RAPPORT dwar ir-relazzjonijiet ekonomiċi u ta' kummerċ ta' l-UE ma' l-Indja
20.7.2006 - (2006/2034(INI))
Kumitat għall-Kummerċ Internazzjonali
Rapporteur: Sajjad Karim
MOZZJONI GĦAL RIŻOLUZZJONI TAL-PARLAMENT EWROPEW
dwar ir-relazzjonijiet ekonomiċi u ta' kummerċ ta' l-UE ma' l-Indja
Il-Parlament Ewropew,
– wara li kkunsidra l-Pjan ta' Azzjoni Konġunt għal Sħubija Strateġika bejn l-Indja u l-UE tas-7 ta' Settembru 2005 u b'mod partikolari s-sezzjoni dwar l-iżvilupp tal-kummerċ u l-investiment,
– wara li kkunsidra l-konklużjonijiet tad-9 laqgħa tal-konferenza bejn l-Indja u l-UE f'Hyderabad bejn it-18 u l-20 ta' Settembru 2005,
– wara li kkunsidra r-riżoluzzjoni tiegħu tat-13 ta' Ottubru 2005 dwar il-prospetti għal relazzjonijiet ta' kummerċ bejn l-UE u ċ-Ċina[1].
– wara li kkunsidra r-riżoluzzjoni tiegħu tad-29 ta' Settembru 2005 dwar ir-relazzjonijiet bejn l-UE u l-Indja. Sħubija Strateġika[2],
– wara li kkunsidra l-pożizzjoni tiegħu ta' l-1 ta' Diċembru 2005 dwar il-proposta għal-regolament tal-Parlament Ewropew u tal-Kunsill dwar l-għoti ta' liċenzji obbligatorju ta' privattivi relatati mal-manifattura ta' prodotti farmaċewtiċi għall-esportazzjoni lejn pajjiżi bi problemi ta' saħħa pubblika[3],
– wara li kkunsidra d-deċiżjoni tal-WTO dwar il-Ftehim dwar l-Aspetti tad-Drittijiet ta' Propjetà Intellettwali relatati mal-Kummerċ (TRIPS) u s-saħħa pubblika adottata fid-29 ta' Novembru 2005,
– wara li kkunsidra r-riżoluzzjoni tiegħu ta' l-14 ta' Frar 2006 dwar il-klawżola tad-drittijiet tal-bniedem u d-demokrazija fi ftehimiet ta' l-Unjoni Ewropea[4].
– wara li kkunsidra l-Ftehim ta' l-2004 bejn l-Indja u l-Istati Uniti: "Il-Pass li jmiss lejn Sħubija Strateġika" u s-Civil Nuclear Deal negozjat waqt iż-Żjara Statali tal-President George W. Bush fl-Indja fit-2 ta' Marzu 2006,
– wara li kkunsidra r-riżoluzzjoni tiegħu ta' l-4 ta' April 2006 dwar l-evalwazzjoni tan-negozjati ta' Doha wara l-Konferenza Ministerjali tal-WTO f'Hong Kong[5],
– wara li kkunsidra s-'Summit' ta' l-Enerġija bejn l-UE u l-Indja li sar f' New Delhi fis-6 ta' April 2006,(A6 0256/2006)(A6 0256/2006)
– wara li kkunsidra ż-żjara ta' New Delhi u l-Punjab minn delegazzjoni tal-Parlament Ewropew għar-relazzjonijiet mal-pajjiżi ta' l-Asja t'Isfel u l-Assoċjazzjoni ta' l-Asja t'Isfel għall-Koperazzjoni Reġjonali (SAARC) f'April 2006,
– wara li kkunsidra l-Artikolu 45 tar-Regoli ta' Proċedura tiegħu,
– wara li kkunsidra r-rapport tal-Kumitat għall-Kummerċ Internazzjonali u l-opinjoni tal-Kumitat għall-Iżvilupp (A6 0256/2006).
A. billi l-UE u l-Indja jikkostitwixxu l-akbar demokraziji fid-dinja u l-impenn kostituzzjonali tagħhom lejn il-pluraliżmu u l-istat tad-dritt jippromwovi l-konsistenza fir-relazzjonijiet kummerċjali u ekonomiċi, filwaqt li jipprovdi ċertezza legali għall-investiment u jikkontribwixxi għall-istabilità reġjonali u mondjali;
B. billi l-Pjan ta' Azzjoni Konġunt jinkludi numru komprensiv ta' attivitajiet li għandhom jitwettqu fil-qafas tad-djalogu u l-koperazzjoni fil-politika kummerċjali u ekonomika, iżda billi jonqos milli jiffissa prijoritajiet u dati ta' skadenza;
C. billi l-UE hija l-akbar sors ta' investiment barrani dirett (FDI) ta' l-Indja b'ammont ħiereġ li jlaħħaq EUR 1,100 miljun fl-2004, u billi d-dħul fl-FDI ta' l-Indja lejn l-UE żdied minn EUR 140 miljun fl-2002 għal EUR 600 miljun fl-2003;
D. billi l-Istati Membri ta' l-UE jikkostitwixxu 22.4% ta' l-esportazzjoni ta' l-Indja u 20.8% ta' l-importazzjoni u billi l-kummerċ bejn l-UE u l-Indja kiber minn EURO 4,400 miljun għal EUR 33,200 miljun bejn l-1980 u l-2004 u b'16.9% bejn 2003-2004;
E. billi jeżisti żbilanċ fil-livelli relattivi ta' kummerċ bejn l-UE u l-Indja; billi l-UE tikkostitwixxi 21% tal-kummerċ ta' l-Indja iżda s-sehem ta' l-Indja mill-kummerċ ta' l-UE huwa inqas minn 1%; billi l-UE hija l-akbar sieħeb fil-kummerċ ma' l-Indja iżda l-Indja tinsab fl-10 post fil-lista relattiva ta' l-UE;
F. billi l-ekonomija ta' l-Indja kibret b'medja ta' 6% fis-sena fl-aħħar għaxar snin u billi tista' tkompli tikber bejn 7-8% fl-għaxar snin li ġejjin;
G. billi settur finanzjarju ineffiċjenti huwa ta' xkiel għall-Indja sabiex iżżomm rata ta' tkabbir ekonomiku ta' 8%;
H. billi, minħabba l-kobor, il-popolazzjoni u t-tkabbir ekonomiku dinamiku tagħha fl-aħħar għoxrin sena, l-Indja hija potenza reġjonali emerġenti u waħda mill-potenzi nukleari dinjin kapaċi tinfluwenza d-direzzjoni ta' l-ekonomija u s-sigurtà fid-dinja, ħaġa li tagħti lill-Indja responsabilità akbar fil-fora multilaterali bħal ma huma n-Nazzjonijiet Uniti, l-Organizzazzjoni Dinjija għall-Kummerċ (WTO) jew l-Aġenzija Internazzjonali għall-Enerġija Nukleari, u fi ħdan organizzazzjonijiet reġjonali fl-Asja, b'mod partikolari l-SAARC u l-Assoċjazzjoni tan-Nazzjonijiet ta' l-Asja tax-Xlokk (l-ASEAN);
I. billi l-espansjoni ta' l-Indja ġġib opportunitajiet ta' benefiċċju iżda tqanqal ukoll tħassib għal ċerti setturi ta' l-industrija ta' l-UE, u ġġib magħha l-bżonn ta' mmanniġġar u koperazzjoni f'livell politiku għall-immaniġġjar ekonomiku u kummerċjali ta' esportazzjoni tagħha fil-livell ta' l-UE;
J. billi, jekk jinżamm it-tkabbir attwali fil-popolazzjoni ta' 2%, fl-2005 l-Indja jkollha popolazzjoni ta' 1.4 biljun ruħ u tkun ta' sfida għaċ-Ċina bħala l-pajjiż bl-akbar popolazzjoni fid-dinja;
K. billi fl-2020 l-età medja ta' Ewropew tal-Punent tkun 45 filwaqt li dik medja fl-Indja tkun biss ta' 29; billi, bħala riżultat tax-xejriet demografiċi kurrenti, it-tkabbir potenzjali ta' l-UE għandu jonqos sa' l-2020; billi, mill-banda l-oħra, il-vantaġġ prinċipali komparattiv ta' l-Indja huwa numru kbir ta' ħaddiema ta' età żgħira mħarrġa li jitkellmu bl-Ingliż u li ma jqumux flus;
L. billi l-konklużjoni pożittiva ta' l-Aġenda ta' Żvilupp ta' Doha (DDA) hija ta' importanza kruċjali kemm għall-UE u kemm għall-Indja u billi ftehim bħal dan ma jeskludix ftehimiet bilaterali tal-WTO+;
M. billi l-Indja hija waħda mill-pajjiżi li l-aktar jagħmlu użu mill-istrumenti kontra d-'dumping', kemm bħala inizjatur u kemm bħala l-mira tagħhom: fl-aħħar għaxar snin inizjat 412-il investigazzjoni, segwita mill-Istati Uniti b'358 u l-UE b'318;
N. billi l-Indja reċentement stabbiliet qafas ta' Indikazzjoni Ġeografika (GI), iżda 27 GIs Indjani diġà ġew irreġistrati u aktar minn 40 applikazzjoni huma pendenti;
O. billi l-infurzar ta' l-obbligi dwar id-drittijiet ta' propjetà intellettwali fi ħdan il-WTO huwa importanti kemm għall-UE u kemm għall-Indja;
P. billi d-Djaspora Indjana hija ta' aktar minn 20 miljun, bi kważi 3 miljun jgħixu fl-UE, li jipprovdu finanzjament fl-Indja li jilħaq medja ta' 6,000 miljun Dollaru Amerikan fis-sena;
Q. billi t-tensjoni kontinwa mill-1945 'l hawn bejn l-Indja, li issa għandha armi nukleari, u l-Pakistan, li ġabet id-dinja fix-xifer ta' gwerra nukleari, tiskoraġġixxi l-investiment u l-impenji interni fiż-żewġ pajjiżi;
R. billi d-domanda dinjija għaż-żejt kibret b'7 miljun barmil kuljum mill-2000 'il hawn, b'miljun barmil ta' dak it-tkabbir imur għall-Indja, li r-rata ta' konsum ta' żejt tagħha qed jiżdied b'ritmu mgħaġġel; billi l-Indja għandha r-raba' l-akbar industrija ta' l-etanol fid-dinja bi produzzjoni annwali ta' 462 miljun gallun fis-sena; billi 70% ta' l-enerġija kkunsmata fl-Indja hija impurtata; billi t-tkabbir ekonomiku kostanti se jiddependi mill-provvista ta' mezzi ta' enerġija ġodda; billi d-domanda dinjija għaż-żejt, li dejjem qed tikber, hija sors potenzjali ta' instabilità ekonomika u ta' tensjoni strateġika u politika;
S. billi, madanakollu, l-Indja se tkun l-ewwel pajjiż fl-Asja t'Isfel li jistabbilixxi riservi strateġiċi taż-żejt;
T. billi 390 miljun Indjan jgħix fuq inqas minn Dollaru Amerikan kuljum u billi t-tkabbir ta' l-Indja kellu effetti li ma kinux ugwali għas-setturi differenti tas-soċjetà, b'impatt biss fuq frazzjoni żgħira ħafna tal-popolazzjoni;
U. billi l-prodott gross domestiku ta' l-Indja tar-reġun li għandu l-aktar tkabbir mgħaġġel, Guajrat, irdoppja bejn l-1993 u l-2003 u l-prodott kull ras żdied b'73%; billi, min-naħa l-oħra, għall-ifqar ta' l-Indja, Bihar, iż-żieda fil-prodott kull ras kienet ta' 22% biss għall-istess perjodu;
V. billi t-tnedija ta' l-inizjattiva fit-2 ta' Frar 2006 magħrufa bħala l-Iskema ta' Garanzija għall-Impiegi Rurali, fid-distrett ta' Anantapur (Andhra Pradesh), se tissalvagwardja 100 jum xogħol fis-sena, fuq salarju minimu, fi proġetti pubbliċi għal membru wieħed ta' unitajiet tal-familji fuq dħul baxx; u billi dan il-programm jirrappreżenta l-iskema l-aktar ambizzjuża biex indirizzat il-faqar rurali fl-Indja;
W. billi l-Indja hija l-akbar benefiċjarju singolu ta' l-iskema GSP - Sistema Ġenerali ta' Preferenza, b'esportazzjoni ta' EUR 7,700 miljun intitolati għal aċċess preferenzjali lejn is-suq ta' l-UE, jew mingħajr l-ebda ħlas ta' dazju jew b'rati mnaqqsa, fl-2005; billi dan ifisser li kważi nofs l-esportazzjoni ta' l-Indja lejn l-UE, stmata li tlaħħaq ftit aktar minn EUR 17,000 miljun, ibbenefikat mill-iskema GSP; billi t-tariffi għall-ħwejjeġ Indjani tnaqqsu b'medja bejn 12% u 9.5%;
X. billi l-aktar li pprofittaw mill-abolizzjoni ta' kwoti fuq it-tessili u l-ħwejjeġ mill-1 ta' Jannar 2005 kienu ċ-Ċina u l-Indja bl-esportazzjoni tiżdied b'42% u 18% rispettivament, is-sena li għaddiet; billi, mill-banda l-oħra, bosta fornituri ta' pajjiżi oħra li qed jiżviluppaw marru lura, għalkemm l-impożizzjoni mill-ġdid ta' kwoti mill-UE fuq l-esportazzjoni taċ-Ċina f'nofs l-2005 kellha effett pożittiv fuq l-esportazzjoni tagħha fit-tieni nofs tas-sena;
Y. billi l-Indja għandha wieħed mill-ogħla rati fid-dinja ta' tħaddim ta' tfal;
Z. billi, skond rapport ta' l-Istati Uniti ta' l-2006 dwar l-epidemija dinjija ta' l-AIDS, 5.7 miljun ruħ huma infettati bl-HIV/AIDS fl-Indja; billi inqas minn 1% tal-popolazzjoni ta' adulti fl-Indja attwalment huwa stmat li huwa infettat iżda l-Indja taqbeż l-Afrika t'Isfel bħala l-pajjiż bl-akbar numru ta' persuni infettati bl-HIV/AIDS, li huwa xhieda ta' l-impatt li l-marda qed ikollha fis-subkontinent ta' l-Asja t'Isfel; billi stati b'inċidenza għolja huma ekonomiji vivaċi li jiġbdu xogħol itineranti u s-servizzi ta' trasport fit-toroq, li t-tnejn iwasslu għall-infezzjoni;
