħhom sal-lum u d-domanda akbar mill-SMEs;

23. Jiddispjaċih ħafna li, fi żminijiet ta’ kriżi ekonomika u speċjalment ta’ rata għolja ta’ qgħad fost iż-żgħażagħ l-approprjazzjonijiet għall-programm PROGRESS tnaqqsu b’EUR 5.3 miljun meta mqabbla mal-ipprogrammar finanzjarju, biex b'hekk prattikament treġġgħu lura għal-livelli tal-2012, minkejja l-prestazzjoni tajba ta’ dan il-programm sal-lum, inklużi t-taqsimiet tiegħu dwar l-ugwaljanza bejn il-ġeneri u n-nondiskriminazzjoni; itenni l-konvinzjoni tiegħu li l-programmi soċjali tal-UE huma strumentali biex jintlaħqu l-miri soċjali u tal-impjiegi tal-istarteġija Ewropa 2020; jiddeplora l-fatt li l-Kummissjoni lanqas fl-aħħar sena tal-QFM kurrenti ma ħadet l-opportunità li treġġa’ f'dan il-programm is-EUR 60 miljun li kienu ġew riallokati favur il-Faċilità ta' Mikrofinanzjament Progress, kif kienet impenjat ruħha li tagħmel fl-2010;

24. Jilqa’ d-deċiżjoni tal-Kummissjoni li tinkludi fl-AB, għat-tielet sena konsekuttiva, approprjazzjonijiet ta’ pagament (EUR 50 miljun) għall-Fond Ewropew ta’ Aġġustament għall-Globalizzazzjoni (FEG); jenfasizza l-fatt li dan mhux biss jagħti viżibbiltà ogħla lill-fond iżda anke jevita trasferimenti minn linji tal-baġit oħra li jsegwu għanijiet differenti u jkopru ħtiġijiet differenti; jenfasizza, barra minn hekk, il-ħtieġa ta' aktar simplifikazzjoni tal-modalitajiet prattiċi tal-proċedura għall-mobilizzazzjoni ta' dan il-fond, speċjalment fil-kuntest tan-negozjati kontinwi dwar ir-regolament il-ġdid tal-FEG;

25. Jiddispjaċih li l-kontribuzzjoni għall-Inizjattiva Emblematika Żgħażagħ Mobbli hija daqsxejn imnaqqsa meta mqabbla mas-sena li għaddiet; jenfasizza, f’dan il-kuntest, il-valur miżjud tal-programmi Tagħlim tul il-Ħajja, Erasmus u Erasmus Mundus, li, fi sfond finanzjarju modest, iħallu redditu kbir f’termini ta' implimentazzjoni effikaċi u immaġni pożittiva tal-Unjoni vis-à-vis ċ-ċittadini tagħha; ifakkar li f’ħafna Stati Membri tal-UE, iż-żgħażagħ qed jiġu milquta b’mod sinifikanti mill-kriżi ekonomika u finanzjarja u li f’dan il-kuntest il-finanzjament adegwat u l-immirar ta’ skemi edukattivi u ta’ mobilità u programmi ta’ tagħlim tul il-ħajja huma sinifikanti fl-immodernizzar tas-sistemi tal-edukazzjoni u t-taħriġ u fiż-żieda tal-livelli tal-ħiliet, tal-mobilità u tal-adattabilità taż-żgħażagħ, biex b’hekk jingħata kontribut b'mod ġenerali għal Ewropa innovattiva, ibbażata fuq l-għarfien, intelliġenti u inklużiva; għal dan l-għan, jappoġġa b’mod qawwi l-promozzjoni ta’ opportunitajiet indaqs sabiex iż-żgħażagħ ikunu jistgħu jibbenefikaw mill-programmi u l-politiki varji għaż-żgħażagħ tal-UE, irrispettivament mill-isfond edukattiv tagħhom; huwa kontra, għaldaqstant, it-tnaqqis propost b’EUR 10.2 miljun meta mqabbel mal-baġit 2012 għall-Programm tat-Tagħlim tul il-Ħajja u, bi qbil mal-pożizzjoni stabbilita tiegħu fl-aħħar proċeduri baġitarji u r-rati eċċellenti ta’ prestazzjoni ta’ dan il-programm, biħsiebu jsaħħaħ l-approprjazzjonijiet ta’ impenn għal-linja tal-baġit korrispondenti;

26. Jenfasizza li l-programm TEN-T, permezz tal-investiment f’infrastrutturi b’valur miżjud Ewropej għoli, għandu rwol ċentrali fl-ilħiq tal-objettivi tal-Istrateġija Ewropa 2020; jikkunsidra dan il-programm bħala essenzjali sabiex tingħata spinta lill-kompetittività tal-UE kollha kemm hi, billi joħloq l-infrastruttura nieqsa u jelimina l-punti ta’ konġestjoni fis-suq intern; jenfasizza li l-proġetti tal-infrastruttura jagħtu wkoll kontribut dirett għat-tkabbir billi jistimulaw l-impjieg matul il-fażi tal-bini; jenfasizza r-rwol tal-programm TEN-T għall-issodisfar tal-għanijiet tal-adattament għat-tibdil fil-klima billi jiżgura s-sostenibbiltà tan-netwerks tat-trasport tal-UE fil-futur; jilqa’ l-proposta tal-Kummissjoni għal żieda b’madwar EUR 85 miljun meta mqabbel mal-baġit 2012, imma jitlob kjarifika ulterjuri dwar it-tnaqqis propost b’EUR 118 miljun meta mqabbel mal-ipprogrammar finanzjarju; ifakkar li l-programm ewlieni TEN-T ġie eżegwit għalkollox fl-2011, u jindika li ġudizzju finali dwar kif ġew implimentati u mħallsa l-impenji għall-proġetti fil-qafas finanzjarju tal-2007-2013 jista’ jsir biss fl-2017;

27. Jemmen li l-programm għall-appoġġ tal-iżvilupp ulterjuri ta' Politika Marittima Integrata jeħtieġ finanzjament adegwat għall-2013; jenfasizza d-diżappunt tiegħu dwar in-nuqqas ta' linja baġitarja dwar it-turiżmu, u jiddispjaċih għat-tnaqqis kostanti fl-allokazzjoni baġitarja għas-sigurtà fit-toroq;

28. Jisħaq fuq il-fatt li s-soluzzjonijiet innovattivi huma meħtieġa b'urġenza bil-għan li jiġu mobilizzati aktar il-fondi privati jew pubbliċi u titwessa' l-firxa ta' strumenti finanzjarji għad-dispożizzjoni tal-proġetti tal-infrastruttura; jappoġġa bis-sħiħ l-Inizjattiva pilota tal-Bonds tal-Proġetti bħala mezz biex tingħata spinta lill-kapaċità ta' investiment fil-qasam tat-trasport, tal-enerġija u tan-netwerks ICT tal-UE; jilqa' favorevolment il-fatt li l-abbozz tal-baġit jinkludi l-approprjazzjonijiet għall-fażi pilota anki jekk jiġu fil-fatt riallokati fi ħdan il-linji baġitarji rilevanti (CIP - TEN-T - TEN -E) kif miftiehem mill-awtorità leġiżlattiva;

29. Jiddeplora t-tnaqqis propost mill-Kummissjoni għall-Awtoritajiet Superviżorji Ewropej, meta mqabbel ma' dak li oriġinarjament kien previst fl-ipprogrammar finanzjarju, li jmorru kontra l-appell ripetut tal-Parlament biex jiġu ffinanzjati b'mod adegwat; iqis li l-livell attwali tal-approprjazzjonijiet mhuwiex biżżejjed biex dawk l-aġenziji jkunu jistgħu jaqdu l-kompiti tagħhom b'mod effiċjenti, notevolment ir-reklutaġġ ta' esperti bi kwalifiki għolja; jemmen li l-kompiti supplementari fdati lill-ASE għandhom ikunu kkomplementati minn valutazzjoni tal-kostijiet; jesprimi, għalhekk, l-intenzjoni tiegħu li l-approprjazzjonijiet jerġa' jġibhom tal-anqas għal-livell tal-2012, għall-Awtorità Bankarja Ewropea (ABE) u għall-Awtorità Ewropea tal-Assigurazzjoni u tal-Pensjonijiet tax-Xogħol (AEAPX), kif ukoll li jsaħħaħ aktar l-Awtorità Ewropea tat-Titoli u s-Swieq (AETS) fid-dawl tal-kompiti ġodda li nfdat bihom;

Intestatura 1b

30. Jinnota li l-AB 2013 jipprevedi żieda fl-AI ta' 3.3 % (għal EUR 54 498 miljun) meta mqabbel mal-baġit 2012, li minnhom EUR 42 144 miljun huma għall-Fondi Strutturali (FEŻR u FSE) u EUR 12 354 miljun għall-Fond ta' Koeżjoni; jenfasizza li t-tnaqqis fil-livell tal-impenji fl-AB għall-assistenza teknika meta mqabbel ma' dak li kien previst oriġinarjament fl-ipprogrammar finanzjarju wassal biex il-marġni jiżdied għal EUR 25 miljun meta mqabbel mal-previżjoni inizjali ta' EUR 0.4 miljun;

31. Jiddispjaċih għat-tnaqqis propost għall-assistenza teknika għall-istrateġiji makroreġjonali; itenni l-ħtieġa għal appoġġ kontinwu tekniku u amministrattiv għall-implimentazzjoni tal-istrateġiji kif ukoll għal kapital inizjali għal proġetti ġodda, kif indikat mir-rata għolja ta' implimentazzjoni fl-2011;

32. Jenfasizza li l-politika ta' koeżjoni ilha li wriet il-valur miżjud tagħha bħala strument neċessarju ta' investiment sabiex jinġieb it-tkabbir u l-ħolqien tal-impjiegi b'mod effikaċi billi jiġu indirizzati b'mod eżatt il-ħtiġijiet ta' investiment tar-reġjuni, u għaldaqstant jikkontribwixxi mhux biss għat-tnaqqis fid-disparitajiet bejniethom, iżda anke għall-irkupru ekonomiku u għall-iżvilupp tal-Unjoni kollha kemm hi; jikkunsidra wkoll il-Fondi Strutturali bħala strument kruċjali – fid-dawl kemm tad-daqs finanzjarju tagħhom kif ukoll tal-objettivi li jridu jintlaħqu – biex jitħaffef l-irkupru ekonomiku fl-UE u jintlaħqu l-objettivi rigward it-tkabbir u l-impjiegi minquxa fl-Istrateġija Ewropa 2020; jilqa', għalhekk, l-inizjattiva tal-Kummissjoni ta' riprogrammar fejn possibbli ta' EUR 82 biljun ta' Fondi Strutturali mhux allokati f'xi Stati Membri favur l-SMEs u l-impjiegi għaż-żgħażagħ, skont il-prijoritajiet tal-Parlament għall-2013; jinnota li, skont il-Kummissjoni, EUR 7.3 biljun f'finanzjament tal-UE ġie mmirat f'dan il-kuntest għal twassil jew riallokazzjoni aċċelerat; jitlob li jinżamm infurmat kif xieraq dwar l-implimentazzjoni ta' din l-inizjattiva fil-livell nazzjonali, l-impatt mistenni tagħha fuq it-tkabbir u l-impjiegi, u l-impatt possibbli tagħha fuq il-baġit 2013;

33. Huwa mħasseb ferm dwar is-sitwazzjoni tal-pagamenti tal-proġetti ta' koeżjoni fl-ambitu ta' din l-Intestatura, u jinnota li żewġ terzi mil-livell totali ta' impenji pendenti (RAL) fi tmiem l-2011 (jiġifieri EUR 135.8 biljun) jiriflettu l-proġetti mhux imħallsa fl-ambitu tal-politika ta' koeżjoni; ifakkar li fi tmiem l-2011 il-Kummissjoni ma setgħetx tirrimborża madwar EUR 11 biljun korrispondenti għal talbiet leġittimi għal pagament imressqa mill-benefiċjarji tal-proġetti minħabba l-livell insuffiċjenti ta' approprjazzjonijiet ta' pagament previsti fil-baġit; josserva li dan wassal għal sitwazzjoni ta' xogħol konsiderevoli b'lura ta' pagamenti, li jkollha tiġi indirizzata permezz tad-disponibbiltà ta' approprjazzjonijiet suffiċjenti ta' pagament fl-2012; jirrimarka b'fermezza li mhuwiex se jaċċetta li din is-sitwazzjoni terġa' sseħħ fl-2013;

34. Ifakkar, f'dan il-kuntest, li l-2013 hija l-aħħar sena tal-MFF attwali, bl-implimentazzjoni tal-proġetti kofinanzjati tkun għaddejja b'ritmu mgħaġġel ħafna u mistennija li tkun aktar mgħaġġla u l-biċċa l-kbira tat-talbiet għal pagament mistennija tasal għand il-Kummissjoni fit-tieni semestru; jistieden lill-Kunsill u lill-Kummissjoni janalizzaw u jivvalutaw immedjatament, flimkien mal-Parlament, iċ-ċifri u r-rekwiżiti bil-għan li l-implimentazzjoni għall-2013 ma tkunx kompromessa; jindika li nuqqas ta' approprjazzjonijiet ta' pagament jista' jipperikola l-programmi li attwalment qed jiffunzjonaw sew; jenfasizza, barra minn hekk, li l-2013 se tkun is-sena meta, minħabba li r-regola N+3 ma tibqax tgħodd, it-talbiet għal pagament imressqa minn 12-il Stat Membru jkollhom jiġu ppreżentati għal żewġ segmenti annwali ta' impenji (2010 u 2011 skont ir-regola N+3 u N+2, rispettivament); għalhekk, iqis bħala minima ż-żieda proposta fl-approprjazzjonijiet ta' pagament bi 11.7 % (għal EUR 48 975 miljun) meta mqabbel mas-sena li għaddiet billi, kif imsemmi mill-Kummissjoni, tirrigwarda strettament l-2013 u tassumi li l-ħtiġijiet ta' pagament minn snin preċedenti jkunu ġew koperti;

35. Iqis din iż-żieda fil-pagamenti biss bħala l-ewwel pass biex jiġu koperti l-ħtiġijiet attwali tal-proġetti li għaddejjin bħalissa, u jtenni l-preokkupazzjoni tiegħu fir-rigward ta' skarsezza possibbli ta' fondi fil-qasam tal-politika ta' koeżjoni; jitlob lill-Kunsill u lill-Kummissjoni jevalwaw b'attenzjoni l-ħtiġijiet reali f'termini ta' pagamenti għall-2013 taħt l-Intestatura 1b, u biex ma jagħmlux tnaqqis li mhuwiex realistiku u ma jiħdux deċiżjonjiet li jmorru kontra l-previżjonijiet provduti mill-Istati Membri stess u użati bħala bażi għall-abbozz ta' baġit tal-Kummissjoni; għalhekk se jopponi kull tnaqqis possibbli fil-livell ta' pagamenti meta mqabbel mal-proposta inkluża fl-AB 2013;

36. Jistieden ukoll lill-Kunsill u lill-Kummissjoni biex, f'każ li l-approprjazzjonijiet ta' impenn ma jkunux biżżejjed biex ikopru l-ħtiġijiet reali matul din is-sena, jippreżentaw u jadottaw fi żmien debitu baġit emendatorju, biex b'hekk jiġi sodisfatt l-impenn konġunt li sar fid-dikjarazzjoni interistituzzjonali ta' Diċembru 2011;

Intestatura 2

37. Jinnota li l-AB 2013 jipproponi li l-AI jiżdiedu b'0.6 % (għal EUR 60 307 miljun) u li l-AP jiżdiedu b'1.6 % (għal EUR 57 964 miljun) meta mqabbel mal-baġit 2012; jissottolinja li dawn il-livelli għadhom anqas miż-żieda proposta mill-Kummissjoni għall-baġit kollu kemm hu; jirrimarka li dawn iż-żidiet huma parzjalment il-konsegwenza tad-dħul gradwali kontinwu ta' pagamenti diretti lill-Istati Membri l-ġodda u l-ħtiġijiet addizzjonali għal proġetti għall-iżvilupp rurali; jenfasizza li l-fondi proposti għal interventi fis-suq huma EUR 419 miljun anqas għall-2013 meta mqabbel mal-baġit 2012;

38. Jinnota li l-marġni mbassar ta' EUR 809 miljun għas-subintestatura tan-nefqa relatata mas-suq u l-għajnuniet diretti taħt l-Intestatura 2 jirrappreżenta żieda sinifikanti meta mqabbel mal-2012, li, skont il-Kummissjoni, huwa fil-parti l-kbira r-riżultat ta' effett ta' darba wara t-tmiem tal-Fond għar-Ristrutturar tal-Industrija taz-Zokkor; jesprimi s-sodisfazzjon tiegħu li dan il-marġni jfisser li l-mekkaniżmu tad-dixxiplina finanzjarja mhux se jiġi applikat fl-2013; jenfasizza li jinħtieġ marġni suffiċjenti taħt din l-intestatura biex itaffi kwalunkwe kriżi potenzjali li sseħħ fis-settur agrikolu, kif kien il-każ fis-snin reċenti waqt il-kriżi tal-EHEC;

39. Jenfasizza li l-2013 hija l-aħħar sena tal-perjodu ta' programmazzjoni attwali u għalhekk irid jiġi żgurat livell xieraq ta' approprjazzjonijiet ta' pagament taħt l-Intestatura 2 sabiex jiġu koperti, b'mod partikolari, il-ħtiġijiet tal-proġetti għall-iżvilupp rurali u tal-proġett LIFE+ attwali;

40. Jirrimarka li l-Intestatura 2 hija strumentali għall-ilħuq tal-objettivi tat-tkabbir sostenibbli u l-impjiegi tal-Istrateġija Ewropa 2020, b'mod partikolari permezz tal-programmi tagħha għall-iżvilupp rurali; jenfasizza l-ħtieġa li jiġu appoġġati l-SMEs fiż-żoni rurali, billi huma dawn li l-aktar joħolqu impjiegi, b'mod partikolari fost iż-żgħażagħ; jilqa', f'dan ir-rigward, iż-żieda proposta ta' AI b'1.3 % (għal EUR 14 808 miljun) għall-iżvilupp rurali;

41. Jinnota li l-approprjazzjonijiet għall-Intestatura 2 huma anqas mill-ħtiġijiet stmati, billi li huwa stmat li d-dħul allokat għall-FAEG huwa ogħla fl-2013 (EUR 1 332.8 miljun) milli fl-2012 (EUR 1 010 miljun); jinnota li din id-differenza toriġina mill-bilanċ li jifdal tal-Fond Temporanju għar-Ristrutturar tal-Industrija taz-Zokkor (EUR 647.8 miljun), filwaqt li huwa mistenni li d-dħul allokat mid-deċiżjonijiet dwar l-approvazzjoni tal-kontijiet ikun anqas minn dak fl-2012 (EUR 400 miljun fl-abbozz ta' baġit 2013 meta mqabbel ma' EUR 600 miljun fil-baġit 2012); ifakkar li aġġustament tal-istimi attwali abbażi tal-ħtiġijiet effettivi se jsir fil-ħarifa permezz tal-ittra emendatorja rigward l-agrikoltura;

