RAPPORT dwar is-semplifikazzjoni tal-implimentazzjoni tal-Programmi Qafas tar-Riċerka

MOZZJONI GĦAL RIŻOLUZZJONI TAL-PARLAMENT EWROPEW

NOTA SPJEGATTIVA

OPINJONI tal-Kumitat għall-Kontroll tal-Baġit (13.7.2010)

OPINJONI tal-Kumitat għall-Iżvilupp Reġjonali (16.9.2010)

RIŻULTAT TAL-VOTAZZJONI FINALI FIL-KUMITAT

6.10.2010 - (2010/2079(INI))

Kumitat għall-Industrija, ir-Riċerka u l-Enerġija
Rapporteur: Maria da Graça Carvalho

Proċedura : 2010/2079(INI)

Ċiklu ta' ħajja waqt sessjoni

Ċiklu relatat mad-dokument :

A7-0274/2010

Testi mressqa :

A7-0274/2010

Dibattiti :

PV 10/11/2010 - 23
CRE 10/11/2010 - 23

Votazzjonijiet :

PV 11/11/2010 - 8.11
Spjegazzjoni tal-votazzjoni
Spjegazzjoni tal-votazzjoni

Testi adottati :

P7_TA(2010)0401

MOZZJONI GĦAL RIŻOLUZZJONI TAL-PARLAMENT EWROPEW
NOTA SPJEGATTIVA
OPINJONI tal-Kumitat għall-Kontroll tal-Baġit
OPINJONI tal-Kumitat għall-Iżvilupp Reġjonali
RIŻULTAT TAL-VOTAZZJONI FINALI FIL-KUMITAT

dwar is-semplifikazzjoni tal-implimentazzjoni tal-Programmi Qafas tar-Riċerka

(2010/2079(INI))

Il-Parlament Ewropew,

– wara li kkunsidra l-Komunikazzjoni tal-Kummissjoni dwar is-semplifikazzjoni tal-implimentazzjoni tal-Programmi Qafas tar-Riċerka (COM(2010)0187),

– wara li kkunsidra d-Deċiżjoni tal-Kummissjoni tat-23 ta' Ġunju 2009 dwar il-Kriterji ta' Aċċettabilità għall-Metodoloġiji tal-Kost Medju tal-Persunal (C(2009)4705),

– wara li kkunsidra r-Rapport tal-Grupp ta' Esperti "il-Valutazzjoni Ex Post tal-Programmi tas-Sitt Qafas (2002-2006)" ('ir-Rapport Rietschel') u l-Komunikazzjoni tal-Kummissjoni sussegwenti (COM(2009)0210),

– wara li kkunsidra l-Komunikazzjoni tal-Kummissjoni tas-26 ta' Mejju 2010 bit-titlu 'Aktar kontrolli jew anqas?' Is-sejbien tal-aħjar bilanċ bejn in-nefqa amministrattiva tal-kontroll u r-riskju ta' żball' (COM(2010)0261),

– wara li kkunsidra l-konklużjonijiet tal-Kunsill dwar 'gwida dwar prijoritajiet futuri għar-riċerka u l-innovazzjoni bbażata fuq ir-riċerka Ewropea fl-istrateġija ta' Lisbona wara l-2010', adottati fit-3 ta' Diċembru 2009, u l-konklużjonijiet tal-Kunsill tal-Kompetittività dwar 'programmi simplifikati u aktar effiċjenti li jappoġġaw ir-Riċerka u l-Innovazzjoni Ewropea', adottati fis-26 ta' Mejju 2010,

– wara li kkunsidra d-dikjarazzjoni ta' Berlin dwar Aċċess Miftuħ għall-Għarfien fix-Xjenzi u fl-Istudji Umanistiċi,

– wara li kkunsidra l-Artikolu 48 tar-Regoli ta' Proċedura tiegħu,

– wara li kkunsidra r-rapport tal-Kumitat għall-Industrija, ir-Riċerka u l-Enerġija u l-opinjonijiet tal-Kumitat għall-Kontroll tal-Baġit u l-Kumitat għall-Iżvilupp Reġjonali (A7-0274/2010),

A. billi s-Seba' Programm Qafas (FP7) huwa l-akbar programm transnazzjonali tar-Riċerka u l-Iżvilupp fid-dinja u element kritiku fis-seħħ ta' Żona Ewropea tar-Riċerka u t-twettiq tal-għanijiet tal-istrateġija UE 2020,

B. billi r-riċerka tagħti kontribut fundamentali għat-tkabbir ekonomiku, għall-ħolqien tal-impjiegi u għal enerġija ħadra u sostenibbli,

C. billi l-Programm Qafas jeħtieġ l-ogħla standards ta' eċċellenza, effikaċja u effiċjenza fir-riċerka biex jiġbed u jżomm l-aqwa xjenzati fl-Ewropa u jrawwem ekonomija tal-UE aktar informattiva u bbażata fuq l-għarfien li tkun tista' tikkompeti f'ekonomija globali,

D. billi l-koordinazzjoni bejn il-politiki ta’ riċerka nazzjonali, reġjonali u Ewropej għadha limitata u dan joħloq ostakli kbar ħafna għall-kisba ta' soluzzjonijiet kosteffettivi,

E. billi l-ġestjoni attwali tas-Seba' Programm Qafas, minkejja t-titjib li sar fuq is-Sitt Programm Qafas, għadha kkaratterizzata minn burokrazija żejda, tolleranza baxxa tar-riskju, effiċjenza fqira u dewmien żejjed li jaġixxu bħala diżinċentiv ċar għall-parteċipazzjoni tal-komunità tar-riċerka, id-dinja akkademika, l-organizzazzjonijiet tas-soċjetà ċivili, in-negozji u l-industrija (l-aktar l-atturi żgħar involuti fir-riċerka, fosthom l-SMEs),

F. billi l-partijiet interessati kollha qegħdin jitolbu aktar simplifikazzjoni u armonizzazzjoni tar-regoli u l-proċeduri, bis-simplifikazzjoni mhux bħala għan fih innifsu, iżda aktar bħala mezz biex tkun żgurata l-attrazzjoni u l-aċċessibbiltà tal-fondi tal-UE għar-riċerka, u biex jitnaqqas il-ħin li r-riċerkaturi jkollhom jinvestu fil-proċess innifsu,

G. billi l-finanzjament ibbażat fuq ir-riżultati jista' jillimita l-ambitu tal-proġetti ta' riċerka għal proġetti inqas riskjużi u orjentati lejn ir-riċerka tas-suq, xi ħaġa li tista' tfixkel l-UE milli tfittex l-eċċellenza fir-riċerka konfinali u l-innovazzjoni,

H. billi r-riċerka u l-innovazzjoni jeħtieġ li jkunu distinti b'mod ċar bħala żewġ proċessi differenti (ir-riċerka ddawwar l-investiment f'għarfien u l-innovazzjoni ddawwar l-għarfien f'investiment),

I. billi l-proċess ta' simplifikazzjoni attwali ġie f'mument kruċjali, biex jipprovdi spinta għar-Reviżjoni ta' Nofs it-Terminu tas-Seba' Programm Qafas u għat-tħejjijiet tat-Tmien Programm Qafas li jmiss,

J. billi d-disinn u l-implimentazzjoni tas-Seba' Programm Qafas attwali u l-Programmi Qafas tal-ġejjieni jridu jkunu bbażati fuq il-prinċipji tas-sempliċità, l-istabbiltà, it-trasparenza, iċ-ċertezza legali, il-konsistenza, l-eċċellenza u l-fiduċja,

1. Jappoġġa l-inizjattiva tal-Komunikazzjoni tal-Kummissjoni biex tissimplifika l-implimentazzjoni tal-Programmi Qafas għar-Riċerka, li tipprovdi miżuri serji u kreattivi biex jingħelbu d-diffikultajiet li jħabbtu wiċċhom magħhom il-parteċipanti fil-Programmi Qafas;

2. Jiġbed l-attenzjoni għall-fatt li, minkejja l-importanza tal-proċess ta' simplifikazzjoni, din hija biss waħda mir-riformi meħtieġa biex itejbu l-finanzjament tal-UE għar-riċerka;

3. Jenfasizza l-ħtieġa li jiġi stipulat, fil-każ ta' kull miżura ta' simplifikazzjoni individwali, jekk din tidħolx fis-seħħ fil-qafas legali attwali jew jekk ikunx hemm il-ħtieġa li jinbidlu r-regoli tar-Regolament Finanzjarju, ir-Regoli għall-Parteċipazzjoni jew ir-regoli speċifiċi li japplikaw għall-programmi tal-Programm Qafas;

4. Jistieden lill-Kummissjoni tikkontribwixxi għar-riforma attwali tar-Regolament Finanzjarju, bl-għanijiet li ġejjin: żieda tal-koerenza fil-qafas legali attwali; tnaqqis tad-dispożizzjonijiet, ċarezza, nuqqas ta’ ambigwità u ġestjonabilità; għal dan il-għan, jitlob l-inkorporazzjoni tar-Regoli għall-Parteċipazzjoni fit-test tar-Regolament Finanzjarju;

5. Jenfasizza l-fatt li, flimkien mas-simplifikazzjonijiet li pproponiet il-Kummissjoni, hija għandha tfassal pjan dettaljat għall-iżvilupp tal-infrastruttura tar-riċerka fl-Istati Membri l-ġodda, sabiex jinħolqu opportunitajiet ugwali għall-Istati Membri kollha biex jaċċessaw il-fondi skont is-Seba’ Programm Qafas u skont it-Tmien Programm Qafas li jmiss;

