RAPPORT dwar il-proposta għal direttiva tal-Parlament Ewropew u tal-Kunsill li temenda d-Direttiva (UE) 2016/97 rigward id-data tal-applikazzjoni tal-miżuri ta' traspożizzjoni tal-Istati Membri
8.2.2018 - (COM(2017)0792 – C8-0449/2017 – 2017/0350(COD)) - ***I
Kumitat għall-Affarijiet Ekonomiċi u Monetarji
Rapporteur: Werner Langen
(Proċedura simplifikata – Artikolu 50(2) tar-Regoli ta' Proċedura)
ABBOZZ TA' RIŻOLUZZJONI LEĠIŻLATTIVA TAL-PARLAMENT EWROPEW
dwar il-proposta għal direttiva tal-Parlament Ewropew u tal-Kunsill li temenda d-Direttiva (UE) 2016/97 rigward id-data tal-applikazzjoni tal-miżuri ta' traspożizzjoni tal-Istati Membri
(COM(2017)0792 – C8-0449/2017 – 2017/0350(COD))
(Proċedura leġiżlattiva ordinarja: l-ewwel qari)
Il-Parlament Ewropew,
– wara li kkunsidra l-proposta tal-Kummissjoni lill-Parlament Ewropew u lill-Kunsill (COM(2017)0792),
– wara li kkunsidra l-Artikolu 294(2) u l-Artikoli 53(1) u 62 tat-Trattat dwar il-Funzjonament tal-Unjoni Ewropea, skont liema artikoli l-Kummissjoni ppreżentat il-proposta lill-Parlament (C8-0449/2017),
– wara li kkunsidra l-Artikolu 294(3) tat-Trattat dwar il-Funzjonament tal-Unjoni Ewropea,
– wara li kkunsidra l-Artikolu 59 tar-Regoli ta' Proċedura tiegħu,
– wara li kkunsidra r-rapport tal-Kumitat għall-Affarijiet Ekonomiċi u Monetarji (A8-0024/2018),
A. Billi għal raġunijiet ta' urġenza huwa ġustifikat li ssir votazzjoni qabel l-iskadenza tat-terminu ta' tmien ġimgħat stabbiliti fl-Artikolu 6 tal-Protokoll Nru 2 dwar l-applikazzjoni tal-prinċipji ta 'sussidjarjetà u proporzjonalità;
1. Jadotta l-pożizzjoni fl-ewwel qari li tidher hawn taħt;
2. Jitlob lill-Kummissjoni biex terġa' tirreferi l-kwistjoni lill-Parlament jekk tibdel il-proposta tagħha, temendaha b'mod sustanzjali jew ikollha l-ħsieb li temendaha b'mod sustanzjali;
3. Jagħti istruzzjonijiet lill-President tiegħu sabiex jgħaddi/tgħaddi l-pożizzjoni tal-Parlament lill-Kunsill u lill-Kummissjoni kif ukoll lill-parlamenti nazzjonali.
Emenda 1
EMENDI TAL-PARLAMENT EWROPEW[1]*
għall-proposta tal-Kummissjoni
---------------------------------------------------------
IL-PARLAMENT EWROPEW U L-KUNSILL TAL-UNJONI EWROPEA,
Wara li kkunsidraw it-Trattat dwar il-Funzjonament tal-Unjoni Ewropea, u b'mod partikulari l-Artikoli 53(1) u 62 tiegħu,
Wara li kkunsidraw il-proposta tal-Kummissjoni Ewropea,
Wara li l-abbozz ta' att leġiżlattiv intbagħat lill-parlamenti nazzjonali,
Wara li kkunsidraw l-opinjoni tal-Kumitat Ekonomiku u Soċjali Ewropew[2],
Filwaqt li jaġixxu skont il-proċedura leġiżlattiva ordinarja,
Billi:
(1) Id-Direttiva (UE) 2016/97 tal-Parlament Ewropew u tal-Kunsill[3] tarmonizza d-dispożizzjonijiet nazzjonali li jikkonċernaw id-distribuzzjoni ta' prodotti tal-assigurazzjoni u tar-riassigurazzjoni u prodotti ta' investiment ibbażati fuq l-assigurazzjoni minn intermedjarji tal-assigurazzjoni, kumpaniji tal-assigurazzjoni, l-impjegati tagħhom u intermedjarji tal-assigurazzjoni anċillari fl-Unjoni.