42. Ifakkar li l-volatilità tal-prezzijiet f'dan is-settur hija preokkupazzjoni kbira u japprova miżuri biex tiġi miġġielda l-ispekulazzjoni f'komoditajiet agrikoli; iħeġġeġ lill-Kunsill u lill-Kummissjoni jimmonitorjaw b'attenzjoni l-iżviluppi fis-swieq agrikoli; f'dan il-kuntest, ifakkar lill-Kummissjoni bl-appell li għamel il-Parlament – li sal-lum l-ebda azzjoni ma ttieħdet – għall-ħolqien ta' 'osservatorju tal-marġnijiet u tal-prezzijiet', li jkun jagħmilha possibbli li tiniseb komparabbiltà tal-prezzijiet u aħjar u aktar trasparenza fl-iffissar tal-prezzijiet tal-ikel;

43. Jinnota li ż-żieda proposta fl-għajnuniet diretti hija prinċipalment dovuta għall-introduzzjoni gradwali kontinwa ta' pagamenti diretti fl-UE-12, li joħloq ħtieġa baġitarja addizzjonali ta' EUR 860 miljun fl-2013, filwaqt li n-nefqa fuq l-interventi fis-suq mistennija tonqos minħabba dħul assenjat ogħla u sitwazzjoni favorevoli tas-suq għall-maġġoranza tas-setturi;

44. Jinnota li l-ammonti assenjati lil ċerti linji baġitarji, inkluż il-programm tal-ħalib fl-iskejjel, tnaqqsu b'mod sinifikanti, u jitlob lill-Kummissjoni tagħti lill-Parlament ġustifikazzjoni għal dan;

45. Jisħaq fuq il-fatt li l-politiki tal-UE u l-baġit tal-UE huma elementi fundamentali biex jinlaħqu l-objettivi tal-istrateġija Ewropa 2020; jemmen f'dan il-kuntest li l-azzjoni klimatika u l-objettivi ambjentali għandhom natura trasversali u jridu jissarrfu f'miżuri konkreti implimentati fl-ambitu ta' diversi programmi u politiki tal-UE, bil-għan li jingħata kontribut sostanzjali lit-tkabbir sostenibbli u jiġu indirizzati b'mod effikaċi l-isfidi bħall-iskarsezza tar-riżorsi u t-tibdil fil-klima;

46. Jinnota ż-żieda żgħira proposta fl-AI – bi 3.3 % għal EUR 366.6 miljun – għal LIFE+, iżda jiddispjaċih li l-approprjazzjoni hija EUR 10.55 miljun inqas mil-livell tal-ipprogrammar finanzjarju ta' Jannar 2012; se janalizza, f'dan ir-rigward, id-dispożizzjonijiet kollha kif iddikjarati fil-paragrafu 37 tal-Ftehim Interistituzzjonali;

47. Jilqa' pożittivament l-ammonti proposti mill-Kummissjoni għall-programm ta' distribuzzjoni tal-ikel għall-persuni l-aktar foqra; jistieden lill-Kunsill jirrispetta d-deċiżjoni konġunta li ttieħdet fit-tmiem tal-2011 dwar iż-żamma tal-finanzjament għal dan il-programm għall-2012 u l-2013;

48. Jiddispjaċih bis-sussidji kontiwni għall-produzzjoni tat-tabakk fl-UE, li jmorru kontra l-objettivi tal-politika tas-saħħa tal-Unjoni;

49. Iqis li huwa importanti li jinżamm l-appoġġ finanzjarju għall-politika komuni tas-sajd (PKS) minħabba r-riforma imminenti tagħha; jenfasizza, b'mod partikolari, il-ħtieġa li jiġu appoġġati l-SMEs fis-settur tas-sajd u l-promozzjoni tal-aċċess għall-impjiegi għaż-żgħażagħ f'dan il-qasam, filwaqt li tiġi garantita n-natura sostenibbli tal-PKS, kif ukoll il-bżonn ta' promozzjoni ta' miżuri li jiżguraw il-fattibbiltà soċjali, ekonomika u ambjentali tas-settur; jilqa', f'dan ir-rigward, iż-żieda proposta għall-Fond Ewropew għas-Sajd bi 2.2 % (għal EUR 687.2 miljun) f'AI u b'7.3 % (għal EUR 523.5 miljun) f'AP rispettivament, meta mqabbel mal-baġit 2012; jiddispjaċih, madankollu, bit-tnaqqis proposta fil-qasam tal-governanza tal-PKS, il-konservazzjoni, il-ġestjoni u l-isfruttament tar-riżorsi tas-sajd, u l-monitoraġġ u l-infurzar tal-PKS;

Intestatura 3a

50. Jinnota li ż-żieda globali fil-finanzjament proposta fl-AB 2013 – EUR 1 392.2 miljun u EUR 928.3 miljun f'impenji u pagamenti rispettivament – meta mqabbel mal-baġit 2012 għal azzjonijiet inklużi taħt din l-Intestatura hija ta' 1.8 % (b'EUR 24.42 miljun) f'AI u 11.1 % f'AP; iqis li dan huwa konformi mal-ambizzjonijiet li qed jikbru tal-UE fil-qasam tal-libertà, tas-sigurtà u tal-ġustizzja;

51. Jenfasizza l-ħtieġa li jissaħħu l-approprjazzjonijiet għaċ-ċibersigurtà fis-settur tal-IT, minħabba l-ħsara enormi li l-attività kriminali li qed tiżdied f'dan il-qasam qed tikkawża lill-ekonomiji tal-Istati Membri; jinsisti li spinta lill-ġlieda kontra ċ-ċiberkriminalità fil-livell tal-Unjoni permezz taċ-Ċentru Ewropew taċ-Ċiberkriminalità se tirrikjedi finanzjament adegwat u għalhekk jiddeplora t-tnaqqis propost mill-Kummissjoni għall-Europol, minħabba li l-kompiti taċ-Ċentru kif identifikati mill-Kummissjoni ma jistgħux jitwettqu bir-riżorsi umani u finanzjarji attwali tal-Europol; jinnota li, għall-kuntrarju tal-ipprogrammar finanzjarju, tnaqqis ta' EUR 64.4 miljun huwa proposta għall-programm għall-Prevenzjoni tal-Kriminalità u l-Ġlieda kontriha, meta mqabbel mal-baġit 2012, għalkemm dan il-programm kien ġie maħsub biex ikopri wkoll iċ-ċiberkriminalità u l-użu illeċitu tal-internet;

52. Jappella għal sostenn kontinwu għall-FRONTEX, kif ukoll għad-diversi aġenziji maħluqa reċentement taħt din l-intestatura (partikolarment l-Uffiċċju Ewropew ta' Appoġġ fil-Qasam tal-Asil u l-aġenzija għas-sistemi tal-IT fuq skala kbira; jinnota t-tnaqqis ta' 8.9 % (-EUR 7.3 miljun) għall-kontribuzzjoni lill-Uffiċċju Ewropew tal-Pulizija (Europol) meta mqabbel mal-baġit 2012, u jistenna li l-Kummissjoni tagħti informazzjoni addizzjonali dwar dan it-tnaqqis propost;

53. Jinnota li t-tnaqqis ta' EUR 30 miljun għall-programm VIS u t-terminazzjoni ta' EURODAC (-EUR 0.5 miljun) se jkun ikkumpensat bit-trasferiment ta' dawn il-kompiti u l-approprjazzjonijiet baġitarji korrispondenti lill-aġenzija l-ġdida għall-ġestjoni operattiva ta' sistemi tal-IT fuq skala kbira;

54. Jinnota ż-żieda sinifikanti f'impenji u l-livell komparattivament baxx ta' pagamenti għal SIS II; jinnota li, skont l-iskeda globali għal SIS II, fl-2013 l-iżvilupp u l-migrazzjoni tagħha għandhom jitlestew u l-Aġenzija tal-IT se tieħu f'idejha l-ġestjoni tas-sistema; jikkritika, għalhekk, iż-żieda sinifikanti fil-baġit lil hinn mill-ippjanar finanzjarju oriġinali tiegħu fi stadju daqshekk tard qabel tibda topera s-SIS II; jirrakkomanda li tinżamm f'riżerva parti sostanzjali tal-baġit għal SIS II sakemm ikunu ġew iġġustifikati l-progress operattiv u l-konformità mal-ippjanar finanzjarju;

55. Japprezza ż-żieda b'EUR 9.8 miljun meta mqabbel mal-baġit 2012 li ġiet proposta mill-Kummissjoni għall-Fond Ewropew għar-Rifuġjati, li hija koerenti mad-deċiżjonijiet meħuda fis-snin li għaddew u l-implimentazzjoni ta' bħalissa ta' Sistema Ewropea Komuni tal-Asil; jieħu nota taż-żieda ta' 19 % tal-allokazzjoni baġitarja tal-Fond għall-Fruntieri Esterni, li tammonta għal EUR 415.5 miljun, ekwivalenti għan-nofs ta' dik prevista mill-ipprogrammar finanzjarju; ifakkar fit-talba b'saħħitha tiegħu għal reazzjoni xierqa u ekwilibrata għall-isfidi, bl-għan tal-ġestjoni tal-migrazzjoni legali u tat-tnaqqis tal-migrazzjoni illegali;

56. Jenfasizza li l-miżuri mmirati lejn il-ġlieda kontra l-vjolenza tal-ġeneru jridu jkunu ffinanzjati suffiċjentement; jenfasizza r-rwol importanti li żvolġa l-programm tal-prevenzjoni u l-ġlieda tal-forom kollha ta' vjolenza (DAPHNE) fl-eliminazzjoni tal-vjolenza fuq in-nisa u l-bniet fl-UE, u jisħaq fuq l-importanza ta' żieda fil-finanzjament xieraq għall-programm fl-2013;

Intestatura 3b

57. Ifakkar li l-Intestatura 3b, għalkemm hija l-iżgħar intestatura tal-MFF f'termini ta' allokazzjoni finanzjarja, tkopri kwistjonijiet ta' interess fundamentali għaċ-ċittadini tal-Ewropa, bħall-programmi edukattivi, kulturali u għaż-żgħażagħ, is-saħħa pubblika, il-ħarsien tal-konsumatur, l-istrument ta' protezzjoni ċivili u l-politika tal-komunikazzjoni; jiddeplora, għalhekk, il-fatt li għal darb'oħra fl-2013 l-approprjazzjonijiet ġenerali taħt din l-Intestatura jitnaqqsu, meta mqabbla mal-baġit 2012, bi tnaqqis fl-AI ta' 1.2 % (EUR 26.08 miljun) u fl-AP ta' 0.4 %, bl-esklużjoni tal-Fond ta' Solidarjetà;

58. Jilqa' pożittivament, abbażi tal-implimentazzjoni soda tiegħu fis-snin preċedenti, iż-żieda tal-finanzjament fl-2013 għall-programm "Żgħażagħ fl-Azzjoni" (għal EUR 140.45 miljun), li tirrappreżenta żieda ta' EUR 0.8 miljun meta mqabbel mal-baġit 2012 u ta' EUR 16.5 miljun meta mqabbla mal-ipprogrammar finanzjarju;

59. Japprezza ż-żidiet f'approprjazzjonijiet meta mqabbel mal-baġit 2012 għall-programm "Kultura" (+1.4 %), "Media 2007" (+1.1 %) u l-azzjoni tal-Unjoni fil-qasam tas-saħħa (+3.1 %), iżda jiddispjaċih bit-tnaqqis tal-approprjazzjonijiet meta mqabbel mal-baġit 2012 għall-programm "L-Ewropa għaċ-Ċittadini" – speċjalment matul is-Sena Ewropea taċ-Ċittadini – kif ukoll l-azzjoni tal-Unjoni fil-qasam tal-politika tal-konsumatur u l-programm "Media Mundus";

60. Jiddispjaċih għall-volum imnaqqas ta' impenji għal azzjonijiet ta' komunikazzjoni meta mqabbel mal-baġit 2012, fi żmien meta d-distakk bejn l-Unjoni Ewropea u ċ-ċittadini tagħha huwa aktar evidenti minn qatt qabel, kif jidher mill-għadd dejjem jonqos ta' votanti fl-elezzjonijiet Ewropej; huwa konvint mill-ħtieġa ta' sforzi msaħħa ta' komunikazzjoni u ta' finanzjament proporzjonat biex tiġi żgurata l-viżibbiltà tal-istituzzjonijiet tal-Unjoni u biex jintwera l-kontribut tagħhom biex tingħeleb il-kriżi ekonomika u finanzjarja;

61. Jissottolinja l-fatt li għal darb'oħra din is-sena jibqa' biss marġni limitat ħafna disponibbli (EUR 25.6 miljun) taħt din l-Intestatura, u dan iħalli possibbiltà ċkejkna ta' manuvra jekk jinħtieġu azzjonijiet jew deċiżjonijiet ġodda dwar il-prijoritajiet ta' finanzjament direttament rilevanti għaċ-ċittadini;

Intestatura 4

62. Jinnota li l-approprjazzjonijiet ta' impenn u ta' pagament ippreżentati fl-AB 2013 jirrappreżentaw żieda ta' 0.7 % u 5.1 % meta mqabbel mal-baġit 2012, għal EUR 9 467.2 miljun u EUR 7 311.6 miljun rispettivament; jirrimarka li dawn iż-żidiet għadhom iktar baxxi minn dawk proposti mill-Kummissjoni għall-baġit in ġenerali;

63. Ifakkar fil-ħtieġa għal koordinazzjoni aktar mill-qrib u koerenza tal-isforzi fil-finanzjament tal-azzjonijiet esterni mill-Unjoni u l-Istati Membri biex jiġu evitati t-trikkib u d-duplikazzjoni ta' riżorsi skarsi; jissottolinja l-ħtieġa li jitħeġġu l-kooperazzjoni u s-sinkronizzazzjoni tal-azzjonijiet ma' donaturi internazzjonali, lokali u reġjonali oħra sabiex il-fondi jintużaw bl-aħjar mod possibbli u jinħolqu sinerġiji; jemmen li fi żminijiet ta' diffikultà ekonomika huwa importanti wkoll li tittejjeb il-flessibbiltà fl-ipprogrammar u l-implimentazzjoni tal-istrumenti kif ukoll li r-riżorsi skarsi jiġu kkomplementati bi strumenti b'effetti ta' lieva li jippermettu l-użu u l-użu mill-ġdid ta' fondi investiti u ġġenerati;

64. Jinnota ż-żieda sinifikanti ta' EUR 272.3 miljun fil-marġni propost għall-Intestatura 4 meta mqabbel mal-ipprogrammar finanzjarju għall-2013 (minn EUR 119.6 miljun għal EUR 391.9 miljun), li hija l-effett nett taż-żieda f'impenji għall-ENPI (rinfurzati b'EUR 51.7 miljun), l-ICI u l-ICI+ (EUR 0.3 miljun aktar mill-ipprogrammar finanzjarju) u tat-tnaqqis fit-tkabbir tal-impenji għall-Fond ta' Garanzija (-EUR 104.5 miljun), l-Istrument għall-Assistenza ta' Qabel l-Adeżjoni (-EUR 99.3 miljun), l-assistena makrofinanzjarja (-EUR 37.4 miljun), l-Istrument ta' Kooperazzjoni għall-Iżvilupp (-EUR 28.6 miljun) u l-Istrument għall-Istabbiltà (-EUR 41.4 miljun); jitlob lill-Kummissjoni sabiex tipprovdi biżżejjed spjegazzjonijiet dwar għaliex kien meħtieġ ridimensjonament daqshekk sinifikanti ta' wħud mill-programmi meta mqabbel mal-ipprogrammar finanzjarju; jenfasizza li filwaqt li jista’ jaqbel mal-prinċipju ta' ridimensjonament tal-programmi li mhumiex implimentati sew jekk dan iwassal għall-iffrankar tal-enerġija, it-tnaqqis fl-approprjazzjonijiet m'għandux ikun trasversali; iwissi dwar il-fatt li l-użu ta' marġni artifiċjalment għoli bħal għodda ta' negozjar fil-proċedura baġitarja ma jistax jitqies bħala prassi baġitarja tajba;

65. Jiddispjaċih b’mod partikolari dwar it-tnaqqis kontinwu ta’ approprjazzjonijiet fil-qasam tal-kooperazzjoni tal-iżvilupp; jistaqsi kif dan huwa kompatibbli mal-impenji internazzjonali tal-UE sabiex talloka, sal-2015, 0,7 % tal-PNG għall-Għanijiet ta' Żvilupp tal-Millennju; jiddispjaċih dwar il-fatt li l-livell totali ta’ impenji skont l-Istrument ta' finanzjament tal-Kooperazzjoni għall-Iżvilupp (DCI), kif propost fl-AB 2013, jirrappreżenta tnaqqis ta' inqas mir-rata ta’ inflazzjoni prevista u li l-livell propost ta’ pagamenti totali tad-DCI huwa anqas minn dak tal-2012; jitlob lill-Kummissjoni tiżgura approċċ iktar koerenti, realistiku u ppjanat aħjar għall-finanzjament tad-DCI;

66. Jieħu nota tal-proposta li jiżdiedu l-approprjazzjonijiet taħt l-Istrument Ewropew ta' Viċinat, li jindirizza l-bżonnijiet ta’ pajjiżi li jħabbtu wiċċhom ma’ bidliet politiċi u ekonomiċi ewlenin; jilqa' l-iffukar fuq is-Sħubija tal-Lvant, u jerġa' jafferma l-appoġġ tiegħu għall-pajjiżi li flimkien jagħmlu l-komponent tan-Nofsinhar tagħha peress li jaffaċċjaw sfidi ta' proporzjonijiet storiċi wara r-Rebbiegħa Għarbija; iqis ir-rappurtar tal-Kummissjoni dwar l-applikazzjoni tal-prinċipju "aktar għal aktar" bħala insuffiċjenti, u jistedinha tiżviluppa kriterji ċari għal kif għandu jiġi applikat;

67. Iqis li livell suffiċjenti ta' assistenza finanzjarja tal-UE lill-Awtorità Palestinjana u lill-UNRWA għadu meħtieġ sabiex ikun hemm reazzjoni adegwata u komprensiva għas-sitwazzjoni politika u umanitarja fil-Lvant Nofsani u għall-proċess ta' paċi; jenfasizza s-sitwazzjoni partikolarment diffiċli ffaċċjata bħalissa mill-UNWRA, notevolment wara l-avvenimenti fis-Sirja; jinnota li l-effett nett taż-żieda fl-impenji għall-ENPI huwa prinċipalment dovut għall-fatt li jinżamm l-appoġġ għat-territorji okkupati tal-Palestina fil-livell tal-abbozz ta’ baġit tal-2012;

68. Jenfasizza li, grazzi għall-impenn qawwi tal-Parlament, il-kontribuzzjoni annwali tal-UE lill-Awtorità Palestinjana, lill-UNRWA u lill-proċess ta’ paċi tal-Lvant Nofsani matul l-aħħar snin tammonta għal EUR 300 miljun, u jfakkar li l-awtorità baġitarja, matul il-fażi tal-konċiljazzjoni baġitarja, qablet dwar allokazzjoni ta’ EUR 200 miljun għas-sena 2012, bil-kundizzjoni li jkun hemm żieda supplimentari sine qua non ta’ EUR 100 miljun għas-sena finanzjarja 2011 li tiġi minn approprjazzjonijiet mhux użati; jitlob li jkun hemm impenn ta' finanzjament li jirrifletti l-ħtiġijiet reali mill-bidu tas-sena baġitarja biex jiġi żgurat li l-UE tkun tista' tappoġġa b'mod effikaċi l-bini ta' paċi sostenibbli; jinsisti li għandhom jiġu imposti kontrolli finanzjarji stretti u li għandhom jintbagħtu analiżi u valutazzjoni dettaljati tal-infiq lill-Parlament Ewropew;