6. Jinnota li l-parteċipazzjoni tas-settur privat fil-Programm Qafas għadha baxxa minħabba r-regoli kumplessi li jieħdu ħafna ħin u li jirregolaw il-parteċipazzjoni, l-ispejjeż għoljin tal-persunal u l-burokrazija żejda;

Bidla prammatika lejn is-simplifikazzjoni amministrattiva u finanzjarja

7. Jilqa' l-isforzi li kulma jmorru qegħdin jiżdiedu lejn is-simplifikazzjoni amministrattiva u finanzjarja tar-regoli tal-Programmi Qafas matul iċ-ċikli tal-ħajja tal-programmi u tal-proġetti (l-applikazzjoni, l-evalwazzjoni u l-ġestjoni) xi ħaġa li għandha tkun ta' benefiċċju kbir għall-partijiet interessati;

8. Jenfasizza li kwalunkwe proċess ta' simplifikazzjoni għandu jiddaħħal b'attenzjoni fis-Seba' Programm Qafas attwali biex tinżamm l-istabilità, il-konsistenza u ċ-ċertezza legali, sabiex tidħol fiduċja reċiproka bejn il-partijiet interessati kollha; f’dan ir-rigward jenfasizza li, billi l-interpretazzjoni uniformi tar-regoli eżistenti għandha tiġi segwita bħala kwistjoni ta’ urġenza, m'għandhiex issir l-applikazzjoni tal-‘linji gwida’ li jirriżultaw mill-konklużjonijiet, għall-kuntratti li għadhom għaddejjin;

9. Jesprimi t-tħassib tiegħu li s-sistema attwali u l-prattika tal-ġestjoni tas-Seba' Programm Qafas huma orjentati żżejjed lejn il-kontroll, li jwassal għal ħela ta' riżorsi, parteċipazzjoni iktar baxxa u xenarji ta' riċerka anqas attraenti; jinnota bi tħassib li s-sistema attwali ta' ġestjoni ta' 'tolleranza żero tar-riskju' tidher li taħrab aktar milli timmaniġġa r-riskji; għalhekk jitlob li ssir reviżjoni u/jew interpretazzjoni estiża tar-Regolament tal-Persunal tal-UE dwar il-kwistjoni tar-responsabbiltà personali, u jitlob ukoll il-preżentazzjoni ta’ proposti konkreti fir-riforma attwali tar-Regolament Finanjzarju (pereżempju, assigurazzjoni jew sistema ta’ qsim tar-riskju);

10. Iqis li l-monitoraġġ u l-kontroll finanzjarju li jsir mill-Kummissjoni u mill-OLAF għandu jkollu l-għan ewlieni li jħares il-fondi pubbliċi u jikkumbatti l-frodi, filwaqt li ssir distinzjoni ċara bejn il-frodi u l-iżbalji; f’dan ir-rigward iqis neċessarju li tiġi stabbilita definizzjoni aktar ċara tal-‘iżbalji’ fid-dokumenti legali vinkolanti kollha, inklużi l-mekkaniżmi biex jiġu stabbiliti l-iżbalji flok l-interpretazzjonijiet differenti; jitlob, għalhekk, għal analiżi bir-reqqa u komunikazzjoni tal-iżbalji kif ukoll għal azzjonijiet ta' rimedju fir-rigward tagħhom;

11. Hu tal-fehma li l-ġestjoni tal-finanzjament tar-riċerka Ewropea għandha tkun aktar ibbażata fuq il-fiduċja u tkun tolleranti fir-rigward tar-riskju tal-parteċipanti fil-fażijiet kollha tal-proġetti, filwaqt li tiġi ggarantita r-responsabilità, b'regoli tal-UE flessibbli biex jiġu allinjati aħjar, fejn hu possibbli, ma’ regolamenti nazzjonali differenti eżistenti u prattiki ta’ kontabilità rikonoxxuti;

12. Jappoġġa bis-sħiħ l-adozzjoni ta' rata aktar għolja ta' riskji tollerabbli għall-iżbalji (TRE), xi ħaġa li tnaqqas kemm il-kumplessità kif ukoll il-verifiki ex-post, biex jiġi żgurat bilanċ xieraq bejn il-ġestjoni finanzjarja tajba u l-kontrolli xierqa; jenfasizza li huwa kruċjali li jiġi żgurat li r-regoli ta' parteċipazzjoni jiġu interpretati u applikati b'mod uniformi, u dan iwassal għal tnaqqis fir-rata tal-iżbalji;

13. Jitlob li l-benefiċjarji li jirċievu għotjiet mill-Programm Qafas ikunu informati dwar l-istrateġiji ta’ verifika rilevanti tal-Kummissjoni; jirrakkomanda li dawn l-istrateġiji jixxerrdu permezz tal-Punti ta’ Kuntatt Nazzjonali u jkunu inklużi fil-Cordis;

14. Jaqbel ma', u jirrakkomanda, aċċettazzjoni aktar wiesgħa tal-prattiki tal-kontabilità normali għall-kostijiet eliġibbli tal-parteċipanti, ladarba jiġu definiti b’mod ċar u jintlaħaq ftehim dwarhom, l-aktar għall-metodoloġiji tal-kost medju tal-persunal, bil-kundizzjoni li dawn il-proċeduri jkunu skont ir-regoli nazzjonali u ċċertifikati minn awtoritajiet kompetenti, li jagħti biżżejjed flessibilità għal kull benefiċjarju biex jutilizza jew il-metodoloġija tal-kost attwali tal-persunal jew il-metodoloġija tal-kost medju tal-persunal;

15. Iħeġġeġ lill-Kummissjoni ssegwi b’mod attiv it-talbiet tal-Parlament kif imqajma fid-deċiżjonijiet ta’ kwittanza tiegħu għas-snin 2007 u 2008, b’mod partikulari biex isiru proposti konkreti għas-simplifikazzjoni tal-kalkolu tal-kost medju tal-persunal u biex dawn il-proposti jiġu applikati;

16. Iqis li fil-każ tal-korpi pubbliċi, id-dikjarazzjonijiet ta’ assigurazzjoni dwar l-affidabilità tal-kontijiet annwali tal-organizzazzjoni u dwar ir-regolarità tat-tranżazzjonijiet sottostanti maħruġa mill-Qorti tal-Awdituri nazzjonali u/jew mill-Awdituri Pubbliċi nazzjonali għandhom jiġu aċċettati mill-istituzzjonijiet Ewropej fil-verifika tal-metodololoġija kollha tal-kostijiet;

17. Jappoġġa aktar tnaqqis fil-kombinazzjonijiet tar-rati u tal-metodi ta' finanzjament għad-definizzjoni ta' kostijiet indiretti fost l-istrumenti differenti kollha u bejn l-attivitajiet (il-ġestjoni, ir-riċerka, id-dimostrazzjoni u d-disseminazzjoni) bla ma jitqiegħed fil-periklu l-livell attwali tar-rati ta' finanzjament; jirrikonoxxi, madankollu, li d-differenzjazzjoni attwali bejn l-universitajiet/iċ-ċentri ta' riċerka, l-industrija, l-organizzazzjonijiet li ma jagħmlux qligħ u l-SMEs għandha tinżamm; jistieden lill-Kummissjoni żżomm l-użu tal-kostijiet reali bħala metodu biex jiġu kkombinati r-rati ta’ finanzjament u biex jiġu definiti l-kostijiet indiretti;

18. Huwa tal-fehma li s-somom ta' flus f'daqqa u r-rati fissi għandhom jintużaw fuq bażi volontarja u jiġu applikati biss fejn jixraq; jistieden lill-Kummissjoni tkompli tiċċara t-terminoloġija dwar l-użu tar-rati fissi u s-somom ta' flus f'daqqa;

19. Hu favur l-introduzzjoni tas-somom ta' flus f'daqqa biex ikopru 'kostijiet diretti oħra', sakemm tibqa' l-alternattiva tal-kostijiet reali; jistieden lill-Kummissjoni tivvaluta b'mod rigoruż l-użu ta' somom ta' flus f'daqqa għall-kostijiet tal-persunal; jenfasizza li s-somom ta' flus f'daqqa huma l-aktar alternattiva effikaċi għal Pajjiżi Sħab fil-Kooperazzjoni Internazzjonali fil-Programmi Qafas;

20. Jirrikonoxxi li t-tnaqqis fid-daqs tal-konsorzji, meta jkun jista' jsir, jikkontribwixxi biex jissimplifika l-proċess, iqassar il-kalendarju tal-proġetti u jnaqqas il-kostijiet amministrattivi;

21. Jemmen li t-timijiet ta’ daqs kbir għandhom ikunu ġustifikati permezz tan-natura multidixxiplinarja tal-ħidma li għandha titwettaq;

22. Jissuġġerixxi, pereżempju, proċedura ta’ approvazzjoni taċita sabiex tiġi ffaċilitata l-modifika tal-ftehim tal-għotja, b’mod partikulari biex jitqiesu l-bidliet fil-kompożizzjoni tal-konsorzji jew fil-konfigurazzjoni amministrattiva u finanzjarja tagħhom;

23. Hu favur l-abolizzjoni sħiħa ta' mekkaniżmi li jirreġistraw il-ħin, bħall-karti tal-ħin (din l-abolizzjoni m'għandhiex tkun biss għall-użu ta' somom ta' flus f'daqqa);

