RAPPORT dwar Strateġija ġdida UE-Afrika – sħubija għal żvilupp sostenibbli u inklużiv

11.2.2021 - (2020/2041(INI))

Kumitat għall-Iżvilupp
Rapporteur: Chrysoula Zacharopoulou


Proċedura : 2020/2041(INI)
Ċiklu ta' ħajja waqt sessjoni
Ċiklu relatat mad-dokument :  
A9-0017/2021

MOZZJONI GĦAL RIŻOLUZZJONI TAL-PARLAMENT EWROPEW

dwar Strateġija ġdida UE-Afrika – sħubija għal żvilupp sostenibbli u inklużiv

(2020/2041(INI))

Il-Parlament Ewropew,

 wara li kkunsidra l-Artikolu 21 tat-Trattat dwar l-Unjoni Ewropea (UE) u l-Artikolu 208 tat-Trattat dwar il-Funzjonament tal-Unjoni Ewropea,

 wara li kkunsidra s-Summit tan-NU dwar l-Iżvilupp Sostenibbli tal-25, is-26 u s-27 ta' Settembru 2015 u d-dokument ta' eżitu adottat mill-Assemblea Ġenerali tan-NU fil-25 ta' Settembru 2015 intitolat "Nittrasformaw id-dinja tagħna: l-aġenda 2030 għall-Iżvilupp Sostenibbli", kif ukoll is-17-il Għan ta' Żvilupp Sostenibbli (SDGs),

 wara li kkunsidra l-Aġenda ta' Azzjoni ta' Addis Ababa tal-2015 dwar il-Finanzjament għall-Iżvilupp,

 wara li kkunsidra l-Kunsens Ewropew ġdid għall-Iżvilupp intitolat "Id-Dinja tagħna, id-Dinjità tagħna, il-Futur tagħna", iffirmat fis-7 ta' Ġunju 2017,

 wara li kkunsidra l-Ftehim ta' Pariġi dwar it-tibdil fil-klima tal-2015,

 wara li kkunsidra l-Aġenda 2063 tal-Unjoni Afrikana (UA) adottata fil-31 ta' Jannar 2015 fl-24 Sessjoni Ordinarja tal-Assemblea tal-Kapijiet ta' Stat u ta' Gvern tal-Unjoni Afrikana li saret f'Addis Ababa,

 wara li kkunsidra l-Istrateġija Konġunta Afrika-UE, adottata f'Lisbona fid-9 ta' Diċembru 2007,

 wara li kkunsidra d-Dikjarazzjoni ta' Abidjan, l-eżitu tar-raba' Summit taż-Żgħażagħ bejn l-Afrika u l-Ewropa, adottata fil-11 ta' Ottubru 2017,

 wara li kkunsidra l-konklużjonijiet tal-ħames Summit bejn l-Unjoni Afrikana u l-Unjoni Ewropea, li sar f'Abidjan fid-29 u t-30 ta' Novembru 2017,

 wara li kkunsidra l-komunikazzjoni tal-Kummissjoni tat-12 ta' Settembru 2018 bit-titlu "Alleanza ġdida Afrika-Ewropa għall-Investiment u għall-Impjiegi Sostenibbli: nieħdu s-sħubija tagħna għall-investiment u għall-impjiegi fil-livell li jmiss" (COM(2018)0643),

 wara li kkunsidra l-konklużjonijiet tal-erba' task forces dwar l-ekonomija diġitali, l-enerġija, it-trasport u l-agrikoltura stabbiliti fil-kuntest tal-alleanza ġdida,

 wara li kkunsidra l-komunikat konġunt tal-għaxar laqgħa tal-Kulleġġi tal-Kummissarji tal-Kummissjoni Ewropea u tal-Kummissjoni tal-Unjoni Afrikana tas-27 ta' Frar 2020,

 wara li kkunsidra l-komunikazzjoni konġunta tal-Kummissjoni u r-Rappreżentant Għoli tal-Unjoni għall-Affarijiet Barranin u l-Politika ta' Sigurtà, tad-9 ta' Marzu 2020 intitolata "Lejn Strateġija komprensiva mal-Afrika" (JOIN(2020)0004) u l-konklużjonijiet tal-Kunsill dwar dan is-suġġett, tat-30 ta' Ġunju 2020,

 wara li kkunsidra l-Karta Afrikana dwar id-Drittijiet tal-Bniedem u tal-Popli u l-Protokoll ta' Maputo,

 wara li kkunsidra l-Karta tad-Drittijiet Fundamentali tal-Unjoni Ewropea,

 wara li kkunsidra l-Konvenzjoni tan-NU dwar id-Drittijiet tat-Tfal tal-20 ta' Novembru 1989,

 wara li kkunsidra l-Pjan ta' Azzjoni tal-UE dwar id-Drittijiet tal-Bniedem u d-Demokrazija 2020–2024,

 wara li kkunsidra l-Konvenzjoni tan-NU dwar id-Drittijiet ta' Persuni b'Diżabilità tat-13 ta' Diċembru 2006,

 wara li kkunsidra l-Istrateġija Ewropea tad-Diżabilità għall-2010–2020 u l-Aġenda Ewropea msaħħa dwar id-Drittijiet tal-Persuni b'Diżabilità għall-2020–2030,

 wara li kkunsidra l-Istrateġija tal-Unjoni Afrikana għall-Ugwaljanza bejn il-Ġeneri u t-Tisħiħ tal-pożizzjoni tal-Nisa għall-perjodu 2018–2028, adottata f'Lulju 2016,

 wara li kkunsidra l-Pjan ta' Azzjoni tal-UE dwar l-Ugwaljanza bejn is-Sessi (GAP II – "L-ugwaljanza bejn is-Sessi u t-Tisħiħ tal-Pożizzjoni tan-Nisa: Nibdlu l-Ħajja tal-Bniet u n-Nisa permezz tar-Relazzjonijiet Esterni tal-UE 2016–2020"),

 wara li kkunsidra l-Ftehim li jistabbilixxi ż-Żona ta' Kummerċ Ħieles Kontinentali (CFTA) tal-Afrika,

 wara li kkunsidra r-rapport tal-2019 tal-Organizzazzjoni tal-Ikel u l-Agrikoltura tan-NU , intitolat "The State of the World's Biodiversity for Food and Agriculture" (L-istat tal-Bijodiversità tad-Dinja għall-Ikel u l-Agrikoltura), u dak tal-2016 bit-titolu "The State of the World's Forests" (L-Istat tal-Foresti tad-Dinja),

 wara li kkunsidra r-Rapport ta' Valutazzjoni Globali dwar il-Bijodiversità u s-Servizzi tal-Ekosistema tal-Pjattaforma Intergovernattiva tal-Politika tax-Xjenza dwar il-Bijodiversità u s-servizzi Ekosistemiċi (IPBES) ta' Mejju 2019,

 wara li kkunsidra l-Qafas ta' Sendai għat-Tnaqqis tar-Riskju ta' Diżastri 2015–2030, adottat min-NU fit-18 ta' Marzu 2015,

 wara li kkunsidra r-Rapporti Speċjali tal-Grupp Intergovernattiv ta' Esperti dwar it-Tibdil fil-Klima (IPCC) li ġejjin: "Global Warming of 1.5°C" (It-Tisħin Globali ta' 1.5 °C), "Climate Change and Land" (It-Tibdil fil-Klima u l-Art), u "the Ocean and Cryosphere in a Changing Climate" (L-Oċeani u l-Krijosfera fi Klima li qed Tinbidel),

 wara li kkunsidra l-komunikazzjoni tal-Kummissjoni tal-11 ta' Diċembru 2019 intitolata "Il-Patt Ekoloġiku Ewropew" (COM(2019)0640),

 wara li kkunsidra l-Istrateġija tal-UE għall-Bijodiversità għall-2030, ippubblikata fl-20 ta' Mejju 2020,

 wara li kkunsidra d-Dikjarazzjoni tan-NU dwar id-Drittijiet tal-Bdiewa u Persuni Oħra li Jaħdmu f'Żoni Rurali,

 wara li kkunsidra d-deċiżjoni tal-Assemblea Ġenerali tan-NU li tipproklama l-perjodu bejn l-2019 u l-2028 bħala d-Deċennju tal-Biedja Familjari,

 wara li kkunsidra d-Dokument ta' Ħidma tal-Persunal tal-Kummissjoni tat-2 ta' Mejju 2017 bit-titolu "Digital4Development: mainstreaming digital technologies and services into EU Development Policy" ("Digital4Development: l-integrazzjoni tat-teknoloġiji u s-servizzi diġitali fil-Politika tal-UE għall-Iżvilupp") (SWD(2017)0157),

 wara li kkunsidra l-Patt Globali dwar ir-Rifuġjati tan-NU, adottat fis-17 ta' Diċembru 2018,

 wara li kkunsidra l-Patt Globali għal Migrazzjoni Sikura, Ordnata u Regolari, adottat min-NU fid-19 ta' Diċembru 2018,

 wara li kkunsidra l-Konvenzjoni tal-Unjoni Afrikana għall-Protezzjoni u l-Assistenza ta' Persuni Spostati Internament fl-Afrika (il-Konvenzjoni ta' Kampala),

 wara li kkunsidra d-Deċennju Internazzjonali għall-Persuni ta' Nisel Afrikan (2015–2024) ipproklamat min-NU, u b'mod partikolari l-pilastru intitolat "Rikonoxximent",

 wara li kkunsidra l-komunikazzjoni tal-Kummissjoni tal-15 ta' Mejju 2013 dwar ir-responsabbilizzazzjoni tal-awtoritajiet lokali fil-pajjiżi msieħba għal governanza aħjar u iktar effettiva tal-eżiti tal-iżvilupp (COM(2013)0280),

 

 wara li kkunsidra r-Rapport Annwali tal-2019 tal-Kunsill tal-Unjoni Ewropea lill-Kunsill Ewropew dwar il-miri tal-UE ta' għajnuna għall-iżvilupp,

 wara li kkunsidra r-riżoluzzjoni tiegħu tal-24 ta' Ottubru 2017 dwar "l-Istrateġija UE-Afrika: spinta għall-iżvilupp"[1],

 wara li kkunsidra r-riżoluzzjoni tiegħu tas-6 ta' Ottubru 2015 dwar ir-rwol tal-awtoritajiet lokali fil-pajjiżi li qed jiżviluppaw fir-rigward tal-kooperazzjoni għall-iżvilupp[2],

 wara li kkunsidra r-riżoluzzjoni tiegħu tat-13 ta' Novembru 2018 dwar "Diġitalizzazzjoni għall-iżvilupp: tnaqqis tal-faqar permezz tat-teknoloġija"[3],

 wara li kkunsidra r-riżoluzzjoni tiegħu tad-19 ta' Ġunju 2020 dwar il-protesti kontra r-razziżmu wara l-mewt ta' George Floyd[4],

 wara li kkunsidra r-riżoluzzjoni leġiżlattiva tiegħu tas-27 ta' Marzu 2019 dwar il-proposta għal regolament tal-Parlament Ewropew u tal-Kunsill li jistabbilixxi l-Istrument ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali (NDICI)[5],

 wara li kkunsidra r-riżoluzzjonijiet preċedenti tiegħu dwar ir-relazzjonijiet bejn l-UE u l-Istati Afrikani, tal-Karibew u tal-Paċifiku (pajjiżi AKP), b'mod partikolari dawk tal-4 ta' Ottubru 2016, l-14 ta' Ġunju 2018 u t-28 ta' Novembru 2019[6],

 wara li kkunsidra l-Artikolu 54 tar-Regoli ta' Proċedura tiegħu,

 wara li kkunsidra l-opinjonijiet tal-Kumitat għall-Affarijiet Barranin, il-Kumitat għall-Kummerċ Internazzjonali, il-Kumitat għal-Libertajiet Ċivili, il-Ġustizzja u l-Affarijiet Interni, il-Kumitat għall-Agrikoltura u l-Iżvilupp Rurali, u l-Kumitat għall-Kultura u l-Edukazzjoni,

 wara li kkunsidra r-rapport tal-Kumitat għall-Iżvilupp (A9-0017/2021),

A. billi s-Summit UE-UA li jmiss għandu jagħti spinta ġdida lis-sħubija u joħloq strateġija komuni b'azzjoni konkreta fir-rigward tal-isfidi u l-opportunitajiet komuni tagħna bi qbil mal-impenji internazzjonali li saru taħt l-Aġenda 2030 u l-Ftehim ta' Pariġi;B.  billi huwa kruċjali li l-pajjiżi jinvestu aktar fil-ġbir sistematiku ta' data diżaggregata preċiża u komparabbli, sabiex isiru jafu fejn u liema intersezzjonalitajiet jeżistu, biex jiddeterminaw kif għandhom jiġu indirizzati, u biex janalizzaw jekk ir-riżultati tal-azzjonijiet meħuda taħt din l-istrateġija humiex qed ikollhom impatt pożittiv fuq kulħadd, inklużi dawk li l-aktar baqgħu lura; billi, f'konformità mal-mira 17.18 tal-SDG, id-data għandha tiġi diżaggregata skont l-introjtu, il-ġeneru, l-età, ir-razza, l-etniċità, l-istatus migratorju, id-diżabilità u l-post ġeografiku;

C. billi l-interessi u l-prijoritajiet tal-Afrika, espressi b'mod partikolari fil-kuntest tal-Aġenda 2063, iridu jkollhom rwol ċentrali fil-bini mill-ġdid tar-relazzjoni tagħna;

D. billi l-Afrika tospita l-aktar popolazzjoni żagħżugħa fid-dinja u xi wħud mill-aktar stati fraġli tad-dinja; billi kull xahar madwar miljun Afrikan jidħlu fis-suq tax-xogħol;

E. billi l-valur miżjud li ġġib magħha l-UE għas-sħubija tagħha mal-Afrika se jiddependi fuq il-kapaċità tal-UE li tgħaqqad id-djalogu interkontinentali ma' approċċ sensittiv għall-kuntest li jqis il-varjetà ta' speċifiċitajiet lokali u reġjonali, is-sensibilitajiet tal-pajjiżi sħab u l-istrutturi soċjali eżistenti, kif ukoll ix-xewqa tagħha li tibni viżjoni fit-tul mal-Afrika bbażata fuq valuri kondiviżi, interessi reċiproċi u impenn ġdid għall-multilateraliżmu;

F. billi l-aċċess għal xogħol u kundizzjonijiet tal-għajxien deċenti fil-livell lokali huma essenzjali biex tittaffa x-xejra lejn il-migrazzjoni;

G. billi fl-2018, il-materja prima kienet tammonta għal 49 % tal-importazzjonijiet totali tal-UE mill-Afrika; billi s-settur tal-estrazzjoni huwa l-aktar mutur importanti tal-investiment dirett barrani fl-Afrika;

H. billi s-sigurtà, l-istat tad-dritt u l-governanza tajba huma prerekwiżiti għat-tkabbir ekonomiku u l-investiment; billi t-tkabbir ekonomiku u l-investiment iridu jkunu sostenibbli u jridu jimxu id f'id ma' miżuri biex tiġi miġġielda l-inugwaljanza permezz ta' politiki ridistributtivi, it-tisħiħ tal-kapital uman, l-ekwità, il-parteċipazzjoni politika, is-sistemi tas-sigurtà soċjali u l-miżuri għall-implimentazzjoni tal-SDGs;

I. billi l-paċi u s-sigurtà huma prekundizzjonijiet essenzjali għall-kisba ta' żvilupp sostenibbli fit-tul u għat-trawwim tal-istabbilizzazzjoni u ta' istituzzjonijiet b'saħħithom fil-livell lokali, reġjonali u nazzjonali, u huma meħtieġa għat-titjib tal-kundizzjonijiet tal-għajxien u t-twettiq tal-SDGs;

J. billi l-bini tal-istat huwa prijorità fi stati Afrikani politikament fraġli u amministrattivament dgħajfa, li jimplika l-bini tal-kapaċità fiskali tagħhom;

K. billi 94 miljun tifel u tifla taħt l-età ta' ħames snin qatt ma ġew irreġistrati fl-Afrika sub-Saħarjana, 51 miljun fl-Afrika tal-Lvant u tan-Nofsinhar u 43 miljun fl-Afrika tal-Punent u l-Afrika Ċentrali; billi d-dritt li wieħed ikun rikonoxxut bħala persuna quddiem il-liġi huwa pass kritiku biex tiġi żgurata l-protezzjoni tul il-ħajja u huwa prerekwiżit għall-eżerċizzju tad-drittijiet l-oħra kollha; billi ċertifikat tat-twelid huwa prova tal-identità legali ta' persuna, li jipprevjeni r-riskju ta' apolidija u jippermetti lid-detentur ifittex protezzjoni mill-vjolenza u l-isfruttament;

L. billi l-ugwaljanza bejn il-ġeneri għandha tkun prijorità għas-sħubija futura UE-Afrika u għalhekk trid tiġi integrata fl-istrateġija UE-Afrika kollha; billi n-nisa u ż-żgħażagħ spiss jiffaċċjaw ostakli biex jilħqu l-potenzjal sħiħ tagħhom, kif rifless fil-piż akbar tal-vjolenza sesswali u abbażi tal-ġeneru, l-infezzjoni tal-HIV, it-tqala mhux intenzjonata, it-tluq bikri mill-iskola, u l-aċċess limitat għall-finanzi u l-intraprenditorija;

M. billi fl-Afrika, 390 miljun ruħ bħalissa qed jgħixu taħt il-linja tal-faqar fl-isfond ta' nuqqas ta' inklużività li tistimula l-inugwaljanzi; billi l-pandemija tal-COVID-19 aggravat il-vulnerabbiltà tal-Afrika fir-rigward tad-diversifikazzjoni ekonomika fqira, il-livelli baxxi ta' mobilizzazzjoni tar-riżorsi domestiċi, il-flussi finanzjarji illeċiti, id-dipendenza kbira fuq l-esportazzjoni tal-materja prima u l-prezzijiet volatili tal-prodotti bażiċi; billi l-kriżi ekonomika l-ġdida li tirriżulta mill-pandemija tal-COVID-19 x'aktarx li żżid l-inugwaljanza u l-faqar, bil-konsegwenzi indiretti tagħha li diġà qed ikollhom impatt qawwi, b'mod partikolari f'termini ta' nuqqas ta' sigurtà tal-ikel, telf ta' introjtu, telf ta' rimessi u għajxien, u kriżi tad-dejn imminenti;

N. billi l-COVID-19 xeħtet dawl fuq il-lakuni fis-sistemi tas-saħħa u tal-ikel u fuq il-ħtieġa urġenti li jinbnew sistemi tas-saħħa u tal-ikel iffukati fuq il-persuni, universali u reżiljenti bbażati fuq id-drittijiet tal-bniedem; billi kriżijiet bħal dawn jistgħu jimmultiplikaw fid-deċennji li ġejjin bħala riżultat tat-tibdil fil-klima u t-telf tal-bijodiversità; billi l-pandemija thedded li twaqqaf jew saħansitra treġġa' lura l-progress fuq tliet epidemiji ewlenin eżistenti, jiġifieri l-HIV, it-tuberkulożi u l-malarja, li jeħtieġu l-adozzjoni ta' approċċi integrati innovattivi, filwaqt li jinvolvu lill-komunitajiet affettwati u jagħtu s-setgħa lis-soċjetà ċivili, biex jilħqu lil dawk li jeħtieġu servizzi li jsalvaw il-ħajja;

O. billi l-kuntatti bejn iż-żewġ kontinenti għandhom jitħeġġu fil-livelli kollha u bejn is-setturi kollha tas-soċjetà;

P. billi l-Kunsill tal-Paċi u s-Sigurtà tal-UA kklassifika t-tibdil fil-klima bħala theddida kbira għas-sigurtà fl-2019;

Q. billi l-kontinent Afrikan huwa affettwat b'mod partikolari mill-impatti negattivi tat-tibdil fil-klima u mid-diversi sorsi tat-tniġġis atmosferiku, tal-ħamrija u tal-ilma; billi l-Afrika teħtieġ investimenti fl-adattament għall-kriżijiet klimatiċi, filwaqt li l-komunikazzjoni konġunta tad-9 ta' Marzu 2020 tiffoka fuq il-mitigazzjoni tat-tibdil fil-klima; billi Alleanza għall-Klima Afrika-Ewropa li tirnexxi tista' ssir forza mexxejja ġdida fid-diplomazija globali dwar il-klima;R.  billi fl-20 ta' Diċembru 2017, l-Assemblea Ġenerali tan-NU adottat riżoluzzjoni li permezz tagħha ddikjarat id-Deċennju tal-Biedja Familjari bejn l-2019 u l-2028;

S. billi l-Afrika sub-Saħarjana għandha l-aktar rati baxxi ta' aċċess għall-enerġija fid-dinja; billi l-elettriku jilħaq biss madwar nofs in-nies tagħha, filwaqt li terz biss għandhom aċċess għal tisjir nadif; billi madwar 600 miljun persuna m'għandhomx elettriku u 890 miljun isajru bi fjuwils tradizzjonali;

T. billi l-finanzjament privat huwa wkoll kruċjali biex jitwasslu għażliet deċentralizzati ta' enerġija rinnovabbli; billi l-investiment privat, l-enerġija rinnovabbli deċentralizzata u mudelli ta' negozju ta' finanzjament għall-konsumatur imfassla apposta (eż. permezz ta' flus pay-as-you-go u mobbli) għandhom il-potenzjal li jġibu aċċess għall-enerġija għal partijiet kbar tal-Afrika, u b'mod partikolari għall-Afrika sub-Saħarjana, fejn ir-rati ta' aċċess għall-enerġija huma l-aktar baxxi fid-dinja;

U. billi s-salvagwardja, il-preservazzjoni u l-apprezzament tal-wirt kulturali u s-setturi kulturali u kreattivi jistgħu jistimulaw l-impjiegi, jagħtu s-setgħa liż-żgħażagħ u lin-nisa, u jikkontribwixxu għal soċjetà reżiljenti u tolleranti li tirrispetta d-differenzi kulturali u tnaqqas l-inugwaljanzi billi tibni pontijiet bejn komunitajiet differenti;

Lejn strateġija riveduta mal-Afrika

1. Jilqa' l-komunikazzjoni konġunta tad-9 ta' Marzu 2020 intitolata "Lejn Strateġija komprensiva mal-Afrika" u jaraha bħala pass lejn sħubija verament ġeopolitika; jissottolinja li l-Ewropa u l-Afrika jinsabu fi prossimità ġeografika mill-qrib u għandhom rabtiet qawwija, storiċi, kulturali u soċjoekonomiċi, li qed jissaħħu biż-żieda fl-isfidi komuni u l-interessi strateġiċi tagħhom; jenfasizza li l-UE u l-Istati Membri tagħha jikkostitwixxu l-akbar sieħeb tal-Afrika fuq kollox f'termini ta' kummerċ, investiment, għajnuna uffiċjali għall-iżvilupp (ODA), assistenza umanitarja u sigurtà;

2. Ifakkar li l-Afrika fiha aktar minn biljun ruħ u li aktar minn nofs it-tkabbir tal-popolazzjoni tad-dinja sal-2050 huwa previst li jseħħ fl-Afrika, filwaqt li 6 mill-10 ekonomiji li qed jikbru bl-aktar rata mgħaġġla fid-dinja huma Afrikani; jenfasizza li r-relazzjonijiet tal-UE mal-Afrika huma tal-akbar importanza għall-futur taż-żewġ kontinenti tagħna u li l-prosperità taż-żewġ kontinenti hija marbuta mill-qrib; jissottolinja li l-iżvilupp tal-bniedem, il-kisba tal-SDGs u l-qerda tal-faqar iridu jibqgħu l-qalba tar-relazzjonijiet UE-Afrika;

3. Itenni l-appelli tiegħu għal sħubija ġenwina "bejn il-kontinenti" bejn l-Unjoni Ewropea u l-Unjoni Afrikana; jenfasizza li s-Summit UE-UA li jmiss li se jsir fl-2021 għandu jwitti t-triq għal sħubija strateġika, ta' benefiċċju għal kulħadd u orjentata lejn ir-riżultati li tirrifletti l-interessi taż-żewġ naħat u ssaħħaħ ir-rabtiet bejn iż-żewġ kontinenti;

4. Jappella biex tinbena sħubija reali bejn partijiet ugwali abbażi tal-liġi internazzjonali u l-konvenzjonijiet, il-ftehimiet u l-istandards internazzjonali, u jħeġġeġ liż-żewġ naħat imorru lil hinn mir-relazzjoni donatur-benefiċjarju; jenfasizza l-importanza li jkun hemm kollegament mas-sħab Afrikani tagħna, inkluża s-soċjetà ċivili Afrikana u d-dijaspora Afrikana, u li jiġi definit b'mod ċar il-pjan direzzjonali għas-sħubija u r-responsabbiltajiet ta' kull naħa abbażi ta' evalwazzjoni ċara tal-implimentazzjoni tal-ftehimiet konġunti preċedenti;

5. Jinnota li l-potenzjal tal-Afrika jattira interess akbar minn ħafna atturi fix-xena dinjija u jesprimi tħassib li, f'ħafna żoni, l-Afrika saret arena ġdida ta' kompetizzjoni kbira għall-poter; jisħaq fuq il-fatt li l-UE hija minn tal-ewwel li tgħin lill-kontinent Afrikan, filwaqt li l-politiki distruttivi użati minn atturi oħra jwasslu għad-detriment tan-nazzjonijiet Afrikani, li għandhom ukoll riperkussjonijiet negattivi fuq l-UE; jissottolinja li l-UE fil-qalba tagħha, fir-relazzjonijiet politiċi u ekonomiċi tagħha ma' pajjiżi terzi, hija motivata mill-avvanz tad-drittijiet fundamentali, mill-għoti ta' appoġġ lill-istituzzjonijiet demokratiċi u mis-sostenn tar-responsabbiltà demokratika; jemmen li pajjiżi terzi, bħaċ-Ċina, qed ifittxu li jiksbu objettivi oħra li, xi drabi, huma ta' tħassib għalina; jisħaq fuq il-fatt li l-objettiv tagħna huwa li nsaħħu r-reżiljenza u l-indipendenza tas-sħab Afrikani tagħna; jesprimi d-dispjaċir tiegħu, għalhekk, li l-azzjonijiet ta' atturi oħra, speċjalment iċ-Ċina u r-Russja, qed javvanzaw l-interessi ġeopolitiċi tagħhom u huma ffukati fuq l-unilateraliżmu li qed jikber, u jisħaq li l-benefiċċji proprji tagħhom huma askapitu tas-sovranità tal-pajjiżi Afrikani u s-sigurtà Ewropea; jistieden lill-UE tikkoordina ma' kull pajjiż li huwa verament interessat fi żvilupp fit-tul prosperuż u pożittiv tal-kontinent Afrikan, abbażi tar-rispett sħiħ tad-drittijiet tal-bniedem, il-libertà u r-responsabbiltà tal-midja, il-governanza trasparenti u reattiva u l-ġlieda kontra l-korruzzjoni, li huma elementi vitali biex jiġi żgurat ambjent politiku, soċjali u ekonomiku stabbli u inklużiv fl-Afrika; jistieden lill-UE tiżviluppa rispons strateġiku u fit-tul għall-Inizjattiva Ċiniża "Belt and Road", li għandha tkun iggwidata mill-valuri komuni tagħna kif ukoll mill-prijoritajiet u l-ħtiġijiet espressi mill-ġirien Afrikani tagħna; jisħaq fuq il-fatt li l-UE u l-Istati Membri tagħha jeħtieġ li jsiru sors ta' stabbiltà u affidabbiltà fir-reġjun; jemmen li l-Unjoni Ewropea jeħtieġ li jkollha rwol ġeopolitiku akbar fl-Afrika u tistabbilixxi relazzjonijiet li huma ta' ġid għal kulħadd;

6. Huwa tal-fehma li r-rwol tal-pajjiżi tal-Afrika ta' Fuq għandu jissaħħaħ fi ħdan is-sħubija u l-kooperazzjoni trilaterali promossi sabiex tingħata spinta ġdida lill-kooperazzjoni Tramuntana-Nofsinhar u Nofsinhar-Nofsinhar u tittejjeb il-koerenza tal-approċċ kontinentali;

7. Jitlob li din is-sħubija tirrifletti l-prijoritajiet il-ġodda tal-pajjiżi Afrikani li jirriżultaw mit-tifqigħa tal-pandemija tal-COVID-19; jappoġġa r-rispons tal-UE għall-kriżi permezz tal-approċċ "Tim Ewropa" u jarah bħala sinjal ewlieni u reali ta' solidarjetà globali u ta' valuri Ewropej;

8. Jenfasizza li l-impatti detrimentali tal-kriżi tal-coronavirus iridu jġiegħlu liż-żewġ kontinenti jimpenjaw ruħhom għal sħubija li tqis bis-sħiħ il-konsegwenzi tagħha u twitti t-triq għal irkupru sostenibbli u inklużiv iffukat fuq l-iżvilupp tal-bniedem, b'mod partikolari fuq l-edukazzjoni u fuq sistemi tas-saħħa aktar b'saħħithom biex jipprevjenu, jidentifikaw u jirrispondu għal pandemiji emerġenti ġodda u jaċċelleraw ir-rispons għal dawk eżistenti, kif ukoll fuq l-ugwaljanza bejn il-ġeneri, fuq it-tkabbir sostenibbli, fuq tranżizzjonijiet aktar rapidi, inklużi tranżizzjonijiet ekoloġiċi u diġitali, u fuq governanza tajba;

9. Jenfasizza l-impenn tal-komunità internazzjonali għall-kisba tas-sbatax-il SDG filwaqt li jiġu rrispettati l-prinċipji tal-Aġenda 2030; iqis li s-sħubija Afrika-UE se tiddetermina b'mod deċiżiv jekk dak l-impenn jintlaħaqx u għandhiex tkun ibbażata fuq approċċ strateġiku u trasversali li jinkorpora l-SDGs kollha u jirrikonoxxi l-interkonnessjonijiet tagħhom;

10. Ifakkar li flimkien l-UA u l-UE jirrappreżentaw piż politiku ta' 81 pajjiż u jenfasizza l-importanza tas-sħubija fi ħdan is-sistema multilaterali; jistieden liż-żewġ partijiet isaħħu l-kooperazzjoni tagħhom f'fora multilaterali u jitlob koordinazzjoni mill-qrib, inklużiva u sistematika qabel kwalunkwe avveniment kbir relatat mal-governanza globali;

11. Ifakkar fir-rwol importanti li għandhom l-Unjoni Afrikana u l-istati Afrikani f'organizzazzjonijiet multilaterali, b'mod partikolari n-Nazzjonijiet Uniti, fejn l-istati Afrikani jammontaw għal 28 % tas-sħubija; jissottolinja li l-objettiv tal-UE li ssaħħaħ l-ordni internazzjonali bbażat fuq ir-regoli u s-sistema multilaterali jinvolvi l-promozzjoni ta' aktar ġustizzja u rappreżentanza ugwali għall-Afrika fil-korpi ta' governanza globali; jistieden, b'mod partikolari, lill-UE tappoġġa t-talba tal-Afrika biex tespandi l-Kunsill tas-Sigurtà tan-NU sabiex tinkludi rappreżentanza permanenti għall-kontinent;

12. Jenfasizza li l-influwenza tal-UE ġejja mir-reġjuni ultraperiferiċi tagħha kemm fl-Oċean Atlantiku kif ukoll fl-Oċean Indjan, u li r-reġjuni ultraperiferiċi tagħha huma storikament, ekonomikament u kulturalment marbuta ma' diversi pajjiżi Afrikani; jappella għal integrazzjoni aħjar tar-reġjuni ultraperiferiċi fl-ambjent reġjonali tagħhom, flimkien ma' kooperazzjoni akbar mal-pajjiżi Afrikani dwar kwistjonijiet komuni, b'mod partikolari fir-rigward tal-ambjent u l-migrazzjoni;

13. Jenfasizza l-ħtieġa li wieħed jibni fuq it-tagħlimiet meħuda mill-Istrateġija Konġunta Afrika-UE u li jiġi żgurat li l-istrateġija konġunta l-ġdida tkun kompletament konsistenti ma' u komplementari għall-"pilastru Afrikan" tal-Ftehim futur ta' wara Cotonou u politiki eżistenti oħra tal-UE sabiex tinkiseb aktar koerenza fil-politika tal-iżvilupp tal-UE; ifakkar fil-ħtieġa li jiġi żgurat li s-sħubija bejn il-kontinenti tiġi implimentata f'koerenza mal-kuntesti lokali, nazzjonali u reġjonali u l-ħtiġijiet speċifiċi;

14. Huwa tal-fehma li sħubija olistika bejn il-kontinenti għandha tippermetti wkoll aktar reġjonalizzazzjoni; itenni l-appoġġ kontinwu tal-UE għall-integrazzjoni reġjonali (f'kuntest li fih il-pandemija tal-COVID-19 enfasizzat il-vulnerabbiltà tal-katina tal-provvista globali) u l-organizzazzjonijiet reġjonali fl-Afrika; jappoġġa l-fehma li l-UE jeħtiġilha żżomm approċċi flessibbli minn pajjiż għal pajjiż u fil-livell sottoreġjonali li jirregolaw il-parteċipazzjoni tagħha u l-appoġġ skont il-bżonnijiet u ċ-ċirkostanzi speċifiċi ta' kull pajjiż fil-ħames reġjuni tal-Afrika; jitlob li jkun hemm aġġornament tad-diversi politiki reġjonali tal-UE lejn is-sottoreġjuni Afrikani; jiddispjaċih għall-fatt li 25 sena mill-bidu tal-Proċess ta' Barċellona, il-ħolqien ta' żona ta' prosperità kondiviża, stabbiltà u libertà mal-pajjiżi tal-viċinat tan-Nofsinhar għad fadallu biex jitlesta;

