RAPPORT dwar is-SOLVIT

MOZZJONI GĦAL RIŻOLUZZJONI TAL-PARLAMENT EWROPEW

NOTA SPJEGATTIVA

OPINJONI tal-Kumitat għall-Petizzjonijiet (29.1.2010)

RIŻULTAT TAL-VOTAZZJONI FINALI FIL-KUMITAT

2.3.2010 - (2009/2138(INI))

Kumitat għas-Suq Intern u l-Ħarsien tal-Konsumatur
Rapporteur: Cristian Silviu Buşoi

Proċedura : 2009/2138(INI)

Ċiklu ta' ħajja waqt sessjoni

Ċiklu relatat mad-dokument :

A7-0027/2010

Testi mressqa :

A7-0027/2010

Dibattiti :

PV 09/03/2010 - 4
CRE 09/03/2010 - 4

Votazzjonijiet :

PV 09/03/2010 - 6.7
Spjegazzjoni tal-votazzjoni
Spjegazzjoni tal-votazzjoni
Spjegazzjoni tal-votazzjoni

Testi adottati :

P7_TA(2010)0047

MOZZJONI GĦAL RIŻOLUZZJONI TAL-PARLAMENT EWROPEW
NOTA SPJEGATTIVA
OPINJONI tal-Kumitat għall-Petizzjonijiet
RIŻULTAT TAL-VOTAZZJONI FINALI FIL-KUMITAT

dwar is-SOLVIT

(2009/2138(INI))

Il-Parlament Ewropew,

– wara li kkunsidra l-Komunikazzjoni mill-Kummissjoni lill-Kunsill, lill-Parlament Ewropew, lill-Kumitat Ekonomiku u Soċjali Ewropew u lill-Kumitat tar-Reġjuni dwar is-Soluzzjoni Effikaċi tal-Problemi fis-Suq Intern (“SOLVIT”)[1],

– wara li kkunsidra r-Rakkomandazzjoni tal-Kummissjoni tas-7 ta' Diċembru 2001 dwar il-prinċipji tal-użu tas-“SOLVIT” – in-Netwerk għas-Soluzzjoni ta’ Problemi fis-Suq Intern[2],

- wara li kkunsidra l-Konklużjonijiet tal-Kunsill tal-1 ta' Marzu 2002, li abbażi tagħhom il-Kunsill ikkonferma l-impenn tal-Istati Membri favur it-tħaddim effettiv tas-sistema tas-SOLVIT u favur il-prinċipji tagħha,

- wara li kkunsidra r-Rakkomandazzjoni tal-Kummissjoni tat-12 ta' Lulju 2004 dwar it-traspożizzjoni fil-liġi nazzjonali ta' Direttivi li jolqtu s-suq intern[3],

– wara li kkunsidra d-dokument ta' ħidma tal-persunal tal-Kummissjoni tal-20 ta’ Lulju 2005 dwar pjan ta' azzjoni biex tittejjeb il-komunikazzjoni tal-Ewropa mill-Kummissjoni[4], inter alia, billi tissimplifika l-informazzjoni u n-netwerks ta' assistenza appoġġjati mill-Kummissjoni,

- wara li kkunsidra d-dokument ta' ħidma tal-persunal tal-Kummissjoni tat-8 ta' Mejju 2008 dwar pjan ta' azzjoni rigward approċċ integrat għall-provvediment ta' Servizzi ta' Assistenza tas-Suq Uniku liċ-ċittadini u n-negozji[5],

– wara li kkunsidra d-dokument ta' ħidma tal-persunal tal-Kummissjoni dwar it-Tabella ta’ Valutazzjoni tas-Suq Intern Nru 19[6],

– wara li kkunsidra r-riżoluzzjoni tiegħu tal-4 ta' Settembru 2007 dwar ir-Reviżjoni tas-Suq Wieħed: negħlbu x-xkiel u l-ineffiċjenzi permezz ta’ implimentazzjoni u infurzar aħjar[7],

– wara li kkunsidra r-riżoluzzjoni tiegħu tat-23 ta' Settembru 2008 dwar l-Evalwazzjoni tas-Suq Intern[8],

– wara li kkunsidra r-rapport SOLVIT 2008 intitolat ‘L-iżvilupp u l-prestazzjoni tan-netwerk SOLVIT fl-2008’[9],

- wara li kkunsidra r-Rakkomandazzjoni tal-Kummissjoni tad-29 ta' Ġunju 2009 dwar miżuri għat-titjib fil-funzjonament tas-suq uniku[10],

- wara li kkunsidra l-konklużjonijiet tal-Kunsill (Kompettittività - Suq Intern, Industrija u Riċerka) tal-24 ta’ Settembru 2009 dwar ‘Kif intejbu l-funzjonament tas-Suq Intern’[11],

- wara li kkunsidra d-dokument ta’ ħidma tal-persunal tal-Kummissjoni dwar attivitajiet tal-Kummissjoni għat-titjib fil-funzjonament tas-suq uniku[12],

- wara li kkunsidra d-dokument ta' ħidma tal-persunal tal-Kummissjoni dwar koperazzjoni amministrattiva fis-suq uniku[13],

– wara li kkunsidra l-Artikolu 119(2) tar-Regoli ta’ Proċedura tiegħu,

– wara li kkunsidra r-rapport tal-Kumitat għas-Suq Intern u l-Ħarsien tal-Konsumatur u l-opinjoni tal-Kumitat għall-Petizzjonijiet (A7-0027/2010),

A. billi l-Kummissjoni, il-Parlament, l-Ombudsman Ewropew u l-Istati Membri jeħtiġilhom jagħmlu iżjed sabiex jiddefinixxu u jipprovdu informazzjoni dwar id-drittijiet taċ-ċittadini u sabiex jgħinu liċ-ċittadini jgawdu dawn id-drittijiet; billi dan jgħin ukoll biex is-suq intern jaħdem aħjar,