(2) Skont l-Artikolu 42 tad-Direttiva (UE) 2016/97, l-Istati Membri għandhom idaħħlu fis-seħħ il-liġijiet, ir-regolamenti u d-dispożizzjonijiet amministrattivi meħtieġa biex jikkonformaw ma' dik id-Direttiva sat-23 ta' Frar 2018.
(3) Fil-21 ta' Settembru 2017, il-Kummissjoni adottat żewġ Regolamenti Delegati li jissupplimentaw id-Direttiva (UE) 2016/97, wieħed fir-rigward tar-rekwiżiti tas-sorveljanza u tal-governanza tal-prodotti għall-impriżi tal-assigurazzjoni u d-distributuri tal-assigurazzjoni[4], u l-ieħor fir-rigward tar-rekwiżiti ta' informazzjoni u r-regoli tal-kondotta tal-operazzjonijiet applikabbli għad-distribuzzjoni ta' prodotti ta' investiment ibbażati fuq l-assigurazzjoni[5].
(4) Fid-deċiżjonijiet tiegħu li ma jqajjem ebda oġġezzjoni għar-Regolamenti Delegati msemmija fil-premessa 3[6], il-Parlament Ewropew stieden lill-Kummissjoni biex tadotta proposta leġiżlattiva li tistabbilixxi l-1 ta' Ottubru 2018 bħala d-data ta' applikazzjoni tal-liġijiet, ir-regolamenti u d-dispożizzjonijiet amministrattivi meħtieġa għall-konformità mad-Direttiva (UE) 2016/97, minflok it-23 ta' Frar 2018. Il-Parlament Ewropew issostanzja dik it-talba bil-ħtieġa li l-impriżi tal-assigurazzjoni u d-distributuri tal-assigurazzjoni jingħataw aktar ħin biex iħejju aħjar għal implimentazzjoni korretta u effikaċi tad-Direttiva (UE) 2016/97 u biex jimplimentaw il-bidliet tekniċi u organizzattivi meħtieġa għall-konformità mar-Regolamenti Delegati.
(5) Minħabba l-perjodu qasir ħafna ta' żmien li fadal qabel ma l-liġijiet, ir-regolamenti u d-dispożizzjonijiet amministrattivi nazzjonali meħtieġa għall-konformità mad-Direttiva (UE) 2016/97 jiddaħħlu fis-seħħ, din id-Direttiva għandha tidħol fis-seħħ mingħajr dewmien.
(6) Għaldaqstant id-Direttiva (UE) 2016/97 għandha tiġi emendata skont dan,
(7) Sabiex tiġi żgurata ċ-ċertezza legali u jiġi evitat tfixkil potenzjali fis-suq, huwa meħtieġ li din id-Direttiva tidħol fis-seħħ b'urġenza u li tapplika, b'effett retroattiv, mit-23 ta' Frar 2018.
(8) Konsegwentement, f'dan il-każ huwa wkoll iġġustifikat li tiġi applikata l-eċċezzjoni għal każijiet urġenti prevista fl-Artikolu 4 tal-Protokoll (Nru 1) dwar ir-rwol tal-Parlamenti nazzjonali fl-Unjoni Ewropea.
ADOTTAW DIN ID-DIRETTIVA:
Artikolu 1
Id-Direttiva (UE) 2016/97 hija emendata kif ġej:
(1) fl-Artikolu 42, il-paragrafu 1 jiġi emendat kif ġej:
(2) (a) l-ewwel subparagrafu huwa sostitwit b'dan li ġej:
(3) "Sal-1 ta' Lulju 2018, l-Istati Membri għandhom jadottaw u jippubblikaw il-miżuri meħtieġa biex jikkonformaw ma' din id-Direttiva. Dawn għandhom minnufih jinfurmaw lill-Kummissjoni.";
(4) (b) jiżdied is-subparagrafu li ġej:
"L-Istati Membri għandhom japplikaw il-miżuri msemmija fl-ewwel subparagrafu sa mhux aktar tard mill-1 ta' Ottubru 2018.";
(5) fl-Artikolu 44, l-ewwel paragrafu jiġi sostitwit b'dan li ġej:
"Id-Direttiva 2002/92/KE, kif emendata mid-Direttivi elenkati fil-Parti A tal-Anness II għal din id-Direttiva, titħassar b'effett mill-1 ta' Ottubru 2018, mingħajr preġudizzju għall-obbligi tal-Istati Membri dwar il-limiti ta' żmien għat-traspożizzjoni fil-liġi nazzjonali tad-Direttivi stabbiliti fil-Parti B tal-Anness II għal din id-Direttiva.".