AA. billi madwar 80% ta' l-art ġeografika ta' l-Indja hija vulnerabbli għaċ-ċikluni, l-għargħar, iċ-ċediment ta' massa ta' l-art, nixfiet, terremoti kif ukoll perikli karatteristiċi għal-lokal, u billi l-kumbinazzjoni ta' kundizzjonijiet soċjo-ekonomiċi foqra u d-diżastri ħolqot ċirku vizzjuż ta' faqar u vulnerabilità;
BB. billi l-preżenza tal-malarja u l-kolera għadhom sors ta' problemi serji fl-Indja, li għalihom politiki speċjali għandhom jiġu adottati;
CC. billi d-diskriminazzjoni kostanti li hija parti integrali mis-sistema tal-kasti tfisser li l-Indja tibqa' ma tiħux l-aħjar mill-poplu tagħha f'termini ta' potenzjal u kapaċitajiet;
Kummerċ
1. Jilqa' b'sodisfazzjon l-impenn kemm ta' l-indja u kemm ta' l-UE għal riżultat pożittiv tad-DDA; jistieden l-Indja għal dan il-għan sabiex tuża l-pożizzjoni tagħha bħala l-mexxejja tal-G20 biex tilħaq, sa tmiem l-2006, ftehim bilanċjat favorevoli għall-iżvilupp bejn il-pajjiżi żviluppati, l-ekonomiji emerġenti u l-pajjiżi li qed jiżviluppaw; jinnota li n-negozjati dwar id-DDA mhumiex kompatibbli ma' negozjati bilaterali tal-WTO+; jinnota li r-riżultat tal-programm ta' Żvilupp tad-Doha għandu jnaqqas il-valur ta' skemi bħall-GSP għall-pajjiżi li qed jiżviluppaw bħall-Indja, billi jitnaqqas aktar il-marġini ta' preferenza li qegħdin igawdu fil-preżent; jistieden l-UE sabiex toffri li tidħol fi ftehim ta' kummerċ ħieles ma' l-Indja, fuq il-linji tal-ftehim tagħha maċ-Ċilì, li jipprovdi għad-dħul mingħajr dazju għall-esportazzjoni taż-żewġ partijiet fuq bażi reċiproka, u jistieden lill-Grupp għall-Kummerċ ta' Livell Għoli biex jesplora l-opportunitajiet taż-żewġ naħat f'dan ir-rigward;
2. Jenfasizza l-fatt li riżultat pożittiv tad-DDA jeħtieġ l-appoġġ sħiħ kemm ta' l-UE u kemm ta' l-Indja; iħeġġeġ l-Indja u l-G20 sabiex jirrealizzaw li l-offerta Ewropea dwar l-agrikoltura għandha tiġi segwita minn offerta raġonevoli mill-G20 dwar l-Aċċess għas-Suq ta' Prodotti Mhux Agrikoli (l-NAMA) u s-servizzi;
3. Jilqa' b'sodisfazzjon il-ħidma tal-Grupp għall-Kummerċ ta' Livell Għoli għal titjib fil-koperazzjoni, u l-implimentazzjoni f'fażijiet tal-Pjan ta' Azzjoni, li ddeterminat l-involviment progressiv ta' l-Indja fi proġetti kbar u konġunti internazzjonali bħall-programmi ITER u Galileo; jinnota, madanakollu, li għalkemm il-Pjan ta' Azzjoni Konġunt jipprovdi għal djalogu kontinwu f'ħafna oqsma, ma jipprovdi l-ebda indikazzjoni fir-rigward ta' prijoritajiet u skadenzi; jistieden liż-żewġ partijiet sabiex juru r-rieda politika neċessarja biex jikkonsolidaw ir-relazzjonijiet tagħhom għal sħubija strateġika effettiva;
4. Huwa mħasseb li, minkejja statistiċi inkuraġġanti, għad baqa' bosta setturi ta' potenzjal għall-kummerċ għaż-żewġ ekonomiji li ma ġiex sfruttat; jistieden lill-Gruppi għall-Kummerċ ta' Livell Għoli biex jittrattaw kwistjonijiet ta' kummerċ u investiment bħala parti minn djalogu estiż, inklużiv u politiku u tiġi esplorata l-koperazzjoni f'setturi bħal ma huma l-migrazzjoni, l-edukazzjoni u l-iskambju kulturali;
5. Jinnota li t-tariffi ta' importazzjoni għoljin ta' l-Indja u, minkejja l-progress reċenti sinifikattiv, l-ostakli mhux tariffati, jibqgħu kawża ta' tħassib ġenwin għall-industrija ta' l-UE; jemmen li ż-żamma ta' politika protezzjonistika bħal din wara l-liberalizzazzjoni ekonomika tagħti lok għal tfixkil fis-suq u manipolazzjoni; huwa mħasseb li n-negozjati tal-WTO dwar tariffi ma wasslu għall-ebda titjib (ma kien hemm l-ebda rbit ta' tariffi jew impenn għal rati massimi "obbligatorji", li wkoll inżammu għoljin) u li l-isforzi li għamlet il-Kummissjoni bħala konsegwenza biex jinbeda djalogu ma' l-Indja fuq is-suġġett ta' tfixkil speċifiku s'issa ma kinux ta' suċċess; jinnota li tnaqqis ta' ostakli fil-kummerċ jista' jġib titjib progressiv fil-kundizzjonijiet tal-kummerċ bl-objettiv li jippromwovu t-tkabbir, l-impiegi u l-iżvilupp sostenibbli; jistieden l-Indja sabiex torbot it-tariffi tagħha għall-importazzjoni f'livelli aktar viċin tar-rati tagħha li tapplika fil-kuntest tad-DDA u sabiex tagħmel aktar sforzi biex tneħħi parti mill-ostakli mhux tariffati preżenti; jinkuraġġixxi l-Grupp għall-Kummerċ ta' Livell Għoli sabiex jaħdem biex jelimina t-tariffi bejn il-partijiet fuq il-kummerċ kollu b'mod sostanzjali permezz ta' ftehim bilaterali dwar kummerċ ħieles, u b'hekk jipprovdi opportunitajiet għall-esportaturi eżistenti u potenzjali biex jiżviluppaw in-negożji tagħhom u jiddiversifikaw il-bażi ta' esportazzjoni tagħhom;
6. Jistieden lill-UE biex tappoġġja l-potenzjal kummerċjali internazzjonali ta' l-Indja kif ukoll l-isforzi biex tiġbed l-investiment barrani dirett, b'mod partikulari billi ssaħħaħ l-għajnuna għall-kummerċ sabiex tindirizza l-intoppi infrastrutturali u amministrattivi;
7. Jikkunsidra li r-regoli tal-kompetizzjoni u l-infurzar effettiv tagħhom huma essenzjali biex jiżguraw li l-benefiċċji sħaħ tal-liberalizzazzjoni u r-riforma regolatorja relattiva jiġu realizzati u jikkontribwixxu għall-iżvilupp ekonomiku u l-iggvernar tajjeb; jikkunsidra wkoll li politika ta' kompetizzjoni effetiva tħajjar l-investituri barranin billi toħloq qafas legali trasparenti u mhux diskriminatorju għall-operaturi ekonomiċi; jinnota li ma jeżistix mudell għall-qisien ta' kulħadd fir-rigward tad-dispożizzjonijiet dwar il-kompetizzjoni fil-ftehimiet dwar il-kummerċ ħieles li l-UE kkonkludiet fl-aħħar għaxar snin, peress li l-kontenut ta' dispożizzjonijiet dwar il-kompetizzjoni jvarja skond kemm jeżistu regoli tal-kompetizzjoni u l-livell ta' żvilupp tagħhom, u l-istituzzjonijiet ta' nfurzar fil-pajjiż sieħeb; jistieden lill-Grupp għall-Kummerċ ta' Livell għoli biex jikkunsidra l-livell ta' ambizzjoni li għandu jintlaħaq fir-rigward tad-dispożizzjonijiet tal-kompetizzjoni fi kwalunkwe ftehim kummerċjali bilaterali bejn l-UE u l-Indja;
8. Jinnota li l-Indja tinnegozja fis-settur kontra d-'dumping' kemm bħala utent u kemm bħala s-suġġett ta' proċeduri; jilqa' b'sodisfazzjon ir-relazzjoni tajba ta' ħidma bej l-UE u l-Indja f'dan il-qasam u jistieden lit-tnejn biex jaħdmu flimkien sabiex irażżnu l-abbuż ta' l-istrumenti kontra d-'dumping' u jwaqqfu d-'dumping';
9. Jinnota li l-UE u l-Indja jikkunsidraw il-protezzjoni tal-GI bħala għodda neċessarja għall-produtturi, il-konsumaturi u l-gvernijiet; jinnota, madanakollu, li l-għodda tal-GI mhijiex magħrufa fl-Indja; jistieden lill-gvern Indjan biex jippromwovi s-sistema tal-GI u jinkuraġġixxi applikazzjonijiet għall-GIs potenzjali; jinnota li, skond it-TRIPS, Membri tal-WTO huma liberi li jimplimentaw il-liġijiet tagħhom biex jagħtu protezzjoni aktar estensiva milli meħtieġ mill-Ftehim innifsu; jikkunsidra li ftehim bilaterali jista' joffri protezzjoni lill-GIs fl-UE u l-Indja lil hinn mill-Ftehim TRIPS, u b'hekk jipprovdi għodda kumplimentari utli ma' l-isforzi multilaterali konġunti;
10. Jinnota li l-importanza emerġenti tal-propjetà intellettwali (IP) fl-Indja hija evidenti mill-kwantità ta' żieda f'każijiet reġistrati fl-Uffiċċji Indjani għall-Propjetà Intellettwali u jinnota li l-industrija Indjana qed tikber biżżejjed biex tilqa' l-isfidi globali u qed tadotta żvilupp ibbażat fuq ir-riċerka bħala parti integrali mill-istrateġija tan-negozju; jinnota r-riformi reċenti li l-Indja għamlet fid-drittijiet dwar il-propjetà intellettwali, inkluż l-Att dwar il-Privattivi ta' l-Indja 2005 (Emenda); jinnota li saru wkoll sforzi biex l-aspetti proċedurali jiġu simplifikati u razzjonalizzati biex is-sistema tkun tista' tintuża b'aktar faċilità;
jinnota wkoll li, skond inizjattivi leġiżlattivi ġodda, l-Indja tat bidu għal programmi kbar ta' modernizzazzjoni għall-Uffiċċji għall-Propjetà Intellettwali u kkommettiet somom kunsiderevoli għall-ħolqien u titjib fl-infrastruttura; jistieden l-Indja biex tiżgura li l-infurzar ta' sistema bħal din huwa konformi mal-Konvenzjoni ta' Rio dwar id-Diversità Bijoloġika u l-obbligi eżistenti meħtieġa mill-WTO;
11. Jinnota li l-UE stabbiliet sistema komprensiva ta' protezzjoni IP fl-aħħar għaxar snin billi armonizzat bosta sistemi IP u introduċiet IPRs tal-Komunità madwar l-UE; jikkunsidra li, minħabba l-prinċipji ta' l-Aktar Nazzjon Favorit u t-trattament domestiku, din il-leġiżlazzjoni tibbenefika lill-possessuri barra l-UE kif ukoll lill-possessuri ta' l-IPR fl-UE; jikkunsidra li l-infurzar huwa parti integrali mill-protezzjoni IP u jinkuraġġixxi l-UE u l-Indja biex jaqblu fuq prinċipji komuni għal miżuri ta' infurzar, b'tali mod li jkunu effettivi, proporzjonati u dissważivi u li m'għandhomx joħolqu ostakli għall-kummerċ leġittimu;
12. Jikkunsidra li, b'aktar minn kopja waħda minn tliet kopji ta' softwer tal-kompjuter miksuba illegalment mad-dinja kollha, il-piraterija tkompli thedded il-ġejjieni ta' l-innovazzjoni tas-softwer, b'riżultat ta' telf ta' postijiet tax-xogħol u dħul mit-taxxi kemm għall-Indja u għall-UE; jinnota li, bl-għajnuna tal-politika tal-gvern li jattakka l-piraterija tas-softwer u kampanja ta' kuxjenza, l-Indja rreġistrat tnaqqis sinifikattiv fil-piraterija ta' 2% fl-2005; jirrikonoxxi, madanakollu, li għad irid isir ħafna għall-kontroll tal-vantaġġ inġust fil-kompetizzjoni li l-kumpaniji Indjani għandhom bl-użu ta' "softwer" u "ħardwer" miksuba illegalment għall-produzzjoni u l-manifattura; jistieden lill-gvern Indjan u l-gvernijiet federali tagħha biex ikomplu jnaqqsu r-rata ta' piraterija; jinnota li, filwaqt li l-isforzi attwali mill-UE u l-Istati Uniti biex jikkumbattu l-piraterija se jikkonċentraw inizjalment fuq iċ-Ċina u r-Russja, il-kumplament ta' l-Asja jkun imiss wara; jikkunsidra li huwa fl-interess ta' l-Indja li taħdem b'mod kostruttiv ma' l-UE f'dan l-isforz fid-dawl ta' l-istudju dwar l-impatt li sar fl-2005 mill-IDC, li stmat li jekk l-Indja hija kapaċi tnaqqas ir-rata attwali ta' piraterija mit-72% attwali għall-64% sa l-2009, l-Indja tiġġenera 115,000 post ġdid tax-xogħol fl-IT, 5,900 miljun Dollaru Amerikan aktar jiżdiedu fl-ekonomija tagħha u żieda fid-dħul mit-taxxi ta' 86 miljun Dollaru Amerikan;
