dwar ir-rwol tal-UE fin-NU - kif jistgħu jintlaħqu aħjar l-objettivi tal-UE fil-qasam tal-politika barranija

(2015/2104(INI))

Il-Parlament Ewropew,

–  wara li kkunsidra t-Trattat dwar l-Unjoni Ewropea,

–  wara li kkunsidra r-riżoluzzjonijiet preċedenti tiegħu dwar l-UE u n-NU, b'mod partikolari r-rakkomandazzjoni lill-Kunsill tat-2 ta' April 2014 dwar id-69 sessjoni tal-Assemblea Ġenerali tan-Nazzjonijiet Uniti(1) u r-riżoluzzjoni tiegħu tal-11 ta' Mejju 2011 dwar "l-UE bħala attur globali: ir-rwol tagħha fl-ambitu tal-organizzazzjonijiet multilaterali"(2),

–  wara li kkunsidra l-konklużjonijiet tal-Kunsill tat-22 ta' Ġunju 2015 dwar il-prijoritajiet tal-UE għas-70 Assemblea Ġenerali tan-NU,

–  wara li kkunsidra l-Karta tan-Nazzjonijiet Uniti,

–  wara li kkunsidra r-riżoluzzjoni tal-Assemblea Ġenerali tan-Nazzjonijiet Uniti (AĠNU) dwar il-parteċipazzjoni tal-Unjoni Ewropea fil-ħidma tan-Nazzjonijiet Uniti(3), li tagħti d-dritt lill-UE tintervjeni fl-Assemblea Ġenerali tan-NU, tippreżenta proposti u emendi orali li jitressqu għall-votazzjoni fuq talba ta' Stat Membru, u teżerċita d-dritt ta' replika,

–  wara li kkunsidra l-ewwel dikjarazzjoni tax-xorta tagħha tal-14 ta' Frar 2014, mill-President tal-Kunsill tas-Sigurtà dwar ir-rwol li l-UE kellha fiż-żamma tal-paċi u s-sigurtà internazzjonali(4),

–  wara li kkunsidra d-dikjarazzjoni tal-Konferenza Dinija ta' Durban tal-2001 kontra r-Razziżmu, id-Diskriminazzjoni Razzjali, il-Ksenofobija u l-Intolleranza Relatata,

–  wara li kkunsidra l-istudju ppublikat f'Marzu 2015 mid-Direttorat Ġenerali tal-Parlament Ewropew għall-Politiki Esterni tal-Unjoni, "Reforming the United Nations: Sate of Play, Ways Forward" (Ir-Riforma tan-Nazzjonijiet Uniti:is-sitwazzjoni attwali, kif nistgħu nimxu 'l quddiem),

–  wara li kkunsidra l-Artikolu 52 tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Affarijiet Barranin u l-opinjonijiet tal-Kumitat għall-Iżvilupp, tal-Kumitat għall-Kummerċ Internazzjonali, tal-Kumitat għall-Kontroll tal-Baġit, tal-Kumitat għall-Kultura u l-Edukazzjoni u tal-Kumitat għall-Affarijiet Kostituzzjonali (A8-0308/2015),

L-objettivi tal-UE u l-punti globali fejn l-UE hija b'saħħitha

A.  billi l-ġejjieni tal-Unjoni Ewropea huwa marbut mal-paċi, mas-sigurtà u mal-iżvilupp globali, kif ukoll mad-drittijiet tal-bniedem; billi l-isfidi li qiegħda tiffaċċja l-UE jeħtieġu soluzzjonijiet globali, u l-kwistjonijiet globali jeħtieġu azzjoni Ewropea;

B.  billi l-prinċipji u l-objettivi tal-politika esterna tal-UE huma minquxa fl-Artikolu 21 tat-Trattat dwar l-Unjoni Ewropea, u huma interkonnessi mill-qrib ma' dawk tan-NU; billi l-Artikolu 21 tat-TUE jappella b'mod espliċitu għar-rispett għall-prinċipji tal-Karta tan-NU u tad-dritt internazzjonali;

C.  billi l-UE għandha potenzjal uniku li timmobilizza r-riżorsi mal-firxa kollha tal-istrumenti diplomatiċi, tas-siġurtà, tad-difiża, dawk ekonomiċi u umanitarji, f'konformità sħiħa mad-dispożizzjonijiet tal-Karta tan-NU; billi l-użu ta' dawn l-istrumenti abbażi ta' approċċ komprensiv jippermetti l-UE flessibbiltà unika hija u tindirizza b'mod effikaċi l-objettivi tas-sigurtà li huma l-aktar ta' sfida;

D.  billi l-UE tipparteċipa b'mod attiv, taħt l-awspiċi tan-NU, fil-promozzjoni tal-paċi, tas-sigurtà u tal-progress, permezz tal-Politika Estera u ta' Sigurtà Komuni (PESK) u tal-Politika ta' Sigurtà u ta' Difiża Komuni (PSDK);

E.  billi l-UE tissalvagwarda l-valuri, l-interessi fundamentali, is-sigurtà, l-indipendenza u l-integrità tagħha u taġixxi għaż-żamma tal-paċi, il-prevenzjoni tal-kunflitti u t-tisħiħ tas-sigurtà internazzjonali, f'konformità mal-prinċipji tal-Karta tan-NU u tal-Att Finali ta' Helsinki tal-1975, u mal-għanijiet tal-Karta ta' Pariġi għal Ewropa Ġdida, adottata fl-1990; billi l-UE hija parti mis-sistema ta' sigurtà kollettiva tan-NU, ukoll bħala wieħed mill-arranġamenti reġjonali previsti skont il-Kapitolu VIII tal-Karta tan-NU;

F.  billi l-UE trawwem il-progress ekonomiku, soċjali u ambjentali sostenibbli tal-pajjiżi li jinsabu fil-fażi tal-iżvilupp, bl-għanijiet primarji li jinqered il-faqar, jiġu promossi l-paċi u l-istabbiltà fit-tul u miġġielda l-inugwaljanzi soċjali, u billi tagħti għajnuna umanitarja lill-popolazzjonijiet, lill-pajjiżi u lir-reġjuni kkonfrontati b'kull tip ta' kriżijiet, naturali jew provokati mill-bniedem;

G.  billi l-UE hija attur ewlieni fl-oqsma ta' politika differenti u interkonnessi: il-kummerċ, l-iżvilupp, l-għajnuna umanitarja, l-ambjent u d-drittijiet tal-bniedem;

H.  billi l-UE taħdem għas-sostenibbiltà ambjentali billi tippromwovi miżuri u azzjonijiet internazzjonali għall-preservazzjoni u għat-titjib tal-kwalità tal-ambjent u l-ġestjoni sostenibbli tar-riżorsi naturali;

I.  billi l-UE tiżvolġi wkoll rwol ewlieni fil-politiki ambjentali, b'mod partikolari fil-ġlieda kontra t-tibdil fil-klima, mhux biss billi tadotta pożizzjoni avangardista u tistabbilixxi hija stess miri ambizzjużi, iżda wkoll billi fin-negozjati globali tiddefendi bla heda arranġamenti vinkolanti u azzjonijiet konkreti u li jistgħu jitkejlu;

J.  billi l-UE ssaħħaħ il-pedament tas-sostenibbiltà soċjali u governanza tajba, billi tikkonsolida, tappoġġa u tippromwovi d-demokrazija, l-istat tad-dritt, id-drittijiet tal-bniedem u l-prinċipji tad-dritt internazzjonali;

K.  billi, skont it-Trattati tagħha, l-UE tippromwovi sistema internazzjonali bbażata fuq kooperazzjoni multilaterali aktar b'saħħitha u governanza globali tajba, u hija impenjata għal multilateraliżmu effikaċi bin-NU fil-qalba tiegħu; billi dan l-impenn għandu l-għeruq tiegħu fil-konvinzjoni li, biex tkun kapaċi twieġeb b'suċċess għall-kriżijiet, l-isfidi u t-theddidiet globali, il-komunità internazzjonali teħtieġ sistema multilaterali effiċjenti, mibnija fuq drittijiet u valuri universali;

L.   billi l-enfasi prinċipali tal-politika esterna tal-UE hija fuq ir-relazzjonijiet bilaterali, il-kooperazzjoni u s-sħubijiet ma' pajjiżi, gruppi ta' pajjiżi u organizzazzjonijiet reġjonali u internazzjonali oħra madwar id-dinja kollha; billi matul l-aħħar għexieren ta' snin ingħatat attenzjoni speċjali lill-objettivi ġeopolitiċi u lit-tħassib fil-viċinat tal-UE tal-Lvant u tan-Nofsinhar; billi l-UE għandha relazzjonijiet speċjali mal-pajjiżi Afrikani, u fl-azzjonijiet tagħha tagħti attenzjoni partikolari lill-isfidi li huma jaffaċċaw;

M.  billi, f'kuntest ta' interdipendenza globali dejjem tiżdied, l-UE jeħtiġilha ssaħħaħ ir-rwol tagħha kemm fir-relazzjonijiet bilaterali kif ukoll fil-fora multilaterali;

N.  billi l-UE hija involuta, u għandha rwol importanti, fin-negozjati u medjazzjonijiet internazzjonali, b'mod partikolari l-każijiet tal-E3/EU3+3 u n-negozjati mal-Iran u tal-Proċess ta' Paċi tal-Lvant Nofsani;

O.  billi, bħala l-akbar blokk kummerċjali fid-dinja, l-UE għandha rwol b'saħħtu f'arranġamenti kummerċjali bilaterali u multilaterali, u żviluppat miżuri attivi ta' politika kummerċjali għall-promozzjoni tat-tkabbir ekonomiku, it-tnaqqis tal-faqar u l-ħarsien tal-ambjent u tar-riżorsi naturali;

P.  billi l-UE u l-Istati Membri tagħha huma l-ikbar kontributuri finanzjarji għall-baġit ġenerali tan-NU, kif ukoll għall-għajnuna umanitarja tagħha, għall-Għajnuna Uffiċjali għall-Iżvilupp (ODA) u għall-operazzjonijiet ta' żamma tal-paċi; billi l-politiki tal-UE tal-iżvilupp huma ta' importanza kbira minħabba li jippromwovu b'mod attiv it-tnaqqis tal-faqar u s-sostenibbiltà ekonomika, soċjali u ambjentali, b'hekk isaħħu l-paċi u s-sigurtà; billi l-UE hija firmatarja ta' aktar minn 50 ftehim u konvenzjoni multilaterali tan-NU, bħala l-unika parteċipant li mhuwiex Stat;

Q.  billi l-UE hija waħda mill-aktar difensuri u promoturi dedikati tad-drittijiet tal-bniedem, tal-libertajiet fundamentali, tal-valuri u d-diversità kulturali, tad-demokrazija u tal-istat tad-dritt; billi dispożizzjonijiet fir-rigward ta' dawk il-prinċipji huma inklużi fis-sħubijiet bilaterali kollha tagħha u għandhom pożizzjoni ċentrali fil-politika multilaterali tagħha; billi l-UE minn dejjem kienet tappoġġa b'mod qawwi l-ġustizzja internazzjonali;

R.  billi l-UE għandha rwol importanti fl-appoġġ għall-operazzjonijiet tan-NU fl-oqsma ta' tħassib reċiproku, b'mod partikolari l-protezzjoni ta' persuni ċivili u speċjalment in-nisa u t-tfal affettwati mill-kunflitti armati;

S.  billi l-ugwaljanza bejn in-nisa u l-irġiel hija valur bażiku tal-UE li huwa rikonoxxut fit-Tratti u fil-Karta tad-Drittijiet Fundamentali tagħha; billi l-UE assumiet ir-responsabbiltà għall-integrazzjoni tal-ugwaljanza bejn is-sessi fl-attivitajiet u fl-oqsma ta' politika kollha tagħha, inkluż fil-politiki esterni u ta' kooperazzjoni għall-iżvilupp;

T.  billi l-bnedmin għandhom valuri u interessi komuni; billi għandu jkun hemm qsim ġust tal-piż u tal-benefiċċji meta jiġu solvuti problemi komuni u meta jiġu promossi objettivi u valuri komuni;

Is-Sistema tan-Nazzjonijiet Uniti

U.  billi s-sistema tan-NU hija l-forum globali ewlieni għat-titjib tal-governanza globali, u għalhekk tirrappreżenta l-aqwa forum fejn jiġu promossi l-valuri u l-interessi tal-UE;

V.  billi l-objettiv ewlieni wara t-Tieni Gwerra Dinjija kien iż-żamma tal-paċi u s-sigurtà; billi l-promozzjoni tal-iżvilupp ekonomiku u soċjali u tad-drittijiet tal-bniedem kellha post ċentrali fil-Karta; billi t-tħassib ambjentali kien fuq l-aġenda tan-NU sa mill-bidu tas-snin sebgħin; billi fl-1987, ir-rapport Brundtland "Il-Futur Komuni Tagħna" ddefinixxa l-kunċett tal-iżvilupp sostenibbli bħala żvilupp li jissodisfa l-ħtiġijiet tal-preżent mingħajr ma jikkomprometti l-kapaċità tal-ġenerazzjonijiet futuri li jissodisfaw il-ħtiġijiet tagħhom stess; billi fil-Konferenza ta' Rio (UNCED) fl-1992, il-politiki tal-iżvilupp u tal-ambjent ġew amalgamati f'taħlita ta' miżuri effikaċi għat-tnaqqis tal-faqar u għall-promozzjoni tal-iżvilupp sostenibbli madwar id-dinja kollha;

W.  billi s-sistema tan-NU tkopri l-oqsma kollha ta' kooperazzjoni, u billi fil-qalba tagħha għandha l-Kunsill tas-Sigurtà li huwa primarjament responsabbli għaż-żamma tal-paċi u tas-sigurtà internazzjonali, megħjun f'dan ir-rigward minn korpi sussidjarji u konsultattivi;

X.  billi s-Sistema tan-NU hija magħmula minn 19-il aġenzija speċjalizzata, fosthom il-FAO, l-IFAD, l-ILO, l-FMI, il-UNESCO, il-UNIDO, id-WHO u l-Grupp tal-Bank Dinji, flimkien ma' 11-il fond u programm, fosthom il-UNCTAD, il-UNDP, il-UNEP, il-UNFPA, il-UNHCR, il-UNICEF, il-UN Women u d-WFP,(5) kif ukoll 9 kummissjonijiet funzjonali, 5 kummissjonijiet reġjonali u għadd ta' korpi oħra tal-istess tip; billi organizzazzjonijiet bħall-Organizzazzjoni Dinjija tal-Kummerċ (WTO) u l-Aġenzija Internazzjonali tal-Enerġija Atomika (IAEA) huma marbutin ukoll mas-Sistema tan-NU;

Y.  billi l-biċċa l-kbira ta' dawn l-aġenziji, fondi, programmi, kummissjonijiet u kumitati jaħdmu taħt l-awspiċi tal-Kunsill Ekonomiku u Soċjali u tal-Assemblea Ġenerali, li huma responsabbli għal xi wħud minnhom;