B. billi ż-żieda fit-trasparenza hija kruċjali biex jintgħelbu l-ostakli għall-moviment transkonfinali u biex jiġu infurzati d-drittijiet tal-moviment ħieles,

C. billi jeħtieġ li jkun hemm titjib ċar min-naħa tal-Kummissjoni u tal-Istati Membri biex iqajmu kuxjenza dwar l-opportunitajiet li s-suq intern joffri għaċ-ċittadini u n-negozji,

D. billi s-suq intern għamel progress kbir iżda għad hemm ostakli li jxekklu l-funzjonament sħiħ u xieraq tiegħu,

E. billi meta r-regoli tas-suq intern jiġu implimentati ħażin, għandu jkun hemm disponibbli rimedju mgħaġġel li ma jinvolvix neċessarjament azzjoni legali,

F. billi n-netwerk SOLVIT, meta jkun operattiv b’mod sħiħ, se jkun jista' jevita r-rikors eċċessiv għas-sistema ġudizzjarja, fejn ta’spiss il-proċeduri jkunu kumplessi, u l-mekkaniżmi li jiggarantixxu d-difiża tal-individwi spiss ixekklu l-aċċess għall-ġustizzja,

G. billi t-taħriġ u l-iskambji transkonfinali, inter alia, permezz tan-netwerks elettroniċi li ħolqot il-Kummissjoni, huma essenzjali biex ikun hemm applikazzjoni aħjar tal-acquis Komunitarju dwar is-suq intern,

H. billi ċ-ċittadini u n-negozji jiddependu minn infurzar effettiv tar-regoli tas-suq intern biex jgħinuhom jibbenefikaw bis-sħiħ mill-potenzjal tas-suq intern,

I. billi l-Istati Membri għandhom, bl-appoġġ tal-Kummissjoni, itejbu l-kapaċità ta' dawn il-mekkaniżmi ta' soluzzjoni tal-problemi sabiex jgħinu liċ-ċittadini jaffermaw id-drittijiet tagħhom,

J. billi n-netwerk SOLVIT inħoloq mill-Kummissjoni u mill-Istati Membri fl-2002 bil-għan li jsolvi l-problemi li jinqalgħu liċ-ċittadini u n-negozji minħabba l-applikazzjoni ħażina tal-leġiżlazzjoni tas-suq intern,

K. billi s-SOLVIT huwa netwerk online li jsolvi l-problemi u li fih l-Istati Membri tal-UE (kif ukoll in-Norveġja, l-Islanda u l-Liechtenstein) jaħdmu flimkien biex isolvu l-problemi – mingħajr rikors għal proċeduri legali – li jiltaqgħu magħhom iċ-ċittadini u n-negozji minħabba l-applikazzjoni ħażina tal-leġiżlazzjoni tas-suq intern min-naħa tal-awtoritajiet pubbliċi,

L. billi is-SOLVIT huwa meqjus bħala sistema relattivament ta' suċċess li tipprovdi rimedju, mingħajr proċeduri formali, fi żmien medju ta' 10 ġimgħat, u billi s-soluzzjoni tal-problemi tas-suq intern bis-SOLVIT tista' tkun mudell ta' prattika tajba għas-Servizzi ta' Assistenza tas-Suq Uniku,

M. billi, jekk dan jitqies meħtieġ minn Stat Membru individwali, speċjalment fid-dawl ta’ kwalunkwe kampanja pubbliċitarja imminenti, il-kapaċità tas-SOLVIT għandha titkabbar sabiex jiġu evitati problemi ta' nuqqas ta' persunal,

N. billi s-SOLVIT, madankollu, la għandu jissostittwixxi l-ħidma legali tal-Kummissjoni dwar il-ksur tal-liġijiet, u lanqas ma għandu jkun skuża biex il-ħidma fl-Istati Membri tkun inqas ambizzjuża sabiex id-direttivi tal-UE jiġu trasposti fil-ħin u b’mod xieraq,

O. billi ħafna ċittadini li jkollhom problema relatata mas-suq intern u li tkun taqa' fl-ambitu tas-SOLVIT m'humiex konxji mis-SOLVIT, u għalhekk imorru għand l-Ombudsman Ewropew bil-problema tagħhom;

Introduzzjoni

1. Jilqa' b'sodisfazzjon l-inizjattiva tal-Kummissjoni ta' Lulju 2002 li tistabbbilixxi n-netwerk SOLVIT tal-amministrazzjonijiet nazzjonali bl-użu ta' bażi tad-data interattiva, li kienet għodda ta’ suċċess li żiedet it-trasparenza u ħolqot pressjoni mill-pari ħalli jitħaffef il-proċess tas-soluzzjoni tal-problemi;

2. Jistieden lill-Kummissjoni biex tuża s-setgħat kollha tagħha biex tiżgura l-applikazzjoni effikaċi tar-regoli tas-suq intern sabiex jitnaqqas il-piż amministrattiv minn fuq iċ-ċittadini u n-negozji;

Soluzzjoni effettikaċi tal-problemi fis-suq intern

3. Jenfasizza l-fatt li permezz tan-netwerk SOLVIT ta' sikwit jinkixfu problemi relatati mal-implimentazzjoni tar-regoli tas-suq intern;

4. Jenfasizza li l-esperjenzi tas-SOLVIT għandhom jitqiesu fit-tfassil tal-politika nazzjonali u tal-UE, u għandhom iwasslu għal bidliet strutturali jew regolatorji fejn ikun meħtieġ;