15. Jenfasizza l-importanza tal-UA f'termini tal-integrazzjoni tal-kontinent Afrikan, b'mod partikolari fir-rigward tal-ħtieġa li tingħata spinta lill-kummerċ intra-Afrikan; jissottolinja li din l-integrazzjoni għandha tkun definita b'mod ċar u bbażata fuq il-ħtiġijiet tas-soċjetajiet Afrikani; ifakkar li sħubija b'saħħitha mhux biss teħtieġ UE b'saħħitha iżda wkoll Unjoni Afrikana b'saħħitha; jitlob lill-UE tappoġġa l-isforzi ta' integrazzjoni fil-livell reġjonali u kontinentali, kif ukoll l-istituzzjonalizzazzjoni u t-tisħiħ tal-Unjoni Afrikana billi tnaqqas id-dipendenza tagħha fuq il-finanzjament estern u ttejjeb l-istruttura ta' governanza tagħha, u permezz tal-kondiviżjoni tal-aħjar prattiki u assistenza teknika u finanzjarja; jilqa' l-proposta għal Programm Pan-Afrikan fil-kuntest tal-Istrument il-ġdid ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali (NDICI) li għandu l-għan li jindirizza l-isfidi tal-kontinent Afrikan kollu kemm hu;

16. Jilqa' b'sodisfazzjon kbir l-indikazzjoni li saret mill-President tal-Kummissjoni Ursula von der Leyen li tixtieq li r-relazzjonijiet mal-Afrika jkunu l-punt fokali tal-mandat tagħha; jilqa' l-vjaġġi reċenti lejn Addis Ababa mill-mexxejja tal-istituzzjonijiet tal-UE; jitlob li jissaħħu u jsiru aktar regolari dawn il-kuntatti fl-ogħla livell politiku; huwa tal-fehma li taħdidiet konġunti regolari mill-mexxejja tal-Unjoni Afrikana u tal-Unjoni Ewropea jtejbu l-viżibilità u s-sensibilizzazzjoni pubblika tas-sħubija tagħna fil-midja nazzjonali rispettiva tagħna u juru l-importanza mogħtija lilha fl-aġendi politiċi taż-żewġ kontinenti; iqis li dawn l-indirizzi għandhom jippermettu feedback dwar l-implimentazzjoni tas-sħubija, l-inklużjoni tal-partijiet interessati fil-proċess, il-progress lejn l-SDGs u diskussjoni tal-kwistjonijiet ewlenin komuni għaż-żewġ kontinenti;

17. Jenfasizza l-ħtieġa li s-soċjetà ċivili Afrikana u Ewropea, inklużi l-NGOs, l-awtoritajiet lokali, is-settur privat, id-dijaspora, il-membri parlamentari taż-żewġ reġjuni, iż-żgħażagħ, il-minoranzi u l-komunitajiet reliġjużi, jiġu involuti fid-definizzjoni u l-evalwazzjoni ta' strateġiji ġodda u eżistenti sabiex tinħoloq sħubija ffukata fuq il-persuni li tinkludi lil u tkun aċċessibbli għal kulħadd;

18. Jissottolinja li l-isforzi tal-UE biex tinvolvi lis-soċjetà ċivili għandhom isiru b'mod trasparenti, billi joffru opportunitajiet, riżorsi finanzjarji u qafas meħtieġa biex jippermettu l-parteċipazzjoni tar-rappreżentanti tas-soċjetà ċivili fil-livelli kollha, inklużi l-atturi lokali u territorjali; jenfasizza li biex tinħoloq sħubija ffukata fuq in-nies, mhuwiex biss tali involviment tas-soċjetà ċivili li huwa kruċjali, iżda wkoll l-impenn tal-UE li tiġġieled kull forma ta' razziżmu, diskriminazzjoni razzjali, ksenofobija u intolleranza relatata, fi ħdan il-fruntieri tagħha u lil hinn minnhom;

19. Jappella għall-monitoraġġ sistematiku, trasparenti u bbażat fuq l-evidenza mill-partijiet interessati kollha, inklużi s-soċjetà ċivili u l-komunitajiet Ewropej u Afrikani, l-awtoritajiet lokali u l-parlamenti nazzjonali, tal-implimentazzjoni tal-istrateġija u għall-konformità mal-prinċipji tal-koerenza tal-politiki għall-iżvilupp u tal-koerenza tal-politiki għall-iżvilupp sostenibbli;

20. Jindika l-importanza tad-diplomazija parlamentari u jqis li l-assemblej parlamentari bħall-Assemblea Parlamentari Konġunta AKP-UE u l-Parlament Pan-Afrikan għandhom rwol fundamentali fit-tisħiħ tad-djalogu politiku bejn l-UE u l-Afrika; jenfasizza r-rwol tal-Parlament Ewropew fil-monitoraġġ u s-sorveljanza tal-implimentazzjoni effikaċi tas-sħubija; ifakkar fil-bosta laqgħat u missjonijiet parlamentari mmexxija mill-Parlament, u jitlob għat-tisħiħ tad-dimensjoni parlamentari tar-relazzjonijiet UE-UA permezz ta' missjonijiet regolari biex il-kumitati ewlenin tal-Parlament ikunu jistgħu jiltaqgħu u jiskambjaw mal-kontropartijiet Afrikani tagħhom;

21. Jemmen li r-rwol tad-dijaspori huwa fundamentali fil-bini ta' pontijiet u fil-promozzjoni ta' fehim reċiproku bejn iż-żewġ kontinenti permezz tat-trasferiment tal-għarfien, l-investiment u r-rimessi u li l-UE għandha tippermetti l-involviment tad-dijaspora fit-tfassil tal-politika billi trawwem strutturi li jiżguraw l-involviment tal-gruppi tad-dijaspora fl-affarijiet soċjali u politiċi; jistieden lill-Kummissjoni tikkunsidra kif l-aħjar taħdem mad-dijaspora bħala parti mill-istrateġija komprensiva mal-Afrika, inkluż billi tapprofitta mis-sinerġiji bejn l-istrumenti ta' finanzjament interni u esterni meta tindirizza sfidi komuni;

22. Ifakkar li r-rimessi tad-dijaspora huma essenzjali għall-ekonomiji lokali; iwissi li, skont il-Bank Dinji, il-flussi ta' rimessi lejn l-Afrika huma mistennija li jonqsu b'madwar 20 % fl-2020 bħala riżultat tal-kriżi tal-COVID-19, b'mod partikolari fil-pajjiżi l-anqas żviluppati fejn huma sors vitali ta' introjtu għall-familji foqra; jitlob, għalhekk, li l-UE u l-pajjiżi Afrikani jaħdmu biex inaqqsu l-ispejjeż tar-rimessi għal inqas minn 3 % sal-2030 f'konformità mal-mira 10.c tal-SDG;

23. Ifakkar li s-suċċess tas-sħubija se jiddependi mill-pakketti finanzjarji allokati lilha; jitlob sforz kbir ta' appoġġ għall-Afrika taħt l-NDICI futur, filwaqt li jindika li l-UE għadha l-akbar donatur għall-Afrika; jiddeplora l-fatt li ħafna Stati Membri naqsu milli jilħqu l-mira li jiddedikaw 0,7 % tal-introjtu nazzjonali gross tagħhom lill-ODA u li xi wħud saħansitra naqqsu l-kontribuzzjonijiet tagħhom għall-għajnuna għall-iżvilupp;

24. Jenfasizza li biex ir-relazzjonijiet UE-Afrika jitbiegħdu minn dinamika ta' donatur-riċevitur u biex il-pajjiżi Afrikani jingħataw is-setgħa li jwettqu l-iżvilupp sostenibbli, il-qafas ta' sħubija mġedded irid jipprevedi azzjonijiet konkreti biex jappoġġa ż-żieda fil-mobilizzazzjoni tar-riżorsi domestiċi fil-pajjiżi Afrikani, bħall-appoġġ għall-ġlieda kontra l-korruzzjoni u l-iżvilupp ta' sistemi tat-taxxa ġusti u effettivi, u l-indirizzar tal-evitar u l-evażjoni tat-taxxa;

25. Jitlob li jkun hemm aktar riżorsi disponibbli għall-kooperazzjoni għall-iżvilupp fil-baġit tal-UE, iffinanzjati minn riżorsi proprji ġodda, inkluża taxxa fuq it-tranżazzjonijiet finanzjarji;

26. Ifakkar li skont il-prinċipji tas-sjieda nazzjonali, il-politiki u l-programmi ta' żvilupp jistgħu jirnexxu biss jekk jitmexxew mill-pajjiżi li qed jiżviluppaw, u jekk ikunu mfassla għas-sitwazzjonijiet u l-ħtiġijiet speċifiċi ta' kull pajjiż; jenfasizza l-bżonn, f'dan ir-rigward, ta' kollaborazzjoni mas-soċjetà ċivili u mal-komunitajiet lokali biex jiġi żgurat li l-bżonnijiet u l-vulnerabbiltajiet tan-nies jiġu indirizzati;

27. Jitlob l-iżvilupp ta' mekkaniżmu ta' monitoraġġ, kif ukoll trasparenza u obbligu ta' rendikont sħaħ tal-finanzjamenti tal-UE;

28. Iħeġġeġ il-fatt li l-għajnuna tal-UE m'għandhiex ittawwal il-kunflitti jew tiffaċilita l-imġiba predatorja tar-reġimi awtokratiċi, li huma l-kawża ta' ħafna mill-problemi soċjoekonomiċi u l-kunflitti politiċi tal-Afrika; jenfasizza li l-insegwiment tal-interessi komuni u l-kooperazzjoni jrid ikun konsistenti mad-dritt internazzjonali, mal-valuri fundamentali tal-UE u mal-objettivi ta' appoġġ għad-demokrazija, il-governanza tajba u d-drittijiet tal-bniedem;29.  Jistieden lill-istituzzjonijiet tal-UE u lill-Istati Membri jkunu attur aktar koerenti u unifikat fir-relazzjonijiet tagħhom mal-kontinent Afrikan u b'mod obbligatorju jikkoordinaw il-politiki tagħhom, filwaqt li jiffokaw l-isforzi tagħhom fuq il-ħolqien ta' oqfsa għal opportunitajiet ekonomiċi u impjiegi;

30. Huwa tal-fehma li s-sħubija għandha tinvolvi s-27 pajjiż tal-UE u l-55 pajjiż tal-UA; jitlob l-involviment sħiħ tal-Istati Membri kollha tal-UE sabiex tiżdied il-viżibilità u jiġi promoss il-valur tas-sħubija fost l-Ewropej u l-pajjiżi sħab, biex b'hekk tkun tista' ssir komunikazzjoni aħjar tal-azzjonijiet u l-ambizzjonijiet konġunti;

Sħab għall-iżvilupp uman u ekonomiku

31. Jitlob li l-iżvilupp tal-bniedem jitqiegħed fil-qalba tal-istrateġija biex jiġi żgurat li ħadd ma jitħalla lura, bi prijorità mogħtija lill-indirizzar tal-faqar, l-inugwaljanzi u d-diskriminazzjoni, u l-iżgurar tad-demokrazija, l-istat tad-dritt, il-governanza tajba u d-drittijiet tal-bniedem għal kulħadd, b'attenzjoni partikolari għall-popolazzjonijiet l-aktar emarġinati u vulnerabbli; jenfasizza li għandha tingħata prijorità wkoll lill-aċċess għal servizzi soċjali bażiċi bħall-ikel, l-ilma u s-sanità, għal sistemi tas-saħħa ta' kwalità, għal edukazzjoni ta' kwalità, għall-protezzjoni soċjali u għall-preservazzjoni ambjentali;

32. Iqis li huwa fundamentali li jiġu ggarantiti kundizzjonijiet tax-xogħol deċenti, jissaħħu d-drittijiet soċjali, jittejbu d-djalogi soċjali u tax-xogħol, jinqerdu t-tħaddim tat-tfal u x-xogħol furzat, u jittejbu l-kundizzjonijiet tas-saħħa u s-sikurezza fuq il-post tax-xogħol;

33. Jissottolinja bil-qawwa l-importanza tar-rwol tal-istituzzjonijiet tal-istat, l-awtoritajiet u l-infrastruttura li jiffunzjonaw, u jemmen li n-nuqqas tagħhom jista' jkun ostaklu sinifikanti għall-iżvilupp, il-progress u l-paċi; jissottolinja li s-sigurtà, l-istabbiltà u fl-aħħar mill-aħħar il-prosperità u l-iżvilupp sostenibbli se jinkisbu biss fir-reġjuni kkonċernati jekk tiġi segwita strateġija komprensiva; jenfasizza l-importanza tar-riformi demokratiċi, il-governanza tajba u l-bini tal-istat għall-iżvilupp sostenibbli; jenfasizza li l-promozzjoni tal-istat tad-dritt, il-ġlieda kontra l-korruzzjoni u l-appoġġ għall-aċċess għall-ġustizzja jikkontribwixxu b'mod sinifikanti għall-kisba tad-drittijiet fundamentali taċ-ċittadini fiż-żewġ kontinenti;

34. Jenfasizza li, filwaqt li għadd ta' pajjiżi għadhom qed jitħabtu mal-korruzzjoni u man-nuqqas ta' governanza tajba u mal-libertajiet soċjali u politiċi, ħafna pajjiżi bdew it-tranżizzjoni lejn riforma u demokrazija; ifakkar li l-pajjiżi fi tranżizzjoni huma partikolarment vulnerabbli u għandhom ikunu jistgħu jiddependu fuq l-UE meta jitolbu appoġġ; jitlob, għalhekk, li jingħataw appoġġ u assistenza kkoordinati tajjeb lil dawk il-pajjiżi fil-bini ta' stati u soċjetajiet aktar reżiljenti sabiex jinżammu u jiġu appoġġati l-aspirazzjonijiet għal bidla pożittiva espressi mill-popli tagħhom; jissuġġerixxi li l-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta' Sigurtà (VP/RGħ) jistabbilixxi gruppi ta' kuntatt ad hoc speċjali biex jissimplifikaw u jiffaċilitaw l-appoġġ għall-UE kollha għal pajjiżi individwali fi tranżizzjoni; huwa tal-fehma li għandhom isiru aktar sforzi biex jiġu promossi sistemi politiċi inklużivi b'diversi partiti u governanza demokratika u responsabbli fl-Afrika, speċjalment fi stati fraġli, billi jiġu ffaċilitati l-gruppi ta' ħidma bejn iċ-ċittadini u l-gvern u s-sorveljanza parlamentari – inkluż permezz tal-użu ta' pjattaformi teknoloġiċi – biex jinġabar il-kontribut taċ-ċittadini dwar kwistjonijiet ta' politika u biex jiġu promossi l-aħjar prattiki permezz ta' skambji bejn il-pari, sabiex tissaħħaħ ir-responsabbiltà tal-gvern u r-rispons tiegħu, li huwa fundamentali biex jinkiseb żvilupp sostenibbli, jiġu indirizzati l-isfidi globali u jitnaqqas ir-riskju taż-żieda tal-instabbiltà;

35. Jissottolinja l-importanza li jingħata appoġġ għal elezzjonijiet ħielsa, ġusti u kompetittivi u favur proċessi elettorali kredibbli; jappoġġa l-koordinazzjoni bejn l-UE u l-UA dwar il-missjonijiet ta' osservazzjoni elettorali u l-assistenza fit-titjib tal-kapaċità tal-UA fit-twettiq ta' osservazzjoni elettorali fit-tul, li tagħmilhom konformi mal-istandards internazzjonali, u l-kooperazzjoni bilaterali mal-pajjiżi rispettivi u s-soċjetajiet ċivili tagħhom, fi sforz biex jitwettqu elezzjonijiet inklużivi, trasparenti u kredibbli fl-Afrika; jindika, għalhekk, l-għadd kbir ta' missjonijiet ta' osservazzjoni elettorali (MOE) immexxija mill-UE, li għandhom l-appoġġ qawwi tal-Parlament; iħeġġeġ lill-UE, lill-NGOs Ewropej, lill-partiti politiċi u lis-soċjetà ċivili jikkooperaw mill-qrib mal-kontropartijiet Afrikani, inklużi uffiċjali pubbliċi, biex jiġġeneraw djalogu politiku sostantiv permezz tal-iżvilupp ta' politiki bbażati fuq kwistjonijiet, jippromwovu prattiki b'saħħithom ta' governanza demokratika, isaħħu r-rappreżentanza u l-inklużjoni ta' popolazzjonijiet emarġinati, u jippromwovu parteċipazzjoni sinifikanti mis-soċjetà ċivili u ċ-ċittadini fil-ħajja pubblika fil-livelli kollha;

36. Japprezza l-isforzi li saru biex jissaħħu l-mekkaniżmi u r-regolamenti ta' sjieda Afrikana dwar il-protezzjoni tad-drittijiet tal-bniedem bħall-Karta Afrikana dwar id-Drittijiet tal-Bniedem u tal-Popli u l-protokolli tagħha, il-Karta Afrikana dwar id-Demokrazija, l-Elezzjonijiet u l-Governanza, il-Kummissjoni Afrikana dwar id-Drittijiet tal-Bniedem u tal-Popli u l-Qorti Afrikana dwar id-Drittijiet tal-Bniedem u tal-Popli; japprezza l-fatt li tali mekkaniżmi u regolamenti jkomplu jassistu lis-sħab Afrikani biex jadattaw l-istrumenti u l-mekkaniżmi tagħhom dwar id-drittijiet tal-bniedem għall-prinċipji, il-liġijiet u l-istandards rikonoxxuti internazzjonalment;

37. Ifakkar fl-importanza tar-rwol tal-Qorti Kriminali Internazzjonali (QKI) biex tiġi indirizzata l-impunità u biex jiġu difiżi l-valuri tal-paċi, is-sigurtà, l-ugwaljanza, il-korrettezza, il-ġustizzja u l-kumpens; jistieden lill-UE u lill-Istati Afrikani jkomplu jappoġġaw l-Istatut ta' Ruma u l-QKI; jistieden lill-istati Afrikani kollha li għadhom ma ffirmawx u ma rratifikawx l-Istatut ta' Ruma biex jagħmlu dan;

38. Jenfasizza l-importanza li l-aħjar interessi tat-tfal isiru kunsiderazzjoni primarja u li jiġi promoss id-dritt għal tfulija paċifika u għall-benessri għat-tfal kollha; jitlob li tingħata attenzjoni urġenti lill-kundizzjonijiet diffiċli u marġinalizzati tat-tfal, b'mod partikolari fl-Afrika sub-Saħarjana u f'għadd ta' żoni oħra ta' kunflitt jew faqar estrem, li ħafna drabi jiġu mċaħħda mid-drittijiet fundamentali tagħhom, bħall-aċċess għall-edukazzjoni, il-kura tas-saħħa bażika u, b'mod aktar ġenerali, id-dritt għal tfulija; jappella, għalhekk, biex il-Konvenzjoni dwar id-Drittijiet tat-Tfal tiġi implimentata b'mod sħiħ;

39. Jirrimarka li l-popolazzjoni Afrikana rduppjat f'dawn l-aħħar 30 sena u li dan it-tkabbir demografiku qawwi huwa mistenni li jkompli fid-deċennji li ġejjin; jenfasizza, għalhekk, l-importanza li tiġi żviluppata strateġija konġunta bejn l-UA u l-UE li tqiegħed lit-tfal u liż-żgħażagħ fil-qalba tas-sħubija u li tqis il-konklużjonijiet tas-Summit taż-Żgħażagħ tal-2017;

40. Jenfasizza li l-aħjar mod biex iż-żgħażagħ jingħataw is-setgħa huwa li jiżviluppaw u jippromwovu opportunitajiet għalihom biex javvanzaw, b'mod partikolari permezz ta' opportunitajiet ta' impjieg u intraprenditorija, kif ukoll opportunitajiet biex jipparteċipaw fil-proċessi demokratiċi u fit-teħid ta' deċiżjonijiet; huwa tal-fehma li din l-istrateġija għandha ssaħħaħ l-opportunitajiet għall-iskambji taż-żgħażagħ u l-volontarjat b'mod partikolari, filwaqt li tagħti prijorità lis-17-il SDG fil-kuntest ta' kwalunkwe kuntatti u proġetti proposti;

41. Jistieden lill-istituzzjonijiet tal-Unjoni Ewropea u lill-Unjoni Afrikana joħolqu opportunitajiet ta' internship għaż-żgħażagħ Ewropej fil-pajjiżi tal-Unjoni Afrikana u għaż-żgħażagħ Afrikani fl-Unjoni Ewropea sabiex iħarrġuhom fil-proċessi rispettivi ta' integrazzjoni;

42. Jistieden lill-UE tippromwovi l-aċċess universali għaż-żgħażagħ kollha, fid-diversità kollha tagħhom, inklużi l-bniet adolexxenti u l-bniet b'diżabilità, għal servizzi tas-saħħa adattati għaż-żgħażagħ, inklużi s-servizzi tas-saħħa sesswali u riproduttiva u tal-HIV, li huma ekwi, aċċessibbli, affordabbli u bbażati fuq il-ħtiġijiet, inkluż f'kuntesti ta' kunflitt u umanitarji;

43. Jindika li ċerti Stati Afrikani ma għandhomx reġistri tal-istat ċivili affidabbli, u b'hekk bosta ċittadini huma miċħuda mill-eżistenza legali u, għalhekk, mid-drittijiet ċivili tagħhom, minn aċċess għall-espressjoni demokratika u mid-dritt tal-vot; jindika li dan in-nuqqas iwassal għal nuqqas ta' affidabbiltà u rilevanza tal-istatistika demografika;

44. Jenfasizza l-importanza li jsir investiment f'inizjattivi konkreti tal-UE mmirati lejn it-tisħiħ tas-sistemi nazzjonali ta' reġistrazzjoni ċivili Afrikani, l-iżgurar li dawk is-servizzi jkunu aċċessibbli u kunfidenzjali, u l-appoġġ lill-gvernijiet Afrikani biex jinvestu f'soluzzjonijiet teknoloġiċi sikuri u innovattivi biex jiffaċilitaw ir-reġistrazzjoni tat-twelid f'konformità mal-mira 16.9 tal-SDG;

45. Jemmen li l-ugwaljanza bejn il-ġeneri u l-emanċipazzjoni tan-nisa u l-bniet għandhom jiġu prijoritizzati u integrati fid-dimensjonijiet kollha tas-sħubija; jistieden, għalhekk, lill-kontropartijiet tiegħu jippromwovu b'mod attiv ir-rwol u l-kontribut tan-nisa fl-ekonomija u s-soċjetà, filwaqt li jirrikonoxxu d-drittijiet ċivili u legali tagħhom, inkluż id-dritt li jkollhom proprjetà u d-dritt li jipparteċipaw f'setturi ekonomiċi u politiċi differenti; jilqa' ż-żieda fir-rappreżentanza politika tan-nisa f'ċerti nazzjonijiet Afrikani; josserva, madankollu, li n-nisa għadhom ftit li xejn rappreżentati f'għadd ta' pajjiżi fil-kontinent Afrikan; jisħaq fuq il-fatt li r-rispett u t-twettiq sħiħ tad-drittijiet tal-bniedem tan-nisa huma s-sisien ta' soċjetà demokratika; iqis, għalhekk, li dawn id-drittijiet u l-objettivi fundamentali jridu jintlaħqu biex tinbena soċjetà tassew demokratika;

46. Jappella biex il-GAP III li tnieda dan l-aħħar isaħħaħ l-isforzi, b'mod partikolari, biex itemm il-vjolenza abbażi tal-ġeneru, il-mutilazzjoni ġenitali femminili u ż-żwieġ furzat; jistieden lill-Kummissjoni tiżgura sinerġiji bejn is-sħubija UE-Afrika u l-GAP III sabiex tinkiseb l-ugwaljanza bejn il-ġeneri; jitlob li s-sħubija UE-Afrika tqiegħed enfasi fuq il-parteċipazzjoni tan-nisa fit-teħid tad-deċiżjonijiet; jitlob pjan direzzjonali konġunt dwar l-objettivi li għandhom jintlaħqu fir-rigward tad-drittijiet tan-nisa;

47. Jenfasizza li l-edukazzjoni komprensiva dwar is-sesswalità (CSE) b'mod partikolari hija kruċjali għat-titjib tal-ugwaljanza bejn il-ġeneri, għat-trasformazzjoni ta' normi dannużi tal-ġeneru, u għall-prevenzjoni tal-vjolenza sesswali, abbażi tal-ġeneru u domestika, kif ukoll għat-tqala mhux intenzjonata u l-infezzjoni tal-HIV;

48. Jenfasizza l-fatt li l-aċċess għas-saħħa u d-drittijiet sesswali u riproduttivi u r-rispett tagħhom huma komponent kruċjali tas-sħubija UE-Afrika; jinnota l-ħtieġa urġenti li jiġi indirizzat il-fatt li l-konsegwenzi tal-kriżi tal-coronavirus llimitaw aktar l-aċċess għas-servizzi u l-edukazzjoni dwar is-saħħa sesswali u riproduttiva, u żiedu d-diskriminazzjoni u l-vjolenza kontra n-nisa u l-bniet; jistieden lill-Kummissjoni tagħti prijorità lis-saħħa u d-drittijiet sesswali u riproduttivi fis-sħubija l-ġdida UE-Afrika u timpenja ruħha għall-promozzjoni, il-protezzjoni u r-rispett tad-dritt ta' kull individwu li jkollu kontroll sħiħ fuq, u jiddeċiedi liberament u b'mod responsabbli fuq, kwistjonijiet relatati mas-sesswalità u s-saħħa u d-drittijiet sesswali u riproduttivi tiegħu, ħielsa mid-diskriminazzjoni, il-koerċizzjoni u l-vjolenza;

49. Jinnota li l-persuni b'diżabilità għadhom il-vittmi ta' diversi forom ta' diskriminazzjoni; jitlob l-integrazzjoni tad-drittijiet tal-persuni b'diżabilità fl-Afrika fl-istrateġija kollha u fl-istrumenti finanzjarji kollha mobilizzati, u jitlob il-parteċipazzjoni attiva tagħhom fis-soċjetà u l-involviment sistematiku fit-tħejjija u l-implimentazzjoni ta' strateġiji mmirati lejn il-promozzjoni tal-inklużjoni tagħhom, b'mod partikolari f'termini ta' edukazzjoni, intraprenditorija u trasformazzjoni diġitali; huwa tal-fehma li dan jista' jinkiseb biss permezz tal-involviment sinifikanti tal-organizzazzjonijiet tas-soċjetà ċivili, inklużi l-organizzazzjonijiet tal-persuni b'diżabilità;

50. Jinsab imħasseb dwar il-vjolenza u d-diskriminazzjoni persistenti kontra persuni LGBTI, b'mod partikolari fir-rigward tal-aċċess għall-kura tas-saħħa, u jitlob liż-żewġ kontinenti jżidu l-isforzi tagħhom biex jipproteġu d-drittijiet tagħhom;

51. Jisħaq fuq ir-rwol essenzjali tas-soċjetà ċivili, inklużi l-NGOs lokali, u l-libertà tal-espressjoni biex jiġi żgurat il-funzjonament xieraq tad-demokraziji; ifakkar fil-ħtieġa li jiġu rikonoxxuti u promossi r-rwoli u l-kontribuzzjonijiet multipli tal-organizzazzjonijiet tas-soċjetà ċivili; jistieden liż-żewġ kontinenti jiggarantixxu qafas li jippermetti lill-organizzazzjonijiet tas-soċjetà ċivili jipparteċipaw fit-tfassil u l-evalwazzjoni tal-politika fid-diversi livelli tat-teħid tad-deċiżjonijiet;

 

52. Jenfasizza r-rwol importanti ta' settur tal-midja u tal-istampa ħieles u vibranti u jfakkar li huwa kruċjali biex jiġi żgurat pubbliku infurmat tajjeb li jkun jista' jiddefinixxi l-prijoritajiet tiegħu stess u biex tiżdied ir-reżiljenza kontra l-aħbarijiet foloz; jinkoraġġixxi l-isforzi Afrikani kontinwi fil-qasam tal-libertà tal-midja u l-appoġġ għall-ġurnalisti u jissottolinja r-rwol importanti ta' stampa ħielsa f'dak li għandu x'jaqsam mal-ġlieda kontra l-korruzzjoni kif ukoll mas-superviżjoni u r-responsabbiltà tal-awtoritajiet pubbliċi;

53. Ifakkar li s-saħħa hija kundizzjoni neċessarja għall-iżvilupp tal-bniedem u li d-dritt għas-saħħa huwa dritt fundamentali; jissottolinja li n-natura multidimensjonali tas-saħħa għandha tiġi indirizzata bis-sħiħ; jenfasizza l-importanza ta' ambjent sikur għas-salvagwardja tas-saħħa tal-bniedem u li l-approċċ "Saħħa Waħda" għandu jiġi integrat fis-sħubija futura;

54. Jisħaq fuq il-ħtieġa li tinbena sħubija ġenwina fil-qasam tas-saħħa mmirata lejn it-tisħiħ tas-sistemi tas-saħħa billi jissaħħaħ ir-rwol tal-komunitajiet; jissottolinja li l-bini tal-kapaċitajiet tal-pajjiżi jrid ikun il-pedament għat-trawwim ta' aċċess universali għal kura tas-saħħa adegwata, aċċessibbli u bi prezz raġonevoli għal kulħadd billi jissaħħaħ l-għoti pubbliku tas-servizzi tas-saħħa;55.  Jisħaq, barra minn hekk, li din is-sħubija għandha tiffoka fuq ir-riċerka u l-iżvilupp tas-saħħa globali u fuq it-tisħiħ tal-kollaborazzjoni bejn l-UE u l-Afrika dwar ir-riċerka u l-innovazzjoni fil-qasam tas-saħħa, biex b'hekk tissaħħaħ b'mod konġunt il-kapaċità ta' produzzjoni lokali Afrikana u Ewropea għall-prodotti u t-tagħmir tas-saħħa u l-mediċini; iħeġġeġ lill-UE, għal dan il-għan, tappoġġa lill-pajjiżi Afrikani, b'mod partikolari lill-pajjiżi l-anqas żviluppati, fl-implimentazzjoni effettiva tal-flessibbiltajiet għall-protezzjoni tas-saħħa pubblika previsti fil-Ftehim dwar l-aspetti tad-drittijiet tal-proprjetà intellettwali relatati mal-kummerċ (TRIPS), bħal-liċenzjar obbligatorju u l-importazzjonijiet paralleli; iħeġġeġ in-networking bejn il-komunitajiet xjentifiċi Afrikani u Ewropej u l-iskambji ta' għarfien espert u esperjenza, u jisħaq fuq il-ħtieġa li jingħeleb il-fenomenu tal-mediċini ffalsifikati;56.  Jenfasizza li l-aċċess għall-ilma, is-sanità u s-servizzi tal-iġjene huwa prerekwiżit essenzjali għal kwalunkwe azzjoni mmirata lejn it-titjib tas-saħħa pubblika u l-ġlieda kontra t-trażmissjoni tal-mard u għandu jkun element essenzjali tal-kooperazzjoni bejn l-UE u l-Afrika; jinsisti fuq il-ħtieġa li jiżdiedu l-isforzi fil-qasam tal-ġestjoni u l-governanza tal-ilma, il-bini tal-infrastruttura, u l-promozzjoni tal-iġjene u l-edukazzjoni; jitlob titjib immirat fl-aċċess għal dawn is-servizzi, b'mod partikolari għall-popolazzjonijiet l-aktar vulnerabbli u dawk li jsofru diskriminazzjoni;

57. Jissottolinja l-benefiċċji għas-saħħa li tiġi sostnuta l-immunizzazzjoni ta' rutina tat-tfal u jitlob li jkomplu jissaħħu l-programmi relatati mal-immunizzazzjoni; jenfasizza li l-kriżi tal-coronavirus aċċentwat il-ħtieġa li jiġi żgurat l-aċċess għat-tilqim u t-trattament, u jistieden liż-żewġ kontinenti jikkooperaw mill-qrib biex jiżguraw li kulħadd jibbenefika f'dan ir-rigward;

58. Jinsab imħasseb dwar il-fatt li aktar u aktar kriżijiet interkonnessi, kemm jekk huma kriżijiet tas-saħħa, tal-ikel, tal-ambjent jew tas-sigurtà, qed ifeġġu u huma mistennija li jiggravaw bit-tibdil fil-klima u t-telf tal-bijodiversità, u jiġbed l-attenzjoni, għalhekk, għall-importanza li tissaħħaħ b'mod komprensiv ir-reżiljenza tan-nies u tal-ekosistemi, kif ukoll il-prevenzjoni, it-tħejjija, is-sorveljanza, u l-kapaċitajiet ta' ġestjoni u rispons transsettorjali tal-kriżijiet, fl-istrateġija futura u fl-istrateġija kkombinata għal reazzjonijiet futuri għal pandemiji globali; jitlob li tingħata kunsiderazzjoni aktar dettaljata lill-mudelli ta' protezzjoni soċjali, id-dħul universali u l-formalizzazzjoni tal-ekonomija informali, u jenfasizza l-importanza li jiġu appoġġati x-xogħol deċenti u d-djalogu soċjali; iħeġġeġ l-appoġġ għall-aċċess għall-edukazzjoni, it-taħriġ u l-impjiegi f'sitwazzjonijiet ta' fraġilità, kriżi u kriżijiet fit-tul, bħala fatturi ewlenin fl-istabbiltà u l-iżgurar tal-għajxien;

59. Jenfasizza li l-edukazzjoni inklużiva, aċċessibbli u ta' kwalità hija dritt fundamentali u prerekwiżit għall-protezzjoni tat-tfal kif ukoll għat-tisħiħ tal-pożizzjoni lill-bniet, inkluż f'sitwazzjonijiet ta' emerġenza;

60. Ifakkar li l-Afrika għandha waħda mill-akbar popolazzjonijiet żgħażagħ fid-dinja, li tirrappreżenta sfida enormi f'termini ta' edukazzjoni iżda, fl-istess ħin, hija ta' vantaġġ għall-iżvilupp futur tal-kontinent; ifakkar fl-importanza tal-edukazzjoni fit-tiswir tar-rwol taċ-ċittadini fis-soċjetà u fl-istimolu tat-tkabbir ekonomiku sostenibbli u l-ħolqien tal-impjiegi; jenfasizza li l-illitteriżmu u n-nuqqas ta' edukazzjoni ta' kwalità u professjonisti mħarrġa huma ostaklu għall-iżvilupp sostenibbli; jisħaq li l-edukazzjoni għal kulħadd hija kwistjoni orizzontali u olistika li taffettwa kull dimensjoni tal-SDGs; jisħaq fuq l-importanza tal-SDG 4.1, li l-għan tiegħu huwa ċiklu sħiħ u ta' kwalità ta' edukazzjoni primarja u sekondarja fuq perjodu ta' 12-il sena bla ħlas għal kulħadd;

