RAPPORT dwar l-appoġġ integrat għat-trattament ugwali bejn l-irġiel u n-nisa fil-qafas tal-ħidma tal-kumitati u d-delegazzjonijiet

1.4.2009 - (2008/2245(INI))

Kumitat għad-Drittijiet tan-Nisa u l-Ugwaljanza bejn is-Sessi
Rapporteur: Anna Záborská

MOZZJONI GĦAL RIŻOLUZZJONI TAL-PARLAMENT EWROPEW

dwar l-appoġġ integrat għat-trattament ugwali bejn l-irġiel u n-nisa fil-qafas tal-ħidma tal-kumitati u d-delegazzjonijiet

(2008/2245(INI))

Il-Parlament Ewropew,

–    wara li kkunsidra l-Artikoli 2, 3(2), 13 u 141(4) tat-Trattat tal-KE,

–    wara li kkunsidra l-Konvenzjoni Ewropea dwar id-Drittijiet tal-Bniedem u l-Libertajiet Fundamentali, il-Karta Soċjali Ewropea riveduta u l-ġurisprudenza tal-Qorti Ewropea tad-Drittijiet tal-Bniedem,

–    wara li kkunsidra l-ħidma tad-Direttorat Ġenerali għad-Drittijiet tal-Bniedem u l-Affarijiet Legali tal-Kunsill tal-Ewropa, u b’mod partikolari tal-Kumitat ta’ tmexxija tiegħu għall-ugwaljanza bejn in-nisa u l-irġiel,

–    wara li kkunsidra d-Direttiva 2002/73/KE tal-Parlament Ewropew u tal-Kunsill tat-23 ta' Settembru 2002 li temenda d-Direttiva tal-Kunsill 76/207/KEE dwar l-implimentazzjoni tal-prinċipju tat-trattament ugwali għall-irġiel u n-nisa għal dak li għandu x'jaqsam mal-aċċess għall-impjiegi, taħriġ professjonali, promozzjoni, u kundizzjonijiet tax-xogħol[1],

–    wara li kkunsidra r-riżoluzzjoni tiegħu tat-13 ta’ Marzu 2003 dwar approċċ integrat għall-ugwaljanza tan-nisa u l-irġiel (integrazzjoni sistematika) fil-Parlament Ewropew[2],

–    wara li kkunsidra r-riżoluzzjoni tiegħu tat-18 ta’Jannar 2007 dwar l-integrazzjoni tal-ugwaljanza bejn is-sessi fix-xogħol tal-Kumitati[3],

–    wara li kkunsidra l-Artikolu 45 tar-Regoli ta’ Proċedura tiegħu,

–    wara li kkunsidra r-rapport tal-Kumitat għad-Drittijiet tan-Nisa u l-Ugwaljanza bejn is-Sessi (A6-0198/2009),

A. billi t-trattament ugwali bejn l-irġiel u n-nisa huwa prinċipju fundamentali tad-dritt Komunitarju u li skont l-Artikolu 2 tat-Trattat, dan jagħmel parti mill-missjonijiet tal-Komunità,

B.  billi l-Artikolu 3(2) tat-Trattat jistabbilixxi l-prinċipju tal-approċċ integrat għat-trattament indaqs filwaqt li jistipula, li fl-azzjonijiet kollha tagħha, il-Komunità tfittex li telimina l-inugwaljanzi u tippromwovi t-trattament ugwali bejn l-irġiel u n-nisa,

C. billi l-perċentwal ta’ Membri nisa fil-Parlament żdied b’mod kostanti minn 17.5% fl-1979 għal 31.8% fl-2009,

D. billi hemm numru żgħir ta’ Membri li għandhom karigi għolja fl-organi tal-Parlament (Presidenza jew membri tal-kumitati jew ta’ delegazzjonijiet, pereżempju),

E.  billi fid-Direttorati Ġenerali tal-politiki interni u tal-politiki esterni tal-Parlament, in-nisa għandhom rappreżentanza għolja u jiffurmaw rispettivament is-66.5% u s-66% tal-persunal, filwaqt li jinnota l-progress konsiderevoli miksub dan l-aħħar fid-Direttorat Ġenerali tal-politiki interni, li wassal għall-għoti tal-“prempju għall-ugwaljanza 2007 – l-aħjar prassi” kemm għall-ħolqien ta’ ambjent ta’ xogħol favur l-ugwaljanza u għall-approċċ integrat tal-ugwaljanza kif ukoll għaż-żieda konsiderevoli tan-numru ta’ nisa li jokkupaw karigi għolja ta’ tmexxija ( in-numru ta’ nisa li huma kapijiet ta’ unità pereżempju, żdied minn 5% għal 30% wara l-2005).