13. Jirrikonoxxi l-importanza ta' l-industrija farmaċewtika għall-ekonomija u s-soċjetà Indjana u jistieden lill-awtoritajiet Indjani biex jiżguraw li l-istandards internazzjonali jkunu applikati fl-użu ta' bnedmin u annimali ħajjin għall-esperimenti xjentifiċi u li jsiru mill-inqas esperimenti bħal dawn u jinstabu alternattivi;
14. Jistieden lill-UE u l-Indja biex ikunu minn ta' quddiem biex isibu soluzzjoni permanenti malajr dwar it-TRIPS u s-saħħa pubblika biex jiffaċilitaw l-aċċess għall-mediċini essenzjali, fi ħdan il-programm ta' Żvilupp Doha; jilqa' b'sodisfazzjon il-passi li l-gvern Indjan ħa fir-rigward tar-regoli ta' l-IP għall-mediċini; jinkuraġġixxi lill-gvern Indjan biex jimplimenta l-liġi b'aktar ħeffa speċjalment fir-rigward ta' l-esportazzjoni tal-mediċini ġeneriċi;
15. Jinnota li l-għerf tradizzjonali dejjem aktar qed jiġi rikonoxxut bħala kwalità ta' valur qawwi kemm għall-pajjiżi żviluppati u kemm għall-pajjiżi li qed jiżviluppaw, b'sa 80% tal-popolazzjoni tad-dinja tiddependi minn prodotti u servizzi li ġejjin minn innovazzjonijiet u prattiki ta' l-għerf tradizzjonali biex jilqgħu għall-bżonnijiet ta' kuljum f'dawk li huma ikel u saħħa, inklużi daqs 441 komunità etnika fl-Indja; jinnota r-rabtiet legali, politiċi u soċjali kumplessi bejn l-IPR u l-konservazzjoni tal-bijodiversità u r-riżorsi ġenetiċi; jistieden lill-UE u l-Indja biex jaħdmu flimkien sabiex isibu soluzzjoni raġonevoli dwar l-armonizzazzjoni ta' TRIPS bl-objettivi tal-Konvenzjoni ta' Rio dwar id-Diversità Bijoloġika;
16. Jilqa' b'sodisfazzjon l-azzjonijiet ta' l-indja biex tirriforma s-settur finanzjarju fir-rigward tal-liberalizzazzjoni estensiva tar-rati ta' interess, it-tnaqqis fiż-żamma tad-dejn tal-gvern meħtieġa mill-banek u l-illaxkar ta' l-obbligi tal-banek li jagħtu self f'oqsma ta' prijorità bħall-biedja u n-negozji fuq skala żgħira; jikkunsidra li waqt li l-Indja tintegra ruħha aktar fis-sistema finanzjarja dinjija, il-bżonn ta' riforma fis-settur finanzjarju saret aktar urġenti; jikkunsidra, b'mod partikulari, li l-liberalizzazzjoni tas-settur finanzjarju biex jilqa' aħjar għax-xokkijiet kemm interni u esterni hija neċessarja biex it-tkabbir tad-depożiti, l-iżvilupp ta' kultura ta' kreditu u d-dħul ta' forzi privati u barranin jiġu inkuraġġiti; jikkunsidra li t-trasferiment ta' l-għarfien tekniku u maniġerjali jista' jkollu rwol utli fl-iżvilupp tas-swieq finanzjarji ta' l-Indja u jistieden lill-UE biex toffri assistenza f'dan ir-rigward;
17. Jilqa' b'sodisfazzjon il-pjanijiet ta' l-Indja li tneħħi l-kontrolli fuq ir-Rupee billi tneħħi l-kontrolli tal-kapital li għad fadal fuq ir-Rupee, li huwa parzjalmenti konvertibbli; jikkunsidra li dan għandu jelimina ostaklu importanti għall-integrazzjoni ta' l-Indja fl-ekonomija dinjija, u jippermetti lill-individwi u lin-negozji Indjani li jinvestu b'aktar libertà barra l-pajjiż u lill-kumpaniji kbar aċċess aktar faċli u orħos għal dejn barrani, li attwalment huwa limitat għal 500 miljun Dollaru Amerikan kull kumpanija fis-sena;
18. Jistieden lill-Indja biex issir Parti mit-Trattat Kontra t-Tixrid ta' l-Armi Nukleari, li huwa l-istrument multilaterali indispensabbli biex il-paċi, is-sigurtà u l-istabilità internazzjonali jinżammu u jissaħħu, u huwa mħasseb dwar il-koperazzjoni nukleari Stati Uniti - Franza u l-Indja, minkejja n-nuqqas ta' impenn kuntrattwali ta' l-Indja lejn is-sikurezza nukleari;
19. Jinnota l-aċċettazzjoni ta' l-Indja tal-fatt li, jekk tixtieq tilħaq l-ambizzjonijiet tagħha, għandha tassumi r-responsabiltajiet tagħha fl-Asja t'Isfel u fl-Asja tax-Xlokk; jilqa' b'sodisfazzjon l-użu tal-kummerċ bħala għodda biex tinbena l-fiduċja bejn l-Indja u l-Pakistan, u jilqa' b'mod partikulari il-ftehim fundamentali tat-2 ta' Mejju 2006 biex jerġa' jqajjem il-kummerċ u n-negozju fuq iż-żewġ naħat tal-Linja ta' Kontroll bejn ir-reġjuni diviżi ta' Jammu u Kashmir billi ġie mniedi servizz ta' trasport bit-trakkijiet fuq ir-rotta Srinagar-Muzaffarabad, kif ukoll servizz tal-karozzi tal-linja li jaqsam il-Kashmir, li jgħaqqad Poonch f'Jammu and Kashmir ma' Rawalakot f'Azad Jammu Kashmir; jilqa' b'sodisfazzjon il-wegħda tal-prim ministru Singh fit-23 ta' Mejju 2006 biex jinħoloq ambjent ta' kummerċ u moviment aktar ħielsa permezz ta' "fruntieri rotob" biex tinħoloq klima għal ftehim dwar il-Kashmir; jistieden kemm l-Indja u l-Pakistan biex inaqqsu aktar l-ostakli amministrattivi biex jiġu implimentati miżuri relatati mal-kummerċ u li jibnu l-fiduċja, u lill-UE biex toffri assistenza teknika f'dan ir-rigward, jekk ikun meħtieġ;
20. Huwa mħasseb, madanakollu, li l-kummerċ intrareġjonali fl-SAARC għadu baxx; jikkunsidra li jeżistu wisq eċċezzjonijiet biex il-Ftehim dwar il-Kummerċ Ħieles fl-Asja t'Isfel jiġi trattat bħala ta' l-istandard tal-Ftehim dwar il-Kummerċ Ħieles (FTA); jistieden lill-SAARC biex kontinwament tirrevedi l-opportunitajiet biex il-kummerċ u l-investiment jikbru fir-reġjun; jikkunsidra li fir-relazzjonijiet tagħha ma' l-Indja, l-UE għandha tieħu approċċ reġjonali inklużiv u jistieden lill-UE biex toħloq "grupp ta' viżjoni" simili għal dak li sar għall-ASEAN, biex jiġu esplorati opportunitajiet futuri għar-relazzjonijiet bejn l-UE u l-SAARC;
21. Jinkuraġġixxi l-Indja, biex bħala membru ta' l-SAARC u l-Koperazzjoni Ekonomika bejn il-Bangladexx, l-Indja, il-Mjanmar, is-Sri Lanka u t-Tajlandja (BIMSTEC), tuża l-influwenza pożittiva biex tiffaċilita l-bidla demokratika u r-rispett għad-drittijiet tal-bniedem f'Mjanmar (Burma) u tkompli bl-appoġġ tagħha għall-proċess ta' paċi fis-Sri Lanka;
22. Jinnota li l-pajjiżi Asjatiċi bħall-Indja u ċ-Ċina, minkejja snin ta' tkabbir ekonomiku, għadhom isofru minn nuqqas ta' rappreżentanza xierqa u għadhom jingħataw il-ġenb inġustament f'korpi multilaterali, inkluż il-Fond Monetarju Internazzjonali; jistieden lill-UE u l-Indja biex jaħdmu flimkien biex jikkoreġu żbilanċi bħal dawn u jiżguraw li l-voti u l-pożizzjonijiet prinċipali jiġu allokati skond l-importanza xierqa fis-sistema ekonomika internazzjonali;
23. Jilqa' b'sodisfazzjon ir-riformi tal-Gvern Indjan ta' l-istrateġija FDI tagħha u l-progress tal-Kummissjoni għall-Investiment; huwa mħasseb li investituri barranin għadhom jiffaċċjaw burokrazija frustranti u ostakli oħra mhux tariffati; iħeġġeġ l-awtoritajiet Indjani biex ikomplu jikkumbattu l-burokrazija u l-korruzzjoni; jistieden lill-Gvern Statali u l-gvernijiet muniċipali biex jissimplifikaw u jikkonsolidaw il-proċeduri ta' applikazzjoni; u jitlob biex isiru sforzi għal trasparenza legali akbar;
24. Huwa mħasseb li investituri barranin għadhom jiffaċċjaw burokrazija frustranti fil-livell lokali fejn is-sistema proċedurali għall-approvazzjoni hija ostaklu kbir, li fiha l-applikazzjonijiet eliġibbli għal aprovazzjoni awtomatika huma ftit ħafna filwaqt li l-kwantità kbira ta' applikazzjonijiet jiġu approvati fuq il-bażi ta' kull każ individwalment; huwa mħasseb li ħafna uffiċjali qed ikomplu jiddiskriminaw favur l-interessi lokali; jinnota li din l-approvazzjoni u l-proċess ta' għoti ta' liċenzji ġie kkritikat f'xi reġjuni għax huwa inġust u nieqes mit-trasparenza b'regolamenti li jinbidlu spiss b'mod tant eżasperanti li ma jkunx faċli tlaħħaq magħhom; jistieden lill-Gvern Statali u l-gvernijiet muniċipali biex jissimplifikaw u jikkonsolidaw il-proċeduri ta' applikazzjoni;
25. Jinnota l-kontribut kbir tad-Djaspora Indjana għat-tkabbir ta' l-indja; jinnota, madanakollu, li d-Djaspora pprovdiet 10% biss ta' d-dħul FDIs ta' l-Indja; jikkunsidra li kemm il-pagamenti soċjali u finanzjarji huma neċessarji għall-iżvilupp fuq tul ta' żmien; jistieden l-Indja biex tkompli tiżviluppa skemi biex ikollha aċċess għar-riżorsi tad-Djaspora, b'ċittadinanza doppja bħala eżempju tanġibbli;
Il-koperazzjoni UE-Indja
26. Jilqa' b'sodisfazzjon il-fatt li l-UE u l-Indja kkommettew ruħhom li jsaħħu d-djalogu u l-impenn, inklużi d-drittijiet tal-bniedem, bħala sħab strateġiċi fis-"Summit" Indja-UE fis-7 ta' Settembru 2005, kif rifless fil-Pjan ta' Azzjoni Konġunt, li jinkludi wkoll koperazzjoni ta' żvilupp, li jagħti importanza lis-sostenibilità ambjentali u lill-koeżjoni soċjali u ekonomika; jitlob li jinżamm dialogu kontinwu fil-qasam tad-drittijiet tal-bniedem fi ħdan is-sħubija strateġika; f'dan il-kuntest jifraħ lill-Kummissjoni Nazzjonali Indjana għad-Drittijiet tal-Bniedem għall-ħidma indipendenti u rigoruża tagħha f'dawn il-kwistjonijiet;
27. Jenfasizza li l-objettiv li jintlaħqu l-Għanijiet tal-Millennju għall-Iżvilupp (MDGs) u l-ġlieda kontra l-faqar għandhom jibqgħu element ċentrali fis-Sħubija Strateġika UE-Indja; jilqa' b'sodisfazzjon il-fatt li s-"summit" UE-Indja li jmiss fit-13 ta' Ottubru 2006 għandu jindirizza l-kwistjoni ta' l-MDGs; u jitlob li jittieħdu miżuri speċifiċi urġenti biex jiġi żgurat li minoritajiet bħad-Daliti u l-Adivasis u komunitajiet oħra emarġinati, tribujiet u kasti, ikunu jistgħu jnaqqsu d-distakk wiesa' mill-kumplament tal-popolazzjoni biex jintlaħqu l-MDGs;
28. Jilqa' b'sodisfazzjon l-enfasi fuq is-saħħa, l-edukazzjoni, l-ilma u l-ambjent fil-koperazzjoni għall-iżvilupp ta' l-UE ma' l-Indja 2002-2006, kif ukoll l-impenn tal-Pjan ta' Azzjoni Konġunt biex iżid il-koperazzjoni għall-iżvilupp fis-setturi tas-saħħa u l-edukazzjoni, bil-għan li tikber il-koperazzjoni għall-iżvilupp biex jikkumplimenta programmi importanti tas-settur soċjali fl-Indja, inklużi miżuri speċifiċi li effettivament iġibu fit-tmiem id-diskriminazzjoni kontra gruppi soċjali anqas iffavoriti, partikolarment, in-nisa; jitlob bl-istess mod li tingħata spinta lill-miżuri li jippromwovu l-edukazzjoni tal-bniet bħala parti mill-Pjan ta' Azzjoni, u b'dan jintlaħqu l-MDGs 2 u 3;