24. Jilqa' t-tneħħija immedjata tal-obbligu tal-irkupru tal-ħlas tal-interessi fuq il-finanzjament minn qabel;

25. Jaqbel li l-użu ta' premjijiet għandu jiġi mħeġġeġ iżda mhux bħala sostitut għal finanzjament li jkun strutturat kif jixraq;

26. Jistieden lill-Kummissjoni tippermetti r-rimborż tal-kostijiet imġarrba wara l-preżentazzjoni tal-proposta, jekk din tintgħażel, sabiex tiffaċilita l-parteċipazzjoni tas-sħab industrijali u b’mod partikulari tal-SMEs;

27. Jitlob interpretazzjoni simplifikata u kjarifika akbar dwar id-definizzjoni tal-kostijiet eliġibbli (bħat-taxxi u t-tariffi fuq il-kostijiet tal-persunal, il-lif għal raġunijiet ta' mard u l-lif tal-maternità), kif ukoll fuq il-kwistjoni dwar jekk il-VAT tistax tiġi rkuprata mill-kostijiet eliġibbli; jistieden lill-Kummissjoni teżamina l-possibilità li l-VAT titqies bħala partita ta' kost eliġibbli, fejn ma titnaqqasx; jitlob aktar kjarifiki dwar il-proċeduri marbuta mar-rati tal-kambju għas-sħab li jużaw munita differenti;

28. Jiddispjaċih li l-introduzzjoni tal-kodiċi ta’ identifikazzjoni tal-parteċipazzjoni (PIC) ma naqqsitx it-talbiet ripetuti għal informazzjoni legali u finanzjarja (u dokumenti ta’ appoġġ) u li l-wasla ta’ PIC matul il-proċess tal-applikazzjoni mhux dejjem tiġi segwita bi proċess ta’ validazzjoni; jistieden, għalhekk, lill-atturi rilevanti jtejbu l-PIC u jagħmlu l-użu tiegħu aktar effiċjenti;

29. Jitlob lill-Kummissjoni tippreżenta regoli ta' proċedura għall-verifika li jkunu aktar preċiżi, konsistenti u trasparenti, inklużi regoli u prinċipji li jiżguraw li d-drittijiet tal-korp li ssirlu verifika jkunu rispettatti u li jinstemgħu il-partijiet involuti kollha, u biex tagħmel rapport dwar ir-relazzjoni bejn il-kostijiet u l-benefiċċji tal-verifiki;

30. Iħeġġeġ lill-Kummissjoni timplimenta l-'approċċ ta' verifika waħda' u taqleb għal verifika fil-ħin reali li ssir minn entità waħda, biex il-benefiċjarji jkunu jistgħu jikkoreġu l-iżbalji sistemiċi u jippreżentaw rapporti aħjar dwar il-kostijiet is-sena ta' wara; jemmen li approċċ ta’ verifika waħda bħal dan għandu jkompli jiżgura li l-proġetti mitmuma ma jiġux ivverifikati aktar minn darba minn awdituri differenti, sabiex il-Kummissjoni toqgħod fuq l-opinjoni tal-ewwel awditur indipendenti li jinħatar u d-dokumenti jiġi provduti darba biss, isiru kemm isiru verifiki;

31. Jistieden lill-Kummissjoni tipprovdi ċertezza legali billi ma tapplikax definizzjoni aktar stretta tar-regoli għall-parteċipazzjoni b'mod retroattiv u billi ma titlobx lir-riċevituri biex jerġgħu jikkalkulaw rapporti finanzjarji li jkunu diġà ġew approvati mis-servizzi tal-Kummissjoni, u b'hekk tonqos il-ħtieġa ta' verifiki ex-post u korrezzjonijiet retroattivi; jistieden lill-Kummissjoni ssolvi malajr sitwazzjonijiet preċedenti li jinqalgħu mill-verifiki li għadhom għaddejjin, filwaqt li taġixxi b’għaqal u b’rispett tal-prinċipji tal-ġestjoni finanzjarja tajba; jirrakkomanda li t-tilwim rigward sitwazzjonijiet preċedenti bħal dawn jinħall permezz ta’ ftehim bejn il-partijiet kollha, abbażi, pereżempju, ta’ verifika oħra indipendenti u/jew bl-intervent ta’ medjatur indipendenti ad hoc;

32. Jipproponi l-introduzzjoni ta’ proċedura ta’ reazzjoni li permezz tagħha, jekk il-Kummissjoni ma tagħti l-ebda reazzjoni f'perjodu ta’ żmien li jrid jiġi stabbilit fir-rigward tal-informazzjoni li tkun irċeviet, din l-informazzjoni titqies bħala validata mill-Kummissjoni;

33. Jistieden lill-Kummissjoni tagħmel rapport regolarment lill-Parlament dwar l-ispiża amministrattiva tas-Seba' Programm Qafas, inklużi l-ispejjeż tal-ġestjoni għall-Kummissjoni u għall-parteċipanti, kif ukoll dwar il-miżuri meħuda jew ippjanati biex jitnaqqas dan il-kost;

Bidla radikali lejn it-titjib fil-kwalità, l-aċċessibilità u t-trasparenza

(a) Ċaqliq lejn approċċ 'b'bażi xjentifika'

34. Ifakkar lill-Kummissjoni li hu maħsub li l-benefiċjarji tal-programmi tal-UE jwettqu b'rieda tajba l-attivitajiet iffinanzjati u jagħmlu l-aħjar sforz tagħhom biex jinkisbu r-riżultati mistennija;

35. Għalhekk hu mħasseb dwar ix-xejra ġenerali tal-Kummissjoni attwali lejn finanzjament abbażi ta' riżultati (essenzjalment iġġustifikata mill-prinċipji ta' responsabbiltà soda) u huwa mħasseb ħafna dwar l-impatt li l-finanzjament abbażi ta' riżultati jista' jkollu fuq il-kwalità u n-natura tar-riċerka, minħabba r-restrizzjonijiet li jista' jkun hemm fuq ir-riċerka xjentifika u l-impatt negattiv fuq proġetti b'objettivi li ma jitkejlux jew b'objettiv li jitkejjel bl-użu ta' parametri oħra għajr dak tal-utilità immedjata; hu mħasseb ukoll dwar il-konklużjoni li jista' jkun hemm rigward aktar valutazzjoni ex-ante u ex-post tar-rendiment/ir-riżultati tal-proġetti u dwar l-identifikazzjoni tal-kriterji meħtieġa biex jiġu definiti;

36. Iqis bħala mhux adegwat, ħlief f’ċirkostanzi straordinarji u ġustifikati kif jixraq, l-użu ġenerali ta' somom ta' flus f'daqqa, bħal somom f'daqqa nnegozjati speċifikament għal proġetti jew somom f'daqqa miftiehma minn qabel għal kull proġett; hu favur, minflok, l-approċċ ta' 'fiduċja kbira' imfassal preċiż għar-riċerka konfinali; jirrakkomanda t-tnedija ta' testijiet pilota tal-'finanzjament abbażi ta' riżultati' bil-ħlas ta' somom ta' flus f'daqqa speċifiċi għal proġetti, f'kuntrast mar-rendiment/ir-riżultati miftiehma għal proġetti ta' riċerka u ta' dimostrazzjoni f'żoni li joffru sfidi speċifiċi;

37. Hu favur, minflok, sistema ta' finanzjament 'b'bażi xjentifika', b'enfasi fuq kriterji xjentifiċi/tekniċi u b'evalwazzjoni orizzontali bbażata fuq l-eċċellenza, ir-rilevanza u l-impatt, b'kontroll finanzjarju simplifikat u effiċjenti, li tirrispetta d-dritt li jinstemgħu l-partijiet involuti kollha; hu tal-fehma li dan l-approċċ b'bażi xjentifika għandu jġib miegħu bidla mill-qiegħ min-naħa finanzjarja għan-naħa xjentifika/teknika rigward il-mekkaniżmi ta' kontroll; iqis li dan l-approċċ jippermetti lill-partijiet interessati jiffukaw l-isforzi tagħhom fuq il-kompetenzi ewlenin tagħhom, fuq kwistjonijiet xjentifiċi/tekniċi u fuq il-bini tal-ERA;

(b) L-użu aħjar tal-ħin

38. Jilqa' t-tendenza ġenerali lejn it-tqassir tal-medja taż-żmien sal-għotja u tal-ħin sal-ħlas iżda jesprimi xi riżervi dwar l-użu ġeneralizzat ta' sejħiet b'kamp ta' applikazzjoni aktar wiesa' u sejħiet b'dati ta' skadenza; jirrikonoxxi, madankollu, li sejħiet bħal dawn huma adatti għall-SMEs bħala mezz biex tonqos l-inċertezza dwar l-opportunitajiet ta' finanzjament u biex tkompli titħeġġeġ il-parteċipazzjoni;

39. Jesprimi t-tħassib tiegħu li ż-żmien medju attwali mill-iskadenza tal-proposta sal-firma tal-kuntratt (iż-żmien sal-kuntratt) għadu twil wisq, b'diskrepanzi bejn is-servizzi differenti tal-Kummissjoni; jistieden lill-Kummissjoni tqassar iż-żmien sal-kuntratt għal massimu ta’ 6 xhur u tistabbilixxi skadenzi xierqa għall-evalwazzjoni u għan-negozjar tal-kuntratt, ibbażati fuq sistema ta' parametri;

40. Jistieden lill-Kummissjoni testendi ż-żmien medju mill-pubblikazzjoni tas-sejħa għall-proposti sal-iskadenza biex tiġi ppreżentata l-applikazzjoni;