F.  billi l-maġġoranza tal-Kumitati parlamentari b’mod ġenerali tagħti ċerta importanza għall-approċċ integrat għat-trattament ugwali bejn in-nisa u l-irġiel (pereżempju fil-qafas tal-ħidmiet leġiżlattivi tagħhom, tar-relazzjonijiet uffiċjali mal-kumitat għad-Drittijiet tan-Nisa u l-Ugwaljanza bejn is-Sessi jew l-iżvilupp ta’ pjan ta’ Azzjoni għall-Ugwaljanza) filwaqt li minoranza tal-Kumitati dan jinteressahom rarament jew qatt;

G. Jenfasizza l-fatt li l-użu ta’ netwerk inkarigat mill-approċċ integrat tal-ugwaljanza fil-kumitati u li jkun magħmul minn Membri u minn membri tal-persunal tas-segretarjat, sa issa għadu ma ħalliex riżultati,

H. Jenfasizza l-fatt li l-Grupp ta' Livell Għoli dwar l-Ugwaljanza bejn is-Sessi u d-Diversità ppropona l-ħolqien ta' netwerk simili ta' delegazzjonijiet interparlamentari bil-għan li l-mistoqsijiet dwar l-ugwaljanza bejn l-irġiel u n-nisa jkunu integrati fir-relazzjonijiet esterni tal-Unjoni Ewropea,

Evalwazzjoni tal-approċċ integrat tat-trattament ugwali bejn in-nisa u l-irġiel

1.   Jenfasizza li t-talba għat-trattament ugwali bejn in-nisa u l-irġiel għandha tissarraf f’approċċ prattiku li ma jpoġġix lin-nisa kontra l-irġiel;

2.   Jenfasizza li l-approċċ integrat għat-trattament ugwali jikkostitwixxi żvilupp pożittiv għan-nisa kif ukoll għall-irġiel;

3.   Jenfasizza li l-approċċ integrat għat-trattament ugwali jipprevedi r-riorganizzazzjoni, it-titjib, l-iżvilupp u l-evalwazzjoni tal-politiki biex fil-livelli u l-istadji kollha, l-atturi li normalment ikunu marbuta mad-deċiżjonijiet politiċi jinkludu l-perspettiva tat-trattament ugwali fil-politiki kollha;

4.   Ifakkar fil-ħtieġa li tiġi adottata u applikata strateġija adegwata b’miri konkreti għal approċċ integrat għat-trattament ugwali bejn in-nisa u l-irġiel fil-politiki tal-Komunità rigward il-kumitati u d-delegazzjonijiet parlamentari;

5.   Jenfasizza l-importanza tal-mandat tal-Grupp ta’ Livell Għoli dwar l-Ugwaljanza bejn is-Sessi u d-Diversità u jistiednu biex ikompli jħeġġeġ u jippromwovi dan il-proċess fil-Parlament kollu, kif ukoll fir-relazzjonijiet u l-kollaborazzjoni mal-Kummissjoni, mal-Kunsill u mal-istituzzjonijiet l-oħra;

6.   Jifraħ lill-kumitati parlamentari li fil-ħidma tagħhom l-approċċ integrat tat-trattament ugwali għamluh operattiv, u jitlob lill-kumitati l-oħra u lid-delegazzjonijiet biex jagħmlu l-istess;

7.   Jitlob li r-rikors għal netwerk inkarigat mill-approċċ integrat tal-ugwaljanza jkun imsaħħaħ f’dak li jirrigwarda d-delegazzjonijiet interparlamentari u l-missjonijiet ta' osservazzjoni tal-elezzjonijiet;

8.   Iħeġġeġ lis-Segretarju Ġenerali biex jagħti prijorità lit-taħriġ għall-approċċ integrat għat-trattament ugwali tal-uffiċjali fil-livelli kollha tal-kumitati u d-delegazzjonijiet parlamentari; itenni t-talba tiegħu biex jingħata taħriġ dwar it-trattament ugwali bejn l-irġiel u n-nisa lill-Membri kollha tal-Parlament, u dan sa mill-bidu tal-leġiżlatura li jmiss;

9.   Jissokta jħeġġeġ in-netwerking tal-uffiċjali tas-Segretarjati tal-kumitati tal-Parlament u tad-delegazzjonijiet interparlamentari tad-Direttorati Ġenerali tal-politiki interni u l-politiki esterni mħarrġa b’mod speċjali dwar l-approċċ integrat tal-ugwaljanza tal-ġeneri sabiex ikun hemm skambju regolari ta’ prattiki tajba;

10. Jenfasizza l-ħtieġa li jkun hemm disponibbli, fil-kumitati u d-delegazzjonijiet tal-Parlament, l-għodod adegwati għall-għarfien tajjeb tal-approċċ integrat għat-trattament ugwali, bħalma huma indikaturi, data u statistika maqsuma skont il-ġeneru, kif ukoll it-taqsim tar-riżorsi tal-baġit mill-aspett tat-trattament ugwali bejn in-nisa u l-irġiel;

11. Jenfasizza li l-implimentazzjoni tal-approċċ integrat għat-trattament ugwali għandu jikkunsidra l-ispeċifiċità ta’ kull kumitat jew delegazzjoni tal-Parlament; jitlob li l-kumitati u d-delegazzjonjiet jipparteċipaw b’mod attiv fl-evalwazzjonijiet li regolarment jitwettqu taħt il-patroċinju tal-Kumitat għad-Drittijiet tan-Nisa u l-Ugwaljanza bejn is-Sessi, fuq il-bażi tal-kwestjonarju li jitressaq lill-Presidenti u lill-Viċi Presidenti responsabbli tal-approċċ integrat għat-trattament ugwali bejn in-nisa u l-irġiel, filwaqt li jiġu inklużi n-nuqqasijiet f’dan il-kuntest fil-ħidma tal-kumitati u d-delegazzjonijiet kif ukoll il-progress tal-istabbiliment tal-approċċ integrat għat-trattament ugwali f’kull Kumitat;

