REPORT dwar id-deliberazzjonijiet 2009 tal-Kumitat għall-Petizzjonijiet

7.6.2010 - (2009/2139 (INI))

Kumitat għall-Petizzjonijiet
Rapporteur: Carlos José Iturgaiz Angulo

Emendi

• 001-005 (PDF - 119 KB)
• 001-005 (DOC - 233 KB)

MOZZJONI GĦAL RIŻOLUZZJONI TAL-PARLAMENT EWROPEW

dwar id-deliberazzjonijiet tal-Kumitat għall-Petizzjonijiet matul is-sena 2009

(2009/2139 (INI))

Il-Parlament Ewropew,

–   wara li kkunsidra r-riżoluzzjonijiet preċedenti tiegħu dwar id-deliberazzjonijiet tal-Kumitat għall-Petizzjonijiet,

–   wara li kkunsidra l-Artikoli 24 u 227 tat-Trattat dwar il-Funzjonament tal-Unjoni Ewropea,

–   wara li kkunsidra l-Artikoli 10 u 11 tat-Trattat dwar l-Unjoni Ewropea,

–   wara li kkunsidra l-Artikoli 48 u 202(8) tar-Regoli ta' Proċedura tiegħu,

–   wara li kkunsidra r-rapport tal-Kumitat għall-Petizzjonijiet (A7-0186/2010),

A.     billi l-attività tal-Kumitat għall-Petizzjonijiet fl-2009 kienet ikkaratterizzata bit-tranżizzjoni mis-sitt leġiżlatura għas-seba’ waħda, u l-kompożizzjoni tal-Kumitat inbidlet b’mod konsiderevoli, b’żewġ terzi tal-membri jieħdu posthom għall-ewwel darba,

B.     billi l-2009 kienet ikkaratterizzata bit-tmiem tal-mandat tal-Ombudsman Ewropew filwaqt li l-Kumitat għall-Petizzjonijiet kien involut direttament fis-smigħ tal-kandidati għall-kariga,

C.     billi t-Trattat ta’ Lisbona daħal fis-seħħ fl‑1 ta’ Diċembru 2009 u ħoloq il-kundizzjonijiet neċessarji għal parteċipazzjoni ikbar taċ-ċittadini fil-proċess tat-teħid ta’ deċiżjonijiet tal-UE, fi sforz biex tissaħħaħ il-leġittimità u r-responsabilità tagħha,

D.     billi ċ-ċittadini tal-UE huma rrappreżentati direttament mill-Parlament, u d-dritt ta’ petizzjoni kif imħaddan fit-Trattat joffri l-mezzi sabiex jindirizzaw lir-rappreżentanti tagħhom kull meta jqisu li d-drittijiet tagħhom ikunu nkisru,

E.     billi l-infurzar tal-leġiżlazzjoni Ewropea għandu impatt dirett fuq iċ-ċittadini, li jinsabu fl-aqwa pożizzjoni biex jevalwaw l-effikaċa u n-nuqqasijiet tagħha u biex jindikaw il-lakuni li baqa’ u li jeħtieġ li jiġu solvuti sabiex tiġi żgurata konformità mal-objettivi tal-Unjoni,

F.     filwaqt li jżomm f’moħħu li ċ-ċittadini Ewropej, individwalment jew b’mod kollettiv, iduru fuq il-Parlament għal rimedju meta tinkiser liġi Ewropea,

G.     billi l-Parlament, permezz tal-Kumitat għall-Petizzjonijiet tiegħu, għandu obbligu li jinvestiga dan it-tħassib u li jagħmel l-almu tiegħu biex iwaqqaf dan il-ksur tal-liġi; billi, sabiex iċ-ċittadini jiġu offruti l-iktar rimedji xierqa u rapidi, il-Kumitat għall-Petizzjonijiet kompla jsaħħaħ il-kooperazzjoni tiegħu mal-Kummissjoni, ma' kumitati parlamentari oħrajn, korpi, aġenziji u netwerks Ewropej u mal-Istati Membri,

H.     billi l-għadd ta’ petizzjonijiet li rċieva l-Parlament fl-2009 kien ftit iktar minn dak irreġistrat fl-2008 (jiġifieri 1 924 meta mqabbel ma’ 1 849), u billi t-tendenza li qed tikber fir-rigward ta’ petizzjonijiet ippreżentati b’mod elettroniku ġiet ikkonfermata (madwar 65% waslu f’din il-forma fl-2009 meta mqabbla ma’ 60% fl-2008),

I.      billi l-għadd ta’ petizzjonijiet inammissibbli li waslu fl-2009 jindika li għandu jkun hemm iktar enfasi sabiex iċ-ċittadini jiġu infurmati aħjar dwar il-kompetenzi tal-Unjoni u r-rwol tal-istituzzjonijiet varji tagħha,

J.      billi, bosta drabi, iċ-ċittadini jippetizzjonaw lill-Parlament dwar deċiżjonijiet meħuda mill-awtoritajiet amministrattivi jew ġudizzjarji kompetenti fl-Istati Membri, u billi ċ-ċittadini għandhom bżonn mekkaniżmi li permezz tagħhom ikunu jistgħu jagħmlu kuntatt mal-awtoritajiet nazzjonali biex jagħtu rendikont tal-parti tagħhom kemm fil-proċess leġiżlattiv Ewropew kif ukoll fil-proċess ta’ infurzar leġiżlattiv,

K.     billi ċ-ċittadini għandhom, b’mod partikulari, jkunu konxji – kif rikonoxxut mill-Ombudsman Ewropew fid-deċiżjoni ta’ Diċembru 2009 li għalqet l-investigazzjoni fir-rigward tal-ilment 822/2009/BU kontra l-Kummissjoni – li l-proċedimenti fil-qrati nazzjonali huma parti mill-proċess tal-implimentazzjoni tal-leġiżlazzjoni Ewropea fl-Istati Membri, u li l-Kumitat għall-Petizzjonijiet ma jistax jindirizza kwistjonijiet soġġetti għal proċedimenti fi qrati nazzjonali u lanqas ma jista' jirrevedi r-riżultat ta' tali proċedimenti,

L.     billi l-Parlament jaffaċċja problema partikulari meta titressaqlu petizzjoni dwar nuqqas allegat mill-ġudikatura nazzjonali biex jitlob deċiżjoni preliminari mill-Qorti tal-Ġustizzja f’nuqqas ta’ osservanza tal-Artikolu 267 tat-TFUE, speċjalment jekk il-Kummissjoni ma tużax il-poteri tagħha skont l-Artikolu 258 sabiex tieħu azzjonijiet kontra l-Istat Membru kkonċernat,

M.    billi l-proċess tal-petizzjonijiet – permezz tal-mekkaniżmi ta’ ħidma tiegħu u minħabba li d-dritt ta’ petizzjoni huwa mogħti liċ-ċittadini u r-residenti kollha tal-UE skont id-dispożizzjonijiet tat-Trattat – huwa differenti minn rimedji oħrajn disponibbli għaċ-ċittadini fil-livell tal-UE, bħalma hija l-preżentazzjoni ta' lmenti lill-Ombudsman Ewropew jew lill-Kummissjoni,

N.     billi ċ-ċittadini huma intitolati għal rimedju rapidu u orjentat lejn is-soluzzjoni u għal livell għoli ta’ trasparenza u ċarezza min-naħa tal-istituzzjonijiet Ewropej kollha u billi l-Parlament talab repetutament lill-Kummissjoni biex tuża l-prerogattivi tagħha bħala gwardjan tat-Trattat sabiex tieħu azzjoni kontra l-ksur tal-leġiżlazzjoni Ewropea żvelat mill-petizzjonanti, speċjalment meta t-traspożizzjoni tal-leġiżlazzjoni tal-UE fil-livell nazzjonali tirriżulta fil-ksur tagħha,

O.     billi ħafna petizzjonijiet għadhom iqajmu tħassib dwar it-traspożizzjoni u l-implimentazzjoni tal-leġiżlazzjoni Ewropea dwar is-suq intern u l-ambjent, u filwaqt li jżomm f’moħħu t-talbiet preċedenti tal-Kumitat għall-Petizzjonijiet lill-Kummissjoni sabiex tiżgura li l-kontrolli ta’ infurzar f’dawn l-oqsma jissaħħu u jsiru aktar effiċjenti,

