RAPPORT dwar il-proposta għal regolament tal-Parlament Ewropew u tal-Kunsill li jemenda l-Anness I tar-Regolament tal-Kunsill (KE) Nru 1528/2007 fir-rigward tal-esklużjoni ta' għadd ta' pajjiżi mil-lista ta' reġjuni jew stati li kkonkludew in-negozjati

25.6.2012 - (COM(2011)0598 – C7‑0305/2012 – 2011/0260(COD)) - ***I

Kumitat għall-Kummerċ Internazzjonali
Rapporteur: David Martin

Proċedura : 2011/0260(COD)

Ċiklu ta' ħajja waqt sessjoni

Ċiklu relatat mad-dokument :

A7-0207/2012

Testi mressqa :

A7-0207/2012

Dibattiti :

PV 12/09/2012 - 13
CRE 12/09/2012 - 13

Votazzjonijiet :

PV 13/09/2012 - 11.6
Spjegazzjoni tal-votazzjoni
Spjegazzjoni tal-votazzjoni

Testi adottati :

P7_TA(2012)0342

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW
NOTA SPJEGATTIVA
OPINJONI tal-Kumitat għall-Iżvilupp
PROĊEDURA
PROĊEDURA

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar il-proposta għal regolament tal-Parlament Ewropew u tal-Kunsill li jemenda l-Anness I tar-Regolament tal-Kunsill (KE) Nru 1528/2007 fir-rigward tal-esklużjoni ta' għadd ta' pajjiżi mil-lista ta' reġjuni jew stati li kkonkludew in-negozjati

(COM(2011)0598 - C7-0305/2012 - 2011/0260(COD)

(Proċedura leġiżlattiva ordinarja: l-ewwel qari)

Il-Parlament Ewropew,

– wara li kkunsidra l-proposta tal-Kummissjoni lill-Parlament u lill-Kunsill (COM(2011)0598),

– wara li kkunsidra l-Artikolu 294(2) u l-Artikolu 207(2) tat-Trattat dwar il-Funzjonament tal-Unjoni Ewropea, skont liema artikoli l-Kummissjoni ppreżentat il-proposta lill-Parlament (C7-0305/2012),

– wara li kkunsidra l-Artikolu 294(3) tat-Trattat dwar il-Funzjonament tal-Unjoni Ewropea,

– wara li kkunsidra l-Artikolu 55 tar-Regoli ta' Proċedura tiegħu,

– wara li kkunsidra r-rapport tal-Kumitat għall-Kummerċ Internazzjonali u l-opinjoni tal-Kumitat għall-Iżvilupp (A7-0207/2012),

1. Jadotta l-pożizzjoni fl-ewwel qari li tidher hawn taħt;

2. Jitlob lill-Kummissjoni biex terġa' tirreferi l-kwistjoni lill-Parlament jekk ikollha l-ħsieb li temenda l-proposta b'mod sustanzjali jew li tibdilha b'test ġdid;

3. Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill, lill-Kummissjoni u lill-parlamenti nazzjonali.

Emenda 1

Proposta għal regolament

Premessa 5

Test propost mill-Kummissjoni

Emenda

(5) Sabiex ikun żgurat li l-imsieħba jerġgħu jiddaħħlu immedjatament fl-Anness I ta' dak ir-Regolament appena jkunu ħadu l-passi neċessarji għar-ratifikazzjoni tal-Ftehimiet rispettivi tagħhom, u sakemm dawn jiddaħħlu fis-seħħ, is-setgħa tal-adozzjoni tal-atti skont l-Artikolu 290 tat-Trattat dwar il-Funzjonament tal-Unjoni Ewropea għandha tiġi delegata lill-Kummissjoni Ewropea hekk li jkunu jistgħu jerġgħu jiddaħħlu l-pajjiżi mneħħija mill-Anness I permezz ta' dan ir-Regolament. Huwa ferm importanti li l-Kummissjoni Ewropea, matul ix-xogħol ta’ preparazzjoni tagħha, tikkonsulta b'mod xieraq, inkluż fil-livell tal-esperti. Il-Kummissjoni Ewropea, meta tkun qiegħda tħejji u tfassal atti ddelegati, għandha tiżgura li jkun hemm trażmissjoni simultanja u fil-pront, kif ukoll xierqa, tad-dokumenti rilevanti lill-Parlament Ewropew u lill-Kunsill,

