dwar it-test konġunt, approvat mill-Kumitat ta' Konċiljazzjoni, għal regolament tal-Parlament Ewropew u tal-Kunsill dwar l-Istrument Finanzjarju għall-Ambjent (LIFE+)

(PE-CONS 3611/2007 – C6‑0105/2007 – 2004/0218(COD))

(Proċedura ta' kodeċiżjoni: it-tielet qari)

Il-Parlament Ewropew,

–   wara li kkunsidra t-test konġunt approvat mill-Kumitat ta' Konċiljazzjoni (PE-CONS 3611/2007 – C6‑0105/2007),

–   wara li kkunsidra l-pożizzjoni tiegħu fl-ewwel qari(1) dwar il-proposta tal-Kummissjoni lill-Parlament Ewropew u lill-Kunsill (COM(2004)0621)(2),

–   wara li kkunsidra l-proposta emendata (COM(2004)0621/2)(3),

–   wara li kkunsidra l-pożizzjoni tiegħu fit-tieni qari(4) dwar il-pożizzjoni komuni tal-Kunsill(5),

–   wara li kkunsidra l-opinjoni tal-Kummissjoni dwar l-emendi tal-Parlament għall-pożizzjoni komuni (COM(2006)0759)(6),

–   wara li kkunsidra l-Artikolu 251(5) tat-Trattat KE,

–   wara li kkunsidra l-Artikolu 65 tar-Regoli ta' Proċedura tiegħu,

–   wara li kkunsidra r-rapport tad-delegazzjoni tiegħu għall-Kumitat ta' Konċiljazzjoni (A6‑0180/2007),

1.  Japprova t-test konġunt;

2.  Jagħti istruzzjonijiet lill-President tiegħu sabiex jiffirma l-att flimkien mal-President tal-Kunsill, skond l-Artikolu 254(1) tat-Trattat KE;

3.  Jagħti istruzzjonijiet lis-Segretarju-Ġenerali tiegħu sabiex jiffirma l-att wara li jkun ivverifika li l-proċeduri ntemmu kif imiss u sabiex, bi qbil mas-Segretarju-Ġenerali tal-Kunsill, jipproċedi għall-pubblikazzjoni ta' l-att fil-Ġurnal Uffiċjali ta' l-Unjoni Ewropea;

4.  Jagħti istruzzjonijiet lill-President tiegħu sabiex jgħaddi din ir-riżoluzzjoni leġiżlattiva lill-Kunsill u lill-Kummissjoni.

(1) ĠU C 157 E, 6.7.2006, p. 451. (2) Għadha mhux ippubblikata fil-ĠU. (3) Għadha mhux ippubblikata fil-ĠU. (4) Testi adottati, 24.10.2006, P6_TA(2006)0431. (5) ĠU C 238 E, 3.10.2006, p. 1. (6) Għadha mhux ippubblikata fil-ĠU.

Sfond

L-għan tar-Regolament rigward l-Istrument Finanzjarju għall-Ambjent (LIFE+), li hu bbażat fuq l-Artikolu 175(1) tat-Trattat, hu li jiġi introdott strument finanzjarju wieħed li jimmira lejn l-ambjent biex b’mod partikulari jappoġġja l-prijoritajiet tas-Sitt Programm ta' Azzjoni ta' l-Ambjent. Dan il-programm, li ser jopera bejn l-2007 u l-2013, ser ikopri l-biċċa l-kbira ta’ programmi attwali li bħalissa qed jiġu mmaniġġjati mid-DĠ għall-Ambjent, bħalma huma l-programm LIFE III, il-programm għall-iżvilupp urban sostenibbli, il-programm għall-NGOs u Forest Focus b’mod issimplifikat.

Il-Parlament għamel l-ewwel qari tiegħu fis-7 ta' Lulju 2005: Il-Kunsill adotta l-pożizzjoni komuni tiegħu fis-27 ta’ Ġunju 2006. Fit-tieni qari ta’ l-24 ta’ Ottubru 2006, il-Parlament adotta 31 emenda tal-pożizzjoni komuni tal-Kunsill.

Ħafna mill-31 emenda tat-tieni qari tal-Parlament kienu marbuta mal-maniġment tal-baġit ta’ LIFE+ li kien ukoll l-iktar kwistjoni kontroversjali. Il-pożizzjoni komuni tal-Kunsill ipproponiet sistema ta’ maniġment delegat tal-Programm, skond liema proposta, 80% tal-fondi kellhom ikunu mmaniġġjati mill-Istati Membri. Il-PE insista fuq l-irwol ċentrali tal-Kummissjoni u għalhekk jappoġġja sistema ta’ maniġment ċentrali. Kwistjonijiet oħra li hemm fin-nofs bejn il-Parlament u l-Kunsill jikkonċernaw l-iktar kwistjonijiet baġitarji (inkluż l-iffinanzjar ta’ Natura 2000), l-introduzzjoni ta' proċedura ta' Komitoloġija ġdida u l-miżuri eliġibbli għall-iffinanzjar.

Il-proċedura ta’ Konċiljazzjoni

Sussegwentement, il-Kunsill, b’mod mhux formali indika li mhux ser ikun jista’ jaċċetta l-emendi kollha tal-Parlament u li b’konsegwenza t’hekk proċedura ta’ konċiljazzjoni tkun neċessarja.