P.     billi, minkejja li l-Kummissjoni tista’ biss tivverifika kompletament il-konformità mal-liġi tal-UE meta tittieħed deċiżjoni finali mill-awtoritajiet nazzjonali biss, huwa importanti, b'mod partikulari fir-rigward tal-kwistjonijiet relatati mal-ambjent u fil-każijiet kollha meta l-aspett ta' żmien ikun sinifikanti b'mod speċjali, li minn stadju bikri jiġi vverifikat li l-awtoritajiet lokali, reġjonali u nazzjonali japplikaw b’mod korrett ir-rekwiżiti proċedurali relevanti kollha skont il-liġi tal-UE u, meta jkun meħtieġ, jagħmlu studji ddettaljati dwar l-applikazzjoni u l-impatt tal-leġiżlazzjoni fis-seħħ, sabiex jiksbu t-tagħrif kollu meħtieġ,

Q.     filwaqt li jżomm f’moħħu l-importanza li jiġi evitat iktar telf irreparabbli tal-bijodiversità, speċjalment fis-siti tan-Natura 2000, u l-impenn tal-Istati Membri li jiżguraw il-protezzjoni ta’ żoni ta’ konservazzjoni speċjali skont id-Direttiva tal-Ħabitats (92/43/KEE) u d-Direttiva dwar l-Għasafar (19/409 KEE),

R.     billi l-petizzjonijiet jenfasizzaw l-impatt tal-leġiżlazzjoni Ewropea fuq il-ħajja ta’ kuljum taċ-ċittadini tal-UE, u filwaqt li jirrikonoxxi l-ħtieġa li jittieħdu l-passi neċessarji kollha sabiex jiġi kkonsolidat il-progress miksub fit-tisħiħ tad-drittijiet taċ-ċittadini mogħtija lilhom mill-UE,

S.     billi, fir-rapport ta’ ħidma preċedenti tiegħu u fl-opinjoni tiegħu dwar ir-rapport annwali tal-Kummissjoni dwar il-monitoraġġ tal-applikazzjoni tal-liġi Komunitarja, il-Kumitat għall-Petizzjonijiet talab li jinżamm infurmat regolarment dwar l-istadji milħuqa fil-proċeduri ta’ ksur li s-suġġett tagħhom ikun kopert ukoll mill-petizzjonijiet,

T.     filwaqt li jżomm f’moħħu li l-Istati Membri għandhom ir-responsabilità primarja għat-traspożizzjoni korretta u l-infurzar tal-leġiżlazzjoni Ewropea, u filwaqt li jirrikonoxxi li ħafna minnhom kienu involuti dejjem iżjed fil-ħidma tal-Kumitat għall-Petizzjonijiet fl-2009,

1.      Jilqa’ b’sodisfazzjon it-tranżizzjoni bla xkiel għal-leġiżlatura l-ġdida u jinnota li ħafna mill-ħidma tal-Kumitat għall-Petizzjonijiet, b’differenza mill-ħidma ta' kumitati parlamentari oħrajn, ġiet ittrasferita għal-leġiżlatura l-ġdida minħabba li l-eżami ta' għadd konsiderevoli ta' petizzjonijiet kien għadu ma ġiex komplut,

2.      Jilqa’ b’sodisfazzjon id-dħul fis-seħħ tat-Trattat ta’ Lisbona u għandu fiduċja li l-Parlament se jkun involut mill-qrib fl-iżvilupp tal-inizjattiva taċ-ċittadini l-ġdida sabiex dan l-istrument ikun jista’ jilħaq l-għan tiegħu b’mod sħiħ u jiġu żgurati trasparenza u responsabilità ikbar fil-proċess ta’ teħid ta’ deċiżjonijiet tal-UE, sabiex iċ-ċittadini jkunu jistgħu jissuġġerixxu titjib jew żidiet fir-rigward tal-liġi tal-UE;

3.      Jilqa’ b’sodisfazzjon il-Green Paper dwar l-Inizjattiva taċ-Ċittadini Ewropej[1], ippubblikata mill-Kummissjoni fl-aħħar tal-2009, bħala l-ewwel pass sabiex dan il-kunċett jitqiegħed fil-prattika;

4.      Jinnota li l-Parlament irċieva petizzjonijiet b'xejra ta' kampanja b’iktar minn miljun firma u jinsisti dwar il-bżonn li jiġi żgurat li ċ-ċittadini jkunu konxji b’mod sħiħ bid-distinzjoni bejn din it-tip ta’ petizzjoni u l-inizjattiva taċ-ċittadini;

5.      Ifakkar fir-riżoluzzjoni tiegħu dwar l-inizjattiva taċ-ċittadini[2], li fir-rigward tagħha l-Kumitat għall-Petizzjonijiet ikkontribwixxa opinjoni; iħeġġeġ lill-Kummissjoni biex tistabbilixxi regoli implimentattivi li jinftiehmu li jidentifikaw b’mod ċar ir-rwoli u l-obbligi tal-istituzzjonijiet involuti fil-proċessi ta’ eżami u ta’ teħid ta’ deċiżjonijiet;

6.      Jilqa’ b’sodisfazzjon is-saħħa legali vinkolanti li akkwistat il-Karta tad-Drittijiet Fundamentali bid-dħul fis-seħħ tat-Trattat ta’ Lisbona u jenfasizza l-importanza tal-Karta li tiċċara iżjed id-drittijiet fundamentali u tagħmilhom iżjed viżibbli għaċ-ċittadini kollha;

7.      Iqis li kemm l-Unjoni kif ukoll l-Istati Membri tagħha għandhom obbligu li jiżguraw li d-drittijiet fundamentali inklużi fil-Karta jiġu osservati b’mod sħiħ, u għandu fiduċja li l-Karta se tgħin biex jiġi żviluppat il-kunċett ta’ ċittadinanza tal-Unjoni;

8.      Għandu fiduċja li se jittieħdu l-passi proċedurali neċessarji kollha sabiex jiġi żgurat li l-aspetti istituzzjonali tal-adeżjoni tal-UE mal-Konvenzjoni Ewropea għall-Protezzjoni tad-Drittijiet tal-Bniedem u l-Libertajiet Fundamentali jiġu ċċarati malajr, u jinnota l-intenzjoni tal-Kumitat għall-Petizzjonijiet li jikkontribwixxi għall-ħidma tal-Parlament fir-rigward ta’ din il-kwistjoni;

9.      Ifakkar fit-talba preċedenti tiegħu li titwettaq reviżjoni sħiħa tal-proċeduri ta’ rimedju disponibbli għaċ-ċittadini tal-UE mis-servizzi relevanti tal-Parlament u l-Kummissjoni u jenfasizza l-importanza li jitkomplew in-negozjati dwar il-Ftehim Qafas rivedut bejn il-Parlament Ewropew u l-Kummissjoni sabiex jiġu kkunsidrati b’mod sħiħ id-drittijiet miżjuda taċ-ċittadni tal-UE b'mod partikulari permezz tal-inizjattivi taċ-ċittadini Ewropej;

10.    Jilqa’ b’sodisfazzjon il-passi meħuda mill-Kummissjoni biex tissimplifika s-servizzi ta’ assistenza pubblika eżistenti, sabiex iċ-ċittadini jkunu infurmati dwar id-drittijiet tagħhom tal-UE u l-mezzi ta’ rimedju disponibbli f’każ ta’ ksur, permezz tar-raggruppament tal-paġni tal-Internet relevanti varji (bħal dawk tas-SOLVIT u l-ECC-Net) taħt it-titolu “Drittijietek fl-UE” fil-paġna ewlenija tal-Internet tal-UE;

11.    Jinnota li l-Parlament talab repetutament lill-Kummissjoni biex tiżviluppa sistema sabiex tissenjala b’mod ċar il-mekkaniżmi varji għall-ilmenti disponibbli għaċ-ċittadini u jemmen li jeħtieġ li jittieħdu passi ulterjuri, bil-għan aħħari li l-paġna tal-Internet “Drittijietek fl-UE” tinbidel f'waħda fejn tkun tista’ tinqeda minn kollox permezz tal-Internet u li tkun tista' tintuża faċilment; jistenna bil-ħerqa l-valutazzjonijiet inizjali tal-implimentazzjoni tal-Pjan ta’ Azzjoni 2008 tiegħu[3], li mistennija joħorġu fl-2010;

12.    Ifakkar fir-riżoluzzjoni tiegħu dwar l-attivitajiet tal-Ombudsman Ewropew fl-2008 u jħeġġeġ lill-Ombusman li għadu kif ġie elett mill-ġdid biex ikompli jaħdem sabiex ikabbar il-ftuħ u r-responsabilità tal-amministrazzjoni Ewropea u biex jiżgura li d-deċiżjonijiet jittieħdu b’mod kemm jista’ jkun miftuħ u kemm jista’ jkun fl-aktar livell viċin taċ-ċittadini;