5. Jistieden lill-Kummissjoni biex b'mod sistematiku, fit-Tabelli ta’ Valutazzjoni tas-Suq Intern u tas-Suq tal-Konsumatur, tinkludi informazzjoni aktar dettaljata dwar l-applikazzjoni u l-infurzar tal-leġiżlazzjoni tas-suq intern, kemm sabiex tiżdied it-trasparenza kif ukoll biex tiġi pprovduta għodda utli għall-persunal tas-SOLVIT;

6. Jitlob li t-Tabella ta’ Valutazzjoni tas-Suq Intern, ir-Rapport SOLVIT, is-Servizz ta’ Informazzjoni għaċ-Ċittadini u t-Tabella ta' Valutazzjoni tas-Suq tal-Konsumatur jiġu ppubblikati darba fis-sena fl-istess żmien (bla ma tinbidel il-frekwenza tal-pubblikazzjoni tagħhom) sabiex tiġi provduta stampa globali tal-iżvilupp tas-suq intern u biex jiġi kkoordinat aħjar ix-xogħol li diġà sar f'dawk l-oqsma filwaqt li tinżamm in-natura partikulari ta' dawk l-istrumenti; jistieden lill-Kummissjoni biex tikkunsidra l-inklużjoni ta' rapport dettaljat dwar il-progress, il-kisbiet u n-nuqqasijiet tas-SOLVIT fit-Tabella ta' Valutazzjoni tas-Suq tal-Konsumatur; jistieden lill-Kummissjoni biex tieħu azzjoni immedjata biex issolvi l-problemi rikurrenti li jiġu identifikati permezz tan-netwerk SOLVIT;

Problemi orizzontali identifikati f'livell nazzjonali

7. Jirrimarka li ċerti ċentri tas-SOLVIT m'għandhomx persunal biżżejjed, u li fl-2008 l-għadd ta' każijiet solvuti naqas, filwaqt li l-għadd medju ta' jiem meħtieġa biex jiġu solvuti żdied; jistieden liċ-ċentri kollha tas-SOLVIT biex jimpjegaw persunal bi kwalifiki u esperjenza biżżejjed għall-pożizzjoni li jkunu se jokkupaw; huwa tal-fehma li għandu jkun hemm iktar taħriġ għall-persunal impjegat mis-SOLVIT; ifaħħar il-ħidma mwettqa mis-SOLVIT, b'mod partikulari r-rata ta' soluzzjoni tal-każijiet tiegħu, li baqgħet għolja (83%) minkejja li fl-2008 l-ammont ta' xogħol żdied (żieda ta' 22% għal total ta' 1 000 każ) u minkejja l-fatt li wħud miċ-ċentri SOLVIT qed jiffaċċjaw problemi minħabba nuqqas ta' persunal;

8. Jinnota li bosta ċittadini u negozji żgħar m'humiex konxji biżżejjed mill-ħidma tas-SOLVIT u li n-negozji jew jużaw servizzi legali kummerċjali f'każijiet fejn ikunu jistgħu jużaw is-SOLVIT għall-benefiċċju tagħhom jew saħansitra jaċċettaw talbiet f'dan is-sens minn Stati Membri, minkejja li dawn it-talbiet m'humiex konformi mal-acquis tas-suq intern tal-Komunità;jilqa' l-fatt li l-attivitajiet tas-SOLVIT wasslu għal frankar tal-ispejjeż għaċ-ċittadini u n-negozji Ewropej li huwa stmat li ammonta għal EUR 32.6 miljun fl-2008;

9. Jinnota li l-portafoll tal-ministeru li jilqa' ċ-ċentru nazzjonali tas-SOLVIT f’pajjiż partikulari jista' jkollu effett fuq il-perċezzjoni tat-tipta’ ħidma li tkun qed issir mis-SOLVIT f'dak il-pajjiż, u li l-livell ta’ soluzzjoni b'suċċess u tal-espedizzjoni tal-każijiet jiddependi fuq ir-rieda u l-ħila tal-Istati Membri li jikkoperaw mill-qrib maċ-ċentri tas-SOLVIT;

10. Jistieden lill-Istati Membri biex jiżguraw li ċ-ċentru tas-SOLVIT tagħhom ikollu appoġġ politiku qawwi ħalli jkun jista' jikkonvinċi lill-awtoritajiet li jkunu saru l-ilmenti dwarhom biex jikkoperaw b'mod attiv fil-kuntest tal-proċedura tas-SOLVIT u fl-iskadenzi relevanti;

11. Iqis li l-Istati Membri għandhom isaħħu l-effiċjenza tal-koperazzjoni bejn l-awtoritajiet nazzjonali, reġjonali u lokali u s-SOLVIT; iqis, barra minn hekk, li l-Istati Membri għandhom iniedu skambju iżjed intensiv u wiesa’ tal-aqwa prattiki;

12. Jenfasizza l-importanza tal-iskambju tal-informazzjoni bejn iċ-ċentri tas-SOLVIT, u għalhekk jirrakkomanda li ċ-ċentri tas-SOLVIT tal-Istati Membri jiltaqgħu regolarment biex ikun jista’ jsir l-iskambju tal-informazzjoni u biex jaqsmu bejniethom eżempji tal-aqwa prattiki u sistemi;

Miżuri li għandhom jiġu previsti

13. Jistieden lill-Istati Membri biex jippromwovu s-SOLVIT, permezz tal-mezzi kollha tal-midja biex jiżguraw li ċ-ċittadini u n-negozji jintlaħqu b'mod wiesa', b'mod speċjali dwar kif jistgħu jaffermaw id-drittijiet tagħhom, u biex jallokaw riżorsi biżżejjed sabiex din il-promozzjoni ssir iżjed effettiva; jistieden, barra minn hekk, lill-Kummissjoni u lill-Istati Membri biex jippromwovu sistemi alternattivi ta' soluzzjoni online tal-kunflitti fi ħdan in-netwerk SOLVIT, u jistieden ukoll lill-Membri tiegħu biex jippromwovu s-SOLVIT fil-kostitwenzi tagħhom;