61. Jemmen li l-edukazzjoni għandha tkun prijorità tal-għajnuna għall-iżvilupp, b'mod partikolari fil-pajjiżi l-anqas żviluppati, u pilastru ewlieni tas-sħubija bejn l-Afrika u l-UE; jitlob li s-sħubija l-ġdida tipprijoritizza t-taħriġ tal-għalliema u t-tisħiħ tal-istrutturi edukattivi, b'mod partikolari f'pajjiżi fraġli u milquta minn kunflitti; jitlob li tittieħed azzjoni biex jiġi miġġieled it-tluq bikri mill-iskola, speċjalment f'żoni rurali, b'mod partikolari billi jiġu pprovduti kantins tal-iskola adegwati u servizzi ta' iġjene; jitlob li ssir promozzjoni tat-taħriġ vokazzjonali; jistieden lill-Istati jinvestu ħafna fl-infrastruttura u fid-diġitalizzazzjoni sabiex jippermettu l-akbar numru ta' tfal kemm minn żoni rurali kif ukoll urbani biex ikunu jistgħu jintegraw fis-sistema skolastika;

62. Jisħaq fuq il-ħtieġa li jiġu indirizzati l-ostakli li jiffaċċjaw il-bniet fl-aċċess tagħhom għal edukazzjoni u taħriġ ta' kwalità, sikuri u inklużivi fil-livelli kollha u fil-kuntesti kollha, inkluż f'kuntesti umanitarji u ta' kunflitt; jenfasizza li l-edukazzjoni "inklużiva" tfisser li d-dritt tat-tfal kollha għal aċċess ugwali għall-edukazzjoni jiġi rispettat bis-sħiħ irrispettivament mill-ġeneru, l-istatus soċjoekonomiku, l-isfond kulturali u r-reliġjon, b'enfasi partikolari fuq il-komunitajiet marġinalizzati u t-tfal b'diżabilità;

63. Jenfasizza l-ħtieġa għal rabtiet aktar b'saħħithom bejn l-edukazzjoni, l-iżvilupp tal-ħiliet u l-impjiegi li jippermettu l-parteċipazzjoni sħiħa taż-żgħażagħ fis-suq tax-xogħol, b'mod partikolari billi jiġu integrati l-ħiliet diġitali u ekoloġiċi fil-kurrikuli tal-iskejjel; jissottolinja li Edukazzjoni u Taħriġ Tekniċi u Vokazzjonali (TVET) ta' kwalità jiżvolġu rwol ewlieni għall-impjieg taż-żgħażagħ u għandhom jiġu mħeġġa; jistieden appoġġ għad-djalogu fis-settur privat biex jinkoraġġixxi l-allinjament tat-taħriġ mal-ħtiġijiet tas-suq tax-xogħol;

64. Jitlob li jkun hemm networking fost l-universitajiet Afrikani u Ewropej u li jitħaffef l-iskambju tal-għarfien; jitlob li jkun hemm aktar mobilità bejn it-Tramuntana u n-Nofsinhar u bejn in-Nofsinhar u t-Tramuntana fl-oqsma tat-taħriġ vokazzjonali, il-boroż ta' studju u l-programmi ta' skambju akkademiku bejn iż-żgħażagħ fl-Afrika u fl-UE permezz ta', pereżempju, Erasmus u Erasmus għal Imprendituri Żgħażagħ, bil-għan li tgħin lil imprendituri ġodda jiksbu l-ħiliet rilevanti għall-ġestjoni ta' negozju;

65. Jiddispjaċih li l-komunikazzjoni tal-Kummissjoni tinjora d-dimensjoni tal-politika kulturali barranija u l-potenzjal promettenti offrut minn kollaborazzjoni kulturali Ewropea u Afrikana approfondita; ifakkar fl-importanza tad-djalogu kulturali bejn l-Ewropa u l-Afrika u jqis li r-relazzjonijiet kulturali u d-djalogu interkulturali jistgħu jikkontribwixxu għall-bini tal-fiduċja u t-trawwim ta' sens kondiviż ta' appartenenza fi sħubija; jitlob li jkun hemm koordinazzjoni fost ir-rappreżentanzi diplomatiċi u konsulari tal-Istati Membri, id-delegazzjonijiet tal-UE, u l-partijiet interessati Ewropej u lokali, u man-network tal-Istituti Nazzjonali tal-UE għall-Kultura, fl-implimentazzjoni ta' proġetti komuni u azzjonijiet konġunti f'pajjiżi terzi bbażati fuq il-prinċipji tar-relazzjonijiet kulturali, li jiffukaw fuq il-bini ta' fiduċja u fehim reċiproċi permezz ta' djalogu bejn il-persuni bejn l-Ewropa u l-Afrika;

66. Ifakkar li l-kooperazzjoni kulturali fi ħdan l-UE u mal-pajjiżi sħab tagħha tippromwovi ordni globali bbażat fuq iż-żamma tal-paċi u fuq il-ġlieda kontra l-estremiżmu u r-radikalizzazzjoni permezz ta' djalogu interkulturali u interreliġjuż dwar id-demokrazija, l-istat tad-dritt, il-libertà tal-espressjoni, id-drittijiet tal-bniedem u l-valuri fundamentali;

67. Jenfasizza l-importanza tal-promozzjoni tal-wirt, l-identità kulturali, l-istorja u l-arti Afrikani; jitlob li l-prodotti kulturali jintbagħtu lura lejn il-pajjiżi Afrikani u li jiġu stabbiliti l-kundizzjonijiet għar-restituzzjoni permanenti tal-patrimonju Afrikan lejn l-Afrika; jistieden lill-UE u lill-Afrika jistabbilixxu "kultura ta' tifkira" li tippermetti liż-żewġ kontinenti jidentifikaw fdalijiet tal-ħakma kolonjali fir-relazzjonijiet attwali u jinnegozjaw miżuri xierqa biex jikkontrobattuhom;

68. Ifakkar fid-diversità lingwistika rikka fil-kontinent Afrikan; jappella lill-UE u lill-Istati Membri jippreservawha fir-relazzjonijiet futuri tagħhom; itenni l-ħtieġa li ssir ħidma f'kooperazzjoni mill-qrib mal-UNESCO biex tiġi żgurata l-preservazzjoni tad-diversità kulturali u lingwistika u biex jinstabu raġunijiet komuni għall-kooperazzjoni;

Sħab għal tkabbir sostenibbli u inklużiv

 

69. Jenfasizza li l-Unjoni Ewropea għandha rabtiet ekonomiċi importanti mal-istati Afrikani, u dawn ir-rabtiet għandhom jissaħħu aktar fil-futur biex tiġi żgurata trasformazzjoni produttiva tar-reġjun u l-bini ta' reżiljenza; jinnota li ċ-Ċina intensifikat il-preżenza tagħha fl-Afrika filwaqt li l-Istati Membri wrew biss interess selettiv ħafna fil-kummerċ mal-istati Afrikani u fl-investiment fihom, li jispjega għalfejn il-volum ta' kummerċ bejn l-UE u ħafna stati Afrikani għadu relattivament baxx; jissottolinja li l-UE teħtieġ bażi kompletament ġdida għas-sħubija ekonomika tagħha mal-Afrika, li jfisser li teħtieġ tasal għal realtà ġdida fejn l-UE u l-Afrika jiżviluppaw sħubija sostenibbli ta' benefiċċju komuni, li ssawwar mill-ġdid ir-relazzjonijiet ekonomiċi, kummerċjali u ta' negozju diretti lejn is-solidarjetà u l-kooperazzjoni u tiżgura wkoll negozju ġust u etiku; jissottolinja li din is-sħubija għandha bħala prerekwiżit l-iżvilupp sostenibbli sostanzjali ulterjuri fl-istati Afrikani kollha; f'dan il-kuntest, jisħaq fuq il-bżonn li jiġi pprovdut investiment u jingħata appoġġ immirat u li tiġi rrispettata l-koerenza politika għall-iżvilupp;

70. Jissottolinja l-konvinzjoni tiegħu li l-Afrika, bħala kontinent sinjur fir-riżorsi, b'ekonomiji dinamiċi u li qed jiżviluppaw li juru livelli għoljin ta' tkabbir, klassi medja li qed tikber u popolazzjoni żagħżugħa u kreattiva, hija kontinent ta' opportunitajiet li wera, f'diversi okkażjonijiet, li l-progress ekonomiku u l-iżvilupp huma possibbli;

71. Jisħaq fuq l-importanza li jitqiesu l-kawżi strutturali kollha u l-fatturi esterni li jiġġeneraw l-insigurtà u l-faqar fl-Afrika, billi jiġu indirizzati l-kawżi fundamentali tal-kunflitti, il-ġuħ, it-tibdil fil-klima, l-inugwaljanzi, in-nuqqas ta' servizzi bażiċi u mudelli agrikoli mhux xierqa, u billi jiġu promossi soluzzjonijiet politiċi u inklużivi għall-kunflitti u jiġi implimentat approċċ komprensiv li jiffoka fuq it-tnaqqis tat-tbatija tal-aktar sezzjonijiet vulnerabbli tal-popolazzjoni;

72. Jirrimarka l-importanza li jiġu avvanzati l-kapaċitajiet ta' produzzjoni domestika u tal-manifattura, li jgħinu biex titnaqqas id-dipendenza fuq l-importazzjonijiet barranin; jissottolinja li l-Afrika teħtieġ trasformazzjoni industrijali u infrastrutturali li se tkun possibbli biss permezz ta' investimenti sostenibbli kbar li fihom il-modi ta' operat pubbliċi-privati jirrappreżentaw għażla vijabbli biex jitrawwem l-iżvilupp; jinnota li l-Fond Ewropew għall-Iżvilupp Sostenibbli (EFSD) għandu jiffinanzja investiment li jippromwovi żvilupp ekonomiku u soċjali inklużiv u sostenibbli, abbażi tal-aċċessibbiltà u d-disinn universali għal kulħadd, filwaqt li jirrikonoxxi n-nuqqasijiet tiegħu fil-Pajjiżi l-Anqas Żviluppati (LDCs);

73. Jenfasizza li l-investimenti tas-settur privat għandhom jaqdu lis-suq u lill-popolazzjoni lokali u jimmiraw lil dawk bi ftit aċċess għall-finanzjament, filwaqt li jiggarantixxu inklużività finanzjarja għal gruppi marġinalizzati, pereżempju, permezz ta' investimenti diretti f'intrapriżi mikro, żgħar u ta' daqs medju (SMEs) lokali u mudelli ta' negozju tal-ekonomija soċjali, b'mod partikolari l-intrapriżi tal-familja;

74. Jappella għal mekkaniżmi b'saħħithom ta' monitoraġġ u evalwazzjoni biex tiġi żgurata l-konformità ma' dawn l-objettivi; jissottolinja li l-għoti tas-setgħa lis-soċjetà ċivili, u b'hekk l-inklużjoni ta' kontroparti soċjali fl-investiment, huwa aspett vitali tal-politiki tal-UE eżistenti lejn l-Istati Afrikani u magħhom.

75. Itenni s-sejbiet tar-rapport ta' valutazzjoni reċenti dwar l-EFSD, li wrew nuqqas ta' evidenza tal-potenzjal ta' żvilupp, l-addizzjonalità u s-sjieda tal-pajjiż tal-mekkaniżmi ta' taħlit;

76. Jilqa' l-inizjattiva tal-Patt tal-G20 mal-Afrika (CwA), varata fl-2017 sabiex jiġi promoss l-investiment privat fl-Afrika, inkluż fl-infrastruttura, u jaraha bħala pjattaforma tajba għall-avvanz ta' aġendi ta' riforma komprensivi, koordinati u speċifiċi għall-pajjiż; jilqa' l-fatt li, s'issa, 12-il pajjiż Afrikan ingħaqdu mal-inizjattiva:

77. Jissottolinja li l-kooperazzjoni kummerċjali u ekonomika bejn l-UE u l-Afrika għandha tagħti prijorità lill-integrazzjoni reġjonali fil-kontinent Afrikan; jitlob lill-Unjoni żżid l-appoġġ tagħha għall-istrateġiji ta' integrazzjoni Afrikana u tiżgura li tkun konsistenti bejn il-livelli kontinentali, reġjonali u nazzjonali li fihom tiġi implimentata;

78. Jistieden lill-Kummissjoni tappoġġa lill-Afrika fl-ambizzjonijiet tagħha għal żona ta' kummerċ ħieles kontinentali; jilqa' t-tnedija taż-Żona ta' Kummerċ Ħieles Kontinentali Afrikana (CFTA tal-Afrika) u jissottolinja l-potenzjal enormi tagħha bħala strument li jrawwem il-kummerċ intra-Afrikan u l-integrazzjoni reġjonali, u jtejjeb l-aċċess tal-Afrika għas-swieq globali; jenfasizza li s-CFTA tal-Afrika għandha tippermetti integrazzjoni li tkun ta' benefiċċju għall-popolazzjonijiet Afrikani kollha, inklużi dawk l-iktar marġinalizzati; ifakkar li hemm differenzi fl-iżvilupp bejn il-pajjiżi Afrikani li jridu jitqiesu sabiex ma jiżdidux l-inugwaljanzi; huwa tal-fehma li l-appoġġ tal-UE għas-CFTA tal-Afrika għandu jiffoka fuq l-iżvilupp ta' oqfsa regolatorji biex tiġi evitata "ġirja lejn l-iktar livell baxx" ta' normi soċjali u ambjentali; jemmen li s-CFTA tal-Afrika u l-isforzi kontinwi għall-integrazzjoni reġjonali jipprovdu opportunità tajba biex jiġi bbilanċjat mill-ġdid ir-reġim tal-investiment internazzjonali sabiex dan isir responsabbli, ekwu u jwassal għall-iżvilupp sostenibbli;

79. Jisħaq fuq il-ħtieġa fl-Afrika li jiġu stabbiliti u diversifikati l-ktajjen tal-valur intrakontinentali sabiex jiġi ġġenerat aktar valur miżjud fl-istati Afrikani nfushom; jissottolinja l-ħtieġa li tiġi implimentata assistenza teknika dwar il-kooperazzjoni fuq il-fruntieri u kwistjonijiet tekniċi oħra għall-finijiet tal-iżvilupp tal-katina tal-valur reġjonali; jinnota li għadhom jeżistu ostakli sinifikanti għal tali kummerċ minħabba l-prevalenza ta' tariffi u ostakli oħra, kif ukoll infrastruttura fqira u kostijiet għoljin ta' tranżazzjoni; jiġbed l-attenzjoni għall-ħtieġa, għalhekk, li jsir investiment sinifikanti fl-infrastruttura tat-trasport biex jiġi ffaċilitat il-kummerċ intra-Afrikan;

80. Jisħaq fuq il-fatt li l-UE u l-Unjoni Afrikana jikkondividu interess komuni f'sistema kummerċjali multilaterali stabbli u bbażata fuq ir-regoli li hija ċċentrata fuq l-Organizzazzjoni Dinjija tal-Kummerċ (WTO);

81. Ifakkar li waħda mill-isfidi ewlenin għall-pajjiżi li qed jiżviluppaw hija li javvanzaw fil-katina ta' valur mondjali permezz tad-diversifikazzjoni ekonomika; jappella lill-UE żżomm lura milli tadotta politika kummerċjali li bħala regola ġenerali tipprojbixxi lill-pajjiżi Afrikani milli jimponu taxxi fuq l-esportazzjoni tal-materja prima, sakemm din tkun kompatibbli mar-regoli tad-WTO;

82. Ifakkar li l-kummerċ ħieles u ġust mal-kontinent Afrikan huwa essenzjali għall-appoġġ tal-iżvilupp sostenibbli u t-tnaqqis tal-faqar; jitlob lill-Kummissjoni tinkludi lis-soċjetà ċivili fil-livelli kollha tad-djalogu politiku, speċjalment meta jitħejjew, jiġu mmonitorjati u evalwati l-ftehimiet kummerċjali; jenfasizza li l-Ftehimiet ta' Sħubija Ekonomika (FSEs) u l-Iskema Ġeneralizzata ta' Preferenzi (SĠP) huma strumenti importanti fir-relazzjoni kummerċjali bejn l-UE u l-Afrika; iħeġġeġ lill-Kummissjoni, madankollu, tirrikonoxxi fehmiet diverġenti dwar l-FSEs u ssib soluzzjonijiet konkreti biex twieġeb għat-tħassib tal-pajjiżi Afrikani, b'mod partikolari rigward il-prijorità tagħhom li jibnu ktajjen ta' valur reġjonali u jagħtu spinta lill-kummerċ intra-Afrikan; itenni t-talba tiegħu għal analiżi fil-fond tal-impatt tal-FSEs;

83. Jappella għall-inklużjoni sistematika ta' mekkaniżmi vinkolanti u infurzabbli għall-implimentazzjoni tal-kapitoli dwar il-Kummerċ u l-Iżvilupp Sostenibbli (TSD) dwar id-drittijiet tal-bniedem, l-istandards tax-xogħol u ambjentali fl-FSEs kollha nnegozjati bħalissa u fil-futur, filwaqt li jenfasizza li l-ftehimiet jeħtieġ li jkunu koerenti mal-politiki tal-iżvilupp u mal-SDGs, speċjalment fir-rigward tal-impatt tagħhom fuq id-deforestazzjoni, it-tibdil fil-klima u t-telf tal-bijodiversità;

84. Jinnota li l-pajjiżi Afrikani, filwaqt li jirrappreżentaw aktar minn 50 % tal-benefiċjarji tal-SĠP, jirrappreżentaw anqas minn 5 % tal-importazzjonijiet tal-SĠP tal-UE; jistieden lill-Kummissjoni tassisti lill-atturi ekonomiċi fil-pajjiżi benefiċjarji dwar l-aderenza mar-regoli tal-oriġini u biex jingħelbu l-ostakli tekniċi, fost l-oħrajn; jiddispjaċih li l-SĠP s'issa ma kkontribwixxietx għad-diversifikazzjoni ekonomika tal-pajjiżi benefiċjarji Afrikani; itenni t-talba tiegħu lill-Kummissjoni biex tikkunsidra li tespandi l-lista ta' prodotti koperti mir-Regolament SĠP;

85. Jistieden lill-Kummissjoni, fid-dawl tar-riskju ddokumentat dejjem akbar tat-tixrid ta' patoġeni żoonotiċi fl-Afrika, biex tippromwovi standards aktar stretti fil-pajjiżi Afrikani f'termini ta' miżuri sanitarji u fitosanitarji (SPS) u ta' trattament xieraq tal-annimali, permezz ta' djalogu u ta' kooperazzjoni regolatorja;

86. Jirrimarka li l-investiment privat u s-sħubijiet pubbliċi-privati huma essenzjali biex jintlaħqu l-SDGs u għall-iżvilupp tas-settur privat lokali u jridu jkunu kompatibbli mad-drittijiet tal-bniedem, mal-istandards tax-xogħol deċenti u mal-istandards ambjentali, kif ukoll mal-objettivi klimatiċi internazzjonali u mat-tranżizzjoni ekoloġika, u li, bħala prijorità, għandhom jissodisfaw il-ħtiġijiet ta' finanzjament ta' intrapriżi żgħar ħafna u SMEs; jilqa', f'dan ir-rigward, l-isforzi magħmula mill-Kummissjoni biex tagħmel mill-"Alleanza Afrika-Ewropa'" pilastru ċentrali tar-relazzjonijiet ekonomiċi bejn iż-żewġ kontinenti;

87. Jinnota li l-SMEs u n-negozji tal-familja jiżvolġu rwol importanti fl-iżvilupp tal-ekonomiji lokali; jirrimarka li l-SMEs huma mutur ewlieni għall-ħolqien tal-impjiegi u jirrappreżentaw 95 % tan-negozji fl-Afrika; jemmen li l-istrateġija għandha tipprijoritizza l-intraprenditorija u l-aċċess għall-finanzi filwaqt li toħloq ambjent tan-negozju affidabbli; iqis, barra minn hekk, li l-appoġġ għas-settur privat lokali se jkun deċiżiv fl-irkupru ta' wara l-COVID-19; jiġbed l-attenzjoni għall-opportunitajiet li għandha l-Aġenzija Eżekuttiva tal-UE għall-Intrapriżi Żgħar u Medji (EASME) biex tippromwovi l-kooperazzjoni bejn in-negozji u l-impriżi konġunti ma' kumpaniji Afrikani, li, barra minn hekk, mhux biss iżid il-viżibbiltà tal-opportunitajiet ta' negozju iżda jrawwem ukoll l-aċċess tant meħtieġ għall-finanzi u l-aċċess għat-teknoloġija permezz ta' trasferiment tal-għarfien;

88. Jisħaq li sħubija bejn l-Afrika u l-UE dwar is-settur privat għandha tinkludi dispożizzjonijiet b'saħħithom dwar finanzi responsabbli; ifakkar li għad irid isir progress konsiderevoli biex jiġi evitat l-abbuż korporattiv u, għalhekk, jisħaq li l-iżgurar tar-rispett għall-prinċipji tar-responsabbiltà soċjali korporattiva, id-drittijiet tal-bniedem u d-diliġenza dovuta ambjentali għandu jiġi stabbilit b'mod ċar bħala prijorità għolja fis-sħubija UE-Afrika;

89. Jissottolinja li l-kumpaniji Afrikani huma responsabbli mill-ktajjen ta' provvista tagħhom; jistieden lill-Kummissjoni tipproċedi bi proposta leġiżlattiva ambizzjuża dwar obbligi vinkolanti ta' diliġenza dovuta fir-rigward tad-drittijiet tal-bniedem, id-drittijiet soċjali u l-ambjent għall-kumpaniji tal-UE; iħeġġeġ lill-Kummissjoni, biex fl-iżvilupp ta' proposti simili, tiżgura li jkunu japplikaw għall-katina ta' provvista kollha u jissodisfaw il-linji gwida tal-OECD dwar ir-responsabbiltà soċjali u d-drittijiet tal-bniedem fil-kummerċ u jkunu kompatibbli mad-WTO, u biex wara valutazzjoni attenta, il-proposti jinstabu li jkunu funzjonali u applikabbli għall-atturi kollha fis-suq, inklużi l-SMEs, u jinkludu dispożizzjonijiet li jiffaċilitaw ir-rikors għall-ġustizzja lill-partijiet li jġarrbu ħsara;

90. Jisħaq li l-investiment privat ingranat għandu jkun parti minn, pjuttost milli minflok, l-impenn tal-pajjiżi żviluppati li jallokaw 0,7 % tal-introjtu nazzjonali gross (ING) għall-Għajnuna Uffiċjali għall-Iżvilupp, u 0,15-0,2 % tal-ING ikun riżervat għal-LDCs;

91. Huwa tal-fehma li l-istrateġija UE-Afrika għandha tinkludi wkoll miżuri li jgħinu lill-pajjiżi Afrikani jikkonvertu l-ġid tar-riżorsi minerali tagħhom f'riżultati ta' żvilupp reali u jitlob li jsir rieżami tal-effikaċja tal-miżuri eżistenti, anke fir-rigward tal-isfruttament dubjuż tal-Afrika miċ-Ċina u r-Russja; jistieden lill-Kummissjoni u lis-sħab Afrikani tal-UE jimplimentaw l-miżuri meħtieġa fl-ambitu tar-Regolament dwar il-Minerali ta' Kunflitt[7] mingħajr ostakli, u jippubblikaw mingħajr dewmien il-lista ta' kumpaniji barra mill-UE li ma jissodisfawx ir-rekwiżiti stabbiliti mir-regolament; jenfasizza l-punti b'saħħithom tal-Ewropa (jiġifieri t-trasparenza, il-prodotti u s-servizzi ta' kwalità għolja u l-governanza demokratika) u jittama li l-attrazzjoni ta' dawk il-valuri fundamentali tkun alternattiva konvinċenti għall-mudelli awtoritarji;

92. Jinnota l-importanza li tiġi implimentata l-Viżjoni Afrikana fuq it-Tħaffir fil-Minjieri adottata fl-2009 mill-Kapijiet ta' Stat u ta' Gvern Afrikani biex jiġi żgurat sfruttament trasparenti, ekwu u ottimali tar-riżorsi minerali;

93. Ifakkar li s-settur tal-estrazzjoni jaqdi rwol importanti fl-ekonomiji ta' bosta pajjiżi Afrikani u huwa marbut ma' interdipendenza mhux ugwali tar-riżorsi mal-Ewropa, li għandha tiġi korretta billi tiġi indirizzata l-kwistjoni tal-flussi illeċiti ta' dħul mit-taxxa u royalties fis-settur tal-estrazzjoni permezz tad-Direttiva dwar it-Trasparenza[8] u d-Direttiva dwar il-Kontabilità[9];

94. Jesprimi t-tħassib tiegħu dwar l-għadd dejjem akbar ta' każijiet ta' Soluzzjoni ta' Tilwim bejn Investituri u Stati (ISDS) li saru kontra stati Afrikani, speċjalment minn kumpaniji Ewropej; jistieden lill-gvernijiet u lill-kumpaniji fl-UE jżommu lura milli jużaw l-ISDS, u jtemmu l-għadd kbir ta' każijiet ISDS li saru kontra pajjiżi Afrikani;

95. Iqis li din is-sħubija għandha tappoġġa l-intraprenditorija femminili u taż-żgħażagħ f'żoni rurali u urbani, u li biex isir dan huwa essenzjali li jiġi appoġġat l-aċċess ugwali għar-riżorsi ekonomiċi u produttivi bħas-servizzi finanzjarji u d-drittijiet tal-art; jitlob li jiġu żviluppati skambji bejn l-imprendituri nisa Afrikani u Ewropej permezz ta' pjattaformi li jippermettu n-networking, il-kondiviżjoni tal-esperjenzi u l-produzzjoni ta' proġetti komuni;

96. Ifakkar li l-pożizzjoni tan-nisa tista' tissaħħaħ permezz ta' dispożizzjonijiet b'saħħithom fil-ftehimiet kummerċjali dwar il-ġeneru u l-kummerċ; jistieden, f'dan ir-rigward, lill-Kummissjoni tassisti lill-Unjoni Afrikana fl-implimentazzjoni tal-Istrateġija għall-Ugwaljanza bejn il-Ġeneri u t-Tisħiħ tal-Pożizzjoni tan-Nisa tagħha, u timplimenta miżuri li jikkontribwixxu għall-kisba tal-ugwaljanza bejn il-ġeneri fil-ftehimiet kummerċjali tagħha mal-pajjiżi Afrikani;

97. Jenfasizza r-restrizzjonijiet fiskali enormi tal-Afrika biex tlaħħaq mal-konsegwenzi soċjoekonomiċi tal-pandemija; ifakkar li xi pajjiżi Afrikani qed jonfqu aktar flus fuq il-ħlasijiet lura tad-dejn milli fuq is-servizzi tas-saħħa; jemmen li għandha tingħata kunsiderazzjoni dettaljata biex jittaffew il-piżijiet tad-dejn mhux sostenibbli li jirriżultaw f'telf kbir ta' servizzi pubbliċi u miżuri soċjali; jieħu nota tat-tħabbir mill-G20 dwar moratorju temporanju fuq il-ħlasijiet lura tad-dejn għall-pajjiżi fil-fażi tal-iżvilupp l-aktar dgħajfa bħala l-ewwel pass fid-direzzjoni t-tajba; itenni t-talba tiegħu lill-kredituri privati biex jipparteċipaw fl-inizjattiva fuq termini kumparabbli, u jħeġġeġ lill-G20, lill-Fond Monetarju Internazzjoni (FMI) u lill-Bank Dinji, kif ukoll lill-banek tal-iżvilupp multilaterali, biex jaħdmu aktar fuq il-ħelsien mid-dejn u jesploraw aktar għażliet għas-sospensjoni tal-pagamenti tas-servizz tad-dejn; jappella, b'mod aktar wiesa', għall-ħolqien ta' mekkaniżmu ta' ristrutturazzjoni tad-dejn multilaterali biex jindirizza kemm l-impatt tal-kriżi kif ukoll ir-rekwiżiti ta' finanzjament tal-Aġenda 2030 għall-Iżvilupp Sostenibbli; jisħaq fuq il-ħtieġa li l-miżuri ta' ħelsien mid-dejn jintrabtu ma' mobilizzazzjoni addizzjonali tal-ODA u li jiġi prijoritizzat il-finanzjament ibbażat fuq l-għotjiet bħala l-għażla prestabbilita, speċjalment għal-LDCs;

98. Jenfasizza l-importanza li jingħata appoġġ lill-pajjiżi Afrikani biex iżidu l-kapaċità tagħhom għall-mobilizzazzjoni tar-riżorsi domestiċi sabiex jiżdied l-investiment fis-servizzi pubbliċi bażiċi; ifakkar li l-flussi finanzjarji illeċiti (IFFs) jirrappreżentaw id-doppju tal-ammont tal-ODA li jirċievu l-pajjiżi Afrikani, total ta' madwar USD 50 biljun fis-sena, u għandhom impatt drammatiku fuq l-iżvilupp u l-governanza tal-kontinent; jistieden lill-UE tkompli tappoġġa lis-sħab Afrikani fit-titjib tal-governanza, fil-ġlieda kontra l-korruzzjoni, fiż-żieda tat-trasparenza tas-sistemi finanzjarji u tat-taxxa tagħhom u fl-istabbiliment ta' mekkaniżmi regolatorji u ta' monitoraġġ adegwati;

99. Jirrakkomanda li l-UE u l-UA jimplimentaw u jinfurzaw aħjar l-istrumenti nazzjonali u internazzjonali eżistenti kontra l-korruzzjoni, u jagħmlu użu mit-teknoloġiji l-ġodda u mis-servizzi diġitali; jistieden lill-UE tadotta qafas regolatorju strett dwar il-korruzzjoni;

Sħab għal Patt Ekoloġiku tal-UA-UE

100. Ifakkar li l-pajjiżi Afrikani u l-popolazzjonijiet tagħhom huma partikolarment affettwati mill-impatti negattivi tat-tibdil fil-klima; ifakkar li skont iċ-Ċentru għar-Riċerka dwar l-Epidemjoloġija tad-Diżastri (ĊRED), fl-2019, kważi 16,6 miljun Afrikan ġew affettwati minn avvenimenti estremi tat-temp, 195 % aktar milli fl-2018; jisħaq fuq il-ħtieġa li l-protezzjoni tal-klima u tal-ambjent titqiegħed fil-qalba tas-sħubija f'konformità mal-impenn tal-UE għall-Ftehim ta' Pariġi u l-Konvenzjoni dwar id-Diversità Bijoloġika; ifakkar li talab li 45 % tal-pakkett tal-NDICI futur ikun iddedikat għal dawn l-objettivi;

101. Jesprimi tħassib dwar kif it-tibdil fil-klima jista' jreġġa' lura l-iżvilupp tal-bniedem u jimmina l-prospetti ta' żvilupp ta' pajjiżi Afrikani b'introjtu baxx u fraġli u jisħaq li huwa fattur ta' riskju għad-destabbilizzazzjoni, il-vjolenza u l-kunflitt; jenfasizza li l-UE għandha toffri appoġġ finanzjarju u tekniku konkret, prevedibbli, responsabbli u fit-tul lill-pajjiżi Afrikani biex isaħħu bl-istess mod l-adattament tagħhom għall-klima (jiġifieri permezz ta' proġetti li jiffukaw fuq l-agrikoltura sostenibbli, l-adattament ibbażat fuq l-ekosistemi u l-bliet sostenibbli) u l-istrateġiji ta' mitigazzjoni, b'enfasi speċjali fuq il-prevenzjoni tar-riskju ta' diżastri u fuq il-komunitajiet żvantaġġati;

102. Jissottolinja r-rwol kruċjali tad-diplomazija dwar l-ilma, peress li, bħala riżultat tat-tibdil fil-klima, hemm ir-riskju li l-ilma jsir riżorsa dejjem aktar skarsa; jissottolinja l-ħtieġa għal diplomazija klimatika aktar effettiva sabiex jiġu promossi r-rabtiet bejn il-politika domestika, barranija u internazzjonali dwar il-klima;

103. Jitlob li jingħata appoġġ mill-UE biex il-pajjiżi Afrikani jiġu megħjuna jimplimentaw u jżidu l-ambizzjoni tal-kontributi stabbiliti fil-livell nazzjonali (NDCs) tagħhom fil-kuntest tal-Ftehim ta' Pariġi u tal-Qafas ta' Sendai, filwaqt li jiġi żgurat li jkollhom finanzjament adegwat għall-adattament, il-mitigazzjoni, it-telf u l-ħsara kif ukoll l-istrateġiji u l-pjanijiet ta' azzjoni nazzjonali tagħhom għall-bijodiversità; jisħaq li biex tali appoġġ ikun effettiv, is-sħubija UE-Afrika futura għal tranżizzjoni trid tkun ibbażata fuq il-prinċipji ta' responsabbiltà komuni iżda differenzjata (CBDR) u l-koerenza tal-politika għall-iżvilupp sostenibbli, filwaqt li tiġi żgurata tranżizzjoni ekoloġika li tkun ġusta u inklużiva;

104. Jenfasizza li l-istrateġiji ta' adattament għandhom iħeġġu bidla fil-mudell fil-pajjiżi Afrikani, abbażi ta' soluzzjonijiet ibbażati fuq in-natura; jitlob il-promozzjoni tal-parteċipazzjoni inklużiva tal-partijiet interessati fl-iżvilupp u l-implimentazzjoni tal-NDCs, il-pjanijiet nazzjonali ta' adattament u l-pjanijiet nazzjonali ta' investiment agrikolu, fost oħrajn;

105. Jenfasizza l-perspettiva u l-ħtiġijiet uniċi tal-Istati Gżejjer Żgħar li qed Jiżviluppaw (SIDS) fir-rigward tal-adattament u l-mitigazzjoni tal-klima;

