RAPPORT dwar l-integrazzjoni soċjali tan-nisa li jappartjenu għal gruppi ta' minoranza etnika

30.6.2010 - (2010/2041(INI))

Kumitat għad-Drittijiet tan-Nisa u l-Ugwaljanza bejn is-Sessi
Rapporteur: Antonyia Parvanova

MOZZJONI GĦAL RIŻOLUZZJONI TAL-PARLAMENT EWROPEW

dwar l-integrazzjoni soċjali tan-nisa li jappartjenu għal gruppi ta' minoranza etnika

(2010/2041(INI))

Il-Parlament Ewropew,

–   wara li kkunsidra l-Artikoli 2 u 3 tat-TUE,

–   wara li kkunsidra t-Tieni Parti tat-TFUE li tistipula l-obbligu tal-Unjoni Ewropea li tiġġieled id-diskriminazzjoni,

–   wara li kkunsidra d-Direttiva tal-Kunsill 2000/43/KE tad-29 ta' Ġunju 2000 li timplimenta l-prinċipju tat-trattament ugwali bejn il-persuni irrespettivament mill-oriġini tar-razza jew etniċità[1], id-Direttiva tal-Kunsill 2000/78/KE tas-27 ta’ Novembru 2000 li tistabbilixxi qafas ġenerali għall-ugwaljanza fit-trattament fl-impjieg u fix-xogħol[2], id-Direttiva 2006/54/KE tal-Parlament Ewropew u tal-Kunsill tal-5 ta' Lulju 2006 dwar l-implimentazzjoni tal-prinċipju ta’ opportunitajiet indaqs u ta’ trattament ugwali tal-irġiel u n-nisa fi kwistjonijiet ta’ impjiegi u xogħol (tfassil mill-ġdid)[3] u d-Direttiva tal-Kunsill 2004/113/KE tat-13 ta' Diċembru 2004 li timplimenta l-prinċipju ta’ trattament ugwali bejn l-irġiel u n-nisa fl-aċċess għal u l-provvista ta' merkanzija u servizzi[4],

–   wara li kkunsidra l-Karta tad-Drittijiet Fundamentali tal-Unjoni Ewropea, b’mod partikolari l-Artikolu 21,

–   wara li kkunsidra d-Dikjarazzjoni Universali tad-Drittijiet tal-Bniedem[5], il-Konvenzjoni tan-NU għall-Eliminazzjoni ta' Kull Forma ta' Diskriminazzjoni kontra n-Nisa (CEDAW)[6] u d-Dikjarazzjoni tan-NU dwar id-Drittijiet ta' Persuni li jappartjenu lil Minoranzi Nazzjonali, Etniċi, Reliġjużi u Lingwistiċi[7],

–   wara li kkunsidra l-Konvenzjoni Ewropea għall-Protezzjoni tad-Drittijiet tal-Bniedem u l-Libertajiet Fundamentali (KEDB),

–   wara li kkunsidra l-Programm ta' Stokkolma[8],

–   wara li kkunsidra l-Istrateġija ta' Lisbona u l-Istrateġija UE 2020, li qed tiġi żviluppata bħalissa,

–   wara li kkunsidra d-Deċiżjoni Nru 1350/2007/KE tal-Parlament Ewropew u tal-Kunsill tat-23 ta’ Ottubru 2007 li tistabbilixxi t-tieni programm ta’ azzjoni Komunitarja fil-qasam tas-saħħa (2008-2013)[9],

–   wara li kkunsidra r-riżoluzzjoni tiegħu tal-1 ta' Ġunju 2006 dwar il-qagħda tan-nisa Roma fl-Unjoni Ewropea[10],

–   wara li kkunsidra r-riżoluzzjoni tiegħu tas-27 ta' Settembru 2007 dwar it-trattament ugwali bejn il-persuni irrispettivament mill-oriġini tar-razza jew l-etniċità[11],

–   wara li kkunsidra r-riżoluzzjoni tiegħu tal-24 ta' Ottubru 2006 dwar l-immigrazzjoni tan-nisa: ir-rwol u l-post tal-immigranti nisa fl-Unjoni Ewropea[12],

–   wara li kkunsidra r-riżoluzzjoni tiegħu tal-14 ta' Jannar 2009 dwar il-qagħda tad-drittijiet fundamentali fl-Unjoni Ewropea 2004-2008[13],

–   wara li kkunsidra r-riżoluzzjoni tiegħu tas-6 ta' Mejju 2009 dwar l-inklużjoni attiva tal-persuni esklużi mis-suq tax-xogħol[14],

–   wara li kkunsidra r-riżoluzzjoni tiegħu tal-10 ta' Frar 2010 dwar l-ugwaljanza bejn in-nisa u l-irġiel fl-Unjoni Ewropea – 2009[15],

–   wara li kkunsidra l-Artikolu 48 tar-Regoli ta' Proċedura tiegħu,

–   wara li kkunsidra r-rapport tal-Kumitat għad-Drittijiet tan-Nisa u l-Ugwaljanza bejn is-Sessi (A7–0221/2010),