Z.  billi l-UE u l-Istati Membri tagħha jiżvolġu rwol kruċjali fil-promozzjoni tal-prinċipji u l-objettivi tan-NU u fis-soluzzjoni tal-problemi komuni tal-umanità; billi, mill-banda l-oħra, l-Ewropa teħtieġ sħab globali biex issolvi l-problemi tagħha stess f'oqsma bħas-sigurtà, il-ħarsien tal-ambjent, id-drittijiet tal-bniedem, il-migrazzjoni, is-salvagwardja tad-dritt għall-asil, u tal-instabbiltà finanzjarji;

AA.  billi l-UE għandha responsabbiltà speċjali fiż-żamma tal-paċi, fl-iżvilupp u fid-drittijiet tal-bniedem fir-rigward tal-viċinat tagħha;

AB.  billi huwa fundamentali li l-azzjonijiet meħuda fi ħdan il-qafas tan-NU jirrispettaw id-dritt internazzjonali; billi d-delitti mwettqa taħt mandat tan-NU huma ta' dannu kbir ħafna għall-kredibbiltà tal-organizzazzjoni u m'għandhomx igawdu minn impunità;

AC.  billi l-pajjiżi huma maqsuma f'żoni ġeografiċi, u dan ħafna drabi jwassal lill-pajjiżi biex jivvutaw b'mod kollettiv; billi l-Istati li huma membri tal-Kunsill tad-Drittijiet tal-Bniedem tan-Nazzjonijiet Uniti (UNHRC) ħafna drabi huma stess jiksru d-drittijiet tal-bniedem b'mod sistematiku, b'hekk jimminaw l-effikaċja u l-kredibbiltà tal-UNHRC b'mod ġenerali;

AD.  billi l-profitti mill-attivitajiet ta' sakkeġġ u ta' kuntrabandu fir-rigward ta' siti u oġġetti kulturali u reliġjużi fl-Iraq u s-Sirja min-naħa tal-ISIS/Da'esh qegħdin jintużaw biex jgħinu l-finanzjament tal-attivitajiet terroristiċi tal-ISIS/Da'esh; billi l-UNESCO u l-Konvenzjoni tagħha dwar il-Mezzi ta' Projbizzjoni u Prevenzjoni tal-Importazzjoni, Esportazzjoni u Trasferiment Illegali tas-Sjieda tal-Proprjetà Kulturali għandhom rwol ċentrali biex tiġi żgurata protezzjoni ta' emerġenza tal-wirt kulturali Sirjan u Iraqi;

AE.  billi l-UE u n-NU jieħdu sehem f'kooperazzjoni mill-qrib f'xenarji ta' kriżijiet l-aktar delikati, b'mod partikolari fil-Lvant Nofsani u fit-Tramuntana tal-Afrika; billi l-isforzi tagħhom għandhom jissaħħu aktar bl-għan li jinstabu soluzzjonijiet politiċi paċifiċi għal dawn il-kriżijiet;

AF.  billi d-diskussjoni u d-deċiżjoni dwar it-tiġdid tal-mandat tal-Forum ta' Governanza tal-Internet (IGF) huma skedati għall-2015 fl-Assemblea Ġenerali tan-NU; billi l-Parlament appella lill-Assemblea biex iġġedded il-mandat tal-IGF u ssaħħaħ kemm ir-riżorsi tiegħu kif ukoll il-mudell ta' partijiet ikkonċernati multipli tal-governaza tal-internet;

L-UE fi ħdan is-sistema tan-NU

1.  Ifakkar li l-UE u l-Istati Membri tagħha jikkondividu valuri u prinċipji tal-Karta tan-NU kif iddikjarat fl-Artikolu 21(1) tat-TUE u għandhom rwol kruċjali fil-promozzjoni ta' dawn il-prinċipji kif ukoll tal-objettivi tan-NU, permezz tal-azzjoni esterna tal-Unjoni; iqis li l-UE teħtieġ is-sħab globali jekk hija trid tikseb b'suċċess l-objettivi tal-politika barranija tagħha, b'mod partikolari fl-oqsma tal-paċi u s-sigurtà, tat-terroriżmu, tal-kriminalità organizzata, tal-kunflitti reġjonali, tal-fallimenti tal-Istati u tat-tixrid tal-armi ta' qerda massiva;

2.  Iqis li l-ambjent ta' sigurtà tal-UE qiegħed isir dejjem aktar instabbli u volatili minħabba għadd kbir ta' sfidi ta' sigurtà fuq żmien twil jew emerġenti; iqis li l-kunflitt fil-Lvant tal-Ukrajna, il-kunflitti fis-Sirja u l-Iraq u l-qawmien tal-organizzazzjoni terroristika ISIS, il-kriżi Libjana u t-theddida terroristika fl-Afrika (b'mod partikolari fis-Saħel, il-Libja u l-Qarn tal-Afrika) huma theddid globali serju li jeħtieġ reazzjonijiet globali; iqis li l-UE ma tistax tindirizza dan it-theddid waħedha iżda teħtieġ l-appoġġ tas-sħab internazzjonali;

3.  Jilqa' l-fatt li l-UE u l-Istati Membri tagħha għandhom sehem attiv u jikkontribwixxu għall-ħidma tas-sistema tan-NU b'modi u strutturi differenti, li għandhom ikunu aktar viżibbli;

4.  Jilqa' wkoll il-kontribut ewlieni tal-UE għall-għajnuna għall-iżvilupp u umanitarja madwar id-dinja; ifakkar li l-UE u l-Istati Membri tagħha flimkien huma l-akbar kontributuri tal-għajnuna għall-iżvilupp u umanitarja fid-dinja;

5.  Ifakkar li l-UE saret attur internazzjonali reali u għaldaqstant għandha status ta' "osservatur privileġġat" fin-NU, bid-dritt li tipparteċipa fid-dibattiti waqt il-laqgħat tal-Assemblea Ġenerali tan-NU flimkien ma' rappreżentanti ta' gruppi maġġuri u Stati individwali, bid-dritt li tressaq proposti u emendi, bid-dritt ta' replika, u bid-dritt li tqajjem punti ta' ordni u tiċċirkola dokumenti;

6.  Ifakkar, barra minn hekk, li l-UE hija rrappreżentata minn bosta atturi fi ħdan in-NU: il-President tal-Kunsill Ewropew, ir-Rappreżentant Għoli tal-Unjoni għall-Affarijiet Barranin u l-Politika ta' Sigurtà, il-Kummissjoni Ewropea u d-delegazzjonijiet tal-UE, kif ukoll mit-28 Stat Membru tagħha, li tnejn minnhom (Franza u r-Renju Unit) huma membri permanenti bid-dritt tal-veto fil-Kunsill tas-Sigurtà tan-NU (UNSC); jinsisti fuq il-fatt li skont it-Trattat, l-Istati Membri tal-UE għandhom l-obbligu li jikkoordinaw l-azzjoni tagħhom fil-fora internazzjonali kollha;

Kif l-objettivi tal-UE fil-qasam tal-politika barranija jistgħu jinkisbu aħjar fi ħdan in-NU

7.  Jinsab konvint li, sabiex tilħaq b'mod aħjar l-objettivi tagħha tal-politika barranija, kif minquxa fit-Trattat, l-UE għandha tfittex li ssaħħaħ il-governanza globali fi ħdan is-sistema tan-NU u żżid l-influwenza tagħha u tal-Istati Membri tagħha f'dik is-sistema; ifakkar l-impenji tal-UE li tappoġġa b'mod attiv riforma komprensiva tas-sistema tan-NU sabiex tissaħħaħ il-leġittimità, ir-rappreżentanza reġjonali, u t-trasparenza, ir-responsabbiltà u l-effikaċja tagħha meta twieġeb għall-isfidi kumplessi u pluridimensjonali tal-lum il-ġurnata; jenfasizza b'mod partikolari l-importanza li tingħata spinta lill-ħidma tal-Assemblea Ġenerali;

8.  Jenfasizza li, fi ħdan l-Assemblea Ġenerali, l-UE għandu jkollha rwol imsaħħaħ li jimplika biżżejjed viżibbiltà u influwenza fuq il-politika, li jippermettulha tesegwixxi b'mod aħjar l-obbligi internazzjonali, f'konformità mar-riżoluzzjoni tal-Assemblea Ġenerali tat-3 ta' Mejju 2011(6);

9.  Itenni l-appoġġ tiegħu għar-rwol tal-parlamenti u l-assemblej reġjonali fis-sistema tan-NU;

10.  Jistieden lill-membri tal-Kunsill tas-Sigurtà jirrieżaminaw u jirrevedu, b'kooperazzjoni mill-qrib mal-Assemblea Ġenerali, il-proċess mhux trasparenti tal-għażla tas-Segretarju Ġenerali tan-NU, u jiżguraw opportunitajiet ekwi bejn il-kandidati rġiel u nisa għal din il-kariga; jistieden lill-korpi kollha tan-NU, b'mod partikolari lill-Kunsill tas-Sigurtà, jagħtu attenzjoni xierqa lill-integrazzjoni tal-perspettiva tal-ġeneri fi ħdan in-NU, u lill-Istati Membri tal-UE biex ikunu minn ta' quddiem f'dan l-isforz billi jinkoraġġixxu u jippromwovu kandidati femminili; jesprimi x-xewqa tiegħu li tiġi eletta mara bħala s-Segretarju Ġenerali tan-NU li jmiss; jistieden lill-UE tappoġġa lill-UN Women meta tqis id-diskriminazzjoni abbażi tal-identità tal-ġeneru u l-espressjoni tal-ġeneru;

11.  Jenfasizza l-prijoritajiet attwali tal-UE stabbiliti għas-70 sessjoni tal-Assemblea Ġenerali tan-NU, li jtennu t-talba, li l-Unjoni ilha tisħaq fuqha, li n-NU għandha tissemplifika l-istrutturi, il-baġit u l-metodi ta' ħidma tagħha, mingħajr ma żżomm lura milli tindirizza kwistjonijiet diffiċli bħar-riforma tal-Kunsill tas-Sigurtà;

12.  Jenfasizza li l-Assemblea Ġenerali, li tirrappreżenta lill-gvernijiet tal-pajjiżi membri kollha, għandu jkollha l-mezzi meħtieġa biex tagħti direzzjoni lis-sistema tan-NU u tikkoordina l-attivitajiet kollha tagħha;

13.  Jinsab konvint li l-Kunsill tas-Sigurtà għandu jiġi riformat sabiex jirrifletti b'mod aħjar ir-realtà l-ġdida tad-dinja u biex jilħaq b'mod aktar effikaċi l-isfidi attwali u futuri fil-qasam tas-sigurtà; jinkoraġġixxi lill-pajjiżi li għandhom id-dritt tal-veto fil-Kunsill tas-Sigurtà tan-NU jżommu lura milli jużaw il-veto f'sitwazzjonijiet ta' ġenoċidju u delitti kontra l-umanità;

14.  Ifakkar, filwaqt li jqis il-kontribut tal-UE għall-artikettitura għall-paċi u s-sigurtà fid-dinja u l-objettiv tat-Trattat ta' Lisbona li tissaħħaħ il-politika barranija Ewropea, l-objettiv fuq terminu twil tal-UE li jkollha siġġu f'Kunsill tas-Sigurtà estiż, u jtenni l-appell tiegħu għal dibattitu madwar l-Ewropa dwar ir-riforma tiegħu; itenni l-istedina tiegħu lill-Viċi President / Rappreżentant Għoli (VP/RGħ) biex tfittex pożizzjonijiet komuni tal-UE dwar kwistjonijiet fir-rigward tal-kompetenza tal-Kunsill tas-Sigurtà, u ttejjeb il-mekkaniżmi eżistenti ta' kooperazzjoni bl-għan li tiżgura li l-Istati Membri tal-UE li huma membri tal-Kunsill tas-Sigurtà jiddefendu pożizzjonijiet komuni tal-UE f'dak il-forum; ifakkar li, skont l-Artikolu 34 tat-TUE, l-Istati Membri tal-UE li huma membri tal-UNSC għandhom iżommu lill-Istati Membri l-oħra u lill-Rappreżentant Għoli għal kollox informati, u jiddefendu l-pożizzjonijiet u l-interessi tal-UE; ifakkar ukoll li fejn l-UE għandha pożizzjoni ċara dwar kwistjoni fuq l-aġenda tal-UNSC, dawk l-Istati għandhom jitolbu li r-Rappreżentant Għoli tkun mistiedna tippreżenta l-pożizzjoni tal-Unjoni;

15.  Ifakkar li l-Kapitolu VIII tal-Karta tan-NU jipprevedi rwol imsaħħaħ għall-organizzazzjonijiet reġjonali u subreġjonali fi ħdan in-NU, u jistieden lill-UE u lill-OSKE jimmiraw li l-organizzazzjonijiet reġjonali tagħhom u organizzazzjonijiet oħra jkollhom involviment akbar fil-governanza globali;

16.  Iqis li, permezz ta' aktar kooperazzjoni man-NU, l-UE għandha tieħu vantaġġ akbar minn sħubijiet mal-aġenziji speċjalizzati, mal-fondi, mal-programmi, mal-kummissjonijiet u mal-kumitati tan-NU; jappella għal tisħiħ tal-koordinament tal-UE fil-bordijijet ta' dawn il-korpi sabiex jiġi żgurat li l-UE titkellem b'vuċi waħda;

17.  Jenfasizza li, minbarra dawn ir-riformi meħtieġa li għandhom jitwettqu fi ħdan in-NU, it-titjib fl-ilħiq tal-objettivi tal-UE fil-qasam tal-politika barranija, inkluż il-promozzjoni tal-valuri fundamentali, jippresupponi koordinament aktar effikaċi tad-diversi dimensjonijiet tal-politika esterna kollha tagħha, kemm bilaterali kif ukoll multilaterali; itenni l-appell tiegħu għal viżibbiltà aktar b'saħħitha tal-azzjoni u l-għajnuna tal-UE fil-fora multilaterali kollha u fuq il-post;

18.  Jistieden lill-UE tikkoordina b'mod aktar effikaċi l-ħidma tagħha fil-qasam tal-għajnuna umanitarja, pereżempju permezz tad-DĠ ECHO, flimkien mal-aġenziji rispettivi tan-NU, sabiex toħloq effiċjenzja ottima b'riżorsi limitati u tevita it-trikkib li mhuwiex meħtieġ;

19.  Jistieden lill-istituzzjonijiet rilevanti tal-UE u tan-NU jirrispettaw u jimplimentaw bis-sħiħ il-Ftehim Qafas Finanzjarju u Amministrattiv (FAFA); jitlob lill-Kummissjoni tirrapporta lill-Parlament dwar l-implimentazzjoni tal-FAFA u l-linji gwida relatati, u tidentifika l-oqsma li jeħtieġu titjib u tressaq proposti rilevanti f'dan ir-rigward;

20.  Jenfasizza l-importanza ta' kooperazzjoni bejn l-UE u l-UNDP dwar l-effikaċja tal-għajnuna; jissottolinja l-impenn tas-Sħubija Globali dwar Kooperazzjoni Effikaċi għall-Iżvilupp u jinkoraġġixxi lill-Istati kollha kif ukoll lill-atturi tas-settur privat jimpenjaw ruħhom għaliha;