106. Jenfasizza, barra minn hekk, il-ħtieġa li tiġi inkluża dimensjoni tal-ġeneru fl-azzjoni klimatika, minħabba l-konsegwenzi partikolari tat-tibdil fil-klima u d-degradazzjoni ambjentali għan-nisa u l-bniet; jistieden lis-sħab Afrikani u Ewropej biex fis-sħubija UE-Afrika futura jenfasizzaw aħjar ir-rwol li n-nisa jista' jkollhom fit-tmexxija tal-komunitajiet tagħhom lejn prattiki aktar sostenibbli u l-parteċipazzjoni fit-teħid ta' deċiżjonijiet dwar l-adattament u l-mitigazzjoni tat-tibdil fil-klima;

107. Jitlob li tiġi implimentata malajr "diplomazija tal-Patt Ekoloġiku" billi titwaqqaf task force li tiffoka fuq id-dimensjoni esterna tal-Patt Ekoloġiku Ewropew, li għandha tagħmel rakkomandazzjonijiet għal Patt Ekoloġiku tal-UA-UE billi tinvolvi lill-awtoritajiet lokali u lill-organizzazzjonijiet tas-soċjetà ċivili, b'approċċ li jinvolvi diversi livelli u diversi partijiet interessati; iqis li dan il-patt għandu jappoġġa b'mod partikolari l-adozzjoni ta' oqfsa regolatorji li jippermettu t-tranżizzjoni lejn ekonomija ekoloġika, l-iżvilupp ta' ekonomija ċirkolari u l-ħolqien ta' impjiegi f'setturi sostenibbli;

108. Jenfasizza l-importanza tal-kooperazzjoni reġjonali u l-kooperazzjoni permezz ta' assistenza teknika, skambju ta' informazzjoni u prattiki tajba; jinsisti fuq l-importanza li jiġu kkomunikati aħjar ir-riskji futuri tal-klima u tad-diżastri u li jitrawwem it-trasferiment legali ta' teknoloġiji li ma jagħmlux ħsara lill-klima; jitlob lill-UE, għal dan il-għan, tippromwovi l-adozzjoni ta' dikjarazzjoni dwar id-drittijiet tal-proprjetà intellettwali u t-tibdil fil-klima, komparabbli mad-Dikjarazzjoni ta' Doha tal-2001 dwar il-Ftehim TRIPS u s-Saħħa Pubblika;

109. Jissottolinja l-ħtieġa għal politiki u proġetti ta' innovazzjoni sostenibbli li jippermettu lill-istati Afrikani "jaqbżu" teknoloġiji eqdem u li jniġġsu aktar bl-għan speċifiku ta' sostenibbiltà ekoloġika u soċjali, u jitlob, f'dan ir-rigward, li ssir investigazzjoni dwar kif il-qabża tista' tikkontribwixxi għal dawn l-għanijiet fl-istati Afrikani;

110. Ifakkar li l-Afrika tospita diversità eċċezzjonali; jesprimi t-tħassib serju tiegħu dwar l-isfruttament żejjed tar-riżorsi naturali u l-impatt tat-tnaqqis tal-bijodiversità fuq il-livelli ta' reżiljenza; jinsab partikolarment allarmat dwar il-fatt li r-rata tad-deforestazzjoni fl-Afrika qed tiżdied; jirrimarka li l-qerda tal-foresti tropikali Afrikani twassal għal telf irriversibbli tal-bijodiversità u tal-bjar ta' karbonju, kif ukoll tad-djar u l-modi ta' għajxien ta' komunitajiet indiġeni li jgħixu fil-foresti; ifakkar li l-foresti jikkontribwixxu b'mod sinifikanti biex jintlaħqu l-miri klimatiċi, jipproteġu l-bijodiversità u jipprevjenu d-deżertifikazzjoni u l-erożjoni estrema tal-ħamrija;

111. Jitlob li titqies ir-rabta bejn is-saħħa pubblika u l-bijodiversità f'konformità mal-approċċ "saħħa waħda"; jilqa' t-tħabbir tal-inizjattiva NaturAfrika, li għandha l-għan li tipproteġi l-organiżmi selvaġġi u l-ekosistemi, u r-rieżami tal-pjan ta' azzjoni kontra t-traffikar ta' organiżmi selvaġġi; jisħaq li l-inizjattiva NaturAfrika għandha tiġi żviluppata f'konsultazzjoni mal-partijiet interessati kollha, b'attenzjoni partikolari għad-drittijiet tal-komunitajiet lokali, tal-popli indiġeni u tan-nisa; jissottolinja li għandha tappoġġa lill-gvernijiet Afrikani u lill-popolazzjonijiet lokali biex jindirizzaw il-kawżi ewlenin tat-telf tal-bijodiversità u d-degradazzjoni ambjentali b'mod olistiku u sistematiku, inkluż billi toffri appoġġ lil networks ta' żoni protetti ġestiti tajjeb; iħeġġeġ lill-UE u lill-Afrika jirrikonoxxu u jipproteġu d-drittijiet tal-popli indiġeni għas-sjieda u l-kontroll konswetudinarji tal-artijiet u r-riżorsi naturali tagħhom, kif stabbilit fid-Dikjarazzjoni tan-NU dwar id-Drittijiet tal-Popli Indiġeni u l-Konvenzjoni 169 tal-Organizzazzjoni Internazzjonali tax-Xogħol, u jikkonformaw mal-prinċipju ta' kunsens liberu, minn qabel u infurmat;

112. Jappella għall-allokazzjoni ta' riżorsi adegwati biex jiġu implimentati r-rakkomandazzjonijiet tal-istudji tal-Kummissjoni tal-2015 bit-titlu "Larger than elephants: Inputs for an EU strategic approach to wildlife conservation in Africa" (Lil hinn mill-iljunfanti: Inputs għal approċċ strateġiku tal-UE għall-konservazzjoni tal-organiżmi selvaġġi fl-Afrika" u tal-2019 bit-titlu "Study on the interaction between security and wildlife conservation in sub-Saharan Africa" (Studju dwar l-interazzjoni bejn is-sigurtà u l-konservazzjoni tal-organiżmi selvaġġi fl-Afrika sub-Saħarjana);

113. Iqis li l-isforzi ta' konservazzjoni ffukati, pereżempju, fuq il-foresti, l-organiżmi selvaġġi u l-ekosistemi tal-baħar u kostali jeħtieġ li jiġu intensifikati billi jsir użu minn oqfsa regolatorji, riżorsi suffiċjenti u data xjentifika u jkunu akkumpanjati minn azzjonijiet ta' restawr u ġestjoni tal-ekosistemi; iħeġġeġ lill-UE u lill-Afrika jkollhom rwol ewlieni fil-konklużjoni ta' ftehim dinji ambizzjuż fil-ħmistax-il Konferenza tal-Partijiet għall-Konvenzjoni dwar id-Diversità Bijoloġika;

114. Ifakkar li l-oċeani huma l-akbar sors globali ta' proteini; ifakkar fl-importanza li ssir ħidma favur governanza aħjar tal-oċeani, inkluż fir-rigward tal-iżvilupp tas-sajd u l-akkwakultura sostenibbli u ekonomija blu, li huma vetturi tal-iżvilupp; jenfasizza li l-azzjoni kontra s-sajd illegali, mhux irrappurtat u mhux irregolat trid tkun prijorità sabiex jiġu limitati l-impatti ambjentali u tiġi ppreservata s-sostenibbiltà tal-istokkijiet tal-ħut u d-dħul mis-sajd;

115. Jistieden lill-Kummissjoni biex b'mod espliċitu timmonitorja l-attivitajiet relatati mas-sajd industrijali peress li dawn jistgħu jkunu ta' theddida għall-istokkijiet disponibbli għall-popolazzjonijiet lokali li jużaw riżorsi tas-sajd tradizzjonali, filwaqt li jirriskjaw ukoll li joħolqu żbilanċ fl-istatus ekoloġiku tajjeb tal-istokkijiet tas-sajd;

116. Ifakkar li l-Afrika hija l-inqas reġjun elettrifikat fid-dinja u jenfasizza l-fatt li l-aċċess għall-enerġija mhuwiex uniformi fil-kontinent Afrikan; jinnota li l-aċċess għal enerġija għall-but ta' kulħadd, affidabbli, sostenibbli u moderna huwa għodda essenzjali għall-iżvilupp ekonomiku u soċjali, inkluż fiż-żoni rurali; jitlob li jiġi żviluppat il-potenzjal tal-Afrika għall-produzzjoni tal-enerġija rinnovabbli;

117. Iħeġġeġ, għaldaqstant, lill-UE u lill-Istati Membri jippromwovu u jsaħħu l-kooperazzjoni mas-sħab Afrikani tagħhom fis-setturi tal-enerġija u tal-klima f'konformità mal-objettivi tal-Patt Ekoloġiku; iħeġġeġ lill-Kummissjoni toħroġ bi pjan ambizzjuż għall-implimentazzjoni ta' sħubija tal-enerġija sostenibbli, u jinnota għal dan il-għan li l-enerġija rinnovabbli u l-effiċjenza enerġetika huma elementi kruċjali biex jitnaqqas id-distakk fl-aċċess għall-enerġija fil-kontinent Afrikan, filwaqt li jiġi żgurat it-tnaqqis meħtieġ fl-emissjonijiet tad-diossidu tal-karbonju; jistieden lill-UE u lill-pajjiżi Afrikani rispettivi jisfruttaw il-possibbiltajiet għal sħubijiet tal-enerġija ta' benefiċċju reċiproku għall-produzzjoni tal-idroġenu bl-użu ta' sorsi ta' enerġija rinnovabbli;

118. Jisħaq fuq l-importanza li l-investiment jiġi dirett lejn ekonomija ħielsa mill-karbonju billi jiġu żviluppati sorsi ta' enerġija rinnovabbli u jiġi ffaċilitat it-trasferiment tat-teknoloġija, inkluża l-produzzjoni deċentralizzata tal-enerġija, l-enerġija rinnovabbli fuq skala żgħira u t-teknoloġiji tal-enerġija solari li jissodisfaw id-domanda lokali għall-enerġija, inkluż fir-rigward tal-infrastruttura u l-konnettività;

119. Jisħaq li l-urbanizzazzjoni tal-kontinent Afrikan tikkostitwixxi opportunità biex l-ippjanar urban jiġi kkunsidrat mill-ġdid u jiġu introdotti soluzzjonijiet sostenibbli għall-bliet, u li dan għandu jkun is-suġġett ta' djalogu aktar intensiv mal-awtoritajiet lokali u reġjonali u ta' kooperazzjoni u skambju tal-aħjar prattiki bejn iż-żewġ kontinenti, b'mod partikolari fir-rigward tal-infrastruttura ekoloġika, l-approċċi bbażati fuq l-ekosistema, il-ġestjoni tal-iskart u s-sistemi tas-sanità, u bi sforzi partikolari biex jiġu involuti ż-żgħażagħ u l-gruppi marġinalizzati; jitlob appoġġ għall-iżvilupp ta' trasport urban sostenibbli mmirat lejn inklużjoni u aċċessibbiltà akbar tal-komunità, inkluż it-trasport lejn l-iskejjel u ċ-ċentri mediċi;

Sħab għal agrikoltura sostenibbli u reżiljenti

120. Jirrimarka l-importanza ċentrali tas-settur agrikolu u dak alimentari fl-ekonomija u biex jipprovdu opportunitajiet ta' impjieg deċenti u sostenibbli f'żoni rurali; jissottolinja li f'ħafna każijiet dan jirrigwarda azjendi żgħar u azjendi agrikoli tal-familja; jinnota l-importanza li jkunu promossi u msaħħa miżuri u għodda li jappoġġaw il-kwalità miżjuda tal-prodott, id-diversifikazzjoni tal-prodotti, il-modernizzazzjoni sostenibbli tal-prattiki agrikoli, il-kundizzjonijiet sikuri tax-xogħol u l-miżuri li jsaħħu r-reżiljenza tal-bdiewa; iqis li l-iżvilupp ta' settur agrikolu sostenibbli u ta' żoni rurali għandu jkun fiċ-ċentru tar-relazzjonijiet bejn l-UE u l-Afrika;

121. Jilqa' l-fatt li s-sħubija UE-Afrika tirrakkomanda l-iżvilupp ta' prattiki agrikoli favur l-ambjent; ifakkar fil-fatt li l-kapaċità tal-agroekoloġija li tirrikonċilja d-dimensjonijiet ekonomiċi, ambjentali u soċjali tas-sostenibbiltà ġiet rikonoxxuta fir-rapporti storiċi mill-IPCC u l-IPBES, kif ukoll mill-Bank Dinji u l-valutazzjoni internazzjonali agrikola mmexxija mill-FAO (IAASTD); jisħaq fuq l-importanza li jiġu promossi l-agroekoloġija, l-agroforestrija, il-produzzjoni lokali u s-sistemi tal-ikel sostenibbli li jiffukaw fuq l-iżvilupp ta' ktajjen tal-provvista qosra kemm fil-politiki nazzjonali kif ukoll fil-fora internazzjonali, sabiex tiġi żgurata s-sigurtà alimentari u nutrizzjonali għal kulħadd filwaqt li tiżdied il-produttività sostenibbli tas-settur agrikolu u r-reżiljenza tiegħu għat-tibdil fil-klima;

122. Jappella lill-UE tqis il-konklużjonijiet tat-Task Force għall-Afrika Rurali dwar il-ħtieġa ta' investiment fil-ktajjen alimentari Afrikani, b'enfasi fuq il-prodotti bażiċi b'valur miżjud; u jistieden lill-UE u lill-Istati Membri jaħdmu flimkien b'mod attiv mas-sħab Afrikani biex joħolqu sinerġiji bejn l-istrateġija UE-Afrika u l-politiki tal-Patt Ekoloġiku, b'mod partikolari d-dimensjoni esterna tal-istrateġija "mill-għalqa sal-platt";

123. Jissottolinja l-fatt li l-użu tal-pestiċidi fl-agrikoltura intensiva fl-Afrika jista' jkollu impatt fuq is-saħħa tal-ħaddiema li ftit għandhom aċċess għal taħriġ dwar il-protezzjoni tal-pjanti u l-kura tas-saħħa, apparti li jikkawża ħsara ambjentali; jitlob li jkun hemm edukazzjoni u taħriġ f'approċċi sostenibbli għall-protezzjoni tal-pjanti u alternattivi għall-pestiċidi kif ukoll il-minimizzazzjoni tal-esponiment għal sustanzi perikolużi; jiddenunzja l-istandards doppji applikati mill-UE fir-rigward tal-pestiċidi meta tiġi permessa l-esportazzjoni ta' sustanzi perikolużi li huma pprojbiti fl-UE lejn pajjiżi Afrikani u pajjiżi terzi oħra; jitlob, għalhekk, li jiġu modifikati r-regoli attwali tal-UE sabiex tiġi eliminata din l-inkonsistenza legali, f'konformità mal-Konvenzjoni ta' Rotterdam tal-1998 u mal-Patt Ekoloġiku;

124. Jinsab ferm imħasseb dwar id-dipendenza għolja tal-istati Afrikani fuq l-importazzjonijiet tal-ikel, speċjalment mill-Unjoni Ewropea, partikolarment meta dawn l-importazzjonijiet huma magħmula minn prodotti sussidjati li l-prezz baxx tagħhom jirrappreżenta kompetizzjoni dannuża għall-agrikoltura fuq skala żgħira fl-Afrika;

125. Jinsab imħasseb dwar l-esportazzjoni Ewropea tat-trab tal-ħalib appoġġata mill-Politika Agrikola Komuni lejn l-Afrika tal-Punent, b'kunsiderazzjoni tal-fatt li t-triplikar tal-esportazzjonijiet minn mindu l-UE neħħiet il-kwoti tagħha tal-ħalib fl-2015 kellu konsegwenzi diżastrużi fuq ir-rgħajja u l-bdiewa, li ma jistgħux jikkompetu; jistieden lill-Kummissjoni taħdem fuq soluzzjonijiet mal-gvernijiet u l-partijiet interessati Afrikani;

126 Ifakkar li l-ġuħ u l-insigurtà tal-ikel qed jerġgħu jiżdiedu madwar id-dinja u li se jkomplu jiżdiedu sakemm ma titteħidx azzjoni fil-pront, u li l-Afrika tinsab lura sew biex tilħaq il-mira ta' ġuħ żero (SDG 2) fl-2030; ifakkar li t-tmiem tal-malnutrizzjoni fil-forom kollha tagħha u l-SDG 2 għandhom jitqiesu bħala prijoritajiet fis-sħubija l-ġdida, b'attenzjoni partikolari għall-persuni fl-aktar sitwazzjonijiet vulnerabbli;

127 Jisħaq li l-COVID-19 u l-kriżi ekonomika li tirriżulta u l-għeluq tal-fruntieri, l-infestazzjonijiet tal-ġrad u d-deżertifikazzjoni ddeterjoraw is-sitwazzjoni diġà diffiċli tas-sigurtà tal-ikel fl-Afrika u jitfgħu dawl fuq il-vulnerabbiltajiet tas-sistema globali tal-ikel; jisħaq fuq il-potenzjal tas-swieq lokali u reġjonali biex jindirizzaw il-fallimenti attwali tas-sistema tal-ikel;

128. Jappella lis-sħubija UE-Afrika tiffoka l-isforzi tagħha fil-qasam tal-agrikoltura fuq is-salvagwardja tad-dritt tal-pajjiżi Afrikani għas-sovranità tal-ikel u fuq iż-żieda tas-sigurtà tal-ikel tagħhom bħala prijorità, kif ukoll fuq it-tisħiħ tal-kapaċità tagħhom li jissodisfaw ir-rekwiżiti nutrittivi tal-popolazzjonijiet tagħhom;

129. Jenfasizza l-importanza tat-trasformazzjoni rurali u t-tisħiħ tal-ktajjen tal-valur lokali, reġjonali u trasparenti sabiex jinħolqu impjiegi sostenibbli, jiġi evitat il-ksur tad-drittijiet tal-bniedem u jittaffa t-tibdil fil-klima; jisħaq fuq il-ħtieġa li jiġu appoġġati ż-żgħażagħ u n-nisa, b'mod partikolari permezz tat-taħriġ, l-aċċess għall-kreditu u l-aċċess għas-swieq; jitlob l-involviment tagħhom fil-formulazzjoni ta' politiki agrikoli u għal appoġġ għal azzjoni kollettiva permezz ta' organizzazzjonijiet tal-produtturi żgħar;

130. Jenfasizza r-rwol essenzjali tan-nisa rurali Afrikani fl-ekonomiji agrikoli u rurali madwar il-kontinent Afrikan, b'mod partikolari fir-rigward tas-sigurtà tal-ikel; ifakkar li kważi nofs ix-xogħol agrikolu fl-Afrika jsir min-nisa, filwaqt li l-bdiewa nisa huma fil-biċċa l-kbira bdiewa żgħar jew ta' sussistenza li m'għandhomx l-aċċess meħtieġ għall-informazzjoni, il-kreditu, l-art, ir-riżorsi jew it-teknoloġija; jinkoraġġixxi l-avvanz tad-drittijiet tal-wirt għan-nisa u l-bniet u jistieden lill-UE tappoġġa lill-pajjiżi sħab, b'mod partikolari fir-rigward tar-rikonoxximent tagħhom tad-dritt sħiħ tan-nisa għad-drittijiet tal-art;

131. Jisħaq fuq il-fatt li n-nisa li jaħdmu fl-agrikoltura ta' sussistenza jħabbtu wiċċhom ma' aktar diffikultajiet biex iżommu s-sovranità tal-ikel minħabba l-protezzjoni qawwija tal-varjetajiet il-ġodda tal-pjanti min-naħa tal-Konvenzjoni Internazzjonali għall-Protezzjoni ta' Varjetajiet Ġodda ta' Pjanti (UPOV) fil-ftehimiet kummerċjali;

132. Jenfasizza l-importanza tal-appoġġ tal-azjendi agrikoli żgħar, tal-pastoraliżmu u ta' sistemi tradizzjonali/lokali oħra tal-ikel sabiex isaħħu r-reżiljenza tagħhom u jagħtu spinta lill-kontribut tagħhom għas-sigurtà tal-ikel, il-ġestjoni sostenibbli tar-riżorsi u l-konservazzjoni tal-bijodiversità;

133. Jitlob li jiġu indirizzati t-tensjonijiet soċjali bejn il-popolazzjonijiet agrikoli stabbiliti u l-komunitajiet pastorali nomadiċi, speċjalment f'reġjuni b'kunflitti etnoreliġjużi li jikkoinċidu;

 

134. Jissottolinja l-importanza li għandhom ir-riċerka u l-innovazzjoni biex jiġu mħeġġa prattiki agrikoli sostenibbli u agroekosistemi produttivi ta' art niexfa u sistemi tal-ikel; jappella, f'dan ir-rigward biex it-tranżizzjoni ġusta tinkludi dipendenza akbar fuq il-kontributi tal-għarfien tradizzjonali Afrikan, speċjalment rigward il-prattiki agrikoli, is-sajd u l-protezzjoni tal-foresti, u b'hekk tingħata s-setgħa lill-poplu Afrikan u lill-komunitajiet lokali;

135. Jinkoraġġixxi l-iskambji ta' għarfien u tal-aħjar prattiki bejn il-bdiewa Ewropej u Afrikani u, b'mod partikolari, il-kuntatti bejn il-bdiewa żgħażagħ, in-nisa u r-rappreżentanti tal-komunitajiet rurali dwar il-metodi ta' produzzjoni sostenibbli u l-protezzjoni tal-bijodiversità, anke fil-qafas tal-assoċjazzjonijiet;

136. Jilqa' l-proposta tat-Task Force għall-Afrika Rurali għall-istabbiliment ta' programm ta' ġemellaġġ bejn l-Ewropa u l-Afrika li jgħaqqad flimkien il-korpi agrikoli tal-Istati Membri tal-UE mal-pajjiżi sħab fl-Afrika, bil-għan li jiġu kondiviżi l-aħjar prattiki u jitrawmu relazzjonijiet bejn sħab simili u b'parteċipazzjoni qawwija;

137 Jisħaq fuq l-importanza li l-protezzjoni u l-promozzjoni tad-dritt tal-komunitajiet lokali li jaċċessaw u jikkontrollaw ir-riżorsi naturali bħall-art u l-ilma, jiġu inklużi fis-sħubija UE-Afrika; jiddeplora l-fatt li l-ħtif tal-art huwa komuni immens fl-Afrika; jirrimarka li din hija prattika brutali li ddgħajjef is-sovranità tal-ikel u tipperikola l-komunitajiet rurali Afrikani; jisħaq fuq l-importanza li jitnieda proċess inklużiv li jkollu l-għan li jiggarantixxi l-parteċipazzjoni effettiva tal-organizzazzjonijiet tas-soċjetà ċivili u tal-komunitajiet lokali fl-iżvilupp, l-implimentazzjoni u l-monitoraġġ tal-politiki u l-azzjonijiet relatati mal-ħtif tal-art; jitlob li l-proġetti kollha li jippromwovu l-protezzjoni tad-drittijiet tal-art, inkluż il-kummerċ, jirrispettaw il-Linji Gwida Volontarji dwar il-Governanza Responsabbli tal-Pussess tal-Art (VGGT), u li jiġu inklużi miżuri li jiżguraw li l-proġetti ma jipperikolawx id-drittijiet tal-art tal-bdiewa fuq skala żgħira;

138. Jiddispjaċih għan-nuqqas ta' rikonoxximent tal-importanza strateġika tal-mergħat, li jkopru madwar 43 % tas-superfiċje tal-art Afrikana u għaldaqstant huma bjar tal-karbonju importanti; jistieden lill-Kummissjoni, flimkien mal-komunitajiet lokali u l-partijiet interessati lokali, tiżviluppa strateġija biex dan il-potenzjal jiġi ottimizzat permezz tal-ġestjoni sostenibbli tar-ragħa bħal ma jiġi pprattikat mir-rgħajja;

139. Jinnota, pereżempju, li d-drittijiet għall-mergħat u l-mergħat komunitarji huma drittijiet tal-użu tal-art tradizzjonali bbażati fuq id-dritt komuni u mhux fuq drittijiet titolizzati tas-sjieda; jenfasizza, madankollu, l-importanza fundamentali tal-protezzjoni ta' dawn id-drittijiet komuni għall-popolazzjonijiet rurali;

Sħab biex id-diġitalizzazzjoni tkun ta' lieva għall-inklużjoni u l-iżvilupp

140. Jisħaq fuq il-fatt li t-trasformazzjoni diġitali tirrappreżenta lieva ta' żvilupp tremenda għall-aċċess għall-edukazzjoni, it-taħriġ, l-impjiegi u s-saħħa, kif ukoll għall-modernizzazzjoni tas-settur agrikolu, il-kapaċità tas-settur pubbliku li jipprovdi servizzi diġitali bħall-identifikazzjoni elettronika (eID), is-saħħa elettronika (eHealth) jew il-Gvern elettroniku (eGovernment), u l-parteċipazzjoni fit-teħid ta' deċiżjonijiet politiċi, id-drittijiet tal-bniedem u l-libertà tal-espressjoni, iżdatista' ġġib magħha wkoll ir-riskju li ddgħajjef id-demokrazija, tipperikola d-drittijiet ċivili u tal-bniedem u żżid l-inugwaljanzi; jisħaq fuq il-fatt li t-trasformazzjoni diġitali trid tappoġġa aċċess għall-but ta' kulħadd, ugwali u inklużiv għall-internet kif ukoll l-użu u l-ħolqien ta' servizzi tat-teknoloġija diġitali li jaderixxu mal-istandards u l-linji gwida internazzjonali u nazzjonali rilevanti;

141. Jenfasizza li d-distakk diġitali għandu jitqies u jingħata kunsiderazzjoni xierqa; jissottolinja l-ħtieġa li tingħata prijorità lill-aċċess għall-konnettività tal-internet għall-maġġoranza tal-komunitajiet Afrikani emarġinati bil-għan li jiġi evitat li jitfaċċa distakk enormi bejn il-popolazzjonijiet rurali u urbani; iqis li jeħtieġ li jitnaqqas id-distakk diġitali bejn il-ġeneri bil-għan li titmexxa 'l quddiem trasformazzjoni diġitali tassew inklużiva; jinkoraġġixxi lin-nisa u l-bniet jiżviluppaw il-potenzjal tagħhom fir-rigward ta' teknoloġija ġdida;

142. Ifakkar fl-impatt negattiv li l-vjolenza online kontra n-nisa u l-bniet u d-diskors ta' mibegħda sessista, il-bullying ċibernetiku, il-ksenofobija, id-diżinformazzjoni u l-istigmatizzazzjoni jista' jkollhom fuq l-inklużjoni soċjali u jistieden lis-sħab Afrikani u Ewropej jindirizzaw kwistjonijiet simili fis-sħubija UE-Afrika; jisħaq li jeħtieġ jiġi żgurat li l-edukazzjoni u l-litteriżmu diġitali jkunu olistiċi, jinkludu ħiliet personali u trasversali bħall-ħsieb kritiku u l-fehim interkulturali;

143. Jisħaq fuq il-fatt li l-ġenerazzjoni ta' skart elettroniku madwar id-dinja toħloq sfidi għall-implimentazzjoni tal-Aġenda 2030, b'mod partikolari fir-rigward tas-saħħa u l-ambjent; jistieden lill-UE u lill-Afrika jżidu l-isforzi tagħhom biex jiżviluppaw investiment responsabbli, sabiex jgħinu jimminimizzaw il-produzzjoni tal-iskart elettroniku, jipprevjenu r-rimi illegali u t-trattament mhux xieraq tal-iskart elettroniku, jippromwovu l-użu effiċjenti tar-riżorsi u r-riċiklaġġ, u joħolqu impjiegi fis-setturi tar-rinnovament u r-riċiklaġġ;

144. Jappoġġa d-diġitalizzazzjoni u l-modernizzazzjoni tal-amministrazzjoni pubblika tapajjiżi Afrikani, b'mod partikolari bil-għan li jiġu żviluppati reġistri tal-istati ċivili affidabbli, dokumenti tal-identità sikuri, u li jiġu promossi l-iskambji ta' data; jisħaq fuq il-fatt li d-data kollha skambjata trid tkun suġġetta għal-liġijiet rilevanti fil-qasam tal-protezzjoni tad-data u tal-privatezza; jistieden lill-UE taħdem id f'id man-nazzjonijiet Afrikani sabiex taħdem favur standards globali fil-qasam tal-protezzjoni tad-data li, min-naħa tagħhom, se jgħinu biex jiġu indirizzati l-kriminalità u t-tisħiħ tal-ekonomiji reċiproċi;

145. Jenfasizza li l-innovazzjoni hija meħtieġa biex jintlaħqu l-Għanijiet ta' Żvilupp Sostenibbli u t-tranżizzjoni ekoloġika; jisħaq fuq il-fatt li s-sħubija għandha tippromwovi r-riċerka u l-innovazzjoni kif ukoll l-aċċessibilità għas-servizzi diġitali u l-użu tagħhom sabiex jitrawmu l-koeżjoni u l-inklużjoni soċjali; ifakkar, madankollu, li t-tranżizzjoni diġitali ma tistax isseħħ mingħajr aċċess għall-enerġija u li l-provvisti tal-enerġija irregolari fiż-żoni rurali jikkostitwixxu ostaklu sinifikanti għall-aċċess għas-servizzi diġitali;

146. Jisħaq fuq il-fatt li l-kriżi tal-COVID-19 ġiegħlet l-aċċelerazzjoni tat-trasformazzjoni diġitali fl-Afrika; jilqa' r-rieda tal-UA li tistabbilixxi suq uniku diġitali; jistieden lill-UE tappoġġa l-istabbiliment ta' industrija diġitali Afrikana u ta' qafas regolatorju xieraq għall-iżvilupp tal-kummerċ online u l-protezzjoni tad-data abbażi tal-ogħla standards eżistenti billi tipprovdi assistenza teknika, tagħti spinta lill-investiment fl-infrastrutturi diġitali u l-intraprenditorija, u ssaħħaħ is-sħubijiet mal-partijiet interessati governattivi, ekonomiċi, akkademiċi, xjentifiċi u tas-soċjetà ċivili;

147. Jenfasizza li skont ir-Rapport tan-NU dwar l-Għanijiet ta' Żvilupp Sostenibbli (2019), għad iridu jiġu indirizzati bosta sfidi biex jintlaħqu l-SDGs, b'mod partikolari fl-Afrika, f'termini ta' aċċess għall-ikel, l-enerġija, l-ilma u s-sanità, l-edukazzjoni u s-saħħa; jemmen li l-assistenza finanzjarja u l-investiment għandhom jimmiraw primarjament lejn is-sodisfar ta' dawk il-ħtiġijiet bażiċi tal-bniedem, li jibqgħu prerekwiżit għall-qerda tal-faqar u l-avvanzi fil-benessri tal-bniedem, speċjalment fi żmien meta r-riżorsi pubbliċi qed isiru dejjem aktar limitati minħabba żieda fit-talbiet kompetittivi, bħas-saħħa u l-edukazzjoni;

148. Jisħaq fuq il-fatt li l-ġbir ta' data diżaggregata preċiża u komparabbli u l-analiżi statistika, filwaqt li jirrispettaw il-protezzjoni tad-data u d-drittijiet tal-privatezza, huma fundamentali għat-teħid ta' deċiżjonijiet infurmati, b'mod partikolari fl-oqsma tal-agrikoltura, il-ġestjoni tar-riżorsi naturali u l-governanza u s-saħħa fil-livelli nazzjonali u deċentralizzati;

149. Jisħaq li jeħtieġ li jittieħed vantaġġ mit-trasformazzjoni diġitali bħala mezz biex jiġu promossi l-iskambji bejn iż-żewġ kontinenti, b'mod partikolari bejn iż-żgħażagħ u s-soċjetà ċivili, permezz tal-pjattaformi;

150. Jistieden lill-UE u lill-pajjiżi Afrikani jżidu l-isforzi konġunti tagħhom biex jiżguraw li l-ekonomija diġitali tkun soċjalment u ambjentalment sostenibbli u jikkontribwixxu għall-objettiv li jiġi stabbilit standard ta' tassazzjoni modern, ġust u effiċjenti għall-ekonomija diġitali;

Sħab għal mobbiltà u migrazzjoni ta' benefiċċju reċiproku

151. Jirrikonoxxi l-isfidi u l-opportunitajiet kumplessi li l-movimenti tal-migrazzjoni għandhom kemm fl-Ewropa kif ukoll fl-Afrika għall-prosperità u l-iżvilupp taż-żewġ kontinenti u jisħaq li jeħtieġ tissaħħaħ il-kooperazzjoni f'dan il-qasam; jinnota li, f'dawn l-aħħar snin, il-kwistjoni tal-migrazzjoni ddominat ir-relazzjoni UE-Afrika u li dan il-fatt seta' kellu effett ta' ħsara fuq il-perċezzjonijiet reċiproċi taż-żewġ kontinenti; jisħaq fuq il-fatt li l-migrazzjoni tikkostitwixxi strument ta' żvilupp sostenibbli reċiproku għaż-żewġ reġjuni;

152. Ifakkar li sa 80 % tal-migranti internazzjonali kollha li joriġinaw mill-pajjiżi Afrikani qed jiċċaqilqu fil-kontinent Afrikan; jinnota li l-pajjiżi Afrikani jospitaw fihom sehem kbir mit-total ta' rifuġjati u tal-persuni spostati internament (IDPs) tad-dinja, u li s-sitwazzjoni vulnerabbli tagħhom kompliet tiġi aggravata mill-kriżi tal-COVID-19; jappella biex ir-responsabbiltà globali għar-rifuġjati tkun waħda kondiviża;

153. Iqis li d-dimensjoni umana tal-migrazzjoni għandha tiġi enfasizzata u għandha tingħata attenzjoni partikolari lill-gruppi ta' migranti l-aktar żvantaġġati; jitlob li tiġi adottata sħubija UE-Afrika dwar il-migrazzjoni u l-mobilità li tkun iċċentrata fuq id-dinjità tal-bniedem tar-rifuġjati u l-migranti, li tkun ibbażata fuq il-prinċipji tas-solidarjetà, ir-responsabbiltà kondiviża u r-rispett sħiħ għad-drittijiet tal-bniedem, id-dritt internazzjonali, tal-UE u nazzjonali u l-liġi dwar ir-rifuġjati;