41. Għandu riżervi qawwija dwar l-effetti tat-tneħħija tar-rekwiżit legali għal opinjoni mill-kumitati tar-rappreżentanti tal-Istati Membri fir-rigward ta' deċiżjonijiet dwar l-għażliet ta' proġetti individwali, b'mod speċjali dawk b'impatt fuq l-etika, is-sigurtà u d-difiża;

42. Jemmen li l-approċċ li jkollu l-għan li jiffavorixxi l-identifikazzjoni ta' prinċipji bażiċi komuni għandu jkun bla ħsara għall-ispeċifiċitajiet u l-għażliet etiċi nazzjonali fil-kwistjoni tar-riċerka;

43. Jappoġġa x-xejra ġenerali lejn proċedura ta' applikazzjoni f''żewġ fażijiet', b'mod partikolari f'każijiet fejn l-eċċess mistenni ta' applikazzjonijiet ikun għoli ħafna, sakemm l-evalwazzjoni ssir bir-reqqa fl-ewwel fażi (l-għanijiet, l-approċċ xjentifiku, il-kompetenzi tal-parteċipanti, il-valur miżjud tal-kollaborazzjoni xjentifika u l-baġit ġenerali); jenfasizza li dan iżid iċ-ċansijiet ta' suċċess fit-tieni fażi, sakemm ma jsirx bis-saħħa ta' perjodi itwal ta' żmien sal-kuntratt jew perjodi itwal ta' għotjiet; hu tal-fehma li dan l-approċċ inaqqas l-ispejjeż tal-applikazzjoni;

44. Jenfasizza li l-ġestjoni tal-Programmi Qafas trid tqiegħed il-benefiċjarji fiċ-ċentru tal-missjonijiet tagħha u tipprovdi aċċess aħjar għall-Programmi Qafas;

45. Jitlob li jsir titjib sostanzjali fiċ-ċarezza u l-aċċessibilità tad-dokumenti ta' gwida, li għandhom jinġabru f’manwal u jiġu tradotti fil-lingwi uffiċjali tal-UE;

46. Jenfasizza l-ħtieġa li tiżdied il-parteċipazzjoni tal-Istati Membri l-ġodda fi proġetti tal-Programm Qafas permezz ta’ simplifikazzjoni tal-proċeduri ta’ applikazzjoni u dawk kuntrattwali li jirrappreżentaw xkiel sinifikanti għad-dħul fil-fażi tal-proposta, speċjalment għal dawk li jkunu qed japplikaw għall-ewwel darba;

47. Jirrakkomanda titjib fl-istabilità provduta lill-partijiet interessati billi, safejn hu possibbli, ikun hemm uffiċjal tal-proġetti wieħed uniku tal-Kummissjoni, li jagħti appoġġ personalizzat matul il-ħajja sħiħa ta' proġett bl-implimentazzjoni konsistenti tar-regoli, kif ukoll approċċ ta' 'wiċċ wieħed għall-klijent', biex il-pariri dwar programmi multipli jingħataw minn punt wieħed ta' kuntatt;

48. Iqis li kull dokument ipprovdut mill-Kummissjoni u s-servizzi tagħha għandu jistabbilixxi b’mod ċar l-istatus legali tiegħu, filwaqt li jispeċifika kemm lil min huwa marbut bil-kontenut tiegħu kif ukoll b’liema mod huwa marbut;

49. Jappoġġa d-dħul ta' aktar strumenti ta' amministrazzjoni elettronika u tal-IT, b'mod partikolari, l-iżvilupp ta' portal għall-parteċipanti fir-riċerka u l-introduzzjoni tal-firem elettroniċi; jistieden lill-Kummissjoni tistabbilixxi sistema onlajn integrata u faċli biex tintuża; jagħti l-appoġġ tiegħu biex l-informazzjoni elettronika kollha dwar il-ġestjoni tal-programmi ssir disponibbli (l-identifikazzjoni, l-applikazzjoni, in-negozjar u r-rapport); jagħti l-appoġġ tiegħu biex din is-sistema onlajn tkun disponibbli sa mill-ewwel jum tal-programm u tkun aċċessibbli fil-fażjiet kollha; hu tal-fehma li għandhom jitħeġġu l-konferenzi bil-video biex jieħdu post il-laqgħat wiċċ imb'wiċċ; jirrakkomanda li s-servizzi ta' amministrazzjoni elettronika jużaw protokolli u formati miftuħa meta jkunu qed jikkomunikaw biex tiġi żgurata t-trasparenza, l-aċċessibilità u l-interoperabilità;

50. Jirrakkomanda li l-Kummissjoni tniedi kampanja ta’ informazzjoni biex jikber l-għarfien dwar l-istrumenti tat-teknoloġija tal-informazzjoni disponibbli bil-programm;

51. Jilqa’ l-Inizjattiva Pilota Aċċess Miftuħ (Open Access Pilot) tal-Kummissjoni, li għandha l-għan li ttejjeb l-aċċess għar-riżultati tar-riċerka kemm permezz tas-sistema Cordis kif ukoll billi tħeġġeġ lix-xjenzjati jirreġistraw ir-riċerka tagħhom f'repożitorju;

52. Jenfasizza li l-aċċess tal-benefiċjarji għal proġetti fl-oqsma tar-riċerka u l-innovazzjoni jeħtieġ kapaċità teknika kbira u għarfien tajjeb tal-proċeduri amministrattivi u finanzjarji u, għalhekk, dan l-aċċess huwa diffiċli immens għal applikanti żgħar bħall-SMEs u l-istituti ta’ riċerka żgħar li jinstabu f’reġjuni periferiċi; ifakkar li daqs 90% tan-negozji fl-Ewropa huma SMEs u li hemm il-ħtieġa li tiġi żgurata l-parteċipazzjoni sħiħa u totali tal-SMEs fl-użu tar-riżorsi tas-Seba' Programm Qafas;

53. Jenfasizza l-bżonn ta’ aktar trasparenza fir-rigward tal-proċess tal-għażla tat-tema għal sejħiet li għandhom jiżguraw il-parteċipazzjoni tal-partijiet interessati rilevanti;

54. Jirrakkomanda l-ħolqien ta' reviżjoni orizzontali aktar trasparenti, koerenti u armonizzata li tkun ibbażata fuq il-mertu;

Sinerġiji tal-programmi u l-istrumenti

55. Iħeġġeġ biex tonqos il-kumplessità tal-programmi tal-UE (pereżempju, l-FP, is-CIP, il-Fondi Strutturali) u l-istrumenti assoċjati (il-JTI, l-inizjattivi tal-Artikolu 187, il-PPP, il-proġetti tal-Artikolu 185, il-KIC, l-Era-NET, eċċ); jenfasizza li dan iwassal għall-isfruttament sħiħ tas-sinerġiji li joħorġu mill-azzjoni kkombinata tagħhom;

56. Jiddeplora l-multiplikazzjoni estrema tal-entitajiet ta' riċerka, tal-mudelli ta' koperazzjoni u tal-mekkaniżmi ta' ġestjoni, kif ukoll il-kumplessità li tirriżulta u li toħloq problemi ta' trasparenza fir-rigward tal-awtorità baġitarja u d-differenza fit-trattament tal-benefiċjarji;

57. Jirrakkomanda sett iżgħar ta' regoli u prinċipji komuni fir-rigward tal-finanzjament li jirregola l-finanzjament għar-Riċerka u l-Iżvilupp min-naħa tal-UE u jitlob għall-koerenza u l-armonizzazzjoni fl-implimentazzjoni u l-interpretazzjoni tar-regoli u l-proċeduri; jisħaq fuq il-ħtieġa li dan is-sett ta' regoli komuni jiġi applikat fil-Programm Qafas kollu u fl-istrumenti assoċjati kif ukoll fil-Kummissjoni, hi min hi l-entità jew l-aġenzija eżekuttiva inkarigata mill-implimentazzjoni;

58. Jirrakkomanda li jiġu stabbiliti mekkaniżmi li jipprovdu gwida komuni fil-Kummissjoni, u li jibda t-taħriġ għall-uffiċjali tal-proġetti u għall-awdituri interni; iħeġġeġ il-ħolqien ta' mekkaniżmu ta' appell bħall-'medjatur tal-Programm Qafas' għall-parteċipanti fil-każijiet ta' interpretazzjoni inkoerenti u inkonsistenti tar-regoli u l-proċeduri; jemmen li d-deċiżjonijiet li jittieħdu minn dan il-medjatur għandhom ikunu finali u vinkolanti;

59. Hu tal-fehma li l-innovazzjoni tista' titrawwem bl-aħjar mod fil-livell reġjonali, minħabba l-viċinanza bejn l-universitajiet, l-organiżmi pubbliċi tar-riċerka, l-intrapriżi l-kbar, l-SMEs u l-awtoritajiet pubbliċi lokali, pereżempju fi ħdan gruppamenti żgħar; jinnota wkoll li t-trawwim tal-innovazzjoni fil-livell reġjonali jista’ jgħin fit-tnaqqis tan-nuqqas ta' parità soċjali u reġjonali; jinkoraġġixxi, madankollu, il-livelli differenti (reġjonali, nazzjonali u Komunitarji) biex jikkoordinaw aħjar l-isforzi tagħhom fil-qafas ta' programmazzjoni fil-livell Ewropew tal-attivitajiet ta' riċerka u żvilupp; jenfasizza wkoll il-ħtieġa ta’ konnessjonijiet aħjar bejn l-akkademja u l-industrija;