12. Jenfasizza l-importanza għall-kumitati u d-delegazzjonijiet tal-Parlament li l-irwol u r-responsabbiltajiet tagħhom fil-qasam tal-approċċ integrat għat-trattament ugwali bejn ġeneri jkunu speċifikati tajjeb;

13. Jenfasizza l-importanza ta’ kollaborazzjoni effikaċi u koordinata bejn il-Grupp ta’ Livell Għoli dwar l-Ugwaljanza bejn is-Sessi u d-Diversità u n-netwerk inkarigat mill-approċċ integrat tal-ugwaljanza fil-kumitati parlamentari u d-delegazzjonijiet interparlamentari kif ukoll mal-Kumitat għad-Drittijiet tan-Nisa u l-Ugwaljanza bejn is-Sessi;

14. Jistieden lis-Segretarju Ġenerali biex isegwi l-implimentazzjoni tal-istrateġija integrata li għandha l-għan li tikkonċilja l-ħajja familjali mal-ħajja professjonali u li tiffaċilita l-iżvilupp tal-karriera tal-uffiċjali nisa;

15. Jistieden lill-gruppi politiċi biex jikkunsidraw l-objettiv ta’ parteċipazzjoni bilanċjata bejn l-irġiel u n-nisa meta jinħatru l-persuni f'karigi għoljin u ta' responsabilità;

16. Jistieden lill-Bureau tal-Parlament biex jenfasizza, fil-kuntatti tiegħu mal-Parlamenti tal-Istati Membri, l-esperjenza pożittiva tal-Grupp ta’ Livell Għoli dwar l-Ugwaljanza bejn is-Sessi u d-Diversità;

17. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni u lill-Kunsill tal-Ewropa.

• [1]  ĠU L 269, 5.10.2002, p. 15.
• [2]  ĠU C 61 E, 10.3.2004, p. 384.
• [3]  ĠU C 244 E, 18.10.2007, p. 225.

NOTA SPJEGATTIVA

DAĦLA

Bħala bażi ta’ rapport fuq inizjattiva (Approċċ Integrat għat-Trattament Ugwali bejn l-Irġiel u n-Nisa fil-Qafas tal-Ħidma tal-Kumitati u d-Delegazzjonijiet (INI/2008/2245) Rapporteur: Anna Záborská) intbagħat kwestjonarju lill-Presidenti/Viċi Presidenti responsabbli għall-gender mainstreaming fil-kumitati u d-delegazzjonijiet. Dsatax-il kumitat wieġbu għal dan l-appell, li minnhom, l-ECON, taħt forma ta’ ittra indirizzata lir-Rapporteur, (19-il kumitat minn 21). Għall-kuntrarju ebda delegazzjoni ma rrispondiet il-kwestjonarju.

Il-kwestjonarju kien jinkludi 28 mistoqsija maqsuma f’4 partijiet iddedikati għall-qasam ta’ applikazzjoni, l-istrateġija u t-twaqqif tal-gender mainstreaming kif ukoll għall-għarfien espert, il-konsultazzjoni u l-koperazzjoni dwar il-perspettiva tas-sessi.

A. Il-qasam ta’ applikazzjoni

Il-kwistjonijiet relatati mal-approċċ integrat għat-trattament ugwali bejn in-nisa u l-irġiel huma importanti għall-ħidma leġiżlattiva tat-tnax-il Kumitat, (AGRI, CULT, DEVE, ECON, EMPL, ENVI, INTA, ITRE, JURI, LIBE, REGI, u TRAN). (Q4)

Fid-dawl tal-kompetenzi tal-Kumitati differenti previsti bir-Regolament, fost is-setturi ewlenin, li għalihom hija pertinenti l-perspettiva tat-trattament ugwali bejn in-nisa u l-irġiel (Q5), il-Kumitati indikaw fost l-oħrajn:

· il-kwistjoni tas-sessi fil-kuntest tal-applikazzjoni tat-Trattat dwar l-UE u l-evalwazzjoni tal-operat tagħha; bilanċ irġiel-nisa fil-ħatra tar-rappreżentanti tal-Parlament għal konferenzi intergovernattivi u konvenzjonijiet futuri, żieda fil-għadd ta’ Membri nisa tal-Parlament Ewropew (AFCO);

· attenzjoni partikolari għall-approċċ integrat tal-perspettiva tas-sessi fl-istadju tat-tħejjija tar-rapporti u l-opinjonijiet; promozzjoni tal-għażla ta’ kliem li jirrspetta n-newtralità bejn is-sessi fil-laqgħat u d-dokumenti tal-Kumitat, l-ugwaljnza bejn is-sessi diskussa waqt l-iskambji mal-kelliema mistiedna u waqt il-laqgħat tad-delegazzjonijiet tal-kumitati (AFET);

· l-iżvilupp rurali, l-iżvilupp tal-Politika Agrikola Komuni (AGRI);

· il-kwistjonijiet relatati mas-sessi huma importanti fl-oqsma kollha li għalihom huwa responsabbli l-Kumitat (CULT);