29. Jilqa' b'sodisfazzjon il-konsultazzjoni pubblika tal-Kummissjoni biex tifformula reviżjoni strateġika dettaljata tar-relazzjonijiet kummerċjali u ekonomiċi maċ-Ċina; jikkunsidra li l-Indja toffri sfida komparabbli, anki jekk distinta, għall-industrija ta' l-UE; jistieden lill-Kummissjoni biex tagħmel eżerċizzju simili għall-Indja biex tiżgura mmaniġġjar politiku, ekonomiku u kummerċjali ta' dawn ir-relazzjonijiet f'livell ta' UE;
30. Jikkunsidra li l-UE għandha tagħti attenzjoni speċjali lis-settur ta' l-SMEs fl-Indja, u li l-SMEs jistgħu jissaħħu permezz ta' miżuri li jgħinu fl-iffinanzjar ta' proġetti lokali bbażati fuq is-suq proposti miċ-ċittadini;
31. Jenfasizza li l-koperazzjoni ta' l-UE għall-iżvilupp għandha tikopera ma' l-Indja bħala donatur internazzjonali emerġenti permezz ta' skambji ta' esperjenza u koperazzjoni fi proġetti konkreti f'pajjiżi li qed jiżviluppaw; jenfasizza li minn dak li tgħallmet mill-esperjenza ta' l-Indja l-UE tista' tagħmel l-għajnuna għall-iżvilupp aktar effettiva u produttiva;
32. Jinnota li l-Indjani huma mħassba dwar l-UE u jixtiequ jistudjawha u jifhmuha aħjar; jilqa' b'sodisfazzjon l-iskema ta' borsa ta' studju Erasmus Mundus ta' EUR 33 miljun , b'enfasi speċifika fuq il-kollaborazzjoni fix-xjenza u t-teknoloġija, fejn il-lezzjoni tas-suċċess ta' l-Indja tista' tagħti spinta lill-prestazzjoni ta' l-UE fil-piramida li fuqha hija bbażata is-soċjetà ta' l-informazzjoni: l-edukazzjoni, ir-riċerka u l-iżvilupp u l-innovazzjoni: jilqa' b'sodisfazzjon il-ħolqien tas-Sedja Jean Monnet fl-Istudji Ewropej fl-Università ta' Delhi bħala inizjattiva kruċjali biex jissaħħu r-relazzjonijiet UE-Indja; jistieden lid-Delegazzjoni tal-Kummissjoni u l-Ambaxxati ta' l-istati Membri biex jaħdmu ma' l-awtoritajiet Indjani sabiex jippromwovu l-irwol propju ta' l-UE favur l-iskambji edukattivi, kulturali u xjentifiċi, u jissuġġerixxi li skambji kulturali jgħinu biex jibnu appoġġ wiesa' tal-pubbliku għal kollaborazzjoni kostruttiva u li l-iskambji professjonali u tan-negozju jistgħu ikunu wkoll ta' benefiċċju kemm għall-ftehim bejn kulturi differenti u biex jgħinu sabiex l-informazzjoni titwassal faċilment fuq iż-żewġ naħat; jenfasizza s-suċċess tal-Programm ta' taħriġ Eżekuttiv - Skambju bejn bnedmin u bnedmin - li jeżisti mal-Ġappun u l-Korea u jħeġġeġ lill-Kummissjoni biex testendi l-programm għall-Indja, b'iffinanzjar xieraq;
33. Jirrakkomanda li l-Kummissjoni tesplora jew tkabbar il-programmi UE-Indja f'oqsma bħall-edukazzjoni għolja u taħriġ vokazzjonali; programmi biex jinkuraġġixxu l-iskambju ta' studenti, għalliema u riċerkaturi;
34. Jirrikonoxxi li l-industrija tas-softwer u s-servizzi ttriplikat fid-daqs fl-aħħar ħames snin u issa tiswa EUR 20 biljun; jinnota li ħafna mit-tkabbir ġie minn bejjiegħa tal-punent b'kuntratti minn barra għal xogħol ta' żvilupp fl-Indja; jikkunsidra li l-UE tista' tieħu vantaġġ b'moviment qawwi ta' ħaddiema Indjani bi kwalifiki u kapaċitajiet għolja; jistieden il-Grupp għan-Negozju ta' Livell Għoli biex jesplora ftehim fuq il-moviment ta' ħaddiema mħarrġa skond Mode 4, sabiex l-esperti Indjani fl-Informatika jkunu jistgħu jaħdmu fl-UE wara l-istudji tagħhom, u b'hekk jipprovdu sors ta' ħaddiema u jiġġustifikaw l-investimenti tas-sistemi ta' l-edukazzjoni għolja ta' l-UE; jinnota li l-kumpaniji tas-softwer huma kalamita għall-kumpaniji sħab u l-industrija tas-servizzi u l-bżonnijiet ta' infrastruttura li jakkumpanjawhom, li tista' tagħti spinta lill-ekonomiji reġjonali u tipprovdi opportunitajiet oħra ta' xogħol għan-nies tal-post;
35. Jinnota li bejn l-2003 u l-2008, 200,000 post tax-xogħol jistgħu jingħataw barra l-pajjiż, l-aktar fl-Indja; jinnota wkoll li sa l-2010, id-domanda ta' l-Indja għal professjonisti f'lingwi barranin għandu jkun ta' 160,000, u 40,000 Indjan biss se jkunu kkwalifikati għal dawn il-postijiet; jikkunsidra li bi 30,000 ħaddiem mill-UE diġà jaħdmu fl-Indja, jeżistu opportunitajiet ċari għal Ewropej imħarrġa li huma ppreparati jiċċaqalqu, u xejra bħal din tiżgura li jkun hemm "skambju ta' mħuħ" bejn l-UE u l-Indja, aktar milli "telf ta' mħuħ";
36. Jirrakkomanda li l-Istati Membri u l-Kummissjoni jipprovdu l-qafas xieraq għall-kumpaniji u l-universitajiet biex jibbenefikaw mill-iżvilupp ekonomiku ta' l-Indja li qed jikber b'ritmu mgħaġġel f'oqsma speċifiċi bħal ma huma s-softwer u l-industrija tal-films;
37. Jinnota li l-impatt tat-tkabbir ta' l-Indja fuq id-domanda dinjija għall-enerġija tqajjem tħassib għas-sigurtà ta' l-enerġija; jinnota li l-Indja għadha ssofri nuqqasijiet serji ta' enerġija u tiddependi ż-żejjed miż-żejt u l-faħam, li huma fjuwils fossili kemm għoja fil-prezz u li jniġġsu; jinnota li l-isforzi ta' l-Indja biex tiżgura provvisti ta' gass u biex tiżviluppa l-enerġija nukleari huma żewġ konsegwenzi konkreti ta' din is-sitwazzjoni; jinnota li anki jekk l-Indja tiżviluppa l-enerġija nukleari, tissodisfa anqas minn 5% tal-bżonn tagħha ta' elettriku u 2% biss tat-total ta' enerġija li teħtieġ; jikkunsidra li l-isforzi biex tiżviluppa l-enerġija nukleari jikkostitwixxu pass lura mill-wegħdiet tal-G8 ta' Gleneagles biex tiġi mrażżna l-bidla fil-klima u biex tissaħħaħ il-preservazzjoni ta' l-enerġija; jikkunsidra li, jekk is-sitwazzjoni ma' tinbidilx, il-ħsara lill-ambjent aktarx li ssir ostaklu kbir għall-futur ta' l-iżvilupp ekonomiku ta' l-Indja;
38. Jinnota li kemm l-Indja u l-UE għandhom tradizzjoni twila li jippromwovu l-użu ta' enerġija li tiġġedded u jemmen li l-enerġija li tiġġedded bħal dik tax-xemx, ir-riħ u l-bijomassa hija alternattiva ta' enerġija prattika, flimkien ma' investimenti qawwija fl-effiċjenza fl-enerġija, li jistgħu jissodisfaw il-bżonnijiet ta' enerġija fuq żmien twil; jilqa' b'sodisfazzjon l-isforzi ta' l-Indja f'dan ir-rigward, iklużi d-'digesters' rurali tal-bijogass u l-pjanċi solari (użati biex jipprovdu d-dawl fid-djar u l-ħwienet tax-xogħol), u aktar reċentement is-suċċess tagħha fil-bini tar-raba' l-akbar industrija ta' enerġija mir-riħ fid-dinja; jikkunsidra li, hekk li l-ifqar pajjiżi fid-dinja qed jintlaqtu b'mod negattiv mid-domanda dejjem tikber għaż-żejt, kif deher mill-ġlied reċenti kontra ż-żidiet fil-prezzijiet taż-żejt fit-toroq ta' l-Indoneżja, l-Indja għandha tkompli tappoġġja l-iżvilupp ta' l-enerġija rinnovabbli reġjonali fuq skala aktar wiesgħa fl-Asja, kif diġà qed tagħmel fil-Bhutan; jilqa' b'sodisfazzjon il-ħolqien ta' Bord għall-Enerġija bejn l-Indja u l-UE u jitlob li jkun hemm aktar koperazzjoni dwar is-sigurtà ta' l-enerġija u r-riformi fis-suq, l-enerġija li tiġġedded u l-effiċjenza fl-enerġija; jikkunsidra li l-Indja u l-UE għandhom ikomplu jikkaratterizzaw l-enerġija dinjija permezz ta' żvilupp ta' enerġija innovattiva u sostenibbli, filwaqt li jilħqu l-'benchmarks'' tal-bidla fil-klima;
39. Jinnota li, peress li l-Indja hija ġeografikament diversa, hija ambjent fertili għaż-żejt u l-gass, iżda l-esplorazzjoni mmexxija mis-settur pubbliku, s'issa, dejjem kient kawta ħafna; jinnota, madanakollu, li bid-dħul ta' kumpaniji Ewropej ta' l-enerġija, din il-pożizzjoni diġà qed tinbidel, pereżempju, il-Cairn Enerġy Britannika rrappurtat bosta skoperti ta' żejt f'Rajasthan fl-2004 (l-akbar waħda hija stmata li fiha 500 miljun barmil ta' riservi li jistgħu jiġu rkuprati); jistieden l-Indja biex tinkuraġġixxi tiftix aktar qawwi għaż-żejt u l-gass, billi tipprovdi inċentivi kbar sabiex tattira l-effiċjenza u l-kompetenza ta' l-esperti ta' kumpaniji ta' esplorazzjoni Ewropej;
40. Jinnota li l-ispejjeż biex jiġi pproċessat il-bijodiżil fl-Indja huma madwar terz ta' dawk fl-Ewropa u li l-Indja reċentement iddeċidiet li tespandi l-programmi ta' raffinar tal-bijodiżil tagħha; jinnota li l-Indja qed tespandi l-industrija ta' l-etanol tagħha u l-gvern approva bosta tipi ta' inċentivi finanzjarji, inklużi tnaqqis fit-taxxa fuq il-bejgħ u dazji mnaqqsa fuq l-etanol u fjuwils imħallta ma' l-etanol; jikkunsidra il-Jatropha li ma tittekilx tirrappreżenta alternattiva vijabbli ta' bijofjuwil għall-Indja, minħaba li tista' tikber f'ħamrija niexfa u kważi niexfa u tinvolvi investiment minimu, u jinkuraġġixxi koperazzjoni bejn l-Indja u l-UE għal dan il-għan.
Is-sitwazzjoni ekonomika u soċjali ta' l-Indja
41. jikkunsidra li programmi bħal dawn, barra li joħolqu bejn wieħed u ieħor 17-il miljun impieg ġdid u jġibu dħul għal komunitajiet rurali batuti, jgħinu biex titnaqqas id-dipendenza ta' l-Indja fuq żejt barrani, iżda dan jista' jseħħ biss jekk il-programmi jitwettqu b'mod sostenibbli; Jinnota li l-kummerċ internazzjonali jista' jmexxi t-tkabbir ekonomiku u jnaqqas il-faqar, iżda m'huwiex bulit maġika, u r-riformi tal-kummerċ huma kumplimentari għall-politiki ta' żvilupp; jikkunsidra li sabiex jinħarġu persuni mill-faqar, u biex l-Indja tkompli tiela' s-sellun ta' żvilupp ekonomiku, hija għandha bżonn tiffoka b'mod kritiku fuq il-bini ta' ambjent ekonomiku li jsaħħaħ l-integrazzjoni ma' l-ekonomija dinjija f'firxa dejjem usa' ta' manifattura u servizzi;
42. Jilqa' r-rikonoxximent dejjem akbar ta' l-importanza ta' l-ambjent ekonomiku estern, il-kummerċ u l-investiment fl-aħħar pjan fuq ħames snin ta' l-Indja dwar l-iżvilupp uman (2002-2007);
43. Jinnota li l-iżbilanċi bejn l-Istati ta' l-Indja huma eżasperati bid-devoluzzjoni ta' setgħat ta' nfiq lil Stati bi standards varjati ta' tmexxija politika u mmaniġġjar fiskali; jikkunsidra li t-tnaqqis tal-faqar jiddependi fuq ir-ridirezzjoni ta' riżorsi ta' l-Istat lejn zoni rurali u l-iżvilupp ta' infrastruttura biex tappoġġa t-tixrid ta' l-attivitajiet ta' manifattura u tas-settur tas-servizzi; jitlob lill-Indja biex tiżgura koerenza u mmaniġġjar aħjar ta' liberalizzazzjoni billi tadotta politiki ekonomiċi kumplimentari b'saħħithom, inkluża l-armonizzazzjoni tat-taxxa, u biex tiffoka l-isforzi ta' bini ta' kapaċitajiet fuq l-ifqar Stati, sabiex ikunu jistgħu jużaw il-fondi b'mod effettiv; jinnota l-effetti ta' żvilupp ta' tkabbir ekonomiku f'xi reġjuni ta' l-Indja; jitlob lill-Kummissjoni biex tappoġġja l-Indja biex titgħallem minn Stati li marru tajjeb fiż-żmien ta' prosperità ekonomika ta' l-Indja, u biex tadotta l-aħjar prattika sabiex tiżgura li l-investimenti kritiċi jkunu diretti lejn reġjuni li għadhom lura u lejn gruppi soċjali b'nuqqas ta' rappreżentanza;