69. Jirrikonoxxi l-fatt li bl-adeżjoni tal-Kroazja mal-Unjoni, l-allokazzjonijiet għall-IPA jonqsu b'EUR 67.6 miljun; madankollu, huwa preokkupat li l-Kummissjoni qed tipproponi tnaqqis akbar fl-appoġġ għall-bini ta' kapaċitajiet istituzzjonali għall-pajjiżi kandidati milli mistenni bit-tnaqqis ta’ allokazzjonijiet għall-IPA għall-Kroazja (total ta’ -EUR 29.14 miljun meta mqabbel mal-2012), filwaqt li l-istess linja għal kandidati potenzjali ġiet rinfurzata (+EUR10.5 miljun meta mqabbel mal-2012); ifakkar li l-kapaċità istituzzjonali hija ta' importanza fundamentali għall-użu korrett tal-finanzjament tal-Unjoni u hija ugwalment importanti kemm għall-kandidati kif ukoll għall-kandidati potenzjali; jilqa’ li ż-żieda proposta f'AI għall-iżvilupp rurali tal-IPA hija ta' 10.2 % meta mqabbel mal-baġit għall-2012;

70. Itenni l-fatt li speċjalment fi żminijiet ta' awsterità, l-approprjazzjonijiet ta' impenn għandhom jiġu ppjanati b'attenzjoni għal kull linja baġitarja tal-PESK sabiex jiġi ggarantit li l-flus tal-UE jiġu allokati għall-miżuri l-aktar meħtieġa, filwaqt li jitqiesu kemm jista' jkun il-flessibbiltà u imprevedibbiltà tal-operazzjonijiet tal-PESK; f’dan ir-rigward, jilqa’ talbiet għal sinerġiji akbar permezz ta’, fost l-oħrajn, il-ġbir flimkien, il-kondiviżjoni u l-integrazzjoni ta’ kapaċitajiet u permezz tal-prestazzjoni mtejba, l-ippjanar u t-twettiq ta’ missjonijiet u operazzjonijiet; jilqa’ sforzi għal ħarsa ġenerali trasparenti u kompluta tal-missjonijiet kollha tal-PESK; se janalizza b'attenzjoni ż-żieda ta' 9.2 % f'AI għall-PESK fl-2013;

71. Jirrikonoxxi l-ħtieġa ta' reazzjoni għat-theddid transreġjonali fl-oqsma tal-kriminalità organizzata, tat-traffikar, tal-protezzjoni tal-infrastruttura kritika, tat-theddid għas-saħħa pubblika u tal-ġlieda kontra t-terroriżmu; madankollu, jistieden lill-Kummissjoni tipprovdi provi li jiġġustifikaw għaliex tinħtieġ żieda ta' 50 % għal dawn il-miżuri fl-2013;

Intestatura 5

72. Jinnota li n-nefqa amministrattiva totali għall-istituzzjonijiet kollha hija stmata li hi EUR 8 544,4 miljun, ammont li jirrappreżenta żieda ta' 3.2 % meta mqabbel mal-2012 u li jħalli marġni ta' EUR 636.6 miljun, inkluża nefqa addizzjonali marbuta mal-adeżjoni tal-Kroazja;

73. Jirrikonoxxi li l-biċċa l-kbira tal-istituzzjonijiet, inkluż il-Parlament Ewropew, għamlu sforz sabiex jillimitaw il-baġits amministrattivi tagħhom għal żieda taħt ir-rata tal-inflazzjoni mistennija, minbarra l-ispiża tat-tkabbir għall-Kroazja; f’dan ir-rigward, jenfasizza l-ħtieġa għar-razzjonalizzazzjoni ta’ riżorsi amministrattivi fuq perjodu ta’ żmien twil u jinisisti fuq il-ħtieġa li tissaħħaħ il-kooperazzjoni interistituzzjonali f’oqsma bħar-riżorsi umani, it-traduzzjoni, l-interpretazzjoni, il-bini, u t-teknoloġija tal-informatika;

74. Jenfasizza li ż-żieda ta’ 3.2% meta mqabbla mal-2012 hija primarjament dovuta għal obbligi statutarji jew kuntrattwali bħall-pensjonijiet jew l-aġġustamenti tas-salarji; jinnota madankollu li l-Kummissjoni kkonformat mal-impenn tagħha li żżomm iż-żieda nominali fl-approprjazzjonijiet amministrattivi tagħha fl-Intestatura 5 inqas mill-inflazzjoni prevista ta' 1.9 % meta mqabbel mal-2012, kif spjegat fl-ittra tat-23 ta' Jannar 2012 mill-Kummissarju għall-Baġit u l-Ipprogrammar Finanzjarju, u saħansitra marret lil hinn minn dan l-impenn;

75. Jifhem li dan intlaħaq diġà għall-2013 permezz ta' tnaqqis ta' iktar minn 1 % fin-numru ta' karigi fl-organigramma tal-Kummissjoni, notevolment fl-oqsma tal-appoġġ amministrattiv, il-ġestjoni baġitarja u l-ġlieda kontra l-frodi, kif ukoll permezz ta' aktar tnaqqis f'punti oħra ta' nefqa amministrattiva; jitlob spjegazzjoni ulterjuri dwar il-ħtieġa reali li wieħed jipproċedi bi tnaqqis bħal dan fil-persunal sabiex tiġi ffriżata n-nefqa amministrattiva f'termini reali, meta l-Kummissjoni rnexxielha tiffriża n-nefqa amministrattiva tagħha f'termini nominali fl-2012 mingħajr ma rrikorriet għal tnaqqis fil-persunal;

76. Jilqa' dan l-isforz favur konsolidament baġitarju fin-nefqa amministrattiva fi żmien ta' restrizzjonijiet ekonomiċi u baġitarji fil-livell nazzjonali; jirrikonoxxi l-ħtieġa li l-istituzzjonijiet kollha tal-UE jikkondividu l-isforzi ta’ din il-konsolidazzjoni; madankollu jinsab imħasseb dwar l-impatt negattiv li tali miżuri jista' jkollhom fuq l-implimentazzjoni rapida, regolari u effettiva tal-azzjonijiet u l-programmi tal-UE min-naħa ta' amministrazzjoni moderna, meta jitqies b'mod partikolari l-bżonn li jiġu ppremjati l-prestazzjoni u l-kwalità tas-servizz, billi jitqies l-ilħiq ta' bilanċ ġeografiku, speċjalment fi żmien meta l-kompetenzi tal-UE qed ikomplu jiżdiedu u Stati Membri ġodda jissieħbu fl-Unjoni; jilqa' l-informazzjoni mogħtija dwar dawk l-oqsma msaħħa f'termini ta' persunal, bħall-governanza ekonomika Ewropea, is-suq uniku u s-sigurtà u l-ġustizzja, iżda jitlob informazzjoni simili dwar dawk l-oqsma tal-politika u t-tipi ta' karigi fejn kien hemm tnaqqis fil-persunal meta mqabbel mal-2012;

77. Itenni f'dan l-isfond li kull tnaqqis bħal dan tal-persunal għandu jkun ibbażat fuq valutazzjoni tal-impatt preliminari u jikkunsidra bis-sħiħ, inter alia, l-obbligi legali tal-Unjoni, il-prijoritajiet tal-UE kif ukoll il-kompetenzi l-ġodda tal-istituzzjonijiet u ż-żieda fil-kompiti li ġejja mit-trattati; jenfasizza li din il-valutazzjoni għandha tqis b'attenzjoni l-effetti għad-Direttorati Ġenerali u s-servizzi differenti, notevolment meta jitqies id-daqs u l-ammont ta' xogħol tagħhom, kif ukoll l-effetti fuq it-tipi differenti ta' karigi kkonċernati kif ippreżentati fl-iskrining annwali tar-riżorsi umani tal-Kummissjoni (tfassil tal-politiki, ġestjoni tal-programmi, appoġġ amministrattiv, ġestjoni baġitarja u attivitajiet kontra l-frodi, servizzi lingwistiċi, eċċ.);

78. Jenfasizza li f'ħafna oqsma tal-azzjoni tal-UE, għandhom jiġu żgurati livelli suffiċjenti ta' persunal fid-dawl tal-istadju tal-implimentazzjoni tal-programmi, prijoritajiet ġodda u żviluppi oħrajn; għalhekk se jiskrutinizza b'attenzjoni l-evoluzzjoni globali tal-livelli tal-persunal fid-DĠ u s-servizzi differenti anke fid-dawl tal-prijoritajiet ippreżentati f'dan ir-rapport; minbarra l-provvista ta' aktar informazzjoni dettaljata f'dan ir-rigward, jitlob lill-Kummissjoni tipproċedi għal valutazzjoni dettaljata simili tal-impatt tat-tnaqqis trasversali propost fil-persunal, filwaqt li jitqies ukoll fuq perjodu itwal ta' żmien kwalunkwe tnaqqis ieħor fil-persunal tal-Kummissjoni, u tirrapporta lura lill-Parlament; jinsisti li din għandha tkun prerekwiżit sabiex l-awtorità baġitarja tikkunsidra li taċċetta, skont l-eżitu tagħha, it-tnaqqis ta' 1 % fil-persunal għall-2013;

79. Huwa tal-opinjoni li għad hemm mistoqsijiet dwar in-numru għoli ta’ pożizzjonijiet ta’ ġestjoni għoljin f’livelli ta’ grad għoli fost il-persunal tas-Servizz Ewropew għall-Azzjoni Esterna; għalhekk jitlob lill-SEAE sabiex jipprovdi informazzjoni addizzjonali b’mod partikolari fir-rigward taż-żieda sinifikanti (+9.2 %) f’postijiet ta' AD14 propost fl-abbozz ta’ baġit; bl-istess mod jitlob informazzjoni ulterjuri dwar iż-żidiet kbar f’approprjazzjonijiet proposti għas-sigurtà u s-sorveljanza tal-bini (+57.2 %);

80. Huwa konvint li l-prevenzjoni u l-medjazzjoni huma fost l-aktar mezzi kosteffikaċi sabiex jiġu ġestiti kunflitti billi jiġu evitati milli jeskalaw fi vjolenza; jilqa’ għalhekk il-proposta li tiġi introdotta intestatura tal-baġit li tammonta għal EUR 500 000 għal Servizzi ta’ Appoġġ għall-Prevenzjoni tal-Kunflitt u l-Medjazzjoni fil-baġit tal-SEAE, wara t-tlestija b’suċċess fl-aħħar ta’ din is-sena ta’ azzjoni preparatorja proposta mill-Parlament;

81. Huwa tal-opinjoni li l-Iskejjel Ewropej għandhom jiġu ffinanzjati b'mod xieraq sabiex tiġi indirizzata s-sitwazzjoni speċifika tat-tfal tal-impjegati tal-istituzzjonijiet tal-UE; jieħu nota tal-allokazzjoni globali proposta ta' 180.7 miljun, li tirrappreżenta żieda ta' 6.8 % meta mqabbel mal-2012, u aktar mill-ammonti tal-ipprogrammar finanzjarju; madankollu se jiskrutinizza b'attenzjoni kull waħda mil-linji baġitarji tal-Iskejjel Ewropej, u matul il-qari tiegħu, se jagħmel kwalunkwe modifika li jqis li tkun xierqa f'dan ir-rigward;

Proġetti pilota – azzjonijiet preparatorji

82. Jenfasizza l-importanza tal-proġetti pilota u l-azzjonijiet preparatorji bħala strumenti prinċipali għall-formulazzjoni ta’ prijoritajiet politiċi u biex titwitta t-triq għal inizjattivi ġodda fuq perjodu ta’ żmien twil kemm fil-livell reġjonali kif ukoll tal-UE li jistgħu jinbidlu f’attivitajiet u programmi tal-UE li jtejbu l-ħajja taċ-ċittadini tal-UE; biħsiebu jipproċedi għall-identifikazzjoni ta' pakkett bilanċjat ta' PP-AP abbażi tal-valutazzjoni u r-rakkomandazzjonijiet tal-Kummissjoni u filwaqt li jitqiesu bir-reqqa s-sostenibilità u d-durabilità tar-riżultati mistennija;

83. Skont l-Anness II, parti D tal-IIA, se jittrażmetti lill-Kummissjoni l-ewwel lista proviżorja ta' PP u AP potenzjali għall-Baġit 2013; jistenna lill-Kummissjoni tipprovdi analiżi mmotivata sew tal-proposti indikattivi tal-Parlament; jenfasizza li din il-lista proviżorja ma teskludix it-tressiq u l-adozzjoni formali ta’ emendi li jirrigwardaw il-proġetti pilota u l-azzjonijiet preparatorji matul il-qari tal-baġit min-naħa tal-Parlament;

84. Ifakkar li fil-baġit għall-2012 kien adottat numru totali ta' 70 proġett pilota u azzjoni preparatorja, li jammontaw għal EUR 105.45 miljun f'AI fl-intestaturi kollha; jirrimarka li jekk l-awtorità baġitarja tadotta għall-2013 proġetti pilota u azzjonijiet preparatorji f'livell simili u bi tqassim simili fl-intestaturi, 54 % tal-marġni taħt l-Intestatura 1a, 27 % ta ta' dak taħt l-Intestatura 3a u 37 % ta' dak taħt l-Intestatura 3b jkunu diġà ntużaw;

85. Jieħu nota tal-proposti tal-Kummissjoni għal erba' azzjonijiet preparatorji u żewġ proġetti pilota għal ammont totali ta' EUR 15,5 miljun f'AI; biħsiebu janalizza b'attenzjoni l-objettivi u l-kontenuti ta' dawn il-proposti u jiċċekkja l-ammonti mitluba;

L-Aġenziji

86. Jinnota l-livell globali ta' EUR 748 miljun (jiġifieri 0.5 % tal-baġit totali tal-UE) iddedikat għall-aġenziji deċentralizzati tal-UE fl-AB 2013, li jwassal għal żieda fil-kontribuzzjoni totali tal-UE (inkluż dħul assenjat) ta' EUR 24 miljun jew +3.2 % meta mqabbel mal-Baġit 2012; huwa konxju li din iż-żieda ġejja primarjament mit-tmien aġenziji li jinsabu fil-fażi inizjali tagħhom, bil-ħsieb li jingħatalhom finanzjament adegwat, u mis-seba' aġenziji li l-kompiti tagħhom ġew estiżi, sabiex ma titfixkilx il-prestazzjoni tagħhom; jinnota li l-kontribuzzjoni tal-UE għall-aġenziji li qed jiffunzjonaw b'ritmu normali qed tonqos f'termini nominali, b'żieda ta' 1.2 %, madankollu, fil-persunal; jinnota li l-aġenziji issa għandhom total ta' 5.115 kariga fl-organigramma, jiġifieri żieda ta' 257 kariga li jikkonċernaw primarjament l-aġenziji b'kompiti ġodda jew li jinsabu fil-fażi tal-bidu tagħhom;

87. Jinnota li għall-ewwel darba l-Kummissjoni naqqset it-talbiet baġitarji ta' kważi l-aġenziji kollha, li kienu konformi b'mod ġenerali mal-ammonti tal-ipprogrammar finanzjarju; dan jinkludi dawk l-aġenziji li l-kompiti tagħhom jaqgħu taħt il-prijoritajiet tal-Parlament, li jinvolvu ammont totali ta' madwar EUR 44 miljun; ifakkar li analiżi b’attenzjoni tal-metodoloġija, il-motivi u l-impatt possibbli ta' dan it-tnaqqis hija meħtieġa fir-rigward ta’ diversi riżoluzzjonijiet, l-aktar riċenti il-kwittanza tal-2010, li jenfasizzaw li r-reviżjoni tal-aġenziji mill-IWG għandha twassal għal titjib strutturali kemm fl-impatt kif ukoll fil-kosteffikaċja tagħhom, inkluż billi jiġu identifikati l-oqsma tad-duplikazzjoni u s-sovrapożizzjoni fost aġenziji eżistenti; jenfasizza għal darba oħra li l-allokazzjonijiet baġitarji tal-aġenziji tal-EU huma 'l bogħod milli jkunu konfinati għan-nefqa amministrattiva biss, iżda minflok jikkontribwixxu għall-kisba tal-għanijiet tal-Ewropa 2020 u tal-objettivi tal-UE inġenerali, filwaqt illi jimmiraw lejn l-iffrankar fil-livell nazzjonali, kif deċiż mill-awtorità leġiżlattiva;

88. Jikkunsidra li l-kwistjonijiet li ġejjin huma ta’ interess speċifiku għat-trilogu li se jseħħ fid-9 ta’ Lulju 2012:

- appoġġ għat-tkabbir, il-kompetittività u l-impjieg, b’mod partikolari għall-SMEs u ż-żgħażagħ, fil-baġit tal-2013,

- livell suffiċjenti ta’ approprjazzjonijiet ta’ pagament sabiex jiġu koperti l-ħtiġijiet li dejjem jiżdiedu ta’ proġetti li jkunu għaddejjin, b’mod partikolari taħt l-Intestaturi 1a, 1b u 2 , fl-aħħar tal-perjodu ta’ programmazzjoni,

- il-problema ta’ impenji pendenti (RAL);

- il-baġit emendatorju għall-2012 sabiex jiġu koperti ħtiġijiet ta’ pagamenti tal-passat u attwali u sabiex jiġi evitat li l-pagamenti tal-2012 jiġu trasferiti għall-2013 kif kien il-każ din is-sena;

- livell suffiċjenti ta’ approprjazzjonijiet ta’ impenn – iktar Ewropa fi żminjiet ta’ kriżi;

- il-laqgħa interistituzzjonali dwar il-pagamenti;

- il-finanzjament tal-ITER fil-baġit tal-2013;

- diskrepanza bejn l-ipprogrammar finanzjarju u l-AB 2013 fir-rigward tal-Intestatura 4;

* * *

89. Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kummissjoni u lill-Kunsill.

TRILOGU BAĠITARJU

26 ta’ Marzu 2012

ABBOZZ TA' KONKLUŻJONIJIET

Dati għall-proċedura baġitarja u modalitajiet għall-funzjonament tal-Kumitat ta' Konċiljazzjoni fl-2012

Il-Parlament Ewropew, il-Kunsill u l-Kummissjoni jfakkru fid-dikjarazzjoni konġunta tagħhom tat-30 ta' Novembru 2009 dwar miżuri transitorji li jiddefinixxu l-kalendarju għall-proċedura baġitarja għall-2011 u li jistipulaw li l-proċeduri baġitarji futuri għandhom isegwu kalendarju simili dment li ma jiġix maqbul mod ieħor. Il-kalendarju għandu jiġi aġġornat kif meħtieġ għall-proċedura baġitarja għall-2013.