· l-Objettivi għall-Iżvilupp tal-Millennju, l-għajnuna umanitarja u l-Istrument ta’ Koperazzjoni għall-Iżvilupp (DCI) (identifikat bħala “kwistjoni trasversali” f’diversi dokumenti strateġiċi għal kull pajjiż) (DEVE);

· l-assigurazzjonijiet, il-pensjonijiet, l-Istrateġija ta’ Liżbona, it-tassazzjoni tas-servizzi ta’ interess ġenerali u tal-mikrofinanzjament (ECON);

· l-impjiegi, il-politika soċjali, il-kundizzjonijiet tax-xogħol, id-diskriminazzjoni fis-suq tax-xogħol (EMPL);

· is-saħħa pubblika, il-prodotti farmaċewtiċi u kosmetiċi, is-saħħa ambjentali (il-pestiċidi, il-bijoċidi, l-iskart) (ENVI);

· is-seduti pubbliċi u l-iskambji ta’ opinjonijiet, il-kwistjoni tal-ugwaljanza bejn is-sessi kkunsidrata mir-Rapporteurs u r-Rapporteurs għal opinjinijiet fit-tħejjija ta’ dokumenti, il-bilanċ ta’ kelliema rġiel-nisa (DROI);

· il-politika tal-konsumaturi (IMCO);

· il-kummerċ u l-aspetti tal-iżvilupp (INTA);

· ir-riċerka, l-industrija (ITRE);

· id-drittijiet fundamentali (LIBE),

· is-sajd kostali u l-iżvilupp integrat u sostenibbli taz-zoni tas-sajd, l-akwakultura u l-industrija tal-ipproċesar u l-politika strutturali (PECH);

· il-leġiżlazzjoni rigward il-Fondi Strutturali tal-UE, il-FEDER, il-Fondi ta’ Koeżjoni u l-FSE, l-evalwazzjoni ta’ politiki oħra tal-Unjoni dwar il-koeżjoni soċjali (REGI);

· il-missjonijiet PESD – ir-rendiment tal-persunal użat skont il-popolazzjoni, mini/distruzzjoni tal-gwerer, l-isplussivi u t-tneħħija ta’ mini, il-proċess tad-diżarmament, tad-demobilizzazzjoni u tar-reintegrazzjoni (DDR) fil-pajjiżi f’sitwazzjoni ta’ wara l-kunflitt (SEDE);

· it-trasport bħala qasam tal-impjiegi u tas-sigurtà tat-toroq (TRAN).

Ħafna huma dawk il-Kumitati li implimentaw l-approċċ integrat għat-trattament ugwali bejn in-nisa u l-irġiel fil-ħidma tagħhom leġiżlattiva u/jew mhux leġiżlattiva (Q7). Erbatax-il Kumitat minn dsatax (12/19 fl-2006) iddikjaraw li kienu diġà daħħlu dan l-approċċ fil-ħidma tagħhom leġiżlattiva u mhux leġiżlattiva.

Hawnhekk hawn xi eżempji:

L-AFET- promozzjoni tal-ugwaljanza bejn is-sessi fix-xena internazzjonali

L-AGRI- opinjoni dwar it-trattament ugwali bejn in-nisa u l-irġiel fl-Unjoni Ewropea – 2007

Il-CULT- il-kwistjonijiet dwar is-sessi huma kkunsidrati bis-sħiħ fit-tħejjija ta’ rapporti u ta’ opinjonijiet, u f’attivitajiet oħra tal-Kumitati bħalma huma s-seduti pubbliċi u l-laqgħat tad-delegazzjonijiet

Id-DEVE- l-Objettivi għall-Iżvilupp tal-Millennju jinkorporaw perspettiva dwar is-sessi. Wieħed minn dawn l-objettivi jiffoka fuq l-ugwaljanza bejn is-sessi u l-emanċipazzjoni tan-nisa (MCR3)

Id-DROI- id-drittijiet tan-nisa huma parti mid-drittijiet tal-bniedem, suġġetti ttrattati dan l-aħħar: ir-reati tal-unur, studju dwar il-gender mainstreaming fl-attivitajiet esterni

L-ECON- l-impjieg tan-nisa u l-integrazzjoni tagħhom fis-suq tax-xogħol, l-edukazzjoni, it-taħriġ tul il-ħajja, il-bilanċ bejn ix-xogħol u l-ħajja fil-familja, kif ukoll it-tagħlim tal-konsumaturi dwar il-finanzi u l-krediti

L-EMPL- id-direttiva dwar il-ħinijiet tax-xogħol, il-pensjonijiet u dwar il-linji gwida rigward l-impjiegi

L-IMCO- il-ħtiġiet speċifiċi ta’ gruppi vulnerabbli enfasizzati fir-rapport “Strateġija għall-Politika tal-Konsumaturi”

Il-PECH- ir-rapporti dwar is-sajd kostali u l-problemi li jiltaqgħu magħhom is-sajjieda tax-xtut, in-netwerks tan-nisa fis-sajd, fl-akwakultura u fl-attivitajiet ta’ diversifikazzjoni u s-sajd u l-akwakultura fil-kuntest tat-tmexxija integrata taz-zoni kostali fl-Ewropa

Ir-REGI- l-approċ integrat dwar it-trattament ugwali bejn in-nisa u l-irġiel jinsab fir-Regolamenti dwar il-Fondi Strutturali bħala perspettiva trasversali tat-tfassil u l-implimentazzjoni tal-politiki.