13.    Jafferma mill-ġdid id-determinazzjoni tiegħu li jappoġġja l-uffiċċju tal-Ombudsman fl-isforzi tiegħu biex iqajjem kuxjenza pubblika fir-rigward tal-ħidma tiegħu u biex jidentifika u jaġixxi kontra l-każijiet ta' amministrazzjoni ħażina fl-attivitajiet tal-istituzzjonijiet Ewropej; jemmen li l-Ombudsman jirrappreżenta sors siewi ta’ informazzjoni fil-ħidma ġenerali biex titjieb l-amministrazzjoni Ewropea;

14.    Jinnota li l-petizzjonijiet li waslu fl-2009, li kważi 40% ġew meqjusa mhux ammissibbli, komplew jiffukaw fuq l-ambjent, id-drittijiet fundamentali u s-suq intern; f’termini ta’ xejra ġeografika, ħafna mill-petizzjonijiet kienu jirrigwardaw l-Unjoni b’mod ġenerali – segwita mill-Ġermanja, Spanja, l-Italja u r-Rumanija – u dan juri li ċ-ċittadini jsegwu b'attenzjoni l-ħidma tal-Unjoni u jduru lejha sabiex tieħu azzjoni;

15.    Jirrikonoxxi l-importanza tal-ħidma tal-petizzjonanti u tal-Kumitat għall-Petizzjonijiet għall-ħarsien tal-ambjent tal-Unjoni; jilqa’ b’sodisfazzjon l-inizjattiva tal-kumitat li ordna studju dwar l-applikazzjoni tad-Direttiva dwar il-Ħabitats, b'antiċipazzjoni tas-Sena Internazzjonali tal-Bijodiversità u jikkunsidraha bħala għodda utli għall-evalwazzjoni tal-istrateġija tal-bijodiversità tal-UE s’issa u għall-abbozzar ta' strateġija ġdida;

16.    Josserva li qed ikun hemm dejjem iżjed petizzjonijiet li jenfasizzaw il-problemi li jħabbtu wiċċhom magħhom iċ-ċittadini li jeżerċitaw id-dritt ta’ moviment liberu tagħhom; dawn il-petizzjonijiet jirreferu għat-tul ta’ żmien eċċessiv min-naħa tal-Istati Membri ospitanti biex joħorġu permessi ta’ residenza lil membri tal-familja minn pajjiżi terzi, għal diffikultajiet fl-eżerċizzju tad-drittijiet ta’ votazzjoni u għar-rikonoxximent tal-kwalifiki;

17.    Itenni t-talbiet preċedenti tiegħu lill-Kummissjoni biex tressaq proposti prattiċi sabiex il-protezzjoni tal-konsumatur kontra l-prattiki kummerċjali inġusti tiġi estiża għan-negozji ż-żgħar, kif mitlub fir-riżoluzzjoni tiegħu dwar il-kumpaniji tad-direttorju qarrieqa[4], minħabba li l-Kumitat għadu jirċievi petizzjonijiet minn vittmi ta’ inganni tad-direttorji kummerċjali;

18.    Jirrikonoxxi r-rwol ċentrali tal-Kummissjoni fil-ħidma tal-Kumitat għall-Petizzjonijiet, li għadu joqgħod fuq il-kompetenza tagħha fil-valutazzjoni tal-petizzjonijiet, fl-identifikazzjoni tal-ksur tal-leġiżlazzjoni Ewropea u biex jinstab rimedju, u jirrikonoxxi l-isforzi magħmula mill-Kummissjoni biex ittejjeb il-ħin totali ta’ reazzjoni għat-talbiet ta’ investigazzjoni tal-Kumitat sabiex il-każijiet li ġew irrappurtati miċ-ċittadini jkunu jistgħu jiġu solvuti kemm jista’ jkun malajr;

19.    Iħeġġeġ lill-Kummissjoni Ewropea biex tintervjeni fi stadju bikri kull meta l-petizzjonijiet jagħtu sinjal ta' danni potenzjali għal żoni protetti speċjali, billi tfakkar lill-awtoritajiet nazzjonali kkonċernati dwar l-impenji tagħhom li jiżguraw l-integrità tas-siti kklassifikati bħala Natura 2000 skont id-Direttiva tal-KE 92/43 (Ħabitats) u, fejn meħtieġ, billi tieħu miżuri preventivi biex tiżgura r-rispett tal-leġiżlazzjoni Ewropea;

20.    Jilqa’ lill-Kummissarji eletti ġodda – b’mod partikulari l-Kummissarju responsabbli għar-relazzjonijiet u l-amministrazzjoni interistituzzjonali – u jittama li se jikkooperaw mal-Kumitat għall-Petizzjonijiet mill-viċin u b'mod effiċjenti kemm jista' jkun u li jirrispettawh bħala wieħed mill-mezzi ta' komunikazzjoni l-aktar importanti bejn iċ-ċittadini u l-istituzzjonijiet Ewropej;

21.    Jiddispjaċih li l-Kummissjoni għadha ma indirizzatx it-talbiet ripetuti tal-Kumitat għal aġġornamenti uffiċjali u regolari dwar il-progress tal-proċedimenti ta’ ksur fir-rigward ta’ petizzjonijiet miftuħa; jinnota li l-pubblikazzjoni ta’ kull xahar tad-deċiżjonijiet tal-Kummissjoni dwar proċedimenti ta’ ksur – skont l-Artikoli 258 u 260 tat-Trattat – minkejja li ta’ min ifaħħarha f’termini ta’ trasparenza, ma tirrappreżentax tweġiba adegwata għal dawn it-talbiet;

22.    Jemmen li jekk il-Kumitat isib il-proċedimenti ta’ ksur billi jsegwi l-istqarrijiet għall-istampa tal-Kummissjoni u jqabbilhom ma’ ċerti petizzjonijiet ikun qed jaħli l-ħin u r-riżorsi tiegħu inutilment, speċjalment fil-każ ta’ ksur orizzontali u jitlob li l-Kummissjoni tinforma lill-Kumitat għall-Petizzjonijiet dwar kwalunkwe ksur tal-proċeduri;

23.    Itenni t-twemmin tiegħu li ċ-ċittadini għandhom jibbenefikaw mill-istess livell ta’ trasparenza mill-Kummissjoni kemm jekk jagħmlu lment formali kif ukoll jekk jippreżentaw petizzjoni lill-Parlament u jistieden lill-Kummissjoni, għal darba oħra, biex tiżgura li jingħata rikonoxximent akbar għall-proċess tal-petizzjonijiet u għar-rwol ta' dan il-proċess li jiżvela l-ksur tal-leġiżlazzjoni Ewropea li fir-rigward tiegħu sussegwentement jitniedu proċedimenti ta’ ksur;

24.    Ifakkar li, f’ħafna każijiet, il-petizzjonijiet jiżvelaw problemi relatati mat-traspożizzjoni u l-infurzar tal-leġiżlazzjoni Ewropea u jirrikonoxxi li t-tnedija ta’ proċedimenti ta’ ksur mhux neċessarjament tipprovdi liċ-ċittadini b'soluzzjonijiet immedjati għall-problemi tagħhom, minħabba t-tul ta’ żmien medju li jieħdu dawn il-proċedimenti;

25.    Jilqa’ b’sodisfazzjon l-isforzi tal-Kummissjoni biex tiżviluppa mezzi alternattivi sabiex tiġi promossa l-implimentazzjoni aħjar tal-leġiżlazzjoni Ewropea, u l-attitudni pożittiva ta’ ċerti Stati Membri li jieħdu l-passi neċessarji biex jikkoreġu l-ksur fi stadju bikri tal-proċess ta’ implimentazzjoni;

26.    Jilqa’ b’sodisfazzjon l-involviment ikbar tal-Istati Membri fl-attività tal-Kumitat għall-Petizzjonijiet u l-preżenza tar-rappreżentanti tagħhom fil-laqgħat; jemmen li tali kooperazzjoni għandha tissaħħaħ minħabba li l-awtoritajiet nazzjonali huma primarjament responsabbli għall-infurzar tal-leġiżlazzjoni Ewropea ladarba din tiġi trasposta fl-ordni legali tagħhom;

27.    Jisħaq li l-kooperazzjoni aktar mill-qrib mal-Istati Membri hija importanti ħafna għall-ħidma tal-Kumitat għall-Petizzjonijiet; jemmen li waħda mis-soluzzjonijiet tista’ tkun li tiġi msaħħa l-kooperazzjoni mal-parlamenti nazzjonali b’mod partikulari fil-kuntest tat-Trattat ta’ Lisbona,

28.    Iħeġġeġ lill-Istati Membri biex ikunu ppreparati li jkollhom parti aktar trasparenti u proattiva meta jirrispondu l-petizzjonijiet li għandhom x’jaqsmu mal-implimentazzjoni u l-infurzar tal-liġi Ewropea;

29.    Iqis li, fid-dawl tat-Trattat ta’ Lisbona, il-Kumitat għall-Petizzjonijiet ta’ dan il-Parlament għandu jsawwar rabtiet ta’ ħidma aktar mill-qrib ma’ kumitati simili fil-parlamenti reġjonali u nazzjonali tal-Istati Membri sabiex jiġi promoss fehim reċiproku tal-petizzjonijiet dwar il-kwistjonijiet Ewropej u biex tiġi żgurata r-risposta l-aktar veloċi liċ-ċittadin fil-livell l-aktar xieraq.