A.     F'dan ir-rigward, huma jaqblu dwar id-dati ewlenin li ġejjin għall-2012:

1.      Ser jiġi msejjaħ trilogu fid-9 ta' Lulju filgħodu qabel l-adozzjoni tal-pożizzjoni tal-Kunsill;

2.      Il-Kunsill ser itemm il-qari tiegħu sa mhux aktar tard mill-ġimgħa 30 (l-aħħar ta' Lulju);

3.      Il-Kumitat għall-Baġits tal-Parlament Ewropew ser jivvota dwar l-emendi għall-pożizzjoni tal-Kunsill sa mhux aktar tard mit-tmiem tal-ġimgħa 41 (kmieni f'Ottubru);

4.      Ser jiġi msejjaħ trilogu fis-17 ta' Ottubru wara nofsinhar qabel il-qari tal-Parlament Ewropew;

5.      Il-Plenarja tal-Parlament Ewropew ser tivvota dwar il-qari tagħha fil-ġimgħa 43;

6.      Il-perijodu ta' Konċiljazzjoni ser jibda fl-24 ta' Ottubru. Jekk meħtieġ, f'konformità mad-dispożizzjonijiet tal-punt c tal-Artikolu 314(4) TFUE, il-Konċiljazzjoni tibqa' għaddejja sat-13 ta' Novembru 2012 (inkluż);

7.      Il-Kumitat ta' Konċiljazzjoni ser jiltaqa' fis-26 ta' Ottubru wara nofsinhar, ospitat mill-Parlament Ewropew u fid-9 ta' Novembru ospitat mill-Kunsill; is-sessjonijiet tal-Kumitat ta' Konċiljazzjoni ser jiġu mħejjija minn trilogi li ser isiru fil-31 ta' Ottubru filgħodu u fis-7 ta' Novembru filgħodu; jaf jissejħu trilogi addizzjonali matul il-perijodu ta' konċiljazzjoni ta' 21 jum.

B.     Huma jaqblu dwar il-modalitajiet għall-funzjonament tal-Kumitat ta' Konċiljazzjoni mniżżlin fl-anness.

ANNESS

Modalitajiet għall-funzjonament tal-Kumitat ta' Konċiljazzjoni fl-2012

1.      Jekk il-Parlament Ewropew jivvota emendi għall-pożizzjoni tal-Kunsill, il-President tal-Kunsill, matul l-istess plenarja, jieħu nota tad-differenzi fil-pożizzjoni taż-żewġ istituzzjonijiet u jagħti l-qbil tiegħu/tagħha lill-President tal-Parlament Ewropew biex immedjatament ilaqqa' l-Kumitat ta' Konċiljazzjoni. L-ittra dwar it-tlaqqigħ tal-Kumitat ta' Konċiljazzjoni tintbagħat fl-istess jum li matulu jkun ingħata l-vot fil-plenarja u l-perijodu ta' Konċiljazzjoni jibda fil-jum ta' wara. Il-perijodu ta' żmien ta' 21 jum huwa kkalkolat skont ir-Regolament (KEE, Euratom) Nru 1182/71 li jistabbilixxi r-regoli applikabbli għal perijodi, dati u limiti ta' żmien.

2.      Jekk il-Kunsill ma jkunx jista' jaqbel dwar l-emendi kollha vvutati mill-Parlament Ewropew, huwa ser jikkonferma l-pożizzjoni tiegħu permezz ta' ittra mibgħuta qabel id-data skedata għall-ewwel laqgħa tal-Kumitat ta' Konċiljazzjoni prevista fil-punt A.7 ta' hawn fuq. F'dan il-każ, il-Kumitat ta' Konċiljazzjoni jipproċedi bil-kondizzjonijiet stabbiliti fil-paragrafi li ġejjin.

3.      Sett komuni ta' dokumenti (dokumenti inizjali) li jqabblu d-diversi passi tal-proċedura baġitarja jsir disponibbli għall-Kumitat ta' Konċiljazzjoni(1). Dan ikun jinkludi ċifri "linja b'linja"(2), totali għall-intestaturi tal-qafas finanzjarju u dokument komparattiv kemm għaċ-ċifri kif ukoll għall-kummenti baġitarji bl-emendi skont il-linja baġitarja għal-linji baġitarji kollha meqjusa li huma teknikament "miftuħa". Dawn id-dokumenti ser ikunu klassifikati skont in-nomenklatura baġitarja.

Dokumenti oħra jiġu mehmuża wkoll mad-dokumenti inizjali għall-Kumitat ta' Konċiljazzjoni(3).

4.      Bil-ħsieb li jintlaħaq qbil sa tmiem il-perijodu ta' konċiljazzjoni, it-trilogi ser:

o jiddefinixxu l-ambitu tan-negozjati tal-kwistjonijiet baġitarji li għandhom jiġu indirizzati;

o jiddiskutu kwistjonijiet pendenti identifikati taħt l-inċiż preċedenti bil-ħsieb tal-possibbiltà li jintlaħaq qbil li għandu jiġi approvat mill-Kumitat ta' Konċiljazzjoni;

o jindirizzaw kwistjonijiet tematiċi, inkluż skont l-intestaturi tal-qafas finanzjarju multiannwali.

Konklużjonijiet mhux finali ser isiru b'mod konġunt matul jew immedjatament wara kull trilogu, b'mod simultanju mal-aġenda tal-laqgħa li jmiss. Tali konklużjonijiet ser jiġu rreġistrati mill-istituzzjoni li tospita t-trilogu u ser jitqiesu bħala proviżorjament approvati wara 24 siegħa mingħajr preġudizzju għad-deċiżjoni finali tal-Kumitat ta' Konċiljazzjoni.

5.      Il-konklużjonijiet tat-trilogi u dokument bil-linji baġitarji li għalihom ikun intlaħaq qbil b'mod tentattiv matul it-trilogi għandhom ikunu disponibbli fil-laqgħat tal-Kumitat ta' Konċiljazzjoni għal approvazzjoni possibbli.

6.      It-test konġunt previst fl-Artikolu 314(5) TFUE għandu jiġi stabbilit mis-segretarjati tal-Parlament Ewropew u tal-Kunsill bl-assistenza tal-Kummissjoni. Huwa ser jikkonsisti f'ittra ta' trasmissjoni indirizzata lill-Presidenti tal-Parlament Ewropew u tal-Kunsill, li jkun fiha d-data tal-qbil fil-Kumitat ta' Konċiljazzjoni, u annessi, li jkunu jinkludu:

o  ċifri linja b'linja għall-partiti baġitarji kollha(4) u ċifri li jiġbru l-ammonti fil-qosor skont l-intestaturi tal-qafas finanzjarju;

o  dokument konsolidat, li jindika ċ-ċifri u t-test finali tal-emendi maqbula għall-abbozz ta' baġit(5) jew għall-pożizzjoni tal-Kunsill.

Il-Kumitat ta' Konċiljazzjoni jista' japprova wkoll dikjarazzjonijiet konġunti possibbli fir-rigward tal-baġit għall-2013.

7.      It-test konġunt ikun tradott fil-lingwi kollha (mis-servizzi tal-Parlament Ewropew) u jiġi ppreżentat għall-approvazzjoni taż-żewġ fergħat tal-awtorità baġitarja fi żmien 14-il jum mid-data wara dik tal-qbil dwar it-test konġunt skont il-punt 6 hawn fuq.

Il-baġit ikun soġġett għall-finalizzazzjoni mill-ġuristi-lingwisti wara l-adozzjoni tat-test konġunt bl-integrazzjoni taż-żewġ annessi tat-test konġunt mal-linji baġitarji li ma jkunux ġew modifikati matul il-proċess ta' konċiljazzjoni.

8.      L-istituzzjoni li tospita t-trilogu jew il-laqgħa tal-Kumitat ta' Konċiljazzjoni ser tipprovdi faċilitajiet ta' interpretazzjoni b'reġim lingwistiku sħiħ applikabbli għal-laqgħat tal-Kumitat ta' Konċiljazzjoni u reġim lingwistiku ad hoc għat-trilogi.

L-istituzzjoni li tospita l-laqgħa ser tiżgura r-riproduzzjoni u d-distribuzzjoni tad-dokumenti tal-laqgħa.

     Is-servizzi tat-tliet istituzzjonijiet ser jikkooperaw għall-kodifikazzjoni tar-riżultati tan-negozjati sabiex jiġi ffinalizzat it-test konġunt.

(1)           Id-diversi passi ser jinkludu: il-baġit tal-2012 (inklużi l-baġits emendatorji adottati); l-abbozz ta' baġit inizjali; il-pożizzjoni tal-Kunsill dwar l-abbozz ta' baġit; l-emendi tal-Parlament Ewropew għall-pożizzjoni tal-Kunsill u l-ittri ta' emenda ppreżentati mill-Kummissjoni. Għal finijiet ta' tqabbil, l-abbozz ta' baġit inizjali ser jinkludi biss dawk l-ittri ta' emenda li jitqiesu kemm mill-qari tal-Kunsill kif ukoll tal-Parlament Ewropew. (2)           Il-linji baġitarji li huma meqjusa bħala teknikament magħluqa ser ikunu evidenzjati fil-materjal inizjali. Linja baġitarja meqjusa teknikament magħluqa hija linja li dwarha ma jkun hemm l-ebda nuqqas ta' qbil bejn il-Parlament Ewropew u l-Kunsill, u li dwarha ma tkun ġiet ippreżentata l-ebda ittra ta' emenda, mingħajr preġudizzju għad-deċiżjoni finali tal-Kumitat ta' Konċiljazzjoni. (3)        Inkluża "ittra ta' implimentabbiltà" tal-Kummissjoni dwar il-pożizzjoni tal-Kunsill u l-emendi tal-Parlament Ewropew; ittra ta' emenda għall-agrikoltura (u oqsma oħra, jekk dan ikun meħtieġ); possibbilment, in-Nota ta' Twissija għall-Previżjoni tal-Baġit tal-ħarifa mħejjija mill-Kummissjoni; u ittri possibbli minn Istituzzjonijiet oħra dwar il-pożizzjoni tal-Kunsill u l-emendi tal-Parlament Ewropew. (4) Linji li mhumiex modifikati fir-rigward tal-abbozz ta' baġit jew il-pożizzjoni tal-Kunsill ser ikunu evidenzjati. (5)           Inklużi ittri ta' emenda meqjusa kemm mill-qari tal-Kunsill kif ukoll tal-Parlament Ewropew.

SUĠĠERIMENTI

Il-Kumitat għall-Affarijiet Barranin jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Itenni li sabiex l-UE jkun jista' jkollha rwol attiv fid-dinja, jeħtieġ li jiġu provduti biżżejjed fondi fil-baġit tal-UE, b'mod partikolari fil-kuntest ta' kompiti addizzjonali fdati lill-Unjoni fil-qasam tal-azzjoni esterna; ifakkar li fi żmien meta l-baġits nazzjonali tal-Istati Membri kollha huma soġġetti għal miżuri ta’ awsterità severi, il-proċedura baġitarja 2013 trid tifforma parti mill-isforz ġenerali biex jiġi kkontrollat l-infiq pubbliku u jitfittxu sinerġiji; huwa tal-opinjoni li, fl-interess tal-eżemplarità u s-solidarjetà, l-UE għandha turi impenn proporzjonat biex iċċekken jew tikkontrolla żidiet fil-finanzjament ta' programmi li ma jipprovdux valur miżjud Ewropew; huwa tal-opinjoni li hemm spazju biex isir użu aktar effiċjenti tar-riżorsi eżistenti, u li għandu jsir tnaqqis immirat fl-infiq fl-intestatura 4 meta l-infiq jirriżulta li jkun ineffiċjenti, ineffikaċi jew mhux konformi mal-prijoritajiet politiċi; ifakkar madankollu li l-iffrankar m'għandux isir b'mod li jipperikola l-impenji tal-UE u l-kapaċità tagħha li tindirizza sfidi globali;

2.  Jifhem, f'dan ir-rigward, il-proposta tal-Kummissjoni li ċċekken il-programmi li mhumiex implimentati b'mod sodisfaċenti, iżda huwa mħasseb dwar in-nuqqas ta' spjegazzjoni għat-tnaqqis fid-daqs ta' ċerti programmi u dwar il-proposta li jiżdied, meta mqabbel mal-ipprogrammar finanzjarju, il-marġni fl-intestatura 4 biex tiġi ffaċilitata l-konċiljazzjoni baġitarja li ġejja, ħaġa li tista' twassal għal baġits emendatorji matul is-sena baġitarja u li ma tistax titqies bħala prattika baġitarja tajba; huwa tal-fehma li, fl-interess tad-dixxiplina baġitarja u l-ġestjoni finanzjarja tajba, il-partijiet kollha involuti għandhom jirrikonoxxu l-ħtiġijiet finanzjarji reali tal-azzjoni esterna tal-Unjoni, u jtenni l-preokkupazzjonijiet tiegħu f'dan ir-rigward, espressi fil-punt 17 tar-riżoluzzjoni tiegħu dwar il-linji gwida ġenerali għall-baġit 2013(1); ifakkar fil-ħtieġa ta' aktar koordinament, koerenza, trasparenza u viżibbiltà fil-finanzjament ta' azzjonijiet esterni mill-UE u mill-Istati Membri tagħha biex jiġu evitati sovrappożizzjonijiet;

3.  Jieħu nota tal-proposta li jiżdiedu l-approprjazzjonijiet taħt l-Istrument Ewropew ta' Viċinat, li jindirizza l-bżonnijiet ta’ pajjiżi li jħabbtu wiċċhom ma’ bidliet politiċi u ekonomiċi ewlenin; jilqa' l-iffukar fuq is-Sħubija tal-Lvant, u jerġa' jafferma l-appoġġ tiegħu għall-pajjiżi li flimkien jagħmlu l-komponent tan-Nofsinhar tagħha peress li jaffaċċjaw sfidi ta' proporzjonijiet storiċi wara r-Rebbiegħa Għarbija; iqis ir-rappurtar tal-Kummissjoni dwar l-applikazzjoni tal-prinċipju "aktar għal aktar" bħala insuffiċjenti, u jistedinha tiżviluppa kriterji ċari għal kif għandu jiġi applikat;

4.  Jenfasizza li, grazzi għall-impenn qawwi tal-Parlament, il-kontribuzzjoni annwali tal-UE lill-Awtorità Palestinjana, lill-UNRWA u lill-proċess ta’ paċi tal-Lvant Nofsani matul l-aħħar snin tammonta għal EUR 300 miljun, u jfakkar li l-awtorità baġitarja, matul il-fażi tal-konċiljazzjoni baġitarja, qablet dwar allokazzjoni ta’ EUR 200 miljun għas-sena 2012, bil-kundizzjoni li jkun hemm żieda supplimentari sine qua non ta’ EUR 100 miljun għas-sena finanzjarja 2011 li tiġi minn approprjazzjonijiet mhux użati; jitlob li jkun hemm impenn ta' finanzjament li jirrifletti l-ħtiġijiet reali mill-bidu tas-sena baġitarja biex jiġi żgurat li l-UE tkun tista' tappoġġa b'mod effikaċi l-bini ta' paċi sostenibbli; jinsisti li jiġu imposti kontrolli finanzjarji stretti u li jsiru analiżi u valutazzjoni dettaljati tal-infiq lill-Parlament Ewropew;

5.  Ifakkar li huwa importanti għall-UE li tippromwovi l-politiki tad-dimensjoni tal-Artiku u tat-Tramuntana, il-politika tat-Tramuntana Mbiegħda, u r-relazzjoni tagħha mal-Amerika Latina u mal-pajjiżi ġeneralment imsejħa BRICS; itenni l-appoġġ tiegħu għall-mekkaniżmi eżistenti kollha li jservu biex isaħħu din il-kooperazzjoni; jenfasizza l-importanza kemm li jiġu inkorporati l-opportunitajiet potenzjali ta' teknoloġiji ġodda fil-politiki kollha tagħha kif ukoll li jiġi miġġieled it-theddid li dawn it-teknoloġiji jippreżentaw;

6.  Jenfasizza li għandhom isiru aktar sforzi biex tingħata informazzjoni sensibbli u li tkun faċli biex tintuża, b'mod partikolari online, dwar il-programmi u l-azzjonijiet tal-Unjoni, biex jiżdiedu l-effikaċja u l-viżibbiltà tal-appoġġ tal-UE; huwa tal-opinjoni, f'dan ir-rigward, li l-Kummissjoni għandha tibda tipproduċi rapporti annwali li jikkonsolidaw l-informazzjoni dwar il-finanzjament estern kollu fl-ambitu ġenerali (jiġifieri, il-finanzjament estern kollu ikunx kopert jew le mill-Intestatura IV biss) u li joffru analiżi tal-infiq skont, inter alia, il-pajjiż benefiċjarju, il-qasam ġenerali ta' applikazzjoni tal-fondi, l-użu tal-istrumenti finanzjarji, l-impenji u l-pagamenti, u l-livell ta' parteċipazzjoni tas-sħab;

7.  Itenni t-tħassib dwar l-iskrutinju parlamentari u t-trasparenza tal-baġit tal-PESK; jemmen bis-sħiħ li għandha ssir analiżi ċara tal-partiti kollha ffinanzjati mill-baġit tal-PESK, inkluż għal kull operazzjoni tal-PSDK, għal kull rappreżentant speċjali tal-UE u għal kull politika oħra relatati, peress li huwa konvint li dan ma jippreġudikax il-flessibbiltà u r-reattività meħtieġa tal-PESK; jistieden lill-Kummissjoni tipprovdi, mingħajr dewmien, il-loġika għall-użu tal-allokazzjonijiet mill-baġit tal-PESK, aktar milli mill-baġit tas-Servizz għall-Azzjoni Esterna, biex ikunu ffinanzjati l-ispejjeż tar-Rappreżentanti Speċjali tal-UE; huwa konvint li kwalunkwe tnaqqis fil-finanzjament tal-missjonijiet tal-PSDK għandu jsir biss wara valutazzjoni dettaljata tal-impatt ta' tali tnaqqis;

8.  Jilqa’ l-iffrankar sostanzjali tan-nefqa miksuba mis-Servizz għall-Azzjoni Esterna fl-2012, u t-tkomplija ta’ din ix-xejra fl-2013 kif previst fl-Estimi; huwa tal-fehma, f'dan il-kuntest, li filwaqt li l-introduzzjoni gradwali tas-Servizz tista' tiġġustifika żieda fl-infiq li tkun proporzjonalment akbar minn dik prevista mill-Istituzzjonijiet l-oħra, għad fadal dubji dwar in-numru għoli ta' karigi maniġerjali li jiswew ħafna flus f'livelli ta' gradi għoljin; jitlob għalhekk lis-SEAE jipprovdi informazzjoni addizzjonali, b'mod partikolari rigward iż-żieda sinifikanti (+9.2 %) fil-karigi AD 14 proposta fl-abbozz ta' baġit; bl-istess mod jitlob aktar informazzjoni dwar iż-żidiet kbar fl-approprjazzjonijiet proposti għas-sigurtà u s-sorveljanza tal-bini (+57.2 %);

9.  Huwa konvint li l-prevenzjoni u l-medjazzjoni huma fost l-aktar modi kosteffiċjenti biex jiġu mmaniġġjati l-kunflitti, peress li jipprevjenu li dawn jeskalaw fi vjolenza; jilqa' għalhekk il-proposta li tiddaħħal linja baġitarja li tammonta għal EUR 500 000 għal Servizzi ta' Prevenzjoni tal-Kunflitti u ta' Appoġġ għall-Medjazzjoni fis-SEAE, wara t-tlestija b'suċċess, fl-aħħar ta' din is-sena, ta' azzjoni preparatorja proposta mill-Parlament Ewropew.

RIŻULTAT TAL-VOTAZZJONI FINALI FIL-KUMITAT

(1) P7_TA-PROV(2012)0077, Riżoluzzjoni tal-14 ta' Marzu 2012 dwar il-linji gwida ġenerali għall-baġit 2013 - Taqsima III - Il-Kummissjoni.