Is-SEDE- f’żewġ rapporti dwar l-Istrateġija Ewropea tas-Sigurtà (Rapporteurs von Wogau u Kuhne)

It-TRAN- emendi u rapporti dwar it-trasport u t-turiżmu, studju dwar in-nisa u t-trasport fl-Ewropa

L-AFCO, l-ENVI, il-JURI, il-LIBE u l-CONT ma daħħlux approċċ integrat għat-trattament ugwali tan-nisa u tal-irġiel fil-ħidma leġiżlattiva tagħhom.

B. L-istrateġija dwar it-trattament indaqs bejn in-nisa u l-irġiel, l-objettivi tal-kumitati għal perjodu qasir u twil

Ħdax il-kumitat parlamentari la ddiskutew u lanqas adottaw strateġija dwar it-trattament ugwali bejn in-nisa u l-irġiel fis-setturi differenti li jikkonċernaw il-ħidma tal-Kumitati. Erba’ kumitati adottaw din l-istrateġija, jiġifieri: l-AFET, il-PECH, ir-REGI, is-SEDE. L-AFCO, l-AGRI u l-ENVI bdew diskussjonijiet bil-ħsieb li jadottaw strateġija. B’paragun ma’ dan, fl-2006, 14-il kumitat la ddiskutew u lanqas adottaw strateġija. Erba’ kumitati bdew diskussjonijiet dwar strateġija u wieħed minnhom biss kien diġà adottaha.

Fil-Pjan ta’ Azzjoni tal-Gender Mainstreaming tiegħu l-Kumitat AFET impenja ruħu li jippromwovi b’mod attiv fil-ħidma tiegħu l-ugwaljanza bejn is-sessi u li jkompli jittratta dawn il-kwistjonijiet mal-kelliema mistiedna kif ukoll fil-laqgħat tad-delegazzjonijiet. L-AFET sejjer bl-istess mod jiggarantixxi li l-kwistjonijiet dwar l-ugwaljanza bejn is-sessi jkunu kkunsidrati kif jixraq fit-tħejjija tar-rapporti u l-opinjonijiet. Huwa se jipprova jiggarantixxi, safejn possibbli, li 33% tal-kelliema li jieħdu sehem fis-seduti jkunu nisa. L-AFET impenja ruħu li fid-dokumenti u l-laqgħat tiegħu jippromwovi l-għażla ta’ kliem li jirrispetta n-newtralità bejn is-sessi. L-AFET wera wkoll ir-rieda tiegħu li jirrevedi l-bilanċ bejn l-irġiel u n-nisa fost il-mibgħuta speċjali tal-UE u l-kapijiet tad-delegazzjonijiet tal-Kumitat.

L-Istrateġija SEDE, ġiet adottata fid-19 ta’ Marzu 2007 taħt forma ta’ dokument bit-titolu Pjan ta’ Azzjoni tal-Gender Mainstreaming. Is-Sotto-Kumitat SEDE impenja ruħu li jippromwovi fil-ħidma tiegħu l-perspettiva tat-trattament ugwali bejn in-nisa u l-irġiel billi jinkludi kwistjonijiet relatati mal-ugwaljanza bejn is-sessi fir-rapporti u l-opinjonijiet tiegħu. Bl-istess mod, sejjer jikkontrolla l-assenjazzjoni tar-rapporti u l-opinjonijiet billi jikkunsidra l-proporzjon ta’ rġiel u nisa u jippromwovi r-rappreżentanza proporzjonali ta’ dawn id-delegazzjonijiet kif ukoll jirrispetta r-rappreżentanza bbilanċjata bejn is-sessi fost il-kelliema mistiedna għas-seduti pubbliċi, u b’mod partikolari jipprevedi kwota ta’ 33% ta’ kelliema nisa. Barra dan, is-SEDE jimpenja ruħu li jippromwovi fl-laqgħat u d-dokumenti miktuba l-għażla ta’ kliem li jirrispetta n-newtralità bejn is-sessi.

Is-SEDE tqis żewġ kwistjonijiet bħala essenzjali fil-kuntest tal-ugwaljanza bejn is-sessi: l-implimentazzjoni tar-Riżoluzzjoni Nru 1325 tal-UNSC fil-qafas tal-ESDP u tal-istandards ta’mġiba ġenerali għall-operazzjonijiet tal-ESDP kif ukoll ir-riforma fis-settur tas-sigurtà u tad-diżarmament, id-demobilizzazzjoni u r-reintegrazzjoni (DDR).

Fl-istrateġija tiegħu bit-titolu Dikjarazzjoni tal-Miri għall-Promozzjoni tal-Ugwaljanza bejn is-Sessi fil-Ħidma tal-Kumitat (Mission Statement on Promoting Gender Equality in the work of the Committee) ir-REGI impenja ruħu li jippromwovi l-ugwaljanza bejn is-sessi fil-ħidma interna tiegħu billi jitlob lill-gruppi politiċi (safejn possibbli) li r-rappreżentanza tan-nisa fil-Kumitat tirrifletti l-proporzjon tan-nisa fil-Parlament u li dan il-proporzjon jiġi wkoll rispettat meta jinħatru l-Membri tal-Bureau u l-Koordinaturi tal-Kumitat. Ir-REGI jittama wkoll li l-Bureau tiegħu jiżgura li dan il-bilanċ bejn l-irġiel u n-nisa fil-Kumitat jiġi rifless fl-assenjazzjoni tar-rapporti u l-opinjonijiet. Ir-REGI jixtieq ukoll jikkonferma li l-prinċipju tal-ugwaljanza tal-opportunitajiet jiġi applikat fil-proċess tal-ħatra tas-Segretarjat tiegħu.