Lezzjonijiet li għandhom jittieħdu għat-Tmien Programm Qafas li jmiss

60. Jemmen li reviżjoni mill-qiegħ tal-amministrazzjoni tal-Programm Qafas hija waħda mill-akbar prijoritajiet li għandhom jiġu indirizzati fit-tfassil tal-Programm Qafas li jmiss;

61. Iqis li r-reviżjoni tar-Regolament Finanzjarju, ir-Regolamenti tal-Persunal u l-implimentazzjoni ta' TRE speċifikament għar-riċerka għandu jkollha rwol ewlieni fir-ristrutturar tal-qafas ta' finanzjament għar-riċerka u biex isir aktar progress fis-simplifikazzjoni tal-finanzjament għar-riċerka;

62. Jistieden lill-Kummissjoni tivvaluta l-effikaċja ta' kull strument individwali, f'kull programm, biex jinkisbu għanijiet ta’ politika speċifiċi u jitlob biex titnaqqas id-diversità tal-istrumenti kull meta l-effikaċja jew il-kontribut distint ma jintwerewx b’mod ċar, filwaqt li tinżamm biżżejjed flessibilità biex takkomoda l-ispeċifiċitajiet tal-proġetti;

63. Jappoġġa sistema ta' finanzjament b'bażi xjentifika u diviżjoni bbilanċjata tajjeb bejn ir-riċerka minn fuq għal isfel immexxija mill-impatt u r-riċerka minn isfel għal fuq immexxija mix-xjenza bħala l-bażi għat-Tmien Programm Qafas;

64. Jemmen li t-Tmien Programm Qafas għandu jiffoka fuq ir-riċerka fil-fruntieri tal-għarfien filwaqt li jqis il-katina sħiħa tal-innovazzjoni permezz tar-riċerka konfinali, l-iżvilupp teknoloġiku, id-dimostrazzjoni, id-disseminazzjoni, il-valorizzazzjoni tar-riżultati u l-integrazzjoni mgħaġġla tar-riżultati tar-riċerka fis-swieq;

65. Jemmen li t-Tmien Programm Qafas għandu jħeġġeġ il-kollaborazzjoni bejn ir-riċerkaturi Ewropej billi jintroduċi skema ta’ vawċers ta' riċerka bi flus għar-riċerka filwaqt li jsegwi r-riċerkaturi li jiċċaqilqu f’universitajiet fl-Istati Membri, jikkontribwixxi għaċ-ċentri ta’ eċċellenza, għall-universitajiet indipendenti u għal aktar mobilità fost ir-riċerkaturi;

66. Jistieden lill-Kummissjoni tippubblika analiżi tal-livelli ta’ parteċipazzjoni tal-Istati Membri differenti fis-Seba’ Programm Qafas u tqis il-konklużjonijiet biex tiżgura żvilupp ibbilanċat tar-riċerka fl-Istati Membri fit-Tmien Programm Qafas;

67. Jemmen li fl-iffissar tal-prijoritajiet għat-Tmien Programm Qafas għandha tingħata kunsiderazzjoni fir-rigward ta’ finanzjament alternattiv li ma jkunx ibbażat fuq l-għotjiet għall-innovazzjoni, inklużi l-impriżi bejn il-pubbliku u l-privat u l-investimenti b’self ta’ kapital;

68. Jirrakkomanda t-titjib fl-internazzjonalizzazzjoni tat-Tmien Programm Qafas permezz tal-koperazzjoni ma' pajjiżi terzi, fosthom il-pajjiżi li qed jiżviluppaw, filwaqt li jiġu pprovduti b'regoli amministrattivi sempliċi u speċifiċi; jinkoraġġixxi, bi tħejjija għat-Tmien Programm Qafas li jmiss, l-iskambju tal-aqwa prattiki u standards mas-sħab internazzjonali l-oħrajn kollha;

69. Jappoġġa r-rwol tal-Kummissjoni bħala gwardjan meta jkun meħtieġ finanzjament minn awtoritajiet nazzjonali jew reġjonali;

70. Jilqa’ t-twaqqif tas-sottogrupp tal-innovazzjoni tal-Kummissjoni, u d-diskussjonijiet tiegħu dwar kif jitkejlu l-effikaċja tal-politika ta’ riċerka u żvilupp tal-UE u l-infiq relatat mal-proġetti ta’ riċerka u żvilupp;

71. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.

Ix-xjenza, l-edukazzjoni u l-innovazzjoni huma l-pilastri tat-tkabbir ekonomiku u l-ħolqien tal-impjiegi. Jeħtieġ li l-Ewropa tinvesti fl-innovazzjoni jekk trid tiżviluppa prodotti u servizzi ġodda. Dawn joħolqu sorsi ġodda ta' impjiegi u tkabbir, biex l-Ewropa ssir aktar kompetittiva u ttejjeb il-kwalità tal-ħajja tagħha. L-innovazzjoni, madankollu, teħtieġ ir-riċerka. Ir-riċerka u l-innovazzjoni jinsabu fil-qalba tal-inizjattiva Ewropa 2020 tal-Unjoni Ewropea.

Il-programmi Ewropej tar-Riċerka u l-Innovazzjoni, b'mod partikolari l-Programm Qafas għar-Riċerka, l-Iżvilupp Teknoloġiku u l-Attivitajiet ta' Dimostrazzjoni, kibru fl-ambitu matul is-snin kemm f'termini tal-applikazzjonijiet tagħhom kif ukoll fid-daqs tal-baġits tagħhom. Iż-żieda fin-numru ta' applikazzjonijiet għall-iffinanzjar tlaqqgħet ma' tkabbir parallel fil-mekkaniżmi ta' kontroll biex jiġi żgurat l-użu xieraq tal-fondi tal-UE. Aktar regoli u proċeduri amministrattivi, madankollu, komplew iżidu fid-diffikultà biex wieħed jersaq lejn il-proċess b'fiduċja. Hu tassew diffiċli għal organizzazzjonijiet żgħar – SMEs, start-ups b'teknoloġija għolja u istituti żgħar, universitajiet u ċentri ta' riċerka – li jsibu tarf ta' din il-komplikazzjoni.

Il-komunità tar-riċerka qiegħda titlob b'urġenza għall-armonizzazzjoni tar-regoli u l-proċeduri u għal simplifikazzjoni ġenerali tar-rekwiżiti tar-responsabilità finanzjarja. Dan l-aħħar, 13,000 riċerkatur iffirmaw petizzjoni b'talba għal aktar simplifikazzjoni u fiduċja fil-finanzjament tal-UE għar-riċerka. Din hi l-fehma ġenerali fost ir-riċerkaturi, id-dinja akkademika u l-membri tal-industrija. Huwa ċertament meħtieġ li jiġu ssimplifikati l-mekkaniżmi involuti fil-Programmi Qafas għar-Riċerka, l-Iżvilupp Teknoloġiku u l-Attivitajiet ta' Dimostrazzjoni, is-Seba' u t-Tmien Programmi Qafas u l-programmi kollha tax-Xjenza u l-Innovazzjoni tal-Kummissjoni Ewropea.

Is-sistema attwali għandha tinbidel b'sistema li jkollha fiduċja akbar fl-applikanti. Għall-ġejjieni għandu jiġi ssimplifikat il-monitoraġġ tal-aspetti finanzjarji u amministrattivi tal-proġetti filwaqt li jissaħħaħ il-proċess ta' valutazzjoni xjentifika u teknoloġika. Dan iġib miegħu evalwazzjoni orizzontali u, magħha, l-applikazzjoni ta' kriterji bbażati fuq l-eċċellenza għall-valutazzjoni. M'għandniex xi ngħidu, it-tranżazzjonijiet finanzjarji kollha jinvolvu grad ta' riskju, iżda tħassib żejjed dwar il-kontroll ta' dan ir-riskju permezz ta' sorveljanza amministrattiva jista' attwalment iżid mal-ispiża ġenerali tal-proċess. L-ewwel, għandhom ikunu ttollerati livelli ogħla ta' riskju (biex b'hekk jiġi ssimplifikat il-kontroll burokratiku) filwaqt li, fit-tieni lok, għandha tiddaħħal fiduċja akbar fil-komunità xjentifika u tan-negozju. Jeħtieġ li jintlaħaq bilanċ bejn il-fiduċja u l-kontroll – bejn it-teħid tar-riskju u l-perikli li r-riskju jġib miegħu – biex tiġi żgurata l-ġestjoni finanzjarja soda tal-fondi tal-UE għar-riċerka.

Hemm domanda reali għal titjib u simplifikazzjoni fil-finanzjament u l-ġestjoni tar-riċerka. Fil-preżent, hemm regoli u proċeduri differenti għal strumenti differenti tal-Programm Qafas, għal tipi differenti ta' istituzzjonijiet (universitajiet, ċentri ta' riċerka, industrija u SMEs) u għal tipi differenti ta' attività (pereżempju, il-ġestjoni, ir-riċerka, id-dimostrazzjoni). Din il-matriċi tridimensjonali (l-istrumenti, l-istituzzjonijiet u l-attivitajiet) tinsab f'numru ta' saffi konċentriċi ta' regoli u proċeduri. Dawn is-saffi jikkonsistu f'regoli ta' parteċipazzjoni, programmi speċifiċi, ir-regolament finanzjarju, ir-riskju tollerabbli tal-iżbalji u r-regolament tal-persunal li direttament jew indirettament jinfluwenzaw il-Programm Qafas.

