RAKKOMANDAZZJONI GĦAT-TIENI QARI dwar il-pożizzjoni tal-Kunsill fl-ewwel qari bil-ħsieb tal-adozzjoni ta' regolament tal-Parlament Ewropew u tal-Kunsill li jemenda r-Regolament (KE) Nru 428/2009 li jistabbilixxi reġim Komunitarju għall-kontroll tal-esportazzjonijiet, it-trasferiment, is-senserija u t-transitu ta' oġġetti b'użu doppju

20.3.2014 - (0000/2014 – C7-0000/2014 – 2011/0310(COD)) - ***II

Kumitat għall-Kummerċ Internazzjonali
Rapporteur: Christofer Fjellner

ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW

dwar il-pożizzjoni tal-Kunsill fl-ewwel qari bil-ħsieb tal-adozzjoni ta' regolament tal-Parlament Ewropew u tal-Kunsill li jemenda r-Regolament (KE) Nru 428/2009 li jistabbilixxi reġim Komunitarju għall-kontroll tal-esportazzjonijiet, it-trasferiment, is-senserija u t-transitu ta' oġġetti b'użu doppju

(0000/2014 – C7-0000‑2014 – 2011/0310(COD))

(Proċedura leġiżlattiva ordinarja: it-tieni qari)

Il-Parlament Ewropew,

–       wara li kkunsidra l-pożizzjoni tal-Kunsill fl-ewwel qari (0000/2014 – C7‑0000/2014),

–       wara li kkunsidra il-pożizzjoni tiegħu fl-ewwel qari[1] dwar il-proposta tal-Kummissjoni lill-Parlament Ewropew u lill-Kunsill (COM(2011)0704),

–       wara li kkunsidra l-Artikolu 294(7) tat-Trattat dwar il-Funzjonament tal-Unjoni Ewropea,

–       wara li kkunsidra l-Artikolu 72 tar-Regoli ta' Proċedura tiegħu,

–       wara li kkunsidra r-rakkomandazzjoni għat-tieni qari tal-Kumitat għall-Kummerċ Internazzjonali (A7‑0236/2014),

1.      Japprova l-pożizzjoni tal-Kunsill fl-ewwel qari;

2.      Japprova d-dikjarazzjoni konġunta tal-Parlament Ewropew, tal-Kunsill, u tal-Kummissjoni mehmuża ma’ din ir-riżoluzzjoni;

3.      Jieħu nota tad-dikjarazzjoni tal-Kunsill mehmuża ma’ din ir-riżoluzzjoni;

4.      Jinnota li l-att qed jiġi adottat b'konformità mal-pożizzjoni tal-Kunsill;

5.      Jagħti istruzzjonijiet lill-President tiegħu sabiex jiffirma l-att flimkien mal-President tal-Kunsill, skont l-Artikolu 297(1) tat-Trattat dwar il-Funzjonament tal-Unjoni Ewropea;

6.      Jagħti istruzzjonijiet lis-Segretarju Ġenerali tiegħu sabiex jiffirma l-att wara li jkun ivverifika li l-proċeduri ntemmu kif imiss u sabiex, bi qbil mas-Segretarju Ġenerali tal-Kunsill, jipproċedi għall-pubblikazzjoni tiegħu f'Il-Ġurnal Uffiċjali tal-Unjoni Ewropea, flimkien mad-dikjarazzjonijiet kollha mehmużin ma' din ir-riżoluzzjoni,;

7.      Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali.

• [1]  Testi Adottati tat-23.10.2012, P7_TA(2012)0383.

ANNESS GĦAR-RIŻOLUZZJONI LEĠIŻLATTIVA

Dikjarazzjoni Konġunta mill-Parlament Ewropew, il-Kunsill u l-Kummissjoni dwar l-analiżi tas-sistema ta' kontroll tal-esportazzjoni ta' oġġetti b'użu doppju

Il-Parlament Ewropew, il-Kunsill u l-Kummissjoni jirrikonoxxu l-importanza li jittejbu b'mod kontinwu l-effikaċja u l-koerenza tar-reġim strateġiku ta' kontroll tal-esportazzjoni tal-UE, li jiżgura livell għoli ta' sigurtà u trasparenza adegwata mingħajr ma jfixkel il-kompetittività u l-kummerċ leġittimu f'oġġetti b'użu doppju.