F’dawn l-azzjonijiet esterni r-REGI jimpenja ruħu li jinkludi b’mod regolari l-kwistjonijiet relatati mal-ugwaljanza bejn is-sessi fir-rapporti leġiżlattivi, ir-rapporti ta’inizjattiva u l-opinjonijiet li qegħdin jitħejjew, l-aktar fejn hemm involut l-iżvilupp reġjonali. Ir-REGI se jikkontrolla bir-reqqa l-effetti tal-perspettiva tas-sessi fl-użu tal-Fondi Strutturali.

L-Istrateġija PECH adottata fl-2006, iddefinixxiet il-linji gwida għall-promozzjoni tal-ugwaljanza bejn is-sessi. Il-PECH jimpenja ruħu li jippromwovi l-gender mainstreaming sabiex jikkontribwixxi għal għarfien legali u soċjali aħjar tax-xogħol li jitwettaq min-nisa u tad-drittijiet tagħhom. Dan l-objettiv jista’ jintlaħaq b’mod partikolari bl-iżvilupp tal-għodod li jippermettu l-ġbir u t-tixrid tal-informazzjoni dwar is-sitwazzjoni tan-nisa, permezz tas-sehem tan-nisa fil-proċess tat-teħid tad-deċiżjonijiet, l-inklużjoni tal-prinċipji tal-ugwaljanza bejn is-sessi fl-abbozzi leġiżlattivi u l-applikazzjoni effettiva tal-prinċipji tal-ugwaljanza bejn is-sessi fil-Fondi Ewropej għas-Sajd u strumenti finanzjarji oħra marbuta mal-politika tas-sajd. Il-Kumitat PECH jimpenja ruħu wkoll li jinkludi fir-rapporti leġiżlattivi u dawk fuq inizjattiva tiegħu l-kwistjonijiet li jikkonċernaw l-ugwaljanza bejn is-sessi. Barra dan, il-PECH jipprevedi li jorganizza għall-inqas darba f’sena skambju ta’ opinjonijiet li jittratta l-politika tal-ugwaljanza bejn is-sessi u l-evalwazzjoni tal-impatt skont is-sessi għal laqgħat tal-Koordinaturi u tal-Kumitat.

L-AFET, is-SEDE u l-PECH iffissaw objettivi konkreti ta’ azzjoni. Il-Kumitat AFET isemmi l-organizzazzjoni ta’ seduta pubblika “In-Nisa fil-pajjiżi Għarab”, eżami tal-bilanċ bejn l-irġiel u n-nisa fost il-mibgħuta speċjali tal-UE u d-delegazzjonijiet tal-Kummissjoni u jqis li jistieden lid-deputati biex jiżguraw li d-delegazzjonijiet futuri jikkunsidraw il-perspettiva tal-ugwaljanza bejn is-sessi.

Il-PECH iffissa l-objettivi tiegħu f’din l-istrateġija. Huma msemmija hawn fuq.

Is-SEDE jirreferi għall-implimentazzjoni tar-Riżoluzzjoni Nru 1325 tal-UNSC fil-qafas tal-ESPD u ta’ standards ta’ mġiba ġenerali għall-operazzjonijiet tal-ESPD.

C. L-istabbiliment tal-gender mainstreaming

Il-kumitati kollha, minbarra il-CULT, inkludew fl-abbozzi futuri tagħhom (rapporti, seduti pubbliċi) suġġetti ta’ interess kbir għat-trattament ugwali bejn in-nisa u l-irġiel. Fil-biċċa l-kbira tal-każi dawn is-suġġetti jikkoinċidu mas-setturi ewlenin, kif indikati fil-parti A tal-kwestjonarju.

Seba’ kumitati kkonfermaw id-disponibilità ta’ dejta jew statistika maqsuma skont is-sess, jiġifieri: l-AGRI, l-EMPL, l-ENVI, il-PECH, ir-REGI, is-SEDE u t-TRAN.

Il-Kumitat PECH jiddeplora, minkejja li jeżistu studji dwar in-nisa fis-settur tas-sajd, in-nuqqas ta’ statistika maqsuma skont is-sess. Is-SEDE talab lill-Kunsill biex jgħaddi statistika dwar il-preżenza ta’ nisa/irġiel fl-operazzjonijiet tal-ESPD. Il-Kumitat għandu wkoll statistika utli dwar il-“Gender mainstreaming fil-missjonijiet tal-ESPD”. Il-Kumitat AGRI ġibed l-attenzjoni għall-fatt li hemm nuqqas ta’ statistika u li din l-istatistika ma tirriflettix pereżempju x-xogħol tal-konjuġi li jgħinu lil xulxin f’attivitajiet agrikoli. L-AGRI talab lill-Kummissjoni u lill-EUROSTAT biex jirrimedjaw għal dawn in-nuqqasijiet u jeliminaw l-elementi diskriminatorji fil-ġbir tad-dejta. L-EMPL qed jeżaminaw il-leġiżlazzjoni rigward l-istatistika dwar ix-xogħol. It-TRAN ordna studju dwar in-nisa u t-trasport fl-Ewropa li jipprovdi statistika rigward in-nuqqas ta’ bilanċ bejn l-irġiel u n-nisa fis-settur tat-trasport fl-Ewropa. Ir-REGI ordna studju bit-titolu “Approċċ integrat dwar it-trattament ugwali bejn in-nisa u l-irġiel fil-kuntest tal-użu tal-Fondi Strutturali” li jagħmel referenza għad-dejta disponibbli.