A. billi t-Trattat dwar l-Unjoni Ewropea u l-Karta tad-Drittijiet Fundamentali tal-Unjoni Ewropea jistipulaw il-valuri li fuqhom hija msejsa l-Unjoni Ewropea, iżda billi fil-prattika mhux in-nies kollha li joqogħdu fl-Unjoni Ewropea qed jibbenefikaw bis-sħiħ mill-Karta tad-Drittijiet Fundamentali, speċjalment in-nisa li jappartjenu għal gruppi etniċi minoritarji, inklużi dawk li huma vittmi tal-vjolenza, tat-traffikar u tal-faqar; billi, barra minn hekk, dawn il-valuri huma komuni għas-soċjetajiet tal-Istati Membri fejn jipprevalu l-pluraliżmu, in-nondiskriminazzjoni, it-tolleranza, il-ġustizzja, is-solidarjetà u l-ugwaljanza bejn in-nisa u l-irġiel,

B.  billi l-Artikolu 21 tal-Karta tad-Drittijiet Fundamentali tal-Unjoni Ewropea jipprojbixxi kull diskriminazzjoni bbażata fuq l-appartenenza għal minoranza nazzjonali; billi, madankollu, diversi komunitajiet ta' minoranzi etniċi li joqogħdu fl-UE għadhom vittmi tad-diskriminazzjoni, l-esklużjoni soċjali u s-segregazzjoni,

C. billi t-trattament indaqs huwa dritt bażiku, mhux privileġġ, taċ-ċittadini kollha, u billi t-tolleranza għandha tkun attitudni ġenerali fil-ħajja, mhux pjaċir li jsir lil xi wħud; billi kull forma ta' diskriminazzjoni trid tkun miġġielda b'intensità pari,

D. billi n-nisa ta' minoranza etnika huma żvantaġġati mhux biss meta mqabbla man-nisa tal-maġġoranza, iżda wkoll meta mqabbla mal-irġiel ta' minoranza etnika,

E.  billi approċċ integrat tal-UE huwa kruċjali għal politika koerenti dwar l-inklużjoni soċjali tan-nisa minn minoranzi etniċi, li jkun jinkludi miżuri li jiġġieldu kontra d-diskriminazzjoni u jgħinu biex jipprovdu aċċess għad-djar, l-impjiegi, l-edukazzjoni, il-kura tas-saħħa u s-servizzi soċjali u jrawmu r-rispett għad-drittijiet fundamentali,

F.  billi m'hemm l-ebda definizzjoni legali aċċettata minn kulħadd ta’ gruppi etniċi minoritarji ; billi l-prinċipji ta' opportunitajiet indaqs u trattament ugwali bbażati fuq ir-rispett reċiproku, il-fehim u l-aċċettazzjoni għandhom ikunu s-sisien tal-politiki tal-UE għall-abitanti kollha tagħha, irrispettivament mill-oriġini tagħhom,

G. billi l-aċċess indaqs għal kulħadd għal edukazzjoni ta' kwalità ttejjeb l-inklużjoni fis-suq tax-xogħol u l-kwalità tal-ħajja b’mod ġenerali; billi, madankollu, f'xi Stati Membri l-popolazzjonijiet ta’ minoranzi etniċi huma esklużi minn parteċipazzjoni sħiħa u indaqs fis-sistemi edukattivi ġenerali; billi, biex ikun żgurat l-iżvilupp ta' soċjetà demokratika u b’moħħha miftuħ fi ħdan l-UE, is-sistemi edukattivi jridu jittrasmettu valuri ta' tolleranza u ugwaljanza,

H. billi l-politiki ta' integrazzjoni għal ċittadini ta' pajjiżi terzi jibbenefikaw minn perspettiva tas-sessi aktar b’saħħitha, li hija meħtieġa sabiex ikun żgurat li jitqiesu l-ħtiġijiet speċifiċi ta' nisa li jappartjenu għal gruppi etniċi minoritarji,

I.   billi l-politiki u l-leġislazzjoni tal-immigrazzjoni u tal-asil għandhom jippromwovu l-inklużjoni ta’ nisa li jappartjenu għal gruppi etniċi minoritarji,

J.   billi jinħtieġ approċċ immirat għall-inklużjoni soċjali tan-nisa li jappartjenu għal minoranzi etniċi biex jiġu evitati d-diskriminazzjoni multipla, l-isterjotipar, l-istigmatizzazzjoni u s-segregazzjoni etnika,

K. billi d-differenzi fil-kultura, fit-tradizzjoni u /jew fir-reliġjon m'għandhomx iservu ta’ ostakli għall-inklużjoni ta’ nisa li jappartjenu għal gruppi etniċi minoritarji,

L.  billi l-ġbir ta' data diżaggregata huwa prerekwiżit għall-ħarsien u l-promozzjoni tad-drittijiet tal-bniedem tan-nisa u tal-minoranzi etniċi, u billi, minħabba n-nuqqas ta' statistiki, ħafna problemi għadhom ma jistgħux jiġu identifikati, li jfisser li ma tiġi adottata l-ebda politika mmirata,

M. billi teżisti firxa wiesgħa ta' strumenti u politiki xierqa disponibbli għall-iżgurar tal-integrazzjoni tan-nisa li jappartjenu għal gruppi etniċi minoritarji , iżda billi hemm differenza fl-implimentazzjoni fil-livell nazzjonali u nuqqas ta' koordinazzjoni fil-livell tal-UE,

N. billi fil-maġġoranza tal-każijiet, in-nisa li jappartjenu għal gruppi etniċi minoritarji jiffaċċjaw diskriminazzjoni multipla u huma aktar vulnerabbli għall-esklużjoni soċjali u għall-faqar u għal ksur estrem tad-drittijiet tal-bniedem bħat-traffikar tal-bnedmin u l-isterilizzazzjoni sfurzata mill-bqija tan nisa u mill-irġiel ta' gruppi minoritarji,