It-tliet istituzzjonijiet iqisu li l-modernizzazzjoni u l-konverġenza ulterjuri tas-sistema huma meħtieġa sabiex din tlaħħaq ma' theddidiet ġodda u bidliet teknoloġiċi rapidi, jitnaqqsu d-distorsjonijiet, jinħoloq suq komuni ġenwin għal oġġetti b'użu doppju (kundizzjonijiet ekwivalenti ta' kompetizzjoni uniformi għall-esportaturi) u tkompli tkun mudell ta' kontroll tal-esportazzjoni għal pajjiżi terzi.

Għal dan il-għan, huwa essenzjali li l-proċess ta' aġġornament tal-listi ta' kontroll jiġi simplifikat (Annessi għar-Regolament); jissaħħu l-valutazzjoni tar-riskju u l-iskambju ta' informazzjoni, jiġu żviluppati standards industrijali mtejba, u jitnaqqsu d-disparitajiet fl-implimentazzjoni.

Il-Parlament Ewropew, il-Kunsill u l-Kummissjoni jirrikonoxxu l-kwistjonijiet fir-rigward tal-esportazzjoni ta' ċerti teknoloġiji tal-informazzjoni u tal-komunikazzjoni (ICT) li jistgħu jintużaw f'konnessjoni mal-ksur tad-drittijiet tal-bniedem kif ukoll biex idgħajfu s-sigurtà tal-UE, b'mod partikolari għat-teknoloġiji użati għas-sorveljanza tal-massa, il-monitoraġġ, l-insegwiment, l-intraċċar u l-iċċensurar, kif ukoll għal-vulnerabbiltajiet tas-software.

Inbdew konsultazzjonijiet tekniċi f'dan ir-rigward, inklużi fil-qafas taż-Żjara bejn il-Pari tal-UE dwar l-Użu Doppju, il-Grupp ta' Koordinazzjoni tal-Użu Doppju, u r-reġimi ta' kontroll tal-esportazzjoni, u tkompla t-teħid ta' azzjonijiet biex jiġu indirizzati sitwazzjonijiet ta' urġenza permezz ta' sanzjonijiet (skont l-Artikolu 215 tat-TFUE), jew ta' miżuri nazzjonali. Barra minn hekk, se jiġu intensifikati l-isforzi għall-promozzjoni ta' ftehimiet multilaterali fil-kuntest tar-reġimi ta' kontroll tal-esportazzjoni, u se jiġu esplorati għażliet biex din il-kwistjoni tiġi indirizzata fil-kuntest tar-rieżami li għadu għaddej tal-politika tal-UE dwar il-kontroll tal-esportazzjoni tal-użu doppju, u biex titħejja Komunikazzjoni tal-Kummissjoni. F'dan il-kuntest, it-tliet istituzzjonijiet ħadu nota tal-ftehim tal-4 ta' Diċembru 2013 mill-Istati Parteċipanti tal-Arranġament ta' Wassenaar biex jadottaw kontrolli fuq għodod kumplessi ta' sorveljanza li jippermettu l-aċċess mhux awtorizzat għas-sistemi tal-kompjuters, u fuq sistemi ta' sorveljanza tal-IP-networks.

Il-Parlament Ewropew, il-Kunsill u l-Kummissjoni jimpenjaw ruħhom ukoll li jiżviluppaw aktar il-mekkaniżmu eżistenti ''catch-all'' għal oġġetti ta' użu doppju li mhumiex fl-Anness I għar-Regolament, sabiex ikomplu jsaħħu s-sistema ta' kontroll tal-esportazzjoni u l-applikazzjoni tagħha fis-suq uniku Ewropew.

Dikjarazzjoni mill-Kummissjoni dwar atti delegati

Fil-kuntest ta' dan ir-Regolament, il-Kummissjoni tfakkar fl-impenn li ħadet fil-paragrafu 15 tal-Ftehim Qafas dwar ir-relazzjonijiet bejn il-Parlament Ewropew u l-Kummissjoni Ewropea li tagħti lill-Parlament l-informazzjoni u d-dokumentazzjoni kollha dwar il-laqgħat tagħha mal-esperti nazzjonali fil-qafas tal-ħidma tagħha rigward it-tħejjija ta' atti delegati.