44. Jinsab imħasseb rigward id-differenza dejjem akbar fid-dħul bejn zoni urbani u zoni rurali fl-Indja; iħeġġeġ lill-awtoritajiet Indjani biex jirrikonoxxu l-istaġnar ta' l-agrikoltura f'zoni rurali u biex jiżviluppaw programmi biex iżidu l-produzzjoni agrikola f'dawn iz-zoni sabiex jissieltu kontra l-faqar rurali b'mod aktar xieraq;
45. Jinnota, li minkejja t-tkabbir impressjonanti, l-infrastruttura ta' l-Indja għadha turi, parzjalment, il-karatteristiċi ta' nazzjon li qed jiżviluppa, b'networks tat-trasport ħżiena u qtugħ ta' l-elettriku regolari; jitlob lill-Indja u lill-UE biex jesploraw l-iżvilupp ta' l-infrastruttura relatata mal-kummerċ, permezz ta' investiment bejn is-settur pubbliku u dak privat, filwaqt li jkunu żgurati trasparenza, ambjent regolatorju kredibbli u l-istess kundizzjonijiet għall-investituri privati u għall-gvern; f''dan is-sens jitlob għall-użu ta' self mill-EIB, li għandu l-mandat - fil-każ ta' l-Asja u l-Amerika Latina - iffokat fuq investiment produttiv; jitlob lill-Indja u lill-UE biex jiffokaw dan l-investiment f'zoni rurali, biex jiggarantixxu provvista ta' l-ilma u sanità aħjar, itejbu n-netwerks tat-trasport, b'mod partikulari t-toroq li jibqgħu jintużaw ikun x'ikun it-temp, u biex titjieb il-kwalità tal-produzzjoni tal-grilji ta' l-elettriku;
Żvilupp u Ambjent
46. Jirrikonoxxi s-suċċess importanti tal-Gvern ta' l-Indja biex jeqred il-faqar, iżda jinnota li minkejja t-tkabbir ekonomiku b'mod sostenut, għad hemm inugwaljanza kbira, b'xi 30% tal-popolazzjoni ta' l-Indja għadha tgħix taħt il-livell tal-faqar; jinsab partikularment imħasseb dwar is-sitwazzjoni tas-sezzjonijiet żvantaġġati tal-popolazzjoni, b'mod partikulari n-nisa, it-tfal, dawk żvantaġġati u l-popolazzjoni rurali, eż. id-Daliti u l-Adivasis (tribuwijiet u popli indiġeni); jitlob lill-Kummissjoni u lill-Kunsill biex jaħdmu flimkien mal-gvern Indjan sabiex itejbu s-sitwazzjoni ta' dawk il-gruppi u biex jeżaminaw koperazzjoni futura bħala l-kontribuzzjoni tagħhom lejn it-tmiem tad-diskriminazzjoni tas-sessi u tal-kasti;
47. Jenfasizza li gvernijiet suċċessivi ta' l-Indja għamlu sforzi konsiderevoli biex jaffaċċjaw il-kwistjoni tad-diskriminazzjoni tal-kasti; madankollu jemmen li għad fadal ħafna xi jsir;
48. Iħeġġeġ lill-UE biex tippromwovi u timplimenta miżuri biex tiżgura l-iżvilupp soċjo-ekonomiku tal-minoranzi, li ġew esklużi bil-kbir mill-ekonomija l-ġdida fl-Indja u li jiġu diskriminati fil-programmi ta' żvilupp u rkupru minn diżastri permezz ta', fost affarijiet oħrajn, il-promozzjoni ta' opportunitajiet indaqs f'impiegi f'kumpaniji privati u f'investituri bbażati fl-UE, l-inkuraġġiment ta' programmi li jinkludu lid-Dalit u l-użu ta' indikaturi biex titkejjel l-inklużjoni tad-Dalit fl-ekonomija l-ġdida;
49. Jirrimarka li huwa importanti li l-gvern Indjan, fil-proċess ta' żvilupp tiegħu, iżomm f'moħħu l-kwistjonijiet ta' koeżjoni soċjali, l-ambjent u d-drittijiet tal-konsumaturi;
50. Jilqa' l-koperazzjoni ta' l-UE ma' l-Indja fil-qasam tal-politika ambjentali u l-fatt li l-politika ambjentali hija identifikata bħala waħda mis-setturi ta' koperazzjoni fil-Pjan ta’ Azzjoni Konġunt; jinnota li bħala kompetituri globali, l-UE u l-Indja għandhom rwol ċentrali fl-isforzi internazzjonali favur immaniġġjar globali aħjar ta' l-ambjent; jitlob sabiex l-aspetti ambjentali jkomplu jiġu enfasizzati fil-koperazzjoni fl-iżvilupp ekonomiku;
51. Jenfasizza li fl-Indja ż-żieda fil-qerda ambjentali hija problema li qiegħda dejjem tikber b'konsegwenzi ekonomiċi, soċjali u ambjentali inkonċepibbli, b'mod partikulari għan-numru kbir ta' Indjani li jgħixu fil-faqar, u jenfasizza l-urġenza partikulari biex titkompla l-koperazzjoni ta' l-UE ma' l-Indja f'dan il-qasam;
52. Jilqa' l-impenn ta' l-Indja għall-MDGs; jinnota li l-Għaxar Pjan fuq Ħames Snin ta' l-Indja jsemmi l-għanijiet u l-objettivi ta' żvilupp uman għal bejn il-ħames u l-għaxar snin li ġejjin, li ħafna minnhom huma aktar ambizzjużi mill-MDGs, iżda jibqa' mħasseb dwar il-kapaċità ta' l-Indja li tilħaqhom sa l-2015, minħabba li l-Proġett tal-Millennju tan-NU jiddikjara li fil-probabiltà l-Indja mhux ser jirnexxielha tikseb ta' l-anqas 4 mit-8 MDGs; jikkunsidra li assistenza relatata mal-kummerċ tista' tgħin lill-Indja biex tilħaqhom fiż-żmien skedat; jitlob lill-UE biex tikkopera ma' l-edukazzjoni universali ta' prijorità u mal-programmi ta' saħħa rurali ta' L-Indja u biex tinkuraġġixxi politiki li jiffaċilitaw l-inklużjoni ta' żgħażagħ fl-ambjent tax-xogħol; jemmen li l-UE tista' tindirizza t-tħassib dwar opportunitajiet indaqs billi tagħti spinta lill-prodotti li jipprovdu għixien għan-nisa, u billi tiffaċilita l-kummerċ f'servizzi li jimpjegaw in-nisa;
53. Jinnota li konnettività hija waħda mill-MDGs, u li s-Segretarju Ġenerali tan-NU, Kofi Annan, talab għal konnettività f'kull pajjiż tad-dinja li għadu qed jiżviluppa sa l-2015 sabiex jiġu eliminati d-differenzi f'termini ta' libertà, rikkezza u setgħa; jilqa' inizjattivi bħall-"Hole-in-the-Wall Internet Education Experiment", fejn aktar minn 150 kompjuter veloċi, bil-kibord, bil-maws u kamera ta' l-internet ġew installati f'50 lokazzjoni, minn kwartieri fqar ta' Delhi għal xi postijiet fl-Indja rurali, u b'hekk eluf ta' subien u bniet li qabel kienu illitterati setgħu jgħallmu lilhom innifishom mhux biss kapaċitajiet relatati ma' l-IT u ħafna elementi ta' l-edukazzjoni primarja, iżda wkoll biex jgħollu l-aspettattivi tagħhom; jikkunsidra li proġetti bħal dawn, filwaqt li ma joffrux sostitut sodisfaċenti għall-klassi ta' l-iskola b'għalliem, jistgħu jgħinu lil dawk it-tfal li attwalment m'għandhom l-ebda possibiltà ta' forma tradizzjonali ta' edukazzjoni; jitlob lill-Indja biex taqsam il-benefiċċji tal-prosperità tagħha fl-IT mat-98% tal-popolazzjoni tagħha li attwalment m'hijiex effetwati minnha u tidderiġi investiment u għajnuna f'proġetti bħal dawn, bi stima ta' spiża rikurrenti annwali ta' anqas minn 2 ċenteżimi għal kull tifel/tifla kuljum;
54. Jinnota li l-Indja kienet waħda mill-benefiċjarji ewlenin ta' l-iskema tal-GSP, b'medja ta' rati ta' użu ta' 80%, f'numru ta' setturi, inklużi prodotti ta' l-annimali (88%), ħaġar prezzjuż u ġojjelli (85%), apparat tat-trasport u metalli komuni (83%); jinnota li 40% ta' l-esportazzjoni tal-ħwejjeġ ta' l-Indja, li tiswa ftit aktar minn EUR 3,000 miljun, minn total ta' esportazzjoni ta' EUR 4,800 miljun, u disa' minn għaxra ta' l-esportazzjoni taż-żraben ta' l-Indja, b'valur ta' EUR 6,00 miljun, minn total ta' esportazzjoni ta' EUR 675 miljun, ibbenefikaw mill-iskema tal-GSP; jinnota li pajjiżi bl-industriji ta' l-insiġ tagħhom stess, bħall-Indja, kienu kapaċi jagħmlu użu ħafna aktar estensiv mill-faċilitajiet tal-GSP minn pajjiżi oħra bħall-Bangladexx, li jużaw tessut impurtat għall-manifattura ta' ħwejjeġ, u li esperjenzaw diffikultajiet minħabba l-iskema tar-regoli ta' l-UE dwar l-oriġini; jilqa' l-prattika ta' l-UE li żżomm dawn l-iskemi u r-regoli taħt reviżjoni u jinkuraġġixxiha biex tissimplifika u tirrazzjonalizza dawn ir-regoli; jilqa' l-proposta biex ir-regoli ta' l-oriġini speċifiċi għall-prodott jinbidlu għal kriterju wieħed ġenerali sabiex il-pajjiżi eleġibbli jkunu jistgħu isibuha eħfef biex jużaw l-iskema;
55. Huwa mħasseb li, meta għandek 60% tat-tigri li fadal fid-dinja jinsabu fl-Indja, iċ-ċensiment ippjanat iżda mdawwem tat-tigri kollha ta' l-Indja jista' juri tnaqqis fin-numru serjament baxx ta' 1,500 tigra fil-pajjiż; jirrikonoxxi li l-valur ta' kummerċ illegali fl-ispeċi ta' annimali selvaġġi huwa stmat li huwa l-akbar wara l-kummerċ internazzjonali tad-drogi illegali u li l-livelli ta' sfruttament u kummerċ ta' xi speċi, bħat-tigri, huma tant għoljin li l-popolazzjonijiet tagħhom qed jonqsu b'mod drastiku; jirrikjedi monitoraġġ aħjar ta' l-importazzjoni ta' kampjuni ta' annimali selvaġġi u ta' prodotti ta' annimali selvaġġi sabiex tiġi mħarsa l-Konvenzjoni dwar Kummerċ ta' Speċi fil-Periklu (CITES), u li l-infurzar jittejjeb sabiex l-ispeċi fil-periklu jiġu salvati mit-theddida ta' l-estinzjoni; jitlob lill-UE biex toffri koperazzjoni u assistenza teknika lill-Indja sabiex tgħinha żżomm il-bijodivesità tagħha u tindirizza l-kummerċ illegali fl-annimali selvaġġi; jitlob sabiex il-kwistjoni ta' protezzjoni tat-tigra b'mod ġenerali, u l-ġlieda kontra l-kummerċ b'mod partikulari tal-ġilda, ta' l-għadam u tal-partijiet tal-ġisem tat-tigra, inkluż permezz ta' koperazzjoni bejn dwani, jiddaħħlu fl-aġenda tal-laqgħa li jmiss tal-Forum Ambjentali bejn l-UE u l-Indja;
56. Jinnota li l-liberalizzazzjoni tal-kummerċ ħalliet lill-bdiewa ż-żgħar kemm fl-UE u fl-Indja jaffaċċjaw kompetizzjoni globali, u minħabba f'hekk kellhom inaqqsu l-prezzijiet, meta fl-istess żmien it-tnaqqis fis-sussidji tal-gvern għollielhom il-prezzijiet tal-biedja; huwa mħassab li fl-Indja, il-bdiewa qed iduru għal kuntratti ta' biedja għall-esportazzjoni, minflok jipprovdu prodotti domestiċi, u dan qed iwassal għall-malnutrizzjoni f'zoni rurali foqra; jinkuraġġixxi lill-Indja biex tidderiġi fondi għal infrastruttura relatata mal-kummerċ lejn zoni ta' agrikoltura rurali biex tgħin lill-bdiewa jadattaw għall-isfidi tal-globalizzazzjoni;
57. Iħeġġeġ lill-UE biex f'fora internazzjonali tippromwovi responsabiltà korporattiva akbar fost l-intrapriżi barranin stabbiliti fl-Indja, u fl-istess ħin iħeġġeġ biex jintlaħaq ftehim mal-gvern Indjan biex titwaqqaf sistema effettiva għall-monitoraġġ tad-drittijiet tal-ħaddiema f'kumpaniji domestiċi u barranin ibbażati fl-Indja.
58. Jitlob għal taħditiet bejn l-UE u l-Indja dwar investiment sabiex titqies ir-responsabiltà soċjali u politika ta' investituri barranin; jenfasizza li d-drittijiet ta' l-investituri għandhom imorru id f'id ma' l-obbligazzjonijiet tagħhom u li l-investituri għandhom ta' l-anqas japplikaw l-istandards fundamentali tax-xogħol ta' l-Organizzazzjoni Internazzjonali għax-Xogħol (ILO).