21.  Jemmen li l-Qorti Ewropea tad-Drittijiet tal-Bniedem ikkontribwiet b'suċċess għall-progress li l-Ewropa għamlet fir-rigward tar-rispett tad-drittijiet tal-bniedem u b'hekk tista' sservi bħala eżempju għal reġjuni oħra;

22.  Jappella għal titjib tal-għodod ta' prevenzjoni u ta' twissija bikrija u għat-tisħiħ tal-kapaċitajiet ta' medjazzjoni tan-NU, b'mandati koerenti u li jistgħu jintlaħqu għall-operazzjonijiet tal-bini tal-paċi u taż-żamma tal-paċi li jinkludu komponent dwar id-drittijiet tal-bniedem u strateġiji ta' ħruġ ċari; jinkoraġġixxi lill-Istati Membri tal-UE jagħtu appoġġ aktar sostanzjali għall-operazzjonijiet tal-bini tal-paċi u taż-żamma tal-paċi u jistieden lill-UE ssaħħaħ l-isforzi ta' medjazzjoni tagħha fir-rigward tar-riżoluzzjoni tal-kunflitti; iqis l-atroċitajiet u l-ksur tad-drittijiet tal-bnidem reċenti mwettqa minn xi gruppi estremisti u terroristi, kif ukoll il-vjolenza sesswali fil-kunflitti li għaddejja, inkluż l-istupru bħala arma ta' gwerra; iħeġġeġ lill-Kunsill tas-Sigurtà, f'konformità mad-duttrina "Responsabbiltà ta' Protezzjoni", biex jiddefenixxi sett ambizzjuż ta' għodod u mezzi sabiex jiżgura l-prevenzjoni effikaċi ta' dawn l-atroċitajiet u r-rispett tal-istat tad-dritt u tad-dritt umanitarju internazzjonali, u jġiegħel lill-Istati Membri tan-NU jiġġieldu kontra t-traffikar tal-bnedmin u jrażżnu r-reklutaġġ u l-finanzjament tal-gruppi terroristiċi permezz tal-prevenzjoni u s-soppressjoni tar-reklutaġġ, l-organizzazzjoni, it-trasport u l-forniment ta' ġellieda barranin u l-finanzjament tal-ivvjaġġar u l-attivitajiet tagħhom;

23.  Jinsab konvint li l-UE għandha turi appoġġ b'saħħtu u impenjat lill-Qorti Kriminali Internazzjoni, b'mod partikolari billi ssaħħaħ u tkabbar ir-relazzjoni tagħha man-NU, speċjalment mal-Kunsill tas-Sigurtà, u billi tiżgura ratifikazzjoni ta' malajr mill-Istati Membri tal-UE tal-emendi ta' Kampala għall-Istatut ta' Ruma li jiddefenixxu d-delitt ta' aggressjoni; ifakkar li l-Istati nnifishom għandhom ir-responsabbiltà primarja li jressqu lill-offensuri quddiem il-ġustizzja, u jappoġġa li l-QKI teżerċita l-ġurisdizzjoni tagħha meta l-awtoritajiet nazzjonali ma jistgħux jew ma jixtiequx jipproċedu ġenwinament kontra l-aktar reati ta' tħassib serji għall-komunità internazzjonali;

24.  Jappoġġa t-tisħiħ tal-koperazzjoni operattiva bejn l-UE u n-NU fl-immaniġġar ta' kriżijiet, kif ukoll billi l-UE taħdem flimkien man-NU kemm fir-rigward tal-kondiviżjoni ta' analiżi (sabiex tintlaħaq analiżi konġunta) kif ukoll fl-ippjanar ta' operazzjonijiet ta' paċi u sigurtà (sabiex jiġu ffaċilitati l-aspetti operattivi);

25.  Iqis li għandu jsir aktar biex jiġi żgurat li l-Istati Membri tan-NU jonoraw il-wegħdiet tagħhom li jagħtu għajnuna umanitarja billi jiġu ppublikati fuq bażi regolari ħarsiet ġenerali fir-rigward tal-konformità mal-obbligi;

26.  Jilqa' l-impenn tal-UE għal responsabbiltà u trasparenza akbar fil-kummerċ tal-armi, u jappoġġa l-promozzjoni tal-universalizzazzjoni u l-implimentazzjoni sħiħa tat-Trattat dwar il-Kummerċ tal-Armi, kif ukoll l-implimentazzjoni tal-eżitu tal-Ewwel Konferenza tal-Istati Partijiet; jitlob lill-UE tkompli tippromwovi t-Trattat dwar in-Nonproliferazzjoni tal-Armi Nukleari (TNP), bħala l-pedament tar-reġim globali ta' nonproliferazzjoni nukleari, u b'hekk il-bażi essenzjali biex jinkiseb id-diżarm skont l-Artikolu VI tal-imsemmi Trattat; jitlob ukoll lill-UE biex b'mod attiv tieħu passi lejn id-diżarm globali;

27.  Jissottolinja l-importanza li l-UE tkompli tippromwovi b'mod attiv l-ugwaljanza u n-nondiskriminazzjoni; jilqa' l-ewwel laqgħa tax-xorta tagħha tal-Kunsill tas-Sigurtà tan-NU dwar id-drittijiet tal-persuni LGBTI, li saret fl-24 ta' Awwissu 2015, li kkundannat l-attakki u l-qtil mill-ISIS tal-persuni LGBTI fil-Lvant Nofsani; jinkoraġġixxi lill-Kunsill tas-Sigurtà jqis ulterjorment il-ksur tad-drittijiet tal-persuni LGBTI;

28.  Ifakkar il-pożizzjoni tal-UE ta' tolleranza żero għall-piena tal-mewt; jissottolinja l-importanza li l-UE tkompli tavvanza l-moratorju dwar il-piena tal-mewt;

29.  Jinsab konvint li d-dimensjonijiet ekonomiċi, soċjali, ambjentali u tal-iżvilupp tas-sistema tan-NU għandhom jissaħħu b'mod sostanzjali billi jiġi żgurat li l-korpi tan-NU jieħdu approċċ aktar politiku u jtejbu l-kooperazzjoni bejniethom, u billi jiġi żgurat użu aktar effikaċi u trasparenti tar-riżorsi disponibbli; jemmen li l-ewwel nett dan għandu jintlaħaq permezz ta' riforma strutturali u funzjonali tal-organu prinċipali responsabbli għal dan l-inkarigu skont il-Karta tan-NU, jiġifieri l-Kunsill Ekonomiku u Soċjali; jistieden lill-istituzzjonijiet u l-Istati Membri tal-UE jqisu l-possibbiltà li jsaħħu r-rwol tagħhom fil-Kunsill Ekonomiku u Soċjali billi dan jiġi żviluppat f'Kunsill għall-Iżvilupp Sostenibbli;

30.  Jilqa' l-ħolqien ta' Forum Politiku ta' Livell Għoli dwar l-Iżvilupp Sostenibbli, li għandu r-rwol li jagħti tmexxija politika, gwida u rakkomandazzjonijiet dwar il-politika tal-iżvilupp fir-rigward tat-tliet pilastri tal-iżvilupp sostenibbli (dak soċjali, ekonomiku u ambjentali); jinsab konvint li l-Forum Politiku ta' Livell Għoli dwar l-Iżvilupp Sostenibbli għandu jkun il-korp deċiżjonali ewlieni għall-politika kollha tal-iżvilupp, b'hekk tiġi żgurata valutazzjoni koordinata u effiċjenti tal-ħtiġijiet, u adozzjoni ta' pjanijiet direzzjonali, deċiżjonijiet u miżuri vinkolati meħtieġa fir-rigward tal-qafas tal-iżvilupp sostenibbli ta' wara l-2015; jinsisti dwar il-ħtieġa li jiġu implimentati b'mod effikaċi l-Għanijiet ta' Żvilupp Sostenibbli adottati fis-Summit tan-NU f'Settembru 2015;

31.  Jinsab konvint, fid-dawl tal-kriżijiet umanitarji rikorrenti marbuta mar-refuġjati u l-migranti li qegħdin jikkawżaw ħafna tbatija umana, u filwaqt li jqis li, l-iżvilupp sostenibbli tal-pajjiżi ta' oriġini jista' fl-aħħar mill-aħħar jagħti soluzzjoni għall-kriżi umanitarja, li għandha tiġi koordinata l-ħidma tal-aġenziji kollha relatati ma' dan it-tħassib;

32.  Huwa tal-fehma li l-isfidi ppreżentati mill-kriżi umanitarja marbuta mar-refuġjati huma kwistjonijiet li jeħtieġ li jiġu mmanniġġjati b'mod komprensiv, fi spirtu ta' solidarjetà fi ħdan l-UE u b'kooperazzjoni mill-qrib man-NU u l-aġenziji tagħha;

33.  Jistieden lill-UE u lin-NU jżidu l-isforzi konġunti tagħhom bl-għan li jintlaħaq ftehim ambizzjuż u ġuridikament vinkolanti fil-Konferenza tan-NU tal-2015 dwar it-Tibdil fil-Klima f'Pariġi, u biex jiżguraw li jkun hemm l-implimentazzjoni ta' malajr tal-COP21;

34.  Huwa tal-fehma li l-ħidma tal-Grupp tal-Bank Dinji, tal-Fond Monetarju Internazzjoni u tal-Organizzazzjoni Dinjija tal-Kummerċ ukoll tista' tkun koordinata bħala parti mis-sistema tan-NU, filwaqt li jinżammu l-istrutturi deċiżjonali attwali tagħhom, sabiex jiġi żgurat li jittieħdu d-deċiżjonijiet rispettivi u jitwettqu l-azzjonijet tagħhom b'mod responsabbli, effiċjenti, koerenti u effikaċi; iqis li l-attivitajiet tal-G7 u tal-G20 għandhom fil-prinċipju jiġu integrati fil-ħidma tal-Kunsill Ekonomiku u Soċjali li jkun aktar b'saħħtu f'termini ta' politika u proċedura, aktar effiċjenti u mgħammar b'riżorsi aħjar;

35.  Jappoġġa l-objettiv li, fil-livell multilaterali, jiġi stabbilit reġim ta' protezzjoni tal-investiment, b'sistema ġdida fejn il-ġurisdizzjoni tal-qrati nazzjonali tkun rispettata, u jistieden lill-Kummissjoni tinkorpora dan l-objettiv fl-aġenda ta' negozjar tagħha waqt l-abbozzar tal-ftehimiet dwar l-investiment; huwa tal-fehma li, fl-eventwalità li tinħoloq qorti internazzjonali permanenti għas-soluzzjoni ta' tilwim dwar l-investiment, din tista' tiddaħħal fis-sistema tan-NU, u għandha tkun ibbażata fuq id-drittijiet u l-obbligi ta' dawk li huma suġġetti għall-qorti, b'enfasi fuq il-prinċipji tal-OECD għall-impriżi multinazzjonali u l-prinċipji tan-NU dwar in-Negozju u d-Drittijiet tal-Bniedem; iqis li s-sistema tan-NU toffri mudelli utli għal tali sistema, b'mod partikolari rigward kwistjonijiet ta' finanzjament;

36.  Iqis li huwa meħtieġ li ċ-Ċiklu ta' Doha għall-Iżvilupp tad-WTO jasal għal konklużjoni, u jemmen li n-NU tista' tuża l-pożizzjoni unika tagħha sabiex tiżgura li tali diskussjonijiet jkunu ta' suċċess għall-pajjiżi fil-fażi tal-iżvilupp; jemmen li, f'dan ir-rigward, in-NU għandha taħdem flimkien mad-WTO, kif ukoll tagħti pariri u gwida lill-pajjiżi fil-fażi tal-iżvilupp, sabiex tippromwovi strateġija għall-kummerċ u l-investiment bl-involviment tal-UE bħala attur ewlieni;

37.  Jinsab konxju tal-ħtieġa li jissaħħu u jiġu implimentati l-Prinċipji Gwida tan-NU dwar in-Negozju u d-Drittijiet tal-Bniedem; iħeġġeġ lill-UE tikkontribwixxi biex ix-xogħol tal-Grupp ta' Ħidma Intergovernattiv dwar id-Drittijiet tal-Bniedem u l-Korporazzjonijiet Transnazzjonali jkollu eżitu ta' suċċess.

38.  Jemmen li n-NU għandha saħħaħ il-materji kollha relatati mal-benessri tal-bniedem; huwa tal-fehma li dawn jinkludu s-sostenibbiltà kulturali u l-protezzjoni u l-promozzjoni tad-diversità tal-espressjoni kulturali, billi l-edukazzjoni, it-turiżmu, id-diplomazija kulturali, il-protezzjoni tal-wirt, is-settur kreattiv u r-riċerka xjentifika jiġu integrati fl-approċċ tat-tfassil tal-politika;

39.  Jirrakkomanda li tiġi żgurata l-kooperazzjoni għall-edukazzjoni bejn l-UE u n-NU fi programmi ta' emerġenzi f'każ ta' kriżijiet umanitarji, kunflitti armati u diżastri naturali, billi jibqgħu jiġu appoġġati programmi bħal Edukazzjoni f'Emerġenzi u Tranżizzjoni Wara Kriżi tal-UNICEF, programm ta' edukazzjoni ta' kwalità fil-kampijiet tar-refuġjati tal-UNHCR u x-xogħol edukattiv tal-UNRWA;

40.  Jilqa' l-organizzazzjoni fi gruppi tal-ħidma tal-Kummissjoni li ġiet maħtura fl-2014, li tagħti lill-VP/RGħ ir-responsabbiltà msaħħa li tikkoordina l-politika esterna tal-UE, f'kooperazzjoni mill-qrib mal-istituzzjonijet l-oħra tal-UE; jenfasizza li l-politiki ta' dimensjoni globali jridu jkunu fil-qalba tal-ħidma ta' dan il-grupp speċifiku;

41.  Jistieden lill-VP/RGħ tinkludi fir-rapport annwali tagħha dwar il-PESK taqsima komprensiva dwar il-promozzjoni tal-objettivi globali tal-politika barranija tal-UE;

42.  Huwa tal-fehma li l-Parlament jeħtieġ li jkun f'pożizzjoni li jindirizza l-isfidi globali bl-istess mod komprensiv u globali bħall-Kummissjoni, u li jorganizza l-ħidma tiegħu b'mod li jirrifletti dan; jinkoraġġixxi lill-kumitati kollha tal-Parlament li l-kompetenza tagħhom tkopri politiki li għandhom dimensjoni estera u globali biex iressqu l-opinjonijiet tagħhom dwar it-taqsima rilevanti tar-rapport tal-VP/RGħ lill-Kumitat għall-Affarijiet Barranin, li huwa responsabbli għal dan ir-rapport;

43.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lis-Servizz Ewropew għall-Azzjoni Esterna, lill-Assemblea Ġenerali tan-Nazzjonijiet Uniti u lis-Segretarju Ġenerali tan-Nazzjonijiet Uniti.