30.    Jiġbed l-attenzjoni għall-konklużjonijiet fir-riżoluzzjoni tiegħu dwar l-impatt tal-urbanizzazzjoni estensiva fi Spanja u jitlob lill-awtoritajiet Spanjoli biex ikomplu jipprovdu valutazzjonijiet tal-miżuri meħuda, hekk kif kienu qegħdin jagħmlu sa issa;

31.    Jinnota l-għadd dejjem ikbar ta’ petizzjonanti li jduru fuq il-Parlament għal rimedju dwar kwisjonijiet li jaqgħu barra mill-qasam ta’ kompetenza tal-UE, bħalma huma, pereżempju, il-kalkolu tal-benefiċċji tal-irtirar, l-infurzar tad-deċiżjonijiet tal-qrati nazzjonali u l-passività min-naħa tal-amministrazzjonijiet nazzjonali; il-Kumitat għall-Petizzjonijiet għamel l-almu tiegħu biex jidderieġi mill-ġdid dawn l-ilmenti lill-awtoritajiet nazzjonali kompetenti;

32.    Jemmen li, filwaqt li l-użu estensiv tal-Internet għandu jkun imħeġġeġ minħabba li jiffaċilita l-komunikazzjoni maċ-ċittadini, għandha tinstab soluzzjoni sabiex jiġi evitat li l-Kumitat jitgħabba b’nonpetizzjonijiet; iqis li tista’ tinstab soluzzjoni possibbli fir-reviżjoni tal-proċess ta’ reġistrazzjoni fil-Parlament u jħeġġeġ lill-persunal responsabbli biex jidderieġi mill-ġdid il-fajls inkwistjoni lill-Unità tal-Korrispondenza maċ-Ċittadini, minflok ma jippreżentahom lill-Kumitat għall-Petizzjonijiet;

33.    Jenfasizza l-bżonn li titkompla l-ħidma fuq iż-żieda tat-trasparenza tal-immaniġġjar tal-petizzjonijiet: internament permezz tal-immodernizzar kontinwu tal-applikazzjoni “E-petition” – li tipprovdi lill-Membri b’aċċess dirett għall-fajls tal-petizzjonijiet – u esternament billi jiġi stabbilit portal tal-petizzjonijiet interattiv u li jkun jista’ jintuża faċilment li jippermetti li l-Parlament jilħaq liċ-ċittadini b’mod iktar effikaċi, u li barra minn hekk jagħmel il-proċeduri ta’ votazzjoni u r-responsabilitajiet tal-Kumitat iktar ċari għall-pubbliku;

34.    Iħeġġeġ il-ħolqien ta' portal li joffri mudell interattiv b'diversi stadji għall-petizzjonijiet, li jkun jista' jinforma liċ-ċittadini dwar dak li jista' jinkiseb jekk issir petizzjoni lill-Parlament u dwar il-kompetenzi tal-Parlament, u li jkun jista’ jinkludi konnessjonijiet għal mezzi ta’ rimedju alternattivi fil-livell Ewropew u f’dak nazzjonali; jitlob li jiġu deskritti kemm jista’ jkun f’dettal ir-responsabilitajiet tal-Unjoni f’diversi oqsma sabiex tiġi eliminata kwalunkwe konfużjoni bejn il-kompetenzi tal-UE u l-kompetenzi nazzjonali;

35.    Jirrikonoxxi li l-implimentazzjoni ta’ inizjattiva bħal din mhux se tkun mingħajr spejjeż iżda jħeġġeġ lis-servizzi amministrattivi relevanti biex jaħdmu mal-Kumitat għall-Petizzjonijiet sabiex isibu l-iktar soluzzjonijiet xierqa, minħabba li portal bħal dan ikun ta’ importanza enormi mhux biss biex jitjieb il-kuntatt bejn il-Parlament u ċ-ċittadini tal-UE iżda wkoll biex jitnaqqas l-għadd ta’ petizzjonijiet inammissibbli;

36.    Jisħaq li sakemm tiġi risolta b’mod sodisfaċenti l-kwistjoni tar-riżorsi, huwa meħtieġ titjib immedjat tal-websajt eżistenti;

37.    Jilqa’ b’sodisfazzjon l-approvazzjoni tar-Regoli ta’ Proċedura ġodda tal-Parlament u r-reviżjoni tad-dispożizzjonijiet relatati mal-immaniġġjar tal-petizzjonijiet; iħeġġeġ il-ħidma tas-Segretarjat u r-rappreżentanti tal-gruppi politiċi fuq gwida riveduta għall-Membri dwar ir-regoli u l-proċeduri interni tal-Kumitat għall-Petizzjonijiet, minħabba li dokument bħal dan mhux biss jassisti lill-Membri fil-ħidma tagħhom iżda jkompli jżid it-trasparenza tal-proċess tal-petizzjonijiet;

38.    Itenni t-talba tiegħu lid-dipartimenti amministrattivi relevanti biex jieħdu l-miżuri meħtieġa sabiex jiġi stabbilit reġistru elettroniku li permezz tiegħu ċ-ċittadini jkunu jistgħu jappoġġjaw jew jirtiraw l-appoġġ tagħhom fir-rigward ta’ petizzjoni skont l-Artikolu 202;

39.    Jagħti istruzzjonijiet lill-President tiegħu sabiex jgħaddi din ir-riżoluzzjoni u r-rapport tal-Kumitat għall-Petizzjonijiet lill-Kunsill, lill-Kummissjoni, lill-Ombudsman Ewropew, lill-gvernijiet tal-Istati Membri, lill-kumitati għall-petizzjonijiet tagħhom kif ukoll lill-ombudspersons nazzjonali tagħhom jew lil entitajiet simili kompetenti.

• [1]  (KUMM(2009)622) finali tal-11.11.2009.
• [2]  Riżoluzzjoni tal-Parlament Ewropew tas-7 ta' Mejju 2009 b'talba lill-Kummissjoni biex tippreżenta proposta għal regolament tal-Parlament Ewropew u l-Kunsill dwar l-implimentazzjoni tal-inizjattiva taċ-ċittadini – P6_TA(2009)0389.
• [3]  Pjan ta’ azzjoni dwar approċċ integrat biex jiġu pprovduti Servizzi ta’ Assistenza għas-Suq Uniku liċ-ċittadini u n-negozji - Dokument ta’ Ħidma tal-Persunal tal-Kummissjoni SEC (2008)1882.
• [4]  Riżoluzzjoni tal-Parlament Ewropew tas-16 ta’ Diċembru 2008 dwar il-kumpaniji ta' direttorju qarrieqa, ĠU C 45E, 23.2.2010, pp. 17-22.

NOTA SPJEGATTIVA

Introduzzjoni

Wieħed għandu jibda dan ir-rapport annwali billi jenfasizza li l-2009 ma kinetx sena normali iżda kienet waħda pjuttost straordinarja, iddominata bl-elezzjonijiet Ewropej u bid-dħul fis-seħħ tat-Trattat ta’ Lisbona. Jekk l-impatt tat-tieni avveniment fuq il-ħidma tal-Kumitat x’aktarx jinħass fis-snin li ġejjin, l-ewwel avveniment kellu influwenza sinifikanti fuq l-attività ta’ kuljum tal-Kumitat.

B’differenza minn kumitati parlamentari oħrajn, il-Kumitat għall-Petizzjonijiet jiddistingwi ruħu bħala wieħed fejn il-kalendarju tal-attivitajiet mhuwiex iffissat skont il-programm leġiżlattiv tal-Kummissjoni, iżda huwa stabbilit miċ-ċittadini li jeżerċitaw id-dritt tagħhom li jressqu petizzjonijiet lill-Parlament Ewropew. L-2009 kienet is-sena tat-tranżizzjoni mis-sitt leġiżlatura għas-seba' waħda; il-Membri l-ġodda tal-Kumitat kellhom jiffamiljarizzaw irwieħhom mal-ħidma ġenerali tiegħu. Minkejja l-isforz konsiderevoli biex jinħadmu kemm jista’ jkun petizzjonijiet sal-aħħar tal-leġiżlatura, bosta fajls ġew ittrasferiti għal-leġiżlatura l-ġdida u, għalhekk, il-Membri kellhom jiffamiljarizzaw rwieħhom magħhom malajr minħabba li baqgħu deħlin petizzjonijiet ġodda. Wieħed għandu jinnota li l-proċess kien pjuttost bla xkiel u li kemm il-Kumitat preċedenti kif ukoll dak attwali għamlu l-almu tagħhom biex jiżguraw li l-petizzjonanti jkunu dawk affettwati l-anqas b’dan il-perjodu ta’ tranżizzjoni. Minkejja dan, aspetti oħrajn tal-ħidma regolari tal-Kumitat – bħaż-żjarat għall-ġbir tal-fatti – kellhom jiġu posposti għall-2010.