O. billi l-istatus soċjoekonomiku aktar baxx ta’ ħafna nisa ta' minoranzi etniċi fil-prattika jissarraf f’limitazzjonijiet tal-eżerċizzju tad-drittijiet fundamentali tagħhom, f’nuqqas ta’ aċċess għar-riżorsi, inklużi r-riżorsi tas-saħħa riproduttiva u dik sesswali, u jagħmel il-proċess ta’ inklużjoni aktar diffiċli,

P.  billi l-istatus tas-saħħa tan-nisa jaffettwa mhux biss is-saħħa tagħhom stess iżda wkoll dak ta' wliedhom,

Q. billi l-parteċipazzjoni attiva tan-nisa fis-soċjetà u l-inklużjoni b'suċċess tagħhom se jkollhom effett pożittiv fuq it-tfal tagħhom u fuq il-ġenerazzjonijiet futuri,

R.  billi l-esklużjoni soċjali tan-nisa li jappartjenu għal minoranzi etniċi tista' twassal għal diffikultajiet fir-rigward tal-indipendenza ekonomika, li jistgħu jirriżultaw fi spejjeż diretti jew indirettai għall-baġits tal-komunità u pubbliċi,

S.  billi n-nisa minn gruppi etniċi minoritarji huma aktar vulnerabbli għal forom differenti ta' vjolenza u sfruttament min-naħa tal-irġiel meta jkunu inqas integrati mill-bqija tan-nisa,

T.  billi l-inklużjoni soċjali tibbenefika kieku kellhom isiru aktar konsultazzjonijiet regolari man-nisa li jappartjenu għal gruppi etniċi minoritarji fil-livell lokali, reġjonali, nazzjonali u tal-UE,

1.  Jenfasizza li ma hemm l-ebda definizzjoni legali aċċettata minn kulħadd għal gruppi etniċi minoritarji , u li dan il-kunċett ikopri medda wiesgħa ta' sitwazzjonijiet li jiffaċċjaw gruppi etniċi differenti fl-Istati Membri tal-UE;

2.  Iħeġġeġ lill-Kummissjoni u lill-Istati Membri biex, b’kollaborazzjoni mal-organizzazzjonijiet mhux governattivi u l-gruppi tas-soċjetà ċivili, jipprovdu għall-ġbir u l-analiżi regolari ta' data diżaggregata skont is-sessi u l-etniċità, skont ir-regoli tal-Istati Membri dwar il-protezzjoni tad-data relatata ma’ kwistjonijiet relatati mal-inklużjoni soċjali, bħall-aċċess għall-edukazzjoni, għass-suq tax-xogħol, għas-sigurtà soċjali, għas-sistema tas-saħħa u għas-sistema tad-djar;

3.  Hu tal-fehma li hu importantissmu li l-leġiżlazzjoni eżistenti tiġi implimentata f'waqtha, u għaldaqstant li jiġu trasposti d-direttivi fl-Istati Membri; hu tal-fehma li koordinazzjoni aktar strutturata tal-politiki tal-UE, nazzjonali, reġjonali u lokali dwar il-gruppi etniċi minoritarji hi meħtieġa sabiex jinkiseb impatt dejjiemi u politiki aħjar fil-livell tal-UE u l-livell nazzjonali, reġjonali u lokali, u jħeġġeġ lil dawk li jfasslu l-politika fil-livelli kollha biex jikkonsultaw lin-nisa li qed jintlaqtu d-drittijiet tagħhom, flimkien mal-komunitajiet u l-organizzazzjonijiet attivi f’dan il-qasam, dwar il-politiki u l-miżuri intenzjonati biex itejbu l-inklużjoni soċjali tan-nisa li jappartjenu għal gruppi etniċi minoritarji;

4.  Jenfasizza l-importanza tal-edukazzjoni dwar l-aċċettazzjoni tal-kulturi differenti u l-impatt tad-diskriminazzjoni u l-preġudizzju; jinnota li r-responsabilità għall-inklużjoni effettiva hi kemm tal-minoranzi etniċi kif ukoll tal-popolazzjoni ġenerali, li t-tnejn li huma jridu jagħmlu sforz biex jintegraw ma’ xulxin għall-kisba tal-għaqda soċjali;

5.  Jistieden lill-Kummissjoni u lill-Istati Membri biex jadottaw miżuri bl-għan li jevitaw li n-nisa li jappartjenu lil minoranzi etniċi jitilfu l-ħiliet tagħhom, billi jipprovdu aċċess aħjar għas-suq tax-xogħol, inkluż aċċess għal kura tat-tfal bi prezzijiet raġonevoli u ta’ kwalità għolja, u billi jiżguraw aċċess għall-edukazzjoni, it-taħriġ u t-taħriġ vokazzjonali; jitlob għall-implimentazzjoni effettiva ta’ politiki mmirati lejn nisa li jappartjenu għal gruppi etniċi minoritarji u li jiġu introdotti proċeduri ċari u b’ħeffa għar-rikonoxximent tal-ħiliet u tal-kwalifiki;