24.9.2015

OPINJONI tal-Kumitat għall-Iżvilupp

għall-Kumitat għall-Affarijiet Barranin

dwar ir-rwol tal-UE fin-NU - kif jistgħu jintlaħqu aħjar l-objettivi tal-UE fil-qasam tal-politika barranija

(2015/2104(INI))

Rapporteur għal opinjoni: Anna Záborská

SUĠĠERIMENTI

Il-Kumitat għall-Iżvilupp jistieden lill-Kumitat għall-Affarijiet Barranin, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Itenni li l-UE u l-Istati Membri tagħha għandu jkollhom rwol ewlieni fl-aġenda għall-iżvilupp għal wara l-2015 u għandhom jaħdmu man-NU u mal-partijiet interessati kollha biex jiżguraw li jittieħdu impenji ambizzjużi lejn il-kisba tal-Ġħanijiet ta' Żvilupp Sostenibbli (SDGs) futuri; jenfasizza li f'dan l-isforz l-UE hija marbuta bil-valuri kondiviżi mill-Istati Membri kollha tagħha;

2.  Jemmen li l-UE u l-Programm ta' Żvilupp tan-Nazzjonijiet Uniti (UNDP) jeħtieġ li jżidu l-isforzi konġunti tagħhom biex jippromwovu valuri kondiviżi u jappoġġaw lill-gvernijiet, lis-soċjetà ċivili u lill-popolazzjonijiet f'pajjiżi ifqar f'oqsma ta' politika importanti, bħall-iżvilupp tal-kapaċità, l-iżvilupp istituzzjonali, il-ġlieda kontra l-korruzzjoni, l-ugwaljanza bejn l-irġiel u n-nisa, l-assistenza elettorali, il-prevenzjoni tal-kriżijiet u l-irkupru, it-tnaqqis tar-riskju ta' diżastri u t-tibdil fil-klima;

3.  Jistieden lill-aġenziji speċjalizzati, lill-fondi u lill-programmi tal-Kummissjoni u tan-NU jistabbilixxu djalogu ta' livell għoli dwar l-implimentazzjoni tal-SDGs, bl-għan li jikkoordinaw il-politiki, il-programmi u l-operazzjonijiet tal-UE u tan-NU; jissottolinja l-importanza ta' data diżaggregata u aċċessibbli għall-monitoraġġ tal-progress u għall-evalwazzjoni tar-riżultati tas-sħubija bejn l-UE u n-NU;

4.  Jistieden lill-UE u lill-UNDP jżidu l-isforzi tagħhom biex jiżguraw li l-attivitajiet tal-kumpaniji multinazzjonali f'pajjiżi ifqar ikunu soġġetti għal monitoraġġ mill-qrib, b'mod partikolari fir-rigward ta' kwistjonijiet ta' importanza sistemika għall-iżvilupp, bħad-drittijiet tal-bniedem, id-drittijiet tal-ħaddiema u l-ħarsien tal-ambjent;

5.  Jenfasizza l-importanza tal-kooperazzjoni bejn l-UE u l-UNDP dwar l-effikaċja tal-għajnuna; jissottolinja l-impenn tas-Sħubija Globali dwar Kooperazzjoni Effikaċi għall-Iżvilupp u jħeġġeġ lill-Istati kollha kif ukoll lill-atturi tas-settur privat jimpenjaw ruħhom lejha;

6.  Jenfasizza kemm huwa importanti għall-iżvilupp tal-pajjiżi ifqar li n-NU tadotta regoli vinkolanti dwar l-attivitajiet tal-kumpaniji multinazzjonali u azzjonijiet li jiġġieldu kontra l-evażjoni u l-evitar tat-taxxa;

7.  Jenfasizza l-importanza tar-relazzjonijiet bejn l-UE u n-NU fil-qasam taż-żamma tal-paċi, it-tnaqqis ta' tensjoni u l-medjazzjoni, u jilqa' t-tisħiħ tar-rabtiet f'dawn l-aħħar snin bejn is-Servizz Ewropew għall-Azzjoni Esterna (SEAE) u d-Dipartiment tan-NU għall-Affarijiet Politiċi (DPA); jappella għal żieda fl-appoġġ tal-UE, inkluż għall-Unità ta' Appoġġ għall-Medjazzjoni; jiddispjaċih għax-xejra attwali fost l-Istati Membri li jnaqqsu l-kontributi tagħhom għall-missjonijiet tan-NU f'termini ta' persunal;

8.  Jappella għal aktar kooperazzjoni bejn l-UE u n-NU fil-qasam tas-saħħa, tal-HIV/AIDS, tal-edukazzjoni, tal-ikel u n-nutrizzjoni, tal-ilma, tas-sanità u l-iġene, tal-protezzjoni tat-tfal, tal-ugwaljanza bejn is-sessi, tal-inklużjoni soċjali, tal-azzjoni dwar il-klima, tal-għajnuna umanitarja, tal-migrazzjoni, tad-drittijiet tal-bniedem, tan-nondiskriminazzjoni fil-forom kollha, tal-governanza tajba u l-bini tad-demokrazija, partikolarment biex jiġu miġġielda l-korruzzjoni, l-evażjoni tat-taxxa u l-flussi finanzjarji illeċiti u jingħata appoġġ għal miżuri għall-prevenzjoni ta' kunflitti;

9.  Jilqa' s-sħubija li ġiet stabbilita fl-2012 bejn l-UE u l-UN Women sabiex issaħħaħ l-ugwaljanza bejn is-sessi u d-drittijiet tan-nisa madwar id-dinja; jappella għal evalwazzjoni ta' din is-sħubija bl-għan ta' tisħiħ possibbli ta' dawn ir-rabtiet;

10.  Jappella għal kooperazzjoni aktar b'saħħitha bejn l-UE u n-NU sabiex tiġi ffaċilitata l-parteċipazzjoni tas-soċjetà ċivili fil-proċess politiku, filwaqt li tingħata attenzjoni speċjali lin-nisa, li għadhom fil-biċċa l-kbira emarġinati mill-isfera politika;

11.  Jissottolinja l-importanza tas-sħubija bejn l-UE u n-NU għat-titjib tal-ħajja tal-ġenerazzjonijiet futuri, u jenfasizza l-vulnerabbiltà speċjali tat-tfal, kif ukoll ir-rwol ċentrali tagħhom fil-kisba ta' żvilupp sostenibbli u ekwu għal kulħadd; jirrikonoxxi l-kooperazzjoni twila bejn l-UE u l-UNICEF bħala waħda kruċjali għall-protezzjoni tat-tfal f'każijiet ta' emerġenza u għall-kisba tal-SDGs kollha li huma relatati mat-tfal;

12.  Itenni li l-UE jeħtiġilha tkun minn ta' quddiem fil-ġlieda kontra t-tibdil fil-klima u tikkoopera aktar man-NU f'dan il-qasam, filwaqt li tieħu kont tas-sitwazzjoni partikolari tal-pajjiżi li jinsabu fil-fażi tal-iżvilupp, speċjalment qabel l-adozzjoni tal-SDGs u l-Ftehim ta' Pariġi COP21;

13.  Jiġbed l-attenzjoni għall-importanza tas-sħubija bejn l-UE u n-NU biex jiġu indirizzati l-kawżi ewlenin u l-konsegwenzi tal-kriżijiet globali tar-refuġjati u l-emerġenzi umanitarji; itenni l-importanza fundamentali tal-użu trasparenti tal-għajnuna għall-iżvilupp u l-azzjoni koordinata mill-atturi internazzjonali kollha, fl-istess waqt li tingħata l-assistenza teknika u jiġu mobilizzati riżorsi adegwati, sabiex jiġu protetti l-gruppi l-aktar vulnerabbli, inklużi t-tfal, u jiġi żgurat ir-rispett għad-dritt tal-migranti għall-protezzjoni internazzjonali; jappella, għalhekk, għal aktar kooperazzjoni u djalogu fit-tħejjija għas-Summit Umanitarju Dinji tal-2016.

RIŻULTAT TAL-VOTAZZJONI FINALI FIL-KUMITAT

22.9.2015

OPINJONI tal-Kumitat għall-Kummerċ Internazzjonali

għall-Kumitat għall-Affarijiet Barranin

dwar ir-rwol tal-UE fin-NU - kif jistgħu jintlaħqu aħjar l-objettivi tal-UE fil-qasam tal-politika barranija

(2015/2104(INI))

Rapporteur għal opinjoni: Ska Keller

SUĠĠERIMENTI

Il-Kumitat għall-Kummerċ Internazzjonali jistieden lill-Kumitat għall-Affarijiet Barranin, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jisħaq fuq il-fehma li l-kummerċ ħieles u ġust fih innifsu huwa l-aktar għodda utli li tgħin lill-pajjiżi fil-fażi tal-iżvilupp jgħinu lilhom infushom; jiġbed l-attenzjoni għall-impatt kbir li l-kummerċ u l-investiment jista' jkollhom fuq l-iżvilupp sostenibbli tal-pajjiżi foqra u l-anqas żviluppati u fuq il-ġlieda kontra l-faqar u kontra l-ksur tad-drittijiet tal-bniedem meta jkunu mfasslin kif meħtieġ, meta jitwettqu b'objettivi fit-tul, meta jkollhom mira ċara u qafas ta' regoli ta' prestazzjoni ċari, u meta jkunu marbutin ma' miżuri ta' kontrobilanċ għall-perjodi ta' tranżizzjoni, pereżempju permezz ta' programmi speċifiċi għall-preferenzi kummerċjali, sanzjonijiet kummerċjali, ir-regolazzjoni tal-kummerċ f'ċerti oġġetti li jistgħu jintużaw għall-piena kapitali, it-tortura jew it-trattamenti u l-pieni inumani jew degradanti, u sistemi ta' ċertifikazzjoni li jirregolaw il-kummerċ fil-minerali ta' kunflitt; jistieden, għalhekk, lill-UE tiżviluppa miżuri ta' politika kummerċjali ambizzjużi, effikaċi u attivi għall-promozzjoni tal-Għanijiet ta' Żvilupp Sostenibbli (SDGs) u l-Għanijiet ta' Żvilupp tal-Millennju (MDGs) tan-NU; jemmen, fir-rigward tal-konklużjoni taċ-Ċiklu ta' Doha għall-Iżvilupp, li n-NU tista' tuża l-pożizzjoni unika tagħha fl-aġenda multilaterali sabiex tiżgura li tali diskussjonijiet jkunu ta' suċċess għall-pajjiżi fil-fażi tal-iżvilupp; iqis li, f'dan ir-rigward, in-NU għandha taħdem flimkien mal-Organizzazzjoni Dinjija tal-Kummerċ (WTO), kif ukoll tagħti pariri u gwida lill-pajjiżi fil-fażi tal-iżvilupp, sabiex tippromwovi strateġija għal-liberalizzazzjoni tal-kummerċ u l-investiment bl-involviment tal-UE bħala attur ewlieni;

2.  Jisħaq fuq il-bżonn ta' aġenda ambizzjuża fil-qasam tal-iżvilupp sostenibbli min-naħa tan-NU, u, f'konformità mal-Artikolu 21(2)(d) tat-TUE, huwa tal-fehma li l-politika kummerċjali tal-UE għandha bżonn tkun aktar koordinata u implimentata b'mod konsistenti bil-għan li s-sħubija globali għall-iżvilupp sostenibbli mil-lat ekonomiku, soċjali u ambjentali tingħata ħajja ġdida u tiġi promossa; jappella sabiex jissaħħu l-isforzi internazzjonali mmirati lejn l-implimentazzjoni ta' valutazzjonijiet tal-impatt komprensivi tal-impatt tal-kummerċ dinji fuq il-kwalità tal-ħajja u l-opportunitajiet indaqs għall-popolazzjoni dinjija, kif ukoll fuq l-ambjent; jappella għall-promozzjoni ta' spazji għad-djalogu bejn l-entitajiet pubbliċi u dawk privati, inklużi l-impriżi, it-trade unions u s-soċjetà ċivili, sabiex jiġu promossi l-iskambju tal-aħjar prattiki u sinerġiji li jwasslu għall-iżvilupp sostenibbli;

3.  Jifhem li l-politika kummerċjali għandha rwol x'tiżvolġi fit-tnaqqis tal-emissjonijiet tas-CO2, u għalhekk iħeġġeġ lill-UE tiżgura li d-deċiżjonijiet tagħha fil-qasam tal-politika kummerċjali huma f'konformità mal-impenji meħuda mill-mexxejja tal-G7 waqt il-laqgħa tagħhom fi Schloss Elmau (il-Ġermanja) fl-ewwel tmiem il-ġimgħa ta' Ġunju 2015 biex "jiddekarbonizzaw l-ekonomija globali matul dan is-seklu" u biex jillimitaw iż-żidiet fit-temperaturi globali għal massimu ta' 2°C, f'konformità mal-objettivi tal-ftehim li wasal biex jiġi ffinalizzat fil-Konferenza COP21 f'Pariġi; iħeġġeġ lill-UE u lill-Istati Membri tagħha jirratifikaw l-Emenda ta' Doha li tkopri l-perjodu sal-2020;

4.  Iħeġġeġ lill-UE biex, bħala l-akbar blokk kummerċjali tad-dinja, tiżvolġi rwol ċentrali fid-diskussjonijiet internazzjonali dejjem aktar numerużi dwar kwistjonijiet purament globali, u fost l-oħrajn biex tieħu sehem prominenti fil-Konferenza tan-NU dwar it-Tibdil fil-Klima 2015, kif ukoll biex issaħħaħ impenn qawwi fil-konfront tal-migranti u r-rifuġjati fil-qafas tan-NU, filwaqt li tiżviluppa wkoll miżuri ta' politika kummerċjali ambizzjużi, effikaċi u attivi għall-promozzjoni tat-tkabbir sostenibbli, it-tnaqqis tal-faqar u l-ħarsien tal-ambjent u tar-riżorsi naturali, f'konformità mal-konvenzjonijiet rilevanti tan-NU;

5.  Iħeġġeġ lill-UE u lill-Istati Membri tagħha jiżguraw l-implimentazzjoni tad-dritt għall-ikel, inkluż fi ftehimiet kummerċjali kif deskritt fir-riżoluzzjoni tan-NU tal-2011 dwar id-dritt għall-ikel (A/66/158); jirrikonoxxi r-rwol essenzjali tal-UE fl-indirizzar tal-isfidi globali marbutin mas-sigurtà tal-ikel;

6.   Ikompli jappoġġa l-konklużjonijiet tar-rapport tal-2011 tal-UNCTAD dwar l-investiment dirett barrani (FDI) fil-pajjiżi anqas żviluppati (LDCs) li jirrakkomandaw pjan ta' azzjoni li jappella għal aktar investiment permezz ta' liberalizzazzjoni bir-reqqa fis-setturi tal-infrastruttura, il-promozzjoni ta' sħubijiet pubbliċi-privati (PPPs) b'investituri barranin, l-inkoraġġiment ta' self lill-SMEs, żieda fil-forniment ta' standards sodi fir-rigward tal-ipproċessar u l-protezzjoni tal-investimenti, u aktar sforzi biex jiġu ttrattati kwistjonijiet ta' governanza ħażina u r-rispett għall-oqsfa ġuridiċi;