154. Ifakkar li għandhom jittieħdu azzjonijiet speċifiċi biex il-migranti jiġu protetti mill-mewt, l-għajbien u s-separazzjoni tal-familja u biex jiġi evitat il-ksur ta' drittijiethom, inklużi azzjonijiet immirati lejn iż-żamma tal-prinċipju ta' non-refoulement u tal-aħjar interessi tat-tfal;

155. Jissottolinja l-ħtieġa li jiġu indirizzati bl-użu ta' finanzjament adegwat il-kawżi fundamentali tal-migrazzjoni irregolari u l-ispostamenti furzati, bħall-instabbiltà politika, il-faqar, in-nuqqas ta' sigurtà u s-sigurtà tal-ikel, il-vjolenza u l-effetti negattivi tat-tibdil fil-klima;

156. Iqis li s-suċċess tas-sħubija se jiddependi fuq titjib sinifikanti fl-opportunitajiet ta' mobilità bejn id-diversi komponenti tas-soċjetajiet Afrikani u Ewropej u li s-sħubija għandha titfassal b'mod sostenibbli biex toħloq "kisba ta' mħuħ" minflok "eżodu ta' mħuħ"; iqis li politika tal-viża aktar effiċjenti u żieda fil-finanzjament għall-programm Erasmus+ jagħtu kontribut utli biex jinkiseb dan;

157. Jisħaq fuq l-importanza li tiġi żviluppata politika tal-migrazzjoni ċirkolari ġenwina li tippermetti lill-ħaddiema b'ħiliet u mingħajr ħiliet biex jibbenefikaw minn skambju ta' għarfien professjonali u mill-mobilità bejn l-UE u l-Afrika, li tiffaċilita r-ritorn ta' persuni fil-pajjiżi ta' oriġini tagħhom; jappoġġa l-għoti ta' prijorità tal-applikazzjonijiet eleġibbli għal permessi tax-xogħol mill-pajjiżi ta' oriġini u ta' tranżitu lejn l-UE (pereżempju, permezz ta' ambaxxati jew online) bil-għan li jiskoraġġixxu lill-migranti milli jirrikorru għal rotot migratorji irregolari, u jtaffu l-piż fuq is-sistemi tal-migrazzjoni u tal-ażil;

158. Ifakkar li l-mobilità tal-ħaddiema tista' tkun waħda mir-risponsi għall-isfidi demografiċi tal-UE u għan-nuqqasijiet u l-ispariġġi tas-suq tax-xogħol; jitlob l-iżvilupp ta' mezzi ta' migrazzjoni sikuri u legali, u l-promozzjoni ta' approċċ aktar armonizzat, komprensiv u fit-tul għall-migrazzjoni relatata max-xogħol fil-livell Ewropew, abbażi ta' approċċ ta' sħubija li jista' jkun ta' benefiċċju fit-tul għaż-żewġ sħab; jenfasizza l-importanza li jissaħħaħ id-Djalogu Afrika-UE dwar il-Migrazzjoni u l-Mobilità (MMD) u s-Sħubija Afrika-UE dwar il-Migrazzjoni, il-Mobbiltà u l-Impjiegi (MME);

159. Jikkundanna b'mod qawwi l-faċilitazzjoni ta' dħul klandestin u t-traffikar ta' bnedmin; jitlob li jissaħħu l-isforzi biex jiġu ttraċċati u miġġielda n-networks kriminali ta' kuntrabandisti u jfittex kooperazzjoni mal-pajjiżi Afrikani fil-ġlieda kontrihom; jitlob, f'dan ir-rigward, sforz komprensiv u multidixxiplinari u l-koordinament fil-livelli kollha, f'kooperazzjoni mal-gvernijiet lokali, inkluża l-kooperazzjoni internazzjonali għall-infurzar tal-liġi; iqis li l-ġlieda kontra l-faċilitaturi u t-traffikanti tal-bnedmin trid issir b'mod konġunt bejn iż-żewġ partijiet, u bl-appoġġ tal-Europol, fost oħrajn;

160. Jitlob li l-UE u n-nazzjonijiet Afrikani jaħdmu flimkien biex joħolqu kampanja ta' informazzjoni effikaċi u wiesgħa rigward ir-riskji u l-perikli tat-traffikar ta' bnedmin u l-faċilitazzjoni ta' immigrazzjoni illegali bil-għan li jipprevjenu lill-individwi milli jipperikolaw ħajjithom biex jidħlu fl-UE b'mod irregolari;

161. Jisħaq li jeħtieġ impenn koerenti tal-UE, li jiżgura li l-kooperazzjoni dwar il-ġlieda kontra l-migrazzjoni irregolari jew dwar il-ġestjoni integrata tal-fruntieri ma jkollha l-ebda impatt negattiv fuq l-oqfsa eżistenti tal-mobilità reġjonali fil-kontinent Afrikan jew fuq id-drittijiet tal-bniedem; ifakkar li jeħtieġ li kwalunkwe sħubija dwar il-Migrazzjoni u l-mobilità trid tqis iż-żewġ patti globali dwar il-Migrazzjoni u r-Rifuġjati (Patt Globali għal Migrazzjoni Sikura, Ordnata u Regolari (GCM), Patt Globali dwar ir-Rifuġjati (GCR));

162. Iqis li l-frammentazzjoni tar-regolamenti nazzjonali dwar il-migrazzjoni tal-ħaddiema fl-UE, kif ukoll il-kumplessità u n-natura burokratika ħafna tal-proċeduri, jiskoraġġixxu l-użu ta' rotot migratorji legali fl-UE; jirrakkomanda l-istabbiliment ta' proċedura ta' applikazzjonijiet armonizzata u mhux burokratika tal-UE fil-qafas tas-Sħubija UE-Afrika;

163. Ifakkar fil-ħtieġa li tiġi stabbilita operazzjoni speċifika u komuni ta' tiftix u salvataġġ ċivili fil-livell Ewropew, sabiex ma jintilfux aktar ħajjiet fuq il-baħar;

164. Jistieden lill-UE tintensifika l-impenji tagħha dwar ir-risistemazzjoni u l-mezzi legali l-oħra għall-persuni fil-bżonn ta' protezzjoni internazzjonali u żżid bl-istess mod l-impenji politiċi u finanzjarji tagħha biex tappoġġa s-sħab Afrikani fl-iżvilupp ta' approċċi sostenibbli għar-rifuġjati, l-IDPs u l-persuni apolidi, b'mod partikolari billi tikkoopera mal-Organizzazzjoni Internazzjonali għall-Migrazzjoni (IOM) u aġenziji oħra tan-NU biex issaħħaħ il-kooperazzjoni għall-iżvilupp u tipprovdi assistenza diretta lill-organizzazzjonijiet umanitarji qrib id-djar li minnhom ikunu ħarbu r-rifuġjati;

165. Jirrakkomanda l-armonizzazzjoni tal-mekkaniżmi reġjonali għall-protezzjoni tal-persuni spostati fil-kuntest tad-diżastri u t-tibdil fil-klima, f'konformità mal-Aġenda għall-Protezzjoni ta' Persuni Spostati Transkonfinalment fil-Kuntest tad-Diżastri u t-Tibdil fil-Klima, il-Pjattaforma dwar l-Ispostament minħabba Diżastri u l-Konvenzjoni ta' Kampala;

166. Jissottolinja li jeħtieġ jiġu ggarantiti proċeduri ġusti u aċċessibbli ta' ażil għal persuni li jeħtieġu protezzjoni internazzjonali kemm fl-Unjoni Ewropea kif ukoll fil-pajjiżi Afrikani u biex jiġi rispettat il-prinċipju ta' non-refoulement bi qbil mad-dritt internazzjonali u tal-UE; jemmen li kwalunkwe ftehim mal-pajjiżi ta' oriġini u ta' tranżitu għandu jiżgura l-protezzjoni sħiħa tal-ħajja tal-bniedem, tad-dinjità u tad-drittijiet tal-bniedem;

167. Jissottolinja l-importanza li jiġu żgurati l-effikaċja, l-ekwità u l-proċess ġust fil-politika dwar ir-ritorn, fil-ħruġ tal-laissez-passers konsulari u fil-konklużjoni ta' ftehimiet ta' riammissjoni, billi tingħata preferenza lir-ritorn volontarju, u jiġi żgurat li d-drittijiet u d-dinjità tal-individwi jkunu protetti u rrispettati bis-sħiħ; jappella għal involviment qawwi min-naħa tal-UE matul il-perjodi ta' qabel ir-ritorn u ta' wara r-ritorn biex tiġi ffaċilitata r-riintegrazzjoni sostenibbli tal-persuni rimpatrijati;

168. Jinkoraġġixxi t-tkomplija tal-kooperazzjoni mal-IOM u aġenziji oħra tan-NU biex jingħata appoġġ addizzjonali lir-rifuġjati u lill-IDPs;

169. Jinnota li fil-mandat ta' negozjar tal-UE għall-Ftehim ta' wara Cotonou, ir-referenzi għall-migrazzjoni mmultiplikaw, b'mod partikolari fir-rigward tat-twaqqif tal-migrazzjoni irregolari, filwaqt li, b'kuntrast, il-mandat ta' negozjar tal-AKP jagħmel enfasi fuq il-qerda tal-faqar, il-promozzjoni tal-migrazzjoni legali, l-importanza tal-flussi ta' rimessi, il-ħtieġa li r-ritorni u r-riammissjoni jkunu volontarji u l-preklużjoni tal-użu tal-għajnuna għall-iżvilupp għan-negozjar ta' kontrolli restrittivi fil-fruntieri; jistieden lill-Kummissjoni tikkkunsidra l-prijoritajiet tal-pajjiżi Afrikani dwar il-migrazzjoni sabiex tinħoloq "sħubija bejn partijiet ugwali" reali;

Sħab għas-sigurtà

170. Jinnota li l-indirizzar ta' kunflitti mtawla jirrikjedi li jittieħdu azzjonijiet konġunti minn atturi umanitarji u tal-iżvilupp u sħab b'leġittimità u kredibbiltà lokali għolja; jistieden, għalhekk, lill-UE trawwem approċċ nexus bejn l-aspett umanitarju u l-iżvilupp fir-rispons tagħha, b'enfasi fuq sjieda lokali b'saħħitha;

171. Jilqa' l-fatt li l-UE tqis il-paċi u s-sigurtà fl-Afrika bħala kundizzjoni ewlenija għall-iżvilupp sostenibbli u li l-Unjoni hija impenjata li "żżid b'mod sinifikanti l-appoġġ tagħha lill-Afrika f'kooperazzjoni mal-komunità internazzjonali"; jikkondividi l-fehma li l-kwistjoni tas-sigurtà fl-Afrika hija ta' importanza kbira għall-iżvilupp tal-kontinent bis-sostenn ta' organizzazzjonijiet reġjonali u internazzjonali, filwaqt li l-istati Afrikani huma l-garanti ewlenin tas-sigurtà tagħhom stess; jistieden, għalhekk, lill-UE tkompli bl-isforzi tagħha biex taħdem f'kooperazzjoni mas-sħab Afrikani tagħha fl-iżvilupp ulterjuri ta' Arkitettura Afrikana għall-Paċi u s-Sigurtà (APSA), biex tikseb paċi u stabbiltà fit-tul u tegħleb il-kriżijiet u l-kunflitti f'dak il-kontinent permezz ta' approċċ integrat li jisfrutta l-għodod kollha disponibbli, inkluż l-appoġġ għall-iżvilupp tal-kapaċitajiet ta' sigurtà u ta' difiża Afrikani u l-operazzjonijiet militari tagħha, il-missjonijiet ċivili, il-bini tal-paċi u l-proġetti ta' demilitarizzazzjoni b'rispett għad-drittijiet tal-bniedem u d-dritt umanitarju internazzjonali u l-indipendenza u s-sovranità tal-pajjiżi Afrikani, u l-appoġġ għal inizjattivi li joriġinaw mill-UA, minn organizzazzjonijiet reġjonali bħall-ECOWAS u l-G5 tas-Saħel; jinkoraġġixxi lill-Istati Membri jipparteċipaw f'missjonijiet u operazzjonijiet tal-UE u jilqa' l-isforzi bilaterali li jikkontribwixxu għall-paċi u l-istabbiltà u jħeġġeġ lill-Kunsill, f'dan ir-rigward, biex japprova malajr il-Faċilità Ewropea għall-Paċi sabiex jipprovdi assistenza aktar komprensiva lis-sħab Afrikani fir-reġjuni milquta mill-kunflitt; jenfasizza l-importanza tal-kooperazzjoni multilaterali fi ħdan it-triangolu UA-UE-NU fil-qasam tas-sigurtà lokali, reġjonali u internazzjonali u r-rwol tal-atturi tas-soċjetà ċivili fl-isforzi għaż-żamma tal-paċi u l-bini tal-paċi; ifakkar, f'dan ir-rigward, li r-riforma tas-settur tas-sigurtà, ir-riforma tal-ġustizzja, il-governanza tajba, ir-responsabbiltà demokratika, u l-protezzjoni taċ-ċivili huma prerekwiżit biex tintrebaħ il-fiduċja tal-popolazzjonijiet fil-gvernijiet u fil-forzi tas-sigurtà tagħhom; jissottolinja, barra minn hekk, in-nexus bejn iċ-ċivil u l-militar u l-ħtieġa li ż-żewġ komponenti tal-missjonijiet tal-Politika ta' Sigurtà u ta' Difiża Komuni (PSDK) jiġu armonizzati aħjar; jappoġġa l-approċċ dejjem aktar proattiv meħud mill-organizzazzjonijiet kooperattivi ta' sigurtà reġjonali lejn l-operazzjonalizzazzjoni sħiħa tal-APSA, li tipprovdi lill-Unjoni Afrikana u lill-organizzazzjonijiet fil-livell reġjonali bl-għodod meħtieġa għall-prevenzjoni, il-ġestjoni u s-soluzzjoni tal-kunflitti; ifaħħar, b'mod partikolari, inizjattivi bħall-G5 tas-Saħel b'kunsiderazzjoni tar-rwol dejjem aktar kruċjali tiegħu fit-teħid ta' azzjoni deċiżiva biex in-nazzjonijiet Afrikani jiżguraw il-paċi u s-sigurtà fil-viċinat tagħhom stess u jistieden lill-Kummissjoni u lill-Istati Membri jżidu l-appoġġ politiku, finanzjarju, operattiv u loġistiku lill-G5 tas-Saħel; jisħaq fuq il-fatt li, sabiex jiġu żgurati livelli xierqa ta' sigurtà u żvilupp, il-pajjiżi Afrikani jrid ikollhom kapaċitajiet adegwati fis-setturi essenzjali kollha, l-aktar importanti fir-rigward tas-sigurtà u d-difiża; jistieden lill-UE tikkoordina l-inizjattivi ta' żvilupp u sigurtà li fihom hija involuta fil-kontinent Afrikan bħala parti minn strateġija integrata li tinkludi l-governanza tajba, id-demokrazija, id-drittijiet tal-bniedem, l-istat tad-dritt u l-ugwaljanza bejn il-ġeneri, b'enfasi partikolari fuq ir-reġjuni fejn il-vulnerabbiltajiet u t-tensjonijiet huma l-ogħla; jilqa' l-kooperazzjoni mwettqa bejn l-UE u l-Afrika fil-ġlieda kontra t-terroriżmu u l-gruppi armati f'konformità mad-dritt internazzjonali; jitlob, fil-kuntest tal-politiki kontra t-terroriżmu, biex jiġu stabbiliti proċessi ta' teħid ta' deċiżjonijiet aktar trasparenti, aktar konformi ma' approċċ ibbażat fuq id-drittijiet tal-bniedem u aktar involviment mal-komunitajiet affettwati minn dawn il-miżuri;

172. Jissottolinja r-rwol importanti li s-Saħel għandu mil-lat strateġiku u ta' sigurtà; f'dan ir-rigward jilqa' b'sodisfazzjon kbir l-istabbiliment tal-G5 tas-Saħel fl-2014 kif ukoll il-Forza Konġunta tal-G5 (G5 Force Conjointe), li nħolqot fl-2017 biex tiġġieled it-theddid għas-sigurtà fir-reġjun;

173. Jisħaq fuq il-ħtieġa urġenti li l-UE tindirizza r-ribelljoni terroristika li qed teskala fit-Tramuntana tal-Mozambique, li diġà kkawżat aktar minn 1 000 persuna mejta u ġiegħlet lil madwar 200 000 persuna jaħarbu minn djarhom, u li toħloq riskju serju li tixtered fir-reġjun tan-Nofsinhar tal-Afrika; iħeġġeġ lill-VP/RGħ joffri l-appoġġ tal-UE lill-Mozambique u liċ-ċittadini tiegħu; jisħaq fuq il-fatt li n-nuqqas ta' rispons mill-UE jista' jwassal biex atturi internazzjonali oħra jieħdu r-rwol mexxej li l-UE biħsiebha tikseb fil-kontinent;

174. Jesprimi t-tħassib tiegħu li l-Botswana, il-Ghana, l-Uganda u ż-Żimbabwe huma inklużi fil-lista s-sewda aġġornata tal-UE ta' pajjiżi li għandhom nuqqasijiet strateġiċi fir-reġimi tagħhom kontra l-ħasil tal-flus/il-ġlieda kontra l-finanzjament tat-terroriżmu (AML/CFT), u jappella lil dawn il-pajjiżi biex minnufih jieħdu l-passi meħtieġa biex jikkonformaw mar-rekwiżiti tal-leġiżlazzjoni u l-implimentazzjoni tagħha (jiġifieri r-Regolament Delegat tal-Kummissjoni (UE) Nru 2020/855 tas-7 ta' Mejju 2020[10]); jilqa' l-fatt li l-Etjopja u t-Tuneżija, wara li wettqu għadd ta' riformi, issa tneħħew mil-lista s-sewda;

175. Jenfasizza l-fatt li l-mandati tal-missjoni tal-PSDK huma komprensivi u għandhom l-għan, fost affarijiet oħra, li jrawmu r-riforma tas-settur tas-sigurtà, javvanzaw ir-riforma tal-ġustizzja u jsaħħu t-taħriġ militari u tal-pulizija, u li jmexxu 'l quddiem is-sorveljanza; jissottolinja l-ħtieġa urġenti li jsir titjib kemm fil-politika ta' komunikazzjoni tal-missjonijiet tal-PSDK kif ukoll fl-ippjanar strateġiku ġenerali tal-UE bil-għan li tiżdied il-viżibbiltà tal-azzjonijiet tal-UE u l-għan tagħha li tissalvagwardja s-sigurtà u l-benessri tal-poplu Afrikan;

176. Jenfasizza r-rwol speċjali tal-entitajiet reliġjużi fl-Afrika li regolarment jaġixxu ta' medjaturi fil-kunflitti, li magħhom jeħtieġ li jkun hemm djalogu u kooperazzjoni, speċjalment fiż-żoni ta' kunflitt peress li d-djalogu interreliġjuż jista' jikkontribwixxi għall-paċi u r-rikonċiljazzjoni;

177. Jieħu nota li l-komunikazzjoni għandha timmira li tapprofondixxi l-appoġġ tal-UE għall-isforzi għall-paċi Afrikani permezz ta' forma aktar strutturata u strateġika ta' kooperazzjoni li tiffoka fuq reġjuni fl-Afrika fejn it-tensjonijiet huma l-ogħla u jitlob li strateġiji speċifiċi fir-reġjuni ta' kunflitt jitqiesu bħala prijorità; jinkoraġġixxi lill-UE u lill-Istati Membri tagħha jkomplu l-kondiviżjoni tal-piżijiet ma' organizzazzjonijiet u sħab internazzjonali, inklużi alleati u stati Afrikani li jservu bħala alleati affidabbli kontra t-terroriżmu bħall-Kenja, il-Marokk, in-Niġerja, il-Ghana u l-Etjopja; jitlob li jissaħħu r-relazzjonijiet tal-UE ma' dawn l-istati ewlenin; jistieden lill-UE tkompli tassisti lis-sħab Afrikani fil-bini tal-kapaċità tal-forzi u tal-istituzzjonijiet tas-sigurtà tagħhom, sabiex tipprovdi servizzi ta' sigurtà u infurzar tal-liġi effettivi u sostenibbli liċ-ċittadini tagħhom, inkluż permezz tal-Faċilità Ewropea għall-Paċi u l-missjonijiet tal-PSDK tagħha, u jistieden lill-UE tiffoka fuq approċċ integrat għall-kunflitti u l-kriżijiet, filwaqt li taġixxi fl-istadji kollha taċ-ċiklu tal-kunflitt, mill-prevenzjoni u r-rispons tal-kunflitti sal-ġestjoni u s-soluzzjoni tal-kunflitti;

178. Jenfasizza l-fatt li l-objettiv tal-appoġġ tal-UE lis-settur tas-sigurtà Afrikan huwa li jħeġġeġ is-sjieda Afrikana rigward kwistjonijiet ta' sigurtà u difiża; iqis li l-Unjoni Afrikana u l-Istati Afrikani huma atturi ewlenin li magħhom l-UE hija involuta b'mod sinifikanti sabiex b'mod konġunt jinkisbu l-iżvilupp sostenibbli u s-sigurtà tal-bniedem; jilqa' bil-qawwa, f'dan ir-rigward, il-pjanijiet tal-Unjoni Afrikana li tibgħat 3 000 suldat b'appoġġ għall-G5 tas-Saħel u jarah bħala sinjal li l-UA u l-UE qegħdin tassew isegwu objettivi ta' sigurtà simili, mibnija fuq objettivi u responsabbiltajiet kondiviżi; jilqa', f'dan ir-rigward, il-kummenti li saru mill-VP/RGħ Borrell lill-Kunsill tas-Sigurtà tan-NU fit-28 ta' Mejju 2020 meta tkellem dwar "is-sejba ta' soluzzjonijiet Afrikani għall-problemi Afrikani";

179. Itenni l-appoġġ tiegħu għall-missjonijiet għaż-żamma tal-paċi tan-NU fil-kontinent Afrikan u jistieden lill-atturi ewlenin, b'mod partikolari l-Istati Uniti tal-Amerka, ir-Russja, iċ-Ċina u r-Renju Unit, biex jingħaqdu mal-isforzi ta' medjazzjoni tal-UE u biex flimkien magħha javvanzaw il-kooperazzjoni u l-paċi sostenibbli fil-kontinent Afrikan kollu; itenni, f'dan ir-rigward, ir-rieda tal-UE li żżid l-appoġġ tagħha għall-missjonijiet tan-NU u li tavvanza l-koordinazzjoni bejn id-diversi missjonijiet tan-NU u tal-UE;

180. Jilqa' t-tnaqqis deċiżiv fil-piraterija 'l barra mill-kosti tal-Afrika tal-Lvant u tal-Punent bħala riżultat ta' sforzi ta' sigurtà marittima internazzjonali li jservu ta' preċedent għall-kooperazzjoni fis-sigurtà Ewropea, Afrikana u transatlantika;

181. Iqis li huwa importanti li l-UE tkompli bl-isforzi tagħha biex tibni stati u soċjetajiet aktar reżiljenti permezz tat-tisħiħ tal-kapaċitajiet u r-riformi tas-settur tas-sigurtà, inkluż permezz tal-Faċilità Ewropea għall-Paċi u l-missjonijiet tal-PSDK tagħha, u tiffoka fuq approċċ integrat għall-kunflitti u l-kriżijiet, filwaqt li taġixxi fl-istadji kollha taċ-ċiklu tal-kunflitt;

182. Ifakkar it-theddida li l-kriminalità organizzata transnazzjonali, l-inkwiet ċivili u l-kriminalità domestika joħolqu għal Stati fraġli u ta' wara l-kunflitt, li jsibuha diffiċli biex jipprovdu s-sigurtà meħtieġa liċ-ċittadini tagħhom; jissottolinja, f'dan ir-rigward, l-importanza ta' forza tal-pulizija nazzjonali u reġjonali mħarrġa sew; jinnota, madankollu, li l-forzi tal-pulizija spiss huma nieqsa mit-taħriġ kif ukoll mit-tagħmir xieraq, u, l-aktar kruċjali, mhux dejjem ikollhom komunikazzjoni tajba mal-popolazzjoni lokali u l-fiduċja tagħha; jissottolinja, għalhekk, l-importanza tat-tisħiħ u l-bini ta' strutturi professjonali tal-pulizija, u jitlob, fost l-oħrajn, appoġġ kunċettwali, loġistiku u amministrattiv intensifikat għall-Mekkaniżmu tal-Unjoni Afrikana għall-Kooperazzjoni tal-Pulizija bbażat fl-Alġier, li ġie varat fl-2014; jemmen li l-kooperazzjoni f'dan il-qasam se tgħin ukoll biex tiġi avvanzata l-kapaċità tal-missjonijiet għaż-żamma tal-paċi u biex trawwem il-komponent tal-pulizija tal-APSA;

183. Jinnota li l-isfera tal-informazzjoni fl-Afrika qed tiġi influwenzata dejjem aktar mill-avversarji globali tal-UE; jistieden, f'dan ir-rigward, lis-SEAE u lill-Kummissjoni jindirizzaw b'mod attiv il-problema tan-nuqqas ta' preżenza ta' vuċi Ewropea fis-soċjetajiet Afrikani u biex jiġġieldu kontra n-narrattivi foloz u jippromwovu aħjar l-approċċ Ewropew u l-valuri demokratiċi għall-poplu Afrikan; jinnota li dan jirrikjedi komunikazzjoni strateġika aħjar li tkun iffukata fuq reġjuni u pajjiżi ewlenin, u wkoll l-istabbiliment ta' unità speċjali responsabbli għal tali azzjonijiet li taħdem f'kooperazzjoni mill-qrib mad-delegazzjonijiet tal-UE;

184. Jissottolinja l-perikli tal-proliferazzjoni ta' armi ħfief illeċiti, u jfakkar li dawn l-armi mingħajr dokumenti, u fil-biċċa l-kbira jinżammu illegalment, mhux biss jheddu s-sikurezza u s-sigurtà tal-komunitajiet iżda huma wkoll jintużaw minn networks kriminali transnazzjonali perikolużi involuti f'diversi forom ta' traffikar, inkluż ta' armi, bnedmin u drogi illegali;

185. Iħeġġeġ it-tkomplija tal-Laqgħat Konsultattivi Konġunti Annwali tal-Kumitat Politiku u ta' Sigurtà tal-Unjoni Ewropea mal-Kunsill tal-Paċi u s-Sigurtà tal-Unjoni Afrikana bil-għan li jitwessa' l-kamp ta' applikazzjoni tal-kooperazzjoni biex jinkludi żjarat konġunti fuq il-post, sessjonijiet konġunti, l-iżvilupp ta' fehim u analiżi kondiviżi dwar sitwazzjonijiet ta' kriżi, u biex jiġu investigati modi għal azzjoni bikrija konġunta bħala l-aħjar mezz għall-istabbiliment ta' sħubiji strateġiċi vijabbli;

186. Ifakkar li l-Afrika tospita l-ogħla numru ta' operazzjonijiet ta' appoġġ għall-paċi (PSOs) fid-dinja u hija l-akbar kontributur ta' truppi u ta' pulizija fihom; jindika l-ħtieġa li l-PSOs madwar l-Afrika jiġu adattati għar-realtà l-ġdida tal-COVID-19 sabiex kemm iċ-ċittadini kif ukoll il-persunal tal-PSO jiġu protetti kif xieraq; jindika l-ħtieġa li jiġi żgurat finanzjament adegwat għal dawn il-missjonijiet, minħabba l-biża' ta' kriżi ekonomika imminenti u t-tnaqqis fil-finanzjament disponibbli;

187. Jistieden lill-UE tiżgura li l-missjonijiet tal-PSDK jiġu ppjanati b'mod effettiv, responsabbli u robust b'operazzjonijiet effiċjenti u b'mandati aktar b'saħħithom marbuta ma' rieda politika sostantiva, li jkollhom l-għan li jsolvu l-kunflitti minflok jiffriżawhom;

188. Jinkoraġġixxi lis-SEAE biex isaħħaħ il-preżenza tiegħu fid-delegazzjonijiet tal-UE fil-kontinent kollu, b'mod partikolari fl-Istati Membri ewlenin tal-UA, sabiex isir aktar progress fir-relazzjonijiet bilaterali u reġjonali tal-UE u jiġi żgurat skambju xieraq mal-partijiet interessati rilevanti; jissottolinja li tali rabtiet mill-qrib jikkostitwixxu l-bażi biex jiġu żgurati sħubijiet globali xierqa u strutturati tajjeb, kif ukoll għal risponsi mfassla apposta; jistieden lis-SEAE jtejjeb b'mod sinifikanti l-istrateġija dwar il-midja u l-komunikazzjoni tiegħu, mhux biss sabiex irawwem għarfien dwar l-isforzi tal-UE fir-reġjuni rispettivi, iżda wkoll biex iżid is-sensibilizzazzjoni u l-appoġġ fost iċ-ċittadini tal-UE għal aktar kooperazzjoni UE-Afrika;

189. Ifakkar fl-importanza li l-istrateġija UE-Afrika tiġi koordinata flimkien man-NU, in-NATO, l-OSKE u ma' pajjiżi oħra tal-istess fehma, bħall-Istati Uniti, il-Kanada, ir-Renju Unit, l-Awstralja u l-Ġappun;

°

° °

190. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni.


NOTA SPJEGATTIVA

Sħubija mġedda f'dinja fi kriżi 

L-Afrika qiegħda tippreżenta ruħha lid-dinja. Bħala kontinent bi sfidi iżda fuq kollox b'opportunitajiet, hija għandha dejjem aktar u aktar sħab potenzjali li qed joffru assistenza. L-Ewropa, l-alleat storiku tagħha, issa trid iġġedded l-approċċ u r-retorika tagħha biex tħaddan it-taqlib kbir li dan il-kontinent ta' 1,3 biljun abitant qed jesperjenza. 

Dan il-proċess għadu għaddej : iż-żjarat reċenti tal-President tal-Kunsill Ewropew, il-President tal-Kummissjoni Ewropea u delegazzjoni kbira ta' Kummissarji Ewropej fil-kwartieri ġenerali tal-Unjoni Afrikana juru x-xewqa li tiġi rikonoxxuta l-importanza tas-sħubija mal-Afrika fuq l-Aġenda Politika Ewropea. Ir-relazzjoni tagħna qiegħda tinbena mill-ġdid.

Filwaqt li n-natura u l-kobor tal-konsegwenzi tal-pandemija tal-coronavirus għadhom mhumiex magħrufa, jidher ċar li se jkollhom impatt fuq dan il-proċess. Il-pandemija għenitna napprezzaw l-interkonnessjoni tagħna u l-vulnerabilità komuni tagħna. Filwaqt li nibqgħu leali lejn il-prijoritajiet taż-żewġ kontinenti, ir-relazzjoni tagħna għalhekk se jkollha taġġusta għall-bżonnijiet il-ġodda tad-dinja wara l-Covid.

L-Afrikani u l-Ewropej huma unanimi: il-kriżi li għaddejjin minnha trid tgħinna biex inqiegħdu l-pedamenti għall-irkupru ffukat fuq l-iżvilupp tal-bniedem u fuq l-aċċelerazzjoni tat-tranżizzjonijiet ekoloġiċi u diġitali. L-inklużjoni u s-solidarjetà se jkunu l-kliem ewlenin għal dan il-qawmien mill-ġdid, fejn il-ġlieda kontra l-inugwaljanzi trid issir komponent trasversali. L-investiment u t-tkabbir ekonomiku se jiġu integrati f'qafas aktar globali li fuq kollox jimmira lejn l-iżvilupp sostenibbli tas-soċjetajiet tagħna u lejn tqassim aħjar u effettiv tal-ġid maħluq. Għal dan kollu, se jkollna nimxu 'l quddiem flimkien u niżviluppaw strateġiji u objettivi konkreti miftiehma.

Irridu nibdew bis-saħħa, li hija prerekwiżit għall-iżvilupp tal-bniedem u li trid titqiegħed fil-qalba tar-relazzjoni tagħna, bil-protezzjoni soċjali bħala l-prijorità assoluta. Fid-dawl tal-kriżi tal-Covid, il-kooperazzjoni bejn iż-żewġ kontinenti tagħna għandha tissaħħaħ biex titjieb is-saħħa tal-popolazzjonijiet kif ukoll il-ħiliet tagħna li nantiċipaw il-kriżijiet futuri tas-saħħa.

Barra minn hekk, l-impatt tal-Covid fl-Afrika aktarx li se jkompli jwessa' l-inugwaljanzi u jpoġġi popolazzjonijiet sħaħ fil-faqar. Għaldaqstant, iridu jitqiesu b'mod xieraq il-konsegwenzi soċjali tal-kriżi, flimkien mal-impatt tagħha fuq l-ekonomiji, fuq il-produzzjoni agrikola u s-sigurtà tal-ikel, kif ukoll fuq il-kuntest tas-sigurtà, u dawn għandhom iwasslu liż-żewġ kontinenti sabiex jikkooperaw aktar mill-qrib f'dawn l-oqsma ewlenin.

Għalhekk, b'mod aktar ġenerali, hija r-reżiljenza tas-soċjetajiet għall-kriżijiet li se tkun fiċ-ċentru tal-attenzjoni kollha. Għaldaqstant, ir-riflessjoni dwar il-mudelli ta' protezzjoni soċjali għandha tiġi intensifikata, b'mod partikolari fir-rigward tal-introduzzjoni ta' introjtu bażiku universali.

Ir-rapporteur tixtieq tisħaq ukoll fuq l-importanza tas-sejħa konġunta minn 18-il mexxej Afrikan u Ewropew għal moratorju fuq is-servizz tad-dejn.

Minkejja l-kriżi tas-saħħa attwali, il-kriżi ambjentali trid tibqa' fuq quddiem tal-aġenda politika. L-Afrika mhijiex responsabbli għat-tibdil fil-klima, iżda qed tbati l-konsegwenzi tiegħu. L-Ewropa, bħala l-garanti tal-Ftehim ta' Pariġi, jeħtiġilha tappoġġa lill-Afrika fit-tranżizzjoni tagħha lejn ekonomija ekoloġika u tinkoraġġixxi l-iżvilupp tal-potenzjal tagħha għall-produzzjoni ta' enerġija rinnovabbli u agrikoltura sostenibbli. Għalkemm l-isfidi u l-opportunitajiet tal-klima huma differenti fiż-żewġ kontinenti, l-Afrika u l-Ewropa jeħtiġilhom jaħdmu flimkien fit-tranżizzjoni ekoloġika billi jinkoraġġixxu l-innovazzjoni, it-trasferimenti tat-teknoloġija u l-kondiviżjoni tal-esperjenzi.