59. Jilqa' l-impenn ta' l-Indja għall-prevenzjoni ta' tħaddim ta' tfal u għall-parteċipazzjoni fil-Programm Internazzjonali dwar l-Eliminazzjoni ta' Tħaddim ta' Tfal u l-proġett INDUS dwar tħaddim ta' tfal; huwa mħasseb bl-inċidenza għolja ta' ħaddiema tfal fl-Indja; jitlob lill-Indja biex tikkopera ma' l-ILO u tirratifika l-Konvenzjoni 138 dwar l-Età Minima u l-Konvenzjoni 182 dwar L-Agħar Forom ta' Tfal li Jaħdmu; jitlob lill-Indja biex tieħu miżuri biex tissielet kontra l-forom kollha ta' skjavitù moderna, tħaddim ta' tfal u l-isfruttament ta' xogħol tan-nisa, bil-ħsieb li jiġi żgurat rispett għad-drittijiet fundamentali tal-ħaddiema u biex jiġi evitat 'dumping' soċjali; kif ukoll biex tadotta l-prinċipju ta' l-ILO ta' 'xogħol deċenti'; ifakkar l-importanza ta' l-arranġamenti varji ta' kummerċ b'konformità ma' konvenzjonijiet internazzjonali dwar drittijiet tal-bniedem u standards tax-xogħol;
60. Iqis li l-Indja għandha tirratifika u timplimenta l-Konvenzjonijiet ta' l-ILO li fadal kemm jista' jkun malajr sabiex tgħin biex jissaħħaħ l-iżvilupp fuq perjodu ta' żmien twil u biex titjieb il-kwalità tal-ħajja ta' l-ifqar frazzjonijiet tas-soċjetà;
61. Jenfasizza li l-UE għandha tagħmel pressjoni fuq il-gvern Indjan sabiex jindirizza, bl-akbar sens ta' urġenza, xogħol 'bonded', li jeffetwa miljuni ta' persuni fl-Indja; jitlob lill-Indja biex tirratifika l-Konvenzjoni 98 dwar Dritt li Torganizza u Negozjati Kollettivi;
62. Jenfasizza l-importanza li r-relazzjonijiet ta' kummerċ li qed jiżviluppaw bejn l-UE u l-Indja ma jiġux separati mir-riformi tad-drittijiet tal-bniedem fl-Indja;
63. Jinnota li l-amministrazzjoni attwali ta' l-Indja rrikonoxxit b'mod aktar miftuħ il-problemi li joħolqu l-HIV/AIDS; jikkunsidra li t-tixrid ta' l-HIV/AIDS għandu l-potenzjal li jħarbat il-progress ta' l-Indja; jinnota li l-aċċess limitat għall-kura tas-saħħa u l-livelli baxxi ta' attenzjoni għas-saħħa huma responsabbli għall-inċidenza dejjem akbar ta' l-HIV/AIDS; jilqa' l-fatt li żiedet il-fondi u l-programmi tagħha biex tindirizza l-problemi li ħolqu l-HIV/AIDS u jitlob lill-UE biex tgħin lill-Indja biex tmexxi 'l quddiem programmi għal individwi u komunitajiet li jinsabu f'risku kbir; f''dan is-sens jilqa' x-xogħol li wettqet l-Organizzazzjoni Nazzjonali għall-Kontroll ta' l-AIDS (NACO) fl-attivitajiet tagħha biex tqajjem kuxjenza fost il-popolazzjonijiet rurali u urbani;
64. Iqis li d-diżastri naturali riċenti, speċjalment it-tsunami ta' l-Oċean Indjan u t-terrimot ta' l-Asja t'Isfel, urew il-bżonn għal kollaborazzjoni aktar kreattiva u immaġinattiva bejn in-numru kbir ta' aġenziji u organizzazzjonijiet li jgħinu f'każ ta' diżastri; jinnota li l-UNESCO, permezz tal-Kummissjoni Oċeanografika tagħha, kienet attiva fit-twaqqif ta' Twissija ta' Tsunami ta' l-Oċean Indjan u Sistema ta' Mitigazzjoni, u li n-NU qed jikkordinaw l-implimentazzjoni tal-Qafas Hyogo ta' Azzjoni, pjan ta' 10 snin għat-tnaqqis tar-riskju ta' diżastru naturali; jitlob lill-Indja, lill-UE u lill-Istati Membri biex jappoġġjaw dawn l-inizjattivi, ħalli, permezz ta' l-antiċipazzjoni tal-frekwenza u s-severità tad-diżastri naturali u s-sinerġiji bejn l-isforzi umanitarji u l-aġenziji ta' għajnuna tal-gvern, tkun tista' tiżdied l-effettività sostenuta ta' l-assistenza ta' wara diżastru;
65. Jitlob biex jinżamm samit parlamentari kull sena li jkun jikkoinċidi ma' jew li jkun eżatt qabel is-samit annwali ta' bejn l-Indja u l-UE, li ssoltu jseħħ mingħajr il-parteċipazzjoni uffiċjali tal-Parlament Ewropew; jikkunsidra li samits bħal dawn jagħmluha possibbli biex jiġu żviluppati r-rabtiet bejn entitajiet parlamentari, itejbu l-komprensjoni tad-differenzi tagħhna u jġibu s-sistemi demokratiċi taż-żewġ naħat eqreb xulxin;
66. Jitlob lill-Kummissjoni biex tirrapporta lill-Parlament Ewropew fuq bażi regolari dwar progress fl-implimentazzjoni tal-Pjan ta' Azzjoni Konġunt bejn l-Unjoni Ewropea u l-Indja;
o
o o
67. Jagħti istruzzjonijiet lill-President tiegħu biex iressaq din ir-riżoluzzjoni lill-Kunsill, lill-Kummissjoni, lill-gvernijiet u lill-parlamenti ta' l-Istati Membri u lill-Gvern u lill-Parlament tar-repubblika ta' l-Indja.
- [1] Test adottat minn dik il-ġurnata, P6_TA(2005)0381.
- [2] Test adottat minn dik il-ġurnata, P6_TA(2005)0364.
- [3] Test adottat minn dik il-ġurnata, P6_TA(2005)0454.
- [4] Test adottat minn dik il-ġurnata, P6_TA(2006)0056.
- [5] Test adottat minn dik il-ġurnata, P6_TA(2006)0123.
NOTA SPJEGATTIVA
Introduzzjoni
L-UE u l-Indja jikkostitwixxu l-akbar demokraziji fid-dinja. Id-demokrazija, il-pluraliżmu u l-istat tad-dritt jiggarantixxu konsistenza u kontinwità fil-kummerċ u fir-relazzjonijiet ekonomiċi tagħhom u jikkontribwixxu għall-istabilità globali.
Għad li jridu jtejbu r-relazzjonijiet ekonomiċi bilaterali, il-fehmiet dwar Sħubija Strateġika jvarjaw f'oqsma vitali. Id-diverġenza bejn ekonomiji fi stadji differenti ta' żvilupp hija naturali iżda l-oqsma prinċipali jridu jiġu indirizzati sabiex jinkisbu benefiċċji ekonomiċi reali.
Wieħed ma jistax iħares biss lejn il-kummerċ, u r-rapport jeżamina bir-reqqa d-distribuzzjoni ta' benefiċċji tal-liberalizzazzjoni Indjana u jevalwa l-implikazzjonijiet ta' tkabbir mgħaġġel.
L-Indja hija mexxejja emerġenti fiċ-ċentru ġeopolitiku: hija l-punt fejn jiltaqgħu l-Lvant Imbiegħed prosperu, il-Lvant Nofsani b'riżorsi kbar ta' enerġija u l-Asja Ċentrali. Ir-rapport jiddiskrivi l-politika ta' l-Indja ta' prammatiżmu strateġiku, jesplora r-relazzjonijiet bilaterali u multilaterali tagħha u jevalwa kif dawn jiddeterminaw it-tkabbir futur.
Koperazzjoni bejn l-UE u l-Indja: Lejn Sħubija Strateġika.
Mill-1980 sa l-2005 l-kummerċ bejn l-UE u l-Indja kiber minn €4.4 biljun għal €40 biljun.
L-UE hija l-akbar sieħeb fil-kummerċ ta' l-Indja u l-Istati Membri jikkostitwixxu 22.4% ta' l-esportazzjoni ta' l-Indja u 20.8% ta' l-importazzjoni. Madankollu hemm żbilanċ bejn il-livelli relattivi tal-kummerċ: iżda filwaqt li l-UE tikkostitwixxi 21% tal-kummerċ Indjan, is-sehem ta' l-Indja mill-kummerċ ta' l-UE huwa inqas minn 1%; u filwaqt li l-UE hija l-akbar sieħeb fil-kummerċ ta' l-Indja, l-Indja tinsab fl-14-il post fil-lista relattiva ta' l-UE;
It-tariffi ta' importazzjoni għoljin ta' l-Indja u r-rifjut ta' impenn għal rati massimi obbligatorji għall-prodotti kollha, jibqgħu kawża ta' tħassib għall-industrija ta' l-UE. Skemi ta' eżenjonijiet u preferenzi jikkombinaw flimkien b'mod kumpless u mingħajr trasparenza li jwassal għal tagħwiġ fis-suq. Flimkien ma' ostakli kbar li mhux tariffati, li jvarjaw minn standards onerużi u ċertifikazzjonijiet fuq prodotti sa listi ta' importazzjoni negattivi, dawn l-ostakli jfixklu l-ottimizzazzjoni tal-kummerċ bilaterali.
Filwaqt li l-liberalizzazzjoni għandha impatti pożittivi fuq perjodu ta' żmien twil, l-ispejjeż fuq żmien qasir jistgħu jeffettwaw lill-industrija Indjana b'mod negattiv. L-Indja titkellem dwar 'Ewropa fortizza' u dwar il-bżonn ta' armonizzazzjoni tas-sistemi marbutin mal-kummerċ madwar l-UE kollha. L-Indja targumenti li l-ostakli mhux tariffati ta' l-UE, bħal azzjonijiet ta' difiża tal-kummerċ, standards tas-saħħa u kontrolli fuq moviment ta' popli joħolqu suq impenetrabbli. Filwaqt li hemm xi tħassib dwar id-WTO, l-eliminazzjoni ta' dawn l-ostakli hija ta' importanza kbira sabiex tinħoloq sħubija strateġika ta' vera.
Wieħed ma jistax iħares lejn il-kummerċ separatament għalih innifsu; l-interessi strateġiċi għandhom irwol ewlieni. Il-Kummissarju Mandelson jiddikjara li l-Indja hija "d-destinazzjoni ta' l-għażla" tiegħu, iżda madankollu jkompli jagħti n-nar lill-ossessjoni li għandha l-UE biċ-Ċina. Il-midja Indjana ġġenerat ostilità lejn l-UE wara t-tilwim dwar l-ICC u l-Konvenzjoni ta' Ottawa, u din tkompli żżid mas-sensitività dwar il-patronizzazzjoni ta' l-UE fuq l-Indja. Il-każ Mittal jepitomizza din il-perspettiva u l-'handling' ta' l-offerta ta' l-OPA tagħt lill-midja Indjana aktar spazju fejn timraħ. Il-bini ta' relazzjonijiet aħjar mid-Delegazzjoni tal-Kummissjoni u l-Ambaxxati ta' l-Istati Membri għandhom jinvolvu l-Indjani u jindirizzaw it-tħassib tagħhom.
Il-Pjan ta' Azzjoni Konġunt huwa maħsub biex iżid il-kummerċ u l-koperazzjoni ekonomika u l-Grupp għall-Kummerċ ta' Livell Għoli qed jesplora xi mezzi biex jissaħħu r-relazzjonijiet bilaterali. It-tnejn huma impenjati għal konklużjoni b'suċċess tad-DDA, iżda fl-istess ħin ma jinjorawx il-ftehimiet bilaterali WTO+. L-opportunitajiet għaż-żewġ naħat jinkludu l-infurzar tal-miżura IPR u l-ftehimiet IPR. Filwaqt li huwa komprensiv, il-Pjan ma jistipulax prijoritajiet jew skadenzi u jipprovdi biss għal djalogu kontinwu. L-ebda naħa m'hija qed turi r-rieda politika biex tibni Sħubija Strateġika effettiva. Hemm bżonn li l-intenzjonijiet ta' kulħadd ikunu ċari: billi jiġu enfasizzati l-ambizzjonijiet komuni u jiġu stipulati l-iskadenzi.
Investiment Barrani Dirett (FDI): It-tegħlib ta' l-Ostakli ta' l-Aċċess għas-Suq
L-indja hija kklassifikata fid-90 post bħala kemm huwa faċli li wieħed jiftaħ negozju, iżda madankollu hija t-tielet għażla tad-dinja għal investiment barrani dirett. L-UE hija l-akbar sors ta' FDI ta' l-Indja b'ammont ħiereġ ta' EUR 820 miljun fl-2003. Madankollu l-Indja hija mħassba dwar il-livelli baxxi tad-dħul ta' l-FDI mill-UE, li huwa anqas minn EUR 5 biljun fl-aħħar 15-il sena - 2% ta' l-FDI totali.
L-atteġġjament tal-Gvern lejn l-FDI tjieb; fl-aħħar sema' t-tħassib ta' l-investituri u qabbad lill-Kummissjoni għall-Investiment biex tħeġġeġ FDI, tiggwida l-investituri fil-proċeduri u tressaq rakkomandazzjonijiet ta' politika għad-dħul ta' l-FDI. Infetħu numru kbir ta' setturi għall-investituri barranin iżda ħafna setturi oħrajn, inklużi l-agrikoltura u l-beni immobbli, għadhom mhux aċċessibbli. Il-prosperità attwali ta' l-Indja fis-setturi finanzjarji u ta' l-assikurazzjoni hija prova tal-benefiċċji tal-ftuħ għall-FDI. Għalkemm il-limiti massimi ta' FDI f'setturi individwali qed jiġu mgħollija gradwalment, il-gvern xorta għadu jxaqleb lejn dawk tal-lokal u l-limiti fuq pussessjoni għadhom ir-regola aktar milli l-eċċezzjoni.
Fuq livelli ta' stat u ta' muniċipju l-investituri barranin iħabbtu wiċċhom ma' burokrazija frustranti. L-applikazzjonijiet eliġibbli għal approvazzjoni awtomatika huma ftit ħafna, filwaqt li l-kwantità kbira ta' l-applikazzjonijiet jiġu indirizzati fuq il-bażi ta' kull każ għalih. Ir-regolamenti jinbidlu spiss b'mod eżasperanti, u jagħmluha diffiċli biex wieħed ilaħħaq mal-kapriċċi ta' sistema mingħajr trasparenza.
L-Indja qed turi l-karatteristiċi tipiċi ta' nazzjon li qed jiżviluppa. B'networks tat-trasport ħżiena u qtugħ ta' l-elettriku regolari, il-Prim Ministru Singh jistma li l-Indja għandha bżonn FDI fl-infrastruttura ta' $150 biljun fuq il-ħames snin li ġejjin. L-intoppi ewlenin jirriżultaw mill-kumplessità taċ-ċaqliq mill-metodi tradizzjonali kif is-settur pubbliku jħaddem l-infrastruttura għal metodu li jiddependi fuq Sħubija bejn il-Gvern u l-Privat. Dan ta' l-aħħar jitlob għal trasparenza u għal ambjent regolatorju kredibbli u jimponi l-istess kundizzjonijiet għall-investituri privati u għall-gvern. Dawn huma kwistjonijiet li l-Indja għandha bżonn tindirizza b'mod ġenerali.
Ir-riskji ta' Sigurtà jibqgħu kawża ta' tħassib. Minkejja li t-tensjonijiet naqsu, ma hemm l-ebda riżoluzzjoni għall-Kunflitt tal-Kashmir u t-tensjonijiet settarji għadhom jippersistu. L-ispezzjonijiet spissi ta' sigurtà jagħmlu l-ivvjaġġar lejn l-Indja wieħed inkonvenjenti, u b'hekk jaqtgħu qalb l-investituri. Madankollu, wieħed mill-vantaġġi ewlenin ta' l-Indja huwa l-istabilità politika. Politiki ta' koalizzjoni jista' jkollhom l-iżvantaġġi tagħhom, iżda minkejja t-tibdil fl-amministrazzjoni, id-direzzjoni ġenerali ta' l-Indja ma nbidlitx f'dawn l-aħħar 15-il sena.
Illum, id-Dijaspora ta' l-Indja hija ta' aktar minn 20 miljun, bi 3 miljun minnhom li jgħixu fl-UE. L-Indjani li jgħixu barra mill-pajjiż jagħmlu konribuzzjoni kbira għall-industrija Indjana relatata ma' l-Esternalizzazjoni tal-Proċessi tal-Kummerċ Indjan (Business Process Outsourcing - BPO). Madankollu, id-Dijaspora ma tinvestix biżżejjed, u tipprovdi biss 10% tad-dħul ta' l-FDI. Kif jinnota l-Prim Ministru Singh: jekk l-Indjani "jgħinu biex l-Amerika ssir kompetittiva, għalfejn ma jistgħux jagħmlu aktar għall-Indja stess?" L-Indja għandha bżonn ta' kontributi soċjali u finanzjarji għal żvilupp fuq perjodu ta' żmien twil. Il-gvern waqqaf kumitat biex ifassal skemi għall-aċċess tar-riżorsi tad-Djaspora; iċ-ċittadinanza doppja hija proposta tanġibbli.