Ir-rapporteur tilqa' l-Komunikazzjoni 'Is-Semplifikazzjoni tal-Implimentazzjoni tal-Programmi Qafas ta' Riċerka'. Din tistabbilixxi pjan serju u kreattiv għal riforma li tindirizza ħafna mid-diffikultajiet li għaddew minnhom il-parteċipanti tal-Programmi Qafas għar-riċerka.

Madankollu, ir-relazzjoni bejn it-tibdil propost u r-regolament finanzjarju eżistenti mhijiex ċara. Xi miżuri li qiegħda tipproponi l-Kummissjoni jeħtieġu tibdil fir-regolament finanzjarju. Jeħtieġ isir ukoll tibdil fir-regoli ta' parteċipazzjoni jew fir-regoli tal-programmi speċifiċi tal-Programm Qafas. Fl-aħħar nett, xi miżuri jeħtieġu tibdil ġenerali filwaqt li oħrajn ma jeħtieġu l-ebda tibdil.

It-tieni, ir-rapporteur hija mħassba dwar ir-rabta bejn il-finanzjament u r-riżultati. Minn naħa waħda, wieħed japprezza l-frankezza tal-Kummissjoni Ewropea biex terġa' tqis ir-regoli għall-finanzjament tal-programmi ta' riċerka tagħha. Madankollu, it-tibdil għandu jitqies b'attenzjoni u bil-ħsieb, filwaqt li jitqiesu mhux biss ir-raġunijiet finanzjarji u amministrattivi u l-konsegwenzi għall-benefiċjarji, imma wkoll l-impatt li jista' jkun hemm fuq il-kwalità tar-riċerka u l-innovazzjoni nnifishom. Ir-rapporteur hija mħassba wkoll li l-għażla tal-finanzjament abbażi ta' riżultati tista' twassal għal proġetti anqas riskjużi u eqreb lejn ir-riċerka tas-suq. L-Ewropa jeħtiġilha aktar innovazzjoni iżda r-riċerka konfinali għandha tibqa' l-bażi għall-innovazzjoni. Barra minn hekk, mingħajr l-eċċellenza fir-riċerka ma hemmx innovazzjoni.

Ir-rapporteur tħeġġeġ bil-qawwa s-simplifikazzjoni tal-aċċess għall-finanzjament għar-riċerka. Jeħtieġ tkun żviluppata kultura ta' fiduċja reċiproka li tinvolvi l-partijiet interessati kollha. Din ittejjeb ir-riċerka u l-innovazzjoni biex l-Ewropa ssir post aktar attraenti fejn wieħed joqgħod u jaħdem.

B'dan kollu, dan ir-rapport għandu rilevanza u urġenza ġenwini. Hu f'waqtu b'mod partikolari, billi issa se tibda l-evalwazzjoni interim tas-Seba' Programm Qafas kif ukoll it-tħejjija għat-Tmien Programm Qafas. Ir-rapport għandu l-ħsieb li joffri pedament sod li fuqu wieħed ikun eventwalment jista' jibni.

Bidla prammatika lejn is-simplifikazzjoni amministrattiva u finanzjarja

It-tnaqqis tal-kumplessità u s-simplifikazzjoni tax-xenarju tal-finanzjament tal-UE għar-riċerka għandu jkollu impatt pożittiv l-aktar fuq il-partijiet interessati. Il-Parlament Ewropew, fir-riżoluzzjoni ta' kwittanza tiegħu tal-2007, ġibed l-attenzjoni għaż-żieda fid-diversità. Talab ukoll li ssir valutazzjoni tal-problemi għall-benefiċjarji, fosthom in-nuqqas ta' trasparenza. Il-proċess ta' simplifikazzjoni għandu joffri stabilità u ċertezza legali lill-parteċipanti.

Għalhekk, is-simplifikazzjoni tar-responsabilità finanzjarja teħtieġ approċċ ibbażat aktar fuq il-fiduċja u fuq it-tolleranza għar-riskju fil-finanzjament Ewropew għar-riċerka. Dan jinvolvi l-aċċettazzjoni tal-prinċipji u l-prattiki normali ta' kontabilità u ta' ġestjoni tal-benefiċjarji, sakemm dawn ikunu konformi mal-awtoritajiet nazzjonali u jkunu ċċertifikati minnhom. Jinvolvi wkoll l-aċċettazzjoni tal-verifiki u ċ-ċertifikati tal-metodoloġija mogħtija mill-awtoritajiet nazzjonali kif ukoll kontroll finanzjarju bil-għan li jkunu salvagwardati l-fondi pubbliċi u tingħeleb il-frodi. L-'approċċ ta' verifika waħda' u l-verifika fil-ħin reali, li jsiru minn entità waħda, jippermetti li l-benefiċjarji jsewwu l-iżbalji sistemiċi.

Għal kull miżura, jeħtieġ ikun stipulat jekk bidla fir-regolament finanzjarju jew fir-regoli tal-parteċipazzjoni jew fil-programmi speċifiċi tkunx meħtieġa jew le. Barra minn hekk, jeħtieġ ikun stipulat jekk il-miżuri jiġux applikati għas-Seba' Programm Qafas jew għat-Tmien Programm Qafas biss. Għas-Seba' Programm Qafas, ir-rapporteur hi favur li dan it-tibdil jidħol gradwalment biex jiġu evitati bidliet drastiċi u f'daqqa fid-direzzjoni fl-istess programm qafas.

Ir-rapporteur tappoġġa wkoll l-idea li titnaqqas il-kombinazzjoni ta' metodi ta' kalkolu tar-rati ta' finanzjament u tal-kostijiet indiretti fl-iskemi kollha ta' finanzjament. Madankollu, il-mudelli ta' kalkolu tar-rati ta' finanzjament u tal-kostijiet indiretti għandhom ikunu differenti għall-universitajiet, l-organizzazzjonijiet tar-riċerka u l-industrija. Ir-raġuni għal dan hi li l-ispejjeż ivarjaw b'mod konsiderevoli bejn dawn it-tipi ta' entitajiet. Ir-rati ta' finanzjament għandhom ikunu differenti għal tipi differenti ta' attivitajiet. L-armonizzazzjoni tar-regoli għandha tkun immirata prinċipalment lejn l-istrumenti differenti. Barra minn hekk, ir-rapporteur hi tal-fehma li l-konsorzji żgħar u l-użu ta' mekkaniżmi ċentrali aktar sempliċi jwasslu għal proċeduri simplifikati.

Għandha tiġi definita b'mod ċar ukoll it-terminoloġija fl-użu ta' kunċetti kkumplikati bħas-somom ta' flus f'daqqa u l-kostijiet eliġibbli biex ma jkunx hemm interpretazzjonijiet differenti. Il-kjarifika dwar il-kostijiet eliġibbli, bħat-taxxi, hi ta' importanza kbira. Hekk ukoll hija l-konsistenza fl-applikazzjoni tar-regoli fis-servizzi kolha tal-Kummissjoni Ewropea u fil-verifiki differenti.

Bidla radikali lejn it-titjib fil-kwalità, l-aċċessibilità u t-trasparenza

a) Ċaqliq lejn approċċ 'b'bażi xjentifika'

L-eċċellenza għandha tkun l-aktar forza importanti fil-finanzjament tar-riċerka u l-approċċ abbażi ta' riżultati jista' jbaxxi l-ambizzjoni xjentifika tar-riċerkaturi. Konsegwentement, minflok approċċ 'abbażi ta' riżultati', ir-rapporteur qiegħda tipproponi sistema ta' finanzjament 'abbażi xjentifika'. Din iġġib magħha s-simplifikazzjoni tal-kontroll min-naħa finanzjarja, enfasi fuq in-naħa xjentifika u teknika u evalwazzjoni orizzontali bbażata fuq l-eċċellenza. Sewwasew, sistema ta' evalwazzjoni orizzontali professjonali, koerenti, trasparenti u armonizzata li tutilizza l-eċċellenza għandha tkun l-aktar kriterju importanti għall-evalwazzjoni, kif inhu l-każ tas-sistema ta' evalwazzjoni ERC. Fl-aħħar nett, għandu jiġi mħeġġeġ l-użu tal-premjijiet b'mod raġonevoli. Madankollu, l-użu tal-premjijiet bħala mezz li jiffinanzja r-riċerka m'għandux jieħu post il-finanzjament strutturat.

b) L-użu aħjar tal-ħin

Il-fażijiet kollha tal-proġett għandhom jiġu ottimizzati biex ma jkunx hemm dewmien u titħeġġeġ il-kosteffettività. Dan jinvolvi l-aċċess għall-abbozz ta' Programmi ta' Ħidma, il-pubblikazzjoni tas-sejħa, l-abbozzar tal-proposta, il-proċedura tal-għażla u l-ħin meħud biex jiġu approvati l-għotjiet u jsir il-ħlas.

It-tnaqqis tal-ħin sal-għotja jkun ta' sodisfazzjon kbir. Madankollu, ir-rapporteur għandha riżervi kbar dwar il-proposta tal-Kummissjoni biex jitneħħa r-rekwiżit li l-Istati Membri jridu jagħtu l-opinjoni tagħhom dwar id-deċiżjonijiet tal-għażla. Hu importanti li l-Istati Membri jkollhom is-setgħa ta' skrutinju, b'mod speċjali fir-riċerka dwar is-sigurtà u d-difiża u fil-każijiet tal-evalwazzjoni etika tal-proġetti.