7.  Jikkondividi l-fehma espressa fir-Rapport dwar l-Investiment Dinji 2015 tal-UNCTAD li l-ambjent ta' politika regolatorja għall-investiment irid jiġi riformat u li l-prattiki ta' frodi tat-taxxa, evitar tat-taxxa u ppjanar aggressiv tat-taxxa kif definit mill-OECD fir-rapport tal-2011, intitolat "Corporate Loss Utilisation through Aggressive Tax Planning" (Użu tat-telf tal-kumpaniji permezz ta' ppjanar aggressiv tat-taxxa), min-naħa tal-impriżi multinazzjonali jridu jieqfu sabiex tiġi appoġġata l-mobilizzazzjoni tar-riżorsi nazzjonali għall-SDGs, u li l-potenzjal sħiħ ta' investiment, it-tnaqqis tal-ostakoli għall-kummerċ, u l-liberalizzazzjoni tal-ekonomiji tagħna għandhom il-potenzjal li jwasslu għal żvilupp ekonomiku sostenibbli, speċjalment fil-pajjiżi l-anqas żviluppati, meta jitwettqu b'objettivi fit-tul, meta jkollhom mira ċara u qafas ta' regoli ta' prestazzjoni ċari, u meta jkunu marbutin ma' miżuri ta' kontrobilanċ għall-perjodi ta' tranżizzjoni; iqis li l-implimentazzjoni effikaċi ta' taxxa fuq it-tranżazzjonijiet finanzjarji (FTT) fil-livell dinji, li għaliha l-UE tiżvolġi rwol ta' avangwardja, tkun mezz addizzjonali biex ħafna pajjiżi jilħqu dawn l-objettivi; jistieden lill-UE tmexxi l-ġlieda globali kontra r-rifuġji fiskali, li jxekklu l-qerda tal-kummerċ illeċitu b'effetti devastanti fuq l-iżvilupp u d-drittijiet tal-bniedem; jistieden lill-UE, f'dan ir-rigward, tindirizza l-evitar tat-taxxa u l-erożjoni tal-bażi u trasferiment tal-profitt (BEPS) minn impriżi multinazzjonali, permezz ta' dispożizzjonijiet adegwati fil-ftehimiet kummerċjali tagħha ma' pajjiżi terzi, fir-regoli tal-BEI, fil-Faċilità ta' Investiment għall-Amerika Latina (FIAL) u fi programmi oħra għall-faċilitazzjoni tal-investiment, eċċ.;

8.   Ifakkar fil-ħtieġa li jingħaqdu u jissaħħu l-isforzi biex jinqered l-isfruttament tal-ħaddiema, b'mod partikolari tan-nisa u t-tfal, li jintemmu l-prattiki ta' dumping soċjali li jheddu l-iżvilupp tal-bniedem, u li jittejbu l-kundizzjonijiet tax-xogħol fil-katina tal-valur globali bl-involviment kemm tax-xerrejja kif ukoll tal-produtturi, kif implimentat dan l-aħħar fil-Bangladesh u l-Myanmar; ifakkar fil-ħtieġa li l-Kummissjoni żżomm l-ogħla livell ta' kooperazzjoni mal-ILO, mhux l-anqas fil-kuntest tas-Summit tan-NU dwar l-Iżvilupp Sostenibbli ta' Settembru 2015; jistieden lill-UE tippromwovi, fix-xena internazzjonali, l-integrazzjoni fil-politika kummerċjali tal-objettivi tal-Aġenda tax-Xogħol Deċenti tal-ILO, kif maqbul mill-istati membri tal-ILO fid-Dikjarazzjoni dwar il-Ġustizzja Soċjali għal Globalizzazzjoni Ġusta, li ġiet approvata b'mod unanimu fl-2008; jistieden ukoll lill-UE tagħmel użu sħiħ mill-għarfien espert ipprovdut mill-korpi kollha tal-ILO, b'mod partikolari l-Kumitat tal-Esperti u l-Kumitat dwar l-Applikazzjoni tal-Istandards; iħeġġeġ lill-UE tinkludi kapitolu ambizzjuż u effikaċi dwar l-iżvilupp sostenibbli fil-ftehimiet kollha fil-qasam tal-politika kummerċjali; ifakkar ukoll, f'dan il-kuntest, ir-rwol vitali li l-ftehimiet kummerċjali konklużi mill-UE kif ukoll strumenti oħra, bħalma huma l-Iskema Ġeneralizzata ta' Preferenzi, jista' jkollhom biex jippromwovu l-implimentazzjoni tal-istandards tal-ILO u biex b'hekk iħeġġu kundizzjonijiet tax-xogħol deċenti fil-livell dinji;

9.  Jappoġġa l-għan li, fil-livell multilaterali, jiġi stabbilit reġim ta' protezzjoni tal-investiment, b'sistema ġdida fejn il-ġurisdizzjoni tal-qrati nazzjonali tkun rispettata, u jistieden lill-Kummissjoni tinkorpora dan l-objettiv fl-aġenda ta' negozjar tagħha waqt l-abbozzar tal-ftehimiet dwar l-investiment; huwa tal-fehma li, fl-eventwalità li tinħoloq qorti internazzjonali permanenti għas-soluzzjoni ta' tilwim dwar l-investiment, din tista' tiġi inserita fis-sistema tan-NU, u għandha tkun ibbażata fuq id-drittijiet u l-obbligi ta' dawk li huma suġġetti għall-qorti, b'enfasi fuq il-prinċipji tal-OECD għall-impriżi multinazzjonali u l-prinċipji tan-NU dwar in-negozju u d-drittijiet tal-bniedem; iqis li s-sistema tan-NU toffri mudelli utli għal tali sistema, b'mod partikolari rigward kwistjonijiet ta' finanzjament;

10.  Ifakkar li l-Mandat ta' Doha, approvat mill-istati parteċipanti kollha waqt it-13-il sessjoni tal-Konferenza tan-Nazzjonijiet Uniti dwar il-Kummerċ u l-Iżvilupp (XIII UNCTAD, Doha, mill-21 sas-26 ta' April 2012), jinsisti fuq ir-rabtiet bejn l-ugwaljanza bejn is-sessi u l-iżvilupp inklużiv, jitlob lill-UNCTAD issaħħaħ il-ħidma tagħha dwar ir-rabtiet bejn l-ugwaljanza bejn is-sessi, it-tisħiħ tal-pożizzjoni tan-nisa, u l-kummerċ u l-iżvilupp, u jinkludi l-kwistjonijiet relatati mal-ugwaljanza bejn is-sessi u mat-tisħiħ tal-pożizzjoni tan-nisa fil-lista ta' objettivi essenzjali għall-pajjiżi kollha; jistieden lill-UE tintensifika l-isforzi tagħha u tkun minn ta' quddiem fl-integrazzjoni tal-perspettivi tal-ġeneru fil-politiki kummerċjali; jappella għall-integrazzjoni sistematika tas-sejbiet u r-rakkomandazzjonijiet dwar l-ugwaljanza bejn is-sessi u l-politika kummerċjali ta' UN Women li jirreferu għall-eżistenza ta' evidenza konklużiva li l-iżvilupp ekonomiku u l-ugwaljanza soċjali jimxu id f'id, minbarra li jikkonstataw il-korrelazzjoni qawwija bejn l-ugwaljanza bejn is-sessi u l-kompetittività u l-PDG per capita; jappella, għaldaqstant, sabiex l-inugwaljanza bejn is-sessi tibqa' tintuża bħala indikatur tas-sostenibbiltà fir-reviżjoni tal-Manwal tal-UE dwar il-Valutazzjonijiet tal-Impatt għas-Sostenibbiltà;

11.  Jistieden lill-UE tħeġġeġ u tappoġġa l-adeżjoni mal-prinċipji tar-Responsabbiltà Soċjali Korporattiva (CSR) tal-Patt Globali tan-NU; jitlob lill-UE tippromwovi, fil-fora tan-NU, l-adozzjoni ta' politiki kummerċjali li jinċentivaw b'mod effikaċi r-rispett għal dawn il-prinċipji, pereżempju billi jiġu stabbiliti kundizzjonijiet għall-akkwist pubbliku;

12.  Jinsab konxju tal-ħtieġa li l-Prinċipji Gwida tan-NU dwar in-Negozju u d-Drittijiet tal-Bniedem (UNGPs) jissaħħu u jiġu implimentati; iħeġġeġ lill-UE tikkontribwixxi għall-eżitu pożittiv tal-ħidma tal-Grupp ta' Ħidma Intergovernattiv dwar il-Korporazzjonijiet Transnazzjonali u Impriżi Kummerċjali Oħrajn fir-rigward tad-Drittijiet tal-Bniedem, li l-għan tiegħu huwa li joħloq strument ġuridikament vinkolanti għan-negozju u d-drittijiet tal-bniedem, filwaqt li jirrikonoxxi r-responsabbiltà konġunta tan-negozji u l-gvernijiet fl-appoġġ ta' dawn il-prinċipji;

13.  Jistieden lill-UE ssaħħaħ ir-rwol u l-parteċipazzjoni tagħha fil-gruppi ta' ħidma fil-qasam regolatorju tal-korpi tan-NU, bħall-grupp WP.29 li jopera taħt l-awspiċji tal-Kummissjoni Ekonomika għall-Ewropa tan-Nazzjonijiet Uniti (UNECE), u tinkoraġġixxi lil stati membri oħra tan-NU jieħdu azzjoni simili; jisħaq fuq il-ħtieġa li ssir ħidma favur il-ħolqien ta' standards tekniċi globali li jippromwovu l-kummerċ ħieles u t-tkabbir ekonomiku filwaqt li jkunu kompatibbli mas-suq uniku Ewropew;

14.  Jirrikonoxxi li l-ftehimiet kummerċjali u l-aċċess għas-saħħa huma relatati mill-qrib, speċjalment fil-pajjiżi fil-fażi tal-iżvilupp; jikkonstata li l-Organizzazzjoni Dinjija tas-Saħħa (WHO) qed taħdem fuq il-ħolqien ta' għodod maħsubin biex jevalwaw din ir-relazzjoni b'mod oġġettiv; iħeġġeġ lill-UE tappoġġa l-inizjattiva tad-WHO u tieħu inkunsiderazzjoni l-konklużjonijiet tal-ħidma tagħha.

RIŻULTAT TAL-VOTAZZJONI FINALI FIL-KUMITAT

24.9.2015

OPINJONI tal-Kumitat għall-Kontroll tal-Baġit

għall-Kumitat għall-Affarijiet Barranin

dwar ir-rwol tal-UE fin-NU - kif jistgħu jintlaħqu aħjar l-objettivi tal-UE fil-qasam tal-politika barranija

(2015/2104(INI))

Rapporteur għal opinjoni: Ryszard Czarnecki

SUĠĠERIMENTI

Il-Kumitat għall-Kontroll tal-Baġit jistieden lill-Kumitat għall-Affarijiet Barranin, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

–  wara li kkunsidra l-Ftehim Qafas Finanzjarju u Amministrattiv (FAFA) bejn l-Unjoni Ewropea u n-Nazzjonijiet Uniti (2003) u l-Addendum Nru 1 (2014) tiegħu,

A.  billi l-2015 hija sena iebsa għad-definizzjoni mill-ġdid tal-mod kif l-atturi u l-istituzzjonijiet globali jaħdmu flimkien, billi jiġu definiti forom ġodda ta' momentum u modus operandi, b'mod partikolari sabiex jinkisbu riżultati aħjar mill-impenji relatati mal-politiki esterni tal-UE;

B.  billi l-UE kiseb riżultati tajbin fil-qasam tal-kooperazzjoni internazzjonali fl-indirizzar ta' sfidi globali u fl-għoti ta' appoġġ għall-iżvilupp u għajnuna umanitarja lil ħafna partijiet tad-dinja;

C.  billi l-baġit tal-UE fil-qasam tad-difiża hu sinifikanti, u l-kontribuzzjonijiet finanzjarji tiegħu għall-missjonijiet ta' paċi tan-NU huma konsiderevoli;

D.  billi l-interventi esterni tal-UE jiġu direzzjonati permezz tal-organizzazzjonijiet internazzjonali li jew jimplimentaw il-fondi tal-UE jew jikkofinanzjaw proġetti flimkien mal-UE, inklużi sfidi f'termini ta' superviżjoni u governanza;

1.  Jenfasizza l-ħtieġa li tittejjeb l-effiċjenza, ir-responsabbiltà, l-effikaċja u t-trasparenza tan-NU, speċjalment fir-rigward tal-użu tar-riżorsi tal-UE u l-prestazzjoni fl-implimentazzjoni tal-orjentamenti strateġiċi u l-għanijiet ta' żvilupp li jkun intlaħaq qbil dwarhom fil-livell internazzjonali;

2.  Jappella lill-istituzzjonijiet rilevanti tal-UE u tan-NU jirrispettaw u jimplimentaw bis-sħiħ il-Ftehim Qafas Finanzjarju u Amministrattiv (FAFA); jitlob lill-Kummissjoni tirrapporta lill-Parlament dwar l-implimentazzjoni tal-FAFA u l-linji gwida relatati, u biex tidentifika l-oqsma li jeħtieġu titjib u tressaq proposti rilevanti f'dan ir-rigward;

3.  Jemmen li l-approssimazzjoni tas-sistemi ta' governanza rispettivi għandha tiffoka fuq id-definizzjoni u l-iskambju kontinwu ta' prattiki tajba bil-għan li jiġu stabbiliti prinċipji fundamentali ta' assigurazzjoni simili u sostenibbli bi qbil mar-Regolament Finanzjarju tal-UE; jappella f'dan ir-rigward għal ftuħ fuq iż-żewġ naħat, sabiex l-awdituri jkunu jistgħu jiksbu aċċess dettaljat għall-kontijiet tan-NU;

4.  Ifakkar li l-Unjoni Ewropea u l-Istati Membri tagħha huma kollettivament l-akbar donatur finanzjarju għall-baġit tan-NU; jinsisti, għaldaqstant, fl-ispirtu tal-inizjattiva "Magħqudin fl-Azzjoni" (mexxej wieħed, baġit wieħed, programm wieħed, uffiċċju wieħed), fuq il-ħtieġa li jiġu żgurati livell ogħla ta' viżibbiltà għall-finanzjament tal-UE mwassal permezz tan-NU, kif ukoll użu effiċjenti ta' dawn il-fondi; jesiġi li n-NU u l-Kummissjoni jżommu lill-Parlament Ewropew kompletament informat dwar l-implimentazzjoni tal-kontribuzzjonijiet tal-UE min-naħa tan-NU;

5.  Jinkoraġġixxi lin-NU u lill-istituzzjonijiet rilevanti tagħha jkomplu japprofondixxu l-kooperazzjoni tagħhom mal-UE b'mod li jitqarrbu kontinwament iż-żewġ mekkaniżmi ta' governanza permezz, inter alia, tal-iżvilupp kontinwu ta' sistemi eżawrjenti u sodi ta' monitoraġġ, rappurtar u kontroll; ifakkar li l-kooperazzjoni strutturata bejn l-UE u n-NU hija l-unika mezz effiċjenti biex jiġi evitat l-użu ineffikaċi ta' fondi u d-duplikazzjoni tal-attivitajiet;