SUĠĠERIMENTI

Il-Kumitat għall-Iżvilupp jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Javża lill-Kummissjoni u lill-Istati Membri li, sakemm ma jkunx ipprovdut finanzjament addizzjonali għall-għajnuna għall-iżvilupp, huwa probabbli li dawn se jonqsu milli jissodisfaw l-impenji internazzjonali tagħhom fir-rigward tal-Għanijiet ta' Żvilupp tal-Millennju (MDGs) u qed jissugraw li jitbiegħdu ħafna mill-impenn kollettiv tal-UE li jinkiseb 0.7 % ODA/DNG sal-2015, u li bosta Stati Membri mhux se jilħqu l-impenji individwali tagħhom tal-ODA/DNG matul l-istess sena;

2.  Jiddispjaċih dwar il-fatt li l-livell totali ta’ impenji skont l-Istrument ta' finanzjament tal-Kooperazzjoni għall-Iżvilupp (DCI), kif propost mill-Kummissjoni fl-Abbozz ta' Baġit għall-2013, żdied inqas mir-rata ta’ inflazzjoni prevista u li l-livell propost ta’ pagamenti totali tad-DCI huwa anqas minn dak tal-2012;

3.  Jinsisti li l-UE u l-Istati Membri jridu jieħdu bis-serjetà s-sħubija tagħhom mal-pajjiżi li qed jiżviluppaw u li jirċievu finanzjament mid-DCI, u li l-prevedibilità fit-tul hija element essenzjali ta' din is-sħubija; jinsisti li l-ifqar popolazzjonijiet u l-popolazzjonijiet l-aktar vulnerabbli fil-pajjiżi benefiċjarji tad-DCI ma għandhomx iġarrbu l-piż taż-żidiet sostanzjali fil-finanzjament tal-iStrument Ewropew ta' Viċinat u Sħubija (ENPI) minħabba r-Rebbiegħa Għarbija; jiġbed l-attenzjoni għall-impenn meħud b’rabta mal-Aġenda għall-Bidla għal tnaqqis gradwali tal-programmi tal-UE li għadhom għaddejjin f’pajjiżi bi dħul medju, sa mill-Qafas Finanzjarju Multiannwali (2014-2020) li jmiss;

4.  Jiddispjaċih, b’mod partikolari, mill-qtugħ enormi lill-programmi ġeografiċi tad-DCI għall-Asja, l-Asja Ċentrali, l-Iraq, l-Iran u l-Jemen; hu tal-fehma li, billi dawn il-programmi qed jitħabtu biex jilħqu r-riżultati maħsuba f'termini ta' tnaqqis tal-qafar, id-demokrazija u d-drittijiet tal-bniedem, jixirqilhom aktar attenzjoni u u input finanzjarju flok anqas;

5.  Jappoġġja ż-żieda sostanzjali fil-finanzjament għall-programm tematiku tad-DCI fuq l-ambjent u l-ġestjoni sostenibbli tar-riżorsi naturali; hu tal-fehma li l-Kummissjoni qed tfittex appoġġ addizzjonali biex tippromwovi l-enerġija sostenibbli għall-pajjiżi li qed jiżviluppaw matul il-perjodu li jwassal għall-Konferenza Rio+20 tan-NU tal-2012, u għall-iffinanzjar tal-inizjattiva tal-UE mħabbra dan l-aħħar dwar ‘Enerġija għall-Iżvilupp’ li tindirizza l-inugwaljanza tal-enerġija fil-pajjiżi li qed jiżviluppaw; itenni, madankollu, li l-iffinanzjar marbut mal-klima għandu jiżdied mal-finanzjament għall-iżvilupp ipprogrammat attwalment u li l-fondi għal setturi ewlenin tal-MDGs, eżempju l-edukazzjoni bażika u s-saħħa, ma għandhomx imorru fuq l-azzjoni klimatika; jilqa’ ż-żieda proposta fil-linja baġitarja ‘Investiment fin-Nies’, u jfakkar lill-Kummissjoni fil-livelli ta' referenza u fl-impenji stabbiliti tal-UE, li saru mindu beda d-DCI 2007-2013, li jkun allokat tal-anqas 20 % tad-DCI għas-saħħa u l-edukazzjoni bażika, b’attenzjoni partikolari għall-progress li sar fir-rigward tal-MDGs li l-aktar għadhom lura;

6.  Jistieden lill-Kummissjoni tiżgura li jittieħed approċċ aktar kontrollat u koerenti għall-iffinanzjar ta’ enerġiji alternattivi fil-ġlieda kontra t-tibdil fil-klima, sabiex ikun żgurat li l-UE ma tipprovdix indirettament appoġġ finanzjarju għal attivitajiet li jagħtu lok għal distorsjonijiet u spekulazzjoni fil-prezzijiet fir-rigward ta’ materja prima tal-ikel jew li jwasslu għall-ħtif ta’ art;

7.  Jistieden lill-Kummissjoni tipprovdi appoġġ finanzjarju għal miżuri mmirati għall-iżvilupp tal-kooperazzjoni biex tevita u teħodha kontra l-ħtif tal-art, li qed isir dejjem iżjed komuni, u biex ikun promoss l-istabbiliment ta’ kodiċi ta’ kondotta fil-livell tal-UE u internazzjonali;

8.  Iħeġġeġ lill-Kummissjoni talloka ffinanzjar sinifikanti li jtejjeb l-aċċess għal sistemi tal-kura tas-saħħa u tal-pensjonijiet ġusti bbażati fuq skemi tal-assigurazzjoni reċiproċi u mhux bi skop ta’ profitt f’żamma mal-mudelli ekonomiċi soċjali; iħeġġeġ lill-Kummissjoni tappoġġja l-pajjiżi sħab fit-tqegħid fis-seħħ ta’ skemi ta’ assigurazzjoni b’kopertura wiesgħa li jinkludu l-ifqar u l-aktar partijiet vulnerabbli tas-soċjetà, inter alia permezz ta’ appoġġ għas-settur tas-servizzi mikrofinanzjarji; konvint li tali skemi, jekk imfassla tajjeb, għandhom il-potenzjal mhux biss li joħorġu n-nies mill-faqar u jsaħħu r-reżistenza tal-aktar nies vulnerabbli billi jitħarsu l-assi tagħhom, iżda wkoll titkattar aktar koeżjoni soċjali u aktar tkabbir inklussiv;

9.  Jenfasizza l-bżonn għall-Kummissjoni li tiżgura li l-assistenza tkun effettiva u jkollha impatt dirett fuq il-qerda tal-faqar, l-iżvilupp tal-bniedem u l-koeżjoni soċjali; jistieden lill-Kummissjoni, f’dan ir-rigward tintroduċi, bħala parti minn serje ta’ miżuri ta’ bini tal-kapaċità għal atturi mhux statali, arranġamenti għal finanzjament ta' proġetti fuq skala żgħira li jinvolvu partijiet interessati privati, bħall-SMEs, kooperattivi u assoċjazzjonijiet lokali;

10. Jinsisti li l-Kunsens Ewropew dwar l-Iżvilupp jibqa' d-dokument gwida għall-għajnuna u l-kooperazzjoni għall-iżvilupp tal-UE, speċjalment fir-rigward tas-saħħa u l-edukazzjoni; iħeġġeġ lill-Kummissjoni tiżgura li l-Istrument tal-Kooperazzjoni għall-Iżvilupp jibqa’ għodda relevanti u effikaċi għall-implimentazzjoni tal-Kunsens Ewropew dwar l-Iżvilupp, speċjalment għall-appoġġ u l-integrazzjoni tas-saħħa, l-edukazzjoni u kwistjonijiet orizzontali relevanti bħall-ugwaljanza bejn is-sessi u l-HIV/AIDS;

11. Jenfasizza l-importanza li jinżammu livelli ta’ finanzjament suffiċjenti għal-linji baġitarji tal-għajnuna umanitarja kif ukoll tar-Riżerva ta' Għajnuna f'Emerġenza; jinsisti li, jekk wieħed iżomm f’moħħu ż-żieda evidenti fil-frekwenza, il-ħruxija u d-daqs tal-kriżijiet umanitarji u d-diżastri naturali li seħħew matul dawn l-aħħar snin, l-UE trid tkun lesta li timmobilizza malajr il-fondi bħala reazzjoni għal tali kriżijiet barra mill-konfini tagħha;

12. Jinsab imħasseb dwar il-qtugħ propost fin-nefqa amministrattiva, inter alia għall-assistenza teknika, l-evalwazzjonijiet u l-awditjar, kemm fi kwartieri ġenerali u f'delegazzjonijiet tal-UE lil hinn minnha, billi dawn l-attivitajiet huma fundamentali biex jinżammu l-aktar standards rigorużi ta' evalwazzjoni u awditjar; meta jitqies li, fl-2011, il-Kummissjoni talbet żieda fil-persunal ta’ 18-il persuna full-time għall-2012 "biex tiżgura amministrazzjoni finanzjarja tajba xierqa għal numru kbir ta' għotjiet ta' ammont żgħir taħt id-DCI",(1) jinsab imħasseb ukoll mir-riorganizzazzjoni sostanzjali tal-persunal proposta mill-attivitajiet tad-DCI lejn l-ENPI, u jinnota r-riskji f’termini ta’ kwalità tal-amministrazzjoni finanzjarja tad-DCI li dan il-livell imdgħajjef tal-persunal jista’ jimplika;

RIŻULTAT TAL-VOTAZZJONI FINALI FIL-KUMITAT

(1) Abbozz tal-Baġit Ġenerali tal-Kummissjoni Ewropea għas-Sena Finanzjarja 2012, Dokument ta’ Ħidma Parti II Riżorsi Umani tal-Kummissjoni, COM(2011)300, Mejju 2011, p 87

SUĠĠERIMENTI

Il-Kumitat għall-Kummerċ Internazzjonali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jenfasizza li l-baġit tal-Unjoni għandu jqis il-prijoritajiet definiti għall-politika kummerċjali komuni bħala, fl-ambitu tal-istrateġija UE 2020 kif ukoll l-interessi strateġiċi komuni fuq żmien twil, u jinnota f'dan ir-rigward il-konklużjonijiet tad-dokument "Xejriet Globali 2030" maħruġ mis-Sistema għall-Analiżi tal-Politika tal-Istrateġija Ewropea (ESPAS); ifakkar fil-bżonn li l-finanzjamenti jitħejjew għar-reviżjoni tal-istrateġija tal-UE fil-qasam tal-politika kummerċjali fl-2013;

2.  Ifakkar fl-impenji mġedda tal-UE favur il-promozzjoni tal-internazzjonalizzazzjoni u tal-kompetittività tal-impriżi żgħar u ta' daqs medju; jirrikonoxxi l-bżonn ta' żieda fl-effiċjenza tal-istrumenti eżistenti f'dak il-qasam u huwa tal-fehma li ċ-Ċentri tal-UE għall-SMEs għandhom jitwessgħu biex ikopru swieq prijoritarji ġodda; jappoġġa l-finanzjament ta' fieri kummerċjali għall-SMEs biex jgħinhom jissuperaw l-ostaklu biex jistabbilixxu l-ewwel kuntatti u sħab tan-negozju, bħall-klijenti, l-intermedjarji jew il-fornituri fi swieq terzi u jagħtu bidu għall-preżenza tagħhom hemmhekk jew ikompu jżiduha;

3.  Jisħaq fuq il-bżonn li jingħata sostenn tekniku u assistenza adegwati lill-pajjiżi tal-viċinat tal-Lvant u tan-Nofsinhar tal-Ewropa b'konformità sħiħa mal-prinċipu "aktar u aktar", speċjalment waqt in-negozjati magħhom ta' ftehimiet ta' kummerċ ħieles profondi u komprensivi li għandhom influwenza b'saħħitha fuq il-liġijiet u r-regolamenti tagħhom;

4.   Jappoġġa l-estensjoni sal-2013 tal-azzjoni ta' tħejjija "Innovazzjoni fl-Euromed: imprendituri għall-bidla" li ġiet adottata s-sena li għaddiet u li attwalment qed tiġi implimentata. din l-azzjoni ta' tħejjija għandha l-għan li ssaħħaħ in-netwerks tal-innovazzjoni u l-investiment ta' kumpaniji ġodda bejn l-Unjoni u erba' pajjiżi Mediterranji assoċjati, li huma l-Eġittu, il-Libanu, it-Tuneżija u l-Marokk; iqis li l-istabbiliment ta' tali rabtiet huwa kruċjali għall-prospetti ekonomiċi u politiċi futuri f'dawn il-pajjiżi u huwa konformi mal-pożizzjoni tal-Parlament espress fir-rapport bit-titolu "Kummerċ għall-bidla: L-Istrateġija Kummerċjali u ta' Investiment tal-UE għan-Nofsinhar tal-Mediterran wara r-rivoluzzjonijiet tar-Rebbiegħa Għarbija".

5.  Jemmen li għandhom jingħataw riżorsi adegwati bil-għan li jittieħed benefiċċju sħiħ mid-djalogi ta' livell għoli ta' bħalissa mal-Istati Uniti, maċ-Ċina, mal-Ġappun u mar-Russja u jinbnew sħubiji kummerċjali strateġiċi ma' potenzi kummerċjali emerġenti b'rati għoljin ta' tkabbir, bħall-Brażil u l-Indja;

6.  Iwissi li r-responsabilitajiet tal-UE fit-titjib tal-inklużjoni fil-kummerċ u tat-trawwim tal-kooperazzjoni u l-istabilità ekonomika internazzjonali jridu jkunu riflessi fil-baġits tal-programmi bħall-Għajnuna għall-Kummerċ, l-Istrument għall-Pajjiżi Industrijalizzati u l-Istrumenti għall-Assistenza Makrofinanzjarja;

7.   Jinnota li l-iskemi għall-kummerċ ġust u etiku u dawk li jinvolvu responsabilità u responsabilizzazzjoni soċjali korporattiva, bħall-"Kummerċ Ġust", isaħħu wkoll il-pożizzjoni tal-produtturi ż-żgħar fil-konfront tal-kumpaniji l-kbar fis-suq dinji; għalhekk, jistieden lill-Unjoni tkompli tiżviluppa skemi eżistenti bħala sinjal pożittiv għall-appoġġ tal-Kummerċ Ġust;

8.  Jappella biex il-kampanji ta' komunikazzjoni pubblika jiġu organizzati bil-ħsieb li jiggarantixxu li ċ-ċittadini Ewropej ikunu infurmati sewwa dwar il-politika kummerċjali tal-Unjoni; jenfasizza l-bżonn, partikolarment fi żmien ta' kriżi, li jiġu żgurati finanzjamenti xierqa għall-politiki ta' aġġustament strutturali intern tal-UE;

9.   Jenfasizza li l-inklużjoni tal-proġett ta' pjattaforma tal-koordinament b'appoġġ għall-internazzjonalizzazzjoni tal-impriżi tal-Unjoni fil-qafas tal-ICI+ jimplika żieda konsistenti ta' dak il-finanzjament tul is-snin li ġejjin

10.  Ifakkar li l-finanzjament suffiċjenti jrid jiġi żgurat biex l-Unjoni tkun tista' tissodisfa l-obbligi tagħha ta' verifika ġuridika u lingwistika u ta' traduzzjoni malli tikkonkludi ftehimiet kummerċjali, sabiex tiżgura li dawn il-ftehimiet jiġu inizjalati, iffirmati u implimentati malajr kemm jista' jkun;

RIŻULTAT TAL-VOTAZZJONI FINALI FIL-KUMITAT

SUĠĠERIMENTI

Il-Kumitat għall-Kontroll tal-Baġit jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

A. billi l-Ewropa qed tiffaċċa kriżi ekonomika, finanzjarja u baġitarja gravi, u billi għandhom jittieħdu l-miżuri kollha biex jintuża l-baġit tal-UE bl-iktar mod effiċjenti possibbli bil-mira tal-irkupru ekonomiku;

B.  billi waħda mill-ikbar sfidi fis-sitwazzjoni diffiċli attwali hija l-kompitu tal-ħolqien ta' tkabbir u impjiegi, b'mod partikulari għall-SMEs u għaż-żgħażagħ;

C. jiddispjaċih mill-fatt li l-Parlament Ewropew qatt ma rċieva s-sommarji annwali mill-Istati Membri tal-UE kif dispost fl-Artikolu 44 tal-Ftehim Interistituzzjonali dwar id-dixxiplina baġitarja u l-amministrazzjoni finanzjarja tajba (2006/C 139/01) iffirmat konġuntament mill-Parlament, mill-Kunsill u mill-Kummisjoni; jistenna li l-Kummissjoni tibgħat uffiċjalment lill-Parlament is-sommarji annwali mill-2007 'l hawn;

D. billi l-ġbir kif suppost tal-VAT u d-dazji doganali jinfluwenza direttament kemm l-ekonomiji tal-Istati Membri kemm il-baġit tal-UE;

1.  Ifakkar li l-impenji baġitarji pendenti huma approprjazzjonijiet ta' impenn li saru, iżda ma ntużawx, u li dawn ġejjin prinċipalment mill-programmi multiannwali (eż. il-Koeżjoni) fejn l-impenji jsiru fis-snin tal-bidu tal-perjodu ta' programmazzjoni, filwaqt li l-pagamenti korrispondenti jsiru b'mod gradwali tul il-perjodu kollu ta' programmazzjoni;

2.  Jinnota li l-livell għoli ta' impenji li għadhom pendenti jista' jindika li, bħala konsegwenza tal-kriżi ekonomika, l-Istati Membri qed isibuha diffiċli jassorbu l-ammonti allokati;

3.  Jinnota li fl-2010, il-Qorti Ewropea tal-Awdituri sabet li dawn l-impenji pendenti kienu żdiedu bi kważi 10% ta' EUR 194 biljun, ċifra li tirrappreżenta kważi tliet snin ta' infiq bir-rata attwali (Rapport Annwali 2010, punt 1.43);

4.  Jemmen li l-kwistjoni tal-impenji pendenti għandha tiġi trattata bir-reqqa fil-baġit 2013 u fin-negozjati dwar il-qafas finanzjarju multiannwali li jmiss sabiex ikun żgurat li l-baġit jiġi implimentat bl-iktar mod effiċjenti u effettiv possibbli;

5.  Jinnota li tipi differenti ta' dħul għandhom effetti negattivi differenti, u jitlob lill-Kummissjoni tqis il-kost tal-għażla tal-ġbir tad-dħul għas-sorsi differenti tad-dħul.