Tliet Kumitati: id-DROI, il-PECH u s-SEDE speċifikaw indikaturi xierqa. Skont il-PECH , l-aħjar li tista’ titkejjel hija d-dejta kwantitattiva dwar l-impjiegi, iżda għandha tiġi kkunsidrata dejta oħra, fejn possibbli, (status legali u soċjali, limitazzjonijiet soċjokulturali, aċċess u livell ta’ taħriġ u edukazzjoni, eċċ.). Id-DROI appella għall-indikaturi fil-kuntest tal-Istrument Ewropew għad-Demokrazija u d-Drittijiet tal-Bniedem, fejn il-gender mainstreaming jikkostitwixxi wieħed mill-objettivi orizontali.

Il-PECH u l-ENVI huma l-uniċi kumitati li analizzaw it-tqassim tar-riżorsi tal-baġit għal kull wieħed mill-oqsma ta’ attivitajiet tagħhom mill-aspett tat-trattament ugwali bejn in-nisa u l-irġiel. Il-PECH jikkwota l-Artikoli tar-Regolament tal-Kunsill relatati mal-Fond Ewropew għas-Sajd li għandu diversi referenzi pożittivi f’dan il-kuntest. Madankollu, dan id-dokument ma jaqsamx il-krediti skont l-oqsma differenti, għaliex dan it-tqassim għandu jsir mill-Istati Membri, fil-qafas tal-programmi operattivi tagħhom. (Q15)

Rigward il-metodi li għandhom jintużaw sabiex jiġi stabbilit l-approċċ integrat għat-trattament ugwali bejn in-nisa u l-irġiel, erba’ Kumitati rrikorrew għal metodi speċifiċi biex japplikaw il-gender mainstreaming. Il-Kumitat AFET juża l-analiżi komparattiva (benchmarking), ir-REGI l-evalwazzjoni tal-impatt skont is-sess, is-SEDE l-istatistika maqsuma skont is-sess u l-Kumitat PECH iddikjara li huwa lest juża l-metodi kollha disponibbli. Din hija wkoll l-opinjoni tal-Kumitat DROI.

D. L-għarfien espert u l-konsultazzjoni dwar il-perspettiva tas-sessi

Il-maġġoranza tal-Kumitati kkonsultaw regolarment l-esperti, l-entitajiet nazzjonali u l-NGOs kif ukoll organizzazzjonijiet oħra li jaħdmu direttament fil-qasam tal-ugwaljanza bejn is-sessi, permezz ta’ smigħ pubbliku jew billi ordnaw xi studji tagħhom. Huma biss l-AFCO, l-AGRI, il-CONT, il-CULT, l-IMCO u l-JURI li ma ħadux konsultazzjonijiet bħal dawn. Id-DROI jenfasizza li l-esperti tal-NGOs li speċjalizzaw fil-kwistjonijiet tas-sessi regolarment jieħdu sehem fis-seduti pubbliċi tagħhom. L-istess ħaġa tgħodd għall-Kumitati PECH u REGI. Fil-każ tad-DEVE, il-konsultazzjoni tal-NGOs u l-esperti esterni hija parti integrali tat-tħejjija ta’ rapporti, opinjonijiet u laqgħat tad-delegazzjonijiet.

Fir-rigward tal-għarfien espert intern tal-Parlament (il-Kumitat FEMM, is-Segretarjat tiegħu, id-dipartiment tematiku, is-servizz legali u l-biblijoteka), erbatax-il kumitat ibbenefikaw minn din il-konsultazzjoni. Il-PECH iddikjara li kkunsidra l-parti l-kbira tas-suġġerimenti li jinsabu f’opinjonijiet tal-Kumitat FEMM u ordna studju mid-dipartiment tematiku bit-titolu: “L-irwol tan-nisa fl-iżvilupp sostenibbli taz-zoni Ewropej tas-sajd”. L-EMPL uża l-biblijoteka, id-dipartiment tematiku u qal li huwa jikkunsidra wkoll l-opinjonijiet tal-Kumitat FEMM. Il-biblijoteka pproduċiet dokument għar-REGI bit-titolu “Gender mainstreaming f’politika reġjonali” u d-dipartiment tematiku nieda studju estern dwar “Approċċ integrat tat-trattament ugwali bejn in-nisa u l-irġiel fil-kuntest tal-użu tal-Fondi Strutturali”. L-ENVI bbenefika minn dan prinċipalment bis-saħħa tal-opinjonijiet tal-Kumitat FEMM li jidhru f’dawn ir-rapporti. Il-LIBE jikkunsidra l-opinjonijiet tal-Kumitat FEMM sottomessi għar-rapporti tiegħu. Id-DEVE juża l-għarfien espert tad-dipartiment tematiku u l-AFET jieħu sehem regolarment fis-seminars organizzati mill-Kumitat FEMM.