14. Jistieden lil kull Stat Membru biex jippromwovi s-SOLVIT bħala mekkaniżmu alternattiv ta’ soluzzjoni tal-kunflitti, permezz ta’ kampanji ta' informazzjoni nazzjonali;

15. Jistieden lill-Istati Membri u lill-Kummissjoni biex jippromwovu s-SOLVIT fuq l-Internet; iħeġġeġ lill-Kummisjoni biex tagħmel disponibbli indirizz tal-internet wieħed għaċ-ċentri nazzjonali kollha tas-SOLVIT - www.solvit.eu - ħalli tħaffef l-aċċess taċ-ċittadini sa ma jasal biex jitnieda mill-ġdid il-portal ‘Your Europe’, li eventwalment għandu jgħaqqad flimkien is-Servizzi ta' Assistenza tas-Suq Intern kollha, inkluż is-SOLVIT;

16. Jistieden lill-Istati Membri biex ifasslu paġni tal-internet li jkunu konnessi mal-portal Ewropew tas-SOLVIT, u li jkun fihom ġabra ta' każijiet li ssolvew b'suċċess u tal-aqwa prattiki fir-rigward tas-soluzzjoni tal-kunflitti permezz ta' dan il-mekkażimu;

17. Jistieden lill-Istati Membri biex iżidu l-effiċjenza taċ-ċentri tas-SOLVIT billi jipprovdu ħaddiema taċ-ċivil fid-dipartimenti rilevanti ħalli titħaffef is-soluzzjoni tal-każijiet li ma jkunux jaqgħu fil-kompetenza tas-SOLVIT (SOLVIT+), u billi jiżguraw aċċess xieraq għall-kompetenza legali fl-amministrazzjoni tagħhom stess taċ-ċentri tas-SOLVIT; iħeġġeġ lill-Kummissjoni biex tħaffef il-provvediment ta' valutazzjonijiet legali informali liċ-ċentri tas-SOLVIT;

18. Jistieden lill-Istati Membri biex jaħtru uffiċjal ta' kollaborazzjoni (liaison) tas-SOLVIT fis-servizzi pubbliċi involuti fl-implimentazzjoni tar-regoli tas-suq intern sabiex tiġi żgurata koperazzjoni aħjar;

19. Jistieden lill-Istati Membri biex jorganizzaw kampanji ta' informazzjoni dwar is-SOLVIT fuq livell lokali, reġjonali jew nazzjonali, li għandhom ikunu maħsuba għal gruppi speċifiċi, bħall-SMEs, li bħalissa għadhom lura fl-għarfien tagħhom dwar is-SOLVIT, u jħeġġeġ lill-Istati Membri biex jikkoperaw u jagħmlu skambju tal-aqwa prattiki ħalli l-promozzjoni tas-SOLVIT tkun effiċjenti kemm jista' jkun; jinnota li l-Kumitat għall-Petizzjonijiet tal-Parlament, parallelament mal-proċedura tiegħu stess, jirreferi lill-petizzjonanti għas-SOLVIT meta jqis li tista' tinsab soluzzjoni aktar malajr permezz tas-SOLVIT;

20. Jirrikonoxxi l-effettività tas-SOLVIT bħala netwerk ta' kooperazzjoni li jagħmel ħiltu bil-għan li jsolvi b'mod informali problemi li jaffaċċjaw iċ-ċittadini u n-negozji minħabba applikazzjoni ħażina tal-liġi tas-suq intern mill-awtoritajiet pubbliċi;

21. Jinnota li r-rapport annwali tal-2008 tas-SOLVIT juri li s-SOLVIT jiġbed lejh ammont kbir ta' każijiet li ma jaqgħux taħt dan in-netwerk u li dan qed iwassal għal proċess aktar bil-mod tal-immaniġġjar tal-ilmenti fiċ-ċentri tas-SOLVIT;

22. Jinnota li hemm diversi entitajiet li permezz tagħhom iċ-ċittadini tal-UE jistgħu jikkomunikaw il-problemi tagħhom, inklużi l-Kumitat għall-Petizzjonijiet, SOLVIT, il-Kummissjoni u l-Ombudsman Ewropew;

23. Jitlob lis-SOLVIT biex jirreferi l-każijiet ta' applikazzjoni ħażina tal-leġiżlazzjoni tal-UE, li għalih huma wisq kumplessi biex isolvihom, mhux biss lill-Kummissjoni iżda wkoll, fejn xieraq, lill-Kumitat għall-Petizzjonijiet tal-Parlament;

24. Ifakkar li l-petizzjonijiet huma trattati b'mod miftuħ u trasparenti f'kooperazzjoni mill-qrib mal-kumitati leġiżlattivi kompetenti, il-Kummissjoni u l-awtoritajiet differenti fl-Istati Membri;

25. Iqis li l-proċess tal-petizzjonijiet jista' jagħti kontribut pożittiv għal tfassil aħjar tal-liġijiet; ifakkar mill-ġdid li, wara d-dħul fis-seħħ tat-Trattat ta' Lisbona, is-setgħa attiva u diretta tal-Parlament fl-iffurmar, ir-reviżjoni u t-titjib tal-leġiżlazzjoni tal-UE se tiżdied ħafna; jinnota, barra minn hekk, li t-tisħiħ tar-rwol tal-parlamenti nazzjonali għandu jiġi kkunsidrat;

26. Jinnota li m’hemmx entità unika responsabbli sabiex issegwi l-ilmenti taċ-ċittadini mill-bidu sal-aħħar minħabba li dawn jiġu sottomessi permezz ta' diversi mezzi; jitlob għal aktar koordinazzoni fost l-entitajiet differenti involuti: dawk li jirċievu kif ukoll dawk li jittrattaw l-ilmenti taċ-ċittadini;