Emenda 2

Proposta għal regolament

Artikolu 1 – punt 1

Regolament (KE) Nru 1528/2007

Artikolu 2b – paragrafu 2


Test propost mill-Kummissjoni	Emenda
2. Id-delega tas-setgħa msemmija fl-Artikolu 2a għandha tingħata lill-Kummissjoni għal pejodu ta' żmien mhux definit mid-dħul fis-seħħ ta' dan ir-Regolament.	2. Id-delega tas-setgħa msemmija fl-Artikolu 2a għandha tingħata lill-Kummissjoni għal perjodu ta’ ħames snin minn ... *. Il-Kummissjoni għandha tfassal rapport dwar id-delega tas-setgħa mhux iktar tard minn disa’ xhur qabel it-tmiem tal-perjodu ta’ ħames snin. Id-delega tas-setgħa għandha tiġi estiża b'mod taċitu għal perjodi ta' tul identiku, dment li l-Parlament Ewropew jew il-Kunsill ma jopponux tali estensjoni sa mhux aktar tard minn tliet xhur qabel it-tmiem ta' kull perjodu.
	__________
	^*ĠU: Jekk jogħġbok daħħal id-data tad-dħul fis-seħħ ta' dan ir-Regolament.

Emenda 3

Proposta għal regolament

Artikolu 1 – punt 1

Regolament (KE) Nru 1528/2007

Artikolu 2b paragrafu 5


Test propost mill-Kummissjoni	Emenda
5. Att iddelegat adottat skont l-Artikolu 2a għandu jidħol fis-seħħ biss jekk ma tkun ġiet espressa oġġezzjoni la mill-Parlament Ewropew u lanqas mill-Kunsill fi żmien xahrejn min-notifika ta' dak l-att lill-Parlament Ewropew u lill-Kunsill jew jekk, qabel jiskadi dak il-perjodu, il-Parlament Ewropew u l-Kunsill it-tnejn li huma jinfurmaw lill-Kummissjoni li ma humiex se joġġezzjonaw. Dak il-perjodu għandu jkun estiż b'xahrejn fuq l-inizjattiva tal-Parlament Ewropew u tal-Kunsill."	5. Att iddelegat adottat skont l-Artikolu 2a għandu jidħol fis-seħħ biss jekk ma tkun ġiet espressa oġġezzjoni la mill-Parlament Ewropew u lanqas mill-Kunsill fi żmien xahrejn min-notifika ta' dak l-att lill-Parlament Ewropew u lill-Kunsill jew jekk, qabel jiskadi dak il-perjodu, il-Parlament Ewropew u l-Kunsill it-tnejn li huma jinfurmaw lill-Kummissjoni li ma humiex se joġġezzjonaw. Dak il-perjodu għandu jkun estiż b'erba' xhur fuq l-inizjattiva tal-Parlament Ewropew u tal-Kunsill."

Emenda 4

Proposta għal regolament

Artikolu 2

Test propost mill-Kummissjoni

Emenda

Dan ir-Regolament għandu jidħol fis-seħħ l-għada li jiġi ppubblikat f'Il-Ġurnal Uffiċjali tal-Unjoni Ewropea.

Għandu japplika fl-1 ta’ Jannar 2014.

Għandu japplika fl-1 ta’ Jannar 2016.

Dan ir-Regolament għandu jorbot fl-intier tiegħu u japplika direttament fl-Istati Membri kollha.

Ġustifikazzjoni

Huwa neċessarju li jingħata aktar żmien għal negozjati ulterjuri sabiex jintlaħaq ftehim dwar il-Ftehimiet ta' Sħubija Ekonomika (FSE) komprensivi, sabiex jiġi evitat ir-riskju li numru ta' pajjiżi AKP li għad għandhom bżonnijiet kbar ta' żvilupp u livelli sostanzjali ta' faqar, ikollhom aċċess tas-suq imnaqqas għall-UE.