Il-BPO: Kif tkun "Bangalored."
L-Indja tiġbed lejha sehem ta' 44% tas-servizzi relatati ma' l-IT nnegozjati globalment u l-Esternalizzazjoni tal-Proċessi tal-Kummerċ (BPO). L-Indja hija l-aqwa destinazzjoni 'off-shore' tan-Negozji Ewropej, b'66% minnhom jaħdmu ma' bejjiegħa bbażati fl-Indja. Il-kuntratti BPO attwati fl-Indja m'għadhomx xogħlijiet ta' programmazzjoni sempliċi u servizzi ta' 'call centre', iżda qed jinvolvu dejjem aktar proċessi ta' negozju sħaħ u xogħol ta' konsultazzjoni.
Bħala riżultat tax-xejriet demografiċi kurrenti, it-tkabbir potenzjali ta' l-UE għandu jonqos sa l-2020. B'kuntrast ma' dan, il-vantaġġ prinċipali komparattiv ta' l-Indja huwa numru kbir ta' ħaddiema żgħażagħ imħarrġa, li jitkellmu bl-Ingliż u li ma jiswewx ħafna flus. Bejn wieħed u ieħor, dawn jaqilgħu $8,000 apparagun ma' $ 70,000 għall-kontropartijiet Germaniżi. Il-klijenti ma jibbażawx id-deċiżjonijiet fuq il-paga biss iżda, anki meta wieħed iqis ukoll l-ispejjeż addizzjonali li jinvolvi t-twaqqif ta' post tax-xogħol adegwat, grazzi għad-differenzi fil-paga, wieħed jista' jiffranka sa 50%.
Għalkemm l-OECD tiddikjara li l-BPO tista' "teffettwa potenzjalment" 20% biss ta' l-impiegi fil-15-il stat oriġinali, bejn l-2003 u l-2008 se jiġu esternalizzati 200,000 impieg ta' l-UE lejn l-Indja. L-Indja ma tipproduċix biżżejjed inġiniera biex tlaħħaq mad-domandi. L-Indja għandha miljun student fil-kulleġġi ta' l-inġinerija iżda 3,000 biss jiggradwaw kull sena mill-IITs. Mill-bqija, ftit jissodisfaw ir-rekwiżiti rigorużi tal-Korporazzjonijiet Multinazzjonali (MNCs). Sa l-2010, id-domanda għall-professjonisti li jitkellmu bl-Ingliż se tkun ta' 160,000 u 40,000 Indjan biss se jkunu kwalifikati. 30,000 espatrijat ta' l-UE diġà jaħdmu fl-Indja u hemm opportunitajiet ċari għal Ewropej imħarrġa li lesti biex jirrilokaw.
L-iskema ta' borża ta' studju Erasmus Mundus ta' €33 miljun u s-Sedja Jean Monnet fl-Istudji Ewropej fl-Università ta' Delhi huma vitali biex jissaħħu r-relazzjonijiet bejn l-UE u l-Indja. F'Bangalore, 95% ta' l-MNCs huma mmexxija minn Indjani li kisbu edukazzjoni u esperjenza barra mill-pajjiż. L-UE għandha tippermetti lill-Indjani biex jibqgħu jaħdmu wara l-istudji tagħhom. Dan jiġġustifika l-investimenti tas-sistemi ta' l-edukazzjoni għolja ta' l-UE u, kif qal il-Ministru ta' l-Edukazzjoni Shanmugharatanam, wara li Singapor iddeċieda li jiġbed studenti Ċiniżi intelliġenti lejn l-iskejjel tiegħu, "int tippreferi li għaxar snin oħra dawn l-istudenti jkunu qed jikkompetu fuq in-naħa tiegħek jew kontrik?"
L-Enerġija: L-Impetus wara l-Politika ta' Kummerċ
L-Impatt tat-tkabbir Indjan fuq id-domanda globali għall-enerġija huwa fenomenali. Attenzjoni mġedda fuq l-enerġija hija mmexxija minn suq taż-żejt dejjaq u prezzijiet li rduppjaw fuq l-aħħar tliet snin. Bi provvista li ġejja minn dejjem anqas pajjiżi, strateġija sensibbli għal sigurtà ta' l-enerġija titlob approċċ integrat u innovattiv.
Fattur prinċipali li jiddetermina t-tkabbir futur huwa l-kapaċità ta' l-Indja li tlaħħaq mal-bżonnijiet ta' enerġija li għadhom telgħin 'il fuq. L-Indja ssofri nuqqasijiet serji ta' enerġija u tiddependi bil-kbir fuq iż-żejt u l-faħam. Is-sigurtà ta' l-enerġija qed tmexxi l-politika barranija u l-Indja tinqala' biex tilgħab bl-imsieħba globali fl-assalt għaż-żejt li fadal. Filwaqt li s-Civil Nuclear Deal ta' l-Istati Uniti qed jistenna l-approvazzjoni tal-Kungress, l-Indja qed tinnegozja pajpijiet għall-importazzjoni ta' gass b'valur ta' $3.5 biljun u $7 biljun mat-Turkmenistan u ma' l-Iran rispettivament.
L-Indja hija ambjent fertili għaż-żejt u l-gass, iżda l-esplorazzjoni mmexxija mis-settur pubbliku dejjem kienet kawta ħafna. Id-dħul ta' kumpaniji tal-Punent biddlu din il-pożizzjoni. Il-Cairn Energy Britannika rrappurtat bosta skoperti ta' żejt f'Rajasthan fl-2004, bl-akbar waħda fiha 500 miljun barmil ta' riservi li jistgħu jiġu rkuprati). L-Indja għandha tinkuraġġixxi tfittix aktar qawwi għaż-żejt u l-gass, billi tipprovdi inċentivi kbar lill-kumpaniji ta' l-UE.
Sorsi li jiġġeddu jistgħu jlaħħqu mad-domanda għall-enerġija ta' l-Indja fuq perjodu ta' żmien twil u jagħtu spinta lill-kapacità tal-ġenerazzjoni ta' l-enerġija. Meta wieħed iqis is-sensitività tal-ħarsien ta' l-ambjent flimkien ma' għarfien teknoloġiku, l-UE tista' toffri soluzzjonijiet billi taqsam l-esperjenza ta' sorsi li jiġġeddu u alternattivi ta' effiċjenza. Flimkien għandna niddefinixxu l-arkitettura ta' l-enerġija globali permezz ta' zvilupp ta' l-enerġija innovattiv u sostenibbli, filwaqt li jintlaħqu l-'benchmarks' dwar il-bidla fil-klima.
L-Indja: Ċentru ġeopolitiku importanti fis-seklu 21?
Hekk kif l-Indja tevolvi minn pajjiż li qed jiżvilluppa għal pajjiż żviluppat, hija qed iġġorr responsabiltà globali. Pijunier fil-kummerċ bejn in-Nofsinhar u n-Nofsinhar, l-esportazzjoni Indjana kibret b'39% f'dawn l-aħħar erba' snin u l-kummerċ bilaterali kiber b’ħames darbiet fl-1990 minn $1.3biljun għal $6.9biljun. Barra minn hekk, l-Indja ħadet rwol ewlieni, għalkemm xi ftit defensiv, fid-WTO, ta' promozzjoni ta' Trattament Speċjali u Differenzjali għall-pajjiżi li qed jiżviluppaw, u għandu jkompli jkollha rwol pożittiv fid-DDA billi tippromwovi l-benefiċċji tal-ftuħ tas-suq u billi timpenja ruħha biex tiftaħ il-kumplament tas-setturi li għadhom protetti.
L-Indja bniet FTAs bilaterali fl-Asja u kemm l-FTA ta' Sri Lanka kif ukoll is-CECA ta' Singapor qed jaħdmu tajjeb. Filwaqt li l-liberalizzazzjoni unilaterali ġġib profitti importanti, it-tkabbir ottimu jiġi permezz ta' multilateraliżmu. Ir-relazzjonijiet bejn l-Indja u l-Pakistan waqqfu l-koperazzjoni ekonomika reġjonali tas-SAARC. Għalkemm il-kummerċ huwa għodda biex tinbena l-fiduċja, il-kummerċ intra-reġjonali għadu baxx u jikkostitwixxi biss 4.7% tal-kummerċ totali. Il-politika ta' "Ħares lejn il-Lvant" kienet suċċess, issa hemm ippjanat FTA bejn l-Indja u l-ASEAN u fl-2004 l-kummerċ ma' l-Asja tal-Lvant ammonta għal 20% tal-kummerċ totali. Meta l-Ftehima dwar il-Kummerċ Ħieles fl-Asja t-Isfel tidħol fis-seħħ f'Lulju 2006, wieħed jista' jistenna espansjoni kbira fir-reġjun, għalkemm il-profitti kienu jkunu akbar kieku ma kienx hemm daqsekk eċċezzjonijiet u kieku rriflettiet FTA ta' vera.
Iċ-Ċina għadha integrata aħjar ma' l-Asja tal-Lvant mill-Indja, għalkemm il-mod ta' kif isir il-kummerċ ma' l-ASEAN, il-punt ta' fejn jiltaqgħu, għandu jinbidel hekk kif jespandi l-kummerċ dirett. Ħafna jaħsbu li l-Indja u ċ-Ċina huma rivali. Ftit huma dawk li jirrealizzaw li l-kummerċ bejn l-Indja u ċ-Ċina, s-sena li għaddiet, kien ta' $1biljun fix-xahar. L-istrutturi ekonomiċi tagħhom huma kumplimentari aktar milli kompetittivi, u għalkemm il-paradigma ta' "Ċ-Ċina bħala fabbrika, u l-Indja bħala l-'back office'" m'għandhiex tkun esaġerata, it-tnejn li huma għandhom il-kapaċità li jkunu BPO u ċentri importanti ta' manifattura. Madankollu, l-attenzjoni ta' l-UE kienet iffokata fuq iċ-Ċina, u ssottovalutat il-potenzjal ta' l-Indja. Filwaqt li tfittex l-aħjar prospetti, fattur ewlieni li jiddetermina l-investiment ta' l-UE fir-reġjun għandu jkun ix-xewqa li xxerred in-negozju madwar il-ġganti ta' l-Asja.
Storja ta' żewġ Indji
Hekk kif l-ekonomija tespandi, is-salarji tal-professjonisti Indjani se jogħlew ħafna. Fi ftit żmien, 3.8 biljun dar se jkollha dħul annwali ta' £130K u dan joħloq żieda f'daqqa fl-infiq. Madankollu, il-benefiċċji m'humiex mifruxin b'mod ibbilanċat. Dawk li qed igawdu mill-prosperità fl-IT huma anqas minn 2%. Il-livell ta' faqar għadu għoli: 390 miljun jgħixu b'anqas minn $1 kuljum u kważi 40% huma illitterati.
Minkejja l-espansjoni mgħaġġla tas-settur tas-servizzi, l-agrikoltura għadha tiddomina, u tħaddem 65% tal-popolazzjoni. Il-liberalizzazzjoni tħalli lill-bdiewa jaffaċċjaw kompetizzjoni globali: u minħabba f'hekk ikollhom iraħħsu l-prezzijiet, filwaqt li t-tnaqqis fis-sussidji tal-gvern għollielhom il-prezzijiet tal-biedja. Il-bdiewa qed iduru għal kuntratti ta' biedja għall-esportazzjoni, minflok jipprovdu prodotti domestiċi, u dan qed iwassal għall-malnutrizzjoni f'zoni rurali foqra. Is-siti ta' l-intrapriżi jinsabu f'zoni urbani, u dan iwassal għal migrazzjoni fuq skala kbira u għalhekk il-faqar urban u l-kwartieri fqar jirriflettu proċess ta' żvilupp oblikwu. Biex wieħed ireġġa lura dawn ix-xejriet, hemm bżonn li jerġgħu jissaħħu l-agrikoltura u l-infrastruttura sabiex jiġi ġġenerat tkabbir fid-dħul f'zoni rurali.
It-tkabbir fl-istati tan-Nofsinhar u tal-Punent jiżboq lil dak fit-Tramuntana u fil-Lvant. Fil-Gurjarat, l-istat li qed jikber bl-aktar rata mgħaġġla, il-GSP rdoppja bejn l-1993 u l-2003 u l-prodott per capita żdied b'73% filwaqt li l-ifqar stat, il-Bihar, per capita żdied b'22% biss. L-iżbilanċi huma eżasperati bid-devoluzzjoni. Dan jaċċelera l-iżvilupp ta' l-istati aktar sinjuri iżda għandu l-effett oppost fuq l-istati aktar fqar. Il-kwalità tal-gvern hija fattur li jagħmel id-differenza, u dan jidher ċar fl-indiċi soċjali li qegħdin dejjem jitjiebu tar-Rajashan u tal-Kerala, li jgawdu minn tmexxija politika b'saħħitha u investiment għaqli. Sabiex tiġi żgurata koerenza, il-gvern ċentrali għandu jadotta politiki kumplimentari b'saħħithom li jridu jiġu applikati madwar l-istati kollha. Ir-riżorsi jridu jiġu ridirezzjonati lejn dawk ir-reġjuni li għadhom lura u lejn dawk il-gruppi soċjali b'nuqqas ta' rapprezentanza. L-isforzi ta' bini ta' kapaċitajiet għandhom ikunu ffokati fuq l-ifqar stati, sabiex ikunu jistgħu jużaw il-fondi b'mod effettiv.
L-Indja hija impenjata favur l-MDGs u qed issaħħaħ id-distribuzzjoni tas-servizzi soċjali. Madankollu, għad hemm dubji serji, bħall-inċidenza għolja ta' tħaddim ta' tfal u ta' HIV/AIDS. Il-koperazzjoni ta' l-UE fl-edukazzjoni u fis-saħħa rurali tista' tipprovdi fondi għal programmi ta' prijorità. L-Indja għandha ssaħħaħ l-integrazzjoni ma' l-ekonomija dinjija f'firxa dejjem usa' ta' manifattura u servizzi. L-UE tista' tindirizza t-tħassib dwar l-opportunitajiet indaqs billi taċċelera prodotti li jipprovdu għixien lin-nisa u billi tiffaċilita l-kummerċ fis-servizzi f'dawk is-setturi li jimpjegaw lin-nisa.