F’dan il-kuntest, ir-Rapport 2009 jipprova joffri stampa komprensibbli tal-attività tal-Kumitat matul is-sena u finalment fehim aħjar ta’ xi tfisser petizzjoni lill-Parlament, l-eżitu possibbli tal-proċess, l-istejjer ta’ suċċess tiegħu u l-limiti tiegħu.

Statistiċi bħal dawk dwar l-għadd ta’ petizzjonijiet li waslu, ingħalqu jew li ġew indirizzati mill-Kumitat, tal-pajjiżi jew is-suġġetti kkonċernati jirrappreżentaw għodda kwantitattiva importanti fil-valutazzjoni tal-ħidma tal-Kumitat. Aspetti addizzjonali bħar-relazzjonijiet ma' istituzzjonijiet Ewropej oħrajn, ma' awtoritajiet nazzjonali jew reġjonali jew bidliet istituzzjonali b'impatt dirett fuq l-attività tal-Kumitat inġabru flimkien biex jikkompletaw l-istampa ġenerali.

Fl-aħħar nett, iżda mhux inqas importanti, ir-rapport jeżamina l-progress miksub fl-implimentazzjoni tar-rakkomandazzjonijiet preċedenti bl-għan li titjieb il-ħidma tal-Kumitat u jenfasizza wħud mill-akbar sfidi li għandu quddiemu fid-dawl tad-dħul fis-seħħ tat-Trattat ta’ Lisbona.

Il-preżentazzjoni ta’ petizzjonijiet lill-Parlament – dritt fundamentali stipulat fl-Artikolu 227 tat-Trattat dwar il-Funzjonament tal-Unjoni Ewropea (preċedentement l-Artikolu 194)

Id-dħul fis-seħħ tat-Trattat ta’ Lisbona reġa’ kkonferma d-dritt ta' petizzjoni lill-Parlament Ewropew bħala element fundamentali taċ-ċittadinanza Ewropea. L-Artikolu 227 tat-Trattat il-ġdid (preċedentement l-Artikolu 194) jipprovdi li ċ-ċittadini jew ir-residenti tal-Unjoni Ewropea, persuni naturali jew legali, individwalment jew f’assoċjazzjoni ma’ ċittadini jew persuni oħrajn, għandhom id-dritt li jippreżentaw petizzjoni lill-Parlament Ewropew dwar kwistjoni li tkun taqa' fil-kamp ta' attività tal-Unjoni.

Il-kliem stess ta’ dan l-artikolu joffri stampa komprensiva ta’ xi tfisser petizzjoni lill-Parlament – għodda li tagħti s-setgħa liċ-ċittadini li jressqu quddiem il-Parlament it-tħassib tagħhom bl-impatt tal-politiki u l-leġiżlazzjonijiet differenti tal-UE fuq il-ħajja tagħhom ta’ kuljum. L-istatistiċi annwali juru li l-maġġoranza taċ-ċittadini jduru fuq il-Parlament għal assistenza fi kwistjonijiet relatati mal-ambjent, id-drittijiet fundamentali, il-ġustizzja, is-suq intern, eċċ., filwaqt li oħrajn jippruvaw isemmgħu leħinhom permezz ta’ suġġerimenti fir-rigward tal-iżvilupp tal-politiki Ewropej. Fl-aħħar nett, iżda xorta waħda importanti, wieħed għandu jqis kif xieraq l-għadd ta’ ċittadini li jappellaw lill-Parlament Ewropew sabiex jikkontestaw id-deċiżjonijiet meħuda mill-awtoritajiet nazzjonali. Il-biċċa l-kbira tal-petizzjonijiet jaffermaw li l-leġiżlazzjoni Ewropea ma tiġix infurzata b’mod xieraq, filwaqt li oħrajn jilmentaw dwar deċiżjonijiet tal-qrati nazzjonali jew dwar nuqqas ta’ infurzar fil-livell amministrattiv iżda l-Parlament ma jistax jagħmel wisq dwar dawn il-kwistjonijiet minħabba li jaqgħu barra mill-ambitu ta’ kompetenzi tal-Unjoni.

Skont l-istatistiċi, fl-2009 l-Parlament Ewropew irċieva 1 924 petizzjoni, żieda żgħira meta mqabbla mal-1 849 ippreżentati fl-2008. Wieħed jista’ jgħid ukoll li din id-differenza żgħira tindika ċertu staġnar wara t-tendenza ta’ żieda kostanti rreġistrata wara t-tkabbir tal-2004 u tal-2007 tal-Unjoni.

Madwar sitta u erbgħin fil-mija tal-petizzjonijiet li waslu fl-2009 ġew iddikjarati ammissibbli, perċentwali kważi simili għal dik irreġistrata fl-2008. Minn 688 petizzjoni meqjusa ammissibbli, 655 intbagħtu lill-Kummissjoni Ewropea għal raġunijiet ta’ informazzjoni. Ta’ min jenfasizza li l-Kummissjoni bagħtet madwar 300 komunikazzjoni b'referenza għall-petizzjonijiet irreġistrati fl-2009. F’dak li għandu x’jaqsam mal-petizzjonijiet inammissibbli s-sitwazzjoni hija simili ħafna għas-sena preċedenti (812 meta mqabbla ma' 818). Minħabba li l-perċentwali ta’ petizzjonijiet inammissbbli għadha pjuttost għolja (ftit iktar minn nofs il-petizzjonijiet mibgħuta), jidher ovvju li għandhom jiżdiedu l-isforzi biex jiġu infurzati r-rakkomandazzjonijiet preċedenti u attwali li għandhom l-għan li jinfurmaw aħjar liċ-ċittadini dwar il-kompetenzi tal-UE.

Deċiżjoni dwar l-adozzjoni tal-petizzjonijiet	Nru ta’ petizzjonijiet	%	Nru ta’ petizzjonijiet	%
	2009		2008
Ammissibbli	688	45.9	708	46.4
Inammissibbli	812	54.1	818	53.6
Ammissibbli u Magħluqa	420	M/A	354	M/A
Petizzjonijiet mibgħuta lill-KE għal opinjoni	655	M/A	729	M/A
Petizzjonijiet mibgħuta għal opinjoni lil entitajiet oħrajn	33	M/A	53	M/A
Petizzjonijiet mibgħuta għal informazzjoni lil entitajiet oħrajn	207	M/A	207	M/A
Mhux irreġistrati	4	M/A	6	M/A

Wieħed għandu jinnota wkoll li madwar żewġ terzi mill-petizzjonijiet tal-2009, jiġifieri 1 232, ingħalqu fi stadji bikrija tal-proċedura minħabba li ġew ikkunsidrati inammissibbli jew minħabba li minkejja li kienu ammissibbli, ingħalqu immedjatament wara li l-petizzjonanti ġew ipprovduti informazzjoni dwar il-kwistjonijiet imqajma jew wara li ntbagħtu lil Kumitati oħrajn tal-PE bil-kompetenza relevanti. Għal darba oħra, l-istatistiċi tal-2009 u l-2008 huma kumparabbli kif wieħed jista’ jinnota mid-dejta ta’ hawn taħt.

2009
Deċiżjoni dwar l-adozzjoni	Għadd ta’ petizzjonijiet	Perċentwali
Ammissibbli	1,062	56.3
Inammissibbli	818	43.4
Mhux irreġistrati	6	0.3

2008
Deċiżjoni dwar l-adozzjoni	Għadd ta’ petizzjonijiet	Perċentwali
Ammissibbli	1,108	57.6
Inammissibbli	812	42.2
Mhux irreġistrati	4	0.2

F’dan il-kuntest, wieħed għandu jiftakar li l-Membri ġibdu ripetutament l-attenzjoni fir-rigward tan-nonpetizzjonijiet minħabba li jargumentaw li l-ipproċessar tagħhom huwa ħela ta’ ħin bla bżonn. Minkejja li m’hemm l-ebda definizzjoni disponibbli ta’ nonpetizzjoni, għandu jkun hemm distinzjoni ċara bejn dawn u l-petizzjonijiet li jitqiesu inammissibbli minħabba li jaqgħu barra mill-kamp ta' kompetenza tal-UE. Normalment nonpetizzjoni tista’ tiġi deskritta bħala dikjarazzjoni personali qasira jew kumment dwar politiki tal-UE jew dwar il-mod kif għandhom jiġu żviluppati.