NOTA SPJEGATTIVA

Il-Ftehim ta' Cotonou jipprevedi l-konklużjoni ta' Ftehimiet ta' Sħubija Ekonomika (FSE) bejn membri tal-Grupp ta' Stati Afrikani, tal-Karibew u tal-Paċifiku (AKP) u l-UE u l-Istati Membri tagħha, u l-arranġamenti dettaljati li japplikaw mill-1 ta' Jannar 2008 fuq prodotti mill-pajjiżi inkwistjoni ġew stabbiliti fir-Regolament tal-Kunsill (KE) Nru. 1528/2007, l-hekk imsejjaħ Regolament għall-aċċess għas-suq. Dan ir-regolament jirregola l-kundizzjonijiet tal-importazzjonijiet tal-UE għas-36 pajjiż AKP li ffirmaw Ftehimiet ta' Sħubija Ekonomika fl-2007. Dan kien soluzzjoni tranżitorja għall-pajjiżi li kienu għadhom mhux fil-pożizzjoni li japplikaw dawn l-Ftehimiet ta' Sħubija Ekonomika, li kienu għadhom mhux ratifikati. Bażikament dan ir-Regolament antiċipa b'mod unilaterali l-aċċess mingħajr dazju li l-UE offriet f'dawn il-ftehimiet.

Madankollu, diversi pajjiżi la ħadu l-passi neċessarji għar-ratifika ta' FSE u lanqas ma kkonkludew negozjati reġjonali komprensivi. Għaldaqstant il-Kummissjoni Ewropea tipproponi li mill-1 ta' Jannar 2014, dawk il-pajjiżi li ma jkunux iffirmaw jew irratifikaw il-Ftehimiet tagħhom, għandhom jitneħħew mil-lista ta' benefiċjarji ta' din id-dispożizzjoni.

Is-17-il pajjiż li sa issa għadhom ma komplewx bil-proċess ta' ratifika tagħhom, jaqgħu f'kategoriji differenti u l-konsegwenzi prattiċi skont iċ-ċirkostanzi attwali ta' din il-proposta jiddependu mill-istatus tagħhom u mill-ftehim finali milħuq waqt ir-reviżjoni tas-Sistema ta' Preferenzi Ġeneralizzati (GSP):

· Il-Burundi, il-Komoros, Ħaiti, il-Lesoto, il-Możambik, ir-Rwanda, it-Tanzanija, l-Uganda u ż-Żambja huma pajjiżi l-anqas żviluppati (LDCs), li se jkomplu jgawdu minn aċċess mingħajr dazju u mingħajr kwoti skont l-iskema Kollox ħlief Armi (EBA) tal-UE, u għaldaqstant mhux se jiġu affettwati;

· Il-Kamerun, Fiġi, il-Gana, il-Kosta tal-Avorju, il-Kenja u s-Sważiland se jaqgħu lura għall-iskema tas-Sistema ta' Preferenzi Ġeneralizzati (GSP) tal-UE, li tipprevedi tariffi mnaqqsa meta mqabbla mar-rata tal-aktar nazzjon iffavorit (MFN), iżda mhux favorevoli daqs aċċess mingħajr dazju u mingħajr kwoti, u dan se jwassal għal tariffi ogħla fuq l-aktar esportazzjonijiet ewlenin;

· Il-Botswana u n-Namibja, ikklassifikati bħala pajjiżi bi dħul medju superjuri għandhom, skont il-proposta għall-GSP, jaqgħu għar-rata MFN, applikata għal bosta pajjiżi (inklużi pereżempju, l-Istati Uniti u l-Ġappun).

Il-Kummissjoni Ewropea tisħaq li s-sitwazzjoni attwali mhijiex kompatibbli mar-regolamenti tad-WTO, u li din hija wkoll kwistjoni ta' ġustizzja, kemm fil-konfront ta' pajjiżi li ssodisfaw l-obbligi tagħhom u rratifikaw il-ftehimiet tagħhom, iżda wkoll ta' dawk il-pajjiżi li qed jiżviluppaw u li mhumiex sħab AKP. L-emenda għar-Regolament tal-Kunsill (KE) Nru. 1528/2007 hija parti minn approċċ fuq żewġ binarji, inkluż l-intensifikazzjoni tan-negozjati FSE li għaddejjin, għall-konklużjoni ta' ftehimiet reġjonali sħaħ. Fil-fatt, din hija probabbilment r-raġuni ewlenija wara l-proposta: sabiex tiżdied il-pressjoni u b'hekk il-momentum tan-negozjati.