27. Jitlob lis-SOLVIT biex jinkludi, fis-sit elettroniku tiegħu, link għall-Kumitat għall-Petizzjonijiet tal-Parlament kif ukoll għall-Kumitati kkonċernati tal-parlamenti nazzjonali, sabiex iċ-ċittadini jkunu jistgħu jsiru konxji dwar id-dritt tagħhom li jibagħtu petizzjoni lill-Parlament bħala mezz li bih jiksbu rimedji li mhumiex ġudizzjarji kif ukoll soluzzjonijiet permezz tal-proċess politiku u leġiżlattiv;

28. Jappoġġja, barra minn hekk, l-iżvilupp ta' sit elettroniku komuni tal-istituzzjonijiet Ewropej maħsub biex jgħin liċ-ċittadini u jirriferihom b'mod dirett lill-istituzzjoni jew lill-entità kompetenti biex jittrattaw l-ilment tagħhom.

29. Jistieden lill-Membri tal-Parlament Ewropew ħalli jieħdu inizzjattivi biex jagħmlu sforzi ħalli jqajmu kuxjenza dwar is-SOLVIT fost il-mambri tal-parlamenti nazzjonali pereżempju billi jippreżentaw il-kisbiet tas-SOLVIt fil-laqgħat tal-COSAC; jenfasizza, barra minn hekk, il-ħtieġa li l-gvernijiet u l-parlamenti nazzjonali jinvolvu ruħhom iktar fil-promozzjoni tas-SOLVIT fil-livell nazzjonali; jistieden lill-Kummissjoni u lill-Istati Membri biex jikkoordinaw seduta ta' smiegħ maċ-ċentri tas-SOLVIT ħalli jiddeterminaw l-aqwa prattika u l-ostakli eżistenti fil-funzjonament taċ-ċentri bil-għan li l-amministrazzjoni u r-rutini tax-xogħol isiru iżjed effiċjenti;

30. Jistieden lill-Istati Membri biex iżidu l-persunal taċ-ċentri tas-SOLVIT, permezz tal-mezzi kollha disponibbli, inklużi arranġamenti ta’ finanzjament alternattiv, ħalli jibnu l-kapaċità amministrattiva fil-ministeri governattivi rispettivi b’mod proporzjonat għall-popolazzjoni tal-pajjiż u skont l-għadd ta' każijiet li ġew ittrattati fl-imgħoddi;

31. Jistieden lill-Istati Membri u lill-Kummissjoni biex jeżaminaw u janalizzaw flimkien il-kawżi tar-rati baxxi ta' suċċess ta' ċerti ċentri tas-SOLVIT, kif ukoll il-kawżi taż-żmien relattivament twil li jittieħed biex jiġu ttrattati l-każi, ħalli tiġi pprovduta informazzjoni siewja għat-tfassil ta' strateġija aħjar għas-soluzzjoni tal-problemi għall-benefiċċju taċ-ċittadini u tan-negozji fis-suq intern;

32. Jistieden lill-Kummissjoni biex tressaq rapporti annwali dwar is-SOLVIT li jkun fihom ħafna iżjed tagħrif dettaljat u data statistika, li għandhom jippermettu wkoll li ssir valutazzjoni tal-effikaċja ta' kull ċentru nazzjonali, minħabba li nkella jkun diffiċli li jsiru valutazzjonijiet fit-tul tax-xejriet u li jiġu proposti miżuri b'miri speċifiċi bil-għan li jsir titjib fis-sitwazzjoni fl-Istati Membri individwali;

33. Jistieden lill-Kummissjoni biex toħloq portal tal-Internet uniku għaċ-ċentri kollha tas-SOLVIT b'indirizz li jkun jista' jinstab b'mod kemm jista' jkun faċli (www.solvit.eu); huwa tal-fehma, fl-istess waqt, li titjib notevoli fil-viżibilità tan-netwerk tas-SOLVIT fuq l-Internet huwa essenzjali, u li għal dan il-għan, għandu jsir użu kemm mis-siti tan-netwerking soċjali u kemm mill-magni tat-tiftix;

34. Iqis li, fid-dawl tal-għadd kbir ta' każijiet li jinvolvu individwi u tar-rikonoxximent tal-kwalifiki u tal-intitolamenti soċjali jew ta' residenza, in-netwerk SOLVIT għandu jikkopera b'mod ferm iżjed intensiv u għandu jwessa' l-kampanji ta' informazzjoni tiegħu sabiex jinkludi l-assoċjazzjonijiet ta' persuni li jgħixu barra pajjiżhom u l-konsulati tal-Istati Membri;

35. Iqis li, fid-dawl tal-għadd kbir ta' każijiet li jinvolvu l-imprendituri, in-netwerk SOLVIT għandu jikkopera b'mod ferm iżjed intensiv u għandu jwessa' l-kampanji ta' informazzjoni tiegħu sabiex jinkludi l-assoċjazzjonijet Ewropej u nazzjonali tan-negozji, b'enfasi partikulari fuq l-intrapriżi ta' daqs żgħir u medju;

36. Jistieden lill-Kummissjoni biex bħala kwistjoni ta' prijorità tiffinalizza l-proġett tas-Servizzi ta' Assistenza dwar is-Suq Uniku għas-simplifikazzjoni tal-informazzjoni, servizzi ta' assistenza għall-għoti ta' pariri u s-soluzzjoni ta' problemi, u biex dawn isiru aktar aċċessibbli u iżjed effettivi;