F’dan ir-rigward, fuq il-paġna tal-Internet tal-Parlament Ewropew dedikata għall-Petizzjonijiet hemm indikat b’mod ċar li la t-talbiet għal informazzjoni ma jiġux indirizzati mill-Kumitat għall-Petizzjonijiet u lanqas il-kummenti ġenerali dwar il-politika tal-UE. Barra minn hekk, iċ-ċittadini huma avżati li l-petizzjonijiet li jkun fihom lingwaġġ offensiv jew li ma jkunux pertinenti mil-lat sostantiv tagħhom ma jiġux investigati mill-Kumitat, u ma jingħatawx tweġiba. Għaldaqstant, wieħed jista' jikkonkludi biss li l-Kumitat jeħtieġ jiddedika iktar attenzjoni biex jispjega aħjar liċ-ċittadini xi tfisser petizzjoni lill-Parlament Ewropew, u biex itejjeb il-proċess ta' reġistrazzjoni fi ħdan il-Parlament Ewropew.

Meta wieħed jikkumpara mal-2008, ġew irreġistrati bidliet minimi fir-rigward tal-pajjiżi li l-petizzjonijiet kienu jikkonċernaw l-aktar: għaldaqstant, l-Unjoni Ewropea b’mod ġenerali għadha fl-ewwel post, segwita mill-Ġermanja, Spanja, l-Italja u r-Rumanija (l-aħħar tnejn qalbu posthom meta mqabbla mal-2008). Sorprendentement, Malta qiegħda fl-aħħar tal-klassifika, wara s-Slovenja u l-Latvja, minħabba li kien hemm disa’ petizzjonijiet biss li kienu jikkonċernaw lil dan il-pajjiż meta mqabbla mal-wieħed u għoxrin li ntbagħtu s-sena l-oħra.

2009
Pajjiż ikkonċernat	Għadd ta’ petizzjonijiet	%
L-Unjoni Ewropea	403	18.6
Il-Ġermanja	298	13.8
Spanja	279	12.9
L-Italja	176	8.1
Ir-Rumanija	143	6.6
Il-Polonja	100	4.6
Oħrajn	764	35.3

2008
Pajjiż ikkonċernat	Għadd ta’ petizzjonijiet	%
L-Unjoni Ewropea	330	15.9
Il-Ġermanja	265	12.8
Spanja	226	10.9
Ir-Rumanija	207	10.0
L-Italja	184	8.9
Il-Polonja	105	5.1
Ir-Renju Unit	99	4.8
Il-Greċja	97	4.7
Franza	86	4.1

Kif semmejna diġà, l-ambjent jibqa’ l-qasam ta’ tħassib ewlieni għall-petizzjonanti, segwit bid-drittijiet fundamentali, il-ġustizzja u s-suq intern, filwaqt li l-petizzjonijiet relatati mar-restituzzjoni tal-proprjetà naqsu fin-numru fl-2008.

2009
Temi	Għadd ta’ petizzjonijiet	Perċentwali
L-ambjent	228	9.7
Id-Drittijiet Fundamentali	164	7.0
Il-Ġustizzja	159	6.8
Is-Suq Intern	142	6.0
Proprjetà u Restituzzjoni	133	5.6
L-Impjiegi	105	4.5
Is-Saħħa	104	4.4
It-trasport	101	4.3
L-Affarijiet Soċjali	93	4.0
Edukazzjoni u Kultura	82	3.5
Oħrajn	1,043	44.3

2008
Temi	Għadd ta’ petizzjonijiet	Perċentwali
L-ambjent	311	12.8
Id-Drittijiet Fundamentali	208	8.6
Proprjetà u Restituzzjoni	149	6.1
Il-Ġustizzja	147	6.1
Is-Suq Intern	130	5.4
L-Affarijiet Soċjali	118	4.9
It-trasport	117	4.8
Is-Saħħa	116	4.8
Edukazzjoni u Kultura	105	4.3
L-Impjiegi	89	3.7
Oħrajn	938	38.6

Il-fatt li l-ambjent jirrappreżenta tħassib kostanti taċ-ċittadini Ewropej mhuwiex sorpriża. Il-leġiżlazzjoni Ewropea f’dan il-qasam hija mibnija fl-ispirtu tal-prinċipju ta’ sussidjarjetà u l-linja bejn il-kompetenzi nazzjonali u dawk tal-UE mhux dejjem tkun ċara għaċ-ċittadini li jduru fuq il-Parlament Ewropew għal assistenza kull darba li jħossu li l-awtoritajiet reġjonali jew nazzjonali ma jkunux qed jisimgħu. F’dan il-kuntest, il-Kumitat laqa’ b’sodisfazzjon il-Komunikazzjoni tal-Kummissjoni dwar l-implimentazzjoni tal-liġi ambjentali Ewropea (KUMM(2008)0773) bħala l-ewwel pass sabiex jiġu żgurati kontrolli ta’ infurzar aħjar f’dan il-qasam[1].

Fir-rigward tad-drittijiet fundamentali, għandha ssir distinzjoni bejn il-petizzjonijiet li jirrapportaw żball ġudizzjarju, nuqqas ta’ infurzar ta’ deċiżjonijiet tal-qrati nazzjonali jew ksur tad-dritt għall-ġustizzja u għal smigħ ġust fil-livell nazzjonali, fuq naħa waħda, u l-petizzjonijiet li jitolbu protezzjoni tad-drittijiet garantiti permezz tal-leġiżlazzjoni Ewropea u l-ġurisprudenza dwar is-suq intern, fuq in-naħa l-oħra.

Għalhekk, fl-2009 l-Kumitat approva d-Dokument ta’ Ħidma ta’ Diana Wallis dwar il-Komunikazzjoni tal-KE dwar “Żona ta' libertà, sigurtà u ġustizzja għas-servizz taċ-ċittadini” l-hekk imsejjaħ “Programm ta’ Stokkolma”. Dan jenfasizza għadd ta’ aspetti problematiċi żvelati mill-petizzjonanti, fosthom id-diffikultajiet li jħabbtu wiċċhom magħhom il-membri tal-familja minn pajjiż terz biex jiksbu dokumenti ta' residenza fil-pajjiż ta' residenza tagħhom (speċjalment fir-Renju Unit), l-interpretazzjonijiet differenti tad-Direttiva KE 2004/38 f’dak li jirrigwarda l-kriterji għall-kwalifikazzjoni għal residenza permanenti, problemi li jaffaċċjaw il-petizzjonanti fl-eżerċizzju tad-dritt ta’ votazzjoni tagħhom jew biex il-kwalifiki tagħhom jiġu rikonoxxuti. F’bosta okkażjonijiet, il-Kumitat irrakkomanda lill-petizzjonanti biex jagħmlu użu mis-SOLVIT, mekkaniżmu informali li jista’ jipprovdi soluzzjonijiet effiċjenti bi skadenzi stretti. Wieħed għandu jenfasizza li r-restrizzjonijiet relatati mal-protezzjoni tad-dejta jimpedixxu li l-Kumitat jidderiġi mill-ġdid dawn il-petizzjonijiet lejn is-SOLVIT u għalhekk jista' biss jagħti parir lill-petizzjonant dwar din il-kwistjoni. Għalhekk hija deċiżjoni tal-petizzjonant jekk jużahx jew le u jekk jinfurmax lill-Kumitat dwar l-eżitu tal-passi eventwali li jkun ħa mas-SOLVIT.

Jistgħu jiġu osservati bidliet żgħar ukoll fil-klassifika tal-petizzjonijiet skont il-lingwa: filwaqt li fl-2009, kif kien ġara fl-2008, il-Ġermaniż u l-Ingliż baqgħu iż-żewġ lingwi ewlenin użati mill-petizzjonanti, it-Taljan u l-Ispanjol qalbu posthom. Is-Sloven, il-Malti u l-Estonjan ikklassifikaw l-aħħar.