Artikolu 2
Din id-Direttiva għandha tidħol fis-seħħ fil-jum tal-pubblikazzjoni tagħha f'Il-Ġurnal Uffiċjali tal-Unjoni Ewropea.
Għandha tapplika. b'effett retroattiv, mit-23 ta' Frar 2018.
Artikolu 3
Din id-Direttiva hija indirizzata lill-Istati Membri.
Magħmul fi Brussell,
Għall-Parlament Ewropew Għall-Kunsill
Il-President Il-President
- [1] * Emendi: it-test ġdid jew modifikat huwa indikat permezz tat-tipa korsiva u grassa; it-tħassir huwa indikat permezz tas-simbolu ▌.
- [2] ĠU C , , p. .
- [3] Id-Direttiva (UE) 2016/97 tal-Parlament Ewropew u tal-Kunsill tal-20 ta' Jannar 2016 dwar id-distribuzzjoni tal-assigurazzjoni (ĠU L 26, 2.2.2016, p. 19).
- [4] [Ir-Regolament Delegat tal-Kummissjoni (UE) .../... tal-21 ta' Settembru 2017 li jissupplimenta d-Direttiva (UE) 2016/97 tal-Parlament Ewropew u tal-Kunsill fir-rigward tar-rekwiżiti tas-sorveljanza u tal-governanza tal-prodotti għall-impriżi tal-assigurazzjoni u d-distributuri tal-assigurazzjoni (ĠU C [...], [...], p. [...])].
- [5] [Ir-Regolament Delegat tal-Kummissjoni (UE) .../... tal-21 ta' Settembru 2017 li jissupplimenta d-Direttiva (UE) 2016/97 tal-Parlament Ewropew u tal-Kunsill fir-rigward ta' regoli dwar il-kondotta tal-operazzjonijiet applikabbli għad-distribuzzjoni ta' prodotti ta' investiment ibbażati fuq l-assigurazzjoni (ĠU C [...], [...], p. [...])].
- [6] P8 TA-PROV(2017)0404 u P8 TA-PROV(2017)0405, adottati fil-25.10.2017, Disponibbli fuq http://www.europarl.europa.eu/portal/mt
PROĊEDURA TAL-KUMITAT RESPONSABBLI
Titolu |
Id-data tal-applikazzjoni tal-miżuri ta’ traspożizzjoni tal-Istati Membri |
||||
Referenzi |
COM(2017)0792 – C8-0449/2017 – 2017/0350(COD) |
||||
Data meta ġiet ippreżentata lill-PE |
20.12.2017 |
|
|
|
|
Kumitat responsabbli Data tat-tħabbir fis-seduta plenarja |
ECON 15.1.2018 |
|
|
|
|
Kumitati mitluba jagħtu opinjoni Data tat-tħabbir fis-seduta plenarja |
IMCO 15.1.2018 |
JURI 15.1.2018 |
|
|
|
Opinjoni(jiet) mhux mogħtija Data tad-deċiżjoni |
IMCO 4.12.2017 |
JURI 24.1.2018 |
|
|
|
Rapporteurs Data tal-ħatra |
Werner Langen 14.12.2017 |
|
|
|
|
Proċedura simplifikata - data tad-deċiżjoni |
14.12.2017 |
||||
Eżami fil-kumitat |
24.1.2018 |
|
|
|
|
Data tal-adozzjoni |
8.2.2018 |
|
|
|
|
Data tat-tressiq |
8.2.2018 |
||||