6.  Hu tal-fehma li, bħala parti mis-sħubija interistituzzjonali, in-NU u l-UE għandhom itejbu l-metodi tagħhom għall-ġestjoni tar-riskji, is-superviżjoni finanzjarja kumplessiva u l-qafas maniġerjali tagħhom, u li l-funzjonijiet ta' awditjar għandhom jikkumparaw id-data, il-metodoloġiji u l-eżiti tagħhom;

7.  Jemmen li approċċi innovattivi għall-finanzjament joffru mezz importanti biex jiġu massimazzati d-disponibbiltà u l-impatt tal-finanzjament għall-iżvilupp, billi jidentifikaw għejun ta' finanzjament, mekkaniżmi u strumenti ta' inġinerija finanzjarja ġodda; jikkunsidra, b'mod partikolari, li l-approċċi innovattivi għall-finanzjament jistgħu jużaw il-finanzjament pubbliku biex jgħinu jiġġeneraw flussi ġodda ta' finanzjament u jikkatalizzaw l-investiment privat u l-finanzjament tas-suq, kif ukoll jimmassimizzaw l-impatt tal-fondi pubbliċi u privati eżistenti;

8.  Japprezza l-fatt li l-indirizzar tal-għajnuna tal-Unjoni permezz tan-NU jippermetti li l-UE tasal fir-reġjuni tad-dinja fejn inkella ma tkunx tista' tasal waħedha; huwa konxju mir-riskju inerenti għoli involut biex titwassal l-għajnuna fir-reġjuni milquta mill-kunflitti; jiddispjaċih, madankollu, li r-rapporti li jsiru lill-Kummissjoni mill-organizzazzjonijiet sħabha fdati bl-implimentazzjoni tal-baġit tal-Unjoni taħt ġestjoni indiretta ħafna drabi jingħataw tard, ma jkunux kompluti jew ma jkunux orjentati biżżejjed lejn ir-riżultati, biex b'hekk jipprevjenu lill-Kummissjoni milli teżerċita b'mod xieraq il-funzjoni ta' monitoraġġ tagħha;

9.  Jilqa', f'dan il-kuntest, il-ftehim reċenti tal-koleġiżlaturi dwar emenda għar-Regolament Finanzjarju, li tobbliga lin-NU u lill-organizzazzjonijiet sħab l-oħra ta' dan it-tip jinnotifikaw lill-Kummissjoni dwar kwalunkwe każ ta' irregolarità jew frodi li jsibu li jkun jaffettwa l-baġit tal-Unjoni; jikkunsidra, madankollu, li għandhom jissaħħu l-possibbiltajiet li għandha l-Kummissjoni biex tivvaluta l-korrettezza, l-effiċjenza u s-sostenibbiltà tal-finanzjament tal-Unjoni indirizzat permezz tan-NU;

10.  Jinsisti fuq il-ħtieġa li jinkiseb l-ogħla livell ta' trasparenza u responsabbiltà istituzzjonali fil-livelli kollha billi jiġi żgurat l-aċċess għal informazzjoni baġitarja u data finanzjarja eżawrjenti u affidabbli relatati mal-proġetti b'finanzjament mill-UE, b'mod li l-Parlament ikun jista' jeżerċita l-funzjoni ta' skrutinju tiegħu; jappella biex tissaħħaħ il-politika ta' divulgazzjoni tan-NU rigward l-intenzjonjiet, il-benefiċjarji u l-finanzjamenti, b'mod partikolari għar-rapporti ta' awditjar u evalwazzjoni tan-NU, bil-għan li jkun hemm amministrazzjoni aħjar tal-fondi tal-UE;

11.  Jikkunsidra li l-iżgurar tal-viżibbiltà tal-Unjoni hu xi ħaġa fundamentali, speċjalment fl-inizjattivi kofinanzjati u b'diversi donaturi fejn ikun involut il-finanzjament tal-UE; hu tal-fehma li hemm bżonn li informazzjoni regolari dwar ir-raggruppament ta' fondi (inklużi fondi fiduċjarji) tingħata rapidament peress li l-funġibbiltà u t-traċċabbiltà tal-fondi tal-UE huma kwistjonijiet ewlenin;

12.  Jinsisti li l-kooperazzjoni u l-qafas tal-ġejjieni għandhom jinkoraġġixxu u jinċentivaw studju u implimentazzjoni ulterjuri ta' għejun, mekkaniżmi u strumenti innovattivi mill-partijiet interessati rilevanti kollha, f'kooperazzjoni mill-qrib mal-banek multilaterali u donaturi oħra, u jiżguraw li dawn l-għejun ta' finanzjament ġodda jkunu kompletament konformi mal-prinċipji ta' trasparenza, responsabbiltà u effikaċja;

13.  Ifakkar li jeħtieġ li n-NU jieħdu l-miżuri xierqa biex jippubbliċizzaw il-fatt li l-azzjonijiet ikunu rċevew finanzjament mill-UE, b'mod li tiġi żgurata viżibbiltà u rikonoxximent paragunabbli ma' dawk ta' donaturi internazzjonali oħrajn, filwaqt li jixxerrdu wkoll il-valuri tal-Unjoni kondiviżi bejn l-UE u n-NU, bħall-promozzjoni tad-drittijiet tal-bniedem u l-istat tad-dritt, it-titjib tal-istandards ambjentali u soċjali, u l-appoġġ kumplessiv għall-iżvilupp sostenibbli kif ukoll għat-tkabbir ekonomiku inklużiv fl-interventi kollha tan-NU;

14.  Jenfasizza li l-attivitajiet kofinanzjati kollha jridu jsegwu akkuratament u jkunu konsistenti mal-istrateġija ġenerali u l-oqsma prijoritarji tal-UE, abbażi ta' preferenzi politiċi, kif ukoll ta' kriterji ta' effiċjenza ekonomika u finanzjarja, li għandhom jiġu riflessi fil-prestazzjoni maniġerjali;

15.  Jissottolinja l-fatt li l-UE tappoġġa l-kunċett li n-NU jridu jkunu adatti għall-iskop tagħhom, kif ukoll dejjem aktar effikaċi u effiċjenti; jemmen li l-isfidi li qed ifeġġu u dejjem jobbligaw lin-NU jassumu funzjonijiet ġodda, li min-naħa tagħhom se jirrikjedu eżami mill-ġdid tal-governanza u l-modalitajiet ta' finanzjament; jikkunsidra li l-iżgurar tal-ġestjoni tajba tar-riżorsi finanzjarji u l-persunal tan-NU, inkluż fin-negozjati dwar il-baġit regolari tan-NU u l-baġits tan-NU għaż-żamma tal-paċi li jmiss, għandu jkompli jkun prijorità għall-UE;

16.  Jappella kemm lill-UE kif ukoll lin-NU jinvolvu ruħhom fl-aħjar koordinament operattiv possibbli f'termini ta' komplementarjetà, sabiex jirriċerkaw b'mod sistematiku l-aħjar opportunitajiet, l-effetti multiplikaturi ottimali u s-sinerġiji għall-appoġġ u l-implimentazzjoni tal-objettivi tal-politiki tal-UE, b'mod partikolari bejn il-politiki tal-UE dwar l-iżvilupp u oqsma oħra ta' azzjoni esterna bħad-drittijiet tal-bniedem, il-migrazzjoni u r-rifuġjati, is-sigurtà, l-istabbiltà u l-prevenzjoni tal-kunflitti;

17.  Jinkoraġġixxi lill-UE u lin-NU jsaħħu, mill-aktar stadju bikri possibbli, l-għarfien espert tagħhom, kif ukoll l-approċċi strateġiċi u programmattivi tagħhom fid-diversi oqsma ta' intervent, u b'mod partikolari, il-kooperazzjoni tagħhom fir-rigward tal-istrumenti għall-ġestjoni tar-riskji (riskji finanzjarji, operattivi jew tal-pajjiż), b'mod li l-għajnuna tiġi indirizzata fejn tkun l-aktar meħtieġa; jappella biex jiġu applikati b'mod xieraq kundizzjonalitajiet stretti, b'mod partikolari l-preżenza jew l-iżvilupp ta' indikaturi ta' governanza tajba fis-settur pubbliku fil-pajjiżi sħab;

18.  Ifakkar li l-prinċipju tal-valur miżjud japplika wkoll għall-finanzjament tal-UE għall-attivitajiet tan-NU, u jappella lill-Kummissjoni biex tirrapporta b'mod sistematiku u fid-dettall dwar x'valur miżjud iġib miegħu kull finanzjament ta' dan it-tip meta mqabbel ma' finanzjament dirett mill-Istati Membri u jekk l-UE u/jew l-Istati Membri jassumu huma nnifishom r-responsabbiltà li jwettqu l-attivitajiet ikkonċernati;

19.  Jemmen li l-approċċ orjentat lejn ir-riżultati, fid-dawl tal-attenzjoni mogħtija lill-prestazzjoni tal-għajnuna tal-Unjoni, għandu jittejjeb permezz tal-introduzzjoni ta' qafas għar-responsabbiltà u l-kejl tar-riżultati li jippermetti l-valutazzjoni tas-solidità tal-proġetti f'termini ta' sostenibbiltà ekonomika u soċjali, kif ukoll l-evalwazzjoni tal-proġetti f'termini ta' effikaċja u effiċjenza;

20.  Jappoġġa djalogu permanenti dwar il-kwalità u s-sostenibbiltà tar-riżultati miksuba fi ħdan is-sħubija NU-UE, marbut ukoll mal-kwistjoni ġenerali tal-konsistenza u l-koerenza tal-interventi; jikkunsidra li l-indikaturi tar-riżultati u l-konverġenza tagħhom għandhom jiġu żviluppati ulterjorment sabiex tiżdied l-effikaċja tal-proġetti, jiġi żgurat valur miżjud reali u jinkiseb impatt akbar fil-qasam tal-iżvilupp;

21.  Jissottolinja, bħala prinċipju fundamentali, l-importanza għall-UE tal-politika ta' tolleranza żero fil-konfront tal-frodi u l-korruzzjoni u t-tisħiħ tar-regoli dwar l-integrità u l-etika; jinkoraġġixxi l-approfondiment tar-relazzjoni tal-istituzzjonijiet u l-korpi tan-NU mal-Uffiċċju Ewropew Kontra l-Frodi (OLAF) billi jadottaw il-linji gwida tal-OLAF dwar l-iskambju ta' informazzjoni u strateġiji.

RIŻULTAT TAL-VOTAZZJONI FINALI FIL-KUMITAT

23.9.2015

OPINJONI tal-Kumitat għall-Kultura u l-Edukazzjoni

għall-Kumitat għall-Affarijiet Barranin

dwar ir-rwol tal-UE fin-NU - kif jistgħu jintlaħqu aħjar l-objettivi tal-UE fil-qasam tal-politika barranija

(2015/2104(INI))

Rapporteur għal opinjoni: Fernando Maura Barandiarán

SUĠĠERIMENTI

Il-Kumitat għall-Kultura u l-Edukazzjoni jistieden lill-Kumitat għall-Affarijiet Barranin, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

Dimensjoni kulturali tal-politika barranija tal-UE

1.  Jenfasizza li l-kultura, flimkien mad-djalogu interkulturali u interreliġjuż hi strument qawwi ħafna għar-relazzjonijiet esterni Ewropej, li jrawwem djalogu politiku ma' pajjiżi terzi, il-koeżjoni, il-paċi u s-sigurtà, filwaqt li jippromwovi l-kuntatti bejn il-persuni, id-djalogu parteċipattiv ma' atturi kulturali f'oqsma differenti, u t-tisħiħ taċ-ċittadini u tas-soċjetà ċivili; jenfasizza fl-istess ħin, li l-kultura hi l-ewwel u qabel kollox valur awtoteliku u għandha tkun appoġġjata bħala tali;

2.  Jenfasizza l-fatt li l-politiki kulturali huma bbażati fuq valuri ewlenin tal-UE bħall-fehim reċiproku, il-kooperazzjoni u l-idea taċ-ċittadinanza kulturali globali, u għalhekk għandhom jiġu inkorporati b'mod konsistenti u strateġiku fl-azzjoni esterna tal-UE - inkluż fil-politika tal-viċinat tagħha - bħala strumenti għall-promozzjoni tal-valuri u tad-drittijiet fundamentali Ewropej, b'rispett sħiħ ta' kulturi u valuri oħrajn;

3.  Iħeġġeġ lis-Servizz Ewropew għall-Azzjoni Esterna (SEAE) u l-Kummissjoni - speċjalment id-Direttorat Ġenerali (DĠ) tagħha għall-Edukazzjoni u l-Kultura u d-DĠ għall-Kooperazzjoni Internazzjonali u l-Iżvilupp - biex jagħtu lill-kultura rwol aktar strateġiku fir-relazzjonijiet tal-UE ma' pajjiżi terzi;

4.  Jitlob li jkun hemm approċċ aktar integrat u kooperazzjoni aktar produttiva bejn il-Kummissjoni, is-SEAE, il-Parlament u n-NU f'oqsma bħall-promozzjoni tal-kultura, il-preservazzjoni ta' patrimonju kulturali f'riskju, il-ġlieda kontra l-kummerċ illegali ta' proprjetà kulturali (inkluż barra mill-UE) il-prevenzjoni tal-kunflitti, il-proċessi ta' rikonċiljazzjoni, il-bini tal-paċi, il-mitigazzjoni ta' wara l-kunflitti, strumenti ta' soljiev rapidu f'sitwazzjonijiet ta' kriżi, l-iżvilupp ta' industriji kreattivi, il-mobilità ta' professjonisti, beni u servizzi kulturali, l-edukazzjoni u l-iżvilupp, programmi ta' skambju ta' studenti, il-bini tal-kapaċità, l-edukazzjoni u t-taħriġ f'emerġenzi u l-aċċess għall-kultura u l-edukazzjoni;

5.  Jenfasizza l-ħtieġa għal skambji u fora kulturali bl-għan ta' fehim reċiproku u kooperazzjoni fil-livell bilaterali u multilaterali u l-bżonn li tissaħħaħ ġabra komuni ta' valuri universali; jiġbed l-attenzjoni, f'dan ir-rigward, dwar il-proġetti organizzati mis-SEAE u mid-DĠ Edukazzjoni u Kultura tal-Kummissjoni dwar id-diplomazija kulturali u jitlob li titfassal komunikazzjoni konġunta li tippromwovi it-tagħlim u l-fehim reċiproku - bil-kunsiderazzjoni ta' proġetti appoġġjati mill-Istati Membri - u l-iżvilupp ta' netwerks tal-organizzazzjonijiet kulturali u NGOs;

6.  Jindika li l-l-edukazzjoni u t-taħriġ għandhom rwol xi jwettqu f'sitwazzjonijiet ta' emerġenza minħabba kunflitti, u għalhekk jirrappreżentaw aspett li għandu jiġi nkluż fit-taqsima ġenerali usa' dwar l-attivitajiet ta' akkoljenza, appoġġ u awtonomizzazzjoni;