6.  Jinnota l-importanza tal-mudelli tal-irwol fl-integrazzjoni, u jappoġġja l-iskambju tal-aħjar prattiki mill-Istati Membri b’aktar esperjenza fil-prevenzjoni tal-esklużjoni soċjali; iħeġġeġ lil dawk li jfasslu l-politika fil-livell tal-UE u dak nazzjonali, reġjonali u lokali biex jikkonsultaw mal-organizzazzjonijiet tan-nisa minn minoranzi etniċi dwar il-politiki u l-miżuri indirizzati lejn l-inklużjoni soċjali tan-nisa minn minoranzi etniċi; iħeġġeġ lill-Kummissjoni u lill-Istati Membri biex jipproponu miżuri mfassla biex jippromwovu l-eżistenza ta' medjaturi interkulturali u soċjokulturali fi ħdan l-UE;

7.  Hu tal-fehma li l-proċess ta' inklużjoni jrid jinbena minn stadju bikri fil-ħajja, sabiex jipprovdi b'mod effettiv alternattivi għall-faqar u l-esklużjoni soċjali; iqis għalhekk li huwa neċessarju li jkun ipprovdut qafas istituzzjonali għal servizzi soċjali u edukattivi bbażati fil-komunità għat-tfal u l-familji li jissodisfaw il-ħtiġijiet reġjonali u personali, b'mod li jkun iggarantit l-aċċess ugwali għal servizzi ta' kwalità għolja, u jistieden lill-Kummissjoni, għalhekk, biex tipprovdi appoġġ partikolari għal programmi għall-inklużjoni bikrija;

8.  Jistieden lill-Kummissjoni biex tikkunsidra li twessa' l-opportunitajiet ta' finanzjament tal-UE mill-Fond Soċjali Ewropew u mill-Fond Ewropew għall-Integrazzjoni u tagħtihom attenzjoni aktar strateġika sabiex ikollhom rwol fl-integrazzjoni u fir-riintegrazzjoni ta' nisa minn minoranzi etniċi fis-suq tax-xogħol, b'mod partikolari fi żminijiet ta' kriżi ekonomika; jenfasizza l-importanza li ssir distinzjoni bejn gruppi migranti u gruppi etniċi minoritarji fil-kuntest tal-Fond Ewropew għall-Integrazzjoni, u jħeġġeġ lill-Kummissjoni sabiex tiżviluppa miżuri li jagħmlu l-finanzjament tal-UE disponibbli aktar faċilment għan-nisa minn minoranzi etniċi;

9.  Jistieden lill-Kummissjoni - permezz tal-Fond Soċjali Ewropew u l-Fond Ewropew ta' Integrazzjoni - u lill-Istati Membri - permezz ta' fondi soċjali nazzjonali - biex jippromwovu opportunitajiet intraprenditorjali mmirati speċifikament lejn in-nisa minn gruppi etniċi minoritarji , billi jiffaċilitaw seminars u workshops dwar l-intraprenditorija u jirriklamaw proġetti għall-iżvilupp;

10. Jistieden lill-Kummissjoni u l-Istati Membri sabiex, f’kollaborazzjoni mal-organizzazzjonijiet mhux governattivi, iwettqu kampanji ta' sensibilizzazzjoni mmirati lejn in-nisa minn minoranzi etniċi kif ukoll lejn il-pubbliku ġenerali, u sabiex jiżguraw l-implimentazzjoni sħiħa tad-dispożizzjonijiet rilevanti sabiex jiġġieldu kontra d-drawwiet kulturali diskriminatorji u l-mudelli ta’ mġiba patrijarkali, sabiex jipprevjenu l-polarizzazzjoni u jittrattaw l-isterjotipi sessisti prevalenti u l-istigmatizzazzjoni soċjali li fuqhom hi msejsa l-vjolenza kontra n-nisa, u biex jiżguraw li ma jkun hemm ebda ġustifikazzjoni għall-vjolenza fuq bażi ta' drawwiet, tradizzjonijiet jew kunsiderazzjonijiet reliġjużi;

11. Jenfasizza li jinħtieġu aktar riċerka u indikaturi intersettorjali dwar l-impatt tad-diskriminazzjoni u l-esklużjoni soċjali fuq in-nisa li jappartjenu għal komunitajiet ta' minoranza etnika fi ħdan l-UE bħala bażi għal politiki ta' integrazzjoni mmirati; f'dan ir-rigward iħeġġeġ lill-Kummissjoni, speċjalment lid-DĠ Riċerka, biex tiffinanzja proġetti ta' riċerka bħal dawn;

12. Iħeġġeġ il-parteċipazzjoni politika u soċjali attiva ta' nisa li jappartjenu għalgruppi etniċi minoritarji fl-oqsma kollha tas-soċjetà, inklużi t-tmexxija politika, l-edukazzjoni u l-kultura biex jiġi miġġieled il-fatt li attwalment in-nisa mhumiex rappreżentati biżżejjed;

13. Isemmi l-fatt li l-għoti tas-saħħa ekonomika lin-nisa u l-indipendenza ekonomika tagħhom huma fatturi kruċjali biex tkun żgurata l-parteċipazzjoni sħiħa tagħhom fis-soċjetà ġenerali/usa';

14. Jistieden lill-Istati Membri jirrispettaw id-drittijiet fundamentali tan-nisa kollha, inklużi n-nisa minn minoranzi etniċi, u b'mod partikolari l-aċċess tagħhom għall-kura tas-saħħa, il-ġustizzja, l-għajnuna legali, it-tagħrif legali u d-djar;