Il-kontroparti l-oħra tal-kriżi ekoloġika hija l-bijodiversità. L-Afrika għandha ekosistemi eċċezzjonali, iżda t-telf tal-bijodiversità huwa problema drammatika u irriversibbli. Lil hinn mill-impatt dirett fuq il-flora u l-fawna, il-qerda tal-bijodiversità, inkluża tal-bijodiversità tal-baħar, hija akkumpanjata minn problemi ta' sigurtà u ta' governanza u minn theddid għas-saħħa tal-bniedem. Din l-emerġenza tfisser li  l-kontinenti tagħna għalhekk iridu jippromwovu l-adozzjoni ta' qafas globali li kapaċi jgħaqqad l-isforzi biex tiġi ppreżervata l-bijodiversità tal-pjaneta tagħna.

Bħala sħab f'dinja fi kriżi, għandna responsabbiltà kbira biex niffurmaw id-dinja ta' għada. Dan se jinvolvi b'mod partikolari d-diplomazija ekoloġika u l-konklużjoni ta' Patt Ekoloġiku tal-Afrika-UE għall-klima u l-bijodiversità.

L-edukazzjoni, iż-żgħażagħ u l-impjiegi se jkunu fuq quddiem fl-irkupru ffukat fuq l-iżvilupp tal-bniedem. L-edukazzjoni li hija prerekwiżit għall-emanċipazzjoni u l-impjegabbiltà taż-żgħażagħ, se jkollha tadatta għall-bidliet li s-soċjetajiet tagħna qed jesperjenzaw. L-iżvilupp tal-industriji ekoloġiċi u r-rivoluzzjoni diġitali b'mod partikolari jfissru li jeħtieġ livell ogħla fir-riċerka u l-innovazzjoni. Il-kontinenti tagħna jridu jkunu jistgħu jistrieħu fuq żgħażagħ mħarrġa sew biex jibnu soċjetajiet sostenibbli u inklużivi. 

Pilastru ieħor tal-iżvilupp tal-bniedem huwa l-ugwaljanza bejn il-ġeneri. Fl-Afrika, bħal fl-Ewropa, il-ġlieda kontra d-diskriminazzjoni u l-vjolenza kontra n-nisa u l-bniet hija battalja kontinwa. L-ebda soċjetà ma tista' tiżviluppa sakemm jibqgħu jinkisru d-drittijiet tagħhom u jibqgħu jippersistu l-ostakli għall-emanċipazzjoni tagħhom. Aċċess għall-edukazzjoni, għall-art jew anke għall-kreditu : il-kontinenti tagħna jeħtieġu jimpenjaw ruħhom sabiex fl-aħħar in-nisa u l-bniet ikunu ugwali mal-irġiel u s-subien. L-Afrika u l-Ewropa se jkollhom jaqblu dwar pjan direzzjonali konkret biex jintlaħaq dan.

Il-promozzjoni ta' soċjetajiet aktar inklużivi u ġusti teħtieġ kooperazzjoni msaħħa fuq il-governanza u d-drittijiet tal-bniedem. Il-valuri jridu jkunu s-sinsla tas-sħubija tagħna li mingħajrha l-ebda waħda mill-isfidi msemmija hawn fuq ma tista' tiġi indirizzata. Għad hemm wisq diskriminazzjoni fl-Afrika u fl-Ewropa, li qed tfarrak il-ħajjiet tal-individwi u tkisser il-koeżjoni soċjali. Il-popolazzjonijiet l-aktar vulnerabbli u l-aktar marġinalizzati għandhom jiġu appoġġati biex jiġi żgurat li kulħadd jista' jgħix b'dinjità. Peress li ż-żgħażagħ xi darba se jkunu l-mexxejja tas-soċjetajiet tagħna, iż-żgħażagħ Afrikani u Ewropej jeħtieġu jiġu offruti possibbiltajiet ġodda biex jiskambjaw ideat u esperjenza dwar kwistjonijiet ta' governanza u ta' drittijiet tal-bniedem, pereżempju permezz ta' pjattaformi virtwali.

F'dan ir-rigward, ir-rapporteur tixtieq tfakkar fil-qawwa tad-diġitalizzazzjoni bħala għodda għall-progress, l-inklużjoni u l-iżvilupp. Ir-rwol tagħha bħala strument għall-iżvilupp tal-bniedem huwa partikolarment ċar fil-kontinent Afrikan. Il-perjodu tal-Covid ra l-iskambji fuq l-internet jisplodu u l-fruntieri, għalkemm magħluqa, qatt ma kienu daqshekk porużi permezz tad-diġitalizzazzjoni. Din it-trasformazzjoni diġitali qed tiżvela ħafna talenti, twarrab l-ostakli u ssostni potenzjal straordinarju għall-innovazzjoni fl-Afrika. L-Ewropa, jekk ma tridx li tinqabeż, trid timpenja ruħha mal-Afrika kull fejn id-diġitalizzazzjoni tista' ssaħħaħ il-benessri tal-popli b'mod partikolari f'termini ta' saħħa, edukazzjoni, governanza, tranżizzjoni ekoloġika u inklużjoni finanzjarja, pereżempju permezz ta' pagamenti mobbli.

Fl-aħħar nett, il-qawwa tas-sħubija mġedda tagħna għandha tippermettilna nsaħħu l-viżibbiltà u l-koerenza tal-azzjoni tagħna fix-xena internazzjonali. Issa li ninsabu għaxar snin mill-iskadenza tal-Aġenda 2030 u tas-17-il Għan għall-Iżvilupp Sostenibbli tagħha, u bl-azzjoni multilaterali taħt pressjoni qawwija, aktar minn qatt qabel jeħtieġ li ngħaqqdu l-forzi tagħna.

Sħubija li tgħaqqad il-kontinenti u l-popli

L-uniku mezz kif din is-sħubija tista' tiġi mħaddna mill-partijiet interessati kollha fiż-żewġ kontinenti huwa permezz ta' proċess inklużiv li jkopri l-iżvilupp, l-implimentazzjoni u l-evalwazzjoni tal-istrateġija. Sabiex tagħti tifsira sħiħa lill-kelma "sħubija", l-Ewropa trid tiżviluppa din l-istrateġija mal-Afrika u mhux għaliha.

Is-summit UE-Afrika li jmiss għandu għalhekk jippermetti liż-żewġ kontinenti jiddefinixxu l-prijoritajiet komuni tagħhom u l-viżjoni Afrikana trid issib postha f'dan il-proċess.

Sussegwentement, tkun kwistjoni li b'mod gradwali nikkonkretizzaw l-idea ta' sħubija bejn partijiet ugwali bi proġetti konkreti li jissodisfaw il-ħtiġijiet tal-popli. Is-suċċess tas-sħubija tagħna se jiddependi minn pjan direzzjonali dettaljat bi tqassim ċar tar-responsabbiltajiet kif ukoll b'evalwazzjoni kontinwa mill-partijiet interessati.

Il-komunikazzjoni konġunta tal-Kummissjoni Ewropea u s-Servizz Ewropew għall-Azzjoni Esterna ppubblikata fid-9 ta' Marzu 2020 tvara l-proċess billi tistabbilixxi l-pedamenti għal proċess ta' riflessjoni li għandu jkun inklużiv kemm jista' jkun

Dan ir-rapport ġie ispirat u msaħħaħ minn bosta laqgħat fuq il-post u tfassal biex jiżgura li jirrifletti r-realtajiet tal-Afrika. Ir-rapporteur żaret diversi pajjiżi Afrikani biex kemm jista' jkun tkun qrib tan-nies u ssir taf dwar l-aspettattivi tagħhom u tagħtihom vuċi. Hija staqsiet lill-partijiet interessati Afrikani dwar kif jaraw ir-rwol tal-Ewropa u x'jistgħu l-popli tagħna joffru lil xulxin.

Ġew ikkonsultati kapijiet ta' Stat, ministri, awtoritajiet pubbliċi, is-soċjetà ċivili, żgħażagħ, nisa, id-dinja akkademika, gruppi ta' riflessjoni, atturi tal-iżvilupp, is-settur privat, kif ukoll rappreżentanti tal-Unjoni Afrikana, in-Nazzjonijiet Uniti u d-delegazzjonijiet tal-UE. Il-konsultazzjonijiet ma kinux imsejsa fuq il-promozzjoni ta' idea Ewropea ta' sħubija, iżda fuq il-viżjoni Afrikana li kienet it-tema rikorrenti ta' dawn il-konsultazzjonijiet

Wara bosta laqgħat waqt żjarat fit-Togo, il-Marokk u l-Etjopja, l-epidemija tal-coronavirus ħarbtet iż-żjarat ippjanati l-oħrajn. Ir-rapporteur għalhekk kompliet bil-proċess ta' konsultazzjonijiet tagħha permezz ta' vidjokonferenzi u kellmet bosta interlokuturi fl-Afrika t'Isfel, in-Niġerja, ir-Rwanda, is-Senegal u l-Kenja. Dawn it-tmien pajjiżi ntgħażlu sabiex jirriflettu d-diversità tal-Afrika.

Mill-intervisti kollha li saru, huwa ċar ħafna li l-Ewropa tibqa' l-alleata ewlenija tal-Afrika. Is-sħab Afrikani tagħna huma ħerqana li jibnu alleanza dejjem aktar b'saħħitha mal-Ewropa biex jiġu żgurati l-paċi, l-istabbiltà u l-prosperità għaż-żewġ kontinenti.

Sħubija inklużiva u miftuħa li tirrikonoxxi l-Afrika fid-diversità kollha tagħha

Ir-relazzjoni tagħna mal-Afrika ilha – ġa għal diversi snin – tiġi limitata għall-kwistjoni tal-migrazzjoni, tant li d-diversi aspetti l-oħra tas-sħubija ġew imwarrba. Filwaqt li b'mod ċar il-migrazzjoni trid tiġi indirizzata, ir-rapporteur xtaqet tiffoka fuq il-kwistjonijiet ewlenin l-oħra li jiffurmaw ir-rikkezza tar-relazzjoni tagħna mal-kontinent Afrikan.

Għaldaqstant, fil-qalba tar-rapport insibu r-rwol li s-sħubija tagħna trid twettaq fix-xena internazzjonali, fl-iżvilupp tal-bniedem, fil-ġlieda kontra l-inugwaljanzi, fl-emanċipazzjoni tan-nisa u ż-żgħażagħ, fit-trasformazzjoni diġitali, fl-agrikoltura sostenibbli kif ukoll fit-tranżizzjoni ekoloġika. Dawn it-temi, se jsawwru d-djalogu fundamentali essenzjali bejn il-komponenti differenti tas-soċjetajiet Afrikani u Ewropej.

L-Afrika, fid-diversità kollha tagħha u bir-rieda tagħha li tillibera l-potenzjal qawwi taż-żgħażagħ, tan-nisa u tat-talenti tagħha, se jkollha impatt deċiżiv fuq il-futur tad-dinja. L-Ewropa fehmet il-fatt li l-Afrika hija alleat mixtieq u sieħba ewlenija. 

Iżda filwaqt li l-Ewropa toffri l-għajnuna tagħha lill-kontinent Afrikan, jeħtiġilha tindirizza wkoll il-ħtiġijiet tal-Ewropej, b'mod partikolari lill-ġenerazzjoni żagħżugħa, u tqanqal fihom ix-xewqa mhux biss li jkunu jafu dwar l-Afrika iżda wkoll li jifhmu x'inhi l-Afrika, u jirrikonoxxu d-destin komuni tagħna. Dan għaliex lil hinn mis-summits u l-laqgħat fl-ogħla livell politiku, huma l-iskambji bejn l-individwi, partikolarment iż-żgħażagħ, in-nisa, is-soċjetà ċivili, l-intraprendituri, il-bdiewa, id-dinja akkademika, ix-xjenzjati, it-tobba u anke l-artisti li se jikkontribwixxu l-enerġija vitali għar-relazzjoni mġedda tagħna.

Din is-sħubija komprensiva trid l-ewwel u qabel kollox tiffoka fuq in-nies u trawwem fehim reċiproku dejjem akbar. Dan se jkun il-muftieħ għal futur kondiviż.


OPINJONI TA' MINORANZA

Bernhard Zimniok

L-istrateġija UE-Afrika trid tiġi miċħuda: il-Kummissjoni (KE) ma għamlet l-ebda analiżi tar-ramifikazzjonijiet tal-Istrateġija fuq l-Ewropa fir-rigward tal-immigrazzjoni tal-massa mill-Afrika; l-Istrateġija hija bbażata fuq narrattiva żbaljata; il-KE qatt ma ltaqgħet ma' rappreżentanti tal-komunitajiet lokali fl-Istati Membri (SM) waqt li kienet qed toħloq din l-Istrateġija, prinċipalment rappreżentanti mill-kumpless tal-immigrazzjoni-industrija, l-organizzazzjoni internazzjonali u r-rappreżentanti Afrikani. Il-KE tiddikjara: "... l-istrateġija hija dokument politiku, għalhekk ma tistax tiffaċilita l-migrazzjoni waħedha.", dan minkejja l-fatt li l-għan tal-Istrateġija huwa li tinfetaħ l-immigrazzjoni tal-massa mill-Afrika għall-Ewropa abbażi tal-affermazzjoni żbaljata li l-istorja u l-futur tal-Ewropa u tal-Afrika huma marbutin flimkien. Barra minn hekk, dan ir-Rapport huwa nieqes mill-iskrutinju tal-Istrateġija; l-ebda numru rappreżentattiv ta' organizzazzjonijiet lokali ma ġie kkonsultat fl-Istati Membri. L-istrateġija tinkludi l-pedamenti tal-Patt dwar il-Migrazzjoni tan-NU li mhux l-Istati Membri kollha qablu miegħu, u b'hekk l-Istrateġija hija invalidata mill-proposti tagħha stess. Bil-prospett inizjali ta' 60 sa 70 miljun (l-għadd ta' adulti biss) li jaslu mill-Afrika, din l-Istrateġija mhux se tikkostitwixxi politika biex issaħħaħ in-nazzjonijiet Ewropej iżda biex teradikahom mill-mappa, kif ukoll mill-istorja.

 

 


 

 

OPINJONI TAL-KUMITAT GĦALL-AFFARIJIET BARRANIN (23.9.2020)

għall-Kumitat għall-Iżvilupp

dwar Strateġija ġdida UE-Afrika – sħubija għal żvilupp sostenibbli u inklużiv

(2020/2041(INI))

Rapporteur għal opinjoni (*): Anna Fotyga

(*) Kumitat assoċjat – Artikolu 57 tar-Regoli ta' Proċedura

 

 

SUĠĠERIMENTI

Il-Kumitat għall-Affarijiet Barranin jistieden lill-Kumitat għall-Iżvilupp, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Jilqa' l-komunikazzjoni konġunta mill-Kummissjoni u l-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà (VP/RGħ) tad-9 ta' Marzu 2020 bit-titlu "Lejn strateġija komprensiva mal-Afrika" u jqisha bħala pass lejn sħubija verament ġeopolitika; jissottolinja li l-Ewropa u l-Afrika jinsabu fi prossimità ġeografika mill-qrib, għandhom rabtiet storiċi, kulturali u soċjoekonomiċi qawwija, li qed jitqarrbu dejjem aktar biż-żieda fl-għadd ta' sfidi komuni u ta' interessi strateġiċi, li jvarjaw mill-avvanz tad-drittijiet tal-bniedem u d-demokrazija, il-ħruġ tal-komunitajiet mill-faqar u l-għoti ta' kundizzjonijiet ta' għajxien deċenti permezz tal-għoti ta' opportunitajiet ekonomiċi, l-iżvilupp sostenibbli jew il-governanza tajba, u l-potenzjal tal-migrazzjoni għal opportunitajiet ta' impjieg u żvilupp sinifikanti; it-tisħiħ tar-relazzjonijiet kummerċjali u ta' investiment, is-sigurtà, il-ġlieda kontra t-terroriżmu, u l-ġlieda kontra l-kriminalità organizzata u t-traffikar ta' bnedmin, ir-riforma multilaterali tal-istituzzjonijiet u l-kummerċ globali, l-ambjent, is-sigurtà tal-ikel, l-aċċess għall-ilma, it-tkabbir tal-popolazzjoni, l-urbanizzazzjoni, il-kwistjonijiet tal-enerġija, l-avvanz tas-saħħa pubblika, l-aċċess għall-kura tas-saħħa, it-tibdil fil-klima; jenfasizza l-fatt li r-relazzjonijiet tal-UE mal-Afrika huma ta' importanza kbira għall-futur taż-żewġ kontinenti tagħna u li l-prosperità taż-żewġ kontinenti hija marbuta mill-qrib, fatti li jitolbu approċċ olistiku kontinentali u Afrikan li jista' jirrikonċilja dawn it-taqsimiet diverġenti fi strateġija komprensiva koerenti li se titkejjel f'termini tar-riżultati li tikseb, u li tiġi mmonitorjata u evalwata kontinwament; jitlob li jkun hemm koerenza akbar bejn il-politiki tal-UE, l-allokazzjoni trasparenti u orjentata lejn ir-riżultati tar-riżorsi tal-UE u alleanza politika msaħħa mill-ġdid, li trid tmur lil hinn mill-iżvilupp tradizzjonali u l-kooperazzjoni umanitarja bil-għan li tassew jiġi sfruttat il-potenzjal sħiħ tas-sħubija tagħna;

2. Ifakkar li skont iċ-Ċentru għar-Riċerka dwar l-Epidemjoloġija tad-Diżastri (ĊRED), fl-2019, kważi 16,6 miljun Afrikan ġew affettwati minn avvenimenti estremi tat-temp, 195 % aktar milli fl-2018, u li d-diżastri naturali għandhom impatt negattiv fuq il-ħajjiet, l-għajxien, id-djar u l-ekosistemi, kif ukoll fuq il-makroekonomija;

3. Jissottolinja li s-sħubija UE-Unjoni Afrikana (UA) tista' tkun ta' suċċess biss jekk tkun verament sħubija bejn partijiet ugwali, jiġifieri sħubija aktar ibbilanċjata, aktar ġusta u sinifikanti, mibnija fuq ir-responsabbiltà proprja u s-solidarjetà u fuq viżjoni komuni għall-futur tagħna; itenni, għalhekk, l-appelli tiegħu għal sħubija ġenwina "minn kontinent għal kontinent" bejn l-Unjoni Ewropea u l-Unjoni Afrikana; ifakkar li l-Afrika hija l-eqreb ġar tagħna, fejn jgħixu aktar minn biljun ruħ u li aktar minn nofs it-tkabbir tal-popolazzjoni tad-dinja sal-2050 huwa previst li jseħħ fl-Afrika, filwaqt li 6 mill-10 ekonomiji li qed jikbru bl-aktar rata mgħaġġla fid-dinja huma Afrikani; jisħaq fuq il-fatt li l-UE u l-Istati Membri tagħha jikkostitwixxu l-akbar sieħeb tal-Afrika taħt l-aspetti kollha, f'dak li għandu x'jaqsam mal-investiment, il-kummerċ, l-għajnuna għall-iżvilupp, l-assistenza umanitarja u s-sigurtà; jinnota, madankollu, li din il-kooperazzjoni dejjem aktar mill-qrib għad trid twassal għal fehim kondiviż jew għal sħubija strateġika vijabbli, f'konformità mal-interessi kondiviżi, il-potenzjal tat-tkabbir, il-prossimità ġeografika u r-rabtiet li ilhom jeżistu għal sekli sħaħ bejn iż-żewġ kontinenti; jissottolinja li l-proċess ta' żvilupp sostenibbli fil-kontinent Afrikan huwa ta' importanza ewlenija għall-prosperità, l-istabbiltà u s-sigurtà, kemm tal-UE kif ukoll tal-Afrika, li huma kundizzjonijiet ewlenin għall-iżvilupp ekonomiku u soċjali għall-Afrikani kif identifikati fl-Għanijiet ta' Żvilupp Sostenibbli (SDGs) tan-NU; jisħaq li l-UE trid tkun kunfidenti fil-ħolqien ta' approċċ ġdid u modern għall-politika tagħha dwar l-Afrika abbażi ta' fehim ċar tal-interessi u r-responsabbiltajiet rispettivi u reċiproċi tagħhom, li jirrifletti l-komprensività u l-maturità tar-relazzjonijiet tagħhom; jinsab ferm konvint li s-sħubija tagħna trid tkun ibbażata fuq pożizzjonijiet u prijoritajiet ċari identifikati mis-sħab Afrikani tagħna u f'dan il-kuntest jemmen li s-6 Summit UA-UE f'din il-ħarifa jipprovdi opportunità f'waqtha biex jinstemgħu s-sħab Afrikani, isir skambju dwar talbiet u proposti reċiproċi u biex jiġu definiti objettivi komuni sabiex jiġu inkorporati fl-istrateġija konġunta ġdida li jmiss, li għandha tkun ta' benefiċċju reċiproku u tirrifletti l-interessi taż-żewġ naħat u ssaħħaħ ir-rabtiet bejn iż-żewġ kontinenti;

4. Jisħaq fuq il-ħtieġa urġenti li jitjiebu s-sinerġiji u titjieb il-koerenza bejn l-oqfsa legali u politiċi kollha li fuqhom huma bbażati r-relazzjonijiet UE-Afrika sabiex ikunu aktar effettivi u sostenibbli, bi sħubija fit-tul, multidimensjonali u multisettorjali aktar b'saħħitha, li għandha tissarraf ukoll f'kooperazzjoni politika aktar b'saħħitha u f'koordinazzjoni effettiva mibnija fuq l-ugwaljanza, il-fiduċja, ir-rispett reċiproku, is-solidarjetà, is-sovranità, il-valuri kondiviżi u fuq viżjoni komuni dwar il-futur tagħna; jenfasizza, f'dan ir-rigward, l-importanza tad-drittijiet tal-bniedem, id-demokrazija, il-paċi u s-sigurtà, kif ukoll il-governanza tajba, l-iżvilupp sostenibbli, l-istat tad-dritt, l-elezzjonijiet ħielsa u ġusti, it-tranżizzjonijiet tal-poter ibbażati fuq il-liġi u paċifiċi fil-pajjiżi Afrikani, l-ugwaljanza bejn il-ġeneri, bħala l-pedamenti meħtieġa għal sħubija sostenibbli, inklużiva u ta' benefiċċju reċiproku UE-Afrika; jisħaq li sħubija b'saħħitha UE-Afrika teħtieġ Unjoni Afrikana b'saħħitha, jenfasizza r-rwol importanti tal-UE fl-appoġġ tal-Unjoni Afrikana biex teżerċita l-mandat tagħha b'mod aktar effettiv, fil-bini tal-paċi u s-sigurtà fil-kontinent kollu u fit-tmexxija tal-progress fl-integrazzjoni kontinentali kif ukoll l-istituzzjonalizzazzjoni tal-Unjoni Afrikana, inkluż il-Parlament Pan-Afrikan, permezz tal-kondiviżjoni tal-aħjar prattiki kif ukoll assistenza teknika u finanzjarja; jilqa' l-proposta għal programm pan-Afrikan fil-kuntest tal-Istrument il-ġdid ta' Viċinat, ta' Kooperazzjoni għall-Iżvilupp u ta' Kooperazzjoni Internazzjonali (NDICI) li għandu l-għan li jindirizza l-isfidi tal-kontinent Afrikan kollu kemm hu;

5. Itenni l-appoġġ għall-Afrika fil-proċessi ewlenin ta' integrazzjoni fil-livelli reġjonali, kontinentali u internazzjonali u jinnota li l-Ewropa u l-Afrika għandhom interess komuni li jikkooperaw dwar il-multilateraliżmu u l-isfidi komuni li jistgħu jiġu indirizzati b'mod effettiv biss billi jaħdmu flimkien; jisħaq fuq il-ħtieġa li jingħelbu d-diviżjonijiet, fejn jeżistu, speċjalment f'oqsma ta' importanza strateġika ewlenija, bħall-issodisfar tal-istandards u l-prattiki internazzjonali fil-kummerċ, id-drittijiet tal-bniedem, il-ġustizzja soċjali, l-ugwaljanza bejn il-ġeneri, l-iżvilupp sostenibbli u l-pożizzjonament f'organizzazzjonijiet internazzjonali; huwa tal-fehma li sħubija olistika minn kontinent għal kontinent għandha tippermetti wkoll aktar reġjonalizzazzjoni; itenni l-appoġġ kontinwu tiegħu għall-integrazzjoni reġjonali u l-organizzazzjonijiet reġjonali, bħall-ECOWAS (il-Komunità Ekonomika tal-Istat tal-Afrika tal-Punent), is-CEMAC (il-Komunità Ekonomika u Monetarja tal-Afrika Ċentrali), l-EAC (il-Komunità tal-Afrika tal-Lvant), l-SADC (il-Komunità għall-Iżvilupp tal-Afrika t'Isfel), l-IGAD (l-Awtorità Intergovernattiva għall-Iżvilupp) u l-ECCAS (il-Komunità Ekonomika tal-Istati tal-Afrika Ċentrali), kif ukoll l-ICGLR (Konferenza Internazzjonali dwar ir-Reġjun tal-Lagi l-Kbar); jappoġġa l-fehma li l-UE jeħtiġilha żżomm approċċi flessibbli minn pajjiż għal pajjiż u fil-livell subreġjonali li jirregolaw il-parteċipazzjoni tagħha u l-appoġġ skont il-bżonnijiet u ċ-ċirkostanzi speċifiċi ta' kull pajjiż fi ħdan il-ħames reġjuni tal-Afrika; jappella għal aġġornament tad-diversi politiki reġjonali tal-UE lejn is-subreġjuni tal-Afrika, bħall-Afrika ta' Fuq, il-Golf tal-Guinea, is-Saħel, il-Lagi l-Kbar u l-Qarn tal-Afrika; jiddispjaċih għall-fatt li 25 sena mill-bidu tal-Proċess ta' Barċellona, il-ħolqien ta' żona ta' prosperità kondiviża, stabbiltà u libertà mal-pajjiżi tal-viċinat tan-Nofsinhar għad fadallu biex jitlesta;

6. Jinnota l-importanza li tiġi implimentata l-Viżjoni Afrikana fuq it-Tħaffir fil-Minjieri adottata fl-2009 mill-Kapijiet ta' Stat u ta' Gvern Afrikani biex jiġi żgurat sfruttament trasparenti, ekwu u ottimali tar-riżorsi minerali;

7. Ifakkar fir-rwol importanti li l-Unjoni Afrikana u l-Istati Afrikani għandhom f'organizzazzjonijiet multilaterali, b'mod partikolari n-Nazzjonijiet Uniti, fejn l-Istati Afrikani jirrappreżentaw 28 % tas-sħubija, u jissottolinja, għalhekk, l-importanza li napprofondixxu aktar ir-relazzjonijiet politiċi tagħna sabiex nirriformaw il-korpi multilaterali tat-teħid tad-deċiżjonijiet biex nagħmluhom aktar ġusti u rappreżentattivi, fattur li huwa kruċjali biex jinstabu soluzzjonijiet għall-isfidi globali komuni tagħna;

8. Jilqa' l-ħames sħubijiet fl-istrateġija l-ġdida proposta; jemmen li barra minn hekk din għandha tiġi aġġornata biex tirrifletti l-ħtiġijiet ekonomiċi u tas-saħħa tal-Afrika fl-indirizzar tal-kriżi tal-COVID-19; jappella għal impenn tal-UE b'saħħtu, kostanti, ambizzjuż u koerenti fis-sigurtà, l-istabbiltà u l-iżvilupp tal-Afrika, inkluż permezz tal-promozzjoni tat-tranżizzjoni ekoloġika u l-aċċess għall-enerġija, it-trasformazzjoni diġitali, it-tkabbir u l-impjiegi sostenibbli, il-paċi u l-governanza, u approċċ bilanċjat u komprensiv għall-migrazzjoni u l-mobilità; jirrikonoxxi li saru sforzi biex jiġu inklużi l-ilħna u l-interessi tas-sħab Afrikani tagħna, iżda jinnota wkoll li xi ilħna esprimew diżappunt dwar perċezzjoni ta' nuqqas ta' komunikazzjoni ma' xi sħab Afrikani qabel il-pubblikazzjoni tagħha; jirrimarka, madankollu, il-ħtieġa li jiġi definit b'mod ċar kif l-istrateġija l-ġdida għandha tiġi implimentata u jiġi indikat liema attur tal-UE huwa responsabbli biex jagħmel xiex; jissottolinja l-importanza tar-relazzjonijiet futuri mal-Afrika u l-fatt li dan jirrikjedi l-involviment wiesa' tas-soċjetajiet ċivili taż-żewġ kontinenti; jappella għal involviment aktar b'saħħtu fil-livelli kollha, inklużi l-organizzazzjonijiet nongovernattivi (NGOs), in-negozju, l-akkademja, il-gruppi ta' riflessjoni, l-istituzzjonijiet kulturali u reliġjużi, it-trade unions, u oħrajn; jilqa' b'sodisfazzjon kbir is-sinjali mibgħuta mill-President tal-Kummissjoni Ursula von der Leyen biex ir-relazzjonijiet mal-Afrika jsiru l-qofol tal-mandat tagħha; jilqa' f'dan ir-rigward il-fatt li l-ewwel żjara tal-President il-ġdid tal-Kummissjoni kienet fl-Afrika u jitlob laqgħat u kuntatti ta' livell għoli aktar frekwenti; iqis li tali laqgħat personali fl-ogħla livell huma ta' importanza kbira peress li mhux biss irawmu rabtiet personali, iżda wkoll jissensibilizzaw lill-pubbliku dwar is-sħubija tagħna fil-midja nazzjonali rispettiva tagħna; jitlob, għalhekk, biex jiġu intensifikati aktar dawn il-laqgħat u l-iskambji ta' livell għoli, inklużi fora u laqgħat kummerċjali u tas-soċjetà ċivili; jesprimi d-dispjaċir tiegħu li l-komunikazzjoni hija nieqsa minn proposti ċari għal approċċi kkoordinati bejn l-UE u l-UA biex jiġu indirizzati sfidi komuni, li jistgħu jiġu indirizzati b'mod konġunt f'sistemi multilaterali (eż. in-NU); jisħaq fuq il-fatt li l-VP/RGħ u l-missjonijiet tal-UE fil-kapitali tal-kontinent Afrikan għandhom ikunu aktar attivi fil-preżentazzjoni tal-objettiv ta' politika tal-UE; iħeġġeġ lill-gruppi ta' riflessjoni Ewropej u lill-akkademja f'dan ir-rigward biex jikkooperaw b'mod aktar attiv mal-kontropartijiet Afrikani tagħhom; jissottolinja l-ħtieġa li jiġi adottat, fi ħdan is-sħubija Afrika-UE, approċċ koordinat u komprensiv, kemm bejn l-UE-UA kif ukoll fost l-UE u l-Istati Membri tagħha, kif previst fl-Artikolu 210 tat-Trattat dwar il-Funzjonament tal-Unjoni Ewropea; jistieden lill-UE taħdem aktar fuq din il-perspettiva konġunta fid-dawl tas-Summit UE-Afrika li jmiss skedat għall-2020;

9. Jinnota li l-potenzjal tal-Afrika jattira interess akbar minn ħafna atturi fix-xena dinjija u jesprimi tħassib li, f'ħafna żoni, l-Afrika saret arena ġdida ta' kompetizzjoni kbira għall-poter; jisħaq fuq il-fatt li l-UE hija minn tal-ewwel li tgħin lill-kontinent Afrikan, filwaqt li l-politiki distruttivi użati minn atturi oħra jwasslu għad-detriment tan-nazzjonijiet Afrikani, li għandhom ukoll riperkussjonijiet negattivi fuq l-UE; jissottolinja li l-UE fil-qalba tagħha, fir-relazzjonijiet politiċi u ekonomiċi tagħha ma' pajjiżi terzi, hija motivata mill-avvanz tad-drittijiet fundamentali, mill-għoti ta' appoġġ lill-istituzzjonijiet demokratiċi u mis-sostenn tar-responsabbiltà demokratika; jemmen li pajjiżi terzi, bħaċ-Ċina, qed ifittxu li jiksbu objettivi oħra li, xi drabi, huma ta' tħassib għalina; jisħaq fuq il-fatt li l-objettiv tagħna huwa li nsaħħu r-reżiljenza u l-indipendenza tas-sħab Afrikani tagħna; jesprimi d-dispjaċir tiegħu, għalhekk, li l-azzjonijiet ta' atturi oħra, speċjalment iċ-Ċina u r-Russja, qed javvanzaw l-interessi ġeopolitiċi tagħhom u huma ffukati fuq l-unilateraliżmu li qed jikber, u jisħaq li l-benefiċċji proprji tagħhom huma askapitu tas-sovranità tal-pajjiżi Afrikani u s-sigurtà Ewropea; jistieden lill-UE tikkoordina ma' kull pajjiż li huwa verament interessat fi żvilupp fit-tul prosperuż u pożittiv tal-kontinent Afrikan, abbażi tar-rispett sħiħ tad-drittijiet tal-bniedem, il-libertà u r-responsabbiltà tal-midja, il-governanza trasparenti u reattiva u l-ġlieda kontra l-korruzzjoni, li huma elementi vitali biex jiġi żgurat ambjent politiku, soċjali u ekonomiku stabbli u inklużiv fl-Afrika; jistieden lill-UE tiżviluppa rispons strateġiku u fit-tul għall-Inizjattiva Ċiniża "Belt and Road", li għandha tkun iggwidata mill-valuri komuni tagħna kif ukoll mill-prijoritajiet u l-ħtiġijiet espressi mill-ġirien Afrikani tagħna; jisħaq fuq il-fatt li l-UE u l-Istati Membri tagħha jeħtieġ li jsiru sors ta' stabbiltà u affidabbiltà fir-reġjun; jemmen li l-Unjoni Ewropea jeħtieġ li jkollha rwol ġeopolitiku akbar fl-Afrika u tistabbilixxi relazzjonijiet li huma ta' ġid għal kulħadd;