7.  Jenfasizza l-importanza tad-diplomazija kulturali u l-fatt li politika barranija kulturali Ewropea komuni żżid b'mod sinifikanti l-viżibbiltà tal-UE f'organizzazzjonijiet internazzjonali bħan-NU; jitlob għalhekk lill-Kummissjoni tiddedika kapitolu separat dwar id-diplomazija kulturali fil-politika barranija u ta' sigurtà globali tal-UE tagħha li qed tiġi mfassla għas-summit tal-Kunsill Ewropew f'Ġunju 2016;

8.  Jinnota li l-edukazzjoni għandha rwol importanti fl-iżvilupp uman, soċjali u ekonomiku u hija għodda kruċjali biex jinkisbu l-miri ewlenin tal-politika barranija tal-UE, bħall-bini tal-paċi u l-istabbiltà fid-dinja, l-iżvilupp dejjiemi, id-djalogu interkulturali u l-ġlieda kontra l-faqar, kemm fil-konfini tagħha u kemm fil-livell globali; jenfasizza l-importanza ta' kooperazzjoni effikaċi bejn l-UE u n-NU bl-għan li tappoġġja l-Edukazzjoni għal Kulħadd, ittejjeb l-aċċess għall-edukazzjoni u l-kwalità tagħhau li ssaħħaħ is-sistemi edukattivi madwar id-dinja kollha;

9.  Jirrikonoxxi li l-kultura tinsab fil-qalba tal-iżvilupp uman, u twettaq rwol importanti fil-bini ta' soċjetà, fil-promozzjoni tad-demokrazija u l-inklużjoni soċjali u fil-promozzjoni tad-drittijiet tal-bniedem u tal-libertajiet fundamentali; jistieden lill-UE, f'konformità mas-setgħat u r-responsabbiltajiet tagħha, biex tinkorpora d-diversità kulturali u l-promozzjoni tad-drittijiet tal-bniedem bħala wieħed mill-elementi ewlenin tar-relazzjonijiet internazzjonali tagħha u b'mod partikolari, fil-kooperazzjoni tal-iżvilupp Ewropew komuni, u tiżgura li kwalunkwe persuna li tallega li d-drittijiet kulturali tagħha ġew miksura jkollha aċċess effettiv għal rimedju;

10.  Jenfasizza li l-interkulturalità u l-fehim reċiproku huma essenzjali għal politiki ta' żvilupp b'suċċess u għalhekk iħeġġeġ lill-UE u lill-Istati Membri jippromwovu politiki ta' edukazzjoni u sensibilizzazzjoni dwar l-iżvilupp li jinkludu din id-dimensjoni;

11.  Iħeġġeġ lill-UE u lill-Istati Membri jippromwovu interessi komuni flimkien mal-pajjiżi terzi, permezz ta' sħubija fuq bażi ta' ugwaljanza ffukata fuq l-iskambju reċiproku u l-kooperazzjoni interkulturali; jirrakkomanda l-iżvilupp ta' rwol dinamiku għall-kultura fid-dimensjoni internazzjonali bħala "soft power" li jista' jkun ta' benefiċċju għall-UE u l-Istati Membri tagħha fir-relazzjonijiet tagħhom mal-kumplament tad-dinja;

12.  Jenfasizza l-potenzjal li għandha l-kooperazzjoni aktar mill-qrib fost l-Istati Membri sabiex jiżdied l-impatt tad-diplomazija kulturali tal-UE, partikolarment permezz ta' koordinament aħjar fost l-attachés kulturali tad-delegazzjonijiet tal-UE u tar-rappreżentanzi tal-Istati Membri, u l-ġbir flimkien tar-riżorsi mill-entitajiet kulturali tal-Istati Membri f'pajjiżi terzi;

13.  Jilqa', f'dan ir-rigward, l-Azzjoni Preparatorja dwar il-kultura fir-relazzjonijiet esterni tal-UE bħala strument importanti fit-titjib tar-rwol tal-kultura bħala fattur strateġiku għall-iżvilupp uman, soċjali u ekonomiku li jikkontribwixxi għall-għanijiet tal-politika barranija;

14.  Jistieden lill-Viċi President / Rappreżentant Għoli biex taħtar professjonist kulturali f'kull rappreżentanza tal-UE f'pajjiżi sħab terzi (bħal fid-delegazzjoni ta' bejn l-UE u ċ-Ċina) u biex tipprovdi lill-persunal tas-SEAE b'taħriġ dwar id-dimensjoni kulturali tal-politika barranija;

15.  Iħeġġeġ kooperazzjoni msaħħa bejn l-istituzzjonijiet kulturali u s-soċjetà ċivili, is-sħubiji bejn l-ibliet u l-ħolqien ta' "ċentri kreattivi" Ewropej f'pajjiżi terzi;

16.  Jitlob strateġija iktar koerenti għall-protezzjoni u l-promozzjoni tal-Patrimonju Dinji u kooperazzjoni internazzjonali msaħħa f'żoni ta' kunflitt f'kooperazzjoni iktar mill-qrib mal-International Committee of the Blue Shield (ICBS - Kumitat Internazzjonali tat-Tarka Blu);

17.  Jirrakkomanda lill-Kummissjoni tikkoopera b'mod proattiv mal-gruppi kulturali bbażati fuq netwerks tal-Istituti Nazzjonali tal-Unjoni Ewropea għall-Kultura (EUNIC), b'kooperazzjoni mal-istituzzjonijiet lokali, mal-prattikanti kulturali u mas-soċjetà ċivili, flimkien mal-istituti kulturali tal-Istati Membri;

18.  Jiddikjara li l-proġetti kulturali u l-inizjattivi ta' diplomazija kulturali għandhom ikunu sorveljati u evalwati sabiex jiġi żgurat l-użu tajjeb tal-fondi, kif ukoll biex tkun ivverifikata l-kwalità u l-impatt tal-inizjattivi;

19.  Jenfasizza l-ħtieġa li tiġi stabbilita dejta statistika dwar il-kultura u l-industriji kulturali biex tikkontribwixxi fid-dibattitu tal-politika kulturali u jiġi enfasizzat aktar il-potenzjal ekonomiku tal-industriji kulturali u kreattivi u l-impatt tagħhom fuq il-benesseri soċjali;

20.  Jenfasizza r-rwol tal-kultura biex trawwem id-demokratizzazzjoni, il-bini tal-paċi u r-rispett tad-drittijiet tal-bniedem; jissottolinja l-impenn tal-UE biex tappoġġja l-libertà artistika u l-libertà tal-espressjoni kulturali kontra ċ-ċensura u l-fastidju ta' artisti, riċerkaturi, ġurnalisti u organizzazzjonijiet tas-soċjetà ċivili; iħeġġeġ id-definizzjoni ta' prijoritajiet marbuta mad-dimensjoni kulturali fi ħdan l-Istrument Ewropew għad-Demokrazija u d-Drittijiet tal-Bniedem (EIDHR);

21.  Jiġbed l-attenzjoni għall-importanza tad-"Dikjarazzjoni dwar il-promozzjoni taċ-ċittadinanza u l-valuri komuni tal-libertà, it-tolleranza u n-nondiskriminazzjoni permezz tal-edukazzjoni" adottata f'Pariġi f'Marzu 2015, li tenfasizza l-ħtieġa li jitrawwem djalogu attiv bejn il-kulturi, kif ukoll solidarjetà globali u rispett reċiproku;

Kooperazzjoni u governanza UE-NU

22.  Jilqa' l-kooperazzjoni kkonsolidata bejn l-UE u l-UNESCO, abbażi tal-adozzjoni tal-Ftehim Qafas Finanzjarju u Amministrattiv bejn l-Unjoni Ewropea u n-Nazzjonijiet Uniti (FAFA) tal-2003, il-Memorandum ta' Ftehim bejn il-UNESCO u l-UE tal-2012 u l-parteċipazzjoni tal-UE fl-Assemblea Ġenerali tan-NU wara r-riżoluzzjoni tal-Assemblea Ġenerali tan-NU adottata fl-2011; jitlob, madankollu, rappreżentazzjoni aktar effikaċi tal-UE fi ħdan in-NU, partikolarment fl-oqsma tal-kultura, l-edukazzjoni, iċ-ċittadinanza u d-drittijiet tat-tfal u ż-żgħażagħ u bi qbil mat-Trattat ta' Lisbona; jenfasizza li sħubija strateġika UE-NU ġenwina tista' tinkiseb billi jkun hemm rappreżentanti tal-UE bi drittijiet tal-vot fuq il-bordijiet tal-aġenziji tan-NU fl-oqsma tal-kultura, l-edukazzjoni, iċ-ċittadinanza u d-drittijiet tat-tfal u ż-żgħażagħ u billi tittieħed azzjoni konġunta mal-UNESCO - u mal-UNICEF, UNDP, UNHCR, UNRWA u UNWOMAN - fil-forma ta' kooperazzjoni finanzjarja u ġestjoni komuni tal-proġetti bi qbil mal-pajjiżi sħab benefiċjarji;

23.  Jenfasizza l-fatt li sabiex tissaħħaħ il-kooperazzjoni bejn l-UE u l-UNESCO, hemm bżonn li dawn imorru lil hinn mill-assistenza finanzjarja u l-ġestjoni konġunta ta' proġetti billi tissaħħaħ is-sħubija fil-qasam tal-edukazzjoni u l-kultura f'perspettiva fit-tul; jitlob, għalhekk l-istabbiliment ta' djalogu strateġiku annwali ta' livell għoli fir-rigward tal-indirizzar ta' sfidi komuni b'mod iktar sostenibbli;

24.  Jenfasizza l-fatt li l-kultura hija l-mutur ewlieni għall-bini ta' soċjetajiet sostenibbli u jitlob l-integrazzjoni sistematika tad-dimensjoni kulturali fl-aġenda għall-iżvilupp sostenibbli post-2015 tan-NU u għalhekk, fl-Għanijiet ta' Żvilupp Sostenibbli (SDGs) li għandhom jinkisbu sal-2030, peress li l-kultura għandha impatt kbir fuq l-iżvilupp ekonomiku, l-inklużjoni soċjali, is-sostenibbiltà ambjentali, il-paċi u s-sigurtà;

25.  Jirrikonoxxi li l-patrimonju kulturali jirrappreżenta d-diversità tal-espressjonijiet kulturali u għalhekk dan għandu rwol importanti fir-relazzjonijiet esterni tal-Unjoni; jitlob li jiġu adottati leġiżlazzjoni armonizzata u ftehimiet internazzjonali biex jipproteġu l-patrimonju kulturali u jiġġieldu kontra t-traffikar illeċitu ta' beni kulturali, f'kooperazzjoni mill-qrib mal-UNESCO;

26.  Jenfasizza l-impatt tal-industriji kulturali u kreattivi (CCIs) fuq l-iżvilupp lokali u reġjonali u jitlob li jitkomplew u jiġu estiżi l-Proġetti tal-Faċilitajiet Esperti tal-UE/UNESCO u biex l-Indikaturi tal-Kultura għall-Iżvilupp tal-UNESCO (CDIS) jiġu meqjusa bħala referenza metodoloġika għall-evalwazzjoni tar-rwol multidimensjonali tal-kultura fil-proċessi tal-iżvilupp;

27.  Jenfasizza l-fatt li t-turiżmu kulturali jiffaċilita l-kuntatti bejn in-nies madwar id-dinja u jilqa' l-isforzi konġunti biex jissaħħaħ it-turiżmu bbażat fuq il-patrimonju tal-UNESCO f'kooperazzjoni mal-UE, li jħeġġeġ investiment fis-settur kulturali u joffri kontribut sostenibbli u ta' kwalità għolja għall-promozzjoni tad-diversità tal-espressjonijiet kulturali;

28.  Jenfasizza l-bżonn li jitneħħew l-ostakli u titjieb il-mobilità għall-artisti u l-professjonisti tal-kultura permezz ta' forom differenti ta' trattamenti preferenzjali, bħal viża għal raġunijiet edukattivi u kulturali, l-iffaċilitar tal-iskambju kulturali, il-proġetti ta' riċerka, ir-residenzi tal-artisti u l-għotjiet għall-ħallieqa u l-artisti, bi qbil mal-Artikolu 16 tal-Konvenzjoni dwar il-Protezzjoni u l-Promozzjoni tad-Diversità tal-Espressjonijiet Kulturali tal-UNESCO tal-2005, iffirmata b'mod konġunt mill-UE;

29.  Jirrakkomanda li tiġi żgurata l-kooperazzjoni għall-edukazzjoni bejn l-UE u n-NU fi programmi ta' emerġenzi f'każ ta' kriżijiet umanitarji, kunflitti armati u diżastri naturali, billi jkomplu jappoġġjaw programmi bħal Edukazzjoni f'Emerġenzi u Tranżizzjoni Wara Kriżi tal-UNICEF, programm ta' edukazzjoni ta' kwalità fil-kampijiet tar-refuġjati tal-UNHCR u x-xogħol edukattiv tal-UNRWA;

Strumenti legali

30.  Ifakkar li l-UE rratifikat il-Konvenzjoni tal-UNESCO 2005 dwar il-Protezzjoni u l-Promozzjoni tad-Diversità tal-Espressjonijiet Kulturali u jistieden lill-Istati Membri li għadhom ma għamlux dan biex jirratifikaw il-Konvenzjoni tal-1970 dwar il-Mezzi ta' Projbizzjoni u Prevenzjoni tal-Importazzjoni, Esportazzjoni u Trasferiment Illegali tas-Sjieda tal-Proprjetà Kulturali, u tal-Konvenzjoni tal-UNIDROIT tal-1995 dwar l-Oġġetti Kulturali Misruqa jew Esportati Illegalment, li jirrappreżentaw għodod importanti għat-tisħiħ tal-protezzjoni tal-patrimonju kulturali u d-diversità kulturali globali, kif ukoll il-Konvenzjoni tal-1954 għall-Protezzjoni tal-Proprjetà Kulturali fil-Każ ta' Konflitt Armat u ż-żewġ protokolli tagħha, il-Konvenzjoni tal-UNESCO dwar il-Protezzjoni tal-Wirt Kulturali ta' Taħt l-Ilma tal-2001 u l-Konvenzjoni tal-UNESCO għall-Ħarsien tal-Patrimonju Kulturali Intanġibbli tal-2003; jitlob li jkun hemm armonizzazzjoni tal-leġiżlazzjoni u ftehim internazzjonali dwar il-patrimonju kulturali u t-traffikar illeċitu;

31.  Jitlob li jkun hemm titjib fl-istrateġiji tal-komunikazzjoni fl-iżvilupp tal-kooperazzjoni kulturali bl-użu u l-iżvilupp ta' riżorsi diġitali, bħal pjattaformi ta' informazzjoni multilingwi bbażati fuq l-internet u riżorsi edukattivi onlajn, biex titrawwem l-aċċessibbiltà, tixxerred l-informazzjoni fil-lingwi lokali u jiġu mħeġġa l-iskambji u n-netwerking fost l-artisti, il-prattikanti kulturali u l-organizzazzjonijiet tas-soċjetà ċivili;

32.  Jenfasizza l-importanza simbolika tal-patrimonju kulturali, li sar mira politika, kif intwera mill-qerda reċenti ta' siti kulturali fis-Sirja u fl-Irak, u li tagħmel il-koordinament u sensibilizzazzjoni akbar indispensabbli għall-protezzjoni tiegħu;

33.  Jitlob f'dan ir-rigward li jiġu intensifikanti l-isforzi biex titwaqqaf il-qerda ta' patrimonju kulturali globali f'kooperazzjoni mal-UNESCO u l-istati membri l-oħra tan-NU.