37. Jistieden lill-Ombudsman Ewropew biex jikkopera iżjed mill-qrib maċ-ċentri tas-SOLVIT, u biex bla dewmien u burokrazija jgħaddi liċ-ċentru tas-SOLVIT kompetenti dawk l-ilmenti li jaslulu u li ma jkunux jaqgħu fil-kompetenza tiegħu, meta l-ilmenti jkollhom x'jaqsmu mas-suq intern u jkunu jistgħu jaqgħu fl-ambitu tas-SOLVIT; Jistieden lill-Kummissjoni biex tniedi proċedura mħaffa ta' ksur tat-Trattat jekk ilment tas-SOLVIT li ma jkunx ġie solvut juri, a prima facie, ksur tal-liġi Komunitarja;

° °

38. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

[1] COM(2001)0702.
[2] OJ L 331, 15.12.2001, p. 79.
[3] OJ L 98, 16.4.2005, p. 47.
[4] SEC(2005)0985.
[5] SEC(2008)1882.
[6] SEC(2009)1007.
[7] OJ C 187 E, 24.7.2008, p. 80.
[8] Testi Adottati, P6_TA(2008)0421.
[9] SEC(2009)0142.
[10] ĠU L 176, 7.7.2009, p. 17.
[11] Dokument tal-Kunsill 13024/09.
[12] SEC(2009)0881.
[13] SEC(2009)0882.

Introduzzjoni

In-netwerk SOLVIT ħolquh il-Kummissjoni u l-Istati Membri bil-għan li jsolvi l-problemi li jinqalgħulhom iċ-ċittadini u n-negozji minħabba l-applikazzjoni ħażina tal-liġi tas-suq intern.

L-Istati Membri kollha, flimkien man-Norveġja, l-Islanda u l-Liechtenstein, ħolqu ċentru nazzjonali tas-SOLVIT, fil-biċċa l-kbira fil-Ministeru għall-Affarijiet Barranin jew għall-Affarijiet Ekonomiċi.

Soluzzjoni Effikaċi tal-Problemi fis-Suq Intern

Dawn iċ-ċentri jikkoperaw direttament permezz ta' bażi tad-data online biex ifasslu soluzzjonijiet rapidi u pragmatiċi għall-problemi mressqa miċ-ċittadini u n-negozji. Ir-regoli li jmexxu l-kooperazzjoni fis-SOLVIT huma stipulati fir-rakkomandazzjoni tal-Kummissjoni tal-2001[1] li kienet approvata mill-konklużjonijiet tal-Kunsill. Is-SOLVIT ilu jopera minn Lulju 2002. Flimkien mar-rakkomandazzjoni, iċ-ċentri tas-SOLVIT adottaw sett ta’ livelli ta’ kwalità komuni u ta’ riżultati f’Diċembru 2004 biex jassiguraw kwalità għolja tas-servizz fis-sistema kollha.

Madankollu, minkejja li l-ħidma ewlenija tas-SOLVIT hija s-soluzzjoni tal-problemi kkaġunati minn applikazzjoni ħażina tal-liġi tal-UE, u jidher li ġieli jkun hemm il-ħtieġa ta' bidla fil-liġi nazzjonali, fil-linji gwida jew f'dispożizzjonijiet oħra formali ta' implimentazzjoni.

Minkejja l-fatt li l-mandat tas-SOLVIT jippermetti li ċ-ċentri tas-SOLVIT jirrifjutaw jieħdu azzjoni f'każijiet bħal dawn, minħabba li jkun diffiċli ssolvihom b'mezzi mhux formali jew fi żmien għaxar ġimgħat, qiegħed ikun hemm żieda fl-għadd ta' ċentri tas-SOLVIT li qegħdin jieħdu interess f'dawn l-hekk imsejħa każijiet SOLVIT+. B'dan il-mod, mhux talli jissolvew problemi individwali ta' min iressaq l-ilment, iżda jiġi evitat ukoll li jinqalgħu problemi simili fil-futur.

Problemi orizzontali identifikati f'livell nazzjonali

Fl-2008, għadd rekord ta' ċentri tas-SOLVIT (tal-Awstrija, il-Belġju, il-Bulgarija, Ċipru, ir-Repubblika Ċeka, il-Finlandja, Franza, il-Latvja, il-Litwanja, il-Pajjiżi Baxxi, il-Polonja, il-Portugall, ir-Rumanija, is-Slovakkja, Spanja, l-Isvezja) kienu involuti f'total ta' 32 każ SOLVIT+, filwaqt li ssolvew 12 minnhom, u għad fadal 20 pendenti.

Huwa fatt inkuraġġanti ħafna li lanqas dawk iċ-ċentri tas-SOLVIT li għandhom problemi serji ta' persunal m'huma qed jirrifjutaw dawn il-każi, minkejja li s-soltu dawn ikunu kkumplikati u jirrikjedu ħafna ħin.

Barra minn dan, bosta ċentri tas-SOLVIT spiss jippruvaw jgħinu lil min iressaq każ għandhom anke meta l-każ ma jkunx jaqa' fl-ambitu tas-SOLVIT (pereżempju, problemi transkonfinali li ma jkollhomx x'jaqsmu mal-liġi tal-UE).

Fis-sena 2007 fil-bażi tad-data SOLVIT inħolqot il-kategorija speċjali 'non-SOLVIT' sabiex tirreġistra każijiet ta' din ix-xorta. Bejn Novembru 2007 u Ottubru 2008, iċ-ċentri tas-SOLVIT ittrattaw 250 każ 'non-SOLVIT'.

Fl-2008, il-fluss ta' każijiet li ttratta s-SOLVIT kiber bi 22%, u għall-ewwel darba mit-twaqqif tas-SOLVIT, intlaħaq ir-rekord ta' 1 000 każ imressaq fis-sistema fi żmien sena. Ir-rata tal-problemi li ssolvew baqgħet għolja, sewwasew 83%. Fl-istess waqt, in-nuqqas ta' persunal u l-bidliet frekwenti f'numru ta' ċentri tas-SOLVIT ikkawżaw tnaqqis fil-medja tal-ħeffa tal-ittrattar tal-każi, minn 58 jum fl-2007 għal 69 jum fl-2008. Barra dan, il-persentaġġ tal-każijiet solvuti fi żmien l-iskadenza ta' għaxar ġimgħat minn 79% niżel għal 74%.