Il-Kummissjoni tipproponi l-użu aktar ġeneralizzat tal-proposti b'żewġ fażijiet. Il-preżentazzjoni f'żewġ fażijiet tnaqqas mill-piż tal-abbozzi ta' proposti sħaħ iżda tista' żżid ukoll fit-tul u l-kumplessità tal-proċess ta' preżentazzjoni. Għalhekk, ir-rapporteur tappoġġa l-proċedura ta' applikazzjoni f'żewġ fażijiet, sakemm din l-evalwazzjoni ssir bir-reqqa fil-fażi inizjali. Dan għandu jnaqqas ukoll l-ispejjeż tal-applikazzjoni.

c) Il-bidla lejn approċċ 'iffukat fuq l-utent' f'termini ta' aċċess

Ir-rapporteur tqis li aċċess aħjar għall-programm u għall-appoġġ tal-utent jista' jinkiseb bit-titjib fil-materjal ta' gwida (anqas lingwaġġ tekniku u aktar konsistenza fit-terminoloġija). Dan jista' jsir bl-ottimizzazzjoni tas-sistemi tal-IT, bl-appoġġ fil-ġestjoni tal-proġetti u bl-appoġġ personalizzat tal-Uffiċjal tal-Proġett tal-UE (għandu jinżamm l-istess uffiċjal tul il-ħajja sħiħa tal-proġett). Għal din ir-raġuni, ir-rapporteur tappoġġa l-integrazzjoni sħiħa tal-għotjiet, l-evalwazzjonijiet u l-proposti fi pjattaforma waħda tal-IT. Din għandha tkun soda, flessibbli u faċli biex tintuża. L-istess pjattaforma għandha tintuża fis-servizzi u l-aġenziji kollha tal-Kummissjoni Ewropea.

Sinerġija tal-programmi u l-istrumenti

Ir-rapporteur jilqa' l-impenn tal-Kummisssjoni biex tiżgura l-interpretazzjoni u l-applikazzjoni uniformi tar-regoli u l-proċeduri fil-programmi u l-istrumenti kollha. Barra minn hekk, l-implimentazzjoni tar-regoli fl-erba' Direttorati Ġenerali tal-Kummissjoni Ewropea u l-Aġenziji kif ukoll fl-Impriżi Konġunti li jimplimentaw il-JTIs għandha tkun uniformi. Madankollu, ir-rapporteur tirrakkomanda bil-qawwa li jkun hemm sett ta' regoli differenti għaċ-ċentri tar-riċerka u l-universitajiet, ieħor għall-industrija u ieħor għall-SMEs.

It-tnaqqis tal-kumplessità fil-programmi tal-UE u fl-istrumenti assoċjati għandu jikkontribwixxi biex tintlaħaq l-ottimizzazzjoni tas-sinerġiji b'riżultat tal-azzjoni kkombinata tagħhom. Hu mixtieq ukoll li jinbena mekkaniżmu komuni ta' gwida fil-Kummissjoni (it-taħriġ tal-uffiċjali tal-proġetti u tal-awdituri u l-ħolqien ta' medjatur għall-Programm Qafas).

Lezzjonijiet li għandhom jittieħdu għat-Tmien Programm Qafas li jmiss

Ir-rapporteur tqis is-simplifikazzjoni tal-amministrazzjoni bħala waħda mill-akbar prijoritajiet għall-Programm Qafas li jmiss. Barra minn hekk, ir-reviżjoni tar-Regolament Finanzjarju, ir-Regolament tal-Persunal u l-implimentazzjoni tar-Riskju Tollerabbli tal-Iżbalji (TRE) speċifiku għar-riċerka hija ta' importanza kbira fir-ristrutturar tal-qafas ta' Finanzjament tar-Riċerka.

Fl-istess ħin, ir-rapporteur tistieden lill-Kummissjoni tivvaluta l-istrumenti individwali u żżid il-koordinazzjoni bejniethom, filwaqt li tinżamm biżżejjed flessibilità biex takkomoda l-ispeċifiċitajiet tal-proġetti skont id-daqs tagħhom.

Ir-rapporteur tqis li l-innovazzjoni hija r-riżultat ta' sistema ta' edukazzjoni u riċerka effiċjenti u ffinanzjata kif jixraq flimkien ma' kundizzjonijiet ta' qafas, bħal politika xierqa dwar l-IPR, l-eżistenza ta' kapital ta' riskju, swieq miftuħa u regolamentazzjoni intelliġenti. Għalhekk, huwa importanti li l-Programm Qafas iqis il-katina sħiħa tal-innovazzjoni mir-riċerka konfinali, għar-riċerka applikata, id-dimostrazzjoni teknoloġika, id-disseminazzjoni u l-valorizzazzjoni tar-riżultati. Ir-rapporteur tappoġġa sistema ta' finanzjament b'bażi xjentifika u diviżjoni bbilanċjata tajjeb bejn ir-riċerka diretta, minn fuq għal isfel immexxija mill-impatt u r-riċerka mhix diretta, minn isfel għal fuq immexxija mix-xjenza bħala l-bażi għat-Tmien Programm Qafas.

Fl-aħħar nett, ir-rapporteur hi tal-fehma wkoll li tkun mixtieqa aktar internazzjonalizzazzjoni tal-Programmi Qafas. Dan iġib miegħu kooperazzjoni akbar ma' pajjiżi terzi, fosthom il-pajjiżi li qed jiżviluppaw.

għall-Kumitat għall-Industrija, ir-Riċerka u l-Enerġija

dwar is-semplifikazzjoni tal-implimentazzjoni tal-programmi qafas tar-riċerka
(2010/2079(INI))

Rapporteur għal opinjoni: Aldo Patriciello

SUĠĠERIMENTI

Il-Kumitat għall-Kontroll tal-Baġit jistieden lill-Kumitat għall-Industrija, ir-Riċerka u l-Enerġija, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Jilqa' b'sodisfazzjon il-miżuri ta' semplifikazzjoni li diġà ddaħħlu fis-seħħ mill-Kummissjoni fl-implimentazzjoni tas-Seba' Programm Qafas (PQ), u jappoġġja lill-Kummissjoni fl-isforzi tagħha biex iżżid is-semplifikazzjoni u l-kjarifika tar-regoli b'tali mod li ma jistax ikun hemm interpretazzjonijiet diverġenti u li jnaqqsu r-riskju ta' żbalji u jnaqqsu wkoll l-ispiża tal-kontrolli; barra minn hekk jistieden lill-Kummissjoni biex tiddefinixxi l-miżuri li se jittieħdu għas-semplifikazzjoni u l-kjarifikazzjoni tar-regoli attwali;

2. Jiddeplora l-multiplikazzjoni estrema tal-entitajiet ta' riċerka, tal-mudelli ta' koperazzjoni u tal-mekkaniżmi ta' ġestjoni, kif ukoll il-kumplessità li tirriżulta u li toħloq problemi ta' trasparenza fir-rigward tal-awtorità baġitarja u differenza ta' trattament tal-benefiċjarji;

3. Itenni t-talba tiegħu lill-Kummissjoni għal aktar ċertezza legali rigward ir-rekwiżiti tal-verifika, biex ma tagħmel l-ebda emenda retroattiva, biex tevita li tirrepeti l-verifiki inutilment jew għaliex tapplika kriterji differenti f'dan ir-rigward, biex tonora l-aspettattivi leġittimi tal-benefiċjarji permezz ta’ interpretazzjoni uniformi tar-regoli u biex tħaffef l-aċċettazzjoni taċ-ċertifikati rigward il-metodu applikat fir-rigward tal-ispejjeż medji tal-persunal, li fir-rigward tagħhom jidher li ma sar ebda progress;

4. Jappoġġja s-semplifikazzjoni tar-regoli ta' kalkolu tal-ispejjeż dikjarati; jitlob definizzjoni ċara tal-kriterji meħtieġa għall-valutazzjoni ta' kemm il-metodi ta' kalkolu tal-benefiċjarji jikkonformaw mar-rekwiżiti regolatorji;

5. Jenfasizza l-ħtieġa li r-regoli jiġu ssemplifikati bla ħsara għall-kwalità tan-nefqa kif ukoll li jittejbu l-effikaċja u l-effettività tal-implimentazzjoni; huwa tal-fehma li sistema ta' finanzjament trasparenti, soda u faċli biex tamministraha għandha tkun kontrobilanċjata b'sistema ta' kontroll strett; jistieden lill-Kummissjoni biex tfassal proposti għal metodoloġija għall-verifika tal-effettività u l-effiċjenza tan-nefqa għar-riċerka;

6. Jinsisti li, matul it-tħejjija tal-PQ li jmiss, il-Kummissjoni tagħmel proposti ambizzjużi bil-għan li tkun stabbilita sistema ta' finanzjament imsejsa fuq ir-riżultati u l-prestazzjonijiet xjentifiċi aktar milli fuq id-dħul u l-ispejjeż, filwaqt li tiżgura li l-applikazzjonijiet innovattivi ma jiġux imxekkla; jisħaq li dan l-approċċ b'bażi xjentifika ma jmurx kontra l-ħtiġiet tal-kontroll baġitarju;

7. Jistieden lill-Kummissjoni biex tiżgura li tingħata l-assistenza lill-applikanti kollha billi tipprovdi għajnuna biex isibu l-imsieħba rilevanti;