15. Iħeġġeġ lill-Kummissjoni, lill-Istati Membri u lill-awtoritajiet reġjonali u lokali biex jagħmlu sforzi attivi biex itejbu u jiffaċilitaw l-aċċess għall-edukazzjoni, b'enfasi partikulari fuq it-tagħlim tal-lingwi, speċjalment il-lingwi uffiċjali tal-pajjiż, u l-aċċess għat-tagħlim tul il-ħajja u l-edukazzjoni għolja, għan-nisa u l-bniet li jappartjenu għal minoranzi etniċi sabiex jevitaw differenzi bejn is-sessi fil-livelli tal-edukazzjoni, li jistgħu jwasslu għall-esklużjoni mis-suq tax-xogħol u għall-faqar;

16. Jenfasizza li n-nisa minn minoranzi etniċi jeħtieġu aċċess għal tagħrif dwar il-kura tas-saħħa f'lingwi differenti; jisħaq fuq l-importanza tat-taħriġ interkulturali għall-fornituri tal-kura tas-saħħa, bi sħubija mal-gruppi tan-nisa tal-minoranzi etniċi;

L-ugwaljanza bejn is-sessi

17. Iħeġġeġ lill-Kummissjoni sabiex tqis l-aspett tas-sessi meta tieħu deċiżjonijiet dwar politiki u miżuri mmirati lejn l-inklużjoni soċjali;

18. Jistieden lill-Istati Membri jieħdu miżuri sabiex jiżguraw aċċess għal servizzi ta' appoġġ għall-prevenzjoni ta’ vjolenza bbażata fuq is-sessi u li jipproteġu n-nisa minn vjolenza tali, independentement mill-istatus legali, ir-razza, l-età, l-orjentament sesswali, l-oriġini etnika u r-reliġjon tagħhom;

19. Jistieden lill-Kummissjoni u lill-Istati Membri biex jiżguraw li l-leġiżlazzjoni eżistenti tal-ugwaljanza bejn is-sessi u kontra diskriminazzjoni tiġi implimentata b'mod sħiħ, billi tagħmel disponibbli riżorsi għal taħriġ iffukat u miżuri ta' sensibbilizzazzjoni dwar id-drittijiet li diġà għandhom in-nisa li jappartjenu għal minoranzi etniċi, u l-modi ta' kif dawn jistgħu jsibu rimedju għal kwalunkwe ksur tad-drittijiet tagħhom;

20. Jistieden lill-Istati Membri sabiex jiżguraw il-protezzjoni ta' vittmi ta' diskriminazzjoni multipla, li grupp kbir minnhom jikkonsisti f'nisa minn minoranzi etniċi, billi jżidu klawżoli espliċiti u regolamenti vinkolanti dwar diskriminazzjoni multipla fis-sistema legali;

21. Jinsisti fuq l-involviment attiv tal-Istitut Ewropew għall-Ugwaljanza tas-Sessi fil-ġbir ta' data u fit-twettiq ta' riċerka dwar kwistjonijiet ta' integrazzjoni rigward in-nisa ta' minoranzi etniċi, li b'mod konsistenti japplikaw il-prinċipju tal-integrazzjoni tal-ugwaljanza bejn l-irġiel u n-nisa (gender mainstreaming) u jippromwovu l-prijoritajiet fil-qasam tal-inklużjoni soċjali;

22. Jistieden lill-Aġenzija tad-Drittijiet Fundamentali biex tinkludi perspettiva transverali tal-ugwaljanza bejn is-sessi u tad-drittijiet tan-nisa fl-aspetti kollha tal-qafas multiannwali u l-attivitajiet sussegwenti tagħha, inklużi dawk dwar id-diskriminazzjoni etnika u dwar id-drittijiet fundamentali tar-Roma;

23. Jistieden lill-Istitut Ewropew għall-Ugwaljanza tas-Sessi biex b'mod sistematiku jiġbor data diżaggregata skont is-sess u l-etniċità kif ukoll elementi oħra, u li jippreżenta r-riżultati b’mod diżaggregat skont is-sess u l-etniċità; jenfasizza l-ħtieġa ta' mekkaniżmi ta' ġbir ta' data u ta' protezzjoni tad-data adegwati biex jiżguraw li ma jkunx hemm użu ħażin tagħha għal skopijiet bħall-ħolqien ta’ profili razzjali;

24. Isemmi r-rwol kruċjali tal-korpi nazzjonali tal-ugwaljanza biex jipprovdu appoġġ u assistenza lill-vittmi ta' diskriminazzjoni u biex jinformawhom dwar id-drittijiet u l-obbligi tagħhom; jistieden lill-Istati Membri biex jiżguraw li l-korpi nazzjonali għall-ugwaljanza jkunu effiċjenti u indipendenti u jipprovdulhom riżorsi finanzjarji u umani suffiċjenti għal kull tip ta' diskriminazzjoni, flimkien mad-diskriminazzjoni multipla; jistieden lill-korpi nazzjonali għall-ugwaljanza biex jiżviluppaw għodda u taħriġ dwar id-diskriminazzjoni multipla, inkluża s-sitwazzjoni speċifika tan-nisa li jappartjenu għal gruppi etniċi minoritarji;

25. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

• [1]  ĠU L 180, 19.7.2000, p. 22.
• [2]  ĠU L 303, 2.12.2000, p. 16.
• [3]  ĠU L 204, 26.7.2006, p. 23.
• [4]  ĠU L 373, 21.12.2004, p. 37.
• [5]  Adottata permezz tar-riżoluzzjoni 217A (III) tal-Assemblea Ġenerali tal-10 ta' Diċembru 1948.
• [6]  Adottata permezz tar-riżoluzzjoni 34/180 tal-Assemblea Ġenerali tat-18 ta' Diċembru 1979.
• [7]  Adottata permezz tar-riżoluzzjoni 47/135 tal-Assemblea Ġenerali tat-18 ta' Diċembru 1992.
• [8]  Dokument Nru 5731/10 tal-Kunsill tal-Unjoni Ewropea tat-3 ta' Marzu 2010.
• [9]  ĠU L 301, 20.11.2007, p. 3.
• [10]  ĠU C 298E, 8.12.2006, p. 283.
• [11]  ĠU C 219E, 28.8.2008, p. 317.
• [12]  ĠU C 313E, 20.12.2006, p. 118.
• [13]  ĠU C 46E, 24.2.2010, p. 48.
• [14]  Testi adottati ta’ dik id-data, P6_TA(2009)0371
• [15]  Testi adottati ta’ dik id-data, P7_TA(2010)0021.