Madankollu r-rapporteur għadu mhux konvint li l-impożizzjoni ta' skadenza daqshekk qasira u unilaterali tirrappreżenta l-aħjar approċċ għall-kisba tar-riżultati mixtieqa. Fil-fatt hemm raġunijiet sodi għaliex il-ftehimiet li ntlaħqu fl-2007 ma ġewx implimentati u l-ftehimiet reġjonali komprensivi ma ġewx konklużi. Diversi mill-ftehimiet konklużi fl-2007 ntlaħqu ma' pajjiżi individwali u mhux ma' reġjuni sħaħ, li komplew bin-negozjati. Madankollu, deċiżjoni għall-implimentazzjoni ta' Ftehimiet ta' Sħubija Ekonomika minn dawn il-pajjiżi individwali fi ħdan reġjun jista' jkollha impatt negattiv serju fuq il-proċess ta' integrazzjoni reġjonali. L-objettivi tal-Ftehimiet ta' Sħubija Ekonomika, li huma appoġġjati mill-Parlament Ewropew, huma li l-ftehimiet għandhom jikkontribwixxu sabiex il-proċess ta' integrazzjoni reġjonali jsir aktar profond, kif ukoll għall-promozzjoni tat-tkabbir ekonomiku u l-iżvilupp għall-pajjiżi u r-reġjuni kollha kkonċernati. Ftehimiet parzjali jista' jkollhom effett oppost.

Il-proċess FSE għandu jipprovdi aċċess għas-suq stabbli u akbar għall-esportazzjonijiet AKP, iżda f'każ li din l-emenda tiġi approvata, ir-realtà hija li numru ta' pajjiżi AKP li għad għandhom ħtiġijiet kbar ta' żvilupp u livelli sostanzjali ta' faqar jista' jkollhom aċċess għas-suq mnaqqas ħafna għall-UE (u f'xi każijiet mhux se jkollhom skema ta' preferenza alternattiva li jistgħu jirrikorru għaliha, partikolarment jekk il-proposta għar-reviżjoni tal-iskema GSP tiġi adottata). Sabiex ikun hemm żmien għall-adattament u biex jiġu limitati l-effetti negattivi possibbli, speċjalment għal dawk il-pajjiżi li l-aċċess tagħhom għas-suq se jonqos, huwa neċessarju li ż-żmien jiġi adattat, biex b'hekk ikun hemm perjodu ta' tranżizzjoni bejn id-dħul fis-seħħ tal-iskema GSP il-ġdida u d-dħul fis-seħħ ta' dan ir-regolament emendat.

In-negozjati bilaterali u multilaterali tal-kummerċ huma kumplessi fin-natura tagħhom, u spiss ma jistgħux jiġu konklużi fi skedi ta' żmien stabbiliti b'mod riġidu. Id-WTO tista' tifhem dan perfettament, fid-dawl tas-sitwazzjoni attwali ta' waqfien taċ-Ċiklu ta' Doha għall-Iżvilupp. Li ssir pressjoni b'mod unilaterali għall-konklużjoni tan-negozjati fi ħdan żmien qasir speċifiku irrispettivament mill-fatt dwar jekk id-dispożizzjonijiet kontroversjali ġewx riżolti jew le, mhijiex mod tajjeb wisq sabiex tinħoloq klima li twassal għall-konklużjoni tan-negozjati fejn l-interessi u t-tħassib taż-żewġ partijiet huma meqjusa. Madankollu, huwa importanti wkoll li r-regolamenti tad-WTO jiġu rispettati, u r-regolament inkwistjoni kien verament previst bħala arranġament temporanju. Iż-żamma ta' preferenzi għall-pajjiżi li mhumiex qed jissodisfaw il-kriterji mhijiex sitwazzjoni sostenibbli, iżda l-iskeda ta' żmien proposta mhijiex realistika u hija qasira wisq għall-konklużjoni b'suċċess tan-negozjati li għaddejjin. Sabiex il-ftehimiet ikunu ratifikati sal-1 ta' Jannar 2014, in-negozjati jridu jiġu konklużi sa madwar Ġunju 2012. Fid-dawl tal-importanza u l-ambitu tal-kwistjonijiet li fadal, dan mhuwiex possibbli. Ir-rapporteur għaldaqstant jipproponi l-estensjoni taż-żmien, sabiex it-tibdil jidħol fis-seħħ mill-1 ta' Jannar 2016 minflok.