2009
Il-lingwa	Għadd ta’ petizzjonijiet	Perċentwali
Bil-Ġermaniż	548	28.5
Bl-Ingliż	343	17.8
Bl-Ispanjol	237	12.3
Bit-Taljan	203	10.6
Bil-Pollakk	116	6.0
Bir-Rumen	110	5.7
Bil-Franċiż	107	5.6
Oħrajn	260	13.5

2008
Il-lingwa	Għadd ta’ petizzjonijiet	Perċentwali
Bil-Ġermaniż	437	23.2
Bl-Ingliż	395	20.9
Bit-Taljan	222	11.8
Bl-Ispanjol	193	10.2
Bir-Rumen	155	8.2
Bil-Franċiż	131	6.9
Bil-Pollakk	101	5.4
Bil-Grieg	87	4.6
Oħrajn	165	8.7

Meta wieħed iqabbel skont in-nazzjonalità, il-Ġermaniżi baqgħu l-iktar petizzjonanti attivi, segwiti mill-Ispanjoli u t-Taljani (anke f’dawn l-istatistiċi, l-Ispanjoli u t-Taljani qalbu posthom apparagun mal-2008). Warajhom hemm il-petizzjonanti Rumeni, Pollakki u Brittanniċi. Fl-aħħar postijiet insibu ċ-ċittadini Ċeki, Estonjani u Lussemburgiżi li flimkien ressqu 11-il petizzjoni fl-2009.

2009
Nazzjonalità bl-akbar numru ta' petizzjonanti	Għadd ta’ petizzjonijiet	Perċentwali
Il-Ġermanja	496	25.8
Spanja	237	12.3
L-Italja	219	11.4
Ir-Rumanija	150	7.8
Il-Polonja	131	6.8
Ir-Renju Unit	121	6.3
Franza	79	4.1
Il-Greċja	78	4.1
Oħrajn	414	21.5

2008
Nazzjonalità bl-akbar numru ta' petizzjonanti	Għadd ta’ petizzjonijiet	Perċentwali
Il-Ġermanja	412	21.8
L-Italja	245	12.9
Spanja	197	10.4
Ir-Rumanija	189	10.0
Ir-Renju Unit	144	7.6
Il-Polonja	112	5.9
Il-Greċja	102	5.4
Franza	91	4.8
Oħrajn	400	21.1

F’dak li għandu x’jaqsam mal-format tal-petizzjonijiet, wieħed jista’ jitkellem dwar konferma: il-petizzjonanti għandhom iktar tendenza li jippreżentaw il-petizzjonijiet tagħhom permezz tal-Internet minflok fil-format ta' ittra tradizzjonali (62.6% tal-petizzjonijiet li waslu fl-2009 ntbagħtu bil-posta elettronika meta mqabbla ma’ 59.2% fl-2008).

2009
Format tal-petizzjoni	Għadd ta' petizzjonijiet	%
Posta elettronika	1,204	62.6
Ittra	720	37.4

2008
Format tal-petizzjoni	Għadd ta’ petizzjonijiet	%
Posta elettronika	1,117	59.2
Ittra	769	40.8

Minkejja li jirrappreżentaw strument utli li jippermetti li l-Kumitat jevalwa l-attività annwali tiegħu, l-istatistiċi għandhom jiġu interpretati bir-reqqa minħabba li hemm bosta elementi li x’aktarx jinfluwenzaw ir-riżultati ġenerali – i.e. il-petizzjonijiet jistgħu jikkonċernaw qasam wieħed jew bosta oqsma, pajjiż wieħed jew bosta pajjiżi; jistgħu jiġu ppreżentati minn individwi jew minn assoċjazzjonijiet u f’xi każijiet jistgħu jieħdu l-forma ta’ kampanji b’numru kbir ta’ firem; barra minn hekk, il-petizzjonanti jistgħu jagħżlu li jippreżentaw dokumenti fil-lingwa materna tagħhom jew fi kwalunkwe lingwa uffiċjali oħra tal-Unjoni.

Minkejja dan, l-istatistiċi juru li l-konklużjonijiet tar-rapporti annwali preċedenti għadhom validi. Għalhekk, kif diġà semmejna, il-fatt li l-maġġoranza tal-petizzjonijiet ġew dikjarati inammissibbli juri li għad hemm konfużjoni fir-rigward tal-kompetenzi Ewropej u nazzjonali, tal-istituzzjonijiet tal-UE u tal-Kunsill tal-Ewropa, b’mod partikulari l-Qorti tad-Drittijiet tal-Bniedem. Għaldaqstant, it-talbiet preċedenti biex jiżdiedu l-isforzi mmirati biex iċ-ċittadini jkunu infurmati aħjar dwar x’inhuwa l-proċess tal-petizzjonijiet u x’jista’ jinkiseb billi ssir petizzjoni lill-Parlament għadhom validi bħal qatt qabel.

Possibilità li tista’ tiġi esplorata tista’ tkun it-titjib tal-paġna tal-Internet iddedikata għall-Petizzjonijiet fil-portal tal-Parlament Ewropew sabiex iċ-ċittadini li jippreżentaw petizzjoni onlajn jirċievu l-informazzjoni neċessarja kollha dwar il-kompetenzi tal-Parlament, il-valutazzjoni tal-petizzjonijiet, il-ħidma tal-Kumitat u l-possibilitajiet li jinkiseb rimedju aktar mgħaġġel permezz ta’ netwerks oħrajn disponibbli għalihom fil-livell tal-UE jew f’dak nazzjonali (is-SOLVIT, in-Netwerk Ewropew tal-Konsumatur, l-Ombudsman Ewropew, l-Ombudsmen nazzjonali jew il-kumitati parlamentari nazzjonali għall-petizzjonijiet).

Ir-Rapporti preċedenti talbu li jkun hemm senjalazzjoni ċara tal-mekkaniżmi varji għall-ilmenti disponibbli għaċ-ċittadini fil-livell tal-UE billi jiġi stabbilit post wieħed fejn tista’ tinqeda minn kollox li jkun jista’ joffri gwida liċ-ċittadini meta jkunu qed ifittxu soluzzjonijiet għall-ksur allegat tad-drittijiet tagħhom. Dan għadu objettiv li importanti ħafna li jintlaħaq. L-inizjattiva tal-Kummissjoni Ewropea li tiġbor il-mekkaniżmi formali u informali għall-ilmenti fil-paġna Drittijietek tal-websajt europa.eu tirrapreżenta pass ‘il quddiem sinifikanti. Minkejja dan, għandha ssir distinzjoni ċara bejn il-mekkaniżmi formali (l-ilmenti lill-KE, il-petizzjonijiet lill-Parlament, l-ilmenti lill-Ombudsman Ewropew) u dawk informali (is-SOLVIT, l-ECC-Net, eċċ.). Tista’ tiġi żviluppata websajt iktar interattiva sabiex iċ-ċittadini jkunu jistgħu jiksbu l-informazzjoni li jeħtieġu qabel ma jieħdu d-deċiżjoni li jindirizzaw istituzzjoni jew oħra, jew li jużaw mekkaniżmu jew ieħor.

Ir-relazzjonijiet mal-Kummissjoni Ewropea

Il-Kummissjoni Ewropea għadha s-sieħba naturali tal-Kumitat fl-indirizzar tal-petizzjonijiet minħabba li l-Membri għadhom joqogħdu fuq il-kompetenzi tas-servizzi tagħha għall-investigazzjoni tal-kwistjonijiet imqajma fil-petizzjonijiet. Hekk kif ir-relazzjoni ta’ ħidma bejn iż-żewġ istituzzjonijiet kompliet titjieb, il-Kumitat qed ikompli jinsisti mal-Kummissjoni biex ittejjeb il-ħin ta’ reazzjoni tagħha għat-talbiet ta’ investigazzjonijiet. Aspett wieħed li għad irid jiġi indirizzat miż-żewġ partijiet jikkonċerna l-mod kif il-Kummissjoni tinforma lill-Kumitat dwar il-progress tal-proċedimenti ta’ ksur marbuta direttament mal-petizzjonijiet.

Filwaqt li l-Kummissjoni targumenta li d-deċiżjonijiet tagħha jiġu ppubblikati kull xahar, wieħed għandu jinnota li dawn jiġu ppubblikati mill-istadju tal-opinjoni mmotivata ‘l quddiem, ħlief fir-rigward tal-każijiet ta’ nuqqas ta’ konformità mad-deċiżjonijiet tal-Qorti, fejn il-pubblikazzjoni tiġi awtorizzata mill-istadju tal-ittra ta’ avviż formali, sakemm il-Kummissjoni ma tiddeċidix mod ieħor. Meta wieħed iqis in-numru ta’ każijiet, il-fatt li diffiċli li jiġi previst ir-ritmu tal-progress ta’ fajl partikulari u l-fatt li ma hemm l-ebda għodda ta’ tfittix li tippermetti li jinstab ksur speċifiku, il-monitoraġġ ta’ kull xahar ta’ din id-dejta jfisser ħela bla bżonn ta’ ħin u riżorsi umani. Għaldaqstant, għandhom jittieħdu passi oħra sabiex il-Kummissjoni tissenjala awtomatikament lill-Kumitat kull progress fil-każijiet ta' ksur relevanti għall-petizzjonijiet.