NOTA SPJEGATTIVA

Introduzzjoni

Dan ir-rapport għandu l-għan li jevalwa l-politiki ta' integrazzjoni soċjali fl-UE għan-nisa li jappartjenu għal minoranzi etniċi u biex jenfasizza fejn dawn qed jiffunzjonaw u fejn hemm il-problemi, biex jgħin sabiex tinstab soluzzjoni.

Sabiex iqis it-temi koperti fit-titlu ta' dan ir-rapport, qed jiġu kkunsidrati tliet aspetti ewlenin:

1. Ir-rwol tal-politiki ta' integrazzjoni fl-Unjoni Ewropea

2. Ir-rwol tan-nisa fil-minoranzi etniċi

3. Il-politika tal-ugwaljanza bejn is-sessi

Aħna ngħixu f'soċjetà multikulturali, li tinkludi bosta komunitajiet kulturali, etniċi u reliġjużi distinti. Għal integrazzjoni effettiva, għandhom jiġu rikonċiljati bżonnijiet u talbiet differenti, li xi kultant anke jkunu f'kunflitt ma' xulxin. Għalhekk, huwa kruċjali li jiġu identifikati dawk it-talbiet u jinstabu l-modi li dawn jiġu rikonċiljati sabiex jissodisfaw l-aspirazzjonijiet legali ta' nisa li jappartjenu għal minoranzi etniċi mingħajr ma jitilfu l-għaqda u l-kontinwità tal-grupp etniku tagħhom.

1. Ir-rwol tal-politiki ta' integrazzjoni fl-Unjoni Ewropea

L-integrazzjoni soċjali tista' tiftiehem li tassigura l-aċċess għar-riżorsi, il-parteċipazzjoni u s-sens ta' appartenenza. Il-politika ta' integrazzjoni soċjali tistabbilixxi l-kundizzjonijiet li jaffettwaw b'mod wiesa' l-kapaċità li persuna tlaħħaq mal-problemi u mal-ostakoli, il-parteċipazzjoni u l-aċċess, u l-ħolqien ta' sens ta' appartenenza. Il-politika tal-integrazzjoni soċjali tinkludi mhux biss strumenti leġiżlattivi, iżda wkoll firxa wiesgħa ta' attivitajiet amministrattivi u volontarji.

M'hemm l-ebda politika legalment vinkolanti tal-UE dwar l-integrazzjoni soċjali fl-Unjoni Ewropea, prinċipalment minħabba li l-integrazzjoni hi r-responsabbiltà tal-Istati Membri. Madankollu, il-politika tal-integrazzjoni saret dejjem aktar importanti fil-livell tal-UE u hemm sforzi sabiex jiġi żviluppat approċċ komuni għall-integrazzjoni fi ħdan qafas Ewropew koerenti. Il-Kummissjoni tenfasizza li l-integrazzjoni ssir saħansitra aktar importanti meta l-aspetti ekonomiċi u soċjali tal-fatt li l-popolazzjoni qed tixjieħ isiru aktar sinjifikanti, u tirreferi b'mod espliċitu għan-nisa migranti u minn minoranzi etniċi bħala grupp li fuqu hija mmirata l-politika tal-integrazzjoni.

L-integrazzjoni fi ħdan l-Istati Membri tal-Unjoni Ewropea għandha tiġi kkunsidrata mill-perspettiva taċ-ċittadinanza Ewropea. Għandu jiġi enfasizzat li l-istruttura tal-UE hija bbażata fuq iċ-ċittadinanza u l-prinċipju ta' opportunitajiet indaqs u n-nuqqas ta' diskriminazzjoni. Madankollu, dawn ir-regoli u prinċipji tal-UE huma applikati biss, fil-maġġoranza tal-każijiet, għaċ-ċittadini tal-UE li fl-istess ħin huma ċittadini tal-Istati Membri. Fid-dawl ta' dan ir-rapport, dan ifisser li l-minoranzi li huma ssetiljati u kisbu status legali ta' ċittadini huma protetti mir-regoli u l-prinċipji tal-Unjoni Ewropea. Imma xi ngħidu dwar in-nies li jkunu waslu fl-UE relattivament reċenti, jiġifieri l-migranti, u li jkun għadhom ma sarux ċittadini ta' xi wieħed mill-Istati Membri? Dawn mhumiex protetti mill-istrumenti tal-UE, bħall-Artikolu 19 tat-TFUE (dak li qabel kien l-Artikolu 13 tat-TKE), id-Direttiva tal-Kunsill 2000/43/KE li timplimenta l-prinċipju tat-trattament ugwali bejn il-persuni irrespettivament mill-oriġini tar-razza jew etniċità. Hemm ċerti drittijiet konferiti lilhom mill-istrumenti tal-UE relatati mal-immigrazzjoni fir-rigward ta' oqsma bħas-suq tax-xogħol, drittijiet soċjali, u l-integrazzjoni legali.Madankollu, għadha ma ġietx stabbilita politika konsistenti tal-UE dwar l-integrazzjoni tal-migranti. Barra minn hekk, in-nisa migranti (kif ukoll in-nisa li jappartjenu għal minoranzi stabbiliti) huma protetti permezz tal-prinċipji ġenerali u tal-istrumenti legali tal-liġi internazzjonali. Iżda l-kwistjoni hija jekk dan hux biżżejjed u jekk għandhiex tittieħed azzjoni ulterjuri fil-livell tal-UE jew le.