Dikjarazzjoni tal-Kummissjoni dwar l-aġġornament tar-Regolament

Sabiex tiżgura approċċ Ewropew aktar integrat, effiċjenti u koerenti għall-moviment (l-esportazzjoni, it-trasferimenti, is-senserija u t-transitu) ta' oġġetti strateġiċi, il-Kummissjoni se tressaq proposta ġdida għall-aġġornament tar-Regolament kemm jista' jkun malajr.

NOTA SPJEGATTIVA

Attwalment l-annessi għar-"Regolament dwar l-Użu Doppju" Nru 428/2009 li jinkludu listi ta' oġġetti u destinazzjonijiet ikkontrollati jiġu aġġornati permezz tal-proċedura leġiżlattiva ordinarja. Din il-proposta tal-allinjament "post-Lisbona" għandha l-għan li tissimplifika l-proċeduri fir-reġim tal-UE għall-kontroll tal-esportazzjonijiet billi tintroduċi atti delegati għall-aġġornamenti regolari tal-Anness I u għal modifiki tal-Anness II.

Wara l-adozzjoni tal-pożizzjoni tal-Parlament fl-ewwel qari fit-23 ta' Ottubru 2012, ġew konklużi, fis-17 ta' Diċembru 2013, negozjati informali bil-għan li jintlaħaq ftehim bikri fit-tieni qari. It-test li ħareġ min-negozjati ġie approvat b'maġġoranza assoluta mill-membri tal-Kumitat għall-Kummerċ Internazzjonali fil-21 ta' Jannar 2014. Wara verifika legali-lingwistika, il-Kunsill adotta l-pożizzjoni tiegħu fl-ewwel qari li tikkonferma l-ftehim fit-3 ta’ Marzu 2014.

Ir-Rapporteur jirrakomanda li l-pożizzjoni tal-Kunsill fl-ewwel qari u d-dikjarazzjoni konġunta mit-tliet istituzzjonijiet jiġu approvati mingħajr emendi , filwaqt li tittieħed nota tad-dikjarazzjonijiet tal-Kummissjoni dwar atti delegati u r-riforma dwar il-kontrolli strateġiċi tal-esportazzjoni. It-tliet dikjarazzjonijiet għandhom jiġu ppubblikati flimkien mal-att leġiżlattiv finali.

PROĊEDURA

Titolu	Emenda tar-Regolament (KE) Nru 428/2009 li jistabbilixxi reġim Komunitarju għall-kontroll tal-esportazzjonijiet, it-trasferiment, is-senserija u t-transitu ta’ oġġetti b’użu doppju
Referenzi	18086/1/2013 – C7-0093/2014 – 2011/0310(COD)
Data tal-1 qari tal-PE - Numru P	23.10.2012                     T7-0383/2012
Proposta tal-Kummissjoni	COM(2011)0704 - C7-0395/2011
Data tat-tħabbir fis-seduta plenarja ta’ meta l-Parlament irċieva l-pożizzjoni tal-Kunsill fl-ewwel qari	13.3.2014
Kumitat responsabbli        Data tat-tħabbir fis-seduta plenarja	INTA 13.3.2014
Rapporteur(s)        Data tal-ħatra	Christofer Fjellner 19.3.2014
Data tal-adozzjoni	20.3.2014
Riżultat tal-votazzjoni finali	+: –: 0:	22 0 3
Membri preżenti għall-votazzjoni finali	William (The Earl of) Dartmouth, Maria Badia i Cutchet, David Campbell Bannerman, Daniel Caspary, María Auxiliadora Correa Zamora, George Sabin Cutaş, Metin Kazak, David Martin, Vital Moreira, Cristiana Muscardini, Godelieve Quisthoudt-Rowohl, Helmut Scholz, Robert Sturdy, Henri Weber, Paweł Zalewski
Sostitut(i) preżenti għall-votazzjoni finali	Emma McClarkin, Peter Skinner
Sostitut(i) (skont l-Artikolu 187(2)) preżenti għall-votazzjoni finali	Zdravka Bušić, Andrzej Grzyb, Jolanta Emilia Hibner, Anna Ibrisagic, Marusya Lyubcheva, Iosif Matula, Horst Schnellhardt, Alda Sousa
Data tat-tressiq	21.3.2014