Il-proposta tinkludi wkoll emendi għall-allinjament tal-proċeduri ta' teħid ta' deċiżjoni ma' dawk tat-Trattat ta' Lisbona. Huwa propost li l-Kummissjoni għandu jkollha s-setgħa tadotta atti delegati skont l-Artikolu 290 tat-TFUE għall-fini li temenda l-Anness I sabiex ikunu jistgħu jerġgħu jiddaħħlu dawn il-pajjiżi li jieħdu l-passi neċessarji lejn ir-ratifika ta' FSE. L-emendi proposti mir-rapporteur fil-maġġorparti tagħhom jibnu fuq pożizzjonijiet meħuda f'regolamenti orizzontali, l-hekk imsejħa 'omnibuses'.

OPINJONI tal-Kumitat għall-Iżvilupp (5.6.2012)

għall-Kumitat għall-Kummerċ Internazzjonali

Rapporteur: Gabriele Zimmer

ĠUSTIFIKAZZJONI QASIRA

Il-Kumitat għall-Iżvilupp jiddispjaċih dwar il-fatt li minkejja l-progress reċenti li nkiseb fin-negozjati, li r-reġjuni kkonċernati qegħdin isegwu b'rieda tajba, l-UE ddeċidiet b'mod unilaterali li timponi skadenza. It-tħassib ewlieni tal-Kumitat għall-Iżvilupp huwa li l-emenda proposta għar-regolament qed tirriskja li titfa' pressjoni fuq il-gvernijiet tal-pajjiżi AKP kkonċernati sabiex jiffirmaw u jirratifikaw il-Ftehimiet ta' Sħubija Ekonomika (FSE) rispettivi tagħhom fiż-żmien speċifikat, irrispettivament mill-fatt jekk id-dispożizzjonijiet kontroversjali ġewx riżolti jew le.

Il-Kumitat għall-Iżvilupp jinsisti li l-konklużjoni tan-negozjati għandha tkun determinata mill-kontenut, li għandu jqis l-interessi u jindirizza t-tħassib taż-żewġ partijiet, u mhux minn skedi ta' żmien. Għalhekk, l-UE għandha turi l-flessibilità neċessarja fil-proċess ta' negozjati, b'rispett għal-livelli ta' żvilupp differenti ta' kull pajjiż AKP. Billi l-għan ewlieni huwa konformità mar-regolamenti tad-WTO, l-UE m'għandhiex tisforza lill-pajjiżi AKP jidħlu f'impenji li huma lil hinn minn dawk mitluba skont il-ftehimiet tad-WTO.

Il-Kumitat għall-Iżvilupp jixtieq jenfasizza li jekk il-proposta tal-Kummissjoni tiġi adottata, numru ta' pajjiżi AKP jistgħu jitilfu l-aċċess tagħhom mingħajr dazju u mingħajr kwoti għas-suq tal-UE, li jista' jkun ta' dannu għall-esportaturi stabbiliti. Barra minn hekk, pressjoni fuq il-pajjiżi sabiex jiffirmaw ftehim ta' kummerċ li jinkludi ċerti dispożizzjonijiet inaċċettabbli, mhux biss tillimita l-ispazju għat-tfassil tal-politiki ekonomiċi nazzjonali, iżda tista' tkun ta' dannu wkoll għas-setturi ekonomiċi emerġenti tagħhom. Dan imur ukoll kontra l-objettiv ta' koerenza politika għall-iżvilupp stabbilit fl-Artikolu 208 tat-TFUE u jkun ta' detriment għar-relazzjonijiet tal-UE fil-pajjiżi kkonċernati.

Id-deċiżjoni jista' jkollha wkoll impatt addizzjonali, billi ċċaqlaq l-investimenti minn pajjiżi AKP li m'għandhomx aċċess sħiħ għas-suq tal-UE lejn dawk li għandhom, u dan imur kontra l-isforzi attwali lejn integrazzjoni reġjonali. Għalhekk, l-UE għandha żżomm r-Regolament KE 1528.