10. Huwa tal-idea li l-istrateġija UE-Afrika għandha tinkludi wkoll miżuri li jgħinu lill-pajjiżi Afrikani jikkonvertu l-ġid tar-riżorsi minerali tagħhom fi żvilupp reali u jitlob għal rieżami tal-effikaċja tal-miżuri eżistenti, anke fir-rigward tal-isfruttament dubjuż miċ-Ċina u r-Russja; jistieden lill-Kummissjoni u lis-sħab Afrikani jimplimentaw miżuri għar-Regolament dwar il-Minerali ta' Kunflitt[11] mingħajr ostakli, u jippubblikaw mingħajr dewmien il-lista ta' kumpaniji barra mill-UE li ma jissodisfawx ir-rekwiżiti stabbiliti mir-regolament; jenfasizza l-karatteristiċi ta' qawwa tal-Ewropa (jiġifieri t-trasparenza, il-prodotti u s-servizzi ta' kwalità għolja u l-governanza demokratika) u jittama li l-attrazzjoni ta' dawk il-valuri fundamentali hija alternattiva konvinċenti għall-mudelli awtoritarji;

11. Ifakkar li s-settur tal-estrazzjoni jaqdi rwol importanti fl-ekonomiji ta' bosta pajjiżi Afrikani u huwa marbut ma' interdipendenza mhux ugwali tar-riżorsi mal-Ewropa, li għandha tiġi korretta billi tiġi indirizzata l-kwistjoni tal-flussi illeċiti ta' dħul mit-taxxa u royalties fis-settur tal-estrazzjoni permezz tad-Direttiva dwar it-Trasparenza u d-Direttiva dwar il-Kontabilità[12];

12. Jilqa' l-fatt li l-UE tqis il-paċi u s-sigurtà fl-Afrika bħala kundizzjoni ewlenija għall-iżvilupp sostenibbli u li l-Unjoni hija impenjata li "żżid b'mod sinifikanti l-appoġġ tagħha lill-Afrika f'kooperazzjoni mal-komunità internazzjonali"; jaqbel mal-fehma li l-kwistjoni tas-sigurtà fl-Afrika hija ta' importanza kbira għall-iżvilupp tal-kontinent bis-sostenn ta' organizzazzjonijiet reġjonali u internazzjonali, filwaqt li l-istati Afrikani huma l-garanti ewlenin tas-sigurtà tagħhom stess; jitlob, għalhekk, lill-UE tkompli bl-isforzi tagħha biex taħdem f'kooperazzjoni mas-sħab Afrikani tagħha fl-iżvilupp ulterjuri ta' Arkitettura Afrikana għall-Paċi u s-Sigurtà (APSA), tikseb paċi u stabbiltà fit-tul u tegħleb il-kriżijiet u l-kunflitti f'dak il-kontinent permezz ta' approċċ integrat li jisfrutta l-għodod kollha disponibbli, inkluż l-appoġġ għall-iżvilupp tal-kapaċitajiet ta' sigurtà u ta' difiża Afrikani u l-operazzjonijiet militari tagħha, il-missjonijiet ċivili, il-bini tal-paċi u l-proġetti ta' demilitarizzazzjoni b'rispett għad-drittijiet tal-bniedem u d-dritt umanitarju internazzjonali u l-indipendenza u s-sovranità tal-pajjiżi Afrikani, u l-appoġġ għal inizjattivi li joriġinaw mill-UA, minn organizzazzjonijiet reġjonali bħall-ECOWAS u l-G5 tas-Saħel; iħeġġeġ lill-Istati Membri jipparteċipaw f'missjonijiet u operazzjonijiet tal-UE u jilqa' l-isforzi bilaterali li jikkontribwixxu għall-paċi u l-istabbiltà u jħeġġeġ lill-Kunsill, f'dan ir-rigward, japprova malajr il-Fond Ewropew għall-Paċi sabiex jipprovdi assistenza aktar komprensiva lis-sħab Afrikani fir-reġjuni milquta mill-kunflitt; jenfasizza l-importanza tal-kooperazzjoni multilaterali fi ħdan it-triangolu UA-UE-NU fil-qasam tas-sigurtà lokali, reġjonali u internazzjonali u r-rwol tal-atturi tas-soċjetà ċivili fl-isforzi għaż-żamma tal-paċi u l-bini tal-paċi; ifakkar, f'dan ir-rigward, li r-riforma tas-settur tas-sigurtà, ir-riforma tal-ġustizzja, il-governanza tajba, ir-responsabbiltà demokratika, u l-protezzjoni taċ-ċivili huma prerekwiżit biex tintrebaħ il-fiduċja tal-popolazzjonijiet fil-gvernijiet u l-forzi tas-sigurtà tagħhom; jissottolinja, barra minn hekk, il-konnessjoni bejn iċ-ċivil u l-militar u l-ħtieġa li ż-żewġ komponenti tal-missjonijiet tal-Politika ta' Sigurtà u ta' Difiża Komuni (PSDK) jiġu armonizzati aħjar; jappoġġa l-approċċ dejjem aktar proattiv meħud mill-organizzazzjonijiet kooperattivi ta' sigurtà reġjonali lejn l-operazzjonalizzazzjoni sħiħa tal-APSA, li tipprovdi lill-Unjoni Afrikana u lill-organizzazzjonijiet fil-livell reġjonali bl-għodod meħtieġa għall-prevenzjoni, il-ġestjoni u s-soluzzjoni tal-kunflitti; ifaħħar, b'mod partikolari, inizjattivi bħall-G5 tas-Saħel minħabba r-rwol dejjem aktar kruċjali tiegħu fit-teħid ta' azzjoni deċiżiva biex in-nazzjonijiet Afrikani jiżguraw il-paċi u s-sigurtà fil-viċinat tagħhom stess u jistieden lill-Kummissjoni u lill-Istati Membri jżidu l-appoġġ politiku, finanzjarju, operattiv u loġistiku lill-G5 tas-Saħel; jisħaq fuq il-fatt li, sabiex jiġu żgurati livelli xierqa ta' sigurtà u żvilupp, il-pajjiżi Afrikani jrid ikollhom kapaċitajiet adegwati fis-setturi essenzjali kollha, l-aktar importanti fir-rigward tas-sigurtà u d-difiża; jistieden lill-Unjoni Ewropea tikkoordina l-inizjattivi ta' żvilupp u sigurtà li fihom hija involuta fil-kontinent Afrikan bħala parti minn strateġija integrata li tinkludi l-governanza tajba, id-demokrazija, id-drittijiet tal-bniedem, l-istat tad-dritt u l-ugwaljanza bejn il-ġeneri, b'enfasi partikolari fuq ir-reġjuni fejn il-vulnerabbiltajiet u t-tensjonijiet huma l-ogħla; jilqa' l-kooperazzjoni mwettqa bejn l-UE u l-Afrika fil-ġlieda kontra t-terroriżmu u l-gruppi armati f'konformità mad-dritt internazzjonali; u jitlob, biex fil-kuntest tal-politiki kontra t-terroriżmu, jiġu stabbiliti proċessi ta' teħid tad-deċiżjonijiet aktar trasparenti, aktar konformi ma' approċċ ibbażat fuq id-drittijiet tal-bniedem u aktar involviment mal-komunitajiet affettwati minn dawn il-miżuri;

13. Jissottolinja r-rwol importanti li s-Saħel għandu mil-lat strateġiku u ta' sigurtà, u f'dan ir-rigward jilqa' b'sodisfazzjon kbir il-ħolqien tal-G5 tas-Saħel fl-2014 kif ukoll il-Forza Konġunta tal-G5 (G5 Force Conjointe), li nħolqot fl-2017 biex tiġġieled it-theddid għas-sigurtà fir-reġjun;

14. Jenfasizza l-fatt li l-mandati tal-missjoni tal-PSDK huma komprensivi u għandhom l-għan, fost affarijiet oħra, li jrawmu r-riforma tas-settur tas-sigurtà, javvanzaw ir-riforma tal-ġustizzja u jsaħħu t-taħriġ militari u tal-pulizija, kif ukoll li jmexxu 'l quddiem is-sorveljanza; jissottolinja l-ħtieġa urġenti li tittejjeb kemm il-politika ta' komunikazzjoni tal-missjonijiet tal-PSDK kif ukoll l-ippjanar strateġiku ġenerali tal-UE bil-għan li tiżdied il-viżibbiltà tal-azzjonijiet tal-UE u l-għan tagħha li tissalvagwardja s-sigurtà u l-benessri tal-poplu Afrikan;

15. Jenfasizza r-rwol speċjali tal-entitajiet reliġjużi fl-Afrika li regolarment jaġixxu ta' medjaturi fil-kunflitti, li magħhom jeħtieġ li jkun hemm djalogu u kooperazzjoni, speċjalment fiż-żoni ta' kunflitt peress li d-djalogu interreliġjuż jista' jikkontribwixxi għall-paċi u r-rikonċiljazzjoni;

16. Jieħu nota li l-komunikazzjoni għandha l-għan li tapprofondixxi l-appoġġ tal-UE għall-isforzi għall-paċi Afrikani permezz ta' forma aktar strutturata u strateġika ta' kooperazzjoni li tiffoka fuq reġjuni fl-Afrika fejn it-tensjonijiet huma l-ogħla u jitlob li strateġiji speċifiċi fir-reġjuni ta' kunflitt jitqiesu bħala prijorità; iħeġġeġ lill-UE u lill-Istati Membri tagħha jkomplu l-kondiviżjoni tal-piżijiet ma' organizzazzjonijiet u sħab internazzjonali, inklużi alleati u stati Afrikani li jservu bħala alleati affidabbli kontra t-terroriżmu bħall-Kenja, il-Marokk, in-Niġerja, il-Ghana u l-Etjopja; jitlob li jissaħħu r-relazzjonijiet tal-UE ma' dawn l-istati ewlenin; jistieden lill-UE tkompli tassisti lis-sħab Afrikani fil-bini tal-kapaċità tal-forzi u tal-istituzzjonijiet tas-sigurtà tagħhom, sabiex tipprovdi servizzi ta' sigurtà u infurzar tal-liġi effettivi u sostenibbli liċ-ċittadini tagħhom, inkluż permezz tal-Faċilità Ewropea għall-Paċi u l-missjonijiet tal-PSDK tagħha, u jistieden lill-UE tiffoka fuq approċċ integrat għall-kunflitti u l-kriżijiet, filwaqt li taġixxi fl-istadji kollha taċ-ċiklu tal-kunflitt, mill-prevenzjoni u r-rispons tal-kunflitti sal-ġestjoni u s-soluzzjoni tal-kunflitti;

17. Jenfasizza l-fatt li l-objettiv tal-appoġġ tal-UE lis-settur tas-sigurtà Afrikan huwa li jħeġġeġ is-sjieda Afrikana rigward kwistjonijiet ta' sigurtà u difiża; iqis li l-Unjoni Afrikana u l-Istati Afrikani huma sħab ewlenin li magħhom l-UE hija involuta b'mod sinifikanti sabiex b'mod konġunt jinkisbu l-iżvilupp sostenibbli u s-sigurtà tal-bniedem; jilqa' bil-qawwa, f'dan ir-rigward, il-pjanijiet tal-Unjoni Afrikana li tibgħat 3 000 suldat b'appoġġ għall-G5 tas-Saħel u jarah bħala sinjal li l-UA u l-UE qed tassew isegwu objettivi ta' sigurtà simili, mibnija fuq objettivi u responsabbiltajiet kondiviżi; jilqa', f'dan ir-rigward, il-kummenti li saru mill-VP/RGħ Borrell lill-Kunsill tas-Sigurtà tan-NU fit-28 ta' Mejju 2020 meta tkellem dwar "is-sejba ta' soluzzjonijiet Afrikani għall-problemi Afrikani";

18. Jikkonferma mill-ġdid l-appoġġ tiegħu għall-missjonijiet għaż-żamma tal-paċi tan-NU fil-kontinent Afrikan u jistieden lill-atturi ewlenin, b'mod partikolari l-Istati Uniti tal-Amerka, ir-Russja, iċ-Ċina u r-Renju Unit, biex jingħaqdu mal-isforzi ta' medjazzjoni tal-UE u biex flimkien magħha javvanzaw il-kooperazzjoni u l-paċi sostenibbli fil-kontinent Afrikan kollu; itenni, f'dan ir-rigward, ir-rieda tal-UE li żżid l-appoġġ tagħha għall-missjonijiet tan-NU u li tavvanza l-koordinazzjoni bejn id-diversi missjonijiet tan-NU u tal-UE;

19. Ifakkar fl-importanza tar-rwol tal-Qorti Kriminali Internazzjonali (QKI) biex tiġi indirizzata l-impunità u biex jiġu difiżi l-valuri tal-paċi, is-sigurtà, l-ugwaljanza, il-korrettezza, il-ġustizzja u l-kumpens; jistieden lill-UE u lill-Istati Afrikani jkomplu jappoġġaw l-Istatut ta' Ruma u l-QKI; jistieden lill-Istati Afrikani kollha li għadhom ma ffirmawx u ma rratifikawx l-Istatut ta' Ruma biex jagħmlu dan;

20. Jisħaq fuq il-ħtieġa urġenti li l-UE tindirizza r-ribelljoni terroristika li qed teskala fit-Tramuntana tal-Mozambique, li diġà kkawżat aktar minn 1 000 persuna mejta u ġiegħlet lil madwar 200 000 persuna jaħarbu minn djarhom, u li toħloq riskju serju li tixtered fir-reġjun tan-Nofsinhar tal-Afrika; iħeġġeġ lill-VP/RGħ joffri l-appoġġ tal-UE lill-Mozambique u liċ-ċittadini tiegħu; jisħaq li n-nuqqas ta' reazzjoni mill-UE jista' jwassal biex atturi internazzjonali oħra jieħdu r-rwol ewlieni li l-Unjoni beħsiebha tikseb fil-kontinent;

21. Jenfasizza li l-konsegwenzi soċjoekonomiċi tal-COVID-19 jista' jkollhom impatt gravi fuq l-istati u s-soċjetajiet Afrikani u għalhekk itenni t-talba tiegħu biex jingħata appoġġ akbar lis-settur tas-saħħa fl-istati Afrikani kollha li talbuh; jappoġġa bil-qawwa r-rispons qawwi tal-UE għall-kriżi dwar id-dimensjoni esterna permezz tal-approċċ "Tim Ewropa" u jarah bħala sinjal reali ta' solidarjetà globali u ta' valuri Ewropej; jinsab imħasseb dwar in-nuqqas mifrux ta' apparat mediku fis-settur tal-kura tas-saħħa fl-Afrika, li jpoġġi s-saħħa tal-ħaddiema tal-kura tas-saħħa u tal-pazjenti f'riskju, b'mod partikolari fil-każ ta' tifqigħat ta' virus; jistieden lill-UE u lill-Istati Membri tagħha jiskopru modi kif jassistu lill-pajjiżi Afrikani bil-provvisti mediċi kull meta jkun possibbli;

22. Jappella għal appoġġ akbar mill-UE għall-Afrika fil-qasam tal-ġustizzja fiskali u t-trasparenza fiskali, it-tnaqqis u l-ġestjoni tad-dejn, b'mod partikolari f'każijiet ta' dejn odjuż, u s-sostenibbiltà tad-dejn bħala messaġġ ċar ta' solidarjetà matul il-kriżi pandemika tal-COVID-19; jemmen li dan ikun pass importanti fil-bini ta' "sħubija bejn partijiet ugwali", kif iddikjarat mill-Kummissjoni, u b'hekk titwarrab r-relazzjoni bejn donatur u riċevitur li ilha għal ħafna żmien tikkaratterizza r-relazzjonijiet UE-Afrika; jilqa' b'sodisfazzjon kbir it-tħabbira mill-G20 li jissospendi l-pagamenti kollha tad-dejn għall-ifqar pajjiżi tad-dinja sa tmiem l-2020;

23. Jisħaq fuq il-fatt li l-għajnuna għall-iżvilupp hija fundamentali għad-diversifikazzjoni tal-ekonomiji tal-pajjiżi Afrikani u biex dawn ilaħħqu mal-kriżi ekonomika u soċjali attwali; jistieden lill-UE u lill-Istati Membri tagħha jżidu l-għajnuna finanzjarja u umanitarja biex jissodisfaw il-ħtiġijiet urġenti tal-popolazzjonijiet; jitlob li l-għajnuna tal-UE u tal-Istati Membri tkun fil-forma ta' għotjiet u mhux self sabiex ma jiżdiedx il-piż tad-dejn; jiddeplora l-fatt li ħafna Stati Membri naqsu milli jilħqu l-mira ta' 0,7 % tal-introjtu nazzjonali gross u li xi wħud saħansitra naqqsu l-kontribuzzjonijiet tagħhom għall-għajnuna għall-iżvilupp;

24. Jissottolinja l-fatt li l-Afrika, bħala kontinent sinjur fir-riżorsi, b'ekonomiji dinamiċi u li qed jiżviluppaw li juru livelli għoljin ta' tkabbir, klassi medja li qed tikber u popolazzjoni żagħżugħa u kreattiva, hija kontinent ta' opportunitajiet li wera, f'diversi okkażjonijiet, li l-progress ekonomiku u l-iżvilupp huma possibbli; jisħaq fuq l-importanza li tkompli tingħata spinta lill-infrastruttura diġitali tal-Afrika fil-proċess tad-diġitalizzazzjoni u li jiġu żgurati konnettività xierqa u aċċess għall-internet madwar il-kontinent, kemm fiż-żoni rurali kif ukoll f'dawk urbani; jenfasizza li l-ekonomija diġitali fl-Afrika tipprovdi mhux biss opportunitajiet għal aktar ħolqien ta' impjiegi u data dwar osservazzjonijiet li tista' tittieħed azzjoni dwarhom, iżda wkoll il-bażi għall-promozzjoni tad-drittijiet tal-bniedem, l-aċċellerazzjoni tal-aċċess għal servizzi bażiċi ta' kwalità, it-titjib tat-trasparenza u r-responsabbiltà tal-gvernijiet, u t-tisħiħ tad-demokrazija; jappella għal kooperazzjoni kontinwa, imsaħħa, sistematika u ta' benefiċċju reċiproku mal-Istati Afrikani dwar id-diġitalizzazzjoni, it-teknoloġiji u s-soluzzjonijiet innovattivi fil-livelli kollha tas-soċjetà, inkluż dwar il-governanza elettronika, il-kummerċ elettroniku, il-ħiliet diġitali u ċ-ċibersigurtà, bi qbil mal-approċċ Diġitali għall-Iżvilupp (D4D); jistieden lill-UE taħdem mill-qrib mas-sħab Afrikani biex tiżgura s-sigurtà, ir-reżiljenza u d-deterrenza kontra ċ-ċiberkriminalità u tipprevjeni l-isfruttament tal-internet għat-terroriżmu u l-estremiżmu vjolenti;

25. Jenfasizza l-fatt li l-Afrika hija affettwata b'mod sproporzjonat mill-impatti negattivi tat-tibdil fil-klima; jinnota li għandna responsabbiltà komuni li nintroduċu miżuri għall-ġlieda kontra t-tibdil fil-klima permezz tal-promozzjoni tal-protezzjoni kontra t-tibdil fil-klima tal-investimenti, l-adattament, l-aċċess deċentralizzat għall-enerġija rinnovabbli, u l-mitigazzjoni tal-klima fil-kontinent Afrikan; jisħaq fuq l-importanza tat-tibdil fil-klima bħala multiplikatur tar-riskju għal kunflitti, in-nixfa, il-ġuħ u l-migrazzjoni fl-Afrika u madwar id-dinja; jitlob li l-istrateġija UE-Afrika tindirizza b'mod espliċitu l-migrazzjoni klimatika; jissottolinja r-rwol kruċjali tad-diplomazija fil-qasam tal-ilma, peress li, bħala riżultat tat-tibdil fil-klima, hemm ir-riskju li l-ilma jsir riżorsa dejjem aktar skarsa, u jistieden, f'dan il-kuntest, lill-Etjopja, lill-Eġittu u lis-Sudan jilħqu soluzzjoni paċifika u ta' benefiċċju reċiproku fir-rigward tat-tlestija tad-diga Grand Ethiopian Renaissance; jilqa' l-medjazzjoni tal-Istati Uniti u tal-Bank Dinji f'dan il-każ u jistieden lill-UA u lill-UE jagħmlu dak kollu possibbli biex jiffaċilitaw soluzzjoni kostruttiva; jissottolinja l-ħtieġa għal diplomazija klimatika aktar effettiva sabiex jiġu promossi r-rabtiet bejn il-politika domestika, barranija u internazzjonali dwar il-klima; jinkoraġġixxi sforzi akbar biex jingħeleb il-paradoss li l-Afrika, minkejja li hija għanja ħafna f'sorsi ta' enerġija sostenibbli, għadha tiddependi ħafna fuq sorsi ta' enerġija tradizzjonali, li jikkontribwixxu għat-tibdil fil-klima u mhumiex inklużivi, peress li l-parti kbira tal-familji Afrikani għadhom qed ibatu l-faqar enerġetiku; iħeġġeġ, għalhekk, lill-pajjiżi Afrikani biex jisfruttaw il-potenzjal enormi tas-setturi tal-enerġija tagħhom għat-tkabbir u l-impjiegi, u jistieden lill-investituri privati jinvolvu ruħhom fi proġetti innovattivi;

26. Jesprimi t-tħassib tiegħu li l-Botswana, il-Ghana, l-Uganda u ż-Żimbabwe huma inklużi fil-lista s-sewda aġġornata tal-UE ta' pajjiżi li għandhom nuqqasijiet strateġiċi fir-reġimi tagħhom kontra l-ħasil tal-flus/il-ġlieda kontra l-finanzjament tat-terroriżmu (AML/CFT), u jappella lil dawn il-pajjiżi biex minnufih jieħdu l-passi meħtieġa biex jikkonformaw mal-leġiżlazzjoni meħtieġa u l-implimentazzjoni tagħha (jiġifieri r-Regolament Delegat tal-Kummissjoni (UE) Nru 2020/855[13]); jilqa' l-fatt li l-Etjopja u t-Tuneżija, wara li wettqu għadd ta' riformi, issa tneħħew mil-lista s-sewda;

27. Itenni li l-iżvilupp ekonomiku sostenibbli fit-tul, u l-ħolqien sussegwenti ta' impjiegi deċenti u mħallsa tajjeb, b'mod partikolari għaż-żgħażagħ, huma prerekwiżit għall-iżvilupp u l-prosperità tal-poplu Afrikan u fl-aħħar mill-aħħar għall-kisba ta' stabbiltà politika, demokrazija u żieda fid-drittijiet ċivili u tal-bniedem; jilqa', f'dan ir-rigward, l-isforzi magħmula mill-Kummissjoni biex tagħmel mill-"Alleanza Afrika-Ewropa'" pilastru ċentrali tar-relazzjonijiet ekonomiċi bejn iż-żewġ kontinenti; jirrimarka l-ħtieġa ta' riformi ekonomiċi strutturali u l-importanza li jiġu avvanzati l-kapaċitajiet ta' produzzjoni domestika u tal-manifattura, li jgħinu biex titnaqqas id-dipendenza fuq l-importazzjonijiet barranin; ifakkar fil-ħtieġa li l-UE ssaħħaħ l-appoġġ għall-intrapriżi żgħar u ta' daqs medju (SMEs) u jindika l-opportunitajiet ipprovduti mill-Aġenzija Eżekuttiva tal-UE għall-SMEs (EASME) biex tippromwovi l-kooperazzjoni bejn in-negozji u l-impriżi konġunti ma' kumpaniji Afrikani, li mhux biss iżid il-viżibbiltà tal-opportunitajiet ta' negozju iżda jrawwem ukoll l-aċċess tant meħtieġ għall-finanzi u l-aċċess għat-teknoloġija permezz tat-trasferiment tal-għarfien; jissottolinja, barra minn hekk, il-ħtieġa li jittejbu l-iskemi ta' protezzjoni tal-investiment sabiex jiġu ffaċilitati u mħeġġa aktar investimenti; jistieden lill-istituzzjonijiet tal-UE u lill-Istati Membri jaġixxu bħala atturi aktar konsistenti u unifikati fl-indirizzar tal-kontinent Afrikan u biex javvanzaw il-koordinazzjoni interna sabiex jiddefinixxu aħjar triq komuni 'l quddiem; jenfasizza, f'dan il-kuntest, il-ħtieġa li tiġi żviluppata strateġija koerenti u komprensiva lejn l-Afrika, li trid tibni fuq l-isforzi eżistenti Afrikani u Ewropej u li tkun iċċentrata fuq il-ħolqien ta' opportunitajiet ekonomiċi u ta' impjiegi; iħeġġeġ lill-UE tkompli tappoġġa l-proċess ta' integrazzjoni fl-Afrika permezz tal-UA, b'mod partikolari billi tappoġġa l-implimentazzjoni taż-Żona ta' Kummerċ Ħieles Kontinentali Afrikana (AfCFTA); jirrikonoxxi l-ambizzjonijiet tan-nazzjonijiet Afrikani li jegħlbu l-isfidi eżistenti u jilqa' bil-qawwa d-dħul fis-seħħ tal-AfCFTA, bħala għodda biex in-nazzjonijiet Afrikani jiżviluppaw bis-sħiħ il-potenzjal tagħhom stess, u b'hekk iqawwu l-awtonomija u r-reżiljenza tagħhom għall-pressjonijiet esterni; jissottolinja l-potenzjal ekonomiku u politiku enormi li għandha għall-futur tal-kummerċ Afrikan u globali; iħeġġeġ lill-Kummissjoni u lill-Istati Membri jestendu l-assistenza massima tagħhom billi jaqsmu l-aħjar prattiki tal-esperjenza miksuba fl-UE sabiex jikkontribwixxu għall-implimentazzjoni b'suċċess tal-AfCFTA hekk kif is-sitwazzjoni tas-saħħa tippermetti; huwa tal-fehma li suq uniku Afrikan u suq diġitali uniku Afrikan ikunu valur miżjud nett kemm f'termini ekonomiċi, politiċi kif ukoll kulturali, u jindika, barra minn hekk, il-ħtieġa li jsir investiment sinifikanti fl-infrastruttura tat-trasport biex jiġi ffaċilitat il-kummerċ intra-Afrikan; jisħaq li l-istrateġija l-ġdida UE-Afrika għandha tippromwovi kummerċ ġust u etiku u standards tax-xogħol u ambjentali;

28. Jissottolinja bil-qawwa l-importanza tar-rwol tal-istituzzjonijiet tal-istat, l-awtoritajiet u l-infrastruttura li jiffunzjonaw, u jemmen li n-nuqqas tagħhom jista' jkun ostaklu sinifikanti għall-iżvilupp, il-paċi u l-progress; jissottolinja l-importanza tas-salvagwardja tas-sigurtà tal-ikel u tal-ġlieda kontra l-malnutrizzjoni, b'mod partikolari fil-biedja fuq skala żgħira, u jisħaq fuq l-importanza tat-trasformazzjoni agrikola multisettorjali u l-iżvilupp rurali fil-pajjiżi u r-reġjuni Afrikani kollha, li jwasslu għall-ħolqien tal-impjiegi u d-deċentralizzazzjoni tal-komunitajiet minn żoni urbani kbar; jenfasizza l-ħtieġa li jinħolqu opportunitajiet ekonomiċi u impjiegi, li huwa ta' importanza ewlenija meta wieħed ifakkar fix-xejriet demografiċi fil-kontinent Afrikan; jirrimarka, f'dan il-kuntest, l-impatt pożittiv tal-Pjan ta' Investiment Estern tal-UE, li ġie varat mill-ex President tal-Kummissjoni Juncker fl-2017, u jesprimi l-appoġġ qawwi tiegħu għall-Alleanza Afrika-Ewropa għal investimenti u impjiegi sostenibbli, li ġiet varata b'riżultat ta' dan;

29. Jirrikonoxxi l-isfidi u l-opportunitajiet kumplessi li l-movimenti tal-migrazzjoni għandhom kemm fl-Ewropa kif ukoll fl-Afrika għall-prosperità u l-iżvilupp taż-żewġ kontinenti u jisħaq fuq il-ħtieġa li tissaħħaħ il-kooperazzjoni tagħhom, abbażi tar-rispett għad-drittijiet tal-bniedem u d-dritt internazzjonali, il-prinċipji ta' kooperazzjoni, solidarjetà, il-bilanċ u responsabbiltà kondiviża; jissottolinja li l-iżvilupp Afrikan huwa bbażat fuq il-kapaċitajiet tal-poplu tiegħu, u għalhekk il-migrazzjoni m'għandhiex twassal għal eżodu ta' mħuħ; jenfasizza l-importanza li tinbena strateġija fit-tul biex jiġu miġġielda n-networks ta' faċilitaturi ta' dħul klandestin ta' bnedmin u traffikanti tal-bnedmin biex tiġi evitata l-migrazzjoni irregolari mill-pajjiżi Afrikani lejn l-UE u biex jissaħħaħ id-Djalogu UE-Afrika dwar il-Migrazzjoni u l-Mobilità (MMD) u s-Sħubija Afrika-UE dwar il-Migrazzjoni, il-Mobilità u l-Impjiegi (MME); huwa tal-opinjoni, madankollu, li ż-żewġ sħab għandhom jiffukaw ukoll aktar fuq l-indirizzar tal-kawżi fundamentali tal-migrazzjoni u jagħmlu użu aktar effettiv mill-istrumenti eżistenti u ġodda ta' kooperazzjoni għall-iżvilupp; jinnota li 36 pajjiż mill-pajjiżi l-aktar fraġli tad-dinja jinsabu fl-Afrika, spiss imdgħajfa minħabba l-kunflitti, filwaqt li l-kontinent jospita 390 miljun persuna li jgħixu taħt il-linja tal-faqar; jisħaq fuq il-fatt li n-nuqqas ta' progress ekonomiku fir-reġjun, il-governanza dgħajfa, l-instabbiltà, il-ksur tad-drittijiet tal-bniedem, il-korruzzjoni, in-nuqqas ta' stat tad-dritt u l-impunità, l-inugwaljanza, il-qgħad, it-tkabbir tal-popolazzjoni f'xi wħud mill-pajjiżi l-aktar foqra u sottożviluppati, flimkien mal-effetti tat-tibdil fil-klima u dawk ambjentali u akkumpanjati minn fatturi bħall-kunflitti vjolenti, ir-radikalizzazzjoni u l-proliferazzjoni tal-kriminalità organizzata inevitabbilment se jwasslu għal sensiela ta' sfidi ġodda, li, jekk ma jiġux indirizzati immedjatament, jistgħu jirriżultaw fi spostament furzat u movimenti migratorji mħallta - kemm fi ħdan il-kontinent Afrikan u lejn l-Ewropa, li jistgħu jwasslu għal xenarji ta' sfida qawwija għall-pajjiżi Afrikani, l-Unjoni Ewropea u għall-Istati Membri tagħha; ifakkar li, fil-kontinent Afrikan, għall-kuntrarju tat-twemmin komuni, il-migrazzjoni intrareġjonali qed tkompli tissupera l-migrazzjoni extraterritorjali u jirrikonoxxi li l-pajjiżi Afrikani jospitaw parti kbira mill-għadd totali ta' rifuġjati u persuni spostati internament madwar id-dinja; jisħaq, għalhekk, fuq il-ħtieġa li tinbena strateġija kondiviża fit-tul u li tissaħħaħ il-kooperazzjoni fl-oqsma kollha, li tenfasizza l-ħtieġa li jiġu miġġielda l-iffaċilitar tad-dħul klandestin tal-bnedmin u r-rotot tal-migrazzjoni irregolari, u biex jiġu stabbiliti opportunitajiet ta' risistemazzjoni; jinnota li l-Afrika u l-Ewropa għandhom interess u responsabbiltà komuni f'dak li għandu x'jaqsam mal-migrazzjoni u l-mobilità u jisħaq li l-ġestjoni tal-migrazzjoni titlob soluzzjonijiet globali li huma bbażati fuq il-prinċipji tal-kooperazzjoni, is-solidarjetà, il-bilanċ u r-responsabbiltà kondiviża u r-rispett għad-drittijiet tal-bniedem u d-dritt internazzjonali u ż-żamma ta' approċċ sostenibbli biex jiġi indirizzat iċ-ċaqliq sfurzat u l-movimenti tar-rifuġjati; jistieden lill-Kummissjoni u lis-Servizz Ewropew għall-Azzjoni Esterna (SEAE) jieħdu azzjonijiet speċifiċi biex jipproteġu lill-migranti mill-mewt, l-għajbien, is-separazzjoni tal-familja u l-ksur tad-drittijiet tagħhom; huwa tal-opinjoni, madankollu, li ż-żewġ sħab għandhom jiffukaw aktar fuq il-kawżi fundamentali tal-faqar u l-inugwaljanzi u fuq l-użu effettiv tal-istrumenti ta' kooperazzjoni għall-iżvilupp; jitlob li jiġu stabbiliti mekkaniżmi effettivi biex tkun tista' tiġi kkontrollata bir-reqqa d-destinazzjoni finali tal-Istrumenti Finanzjarji Esterni u biex jiġu vvalutati l-proġetti li rċevew finanzjament; jinkoraġġixxi t-tkomplija tal-kooperazzjoni mal-Organizzazzjoni Internazzjonali għall-Migrazzjoni u aġenziji oħra tan-NU biex jingħata appoġġ addizzjonali lir-rifuġjati u lill-persuni spostati internament;