Meta nqisu dak li semmejna hawn fuq naraw li jeħtieġ noqgħodu attenti għad-differenzi possibbli bejn minoranzi stabbiliti jew tradizzjonali u dawk li jkun għadhom kemm ġew stabbiliti, bħall-migranti.

Fir-rapport, ir-rapporteur tistudja jekk għandhiex tittieħed azzjoni speċifika fil-livell tal-UE sabiex tagħti aktar lok lill-integrazzjoni ta' nisa li jappartjenu għal minoranzi etniċi, u jekk iva, il-forma li għandu jkollha din l-azzjoni. Għandhiex tkun il-qsim ta' prassi tajba / informazzjoni fost l-Istati Membri, jew inkella leġiżlazzjoni vinkolanti.

Possibbiltà oħra għall-UE biex tiċċara u tfassal aħjar il-politiki ta' integrazzjoni jista' jkun li tħejji linji gwida tal-UE biex tgħin lill-Istati Membri sabiex jippermettu lin-nisa minn minoranzi etniċi li jkollhom aċċess għal: 1) is-sistema edukattiva, 2) is-sistema tal-kura tas-saħħa, 3) is-sistema tal-kura fit-tul, 4) benefiċċji soċjali, 5) impjieg u / jew 6) għajnuna finanzjarja.

2. Ir-rwol tan-nisa fil-minoranzi etniċi

M'hemm l-ebda definizzjoni legali komuni ta' minoranzi nazzjonali jew etniċi fil-liġi internazzjonali. Il-Kunsill tal-Ewropa, meta jitkellem dwar minoranzi nazzjonali fid-dokumenti[1] tiegħu, jirreferi għal 'grupp ta' persuni fi stat li jirrisjedu fit-territorju ta' dak l-istat u li huma ċittadini tiegħu, li għandhom rabtiet antiki, sodi u dejjiema ma' dak l-istat, juru karatteristiċi etniċi, kulturali, reliġjużi jew lingwistiċi li jiddistingwuhom, huma rappreżentattivi biżżejjed, minkejja li l-għadd tagħhom ikun iżgħar minn dak tal-bqija tal-popolazzjoni ta' dak l-istat jew ta' reġjun ta' dak l-istat, huma mmotivati minn interess li jikkonservaw flimkien dak li jikkostitwixxi l-identità komuni tagħhom, fosthom il-kultura tagħhom, it-tradizzjonijiet tagħhom, ir-reliġjon tagħhom jew il-lingwa tagħhom.' Kif wieħed jista' jara minn din id-definizzjoni, il-Kunsill tal-Ewropa jirreferi għal minoranzi stabbiliti jew persuni li jappartjenu għal minoranzi stabbiliti li diġà akkwistaw iċ-ċittadinanza tal-Unjoni Ewropea u għalhekk huma protetti permezz tal-liġi tal-UE. Madankollu, il-leġiżlazzjoni waħedha ma tistax toħloq relazzjonijiet tajba u tbiddel l-attitudnijiet. Iżda tista' tistabbilixxi standards ċari ta' mġieba aċċettabbli u tipprovdi rimedju għal dawk li jkunu ġarrbu inġustizzja.

Huwa aktar diffiċli biex tiddefinixxi gruppi li jkun għadhom ma ġewx stabbiliti fil-pajjiż ospitanti. Grupp jista' jitqies bħala grupp etniku jekk, f'soċjetà akbar, jiddistingwi ruħu u hu marbut permezz ta' rabtiet komuni, fosthom il-lingwa, in-nazzjonalità, il-kultura, perċezzjoni ta' karatteristiċi 'razzjali', u storja komuni.

Madankollu, fid-dawl tal-għan ta' dan ir-rapport, mhux daqstant kruċjali li grupp jiġi definit bħala minoranza jew bħala grupp etniku minħabba li d-drittijiet u l-protezzjoni tal-liġi tal-UE hija konferiti fuq il-persuna fuq il-bażi tal-istatut legali tiegħu/tagħha bħala ċittadin tal-UE u mhux bħala membru ta' minoranza jew grupp etniku.

F'dan ir-rigward, ir-rapport se jiffoka fuq l-identifikazzjoni tal-problemi eżistenti relatati mal-minoranzi etniċi u l-migranti nisa, filwaqt li jeżamina s-sitwazzjoni tagħhom fl-isfera tad-drittijiet taċ-ċittadini kif deskritti fl-ewwel parti ta' dan id-dokument ta' ħidma: aċċess għal servizzi pubbliċi bħall-edukazzjoni, is-servizzi soċjali, kura tas-saħħa u s-suq tax-xogħol, li għandhom impatt kbir fuq l-integrazzjoni tan-nisa li jappartjenu għal minoranzi etniċi.