******

Il-Kumitat għall-Iżvilupp jistieden lill-Kumitat għall-Kummerċ Internazzjonali, bħala l-kumitat responsabbli, sabiex jipproponi ċ-ċaħda tal-proposta tal-Kummissjoni.

PROĊEDURA

Titolu	L-emendar tal-Anness I tar-Regolament tal-Kunsill (KE) Nru 1528/2007 fir-rigward tal-esklużjoni ta’ għadd ta’ pajjiżi mil-lista ta’ reġjuni jew stati li kkonkludew in-negozjati
Referenzi	COM(2011)0598 – C7-0305/2011 – 2011/0260(COD)
Kumitat responsabbli Data tat-tħabbir fis-seduta plenarja	INTA 12.10.2011
Opinjoni(jiet) mogħtija minn Data tat-tħabbir fis-seduta plenarja	DEVE 12.10.2011
Rapporteur(s) Data tal-ħatra	Gabriele Zimmer 11.10.2011
Eżami fil-kumitat	23.4.2012
Data tal-adozzjoni	4.6.2012
Riżultat tal-votazzjoni finali	+: –: 0:	13 8 4
Membri preżenti għall-votazzjoni finali	Thijs Berman, Ricardo Cortés Lastra, Corina Creţu, Véronique De Keyser, Nirj Deva, Leonidas Donskis, Charles Goerens, Eva Joly, Filip Kaczmarek, Gay Mitchell, Norbert Neuser, Birgit Schnieber-Jastram, Michèle Striffler, Alf Svensson, Keith Taylor, Ivo Vajgl, Iva Zanicchi
Sostitut(i) preżenti għall-votazzjoni finali	Emer Costello, Enrique Guerrero Salom, Fiona Hall, Edvard Kožušník, Judith Sargentini, Horst Schnellhardt, Patrizia Toia
Sostitut(i) (skont l-Artikolu 187(2)) preżenti għall-votazzjoni finali	Marisa Matias

PROĊEDURA

Titolu	L-emendar tal-Anness I tar-Regolament tal-Kunsill (KE) Nru 1528/2007 fir-rigward tal-esklużjoni ta’ għadd ta’ pajjiżi mil-lista ta’ reġjuni jew stati li kkonkludew in-negozjati
Referenzi	COM(2011)0598 – C7-0305/2011 – 2011/0260(COD)
Data meta ġiet ippreżentata lill-PE	30.9.2011
Kumitat responsabbli Data tat-tħabbir fis-seduta plenarja	INTA 12.10.2011
Kumitat(i) mitlub(a) jagħti/u opinjoni Data tat-tħabbir fis-seduta plenarja	DEVE 12.10.2011
Rapporteur(s) Data tal-ħatra	David Martin 11.10.2011
Eżami fil-kumitat	25.1.2012	25.4.2012
Data tal-adozzjoni	21.6.2012
Riżultat tal-votazzjoni finali	+: –: 0:	25 2 2
Membri preżenti għall-votazzjoni finali	William (The Earl of) Dartmouth, Laima Liucija Andrikienė, John Attard-Montalto, Maria Badia i Cutchet, Daniel Caspary, María Auxiliadora Correa Zamora, Marielle de Sarnez, Yannick Jadot, Metin Kazak, Franziska Keller, Bernd Lange, David Martin, Paul Murphy, Cristiana Muscardini, Franck Proust, Godelieve Quisthoudt-Rowohl, Niccolò Rinaldi, Helmut Scholz, Peter Šťastný, Gianluca Susta, Iuliu Winkler, Paweł Zalewski
Sostitut(i) preżenti għall-votazzjoni finali	Amelia Andersdotter, George Sabin Cutaş, Albert Deß, Salvatore Iacolino, Syed Kamall, Maria Eleni Koppa, Elisabeth Köstinger, Marietje Schaake, Konrad Szymański
Sostitut(i) (skont l-Artikolu 187(2)) preżenti għall-votazzjoni finali	Françoise Castex, Marielle Gallo
Data tat-tressiq	25.6.2012

Avviż legali - Politika tal-privatezza