B’mod ġenerali, sbatax-il kumitat indikaw li l-koperazzjoni bejn il-Kumitat tagħhom u l-Kumitat għad-drittijiet tan-nisa u t-trattament ugwali bejn is-sessi hija regolari jew sporadika. L-AFET, il-CULT, id-DEVE, l-EMPL, l-ITRE, il-LIBE u il-PECH jikkoperaw regolarment mal-FEMM. Bħala eżempju, id-DEVE organizza mal-FEMM seduta “In-nisa u l-gwerra” u jqis din il-koperazzjoni bħala waħda tajba u regolari. L-AFET jikkopera fuq kollox permezz tal-Viċi Presidenti responsabbli mill-integrazzjoni tal-perspettiva tal-ugwaljanza bejn is-sessi u tan-netwerk simili tal-amministraturi. Il-CULT jifraħ bid-diversi opinjonijiet stabbiliti mill-Kumitat FEMM għar-rapporti tiegħu u dejjem jikkunsidrahom ħafna. Minbarra l-koperazzjoni mal-FEMM, l-EMPL isemmi ukoll il-kunflitti ta’ responsabilitajiet rigward il-proposti tal-Kummissjoni.

Ħames Kumitati talbu lill-Kummissjoni Ewropea biex tagħmel evalwazzjoni tal-impatt ta’ dokument dwar it-trattament ugwali bejn in-nisa u l-irġiel (id-DROI, l-INTA, l-ITRE, il-PECH u r-REGI). L-INTA għamel dan meta adotta xi paragrafi tal-opinjoni tal-Kumitat FEMM dwar il-kummerċ u t-tnaqqis tal-faqar, id-DROI meta ġie applikat l-Istrument Ewropew għad-Demokrazija u d-Drittijiet tal-Bniedem (EIDHR) meta għamel talba aktar ġenerali rigward l-istrument finanzjarju.

Għall-mistoqsija “X’taħseb int dwar l-għarfien espert rigward il-kwistjonijiet dwar is-sessi fi ħdan is-Segretarjat tal-Kumitat tiegħek?, Għaxar Kumitati wieġbu li l-għarfien espert qiegħed fil-fażi tal-iżvilupp. Ħames Segretarjati għandhom għarfien espert tajjeb, dawn huma l-AFET, il-CONT, il-CULT, id-DROI u l-EMPL.

Fis-Segretarjat tal-Kumitat INTA, l-għarfien espert dwar il-kwistjonijiet tas-sessi huwa meqjus bħala ineżistenti.

It-tabella hawn taħt turi l-membri tal-Kumitati:

Kumitat	MEP N	MEP R	Total	% Nisa	Kummenti
AFCO	12	42	54	22,2
AFET	38	133	171	22,2
AGRI	28	64	92	30,4
CONT	31	52	83	37,4	fost il-membri, 20% huma nisa u fost is-supplenti, 39% huma nisa.
CULT	32	43	75	41,6	il-President kif ukoll wieħed mill-Viċi Presidenti huma nisa, u anke l-koordinaturi tal-gruppi PPE, PSE u GUE.
DEVE	27	44	71	38
DROI	27	45	72	37,5
EMPL	43	58	101	42,5
ENVI	56	79	135	41,4
IMCO	36	52	88	40,9	(in-nisa jokkupaw il-kariga ta’ President, l-ewwel u t-tieni Viċi Presidenti).
INTA	15	50	65	23
ITRE	38	69	107	35,5
JURI	16	36	52	30,7
LIBE	51	64	115	44,3
PECH	14	49	63	22,2	żvilupp pjuttost pożittiv iżda li ma jirriflettix ir-realità sħiħa, għaliex in-nisa nsibuhom fost il-membri l-aktar attivi tal-Kumitat u jokkupaw karigi speċifiċi fil-Bureau (3 Viċi Presidenti) u koordinaturi ta’ gruppi politiċi.
REGI	30	80	110	27,2
SEDE	15	55	70	21,4
TRAN	21	78	99	21,2

RIŻULTAT TAL-VOTAZZJONI FINALI FIL-KUMITAT

Data tal-adozzjoni	31.3.2009
Riżultat tal-votazzjoni finali	+: –: 0:	23 0 1
Membri preżenti għall-votazzjoni finali	Edit Bauer, Edite Estrela, Věra Flasarová, Nicole Fontaine, Lissy Gröner, Anneli Jäätteenmäki, Rodi Kratsa-Tsagaropoulou, Urszula Krupa, Astrid Lulling, Siiri Oviir, Marie Panayotopoulos-Cassiotou, Zita Pleštinská, Teresa Riera Madurell, Eva-Riitta Siitonen, Eva-Britt Svensson, Anne Van Lancker, Anna Záborská
Sostitut(i) preżenti għall-votazzjoni finali	Donata Gottardi, Marusya Ivanova Lyubcheva, Maria Petre, Heide Rühle
Sostitut(i) (skont l-Artikolu 178(2)) preżenti għall-votazzjoni finali	Jean-Pierre Audy, Wolfgang Bulfon, Marie-Hélène Descamps, Jean Spautz