Biex ikun aċċertat li s-soluzzjonijiet ikunu kompatibbli mal-liġi tal-UE, iċ-ċentri tas-SOLVIT jeħtieġu konsulenza legali soda rigward il-merti legali tal-problemi li jitressqu u s-soluzzjonijiet proposti. Dawn jeħtieġ li jkollhom aċċess tajjeb għall-konsulenza legali, kemm fiċ-ċentru tagħhom u kemm fl-amministrazzjoni li jappartienu.

Meta jkun hemm differenzi fl-opinjoni legali bejn żewġ Stati Membri rigward xi każ li jkunu qed jittrattaw flimkien, kwistjonijiet legali kumplessi jew inkella sempliċiment nuqqas ta' aċċess xieraq għall-konsulenza legali fil-pajjiż, iċ-ċentri tas-SOLVIT spiss jitolbu parir mingħand l-Kummissjoni.

Madankollu, minħabba ż-żieda fl-għadd ta' talbiet għall-għajnuna miċ-ċentri tas-SOLVIT, il-Kummissjoni mhux dejjem tkun tista' tipprovdi konsulenza legali informali malajr daqs kemm ikunu jixtiequ ċ-ċentri tas-SOLVIT. L-Istati Membri għandhom jiżguraw li ċ-ċentri tas-SOLVIT ikollhom aċċess xieraq għall-kompetenza legali fl-amministrazzjoni tagħhom stess. Il-Kummissjoni għandha tħaffef il-provvediment ta' evalwazzjonijiet legali informali liċ-ċentri tas-SOLVIT meta taslilha tali talba.

Fir-riżoluzzjoni tiegħu ta' Settembru 2008 dwar it-Tabella ta' Valutazzjoni tas-Suq Intern, il-Parlament talab li jingħata aktar tagħrif dwar liema direttivi għadhom ma ġewx traspsosti, minħabba li d-direttivi kollha għandhom l-istess piż fl-istatistiki.

Billi tipprovdi informazzjoni aktar dettaljata fuq il-websajt tagħha dwar liema direttiva għadhom ma ġewx implimentati fl-Istati Membri individwali, il-Kummissjoni tkun qed tgħin biex titqajjem iżjed kuxjenza fost il-pubbliku ġenerali. Dan jippermetti wkoll li ssir pressjoni mill-pari, anke minn membri tal-Parlament Ewropew fuq membri tal-parlamenti nazzjonali. Din l-informazzjoni tkun utli ħafna wkoll għall-ħidma tas-SOLVIT.

Miżuri li għandhom jiġu previsti

Ir-Rapporteur tiegħek jirrakkomanda dan li ġej:

L-informazzjoni dwar dawn is-servizzi għandha tiġi kkomunikata liċ-Ċittadini u lin-Negozji bl-iżjed mod wiesa' possibbli permezz tal-mezzi kollha tal-midja fuq il-livelli nazzjonali, reġjonali u lokali.

Barra dan, l-Istati Membri, bl-għajnuna tal-Kummissjoni, għandhom itejbu l-kapaċità ta' dawn il-mekkaniżmu tar-riżoluzzjoni tal-problemi, b'mod speċjali tas-SOLVIT, billi jallokaw iżjed riżorsi finanzjarji u umani permezz tal-Fond Soċjali Ewropew.

Il-membri tal-persunal tas-SOLVIT għandhom jirċievu t-taħriġ meħtieġ biex jibqgħu aġġornati dwar ir-regoli tas-suq intern, u għandu jkollhom ukoll għarfien tajjeb tal-Ingliż u ta' lingwa oħra tal-UE, apparti l-ilsien nattiv tagħhom.

Is-servizz tal-gvern kollha li jittrattaw kwistjonijiet relatati mal-implimentazzjoni tar-regoli tas-suq intern għandhom jaħtru uffiċjal ta' koperazzjoni tas-SOLVIT sabiex jiżguraw li jkun hemm komunikazzjoni effettiva u effiċjenti bejn is-servizzi. Kull Stat Membru għandu jaċċerta li fit-territorju tiegħu jkollu uffiċċju lokali tas-SOLVIT.

Fl-aħħar, u forsi l-iżjed importanti, l-Istati Membri għandhom iżidu l-isforzi tagħhom biex jinfurmaw liċ-ċittadini u lin-negozji dwar id-drittijiet tagħhom fis-suq intern ħalli jagħtuhom il-ħila jeżerċitaw dawk id-drittijiet fil-prattika. Meta fl-aħħar jitlesta, il-proġett tas-Servizzi ta' Assistenza tas-Suq Uniku (SMAS) għandu jiffaċilita l-aċċess għal diversi servizzi ta' informazzjoni, konsulenza, assistenza u riżoluzzjoni tal-każi, u mistenni wkoll jirrazzjonalizzahom.