RIŻULTAT TAL-VOTAZZJONI FINALI FIL-KUMITAT

30.9.2015

OPINJONI tal-Kumitat għall-Affarijiet Kostituzzjonali

għall-Kumitat għall-Affarijiet Barranin

dwar ir-rwol tal-UE fin-NU - kif jistgħu jintlaħqu aħjar l-objettivi tal-UE fil-qasam tal-politika barranija

(2015/2104(INI))

Rapporteur għal opinjoni: David McAllister

SUĠĠERIMENTI

Il-Kumitat għall-Affarijiet Kostituzzjonali jistieden lill-Kumitat għall-Affarijiet Barranin, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1.  Jikkunsidra kemm l-istruttura istituzzjonali kumplessa tan-Nazzjonijiet Uniti (NU) bħala organizzazzjoni internazzjonali ta' stati kif ukoll in-natura speċifika tal-Unjoni Ewropea (UE) bħala unjoni sovranazzjonali li għandha status ta' osservatur privileġġat fi ħdan in-NU sa mill-2011, bi dritt li tipparteċipa f'dibattiti, tressaq proposti u emendi, tqajjem punti ta' ordni u tiċċirkula dokumenti abbażi tar-Riżoluzzjoni tan-NU 65/276 dwar "Il-parteċipazzjoni tal-Unjoni Ewropea fil-ħidma tan-Nazzjonijiet Uniti" tat-3 ta' Mejju 2011; jissottolinja li s-suġġetti ġuridiċi attwali tan-NU huma stati sovrani tal-komunità internazzjonali, inklużi l-Istati Membri tal-UE; jappella, bil-għan li tiżdied il-kooperazzjoni globali effikaċi, biex ikun hemm kuntatt aħjar bejn il-parteċipanti tan-NU kif ukoll l-istrutturi differenti tan-NU (aġenziji, fondi, programmi, Kummissjoni u kumitati) billi jitjiebu b'mod globali l-koordinazzjoni u l-koerenza; jemmen, f'dan il-kuntest, li l-UE għandha taġixxi bħala attur globali ġenwin fi ħdan in-NU u għandha tfittex li tkompli ttejjeb l-effett ta' lieva u l-viżibbiltà tagħha fix-xena internazzjonali, bi qbil mal-ittra u l-ispirtu tat-Trattat ta' Lisbona;

2.  Jemmen li l-istatus privileġġat tal-UE fi ħdan in-NU għandu jwitti t-triq għal koeżjoni u kooperazzjoni aktar mill-qrib; jistieden lill-Istati Membri, bil-għan li jkun possibbli li jingħata aktar piż lir-rwol tal-Unjoni fil-politika barranija billi l-UE tieħu pożizzjoni bħala attur internazzjonali uniku ħalli ttejjeb il-koordinazzjoni interna f'dak il-qasam, biex jaqblu minn qabel fuq pożizzjoni komuni dwar il-kwistjonijiet relevanti kollha u jqisu modi li bihom jipprovdu l-għodod kollha meħtieġa ħalli tinkiseb Politika għall-Affarijiet Barranin u ta' Sigurtà verament komuni; ifakkar li l-pożizzjoni ta' Rappreżentant Għoli għall-Affarijiet Barranin u l-Politika ta' Sigurtà kienet introdotta, skont l-Artikolu 18 tat-TUE, bil-għan li l-Unjoni tkun tista' titkellem b'vuċi waħda fil-forums internazzjonali, u mhux b'inqas fin-NU, u li għalhekk ir-Rappreżentant Għoli għandha tingħata l-opportunità li twettaq ir-rwol tagħha b'mod sħiħ, bħala r-rappreżentant estern prinċipali tal-UE;

3.  Jitlob lin-NU, lill-Kummissjoni u lill-Kunsill iżommu lill-Parlament informat b'mod sħiħ dwar il-koordinazzjoni ta' bejniethom, sabiex jinvolvu lill-Parlament fid-definizzjoni u r-reviżjoni tal-għanijiet tal-politika barranija tal-UE;

4.  Jappoġġa l-aġenda ta' riforma tan-NU għall-espressjoni ta' multilateraliżmu effikaċi, filwaqt li jirrikonoxxi l-istatus privileġġat tal-UE fl-Assemblea Ġenerali tan-NU wara d-dħul fis-seħħ tat-Trattat ta' Lisbona fl-1 ta' Diċembru 2009 u l-adozzjoni tar-Riżoluzzjoni tan-NU 65/276 tat-3 ta' Mejju 2011 dwar "Il-parteċipazzjoni tal-Unjoni Ewropea fil-ħidma tan-Nazzjonijiet Uniti";

5.  Jappella biex isiru n-negozjati, il-proċeduri u r-riforma meħtieġa tal-Kunsill tas-Sigurtà tan-NU ħalli l-UE tkun tista' ssir membru permanenti ta' dak il-korp, b'siġġu permanenti u vot uniku;

6.  Ifakkar li l-prinċipji bażiċi taż-żewġ entitajiet internazzjonali huma komuni għat-tnejn, u jenfasizza li dawn il-valuri kondiviżi għandhom ikunu meqjusa bħala l-bażi ewlenija għal ħidma konġunta; jenfasizza li sħubija soda u stabbli bejn l-UE u n-NU hija fundamentali għall-ħidma tan-NU taħt it-tliet pilastri – il-paċi u s-sigurtà, id-drittijiet tal-bniedem u l-iżvilupp sostenibbli – u hija importanti ħafna wkoll għar-rwol tal-UE bħala protagonist globali attiv; jafferma mill-ġdid ir-rwol ċentrali li jiżvolġu l-prevenjoni tal-kawżi ta' kunflitti vjolenti u l-ġlieda kontrihom u t-tiftix ta' soluzzjonijiet għal sfidi ġodda;

7.  Jissottolinja li Assemblea Parlamentari tan-NU (UNPA), maħluqa skont l-Artikolu 22 tal-Karta tan-NU, tista' tkun il-punt tat-tluq għad-demokratizzazzjoni tan-NU, sabiex tissaħħaħ ir-responsabbiltà demokratika u t-trasparenza tal-governanza globali u sabiex il-pubbliku jkun jista' jipparteċipa aktar fl-attivitajiet tan-NU;

8.  Huwa impenjat biex jagħmel is-sistema tan-NU u l-istituzzjonijiet u l-istrutturi multipli tagħha aktar adatti għal sfidi u żviluppi globali ġodda, u biex iżid it-trasparenza, ir-responsabbiltà u l-effikaċja tagħha billi tiġi evitata d-duplikazzjoni u billi l-istrutturi differenti tan-NU jintużaw b'mod aktar razzjonali; jissuġġerixxi li l-esperjenza tal-UE fit-teħid ta' deċiżjonijiet transnazzjonali tista' tipprovdi perspettivi li jistgħu jkunu ta' għajnuna għall-proċess ta' riforma tan-NU, speċjalment fir-rigward tal-Kunsill tas-Sigurtà;

9.  Jappella biex il-kandidati nisa għall-pożizzjoni ta' Segretarju Ġenerali tan-NU jkunu appoġġati fl-elezzjonijiet li ġejjin;

10.  Ifakkar li l-UE u l-Istati Membri tagħha flimkien huma l-akbar donatur finanzjarju għall-baġit tan-NU; ifakkar li l-impenn tal-UE hu rifless mhux biss fl-ammont finanzjarju iżda wkoll fil-kollaborazzjoni permezz tal-kapital uman u l-għarfien tekniku; jinsisti, għaldaqstant, fl-ispirtu tal-inizjattiva "Magħqudin fl-Azzjoni" (mexxej wieħed, baġit wieħed, programm wieħed, uffiċċju wieħed), fuq il-ħtieġa li jiġi żgurat livell ogħla ta' viżibbiltà għall-finanzjament tal-UE mwassal permezz tan-NU, kif ukoll li jkun hemm użu effiċjenti tal-fondi kkonċernati; jitlob li l-Kummissjoni u l-Istati Membri tal-UE jagħmlu pressjoni fuq in-NU biex tiżgura l-implimentazzjoni konsistenti tal-Inizjattiva ta' Trasparenza u Responsabbiltà tan-NU, u jitlobhom iżommu lill-Parlament infurmat b'mod sħiħ u fil-ħin dwar l-implimentazzjoni tal-kontribuzzjonijiet tal-UE min-NU;

11.  Japprezza l-fatt li t-twassil tal-għajnuna tal-Unjoni permezz tan-NU jippermetti li l-UE tappoġġa reġjuni tad-dinja fejn għandha mnejn ma tkunx tista' tasal waħedha; huwa konxju mir-riskju inerenti għoli involut biex l-għajnuna titwassal fir-reġjuni milquta mill-kunflitti; jiddispjaċih, madankollu, li r-rapporti li jsiru lill-Kummissjoni mill-organizzazzjonijiet sħabha fdati bl-implimentazzjoni tal-baġit tal-Unjoni taħt ġestjoni indiretta ħafna drabi jingħataw tard, ma jkunux kompluti jew ma jkunux orjentati biżżejjed lejn ir-riżultati, u b'hekk jimpedixxu lill-Kummissjoni milli teżerċita b'mod xieraq il-funzjoni ta' monitoraġġ tagħha;

12.  Iqis li kooperazzjoni bejn l-UE u n-NU fir-rigward tal-appoġġ għall-paċi hija essenzjali sabiex jiġu assistiti missjonijiet politiċi u attivitajiet marbuta mal-medjazzjoni, kif ukoll sabiex jiġu semplifikati l-proċeduri tal-ippjanar, u f'dan ir-rigward jagħti l-appoġġ sħiħ tiegħu lir-rieżami tal-operazzjonijiet tal-paċi tan-NU;

13.  Jirrikonoxxi l-ħtieġa tal-UE li tagħmel is-sistema tan-NU aktar adatta għal konfigurazzjonijiet tal-poter globali ġodda, imma jqis li l-isforzi tagħha favur ir-riformi ġew imfixkla min-nuqqas ta' pożizzjoni komuni fost l-Istati Membri, partikolarment f'dak li jirrigwarda l-paċi u s-sigurtà fil-livell internazzjonali, u kkontribwew lejn – jew tal-inqas ma rrisolvietx – l-impass attwali dwar ir-riforma tal-Kunsill tas-Sigurtà;

14.  Jenfasizza l-prijoritajiet attwali tal-UE stabbiliti għad-69 sessjoni tal-Assemblea Ġenerali tan-NU, li jtennu t-talba li l-Unjoni ilha tisħaq fuqha li n-NU għandha tissemplifika l-istrutturi, il-baġit u l-metodi ta' ħidma tagħha, mingħajr ma tibqa' lura milli tittratta kwistjonijiet diffiċli bħar-riforma tal-Kunsill tas-Sigurtà;

15.  Jenfasizza li l-Assemblea Ġenerali, li tirrappreżenta lill-gvernijiet tal-pajjiżi membri kollha, irid ikollha l-mezzi meħtieġa biex tagħti direzzjoni lis-sistema tan-NU u tikkoordina l-attivitajiet kollha tagħha;

16.  Jirrakkomanda lill-Kunsill: li jappoġġa b'mod attiv riforma komprensiva tas-sistema tan-NU, u b'mod speċjali tal-Kunsill tas-Sigurtà tagħha, sabiex jissaħħu l-leġittimità, ir-rappreżentazzjoni reġjonali, ir-responsabbiltà u l-effikaċja tas-sistema tagħha; li jwettaq ħidma lejn l-għan fuq terminu twil li l-UE jkollha siġġu f'Kunsill tas-Sigurtà estiż; li jiżgura l-koerenza u l-effikaċja tal-UE bħala attur globali, bil-għan li jkun hemm azzjoni rapida u komprensiva u li jitwassal "messaġġ b'leħen wieħed", billi jittejbu il-koordinazzjoni tal-pożizzjonijiet tal-Istati Membri u l-kooperazzjoni bejn is-SEAE u l-Istati Membri; u li jħeġġeġ, f'dan ir-rigward, lis-SEAE, b'mod partikolari permezz tad-delegazzjonijiet tal-UE fi New York u f'Ġinevra, biex jaħdem lejn koerenza akbar tal-UE.

RIŻULTAT TAL-VOTAZZJONI FINALIFIL-KUMITAT LI JINTALAB JAGĦTI OPINJONI

RIŻULTAT TAL-VOTAZZJONI FINALIFIL-KUMITAT RESPONSABBLI

VOTAZZJONI FINALI B'SEJĦA TAL-ISMIJIET FIL-KUMITAT RESPONSABBLI

Tifsira tas-simboli użati

+  :  favur

-  :  kontra

0  :  astensjonijiet

(1) ĠU C 100, 26.3.2015, p. 27. (2) ĠU C 377, 7.12.2012, p. 66. (3) 65/276 tat-3 ta' Mejju 2011 dwar il-parteċipazzjoni tal-Unjoni Ewropea fil-ħidma tan-Nazzjonijiet Uniti (4) S/PRST/2014/4 tal-14 ta' Frar 2014 - dikjarazzjoni mill-President tal-Kunsill tas-Sigurtà dwar il-kooperazzjoni bejn in-Nazzjonijiet Uniti u l-organizzazzjonijet reġjonali u subreġjonali fiż-żamma tal-paċi u s-sigurtà internazzjonali (5) FAO: Organizzazzjoni tal-Ikel u l-Agrikoltura tan-Nazzjonijiet Uniti; IFAD: Fond Internazzjonali għall-Iżvilupp Agrikolu; ILO: Organizzazzjoni Internazzjonali tax-Xogħol; FMI: Fond Monetarju Internazzjonali; UNESCO: Organizzazzjoni tan-NU għall-Edukazzjoni, ix-Xjenza u l-Kultura; UNIDO: Organizzazzjoni tan-NU għall-Iżvilupp Industrijali; WHO: Organizzazzjoni Dinjija tas-Saħħa; UNCTAD: Konferenza tan-NU dwar il-Kummerċ u l-Iżvilupp; UNDP: Programm ta' Żvilupp tan-NU; UNEP: Programm tan-NU għall-Ambjent; UNFPA: Fond tan-NU għall-Popolazzjoni; UNHCR: Uffiċċju tal-Kummissarju Għoli tan-NU għar-Rifuġjati; UNICEF: Fond tan-NU għat-Tfal; WFP: Programm Dinji tal-Ikel. (6) Riżoluzzjoni tal-Assemblea Ġenerali tan-NU A/65/276 tat-3 ta' Mejju 2011 dwar il-parteċipazzjoni tal-Unjoni Ewropea fil-ħidma tan-Nazzjonijiet Uniti