Importanti li wieħed iqis id-dilemma tal-integrazzjoni fi ħdan l-Unjoni Ewropea u jenfasizza l-fatt li meta mara tkun tappartjeni għal grupp etniku partikolari mhux żvantaġġ f'soċjetà demokratika, iżda dan għandu rwol soċjoekonomiku dejjem aktar importanti fl-Unjoni Ewropea.

Huwa diffiċli li neżaminaw is-sitwazzjoni attwali tan-nisa li jappartjenu għal minoranzi etniċi minħabba n-nuqqas ta' data dwar l-integrazzjoni soċjali tal-migranti u minoranzi li tkun diżaggregata skont is-sessi. L-esperjenzi tan-nisa ta', pereżempju, ir-razziżmu u d-diskriminazzjoni spiss ikunu differenti minn dawk tal-irġiel minħabba li n-nisa u l-bniet jistgħu jsofru minn forom multipli ta' diskriminazzjoni, kemm fuq il-bażi ta’ sess u kemm fuq il-bażi ta’ identità etnika. Id-diskriminazzjoni multipla li jħabbtu wiċċhom magħha n-nisa migranti u n-nisa tal-minoranzi joħolqu l-ħtieġa li jiġu żviluppati modi innovattivi biex titqajjem kuxjenza dwar id-drittijiet tan-nisa, biex in-nisa jingħataw is-saħħa u biex jiġu mnebbħa jieħdu rwoli ta' tmexxija fil-komunitajiet tagħhom biex jippromwovu d-drittijiet tal-bniedem.

Diffikultà oħra fl-identifikazzjoni ta' problemi komuni fl-UE hija li l-isfidi li jħabbtu wiċċhom magħhom in-nisa minn minoranzi etniċi u n-nisa migranti fl-Ewropea huma differenti ħafna, u jiddependu fuq l-ispeċifiċità tal-Istat Membru li jgħixu fihom dawn in-nisa, l-istorja tal-migrazzjoni f'dak il-pajjiż, il-leġiżlazzjoni u liġijiet eżistenti li jirregolaw il-migrazzjoni, il-ħila u r-rieda ta' dawk il-pajjiżi li jirrikonoxxu u jirrispettaw il-preżenza tal-minoranzi u tal-immigranti, u l-mentalità tas-soċjetà.

Waqt li niddiskutu ir-rwol tan-nisa fil-politiki tal-integrazzjoni, ir-rwol tal-irġiel m'għandux jintesa. Ir-rapporteur teżamina jekk l-irwol tal-irġiel minn minoranzi etniċi jeħtieġx li jiġi kkunsidrat sabiex tiġi promossa l-integrazzjoni tan-nisa minn minoranzi etniċi fl-Unjoni Ewropea.

Ir-rapporteur tiġbed l-attenzjoni għall-kwistjoni ta' ċerti kundizzjonijiet u fatturi ta' sfond li jistgħu jfixklu l-integrazzjoni soċjali tan-nisa minn minoranzi etniċi aktar minn dik tan-nisa li jappartjenu lill-grupp etniku tal-maġġoranza. Dawk il-kwistjonijiet huma 1) il-livell edukattiv u l-għarfien tal-lingwi, 2) il-kundizzjonijiet tal-akkomodazzjoni, 3) il-kundizzjoni tas-saħħa u / jew 4) il-kwalità tal-impjiegi u l-kundizzjonijiet tax-xogħol.

3. Il-politika tal-ugwaljanza bejn is-sessi

Il-politika tal-ugwaljanza bejn is-sessi tal-UE hi maħsuba biex tippromwovi l-ugwaljanza bejn l-irġiel u n-nisa kollha kemm huma, iżda jista' jkun li n-nisa minn gruppi etniċi minoritarji qed jinżammu milli jibbenefikaw mill-politiki minħabba nuqqas ta' integrazzjoni soċjali?

Fir-rapport, ir-rapporteur teżamina jekk għandhomx jittieħdu miżuri speċifiċi mmirati lejn l-ugwaljanza bejn is-sessi fost il-minoranzi etniċi.

• [1]  European Charter for Regional or Minority Languages u Recommendation 1201 (1993) of the Parliamentary Assembly of the Council of Europe

RIŻULTAT TAL-VOTAZZJONI FINALI FIL-KUMITAT

Data tal-adozzjoni	23.6.2010
Riżultat tal-votazzjoni finali	+: –: 0:	21 0 11
Membri preżenti għall-votazzjoni finali	Edit Bauer, Emine Bozkurt, Andrea Češková, Marije Cornelissen, Silvia Costa, Edite Estrela, Ilda Figueiredo, Iratxe García Pérez, Jolanta Emilia Hibner, Mary Honeyball, Sophia in ‘t Veld, Lívia Járóka, Teresa Jiménez-Becerril Barrio, Philippe Juvin, Nicole Kiil-Nielsen, Rodi Kratsa-Tsagaropoulou, Barbara Matera, Antonyia Parvanova, Frédérique Ries, Raül Romeva i Rueda, Joanna Katarzyna Skrzydlewska, Eva-Britt Svensson, Marc Tarabella, Marina Yannakoudakis, Anna Záborská
Sostitut(i) preżenti għall-votazzjoni finali	Christa Klaß, Elisabeth Morin-Chartier, Mariya Nedelcheva, Norica Nicolai, Chrysoula Paliadeli, Joanna Senyszyn
Sostitut(i) (skont l-Artikolu 187(2)) preżenti għall-votazzjoni finali	Julie Girling