8. Jistieden lill-Kummissjoni biex teżamina t-tendenza tagħha favur il-ħlas b'rata fissa u permezz ta' somma waħda f'daqqa, li jista' jkollhom effett detrimentali fuq il-ħila tal-benefiċjarji sabiex iwettqu b'mod adegwat ir-rekwiżiti tal-verifika;

RIŻULTAT TAL-VOTAZZJONI FINALI FIL-KUMITAT

għall-Kumitat għall-Industija, ir-Riċerka u l-Enerġija

dwar is-semplifikazzjoni tal-implimentazzjoni tal-programmi qafas tar-riċerka
(2010/2079(INI))

Rapporteur għal opinjoni: Alain Cadec

SUĠĠERIMENTI

Il-Kumitat għall-Iżvilupp Reġjonali jistieden lill-Kumitat għall-Industija, ir-Riċerka u l-Enerġija, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Jenfasizza l-importanza tar-riċerka u l-iżvilupp biex jintlaħqu l-isfidi l-kbar li qiegħda tħabbat wiċċha magħhom l-Unjoni Ewropea, partikularment fil-qafas tal-Istrateġija UE 2020; ifakkar li l-politika ta' koeżjoni tikkontribwixxi sostanzjalment għall-finanzjament tar-riċerka u l-iżvilupp fir-reġjuni;

2. Jilqa' l-proposti tal-Kummissjoni li għandhom l-għan li jissimplifikaw il-proċeduri amministrattivi għas-sejħiet għall-offerti kumplessi u li jiswew il-flus u l-proċedura ta’ implimentazzjoni fi ħdan il-programmi qafas tar-riċerka, partikularment l-introduzzjoni gradwali ta' finanzjament ibbażat fuq ir-riżultati u fuq elementi standard għall-persunal tal-proġett ikkonċernat; jissuġġerixxi li jikkunsidra mill-ġdid l-hekk imsejħa regola 'proġett wieħed għal kull suġġett' u jħeġġeġ it-twaqqif ta' approċċ tematiku axxendenti aktar flessibbli biex jitħaffef il-proċess li jwassal għall-implimentazzjoni ta' ideat innovattivi. jenfasizza, madankollu, li minħabba l-imprevedibbiltà inerenti tar-riċerka, anke l-proġetti li r-riżultati tagħhom ma jistgħux ikunu magħrufa b’mod ċar minn qabel huma ta’ valur; josserva wkoll li għandu jkun ċar dwar kif ir-regoli ta’ verifika għandhom jiġu interpretati sabiex issir differenza ċara bejn l-irregolaritajiet u l-frodi ntenzjonat;

3. Jilqa' d-diskussjonijiet attwali tal-istituzzjonijiet tal-UE dwar il-ħtieġa li tiġi ssimplifikata l-politika tal-iżvilupp reġjonali bil-għan li ssir aktar trasparenti, li tkun aktar aċċessibbli għall-parteċipanti li għandhom nuqqas ta’ riżorsi finanzjarji u li tkun aktar effikaċi kif ukoll li tipprovdi tisħiħ fis-sigurtà legali għall-benefiċjarji; iqis li l-prattiki tajba li ġew identifikati matul dan il-proċess jistgħu jkunu utli għas-simplifikazzjoni tal-implimentazzjoni tas-Seba' Programm Qafas għar-riċerka u l-iżvilupp teknoloġiku;

4. Jenfasizza li l-aċċess tal-benefiċjarji għal proġetti fl-oqsma tar-riċerka u l-innovazzjoni jeħtieġ kapaċità teknika kbira u għarfien tajjeb tal-proċeduri amministrattivi u finanzjarji u, għalhekk, dan l-aċċess huwa diffiċli mmens għall-applikanti żgħar bħal SMEs u istituti ta’ riċerka żgħar li jinstabu f’reġjuni periferiċi; ifakkar li daqs 90% tan-negozji fl-Ewropa huma SMEs u li hemm il-ħtieġa li tiġi żgurata l-parteċipazzjoni sħiħa u totali tal-SMEs fl-użu tar-riżorsi FP7;

5. Huwa tal-opinjoni li d-diversi għodod tal-Unjoni Ewropea għall-koeżjoni, ir-riċerka u l-innovazzjoni għandhom jiġu implimentati b’mod integrat bil-għan li tiġi żgurata l-effettività tagħhom; jenfasizza l-ħtieġa ta’ riċerka tas-sinerġiji bejn dawn l-għodod u li jiġu eliminati l-ostakli lil tali sinerġiji, partikularment billi jiġu armonizzati r-regoli tal-verifika u tal-eliġibilità tal-ispejjeż biex tiġi ssimplifikata l-implimentazzjoni min-naħa tal-benefiċjarji;

6. Iqis li l-livell reġjonali huwa l-livell li huwa l-aktar adattat biex jiġu stimolati r-riċerka u l-innovazzjoni bis-saħħa tal-viċinanza bejn l-universitajiet, l-organiżmi pubbliċi tar-riċerka, l-intrapriżi l-kbar, l-SMEs u l-awtoritajiet pubbliċi reġjonali, partikularment fi ħdan gruppamenti żgħar; jinnota wkoll li t-trawwim tar-riċerka u l-innovazzjoni fil-livell reġjonali jista’ jgħin fit-tnaqqis tan-nuqqas ta' parità ekonomika, soċjali u reġjonali eżistenti; jinkoraġġixxi, madankollu, il-livelli differenti (reġjonali, nazzjonali u Komunitarji) biex jikkoordinaw aħjar l-isforzi tagħhom fil-qafas ta' programmazzjoni fil-livell Ewropew tal-attivitajiet ta' riċerka u żvilupp; jenfasizza wkoll il-ħtieġa ta’ konnessjonijiet aħjar bejn l-akkademja u l-industrija;

7. Ifakkar li bħal politika tal-iżvilupp reġjonali, is-Seba' Programm Qafas għar-riċerka u l-iżvilupp teknoloġiku, huwa bbażat fuq il-prinċipji tas-sħubija u tal-kofinanzjar; jaffirma l-impenn tiegħu għal dawn il-prinċipji ta’ ġestjoni tajba u jitlob li jibqgħu jiġu applikati minkejja r-restrizzjonijiet fuq l-ispejjeż pubbliċi li huma r-riżultat tal-kriżi ekonomika;

8. Ifakkar li s-Seba' Programm Qafas għar-riċerka u l-iżvilupp teknoloġiku jiffoka fuq proġetti ta’ skala kbira li jista' jkollhom impatt konkret fuq l-attività ekonomika, l-innovazzjoni tal-programmi ta' produzzjoni u l-garanzija ta' produzzjoni futura b'valur miżjud qawwi u, għalhekk, il-ħolqien tal-impjiegi u t-titjib tal-kapaċità kompetittiva globali tal-Unjoni Ewropea; jinnota li d-dinamiżmu ġġenerat minn proġetti ta’ eċċellenza, f’oqsma kemm ta’ riċerka applikata u fundamentali, għandu benefiċċji fuq it-totalità tat-territorju tal-Unjoni Ewropea, hu x'inhu l-livell attwali tiegħu ta' żvilupp xjentifiku, partikularment jekk is-sinerġija tinkiseb bil-fondi tal-politika reġjonali u jikkompleta b’mod effiċjenti d-dimensjoni territorjali tal-għodod tal-politika ta’ koeżjoni, fl-interess kemm tal-iżvilupp ibbilanċjat kif ukoll tal-kompetittività; jinnota madankollu li għandha tingħata attenzjoni partikulari wkoll għal proġetti żgħar, li aktarx ikollhom impatt konkret, pereżempju billi tissaħħaħ ir-rabta bejn l-innovazzjoni u l-integrazzjoni soċjali;

9. Jitlob lill-Kummissjoni biex tippublika analiżi tal-livelli ta’ parteċipazzjoni ta’ Stati Membri differenti fis-Seba' Programm Qafas għar-riċerka u l-iżvilupp teknoloġiku

10. Jinnota li ż-żieda fid-differenzi reġjonali rigward il-potenzjal tar-riċerka u l-iżvilupp hija sfida li għandha tiġi indirizzata mhux biss fil-qafas tal-Politika ta' Koeżjoni iżda wkoll permezz tal-politika dwar ir-riċerka u l-innovazzjoni;

11. Huwa tal-opinjoni li għandhom jiġu inkoraġġuti l-iskambji professjonali mingħajr madankollu ma titħeġġeġ il-ħarba tal-imħuħ mill-Unjoni Ewropea għal inħawi oħra tad-dinja u, fl-Unjoni stess, mill-ifqar pajjiżi għal dawk aktar sinjuri, li jmur kontra l-politika ta' koeżjoni Ewropea;

RIŻULTAT TAL-VOTAZZJONI FINALI FIL-KUMITAT

Data tal-adozzjoni

Riżultat tal-votazzjoni finali

+:

–:

0:

Membri preżenti għall-votazzjoni finali

Marta Andreasen, Jean-Pierre Audy, Inés Ayala Sender, Zigmantas Balčytis, Luigi de Magistris, Tamás Deutsch, Martin Ehrenhauser, Jens Geier, Gerben-Jan Gerbrandy, Ingeborg Gräßle, Ville Itälä, Bogusław Liberadzki, Monica Luisa Macovei, Jan Olbrycht, Aldo Patriciello, Theodoros Skylakakis, Georgios Stavrakakis, Søren Bo Søndergaard

Sostituti preżenti għall-votazzjoni finali

Zuzana Brzobohatá, Edit Herczog, Ivailo Kalfin, Olle Schmidt, Derek Vaughan

Avviż legali - Politika tal-privatezza