RIŻULTAT TAL-VOTAZZJONI FINALI FIL-KUMITAT

SUĠĠERIMENTI

Il-Kumitat għall-Impjiegi u l-Affarijiet Soċjali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jenfasizza li l-baġit tal-2013 għandu jappoġġa l-għanijiet tal-istrateġija tal-Ewropa 2020 u jitlob finanzjament ambizzjuż għall-inizjattivi ewlenin ‘Żgħażagħ Attivi’, ‘Ħiliet Ġodda għal Impjiegi Ġodda’, ‘Pjattaforma Ewropea kontra l-Faqar’, u ‘Unjoni tal-Innovazzjoni’; jitlob li enfasi partikolari għandha titqiegħed fuq il-ħolqien ta’ impjiegi permezz tat-twaqqif u l-konsolidazzjoni ta’ negozji ġodda, u fuq l-enfasizzar tar-rwol sinifikanti li dawn għandhom fil-kisba tal-mira ta’impjieg ta’ 75% sal-2020;

2.  Jenfasizza l-importanza ta’ fondi baġitarji għal kontra l-qgħad fost iż-żgħażagħ, b’mod partikolari fost gruppi soċjalment żvantaġġati, u l-ħtieġa li jinħoloq ambjent dinamiku, innovattiv u li hu tajjeb għan-negozju għal bidu ġdid ta’ ħolqien ta’ impjiegi ta’ kwalità; jitlob allokazzjoni ċara ta’ fondi mill-Kummissjoni għal dan l-għan; jenfasizza l-ħtieġa ta’ finanzjament xieraq tal-istrumenti kollha tal-impjieg;

3.  Iħeġġeġ ukoll l-appoġġ finanzjarju għall-programmi li joħolqu impjiegi għal dawk bi żvantaġġi multipli fis-suq tax-xogħol, bħalma huma l-persuni f’qgħad fit-tul, il-persuni b’diżabilità u l-persuni li jagħmlu parti minn minoranza;

4.  Jirrimarka li l-mikrointrapriżi, dawk żgħar, u ta’ daqs medju jimpjegaw ħafna ħaddiema fl-UE u li waħda mill-problemi ewlenin fit-twaqqif u ż-żamma ta’ tali intrapriżi hi l-kisba tal-finanzi; jipproponi, għalhekk, li l-element mikrofinanzjarju jiġi estiż;

5.  Huwa tal-fehma li l-baġit tal-2013 għandu jappoġġa wkoll is-sett ta’ miżuri konkreti proposti mill-Kummissjoni biex tingħata spinta lill-impjiegi, bħall-iffokar fuq il-ħolqien tal-impjiegi mil-lat ta' domanda u s-suġġeriment ta’ modijiet kif l-Istati Membri jistgħu jħeġġu t-tfittix tal-ħaddiema billi jnaqqsu t-taxxi fuq ix-xogħol - b’mod newtrali għall-baġit, bla ebda impatt fuq il-ħarsien soċjali - jew billi jagħtu iktar appoġġ lill-bidu tan-negozji;

6.  Jistieden l-Istati Membri jiddirezzjonaw l-għajnuna mhux allokata mill-FSE u l-Fondi Strutturali l-oħra bil-għan li jitnaqqas il-qgħad taż-żgħażagħ billi jiġu appoġġati l-SMEs (b’mod partikolari l-mikrointrapriżi, peress li 90% tal-SMEs huma mikro-intrapriżi) fil-ħolqien ta’ impjiegi ġodda u billi jiġu żviluppati programmi ta’ taħriġ vokazzjonali; jitlob li titqies il-programmazzjoni miżjuda u orjentata mill-ġdid tal-FSE fil-baġit tal-2013 fir-rigward tat-tmiem viċin tal-qafas finanzjarju multiannwali attwali;

7.  Jistieden lill-Istati Membri jiddirezzjonaw il-Fondi Strutturali mhux allokati għat-titjib tal-kundizzjonijiet eżistenti għal imprendituri l-ġodda, sabiex jiġi sfruttat aħjar il-potenzjal qawwi tagħhom għall-ħolqien ta’ impjiegi ġodda u sostenibbli;

8.  Jitlob biex isir sforz sostnut permezz tal-baġit li jipprovdi, bl-appoġġ tas-sħab soċjali u f'konformità mal-għanijiet tal-Ewropa 2020, taħriġ xieraq u l-għoti ta’ ħiliet mill-ġdid, mhux l-inqas ta’ ħaddiema aktar anzjani li kieku jistgħu jiffaċċjaw l-esklużjoni mis-suq tax-xogħol, f’setturi b’nuqqas ta’ ħaddiema u s-setturi ewlenin b'potenzjal għoli ta’ ħolqien ta’ impjiegi identifikati mill-Kummissjoni fil-komunikazzjoni tagħha bit-titolu “Lejn irkupru li jwassal għall-ħolqien abbundanti ta’ impjiegi” (COM (2012) 0173), bħall-ekonomija ekoloġika u s-setturi tal-kura tas-saħħa u tal-ICT; Jitlob għal użu aħjar tal-FSE u l-valorizzazzjoni tal-FEG billi jiżdiedu l-koerenza, is-sostenibilità u l-komplementarjetà sabiex jitnaqqas u jiġi ssimplifikat il-proċess tat-teħid ta’ deċiżjonijiet;

9.  Jenfasizza li r-reviżjoni attwali tar-regolament ta’ implimentazzjoni tal-FEG għandha tagħmlu iktar effikaċi, b’mod partikolari fir-rigward tal-aspetti baġitarji tal-mobilizzazzjoni tiegħu; jistieden l-Istati Membri jagħmlu użu sħiħ mill-FEG u b’mod partikolari jżidu l-isforzi tagħhom biex itejbu s-sensibilizzazzjoni dwar dan l-istrument;

10. Jitlob għal tisħiħ ta’ informazzjoni pubblika mmirata lejn programmi eżistenti bħall-EURES, il-proġetti pilota "L-ewwel impjieg tal-EURES tiegħek" u "Solidarjetà Soċjali għall-Integrazzjoni Soċjali" u l-Faċilità ta’ Mikrofinanzjament;

11. Jitlob li l-Parlament jingħata aġġornamenti regolari u dettaljati dwar l-istadji varji fl-implimentazzjoni ta’ proġetti pilota mill-Kummissjoni;

12. Jenfasizza li l-baġit tal-UE jrid jappoġġa l-kompletezza tas-suq uniku, il-kompetittività, u l-konverġenza soċjali, l-iżvilupp ta’ politika dwar l-impriżi soċjalment responsabbli u l-monitoraġġ tal-applikazzjoni tan-normi soċjali legali mill-impriżi biex jiġi żgurat il-ħolqien ta’ impjiegi diċenti (impjiegi li jkunu stabbli u joffru kundizzjonijiet ta’ impjieg tajbin u ħlas suffiċjenti biex jinkiseb aċċess għal prodotti u servizzi vitali).

RIŻULTAT TAL-VOTAZZJONI FINALI FIL-KUMITAT

SUĠĠERIMENTI

Il-Kumitat għall-Industrija, ir-Riċerka u l-Enerġija jistieden lill-Kumitat għall-Baġit, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jemmen li l-baġit tal-UE għandu jkun iffokat fuq politiki u programmi tal-UE li jistgħu jagħtu kontribut sostanzjali għar-revitalizzazzjoni tat-tkabbir sostenibbli fl-UE u li jindirizzaw l-isfidi prinċipali fis-soċjetà;

2.  Jenfasizza l-importanza tal-investiment fit-tul fir-riċerka, l-iżvilupp u l-innovazzjoni u li jiġi żgurat livell adattat ta' finanzjament fl-2013 għat-tranżizzjoni għal ekonomija b'livelli baxxi tal-karbonju u ekoloġika;

3.  Jemmen li għandhom jittieħdu passi biex in-nisa jiġu integrati fis-suq tax-xogħol u biex ikun hemm rikonċilazzjoni bejn il-ħajja tax-xogħol u l-ħajja tal-familja;

4.  Ifakkar li l-baġit tal-Unjoni Ewropea huwa strument importanti għat-titjib tas-solidarjetà bejn l-Istati Membru u bejn il-ġenerazzjonijiet, kif ukoll għat-titjib tal-kompetittività Ewropea; hu konvint li l-baġit tal-UE jirrappreżenta potenzjal sinerġetiku għall-implimentazzjoni ta' politiki li ma jistgħux jitwettqu mill-Istati Membri waħedhom; jitlob li jsir l-aħjar użu mill-għoti attwali ta' fondi mill-UE billi jkun hemm enfasi fuq il-valur miżjud tal-UE, il-koeżjoni ekonomika, soċjali u territorjali miżjuda, ir-razzjonalizzazzjoni effettiva u l-effetti tal-ingranaġġ;

5.  Jifhem it-tħassib tal-Kunsill fir-rigward tar-restrizzjonijiet ekonomiċi u baġitarji li jaġixxu fil-livell nazzjonali, bħala riżultat tal-kriżi globali li għamlet ħsara lit-tkabbir ekonomiku u l-istabilità finanzjarja tal-Istati Membri kif ukoll aggravat il-pożizzjoni tad-dejn tagħhom, iżda jemmen li fl-2013 għandhom jittieħdu miżuri li jsaħħu s-solidarjetà u jistimulaw it-tkabbir sostenibbli u l-impjieg sabiex jinkiseb irkupru ekonomiku;

6.  Jenfasizza l-ħtieġa li l-Kummissjoni u l-Istati Membri jsawru u jiffaċilitaw il-ħolqien ta' impjiegi ġodda sostenibbli ta' kwalità għolja permezz tal-iżvilupp, fl-UE, mhux biss ta' industriji li ma jagħmlux ħsara lill-ekosistema u trasport u enerġija ekoloġiċi u effiċjenti, iżda wkoll ta' servizzi innovattivi aġġornati;

7.  Ifakkar li l-baġit annwali tal-Unjoni Ewropea bl-effett ta' lieva tiegħu, irid jappoġġja l-politiki ta' rkupru tal-Istati Membri, u jirrikonoxxi l-ħtieġa li l-għoti ta' fondi jissaħħaħ u jiġi kkoordinat sabiex jimplimenta u jkun allinjat mal-Istrateġija Ewropa 2020 għat-Tkabbir u l-Impjiegi; isostni li l-valuri limitu taħt l-Intestatura 1a għall-qafas finanzjarju kurrenti huma insuffiċjenti biex jissodisfaw il-politiki prijoritarji tal-UE; jilqa' ż-żieda proposta fl-infiq fuq it-tkabbir sostenibbli, partikolarment is-Seba' Programm Qafas u l-Programm Qafas għall-Kompetittività u l-Innovazzjoni; jenfasizza l-ħtieġa li tingħata attenzjoni partikolari lill-implimentazzjoni tal-prijoritajiet baġitarji tal-PE tas-snin preċedenti fl-oqsma tal-politika industrijali, ir-riċerka u l-enerġija;

8.  Jemmen, f'dan ir-rigward, li għandu jkun hemm iffokar aktar b'saħħtu fuq il-proġetti ta' mobilizzazzjoni fi ħdan il-finanzjament tar-riċerka u l-innovazzjoni biex jitnaqqas id-distakk bejn ir-riżultati tar-riċerka u l-kummerċjalizzazzjoni, u b'hekk tiġi żgurata l-kompetittività Ewropea;

9.  Jistieden lill-Kummissjoni tiżgura livell suffiċjenti ta' għoti ta' fondi fl-2013 għar-riċerka u l-iżvilupp fir-rigward ta' applikazzjonijiet u servizzi speċifiċi tal-GNSS;

10. Jinnota r-rwol prinċipali li l-programmi ewlenin futuri tal-UE, bħal l-Orizzont 2020, il-COSME u l-Faċilità Nikkollegaw l-Ewropa, jista' jkollhom għall-irkupru ekonomiku tal-UE jekk jingħataw biżżejjed fondi; jemmen li l-baġit tal-2013 għandu jwassal għal tranżizzjoni bla xkiel lejn l-istabbiliment ta' dawn il-programmi l-ġodda; jitlob li jiġu mobilizzati riżorsi aktar sostanzjali, fil-politika ta' sinerġija u koeżjoni, sabiex tissaħħaħ is-sostenibilità tal-ekonomija Ewropea bħala mutur ewlieni għall-kompetittività, l-iżvilupp industrijali u r-reżiljenza fil-futur;

11. Jenfasizza l-importanza tal-politiki ta' appoġġ tal-UE għall-pluraliżmu tal-media, speċjalment permezz tar-riċerka, l-edukazzjoni u attivitajiet ta' disseminazzjoni; jenfasizza r-rwol ta' valur għoli li jista' jkollu ċ-Ċentru għall-Pluraliżmu u l-Libertà tal-Media li għadu kif twaqqaf;

12. Jiġbed l-attenzjoni lejn il-fatt li 85 % tal-impjiegi netti ġodda fl-UE bejn l-2002 u l-2010 nħolqu minn impriżi żgħar u ta' daqs medju(1); jitlob li jkun hemm titjib fil-politiki, il-programmi u r-riżorsi ta' appoġġ tal-UE li jiġi provduti biex jappoġġjaw lill-intrapriżi żgħar u ta' daqs medju biex jiżviluppaw bis-sħiħ il-potenzjal ta' tkabbir tagħhom, jiġifieri billi tiġi ffaċilitata l-parteċipazzjoni tal-intrapriżi żgħar u ta' daqs medju fl-akkwist pubbliku, jiġu garantiti investimenti fl-innovazzjoni, jiġu appoġġjati l-intrapriżi li għadhom jibdew, tingħata l-għajnuna biex jitqassmu l-piżijiet amministrattivi, titjieb il-mentalità intraprenditorjali u jiġi ffaċilitat u ssimplifikat l-aċċess għall-fondi, inkluż l-aċċess għall-kapital ta' riskju; jilqa' ż-żieda fl-allokazzjoni lill-programm Intraprenditorija u Innovazzjoni li jappoġġja l-innovazzjoni fl-intrapriżi żgħir u ta' daqs medju; jidispjaċih, madanakollu, li l-proposta tal-Kummissjoni ma tipprevedix l-implimentazzjoni sħiħa tal-Programm Enerġija Intelliġenti - Ewropa;

13. Ifakkar lill-Kummissjoni Ewropea bil-ħtieġa li ssaħħaħ l-iffokar u l-għoti ta' fondi tal-programmi mmirati biex jilħqu l-għanijiet fis-'Small Business Act' għall-Ewropa, li fih ġew stipulati sett ta' għaxar prinċipji biex jiġi żgurat ambjent tan-negozju aktar favorevoli għall-intrapriżi żgħar u ta' daqs medju;

14. Jifraħ lill-Kummissjoni għas-suċċess tal-azzjoni preparatorja tal-Erasmus għall-Intraprendituri ż-Żgħar, u jilqa' d-deċiżjoni li l-programm jiġi inkorporat fil-Programm għall-Kompetittività u l-Innovazzjoni; jiddispjaċih, madankollu, li l-azzjoni biex il-programm jiġi estiż hija mxekkla mill-allokazzjoni finanzjarja fqira u li, għal din ir-raġuni, is-sħab interessati u kapaċi qed jaqtgħu qalbhom; jistieden, għalhekk, lill-Kummissjoni biex tagħmel il-fondi disponibbli sabiex il-programm jikber b'mod adegwat fl-2012 u l-2013;

15. Jirrikonoxxi l-ħtieġa li jiġi evitat li l-intrapriżi żgħar u ta' daqs medju jnaqqsu mill-investimenti tagħhom, b'mod partikolari fir-riċerka u l-iżvilupp; jemmen li t-tisħiħ tal-appoġġ għall-intrapriżi żgħar u ta' daqs medju u l-infrastruttura min-naħa tal-Bank Ewropew għall-Investiment (BEI) għandu jkun prijorità ewlenija u, għalhekk, l-użu ta' dan l-appoġġ finanzjarju mill-intrapriżi żgħar u ta' daqs medju għandu jiġi massimizzat;

16. Jappoġġa bis-sħiħ l-Inizjattiva pilota tal-Bonds tal-Proġetti, immirata lejn il-mobilizzazzjoni tat-tfaddil privat u biex ittejjeb il-firxa ta’ strumenti finanzjarji disponibbli għal proġetti infrastrutturali tal-enerġija, it-trasport u t-teknoloġija tal-informatika u l-komunikazzjoni; jenfasizza l-ħtieġa li jsir użu adegwat mill-kriterji ta’ sostenibbiltà tal-BEI, fuq bażi ugwali mal-kriterji finanzjarji;

17. Jitlob li jiġu stabbiliti strumenti finanzjarji speċifiċi biex jappoġġjaw inizjattivi tal-Fond Ewropew għall-Investiment (FEI) biex tinbena infrastruttura Ewropea ta' għoti ta' fondi lill-intraprenditorija soċjali sabiex dan is-settur jiġi stabbilit bħala settur ekonomiku tal-istess importanza daqs setturi ekonomiċi oħra fl-Ewropa;

18. Ifakkar li madwar EUR triljun(2) għandhom jiġu investiti fis-sistema enerġetika tagħna bejn illum u l-2020 sabiex jintlaħqu l-objettivi tal-politika tal-Unjoni dwar l-enerġija u t-tibdil fil-klima u li hemm diskrepanza finanzjarja ta' madwar EUR 100 biljun għan-netwerks għat-trażmissjoni tal-enerġija;

19. Jiddeplora l-fatt li l-inizjattivi mmirati biex itejbu l-miri tal-enerġija ewlenin tal-UE ma ngħatawx fondi biżżejjed u li l-pjan SET għadu ma rċeviex biżżejjed fondi minkejja t-talbiet kontinwi tal-Parlament Ewropew;

20. Jemmen li jeħtieġ li l-UE tagħmel investimenti biex tiżgura aċċess Ewropew garantit għall-infrastruttura spazjali u orbitali;

21. Ifakkar li l-2103 se tkun l-aħħar sena tal-perjodu ta’ pprogrammar attwali u jinsab imħasseb dwar it-tnaqqis possibbli fil-livell tal-approprjazzjonijiet għall-ħlasijiet; jenfasizza li huwa essenzjali li jiġu ssodisfati l-impenji tal-UE fi proġetti kurrenti u jappoġġja ż-żieda proposta fil-ħlasijiet imresssqa mill-Kummissjoni fl-abbozz ta' baġit tagħha;

22. Jilqa' l-ftehim li ntlaħaq dwar il-finanzjament tal-ispejjeż addizzjonali tal-ITER f'Diċembru 2011, iżda huwa tal-fehma li l-garanzija tal-ammont ta' EUR 360 miljun fil-baġit tal-2013 ma għandhiex thedded l-implimentazzjoni b'suċċess ta' politiki oħra tal-UE, speċjalment dawk li jikkontribwixxu għall-miri tal-Istrateġija Ewropa 2020 matul din l-aħħar sena tal-perjodu ta' programmar, u jopponi speċifikament kwalunkwe riallokazzjoni tikser din il-prijorità baġitarja.

RIŻULTAT TAL-VOTAZZJONI FINALI FIL-KUMITAT

(1) Komunikazzjoni mill-Kummissjoni tal-25 ta' Ġunju 2008 lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni – 'Aħseb l-Ewwel fiż-Żgħir' – 'Att dwar in-Negozji ż-Żgħar' għall-Ewropa, COM(2008)394. (2) Prijoritajiet tal-infrastruttura tal-enerġija għall-2020 u wara – Pjan ddetaljat għal netwerk tal-enerġija Ewropew integrat, COM (2010) 677 finali.