Ir-relazzjonijiet mal-Ombudsman Ewropew – Is-smigħ tal-kandidati għal din il-kariga

Waħda mill-prijoritajiet prinċipali tal-Kumitat fl-2009 kienet l-organizzazzjoni tas-smigħ tal-kandidati għall-kariga ta’ Ombudsman Ewropew. Il-Membri, li ħafna minnhom kienu ġodda kemm għall-Kumitat kif ukoll għall-Parlament, irnexxielhom iwettqu r-responsabilitajiet tagħhom b’suċċess.

Ta’ min wieħed isemmi li l-ewwel Rapport adottat mill-Kumitat il-ġdid kien jikkonċerna l-attività tal-Ombudsman Ewropew[2] fl-2008. Dan enfasizza li r-rwol tal-Ombudsman bħala protettur tal-interessi taċ-ċittadini Ewropej fir-relazzjonijiet tagħhom mal-istituzzjonijiet u l-korpi tal-Unjoni Ewropea evolva matul l-14-il sena minn meta ġiet stabbilita l-kariga, speċjalment bis-saħħa tal-indipendenza tal-istituzzjoni nnifisha u minħabba l-iskrutinju demokratiku tal-Parlament Ewropew fuq it-trasparenza tal-attivitajiet tiegħu.

Il-Membri enfasizzaw il-konvinzjoni tagħhom li r-rwol tal-Ombudsman kien jikkonsisti fit-tisħiħ tat-trasparenza u r-responsabilità fil-proċess tat-teħid ta’ deċiżjonijiet u fl-amministrazzjoni tal-Unjoni Ewropea, sabiex b’hekk issir kontribuzzjoni essenzjali favur Unjoni fejn id-deċiżjonijiet "jittieħdu bil-miftuħ kemm jista' jkun possibli u kemm jista' jkun qrib iċ-ċittadin"[3]. Huma talbu lill-Ombudsman biex ikompli l-isforzi tiegħu sabiex iqajjem kuxjenza dwar il-ħidma tiegħu u biex jippromwovi l-attivitajiet tiegħu b'mod effikaċi.

Konklużjonijiet

Jekk l-2009 kienet sena ta’ tranżizzjoni, jidher li l-2010 se tkun waħda mimlija sfidi għall-Kumitat. Il-Kummissjoni għandha tippreżenta l-abbozz ta’ regolament tagħha lill-Parlament Ewropew u lill-Kunsill dwar l-Inizjattiva taċ-Ċittadini u l-Kumitat se jipprovdi Opinjoni għar-Rapport li għandha tiġi abbozzata mill-Kumitat għall-Affarijiet Kostituzzjonali. Barra minn hekk, id-dħul fis-seħħ tat-Trattat ta’ Lisbona jfisser li l-Karta tad-Drittijiet Fundamentali saret legalment vinkolanti. F’dan l-istadju, huwa diffiċli li wieħed ibassar kif dan se jaffettwa l-attività tal-Kumitat, iżda d-drittijiet fundamentali huma fost it-temi invokati b’mod kostanti mill-petizzjonanti. X’aktarx ikun hemm bżonn ta' iktar kjarifiki dwar l-applikazzjoni tal-Karta fil-futur qarib.

ANNESSI:

Pajjiż ikkonċernat	2009			2008
	Għadd ta’ petizzjonijiet	Ammissibbli	Inammissibbli	Għadd ta’ petizzjonijiet	Ammissibbli	Inammissibbli
L-Unjoni Ewropea	403	341	61	330	286	43
Membri tal-UE	1,630			1,647
Il-Ġermanja	298	144	152	265	127	137
Spanja	279	196	83	226	151	74
L-Italja	176	110	66	184	97	86
Ir-Rumanija	143	46	97	207	70	136
Il-Polonja	100	27	72	105	26	79
Ir-Renju Unit	83	60	23	99	64	35
Il-Greċja	74	37	37	97	40	57
Franza	73	43	30	86	56	29
Il-Bulgarija	56	24	32	65	37	28
L-Irlanda	37	18	19	58	37	21
Il-Portugall	37	21	16	24	10	14
Il-Pajjiżi l-Baxxi	35	24	11	24	19	4
L-Awstrija	34	24	9	20	13	7
Il-Belġju	30	21	9	32	21	10
L-Ungerija	25	19	6	18	9	9
Il-Finlandja	20	7	13	36	9	27
Is-Slovakkja	19	5	14	9	3	6
L-Isvezja	17	7	10	12	6	6
Id-Danimarka	14	7	7	6	1	5
Il-Litwanja	14	7	7	7	2	5
Ċipru	13	8	5	9	3	6
Ir-Repubblika Ċeka	13	8	5	15	9	6
Is-Slovenja	12	2	10	7	2	5
Il-Latvja	11	4	7	7	3	4
Malta	9	6	3	21	16	5
L-Estonja	4	1	3	2	2	0
Il-Lussemburgu	4	3	1	6	4	2

Lingwa tal-petizzjonijiet	Għadd ta’ petizzjonijiet
	2009	2008
Bil-Ġermaniż	548	437
Bl-Ingliż	343	395
Bl-Ispanjol	237	193
Bit-Taljan	203	222
Bil-Pollakk	116	101
Bir-Rumen	110	155
Bil-Franċiż	107	131
Bil-Grieg	61	87
Bl-Olandiż	46	33
Bil-Bulgaru	37	31
Bil-Portugiż	27	26
Bil-Finlandiż	19	35
Bl-Ungeriż	16	15
Bis-Slovakk	11	5
Bid-Daniż	9	4
Bis-Svediż	8	6
Bil-Latvjan	7	2
Bil-Litwan	7	2
Biċ-Ċek	4	3
Bis-Sloven	4	2
Bil-Malti	2	0
Bl-Estonjan	1	1
test b’taħlita ta’ lingwi	1	0
Lingwa mhux definita	0	0
Total	1,924	1,886

Nazzjonalità bl-akbar numru ta' petizzjonanti	Għadd ta’ petizzjonijiet
	2009	2008
Membri tal-UE	1,879	1,845
Il-Ġermanja	496	412
Spanja	237	197
L-Italja	219	245
Ir-Rumanija	150	189
Il-Polonja	131	112
Ir-Renju Unit	121	144
Franza	79	91
Il-Greċja	78	102
Il-Bulgarija	54	60
Il-Pajjiżi l-Baxxi	44	33
L-Awstrija	38	21
Il-Portugall	32	25
L-Irlanda	31	59
Il-Belġju	27	31
Il-Finlandja	26	40
L-Ungerija	17	20
Is-Slovakkja	14	8
Id-Danimarka	13	5
L-Isvezja	13	10
Il-Latvja	11	5
Malta	11	16
Is-Slovenja	10	5
Ċipru	8	1
Il-Litwanja	8	5
Ir-Repubblika Ċeka	6	6
L-Estonja	3	1
Il-Lussemburgu	2	2

• [1]  Opinjoni tal-Kumitat għall-Petizzjonijiet dwar il-monitoraġġ tal-applikazzjoni tal-liġi Komunitarja (2007) (2008/2337(INI) - Rapporteur Diana Wallis (31.03.2009)
• [2]  Rapport dwar ir-rapport annwali dwar l-attivitajiet tal-Ombudsman Ewropew fl-2008 (2009/2088 (INI)), ta’ Chrysoula Paliadeli (A7/0020/2009).
• [3]  Titolu I, Artikolu 1, paragrafu 2, tat-Trattat dwar il-Funzjonament tal-Unjoni (C115/ 9.05.2008, p .0016).

RIŻULTAT TAL-VOTAZZJONI FINALI FIL-KUMITAT

Data tal-adozzjoni	1.6.2010
Riżultat tal-votazzjoni finali	+: –: 0:	20 0 2
Membri preżenti għall-votazzjoni finali	Margrete Auken, Elena Băsescu, Victor Boştinaru, Simon Busuttil, Michael Cashman, Bairbre de Brún, Pascale Gruny, Carlos José Iturgaiz Angulo, Peter Jahr, Lena Kolarska-Bobińska, Erminia Mazzoni, Willy Meyer, Mariya Nedelcheva, Nikolaos Salavrakos, Angelika Werthmann, Tatjana Ždanoka
Sostitut(i) preżenti għall-votazzjoni finali	Pablo Arias Echeverría, Kinga Göncz, Marian Harkin, Axel Voss
Sostitut(i) (skont l-Artikolu 187(2)) preżenti għall-votazzjoni finali	Enrique Guerrero Salom, Andres Perello Rodriguez