[1] Rakkomandazzjoni tal-Kunsill tas-7 ta' Diċembru 2001 dwar il-prinċipji tal-użu tas-"SOLVIT" - in-Netwerk Intern għar-Riżoluzzjoni tal-Problemi fis-Suq (Test b'rilevanza għall-EEA) (innotifikat taħt dokument numru C (2001)3901) ĠU L 331, 15/12/2001 P. 79 – 82.

għall-Kumitat għas-Suq Intern u l-Ħarsien tal-Konsumatur

dwar SOLVIT
(2009/2138(INI))

Rapporteur għal opinjoni: Simon Busuttil

SUĠĠERIMENTI

Il-Kumitat għall-Petizzjonijiet jistieden lill-Kumitat għas-Suq Intern u l-Ħarsien tal-Konsumatur, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Ifaħħar il-ħidma li saret minn SOLVIT u b'mod partikulari r-rata ta' riżoluzzjoni tal-każijiet tiegħu, li baqgħet għolja (83%) minkejja li fl-2008 l-ammont ta' xogħol żdied (żieda ta' 22% b'total ta' 1000 każ) u minkejja l-fatt li wħud miċ-ċentri SOLVIT qed jiffaċċjaw problemi minħabba nuqqas ta' staff;

2. Jilqa' l-fatt li l-attivitajiet tas-SOLVIT wasslu għall-iffrankar tal-ispejjeż għaċ-ċittadini u n-negozji Ewropej li huma stmati li jammontaw għal EUR 32.6 miljun fl-2008;

3. Jinnota li l-Kumitat għall-Petizzjonijiet tal-Parlament, parallelament mal-proċedura tiegħu stess, jirreferi lill-petizzjonanti għas-SOLVIT meta jqis li tista' tinsab soluzzjoni aktar malajr permezz ta' SOLVIT;

4. Jirrikonoxxi l-effettività ta' SOLVIT bħala netwerk ta' kooperazzjoni li jagħmel ħiltu bil-għan li jsolvi b'mod informali problemi li jaffaċċjaw iċ-ċittadini u n-negozji minħabba applikazzjoni ħażina tal-liġi tas-suq intern mill-awtoritajiet pubbliċi;

5. Jinnota li r-rapport annwali tal-2008 tas-SOLVIT juri li SOLVIT jiġbed lejh ammont kbir ta' każijiet li ma jaqgħux taħt dan in-netwerk u li dan qed iwassal għal proċess aktar bil-mod tal-immaniġġjar tal-ilmenti fiċ-ċentri SOLVIT;

6. Jinnota li hemm diversi entitajiet li permezz tagħhom iċ-ċittadini tal-UE jistgħu jikkomunikaw il-problemi tagħhom, inklużi l-Kumitat għall-Petizzjonijiet, SOLVIT, il-Kummissjoni Ewropea u l-Ombudsman Ewropew;

7. Jitlob lil SOLVIT biex jirreferi l-każijiet ta' applikazzjoni ħażina tal-leġiżlazzjoni tal-UE, li għalih huma wisq kumplessi biex isolvihom, mhux biss lill-Kummissjoni Ewropea iżda wkoll, fejn xieraq, lill-Kumitat għall-Petizzjonijiet tal-Parlament;

8. Ifakkar li l-petizzjonijiet huma trattati b'mod miftuħ u trasparenti f'kooperazzjoni mill-qrib mal-kumitati leġiżlattivi kompetenti, il-Kummissjoni Ewropea u l-awtoritajiet differenti fl-Istati Membri;

9 Iqis li l-proċess tal-petizzjonijiet jista' jagħti kontribut pożittiv għal tfassil aħjar tal-liġijiet; ifakkar mill-ġdid li, wara d-dħul fis-seħħ tat-Trattat ta' Lisbona, is-setgħa attiva u diretta tal-Parlament fl-iffurmar, ir-reviżjoni u t-titjib tal-Leġiżlazzjoni tal-UE se tiżdied ħafna. jinnota, barra minn hekk, li t-tisħiħ tar-rwol tal-parlamenti nazzjonali għandu jiġi kkunsidrat;

10. Iqis li mhemmx punt ta’ referenza uniku responsabbli sabiex isegwi l-ilment taċ-ċittadini mill-bidu sal-aħħar minħabba li dawn jiġu sottomessi permezz ta' diversi mezzi disponibbli; jitlob għal aktar koordinazzoni fost l-entitajiet differenti involuti: dawk li jirċievu kif ukoll dawk li jittrattaw l-ilmenti taċ-ċittadini;

11. Jitlob lil SOLVIT biex jinkludi, fis-sit elettroniku tiegħu, link għall-Kumitat għall-Petizzjonijiet tal-Parlament kif ukoll għall-Kumitati kkonċernati tal-parlamenti nazzjonali, sabiex iċ-ċittadini jkunu jistgħu jsiru konxji dwar id-dritt tagħhom li jibagħtu petizzjoni lill-Parlament bħala mezz li bih jiksbu rimedji li mhumiex ġudizzjarji kif ukoll soluzzjonijiet permezz tal-proċess politiku u leġiżlattiv;

12. Jappoġġja, barra minn hekk, l-iżvilupp ta' sit elettroniku komuni tal-istituzzjonijiet Ewropej maħsub biex jgħin liċ-ċittadini u jirriferihom b'mod dirett lill-istituzzjoni jew lill-entità kompetenti biex jittrattaw l-ilment tagħhom.

RIŻULTAT TAL-VOTAZZJONI FINALI FIL-KUMITAT

Data tal-adozzjoni

Riżultat tal-votazzjoni finali

+:

–:

0:

Membri preżenti għall-votazzjoni finali

Victor Boştinaru, Simon Busuttil, Giles Chichester, Pascale Gruny, Ágnes Hankiss, Roger Helmer, Peter Jahr, Lena Kolarska-Bobińska, Erminia Mazzoni, Willy Meyer, Mariya Nedelcheva, Chrysoula Paliadeli, Nikolaos Salavrakos, Ernst Strasser, Angelika Werthmann, Tatjana Ždanoka

Sostitut(i) preżenti għall-votazzjoni finali

Sir Robert Atkins, Gerald Häfner, Marian Harkin, Joe Higgins, Alan Kelly, Mairead McGuinness, Axel Voss

Avviż legali - Politika tal-privatezza