SUĠĠERIMENTI

Il-Kumitat għall-Iżvilupp Reġjonali jistieden lill-Kumitat għall-Baġits, bħala l-Kumitat responsabbli, sabiex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Iqis li l-konsolidazzjoni fiskali trid tiġi bbilanċjata bl-investimenti meħtieġa biex jiġu segwiti l-miri tat-Trattati, minn naħa l-waħda, u biex jiġu bbilanċjati l-effetti negattivi tal-kriżi, min-naħa l-oħra;

2.  Jinnota li f’dawn iż-żminijiet diffiċli għall-ekonomija Ewropea, l-Istati Membri u l-istituzzjonijiet tal-UE jeħtieġu jikkunsidraw flimkien kif għandhom jifformulaw “Aġenda għat-tkabbir” u jagħtu sens u kredibilità akbar lill-politika dwar il-konsolidament tal-baġit; iqis li, f’dan il-kuntest, il-mobilizzazzjoni tal-istrumenti tal-UE, kemm jekk huma l-fondi strutturali jew jekk huma l-possibilitajiet offruti mill-Bank Ewropew tal-Investiment, jistgħu jagħtu kontribut sinifikanti biex dak l-objettiv jintlaħaq;

3.  Jenfasizza li l-Politika ta' Koeżjoni ilha li tat prova tal-valur miżjud tagħha bħala għodda ta' investiment meħtieġa biex jiġu rrealizzati t-tkabbir u l-ħolqien tal-impjiegi b'mod effikaċi billi tindirizza b'mod eżatt il-ħtiġijiet ta' investiment tar-reġjuni, u b'hekk tikkontribwixxi mhux biss għat-tnaqqis tad-disparitajiet ta' bejniethom, imma wkoll għall-irkupru ekonomiku u għall-iżvilupp tal-Unjoni b'mod ġenerali;

4.  Jinnota bi tħassib li l-aċċelerazzjoni tal-implimentazzjoni tal-parti l-kbira tal-programmi taħt l-Intestatura 1b wasslet biex fi tmiem l-2011 kien hemm ammont konsiderevoli ta’ ħlasijiet li kienu għadhom ma sarux, sitwazzjoni li se jkollha tiġi indirizzata permezz tad-disponibilità ta’ approprjazzjonijiet ta’ pagament suffiċjenti fl-2012;

5.  Jinsab imħasseb ukoll li dawn in-nuqqasijiet x’aktarx li jmorru għall-agħar fl-2013, filwaqt li l-implimentazzjoni taħt l-Intestatura 1b mistennija tkompli taċċelera aktar; jistieden lill-Kunsill u lill-Kummissjoni ħalli immedjatament janalizzaw u jivvalutaw, flimkien mal-Parlament, iċ-ċifri u l-ħtiġijiet bil-għan li l-implimentazzjoni għall-2013 ma tintefax f’riskju; jirrimarka li nuqqas ta’ approprjazzjonijiet ta’ pagament jista' jqiegħed f'periklu l-programmi li bħalissa qed jiffunzjonaw tajjeb u jista’ jillimita r-realizzazzjoni tal-objettivi li dawn il-programmi għandhom;

6.  Jistieden ukoll lill-Kunsill u lill-Kummissjoni jivvalutaw b’attenzjoni l-ħtiġijiet reali f’dawk li huma pagamenti għall-2013 taħt l-Intestatura 1b, jaraw li ma jagħmlu l-ebda tnaqqis li ma jkunx realistiku jew li ma jkunx ġustifikat biżżejjed u li ma jeħdux deċiżjonijiet li ma jaqblux mal-previżjonijiet mogħtija mill-Istati Membri nfushom u użati bħala bażi għall-abbozz ta' baġit tal-Kummissjoni; jenfasizza f’dan ir-rigward li se jopponi kwalunkwe tnaqqis li jista’ jkun hemm fil-livell tal-pagamenti kif imqabbla mal-ħtiġijiet stmati mill-Kummissjoni fuq dik il-bażi.

RIŻULTAT TAL-VOTAZZJONI FINALI FIL-KUMITAT

SUĠĠERIMENTI

Il-Kumitat għall-Agrikoltura u l-Iżvilupp Rurali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jinnota li, minħabba l-miżuri ta’ awsterità approvati f’bosta Stati Membri sabiex jerġgħu jibbilanċjaw il-baġits nazzjonali u jnaqqsu d-dejn pubbliku, huwa meħtieġ baġit realistiku tal-UE li jistipula kemm il-prijoritajiet pożittivi u negattivi; jinnota li l-impenji bbaġittjati għall-agrikoltura u l-iżvilupp rurali żdiedu bi ftit, b’żidiet fl-impenji ta’ 0.4 % u 1.3 % rispettivament meta mqabbla mal-2012, u żidiet fil-pagamenti ta’ 0.5 % u 5.4 % rispettivament, b’żieda totali f’pagamenti taħt l-Intestatura 2 ta’ 1.6 %, li huwa sew taħt iż-żieda proposta tal-baġit ta’ 6.8 %; jistieden lill-Kummissjoni biex kontinwament tfittex kulfejn huwa possibbli li jiġu ffrankati spejjeż fil-baġit, speċjalment permezz ta’ tnaqqis tal-infiq amministrattiv u bl-għoti ta’ finanzjament għal ħtiġijiet reali biss;

2.  Jinnota li l-marġni mbassar ta' EUR 809 miljun għas-subintestatura tan-nefqa relatata mas-suq u l-għajnuniet diretti taħt l-Intestatura 2 jirrappreżenta żieda sinifikanti meta mqabbel mal-2012, li, skont il-Kummissjoni, huwa fil-parti l-kbira r-riżultat ta' effett ta' darba wara t-tmiem tal-Fond għar-Ristrutturar tal-Industrija taz-Zokkor; jesprimi s-sodisfazzjon tiegħu li dan il-marġni jfisser li l-mekkaniżmu tad-dixxiplina finanzjarja mhux se jiġi applikat fl-2013;

3.  Jistenna, minħabba l-adeżjoni li ġejja tal-Kroazja fl-1 ta’ Lulju 2013, li r-reviżjoni tal-Qafas Finanzjarju Multiannwali (MFF) tiġi adottata malajr, f’konformità mal-Punt 29 tal-IIA (‘L-Aġġustament tal-qafas finanzjarju sabiex jindirizza t-tkabbir’), u jitlob lill-Kummissjoni tippreżenta l-proposta tagħha għall-approprjazzjonijiet addizzjonali korrispondenti hekk kif l-Att ta’ Adeżjoni jkun ġie rratifikat mill-Istati Membri kollha;

4.  Jinnota li hemm żieda proposta ta’ 5.4% f’approprjazzjonijiet ta’ pagament għall-iżvilupp rurali; jistieden lill-Kummissjoni tivverifika li din iż-żieda hija preċiża u tikkorrispondi mal-ħtiġijiet reali tal-Istati Membri; iħeġġeġ lill-Kummissjoni timmonitorja l-implimentazzjoni korretta tal-proġetti ta’ żvilupp rurali bil-ħsieb li tiġi ggarantita l-leġittimità tal-infiq tal-UE; jirrimarka li l-programmi tat-tieni pilastru tal-PAK jirrappreżentaw mutur importanti għall-iżvilupp rurali u għandhom jiġu mmirati lejn il-ġenerazzjoni tat-tkabbir, il-valur miżjud u l-impjiegi fiż-żoni rurali;

5.  Jinnota li ż-żieda proposta fl-għajnuniet diretti hija prinċipalment dovuta għall-introduzzjoni gradwali kontinwa ta’ pagamenti diretti fit-12-il Stat Membru tal-UE, li joħloq ħtieġa baġitarja addizzjonali ta’ EUR 860 miljun fl-2013, filwaqt li n-nefqa fuq l-interventi fis-suq mistennija tonqos minħabba dħul assenjat ogħla u s-sitwazzjoni favorevoli tas-suq għall-maġġoranza tas-setturi;

6.  Jesprimi tħassib dwar il-volatilità tas-swieq tal-biedja, li tikkawża inċertezza fost il-bdiewa u n-negozji agrikoli; jistieden lill-Kummissjoni timmonitorja l-iżviluppi fis-swieq agrikoli u tirreaġixxi bil-ħeffa u b’mod effettiv meta jkun meħtieġ; iħeġġeġ bil-qawwa lill-Kummissjoni tagħmel disponibbli strumenti għal żminijiet ta’ kriżi u żżid il-livell ta’ għarfien fost il-bdiewa fir-rigward ta’ kif għandhom jirreaġixxu għas-swieq volatili;

7.  Jesprimi t-tħassib tiegħu dwar il-problemi kontinwi fis-settur tal-frott u l-ħxejjex minħabba kundizzjonijiet tat-temp ħżiena u jtenni, għaldaqstant, il-ħtieġa li jiġu allokati riżorsi supplimentari maħsuba għall-miżuri ta’ prevenzjoni u ġestjoni tal-kriżijiet promossi mill-Organizzazzjonijiet tal-Produtturi; jinnota li dan is-settur diġà qed jiffaċċja problemi iebsa f’ċerti Stati Membri mill-2011 bħala riżultat tal-mod kif ġiet indirizzata s-sitwazzjoni meta faqqgħet l-EHEC; jinnota r-rwol importanti li jista’ jkollhom miżuri ta’ promozzjoni biex is-settur ikun b’saħħtu;

8.  Jinnota li l-ammonti assenjati lil ċerti linji tal-baġit, inkluż il-programm tal-ħalib fl-iskejjel, tnaqqsu b’mod sinifikanti, u jitlob lill-Kummissjoni tipprovdi lill-Parlament ġustifikazzjoni għal dan;

9.  Jinnota li l-Kummissjoni ma implimentatx numru ta’ proġetti pilota ewlenin rikjesti mill-Parlament: ‘Osservatorju Ewropew tal-Prezzijiet u Marġni tal-Farms’, ‘Miżuri kontra l-ispekulazzjoni tal-prodotti agrikoli’ u ‘Skambju tal-aqwa prattika għas-simplifikazzjoni tal-kundizzjonalità’; itenni li dawn il-kwistjonijiet għadhom prijorità għall-Parlament u jistenna lill-Kummissjoni tipprovdi spjegazzjoni dettaljata dwar ir-raġuni għaliex naqset milli timplimenta l-proġetti pilota u dwar kif qed tippjana li tindirizza dawn il-prijoritajiet fil-ġejjieni;

10. Jissottolinja l-iżbilanċi kontinwi fil-katina ta’ provvista tal-ikel, fejn il-pożizzjoni tal-produtturi primarji hija kunsiderevolment iktar dgħajfa minn dik ta’ atturi oħra; iħeġġeġ lill-Kummissjoni tieħu azzjoni biex ittejjeb it-trasparenza tal-prezzijiet u l-marġnijiet fil-katina ta’ provvista tal-ikel; jenfasizza l-valur ta’ proġett pilota f’dan il-qasam.

RIŻULTAT TAL-VOTAZZJONI FINALI FIL-KUMITAT

SUĠĠERIMENTI

Il-Kumitat għal-Libertajiet Ċivili, il-Ġustizzja u l-Intern jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jiddeplora l-fatt li, minkejja l-ambizzjonijiet dejjem akbar tal-UE fl-Ispazju ta' Libertà, Sigurtà u Ġustizzja u l-qafas finanzjarju attwali, l-abbozz ta' baġit propost mill-Kummissjoni jirrappreżenta biss żieda żgħira fl-approprazzjonijiet ta' impenn taħt is-subintestatura 3a meta mqabbel mal-2012;

2.  Jinsisti li, minkejja l-kriżi ekonomika u r-razzjonalizzazzjoni tal-infiq, is-sena finanzjarja 2013 hija sena ta’ konnessjoni mal-qafas finanzjarju multiannwali l-ġdid; konsegwentement, jeħtieġ li l-baġit 2013 ikun adegwat bħala prerekwiżit għall-qafas finanzjarju għall-2014-2020;

3.  Jenfasizza l-importanza li l-baġit tal-UE jiffoka fuq il-valur miżjud tal-UE u jkabbar kemm jista’ jkun l-effiċjenza tal-finanzjament nazzjonali f’oqsma ta’ interess komuni tal-UE;

4.  Jiddeplora t-tnaqqis propost mill-Kummissjoni fil-programm għall-prevenzjoni tal-kriminalità u l-ġlieda kontriha, fid-dawl tal-importanza ta’ dan il-qasam għall-UE kif juri ċar it-twaqqif reċenti tal-Kumitat Speċjali dwar il-Kriminalità Organizzata, il-Korruzzjoni u l-Ħasil tal-Flus, u jenfasizza li jeħtieġ li jkun hemm finanzjament disponibbli għall-prevenzjoni tal-kriminalità;

5.  Jiddeplora l-fatt li żieda żgħira biss hija proposta għall-Programm Drittijiet Fundamentali u Ċittadinanza u li l-baġit għas-Sena Ewropea taċ-Ċittadini jikkostitwixxi l-iċken baġit li qatt kien allokat għal Sena Ewropea; jitlob, għalhekk, li jkun hemm riżorsi suffiċjenti allokati għall-promozzjoni u l-protezzjoni tad-drittijiet fundamentali u tad-drittijiet taċ-ċittadini, speċjalment fid-dawl tal-klima dejjem akbar ta' intolleranza li ġejja mill-kriżi finanzjarja;

6.  Jilqa’ ż-żieda fil-baġit għall-erba’ fondi taħt il-programm tas-Solidarjetà u l-Ġestjoni tal-Flussi tal-Migrazzjoni meta mqabbel mal-baġit 2012; jiddispjaċih ħafna, madankollu, għall-iżbilanċ bejn il-fondi differenti, bi prijorità tingħata lill-Fond għall-Fruntieri Esterni u l-Fond Ewropew ta' Ritorn; jenfasizza li sehem ibbilanċjat ta' riżorsi finanzjarji għandu jiġi allokat lill-Fond għar-Refuġjati u lill-Fond għall-Integrazzjoni; jinnota li għandhom ikunu disponibbli riżorsi finanzjarji bl-iskop tar-rilokazzjoni intra-UE tal-migranti abbażi ta' solidarjetà mal-Istati Membri li jiffaċċjaw pressjonijiet migratorji sproporzjonati;

7.  Jikkunsidra li, peress li dan huwa fost il-prijoritajiet tal-Istrateġija għas-Sigurtà Interna tal-UE, il-bżonnijiet taċ-ċibersigurtà għandhom jiġu indirizzati skont il-linji baġitarji xierqa, filwaqt li jintużaw bis-sħiħ is-sinerġiji possibbli bejn il-programmi eżistenti; ; jinsisti li l-intensifikazzjoni tal-ġlieda kontra ċ-ċ-ċiberkriminalità fil-livell tal-Unjoni permezz taċ-Ċentru Ewropew taċ-Ċiberkriminalità se tirrikjedi finanzjament adegwat, u għalhekk jiddeplora t-tnaqqis propost mill-Kummissjoni għall-Europol, għaliex il-kompiti taċ-ċentru kif identifikati mill-Kummissjoni ma jistgħux jitwettqu bir-riżorsi umani u finanzjarji attwali tal-Europol;

8.  Iqis li jeħtieġ li tkun inkluża riżerva pożittiva fil-Programm għall-Prevenzjoni tal-Kriminalità u l-ġlieda kontriha, sabiex jingħata appoġġ lil azzjonijiet li jikkoordinaw aħjar l-isforzi dwar iċ-ċiberkriminalità bejn l-Aġenziji differenti, inkluża l-ENISA;

9.  Jinnota ż-żieda sinifikanti f'impenji u l-livell relattivament baxx ta' pagamenti għal SIS II; jinnota li, skont l-iskeda globali għal SIS II, fl-2013 l-iżvilupp u l-migrazzjoni tagħha għandhom jitlestew u l-Aġenzija IT għandha tieħu f'idejha l-ġestjoni tas-sistema; mhuwiex konvint, għalhekk, minn din iż-żieda sinifikanti fil-baġit fi stadju daqstant tard qabel ma s-SIS II hija mistennija li tibda topera; jirrakkomanda li sehem sostanzjali tal-baġit għal SIS II jinżamm fir-riżerva sakemm isir progress operazzjonali u jkun hemm konformità mal-ippjanar finanzjarju;

10. Jinsisti li l-aġenziji għandhom jirċievu fondi xierqa, abbażi tal-kontribut u r-riżultati tagħhom u b'kundsiderazzjoni tas-sitwazzjoni ġenerali tal-finanzi pubbliċi fl-UE, u għandhom ikunu allokati l-persunal meħtieġ biex iwettqu l-attivitajiet tagħhom;

11. Jiddispjaċih dwar il-fatt li l-Kummissjoni pproponiet riżorsi umani u finanzjarji insuffiċjenti biex jiżguraw l-iżvilupp kontinwu u l-funzjonament tal-EASO; jinnota li l-EASO għandu jkollu rwol kruċjali speċjalment fl-implimentazzjoni b'suċċess tat-Twissija Bikrija, il-Mekkaniżmu ta' Tħejjija u l-Ġestjoni tal-Kriżi kif previst mill-konklużjonijiet tal-Kunsill tat-8 ta' Marzu 2012;

12. Iqis li, fid-dawl taż-żieda fl-impenji skont il-mandat il-ġdid, speċjalment fil-qasam tad-drittijiet fundamentali u l-implimentazzjoni futura tal-EUROSUR, il-Frontex għandu jaħtar uffiċjal għad-Drittijiet fundamentali, malajr kemm jista' jkun, u kull baġit addizzjonali għal impjiegi ġodda għandu jitqiegħed fir-riżerva sakemm jimtela dan il-post; jitlob lill-Kummissjoni biex tiżgura li f'sitwazzjonijiet ta' emerġenza jkun hemm fondi speċifiċi disponibbli minnufih u jkunu allokati f'konformità mal-iżviluppi;

13. Jinsisti li għandu jiġi allokat finanzjament speċifiku għall-iżvilupp ta' kontrolli tal-fruntiera sensittivi għall-protezzjoni, li jirrispettaw bis-sħiħ id-drittijiet fundamentali tal-migranti u li jikkonformaw mal-Karta tad-Drittijiet Fundamentali tal-UE inkluż il-kontest tal-operazzjonjiet tal-Frontex;

14. Jilqa' r-rwol tal-finanzjament tal-UE fil-promozzjoni tas-solidarjetà fost l-Istati Membri u ma' pajjiżi terzi fil-qasam tal-migrazzjoni u l-asil

RIŻULTAT TAL-VOTAZZJONI FINALI FIL-KUMITAT

SUĠĠERIMENTI

Il-Kumitat għall-Affarijiet Kostituzzjonali jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

A. billi jagħraf is-sitwazzjoni tal-finanzi pubbliċi fil-livell nazzjonali, u billi l-baġit tal-Unjoni jirrappreżenta, fost affarijiet oħra, strument uniku li jista’ jservi ta’ katalizzatur għall-investiment, li għandu jiġi intensifikat fi żmien ta’ kriżi;

B.  billi jagħraf ir-riżoluzzjonijiet tiegħu tal-14 ta’ Marzu 2012 dwar il-linji gwida ġenerali għall-baġit 2013 – Taqsima III – Il-Kummissjoni(1) u tat-8 ta’ Ġunju 2011 bl-isem: “Ninvestu fil-ġejjieni: Qafas Finanzjarju Multiannwali (MFF) ġdid għal Ewropa kompetittiva, sostenibbli u inklużiva”(2);

1.  Huwa tal-fehma li l-2013 tista’ tkun, anzi jeħtieġ li tkun, is-sena li fiha jibdew jingħelbu l-kriżijiet, u li l-politika baġitarja m’għandhiex fiha nnifisha sservi ta’ ostakolu għall-prospett ta’ rkupru tat-tkabbir; iqis, għaldaqstant, li l-qafas finanzjarju multiannwali li jmiss 2014-2020 għandu jipprovdi bilanċ aħjar bejn miżuri restrittivi u dawk li jistimulaw il-ħolqien tal-impjiegi u r-ritorn lejn ix-xogħol, fil-qies sħiħ tal-integrazzjoni tal-politiki rigward l-ugwaljanza bejn il-ġeneri;

2.  Jissottolinja li l-2013 hija sena ta' qabel l-elezzjonijiet, li tirrikjedi politika ta’ komunikazzjoni bilanċjata ħalli ċ-ċittadini jkunu mgħarrfa dwar il-jeddijiet elettorali tagħhom u l-kwestjonijiet marbutin mal-elezzjonijiet Ewropej;

3.  Jiddispjaċih li s-Sena Ewropea taċ-Ċittadini 2013 ma setgħetx tibbenefika minn fondi addizzjonali mill-baġit tal-Unjoni, u jitlob li l-Kummissjoni tiżgura li l-objettivi tas-sena jkunu kkunsidrati sewwa fl-implimentazzjoni tal-politiki tal-Unjoni;

4.  Jenfasizza li, biex jiżguraw implimentazzjoni effikaċi tal-Inizjattiva taċ-Ċittadini Ewropej, il-Kummissjoni u l-Parlament Ewropew għandhom jagħmlu provvediment għal finanzjarment adegwat u ġust għal seduti pubbliċi ta’ smigħ;

5.  Huwa tal-fehma li l-partiti politiċi fil-livell Ewropew u l-fondazzjonijiet Ewropej għandhom jibbenefikaw minn finanzjament biżżejjed biex ikunu jistgħu jaqdu l-funzjoni li t-trattati jagħtu lill-partiti f’dak li jirrigwarda l-formazzjoni ta’ kuxjenza politika u l-espressjoni tar-rieda taċ-ċittadini; jistenna bil-ħerqa l-proposta tal-Kummissjoni li jinħoloq titolu ġdid fir-Regolament Finanzjarju li jkun iddedikat unikament u mfassal speċifikament għall-finanzjament tal-partiti u tal-fondazzjonijiet Ewropej.