OPINJONI għall-Kumitat għall-Iżvilupp (31.5.2006)
tal-Kumitat għall-Kummerċ Internazzjonali
dwar ir-relazzjonijiet ekonomiċi u ta' kummerċ ta' l-UE ma' l-Indja
(2006/2034(INI))
Rapporteur għal opinjoni: Filip Andrzej Kaczmarek
SUĠĠERIMENTI
Il-Kumitat għall-Kummerċ Internazzjonali jistieden lill-Kumitat għall-Iżvilupp, bħala l-kumitat responsabbli, biex jinkorpora fil-mozzjoni għal riżoluzzjoni tiegħu s-suġġerimenti li ġejjin:
1. Jilqa' b'sodisfazzjon il-fatt li l-UE u l-Indja kkommettew ruħhom li jsaħħu d-djalogu u l-impenn, inklużi d-drittijiet tal-bniedem, bħala sħab strateġiċi fis-samit Indja-UE fis-7 ta' Settembru 2005, kif rifless fil-Pjan ta' Azzjoni Konġunt, li jinkludi wkoll koperazzjoni ta' żvilupp, li jagħti importanza lis-sostenibilità ambjentali u lill-koeżjoni soċjali u ekonomika; jitlob li jinżamm dialogu kontinwu fil-qasam tad-drittijiet tal-bniedem fi ħdan is-sħubija strateġika; f'dan il-kuntest jifraħ lill-Kummissjoni Nazzjonali Indjana għad-Drittijiet tal-Bniedem għall-ħidma indipendenti u rigoruża tagħha f'dawn il-kwistjonijiet;
2. Jilqa' r-rikonoxximent li qed jikber ta' l-importanza ta' l-ambjent ekonomiku estern, il-kummerċ u l-investiment fl-aħħar pjan fuq ħames snin ta' l-Indja dwar l-iżvilupp uman (2003-2007);
3. Jirrikonoxxi s-suċċess importanti tal-Gvern ta' l-Indja biex jeqred il-faqar, iżda jinnota li minkejja t-tkabbir ekonomiku b'mod sostenut, għad hemm inugwaljanza kbira, b'xi 30% tal-popolazzjoni ta' l-Indja (aktar minn 400 miljun persuna) għadha tgħix taħt il-livell tal-faqar; jinsab partikularment imħasseb dwar is-sitwazzjoni tas-sezzjonijiet żvantaġġati tal-popolazzjoni, b'mod partikulari n-nisa, it-tfal, dawk żvantaġġati u l-popolazzjoni rurali, eż. id-Daliti u l-Adivasis (tribuwijiet u popli indiġeni); jitlob lill-Kummissjoni u lill-Kunsill biex jaħdmu flimkien mal-gvern Indjan sabiex itejbu s-sitwazzjoni ta' dawk il-gruppi u biex jeżaminaw koperazzjoni futura bħala l-kontribuzzjoni tagħhom lejn it-tmiem tad-diskriminazzjoni tas-sessi u tal-kasti;
4. Huwa impressjonat bl-effetti ta' żvilupp ta' tkabbir ekonomiku f'xi reġjuni ta' l-Indja u jitlob lill-Kummissjoni biex tappoġġja riċerka dwar il-mudelli ewlenin u l-politiki nazzjonali/subnazzjonali bażiċi responsabbli għal effetti bħal dawn, sabiex jiġi ffaċilitat tagħlim transreġjonali u l-aħjar prattiki;
5. Jenfasizza li koperazzjoni ekonomika u kummerċjali għandha tkun iffokata fuq it-titjib tal-kundizzjonijiet ta' għixien ta' l-Indjani foqra, barra li jenfasizza wkoll l-iżvilupp ekonomiku sostenibbli;
6. Jenfasizza li l-objettiv li jintlaħqu l-Għanijiet ta' l-Iżvilupp tal-Millennju (MDGs) u l-ġlieda kontra l-faqar għandhom jibqgħu element ċentrali fis-Sħubija Strateġika bejn l-UE u l-Indja; jilqa' b'sodisfazzjon il-fatt li s-samit li jmiss bejn l-UE u l-Indja fit-13 ta' Ottubru 2006 għandu jindirizza l-kwistjoni ta' l-MDGs; u jitlob li jittieħdu miżuri speċifiċi urġenti biex jiġi żgurat li minoritajiet bħad-Daliti u l-Adivasis u komunitajiet oħra emarġinati, tribujiet u kasti, ikunu jistgħu jnaqqsu d-distakk wiesa' mal-kumplament tal-popolazzjoni biex jintlaħqu l-MDGs;
7. Jitlob lill-UE biex tappoġġja lill-potenzjal kummerċjali internazzjonali ta' l-Indja kif ukoll l-isforzi biex tiġbed investiment barrani dirett, b'mod partikulari billi ssaħħaħ l-għajnuna għall-kummerċ sabiex tindirizza l-intoppi infrastrutturali u amministrattivi, billi tistinka għal konklużjoni tad-WTO Doha Round li tiffaċilita l-iżvilupp fl-aħħar ta' l-2006, billi tuża l-pożizzjoni tagħha bħala mexxejja fil-grupp G20 sabiex tiżgura ftehim bilanċat bejn il-pajjiżi żviluppati, l-ekonomiji emerġenti u l-pajjiżi li qed jiżviluppaw;
8. Jitlob għal taħditiet bejn l-UE u l-Indja dwar investiment sabiex tiġi meqjusa r-responsabiltà soċjali u politika ta' l-investituri barranin; jenfasizza li d-drittijiet ta' l-investituri għandhom imorru id f'id ma' l-obbligazzjonijiet tagħhom u li l-investituri għandhom ta' l-anqas japplikaw l-istandards fundamentali tax-xogħol ta' l-Organizzazzjoni Internazzjonali għax-Xogħol (ILO).
9. Jikkunsidra li l-UE għandha tagħti attenzjoni speċjali lis-settur ta' l-SMEs fl-Indja, u għalhekk jissuġġerixxi li l-programmi kollha ta' koperazzjoni għall-iżvilupp bejn l-UE u l-SMEs ta' l-Indja jistgħu jissaħħu permezz ta' miżuri li jgħinu fl-iffinanzjar ta' proġetti lokali bbażati fuq is-suq u proposti miċ-ċittadini;
10. Jilqa' b'sodisfazzjon l-enfasi fuq is-saħħa, l-edukazzjoni, l-ilma u l-ambjent fil-koperazzjoni għall-iżvilupp ta' l-UE ma' l-Indja 2002-2006, kif ukoll l-impenn tal-Pjan ta' Azzjoni Konġunt biex iżid il-koperazzjoni għall-iżvilupp fis-setturi tas-saħħa u l-edukazzjoni, bil-għan li tikber il-koperazzjoni għall-iżvilupp u biex jikkumplimenta programmi importanti tas-settur soċjali fl-Indja, inklużi miżuri speċifiċi li effettivament iġibu fit-tmiem id-diskriminazzjoni kontra gruppi soċjali anqas iffavoriti, partikolarment, in-nisa; jitlob bl-istess mod li tingħata spinta lill-miżuri li jippromwovu l-edukazzjoni tal-bniet bħala parti mill-pjan ta' azzjoni, u b'dan il-mod jintlaħqu l-MDGs 2 u 3;
11. Jilqa' l-fatt li l-politika ambjentali hija identifikata bħala waħda mis-setturi ta' koperazzjoni fil-Pjan ta’ Azzjoni Kongunt; madankollu, jitlob sabiex l-aspetti ambjentali jkomplu jiġu enfasizzati fil-koperazzjoni għall-iżvilupp;
12. Jenfasizza li ż-żieda fil-qerda ambjentali fl-Indja hija problema li qiegħda dejjem tikber b'konsegwenzi ekonomiċi, soċjali u ambjentali inkonċepibbli, b'mod partikulari għan-numru kbir ta' Indjani li jgħixu fil-faqar, u jenfasizza l-urġenza partikulari biex titkompla l-koperazzjoni ta' l-UE ma' l-Indja f'dan il-qasam;
13. Jitlob għal koperazzjoni bejn l-UE u l-Indja fil-qasam ta' l-impiegi u tal-politika soċjali biex tkun iffokata fuq il-problemi tad-diskriminazzjoni kontra n-nisa fix-xogħol, ta' xogħol furzat u ta' tħaddim ta' tfal - ladarba l-Indja għandha waħda mill-ogħla inċidenzi ta' tħaddim ta' tfal - u jitlob lill-UE biex tinkuraġġixxi lill-Indja biex tirratifika l-Konvenzjoni 182 ta' l-ILO dwar L-Agħar Forom ta' Tħaddim ta' Tfal, u l-Konvenzjonijiet C 138 dwar l-età minima biex wieħed ikun jista' jaħdem u C 98 dwar id-Dritt li Torganizza u Negozjati Kollettivi, li jkun ifisser pass pożittiv lejn l-abolizzjoni eventwali tat-tħaddim tat-tfal;
14. Iħeġġeġ lill-UE biex tippromwovi u timplimenta miżuri biex tiżgura l-iżvilupp soċjo-ekonomiku tal-minoranzi, li ġew esklużi bil-kbir mill-ekonomija l-ġdida fl-Indja u li jiġu diskriminati fil-programmi ta' żvilupp u rkupru minn diżastri permezz ta', fost affarijiet oħrajn, il-promozzjoni ta' opportunitajiet indaqs f'impiegi f'kumpaniji privati u f'investituri bbażati fl-UE, l-inkuraġġiment ta' programmi li jinkludu lid-Dalit u l-użu ta' indikaturi biex titkejjel l-inklużjoni tad-Dalit fl-ekonomija l-ġdida;
15. Jenfasizza li l-UE għandha tagħmel pressjoni fuq il-gvern Indjan sabiex jindirizza, bl-akbar sens ta' urġenza, xogħol 'bonded', li jeffetwa miljuni ta' persuni fl-Indja;
16. Jenfasizza li l-koperazzjoni ta' l-UE għall-iżvilupp għandha tikkopera ma' l-Indja bħala donatur internazzjonali emerġenti permezz ta' skambji ta' esperjenza u koperazzjoni fi proġetti konkreti f'pajjiżi li qed jiżviluppaw; jenfasizza li minn dak li tgħallmet mill-esperjenza ta' l-Indja, l-UE tista' tagħmel l-għajnuna għall-iżvilupp aktar effettiva u produttiva;
17. Iħeġġeġ lill-UE biex f'fora internazzjonali tippromwovi responsabiltà korporattiva akbar fost l-intrapriżi barranin stabbiliti fl-Indja, fl-istess ħin iħeġġeġ li jintleħaq ftehim mal-gvern Indjan biex titwaqqaf sistema effettiva għall-monitoraġġ tad-drittijiet tal-ħaddiema f'kumpaniji domestiċi u barranin ibbażati fl-Indja.
PROĊEDURA
|
Titlu |
Ir-relazzjonijiet ekonomiċi u ta' kummerċ ta' l-UE ma' l-Indja | |||||
|
Referenzi |
||||||
|
Kumitat responsabbli |
INTA | |||||
|
Opinjoni ta' |
DEVE | |||||
|
Koperazzjoni eqreb - data mħabbra fil-plenarja |
| |||||
|
Rapporteur għal opinjoni: |
Filip Andrzej Kaczmarek | |||||
|
Diskussa fil-kumitat |
30.5.2006 |
25.4.2006 |
|
|
| |
|
Data adottata |
30.5.2006 | |||||
|
Riżultat tal-votazzjoni finali |
+: –: 0: |
18 0 1 | ||||
|
Membri preżenti għall-votazzjoni finali |
Danutė Budreikaitė, Michael Gahler, Hélène Goudin, Filip Andrzej Kaczmarek, Glenys Kinnock, Ģirts Valdis Kristovskis, Maria Martens, José Javier Pomés Ruiz, Horst Posdorf, Frithjof Schmidt, Margrietus van den Berg, Mauro Zani | |||||
|
Sostituti preżenti għall-votazzjoni finali |
Marie-Hélène Aubert, John Bowis, Manolis Mavrommatis, Zbigniew Zaleski | |||||
|
Sostituti skond ir-Regola 178(2) preżenti għall-votazzjoni finali |
Sajjad Karim, Francisco José Millán Mon, Ralf Walter | |||||
PROĊEDURA
|
Titlu |
Ir-relazzjonijiet ekonomiċi u ta' kummerċ ta' l-UE ma' l-Indja | ||||||||||
|
Numru tal-Proċedura |
|||||||||||
|
Kumitat responsabbli |
INTA | ||||||||||
|
Kumitat(i) mitlub(a) jagħtu/i opinjoni(jiet) |
DEVE |
|
|
|
| ||||||
|
Opinjoni(ijiet) mhux mogħtija |
|
|
|
|
| ||||||
|
Koperazzjoni aktar mill-qrib |
|
|
|
|
| ||||||
|
Rapporteur(s) |
Sajjad Karim |
| |||||||||
|
Rapporteur(s) preċedenti |
|
| |||||||||
|
Diskussa fil-kumitat |
21.3.2006 |
19.6.2006 |
|
|
| ||||||
|
Data adottata |
12.7.2006 | ||||||||||
|
Riżultat tal-votazzjoni finali |
+ - 0 |
26 0 1 | |||||||||
|
Membri preżenti għall-votazzjoni finali |
Francisco Assis, Jean-Pierre Audy, Enrique Barón Crespo, Daniel Caspary, Giulietto Chiesa, Christofer Fjellner, Béla Glattfelder, Jacky Henin, Syed Kamall, Sajjad Karim, Alain Lipietz, Helmuth Markov, Javier Moreno Sánchez, Georgios Papastamkos, Godelieve Quisthoudt-Rowohl, Bogusław Rogalski, Peter Šťastný, Robert Sturdy, Gianluca Susta, Johan Van Hecke, Zbigniew Zaleski | ||||||||||
|
Sostituti preżenti għall-votazzjoni finali |
Elisa Ferreira, Eugenijus Maldeikis, Antolín Sánchez Presedo, Mauro Zani | ||||||||||
|
Sostituti skond ir-Regola 178(2) preżenti għall-votazzjoni finali |
Anne Ferreira, Sarah Ludford | ||||||||||
|
Data tat-tressiq |
20.7.2006 | ||||||||||
|
Kummenti (disponibbli f'lingwa waħda biss) |
| ||||||||||