Nagħtuk informazzjoni dwar l-għażliet biex issolvi s-sitwazzjoni
Il-Koordinatur jista' jappoġġjak billi jiggwidak fir-rigward tad-diversi għażliet miftuħa għalik sabiex is-sitwazzjoni tkun tista' tiġi solvuta malajr kemm jista' jkun.
Se nagħmlu dan b'mod imparzjali u newtrali, iggwidati mill-prinċipju tal-aħjar interessi tat-tfal, filwaqt li nqisu li ibnek/bintek għandu/għandha d-dritt li jkollu/jkollha relazzjoni u kuntatti maż-żewġ ġenituri tagħhom, dment li dan ma jkunx kontra l-interessi tagħhom.
Jekk jogħġbok innota li l-Koordinatur taħt l-ebda ċirkostanza ma joffri parir legali jew assistenza legali.
Niggwidawk fil-kumplessità tal-proċeduri
L-uffiċċju tal-Koordinatur qed jaħdem mill-qrib mal-korpi u mal-partijiet ikkonċernati nazzjonali u internazzjonali, mal-esperti dwar il-ħtif tal-minuri mill-ġenituri u dwar kwistjonijiet transfruntiera oħra tal-familja. Fejn xieraq, aħna nistgħu niggwidawk billi nipprovdu informazzjoni dwar miżuri disponibbli sabiex tiġi rrimedjata s-sitwazzjoni.
Peress li l-gwida tal-Koordinatur ma tikkostitwixxix parir legali jew assistenza legali, l-informazzjoni pprovduta hija tabilħaqq addizzjonali għall-parir legali professjonali pprovdut mill-avukati tiegħek u ma tissostitwixxihx.
Nagħtuk informazzjoni dwar il-medjazzjoni bħala alternattiva għall-proċeduri tal-qorti
Il-medjazzjoni f'każijiet ta' familja b'kunflitt għoli bħall-ħtif transfruntier tal-minuri mill-ġenituri u t-tilwim dwar il-kustodja u l-aċċess tista' tkun effettiva ħafna peress li l-ġenituri huma ggwidati minn medjaturi imparzjali u esperjenzati. Il-medjaturi transfruntiera huma speċjalisti mħarrġa u familjari mal-kumplessitajiet ta' każijiet bħal dawn.
Il-medjazzjoni tista' tgħinek tikkomunika mal-eks sieħeb/sieħba f'ambjent sikur u newtrali u ssib soluzzjoni volontarja, vijabbli u orjentata lejn it-tfal li tkun aċċettabbli għaż-żewġ ġenituri, iżda fuq kollox se tgħinek tiffoka fuq il-ħtiġijiet ta' ibnek/bintek u tiżgura li l-aħjar interessi tat-tifel/tifla jiġu protetti. Tista' tgħinek tevita wkoll proċeduri ġudizzjarji twal u li jiswew il-flus.
Aħna nistgħu nispjegaw kif taħdem il-medjazzjoni u se nfittxu li nħeġġuk biex tqis din l-għażla, jekk ikun xieraq.
Jekk tixtieq issir taf aktar dwar il-medjazzjoni, jekk jogħġbok ibgħatilna email sabiex inkunu nistgħu nipprovdulek l-informazzjoni rilevanti. Aħna nistgħu niggwidawk biex tikkuntattja lill-medjaturi mħarrġa fil-kunflitti transfruntiera fil-familja u b'mod partikolari, f'każijiet ta' ħtif ta' minuri mill-ġenituri f'pajjiżek.
Għal medjaturi transfruntiera esperjenzati, tista' tikkonsulta lin-Network tal-UE tal-Medjaturi tal-Familja u liċ-Ċentru Internazzjonali ta' Medjazzjoni għall-Kunflitti fil-Familja u l-Ħtif tat-Tfal (MiKK).
Nirreferuk għal avukati speċjalizzati u għajnuna legali
Il-proċeduri ta' ritorn u tilwim familjari transfruntier ieħor huma kumplessi u għalhekk inħeġġuk tfittex parir mingħand avukati li għandhom għarfien speċjalizzat u esperjenza fi proċeduri legali bħal dawn.
L-awtoritajiet ċentrali fil-pajjiżi tal-UE jistgħu jipprovdulek id-dettalji ta' avukati li jaħdmu f'dan il-qasam f'kull pajjiż.
Tista' tikkonsulta wkoll in-network ta' Avukati fl-Ewropa li jiffokaw fuq il-Ħtif internazzjonali tal-Minuri mill-Ġenituri (LEPCA). Dan in-network ta' prattikanti privati, avukati u professjonisti legali, jittratta każijiet internazzjonali ta' ħtif ta' minuri. In-network ġie stabbilit bħala riżultat ta' żewġ proġetti Ewropej fl-2012.
Jekk ibnek/bintek ikunu ttieħdu f'pajjiż fejn il-Konvenzjoni tal-Aja tal-1980 ma tapplikax, nistgħu ninfurmawk ukoll dwar interventi lokali possibbli.
Il-proċeduri legali dwar it-tilwim familjari transfruntier jistgħu jkunu għaljin. Jekk tirrikjedi għajnuna legali, il-portal tal-Ġustizzja Elettronika jipprovdi informazzjoni dettaljata dwar kif tista' tikseb għajnuna legali fi Stat Membru ieħor. L-awtorità ċentrali tista' wkoll tagħtik pariri dwar l-għażliet li għandek disponibbli.