RIŻULTAT TAL-VOTAZZJONI FINALI FIL-KUMITAT

(1) Testi adottati, P7_TA(2012)0077. (2) Testi adottati, P7_TA(2011)0266.

SUĠĠERIMENTI

Il-Kumitat għad-Drittijiet tan-Nisa u l-Ugwaljanza bejn is-Sessi jistieden lill-Kumitat għall-Baġits, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jenfasizza li, skont l-Artikolu 8 tat-Trattat dwar il-Funzjonament tal-Unjoni Ewropea, il-promozzjoni tal-ugwaljanza bejn l-irġiel u n-nisa hija prinċipju fundamentali tal-Unjoni Ewropea; jissottolinja li l-kwestjoni tal-ugwaljanza għandha tkun inkorporata fil-politiki kollha u indirizzata fil-livelli kollha tal-proċess tal-baġit;

2.  Jirrikonoxxi l-ħtieġa għall-viġilanza u l-attenzjoni għall-ammont ta’ flus minfuq fi żminijiet ta’ awsterità u għalhekk jisħaq dwar l-importanza ta’ finanzjament effettiv tal-UE li jagħti valur miżjud lill-proġetti kollha; jindika l-fatt li hu aktar neċessarju u urġenti minn qatt qabel, fi żmien ta' kriżi u fraġilità ekonomika, li ssir difiża mingħajr kompromessi tal-jeddijiet ta’ dawk l-aktar milqutin mill-konsegwenzi ta’ din il-kriżi, l-aktar in-nisa; jisħaq li l-ugwaljanza tas-sessi ma hijiex biss kwestjoni ta’ ġustizzja – ġie wkoll dimostrat li għandha impatt ekonomiku pożittiv;

3.  Itenni għalhekk it-talba tiegħu li l-approċċ favur l-ibbaġitjar skont il-ġeneru jintuża fil-valutazzjoni u r-ristrutturar tal-programmi, il-miżuri, u l-politiki kollha tal-baġit, ħalli jiġi ddeterminat sa liema punt ir-riżorsi għandhom jiġu allokati b'modi li jkunu sensibbli għall-ġeneru jew ma jħarsux lejn il-ġeneru, u fl-aħħar mill-aħħar, fil-ksib tan-newtralità tal-ġeneru, meta tingħata kunsiderazzjoni ndaqs lil kull individwu indipendentement mill-ġeneru;

4.  Jissottolinja l-ħtieġa ta’ fondi xierqa għall-azzjonijiet deskritti fl-Istrateġija tal-Kummissjoni għall-ugwaljanza bejn in-nisa u l-irġiel 2010-2015, billi titqies ukoll id-diskriminazzjoni multipla iffaċċjata fost l-oħrajn min-nisa migranti, nisa Roma, nisa b'diżabilitajiet, lesbiċi u nisa anzjani, u jħeġġeġ l-adozzjoni tal-‘ibbaġitjar skont il-ġeneru’ kemm fl-istrateġiji Ewropej u f’dawk nazzjonali għal promozzjoni aktar effikaċi tal-ugwaljanza bejn il-ġeneri; jisħaq dwar l-importanza li l-Kummissjoni tirrispetta l-impenn tagħha favur il-mainstreaming tal-ġeneru fl-azzjonijiet kollha tagħaha;

5.  Jenfasizza l-ħtieġa li jiġu allokati fondi miżjuda għall-ġlieda kontra l-forom kollha ta' diskriminazzjoni kontra n-nisa; jistieden, b’mod partikolari, lill-Kummissjoni tagħmel riżorsi finanzjarji disponibbli għal riċerka u informazzjoni settorjali mmirati, sensibilizzazzjoni u taħriġ għal azzjonijiet diretti lejn id-differenza fil-pagi bejn il-ġeneri u l-eliminazzjoni tal-vjolenza fuq in-nisa;

6.  Ifakkar lill-Istati Membri jagħmlu użu mill-fondi disponibbli skont il-Fond Soċjali Ewropew (FSE) u l-Fond Ewropew għall-Iżvilupp Reġjonali (FEŻR) għall-promozzjoni tal-ugwaljanza bejn il-ġeneri, l-aktar fil-qasam tal-impjiegi, u mhux biss bl-implementazzjoni tal-mainstreaming tal-ġeneri; jenfasizza li l-miżuri għandhom ikunu mmirati lejn gruppi ta’ nisa, billi jitqies l-impatt tal-kriżi ekonomika, l-investiment f'servizzi pubbliċi ta' kwalità għolja, u b'mod speċifiku, il-garanzija ta' għoti xieraq ta' servizzi ta' kwalità għolja bi prezzijiet li wieħed ilaħħaq magħhom ta’ kura għat-tfal, kura għall-anzjani, u kura għal persuni oħrajn li jiddependu minn ħaddieħor; jiġbed l-attenzjoni tal-FSE b’mod partikolari, li għandu jkollu kapaċità biżżejjed għall-promozzjoni tal-politiki intiżi għall-ugwaljanza, l-impjiegi permanenti ta’ kwalità għolja, u redistribuzzjoni ġusta tad-dħul; jitlob li tiġi inkluża l-perspettiva tal-ġeneru fir-regolamentazzjoni u fl-implimentazzjoni tal-fondi kollha tal-UE kif ukoll trasparenza baġitarja ġenwina;

7.  Jilqa’ d-deċiżjoni tal-Kummissjoni li tibda l-azzjoni leġiżlattiva li tittratta n-nuqqas ta’ nisa bħala membri ta’ bordijiet; iħeġġeġ lill-Kummissjoni tfassal u timplimenta l-intestaturi baġitarji relevanti fil-proposti leġiżlattivi tagħha sabiex jiżdied in-numru ta' nisa fil-bordijiet tal-kumpaniji; jitlob lill-Kummissjoni tiżviluppa wkoll azzjonijiet biex iżżid in-numru ta' nisa fil-pożizzjonijiet ta' tmexxija f'kull qasam tal-ħajja, b'mod partikolari biex jiżdied in-numru tan-nisa fil-politika;

8.  Jenfasizza li l-miżuri mmirati lejn il-ġlieda kontra l-vjolenza tal-ġeneru jridu jkunu ffinzjati suffiċjentement; jenfasizza r-rwol importanti li kellu l-programm tal-prevenzjoni u l-ġlieda tal-forom kollha ta’ vjolenza (DAPHNE) fl-eliminazzjoni tal-vjolenza fuq in-nisa fl-Unjoni Ewropea, u jisħaq l-importanza ta' żieda fil-finanzjament xieraq għall-programm fl-2013;

9.  Jirrikonoxxi d-deċiżjoni tal-Kummissjoni li tikkrea programm tal-finanzjament aktar flessibbli għall-azzjonijiet li jsiru mid-DĠ JUST taħt l-intestaturi Ġustizzja, Drittijiet u Ċittadinanza; iħeġġeġ lill-Kummissjoni tqis limitu aktar baxx għall-finanzjament għall-eliminazzjoni tal-vjolenza fuq in-nisa sabiex tiggarantixxi s-sostenibilità tal-azzjonijiet futuri f’dan il-qasam;

10. Jindika r-rwol importanti tal-intestaturi dwar l-ugwaljanza tal-ġeneri u l-antidiskriminazzjoni tal-Programm PROGESS fil-promozzjoni tal-ugwaljanza bejn l-irġiel u n-nisa u t-taqbida kontra d-diskriminazzjoni fl-Unjoni Ewropea; iħeġġeġ li dawn il-linji baġitarji ma jkunux ridotti fis-sena finali tal-Qafas Finanzjarju Multiannwali (MFF) 2007-2013 u li jittieħdu miżuri ħalli jiżguraw li l-finanzjament ikun iggarantit fl-MFF li jmiss, dak tal-2014-2020

11. Jafferma mill-ġdid l-ħtieġa ta' żieda fil-finanzjament għall-Istitut Ewropew għall-Ugwaljanza bejn is-Sessi sabiex ikun jista' jikseb bis-sħiħ l-objettivi ġenerali tiegħu tal-promozzjoni tal-ugwaljanza bejn il-ġeneri u s-sostenn tal-attività tal-istituzzjonijiet tal-UE, il-presidenzi tal-Kunsill tal-UE b’rotazzjoni u l-Istati Membri li jagħtu studji, data u statistika importanti marbuta mill-politiki tal-ġeneri fl-Ewropa;

12. Jiddispjaċih mill-fatt li numru għoli ta' nisa għadhom jgħixu fil-faqar jew jinsabu f'riskju ta' faqar, l-aktar in-nisa bi bżonnijiet speċjali, bħalma huma n-nisa b'diżabilitajiet, in-nisa immigranti, in-nisa ġejjin mill-minoranzi, in-nisa xjuħ u n-nisa li huma ommijiet mingħajr ma huma miżżewġin; iħeġġeġ lill-Kummissjoni talloka fondi biex tiġi indirizzata din il-problema, kemm meta tkun qed tfassal u timplimenta l-intestaturi baġitarji relevanti kif ukoll fil-politiki li tadotta;

13. Jitlob lill-Kummissjoni tvara proġetti pilota fl-oqsma li ġejjin:

–   miżuri mmirati lejn l-identifikazzjoni ta' forom ta' appoġġ ekonomiku disponibbli għall-unitajiet domestiċi monoparentali fl-Ewropa,

–   miżuri intiżi li jiżviluppaw l-indikaturi ħalli jsir il-benchmarking tal-istat ta’ implementazzjoni tal-‘Karta għall-Ugwaljanza bejn in-Nisa u l-Irġiel fil-Ħajja Lokali' kontra l-objettivi tal-istess,

–   miżuri għat-taqbida kontra l-kummerċ fin-nisa u l-prostituzzjoni, inkluż b’mod partikolari miżuri effettivi għall-protezzjoni ta’ dawk il-vittmi li jitkellmu, billi jkunu garantiti lilhom impjiegi b’jeddijiet u t-trawwim tal-inklużjoni soċjali tagħhom, u miżuri għall-ġlieda kontra t-traffikanti u l-promozzjoni tal-assistenza għall-iżvilupp fil-pajjiżi mnejn ikunu ġejjin il-vittmi,

–   miżuri intiżi għall-involviment tan-nisa fl-impjiegi favur l-ekoloġija u t-trasformazzjoni ekoloġika;

14. Jilqa' l-konsultazzjoni aperta tal-Kummisjoni dwar l-attivitajiet fil-qasam tas-Sena Ewropea taċ-Ċittadinanza 2013; jitlob lill-Kummissjoni tinkludi fil-fondi tal-baġit annwali allokati għall-attivitajiet speċifiċi bbażati fuq is-sessi, inklużi miżuri għaż-żieda tal-parteċipazzjoni tan-nisa fil-livell lokali, nazzjonali u Ewropew, b’enfasi partikolari fuq in-nisa ġejjin mill-minoranzi, in-nisa b’diżabilitajiet, in-nisa ixjeħ, u n-nisa li huma ommijiet imma mhux miżżewġin li spiss isibu rwieħhom soġġetti għal forom multipli ta' diskriminazzjoni;

15. Jisħaq dwar l-importanza tal-imsieħba soċjali fit-tifsil u l-implementazzjoni ta’ proġetti effettivi tal-UE għall-promozzjoni tal-ugwaljanza u l-eliminazzjoni tad-diskriminazzjoni; ifakkar li ħafna organizzazzjoni mhux-governattivi (NGOs) li huma attivi f’bosta livelli jagħtu kontribut importanti fil-livell Ewropew, fl-assistenza tal-iżvilupp tal-orjentamenti tal-politika marbuta mal-objettivi ġenerali tal-programmi DAPHNE u PROGRESS;

16. Jenfasizza l-importanza li finanzjament adegwat isir disponibbli għal miżuri biex tiġi promossa l-ugwaljanza bejn is-sessi fil-pajjiżi terzi filwaqt li jiġi żgurat li l-kundizzjonalità ta' dan il-finanzjament tkun ibbażata fuq il-progress kontinwu tad-drittijiet tal-bniedem, tal-libertajiet fundamentali u l-promozzjoni tad-demokrazija; jisħaq dwar il-ħtieġa ta’ miżuri ffinanzjati mill-UE għall-eliminazzjoni tal-kummerċ u l-vjolenza f’pajjiżi terzi, l-aktar il-fenomenu tal-mutilazzjoni ġenitali femminili, u għal programmi għat-tkabbir tal-parteċipazzjoni femminili fl-edukazzjoni u t-taqbida kontra l-illitteriżmu femminili, il-promozzjoni tal-parteċipazzjoni tan-nisa fil-livelli kollha tal-proċessi deċiżjonali u għall-inkoraġġiment tal-imprenditorija femminili;

RIŻULTAT TAL-VOTAZZJONI FINALI FIL-KUMITAT

Kumitat għas-Sajd

Iċ-Chairperson

IPOL-COM.PECH D(2012) 24881

Is-Sur Alain Lamassoure

Chairperson tal-Kumitat għall-Baġits

ASP 13E205

Suġġett: Prijoritajiet baġitarji għall-2013 tal-Kumitat PECH - riżoluzzjoni dwar il-mandat għat-Trilogu

Sur Chairperson,

Għażiż kollega,

Fil-kuntest tal-proċedura baġitarja għall-2013, il-Kumitati speċjalizzati huma mitluba jipprovdu kontribuzzjoni għar-riżoluzzjoni dwar il-mandat tat-Trilogu li jmiss. Meta jitqies il-kalendarju intern tal-Kumitat PECH u l-iskadenzi stabbiliti, il-kumitat tagħna mhux se jkun jista' jipprovdi opinjoni f'waqtha u xierqa. Huwa għalhekk li qed nipproponilek li tikkunsidra l-elementi li jsegwu l-prijoritajiet settorjali tagħna għall-2013.

Din l-ittra kienet soġġetta għal konsultazzjoni mal-koordinaturi kollha tal-gruppi tal-kumitat tagħna u r-rapporteur għal opinjoni tagħna għall-baġit 2013, is-Sur Crescenzio Rivellini. Hija tikkostitwixxi wkoll segwitu għall-konklużjonijiet tad-djalogu strutturat dwar il-prijoritajiet politiċi u leġiżlattivi għall-2013 li kellhom il-membri tal-Kumitat PECH fl-20 ta' Marzu 2012 mal-Kummissarju Maria DAMANAKI.

Il-prijoritajiet tal-Kumitat PECH jistgħu jinġabru f'5 punti :

1.  L-ewwel prijorità tal-Kumitat PECH hija ż-żamma tal-koerenza multiannwali tal-mezzi allokati bejn l-approprjazzjonijiet ta' impenn u l-approprjazzjonijiet ta' pagamenti, sabiex jiġu appoġġati l-objettivi allokati lill-Politika Komuni tas-Sajd (PKS), fid-dawl tar-riforma imminenti tagħha kif ukoll il-previżjoni tal-integrazzjoni tal-Kroazja fil-politiki b'rabta mas-sajd u mal-affarijiet marittimi. Kull tnaqqis fl-approprjazzjonijiet meta mqabbla mal-baġit 2012 ikun għalhekk inaċċettabbli.

2.  Jaqbel li jissaħħu l-approprjazzjonijiet tal-Fond Ewropew għas-Sajd (FES) b'mod sinifikanti għar-raġunijiet li jmiss:

–   huwa neċessarju li jiġi appoġġat iktar l-iżvilupp ta' akkwakultura sostenibbli, tas-sajd kostali, artiġjanali u familjari kif ukoll tal-intrapriżi żgħar u ta' daqs medju (SME) tas-settur. Iż-żieda mingħajr waqfien fl-ispejjeż ta' ġestjoni u ta' kemm l-oġġet iqum għandha konsegwenzi negattivi fuq id-dħul u l-impjieg, u dan jostakola l-ġejjieni tal-ekonomija marittima tradizzjonali. Huwa għalhekk neċessarju li jiġi favorizzat l-impjieg lokali bl-għan li jiġi ppreservat it-tessut eżistenti tas-sajd kostali, artiġjanali u familjari fuq skala żgħira;

–   huwa wkoll indispensabbli li jiġi appoġġat u promoss id-dħul taż-żgħażagħ fis-settur għaż-żamma ta' bilanċ soċjoekonomiku ottimali sabiex jintlaħqu l-objettivi ta' Ewropa 2020 fil-qasam tal-impjieg;

–   jaqbel ukoll li jiżdiedu l-isforzi baġitarji fil-kuntest tas-sħubija tal-Kroazja, sabiex tiġi modernizzata l-flotta billi titjieb l-iġjene u s-sikurezza abbord il-bastimenti biex ikun hemm titjib fil-kundizzjonijiet tax-xogħol. Dawn l-isforzi, minbarra li jikkonċernaw il-kundizzjonijiet tax-xogħol, huma marbuta b'mod profond mal-limitazzjoni tal-isforzi tas-sajd billi jiġu favorizzati tekniki ta' sajd iktar selettivi li jeliminaw l-iskart tal-ħut, kif ukoll mas-sikurezza alimentari tal-prodotti tal-baħar billi jitjiebu l-kundizzjonijiet tal-ħażna.

3.  Barra minn hekk, għandhom jiġu żgurati biżżejjed approprjazzjonijiet għar-riċerka xjentifika u għall-ġbir tad-data fl-oqsma tal-konservazzjoni, tal-ġestjoni u tal-isfruttament tar-riżorsi tas-sajd (11.07).

4.  Jaqbel ukoll li tiġi enfasizzata l-importanza tal-kontroll (11.08) tal-attivitajiet tas-sajd u b'mod partikolari r-rwol primordjali tal-Aġenzija Ewropea għall-Kontroll tas-Sajd, li għaliha kwalunkwe tnaqqis fl-approprjazzjonijiet ikollu konsegwenzi ferm negattivi fuq is-settur, u li l-Kumitat għas-Sajd jopponi bis-saħħa.

5.  Fl-aħħar nett, il-proposta li l-politika marittima integrata ma tiġix allokata approprjazzjonijiet ta' impenn hija meqjusa bħala inaċċettabbli.

Nittamaw li l-Kumitat għall-Baġits u r-rapporteur ġenerali tiegħu, is-Sur Giovanni LA VIA, jaqblu ma' dawn il-prijoritajiet u jkunu jistgħu jinkluduhom fir-riżoluzzjoni dwar il-mandat ta-Trilogu.

Dejjem Tiegħek,

Gabriel Mato Adrover                                                                   Crescenzio Rivellini

Iċ-Chairperson                                                                              Ir-Rapporteur

Kopja: Is-Sur Giovanni LA VIA, Rapporteur ġenerali għall-baġit 2013