Il-laqgħa kostitwenti tad-delegazzjoni tal-Parlament għall-Kumitat ta’ Konċiljazzjoni saret fit-28 ta’ Novembru 2006 fi Brussell. Saru tliet trijalogi (fl-1 ta’ Frar, fit-13 ta’ Frar u fl-1 ta’ Marzu), fejn it-tim li kien qed jinnegozja kien qed jirrapporta lura lid-delegazzjoni tal-PE (fit-13 ta’ Frar u fil-15 ta’ Marzu). Waqt l-ewwel fażi tan-negozjati, il-Kunsill aċċetta l-pożizzjoni tal-PE dwar maniġment ċentrali dirett. Sar progress raġonevoli fuq kwistjonijiet oħra bħall-possibilità li l-Istati Membri jfasslu prijoritajiet nazzjonali, parteċipazzjoni pubblika u xi dispożizzjonijiet tekniċi.

Madankollu, punti ewlenin oħra ta’ differenza baqgħu mingħajr soluzzjoni bħal: il-baġit totali, l-implimentazzjoni tal-baġit, il-proporzjon tal-baġit dedikat għall-proġetti “natura u bijodiversità”, u l-bżonn li jittejbu l-proġetti ta' koperazzjoni transkonfinali.

Il-Kumitat ta’ Konċiljazzjoni ltaqa’ filgħaxija fis-27 ta’ Marzu 2007. Il-PE kien irrapreżentat mill-Viċi-President is-Sra Rodi Kratsa-Tsagaropoulou, il-president tal-Kumitat responsabbli, is-Sur Miroslav Ouzký, u r-rapporteur, is-Sra Marie Anne Isler Béguin.

Il-Kunsill kien irrapreżentat mis-Sur Gabriel, il-Ministru Federali Ġermaniż għall-Ambjent u l-Kummissjoni kienet irrapreżentata mill-Kummissarju Dimas. Ftit qabel nofs il-lejl, il-Kumitat seta’ jasal għal qbil finali wara li d-delegazzjoni tal-Parlament Ewropew aċċettat b’mod unanimu l-pakkett ta’ kompromess propost.

Il-punti ewlenin tal-qbil milħuq jistgħu jinġabru fil-qosor kif ġej:

LIFE+ baġit totali: Il-PE irnexxielu jiżgura żieda ta’ 40 milljun Euro fuq l-ammont li tpoġġa għad-dispożizzjoni mill-Pożizzjoni Komuni tal-Kunsill. Il-baġit għal LIFE+ issa sar madwar 1894 miljun Euro.

Implimentazzjoni tal-baġit LIFE+: Il-Kunsill ippropona li 79% tar-riżorsi baġitarji għal LIFE+ ser jintużaw għal azzjonijiet tal-proġetti, bil-Kummissjoni jibqalha 1% għal spejjeż oħra. Il-PE insista fuq il-bżonn li l-Kummissjoni tirċievi r-riżorsi neċessarji biex tiffinanzja l-infiq amministrattiv għall-proċedura ta’ l-għażla tal-proġett kif ukoll għal attivitajiet relevanti oħra, bħal kampanji ta’ informazzjoni u ta’ kuxjenza u għal Ġimgħat iddedikati għall-Ambjent (Green Weeks). F’aħħar kien hemm qbil li 78% tar-riżorsi baġitarji għal LIFE+ ser jintużaw għal azzjonijiet tal-proġetti u li l-Kummissjoni ser tingħata 2% tal-baġit għal spejjeż oħra.

Proporzjon tal-baġit ta’ LIFE+ dedikat għall-proġetti "natura u bijodiversità": Il-PE żgura li ta’ l-anqas 50% tar-riżorsi tal-baġit għal LIFE+ ser jiġu dedikati għal għotjiet ta’ azzjonijiet tal-proġetti għal miżuri biex jappoġġjaw il-konservazzjoni tan-natura u tal-bijodiversità. Fil-pożizzjoni komuni tiegħu, il-Kunsill ippropona li jiddedika 40% tal-baġit kollu għal proġetti bħal dawn.

Proġetti transnazzjonali: Il-PE żgura l-inklużjoni fir-Regolament ta’ dispożizzjoni li ta’ l-inqas 15% tar-riżorsi baġitarji ta’ LIFE+ għandhom jiġu allokati għal proġetti transnazzjonali. Il-Kunsill oppona din id-dispożizzjoni.

Waqt il-laqgħa tal-Kumitat ta’ Konċiljazzjoni, is-Sur Dimas qara dikjarazzjoni li, qabel ir-reviżjoni tal-Qafas Finanzjarju, il-Kummissjoni ser tagħmel reviżjoni ta’ infiq li diġà ttieħed impenn dwaru u diġà ppjanat għall-maniġment tan-netwerks ta’ Natura 2000, kemm fuq livell nazzjonali kif ukoll dak ta’ l-UE. Din il-ħarsa ġenerali ser tintuża bl-għan li jiġu adottati strumenti Komunitarji, b’mod partikulari LIFE+, u sabiex ikun żgurat livell għoli ta’ kofinanzjament.

Konklużjoni

Il-qbil milħuq matul il-proċedura ta’ konċiljazzjoni tindirizza kwisjonijiet ewlenin koperti mill-emendi tat-tieni qari tal-Parlament. Huwa wkoll ħafna iktar sodisfaċenti minn kull qbil ieħor li seta’ ġie konkluż fi stadju aktar kmieni tal-proċedura leġiżlattiva. B’mod partikulari, il-PE irnexxielu jiżgura li l-Kummissjoni Ewropea ser tibqa’ l-parteċipant prinċipali fil-maniġment tal-programm. Għalhekk, id-delegazzjoni tirrakkomanda li l-Parlament japprova t-test konġunt fit-tielet qari.

ESTENSJONI TAL-PERJODI TA' SKADENZA