30. Jissottolinja bil-qawwa r-rwol importanti tal-istituzzjonijiet tal-istat, l-awtoritajiet u l-infrastruttura li jiffunzjonaw u jemmen li n-nuqqas tagħhom jista' jkun ostaklu sinifikanti għall-iżvilupp, il-paċi u l-progress; jissottolinja li s-sigurtà, l-istabbiltà u fl-aħħar mill-aħħar il-prosperità u l-iżvilupp sostenibbli se jinkisbu biss fir-reġjuni kkonċernati jekk tiġi segwita strateġija komprensiva; ifakkar, f'dan ir-rigward, li r-riforma tas-settur tas-sigurtà, ir-riforma tal-ġustizzja, il-governanza tajba, ir-responsabbiltà demokratika, u l-protezzjoni taċ-ċivili huma prerekwiżit biex tintrebaħ il-fiduċja tal-popolazzjonijiet fil-gvernijiet u fil-forzi tas-sigurtà tagħhom; jenfasizza li, filwaqt li għadd ta' pajjiżi għadhom qed jitħabtu mal-korruzzjoni, man-nuqqas ta' governanza tajba u mal-libertajiet soċjali u politiċi, ħafna pajjiżi bdew it-tranżizzjoni lejn ir-riformi u d-demokrazija; ifaħħar, f'dan ir-rigward, u b'mod partikolari lill-poplu tas-Sudan, għall-kuraġġ u l-qlubija tagħhom; ifakkar li l-pajjiżi fi tranżizzjoni huma partikolarment vulnerabbli u għandhom ikunu jistgħu jiddependu fuq l-UE meta jitolbu appoġġ; jitlob, għalhekk, appoġġ u assistenza kkoordinati tajjeb lil dawk il-pajjiżi fil-bini ta' stati u soċjetajiet aktar reżiljenti sabiex jinżammu u jiġu appoġġati l-aspirazzjonijiet għal bidla pożittiva kif espressi mill-popli tagħhom; jissuġġerixxi li l-VP/RGħ jistabbilixxi gruppi ta' kuntatt ad hoc speċjali li jissemplifikaw u jiffaċilitaw l-appoġġ fl-UE kollha għal pajjiżi fi tranżizzjoni individwali; huwa tal-fehma li għandhom isiru aktar sforzi biex jiġu promossi sistemi politiċi inklużivi b'diversi partiti u governanza demokratika u responsabbli fl-Afrika, speċjalment fi stati fraġli, billi jiġu ffaċilitati l-gruppi ta' ħidma bejn iċ-ċittadini u l-gvern u s-sorveljanza parlamentari – inkluż permezz tal-użu ta' pjattaformi teknoloġiċi – biex jinġabar il-kontribut taċ-ċittadini dwar kwistjonijiet ta' politika u biex jiġu promossi l-aħjar prattiki permezz ta' skambji bejn il-pari, sabiex tissaħħaħ ir-responsabbiltà tal-gvern u r-rispons tiegħu, li huwa fundamentali biex jinkiseb żvilupp sostenibbli, jiġu indirizzati l-isfidi globali u jitnaqqas ir-riskju tat-tixrid tal-instabbiltà; jisħaq fuq l-importanza li jiġu inklużi l-prinċipji tat-trasparenza u l-governanza tajba fl-istrateġija UE-Afrika u fl-ippjanar, l-implimentazzjoni u l-evalwazzjoni tagħha;

31. Jilqa' l-inizjattiva tal-Patt tal-G20 mal-Afrika (CwA), varata fl-2017 sabiex jiġi promoss l-investiment privat fl-Afrika, inkluż fl-infrastruttura u jaraha bħala pjattaforma tajba għall-avvanz ta' aġendi ta' riforma komprensivi, koordinati u speċifiċi għall-pajjiż; jilqa' l-fatt li, s'issa, 12-il pajjiż Afrikan ingħaqdu mal-inizjattiva: il-Benin, il-Burkina Faso, il-Kosta tal-Avorju, l-Eġittu, l-Etjopja, il-Ghana, il-Guinea, il-Marokk, ir-Rwanda, is-Senegal, it-Togo u t-Tuneżija;

32. Jilqa' t-tnaqqis deċiżiv fil-piraterija 'l barra mill-kosti tal-Afrika tal-Lvant u tal-Punent bħala riżultat ta' sforzi ta' sigurtà marittima internazzjonali li jservu ta' preċedent għall-kooperazzjoni fis-sigurtà Ewropea, Afrikana u transatlantika;

33. Iqis li huwa importanti li l-UE tkompli bl-isforzi tagħha biex tibni stati u soċjetajiet aktar reżiljenti permezz tat-tisħiħ tal-kapaċitajiet u r-riformi tas-settur tas-sigurtà, inkluż permezz tal-Faċilità Ewropea għall-Paċi u l-missjonijiet tal-PSDK tagħha, u tiffoka fuq approċċ integrat għall-kunflitti u l-kriżijiet, filwaqt li taġixxi fl-istadji kollha taċ-ċiklu tal-kunflitt;

34. Huwa tal-fehma li l-UE għandha tagħmel aktar sforzi biex issaħħaħ l-istat tad-dritt, ir-riforma tas-sistemi ġudizzjarji u l-ġestjoni tal-finanzi pubbliċi; jisħaq fuq il-fatt li l-istituzzjonijiet responsabbli jgħinu fil-promozzjoni ta' tkabbir ekonomiku aktar ekwu u sostnut, li jgħin biex jiġu indirizzati l-flussi finanzjarji illeċiti, il-kriminalità organizzata serja, u l-kultura ta' impunità; jinnota l-importanza tal-appoġġ u l-kooperazzjoni tal-UE mal-pajjiżi Afrikani fil-ġlieda kontra l-korruzzjoni; ifakkar li huwa stmat li l-flussi finanzjarji illeċiti (IFFs) jikkostitwixxu problema sostanzjali għall-pajjiżi li qed jiżviluppaw u li fl-Afrika l-flussi finanzjarji illeċiti jammontaw għal USD 50 biljun – darbtejn l-ammont tal-għajnuna għall-iżvilupp uffiċjali; jisħaq li r-rapport tal-Bord ta' Livell Għoli tan-NU dwar l-IFFs mill-Afrika evalwa l-attivitajiet kummerċjali li jammontaw għal 65 % tal-IFFs; jistieden lill-UE tadotta qafas regolatorju dwar il-korruzzjoni, id-drittijiet obbligatorji tal-bniedem u d-diliġenza dovuta ambjentali u l-obbligu ta' rendikont korporattiv għall-kumpaniji Ewropej li jinvestu u joperaw fl-Afrika;

35. Jissottolinja l-importanza li jingħata appoġġ għal elezzjonijiet ħielsa, ġusti u kompetittivi u favur proċessi elettorali kredibbli; jappoġġa l-koordinazzjoni bejn l-UE u l-UA dwar il-missjonijiet ta' osservazzjoni elettorali u l-assistenza fit-titjib tal-kapaċità tal-UA fit-twettiq ta' osservazzjoni elettorali fit-tul, li tagħmilhom konformi mal-istandards internazzjonali, u l-kooperazzjoni bilaterali mal-pajjiżi rispettivi u s-soċjetajiet ċivili tagħhom, fi sforz biex jitwettqu elezzjonijiet inklużivi, trasparenti u kredibbli fl-Afrika; jindika, għalhekk, l-għadd kbir ta' missjonijiet ta' osservazzjoni elettorali (MOE) immexxija mill-UE, li għandhom l-appoġġ qawwi tal-Parlament; iħeġġeġ lill-UE, lill-NGOs Ewropej, lill-partiti politiċi u lis-soċjetà ċivili jikkooperaw mill-qrib mal-kontropartijiet Afrikani, inklużi uffiċjali pubbliċi, biex jiġġeneraw djalogu politiku sostantiv permezz tal-iżvilupp ta' politiki bbażati fuq kwistjonijiet, jippromwovu prattiki b'saħħithom ta' governanza demokratika, isaħħu r-rappreżentanza u l-inklużjoni ta' popolazzjonijiet emarġinati; u biex jippromwovu parteċipazzjoni sinifikanti mis-soċjetà ċivili u ċ-ċittadini fil-ħajja pubblika fil-livelli kollha;

36. Jappella lill-UA, lill-Unjoni Ewropea u l-Istati Membri tagħhom, jiżguraw kooperazzjoni aktar b'saħħitha fir-rigward tal-promozzjoni u l-protezzjoni tad-drittijiet tal-bniedem, id-difensuri tad-drittijiet tal-bniedem, is-soċjetà ċivili, u biex jagħtu appoġġ politiku u finanzjarju sħiħ għall-mekkaniżmi tad-drittijiet tal-bniedem rispettivi tagħhom; iqis li l-parteċipazzjoni komuni fix-xena globali biex issaħħaħ l-ordni multilaterali bbażat fuq ir-regoli tirrikjedi valuri kondiviżi u rispett għad-dritt internazzjonali u d-drittijiet fundamentali; huwa tal-fehma li istituzzjonijiet demokratiċi stabbli, elezzjonijiet ħielsa u ġusti, u l-edukazzjoni huma kollha prerekwiżiti għall-iżvilupp u jridu jkunu fil-qalba tal-kooperazzjoni UE-Afrika; jisħaq fuq il-fatt li s-soċjetà ċivili trid tkun inklużiva biex tirrappreżenta l-minoranzi kollha u jesprimi t-tħassib serju tiegħu li d-drittijiet tagħhom, inklużi l-persuni LGBTIQ, fil-biċċa l-kbira mhumiex protetti fil-kontinent kollu; iqis li l-kooperazzjoni interkontinentali bejn l-UE u l-Afrika tista' tikkontribwixxi b'mod sinifikanti għall-ġlieda kontra l-ksenofobija u l-fundamentaliżmu u għall-istabbilizzazzjoni tar-reġjun tal-Mediterran; jenfasizza r-rwol kruċjali mwettaq mis-soċjetà ċivili u d-difensuri tad-drittijiet tal-bniedem fit-tisħiħ tad-demokrazija, il-paċi, l-istat tad-dritt u l-protezzjoni tad-drittijiet tal-bniedem fiż-żewġ kontinenti; jisħaq fuq il-ħtieġa li tissaħħaħ il-parteċipazzjoni tas-soċjetà ċivili fis-Sħubija Afrika-UE bil-promozzjoni tat-tisħiħ tal-kapaċitajiet; jistieden lill-Unjoni Ewropea tappoġġa inizjattivi konkreti biex jissaħħu l-organizzazzjonijiet tas-soċjetà ċivili u d-drittijiet tal-bniedem; jenfasizza r-rwol importanti ta' settur tal-midja u tal-istampa ħieles u vibranti u jfakkar li huwa kruċjali biex jiġi żgurat li l-pubbliku jkun infurmat tajjeb u jkun jista' jiddefinixxi l-prijoritajiet tiegħu stess; jisħaq fuq il-fatt li settur tal-midja u tal-istampa ħieles u vibranti jżid ir-reżiljenza kontra l-aħbarijiet foloz; jistieden lill-UE tkun involuta b'mod aktar attiv flimkien mal-Afrika fir-rigward tal-appoġġ għal-libertà tal-espressjoni, il-pluraliżmu tal-midja u s-sikurezza tal-ġurnalisti; u jissottolinja r-rwol importanti ta' stampa ħielsa fir-rigward tal-ġlieda kontra l-korruzzjoni u s-superviżjoni u r-responsabbiltà tal-awtoritajiet pubbliċi; jisħaq fuq l-importanza li jiġu inklużi klawżoli legalment vinkolanti dwar id-drittijiet tal-bniedem fil-ftehimiet internazzjonali kollha tal-UE, b'mekkaniżmu ta' konsultazzjoni ċar u preċiż imfassal fuq l-Artikolu 96 tal-Ftehim ta' Cotonou; jilqa' f'dan ir-rigward il-fatt li ddaħħlet klawżola simili fil-ftehimiet ta' kummerċ ħieles tal-ġenerazzjoni l-ġdida;

37. Jissottolinja li l-futur tal-Afrika jinsab f'idejn il-ġenerazzjoni żagħżugħa tagħha; jistieden lill-UE tappoġġa inizjattivi konkreti li jagħtu s-setgħa liż-żgħażagħ u lin-nisa fl-istrateġija UE-Afrika mġedda tagħha u tiżgura l-parteċipazzjoni attiva tagħhom fil-proċessi tat-teħid tad-deċiżjonijiet tal-ħajja ċivika u politika; jisħaq fuq il-fatt li l-iżvilupp tal-Afrika jiddependi fuq l-inklużjoni tal-edukazzjoni u li jeħtieġ li jkomplu jiġu indirizzati l-inugwaljanzi fl-edukazzjoni u li jiżdied l-investiment fil-politiki u l-programmi tal-edukazzjoni u tas-saħħa għall-iżvilupp tat-tfal u ż-żgħażagħ; jissottolinja li l-kooperazzjoni UE-Afrika trid ikollha element xieraq tas-soċjetà ċivili u għalhekk ma jistax ikollha approċċ minn fuq għal isfel, jitlob li jsiru aktar sforzi f'dan il-qasam biex isir avvanz fir-relazzjonijiet bejn il-persuni, speċjalment fost iż-żgħażagħ; jirrimarka, f'dan il-kuntest, l-impatt pożittiv u importanti fit-tul ta' Erasmus+; ifakkar li l-ġid ta' talent żagħżugħ fl-Afrika jista' jilħaq il-potenzjal tiegħu biss meta l-Afrika u s-sħab tagħha jinvestu fl-edukazzjoni u l-innovazzjoni; jisħaq fuq il-fatt li l-governanza tajba u l-iżvilupp b'suċċess huma prerekwiżit indispensabbli biex jintlaħaq dan l-għan, u jistieden lill-UE torbot l-għajnuna għall-iżvilupp mal-istandards tal-edukazzjoni għolja u t-tisħiħ tal-pożizzjoni tan-nisa; jesprimi d-dispjaċir tiegħu li l-komunikazzjoni tal-Kummissjoni tinjora d-dimensjoni tal-politika kulturali barranija u l-potenzjal promettenti offrut minn kollaborazzjoni kulturali Ewropea u Afrikana approfondita; iħeġġeġ, għalhekk, lill-Kummissjoni u lis-SEAE jagħtu prijorità lil dan il-qasam billi jippromwovu u jiffinanzjaw sħubijiet bikontinentali bejn l-istituzzjonijiet u l-individwi; iħeġġeġ, għalhekk, lill-Kummissjoni tipproponi inizjattiva komprensiva UE-Afrikana biex tirrifletti l-istorja kolonjali mħabbla u tinvestiga każijiet ta' approprjazzjoni illeċita u tesplora miżuri ta' ripatrijazzjoni u restituzzjoni ta' artefatti kulturali ta' oriġini Afrikana;

38. Ifakkar it-theddida li l-kriminalità organizzata transnazzjonali, l-inkwiet ċivili u l-kriminalità domestika joħolqu għal Stati fraġli u ta' wara l-kunflitt, li jsibuha diffiċli biex jipprovdu s-sigurtà meħtieġa liċ-ċittadini tagħhom; jissottolinja, f'dan ir-rigward, l-importanza ta' forza tal-pulizija nazzjonali u reġjonali mħarrġa sew; jinnota, madankollu, li l-forza tal-pulizija spiss hija nieqsa mit-taħriġ kif ukoll mit-tagħmir xieraq, u, l-aktar kruċjali, mhux dejjem ikollha komunikazzjoni tajba mal-popolazzjoni lokali u l-fiduċja tagħha; jissottolinja, għalhekk, l-importanza tat-tisħiħ u l-bini ta' strutturi professjonali tal-pulizija, u jitlob, fost l-oħrajn, appoġġ kunċettwali, loġistiku u amministrattiv intensifikat għall-Mekkaniżmu Afrikan għall-Kooperazzjoni tal-Pulizija f'Algiers, li ġie varat fl-2014; jemmen li l-kooperazzjoni f'dan il-qasam se tgħin ukoll biex tiġi avvanzata l-kapaċità tal-missjonijiet għaż-żamma tal-paċi u biex trawwem il-komponent tal-pulizija tal-APSA;

39. Jinnota li l-isfera tal-informazzjoni fl-Afrika hija dejjem aktar influwenzata mill-avversarji globali tagħna; jistieden, f'dan ir-rigward, lis-SEAE u lill-Kummissjoni jindirizzaw b'mod attiv il-problema tan-nuqqas ta' preżenza ta' vuċi Ewropea fis-soċjetajiet Afrikani u biex jiġġieldu kontra n-narrattivi foloz u jippromwovu aħjar l-approċċ Ewropew u l-valuri demokratiċi għall-poplu Afrikan; jinnota li dan ikun jeħtieġ komunikazzjoni strateġika aħjar li tkun iffukata fuq reġjuni u pajjiżi ewlenin, u tirrikjedi l-istabbiliment ta' unità speċjali responsabbli għal tali azzjonijiet li taħdem f'kooperazzjoni mill-qrib mad-delegazzjonijiet tal-UE;

40. Jissottolinja l-perikli tal-proliferazzjoni ta' armi ħfief illeċiti, u billi dawn l-armi mingħajr dokumenti, u fil-biċċa l-kbira jinżammu illegalment, mhux biss jheddu s-sikurezza u s-sigurtà tal-komunitajiet iżda huma wkoll jintużaw minn networks kriminali transnazzjonali perikolużi involuti f'diversi forom ta' traffikar, inkluż ta' armi, bnedmin u drogi illegali;

41. Iħeġġeġ it-tkomplija tal-Laqgħat Konsultattivi Konġunti Annwali tal-Kumitat Politiku u ta' Sigurtà tal-Unjoni Ewropea u tal-Kunsill tal-Paċi u s-Sigurtà tal-Unjoni Afrikana bil-għan li jitwessa' l-kamp ta' applikazzjoni tal-kooperazzjoni biex jinkludi żjarat konġunti fuq il-post, sessjonijiet konġunti, l-iżvilupp ta' fehim u analiżi kondiviżi dwar sitwazzjonijiet ta' kriżi, u biex jiġu investigati modi għal azzjoni bikrija konġunta bħala l-aħjar mezz għall-istabbiliment ta' sħubiji strateġiċi vijabbli;

42. Ifakkar li l-Afrika tospita l-ogħla numru ta' operazzjonijiet ta' appoġġ għall-paċi (PSOs) fid-dinja u hija l-akbar kontributur ta' truppi u ta' pulizija; jindika l-ħtieġa li l-PSOs madwar l-Afrika jiġu adattati għar-realtà l-ġdida tal-COVID-19 sabiex kemm iċ-ċittadini kif ukoll il-persunal tal-PSO jiġu protetti kif xieraq; jindika l-ħtieġa li jiġi żgurat finanzjament adegwat għall-missjonijiet, minħabba l-biża' ta' kriżi ekonomika imminenti u t-tnaqqis fil-finanzjament disponibbli;

43. Jistieden lill-UE tiżgura li l-missjonijiet tal-PSDK jiġu ppjanati b'mod effettiv, responsabbli u robust b'operazzjonijiet effiċjenti u b'mandati aktar b'saħħithom marbuta ma' rieda politika sostantiva, li jkollhom l-għan li jsolvu l-kunflitti minflok jiffriżawhom;

44. Jindika l-importanza tad-diplomazija parlamentari u, f'dan id-dawl, ifakkar fil-bosta laqgħat u missjonijiet parlamentari li wettaq il-Parlament, b'mod partikolari l-laqgħat regolari bejn il-Parlament Ewropew u l-Parlament Pan-Afrikan; jitlob, għalhekk, għat-tisħiħ tad-dimensjoni parlamentari fir-relazzjonijiet UE-UA, u jitlob li l-missjonijiet annwali tal-kumitati ewlenin tal-Parlament Ewropew jiltaqgħu u jiskambjaw fuq bażi regolari mal-kontropartijiet Afrikani tagħhom;

45. Iħeġġeġ il-fatt li l-għajnuna tal-UE m'għandhiex ittawwal il-kunflitti jew tiffaċilita l-imġiba predatorja tar-reġimi awtokratiċi, li huma l-kawża ta' ħafna mill-problemi soċjoekonomiċi u l-kunflitti politiċi tal-Afrika; jenfasizza li l-insegwiment tal-interessi komuni u l-kooperazzjoni jrid ikun konsistenti mad-dritt internazzjonali, mal-valuri fundamentali tal-UE u mal-objettivi ta' appoġġ għad-demokrazija, il-governanza tajba u d-drittijiet tal-bniedem;

46. Japprezza l-isforzi li saru biex jissaħħu l-mekkaniżmi u r-regolamenti ta' sjieda Afrikana dwar il-protezzjoni tad-drittijiet tal-bniedem bħall-Karta Afrikana dwar id-Drittijiet tal-Bniedem u tal-Popli u l-protokolli tagħha, il-Karta Afrikana dwar id-Demokrazija, l-Elezzjonijiet u l-Governanza, il-Kummissjoni Afrikana dwar id-Drittijiet tal-Bniedem u tal-Popli u l-Qorti Afrikana dwar id-Drittijiet tal-Bniedem u tal-Popli; japprezza l-fatt li tali mekkaniżmi u regolamenti jkomplu jassistu lis-sħab Afrikani biex jadattaw l-istrumenti u l-mekkaniżmi tagħhom dwar id-drittijiet tal-bniedem għall-prinċipji, il-liġijiet u l-istandards rikonoxxuti internazzjonalment;

47. Jemmen li l-parteċipazzjoni akbar tan-nisa fil-ħajja pubblika, inkluż fil-politika, hija fundamentali għal soċjetà egalitarja u inklużiva; jisħaq fuq l-importanza ta' sforzi konġunti UE-Afrika biex jittejbu l-politiki u l-leġiżlazzjoni dwar kwistjonijiet bħall-aċċess għall-edukazzjoni għall-bniet u l-waqfien taż-żwieġ tat-tfal, it-tmiem tal-mutilazzjoni ġenitali femminili, l-iżgurar tad-drittijiet ekonomiċi, politiċi u soċjali tan-nisa u l-parteċipazzjoni tagħhom fl-oqsma kollha tas-soċjetà, fil-proċessi tat-teħid tad-deċiżjonijiet, fil-bini tal-paċi u l-isforzi għaż-żamma tal-paċi, biex tintemm il-vjolenza psikoloġika, fiżika u sesswali, inkluż l-istupru fiż-żwieġ, u kwalunkwe forma oħra ta' abbuż; ifakkar li l-promozzjoni tal-ugwaljanza bejn il-ġeneri hija waħda mill-aktar modi effettivi biex jiġi xprunat it-tkabbir inklużiv, jitnaqqas il-faqar u tiġi avvanzata l-paċi; jinkoraġġixxi aktar appoġġ għat-tisħiħ tal-pożizzjoni ekonomika tan-nisa Afrikani permezz tal-edukazzjoni, it-trasferiment tal-ħiliet, l-aċċess għall-finanzi u l-assistenza f'dak li għandu x'jaqsam mal-ħolqien ta' negozji, u l-aċċess għall-art; jilqa' ż-żieda fir-rappreżentanza tan-nisa f'ċerti nazzjonijiet Afrikani; josserva, madankollu, li n-nisa għadhom ftit li xejn rappreżentati f'għadd ta' pajjiżi fil-kontinent Afrikan; jisħaq fuq il-fatt li r-rispett u t-twettiq sħiħ tad-drittijiet tal-bniedem tan-nisa huma s-sisien ta' soċjetà demokratika; iqis, għalhekk, li dawn id-drittijiet u l-objettivi fundamentali jridu jintlaħqu biex tinbena soċjetà tassew demokratika; jissottolinja li d-disparità bejn il-ġeneri fl-edukazzjoni għadha problema serja fl-Afrika, speċjalment f'komunitajiet emarġinati, u jisħaq fuq il-ħtieġa li jiġi pprovdut aċċess xieraq għall-edukazzjoni, programmi ta' tagħlim tal-ħiliet, u opportunitajiet fil-ħajja reali għall-bniet u n-nisa;

48. Jinkoraġġixxi lis-SEAE biex isaħħaħ il-preżenza tiegħu fid-delegazzjonijiet tal-UE fil-kontinent kollu, b'mod partikolari dawk fl-Istati Membri ewlenin tal-UA, sabiex isir aktar progress fir-relazzjonijiet bilaterali u reġjonali tagħna u jiġi żgurat skambju xieraq mal-partijiet interessati rilevanti; jissottolinja li tali rabtiet mill-qrib jikkostitwixxu l-bażi biex jiġu żgurati sħubijiet globali xierqa u strutturati tajjeb, kif ukoll għal risponsi mfassla apposta; jistieden lis-SEAE jtejjeb b'mod sinifikanti l-istrateġija dwar il-midja u l-komunikazzjoni tiegħu, mhux biss sabiex irawwem għarfien dwar l-isforzi tal-UE fir-reġjuni rispettivi, iżda wkoll biex iżid is-sensibilizzazzjoni u l-appoġġ fost iċ-ċittadini tal-UE għal aktar kooperazzjoni UE-Afrika;

49. Jisħaq li r-relazzjonijiet UE-Afrika għandhom jaqilbu minn relazzjoni orjentata lejn l-iżvilupp għal waħda li għandha l-għan li tpoġġi n-nazzjonijiet Afrikani fuq l-istess livell, ikkaratterizzata minn relazzjonijiet kummerċjali ambizzjużi sabiex tgħolli l-istandards Afrikani; jisħaq li l-UE għandha tgħin lin-nazzjonijiet Afrikani fil-mixja lejn l-awtodipendenza; jemmen li t-tisħiħ tar-rabtiet ekonomiċi mal-Afrika huwa vitali għas-salvagwardja tal-indipendenza ekonomika tal-istati Afrikani;

50. Jinkoraġġixxi lill-mexxejja Afrikani jagħżlu proġetti ta' investiment barrani ta' kwalità għolja, trasparenti, inklużivi u sostenibbli u jappoġġa l-aċċess għal opportunitajiet ta' finanzjament li jipprovdu alternattivi b'saħħithom għal inizjattivi esterni diretti mill-istat;

51. Ifakkar fl-importanza li l-istrateġija UE-Afrika tiġi koordinata flimkien man-NU, in-NATO, l-OSKE u ma' pajjiżi oħra tal-istess fehma, bħall-Istati Uniti tal-Amerka, il-Kanada, ir-Renju Unit, l-Awstralja u l-Ġappun.


INFORMAZZJONI DWAR L-ADOZZJONI
FIL-KUMITAT LI JINTALAB JAGĦTI OPINJONI

Data tal-adozzjoni

21.9.2020

 

 

 

Riżultat tal-votazzjoni finali

+:

–:

0:

55

6

6

Membri preżenti għall-votazzjoni finali

Alviina Alametsä, Alexander Alexandrov Yordanov, Maria Arena, Petras Auštrevičius, Traian Băsescu, Anna Bonfrisco, Reinhard Bütikofer, Fabio Massimo Castaldo, Włodzimierz Cimoszewicz, Katalin Cseh, Tanja Fajon, Anna Fotyga, Michael Gahler, Sunčana Glavak, Raphaël Glucksmann, Klemen Grošelj, Bernard Guetta, Márton Gyöngyösi, Sandra Kalniete, Dietmar Köster, Andrius Kubilius, Ilhan Kyuchyuk, David Lega, Miriam Lexmann, Nathalie Loiseau, Antonio López-Istúriz White, Lukas Mandl, Thierry Mariani, David McAllister, Vangelis Meimarakis, Sven Mikser, Francisco José Millán Mon, Javier Nart, Gheorghe-Vlad Nistor, Urmas Paet, Demetris Papadakis, Kostas Papadakis, Tonino Picula, Manu Pineda, Kati Piri, Giuliano Pisapia, Jérôme Rivière, María Soraya Rodríguez Ramos, Nacho Sánchez Amor, Isabel Santos, Andreas Schieder, Radosław Sikorski, Jordi Solé, Sergei Stanishev, Tineke Strik, Hermann Tertsch, Harald Vilimsky, Idoia Villanueva Ruiz, Viola Von Cramon-Taubadel, Thomas Waitz, Charlie Weimers, Isabel Wiseler-Lima, Salima Yenbou, Željana Zovko

Sostituti preżenti għall-votazzjoni finali

Özlem Demirel, Angel Dzhambazki, Assita Kanko, Arba Kokalari, Dragoş Tudorache, Mick Wallace, Elena Yoncheva, Marco Zanni

 


 

VOTAZZJONI FINALI B'SEJĦA TAL-ISMIJIET
FIL-KUMITAT LI JINTALAB JAGĦTI OPINJONI

55

+

ECR

Angel Dzhambazki, Anna Fotyga, Assita Kanko, Hermann Tertsch

NI

Fabio Massimo Castaldo, Márton Gyöngyösi

PPE

Alexander Alexandrov Yordanov, Traian Băsescu, Michael Gahler, Sunčana Glavak, Sandra Kalniete, Arba Kokalari, Andrius Kubilius, David Lega, Miriam Lexmann, Antonio López-Istúriz White, Lukas Mandl, David McAllister, Vangelis Meimarakis, Francisco José Millán Mon, Gheorghe-Vlad Nistor, Radosław Sikorski, Isabel Wiseler-Lima, Željana Zovko

RENEW

Petras Auštrevičius, Katalin Cseh, Klemen Grošelj, Bernard Guetta, Ilhan Kyuchyuk, Nathalie Loiseau, Javier Nart, Urmas Paet, María Soraya Rodríguez Ramos, Dragoş Tudorache

S&D

Maria Arena, Włodzimierz Cimoszewicz, Tanja Fajon, Raphaël Glucksmann, Sven Mikser, Demetris Papadakis, Tonino Picula, Kati Piri, Giuliano Pisapia, Isabel Santos, Andreas Schieder, Sergei Stanishev, Nacho Sánchez Amor, Elena Yoncheva

VERTS/ALE

Alviina Alametsä, Reinhard Bütikofer, Jordi Solé, Tineke Strik, Viola Von Cramon-Taubadel, Thomas Waitz, Salima Yenbou

6

GUE/NGL

Özlem Demirel, Manu Pineda

ID

Thierry Mariani, Jérôme Rivière, Harald Vilimsky

NI

Kostas Papadakis

6

0

ECR

Charlie Weimers

GUE/NGL

Idoia Villanueva Ruiz, Mick Wallace

ID

Anna Bonfrisco, Marco Zanni

S&D

Dietmar Köster

 

Tifsira tas-simboli użati:

+ : favur

- : kontra

0 : astensjoni

 


 

 

OPINJONI TAL-KUMITAT GĦALL-AGRIKOLTURA U L-IŻVILUPP RURALI (8.9.2020)

għall-Kumitat għall-Iżvilupp

dwar Strateġija ġdida UE-Afrika – sħubija għal żvilupp sostenibbli u inklużiv

(2020/2041(INI))

Rapporteur għal opinjoni: Manuel Bompard

 

 

SUĠĠERIMENTI

Il-Kumitat għall-Agrikoltura u l-Iżvilupp Rurali jistieden lill-Kumitat għall-Iżvilupp, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

 wara li kkunsidra l-Komunikazzjoni Konġunta mill-Kummissjoni u r-Rappreżentant Għoli tal-Unjoni għall-Affarijiet Barranin u l-Politika ta' Sigurtà lill-Parlament Ewropew u lill-Kunsill tad-9 ta' Marzu 2020 bit-titolu "Lejn strateġija komprensiva mal-Afrika" (JOIN(2020)0004),

 wara li kkunsidra r-rapport tat-Task Force għall-Afrika Rurali tas-7 ta' Marzu 2019,

 wara li kkunsidra d-Dikjarazzjoni tan-NU dwar id-Drittijiet tal-Bdiewa u Persuni Oħra li Jaħdmu f'Żoni Rurali,

 wara li kkunsidra d-deċiżjoni tal-Assemblea Nazzjonali tan-Nazzjonijiet Uniti li tipproklama d-Deċennju tal-Agrikoltura Familjari għall-perjodu mill-2019 sal-2028,

 wara li kkunsidra l-Istrateġija tal-UE għall-Bijodiversità għall-2030,

1. Jilqa' l-fatt li s-sħubija UE-Afrika tirrakkomanda l-iżvilupp ta' prattiki agrikoli favur l-ambjent u l-integrazzjoni ta' kwistjonijiet relatati mal-bijodiversità; jinsab imħasseb, madankollu, dwar id-dipendenza għolja tal-istati tal-Afrika fuq l-importazzjonijiet tal-ikel; f'dan ir-rigward, ifakkar fil-ħtieġa li jkunu garantiti l-koerenza tal-politiki Ewropej tal-agrikoltura u l-kummerċ favur żvilupp sostenibbli billi tiġi żgurata l-implimentazzjoni tal-analiżi tal-impatti tagħhom fuq l-objettivi tal-iżvilupp sostenibbli, id-drittijiet tal-bniedem u d-drittijiet ta' bdiewa żgħar u ta' popolazzjonijiet oħra li jgħixu f'żoni rurali; jappoġġa l-iżvilupp tal-opportunitajiet ta' kummerċ bejn il-kontinenti, filwaqt li jinkludi protezzjoni u salvagwardja għal prodotti agrikoli sensittivi li jippermettu reġjuni jsaħħu l-potenzjal tal-produzzjoni tagħhom; jirrimarka li l-ftehimiet kummerċjali jeħtieġ li jżommu l-prinċipju ta' kummerċ ġust għall-benefiċċju tal-agrikoltura lokali u fl-istess ħin jiżguraw id-disponibbiltà ta' ikel prodott b'mod sostenibbli; jistieden lill-Kummissjoni tiżgura li l-ftehimiet ta' kummerċ ma jiddistabbilizzawx l-agrikoltura lokali, ma jagħmlux ħsara lill-bdiewa żgħar u ma jżidux id-dipendenza tal-kontinent Afrikan fuq l-importazzjoni tal-ikel;

2. Jistieden lill-UE tintensifika l-kooperazzjoni bejn iż-żewġ kontinenti b'mod sostenibbli, inklużi fl-għarfien espert u s-sħubiji fir-riċerka u l-innovazzjoni u l-iskambju tal-aħjar prattiki fl-agrikoltura; jirrimarka l-importanza ċentrali tal-agrikoltura u tas-settur alimentari fl-ekonomija u s-soċjetà kemm tal-Afrika kif ukoll tal-UE, iqis li l-iżvilupp ta' settur agrikolu sostenibbli u taż-żoni rurali hu fundamentali għall-potenzjal tal-ħolqien tal-impjiegi u l-iżvilupp sostenibbli fl-Afrika, u għaldaqstant għandu jkun fiċ-ċentru tar-relazzjonijiet UE-Afrika; jitlob lill-UE tiżviluppa pożizzjoni strateġika konkreta biex tkompli tippromwovi l-ġestjoni sostenibbli tal-ekonomija tar-riżorsi naturali flimkien ma' ktajjen tal-valur sostenibbli, u ttejjeb il-kooperazzjoni bejn l-UE u l-Afrika b'enfasi fuq it-tiswir ta' futur newtrali għall-klima sabiex jinħoloq ambjent għal investimenti sostenibbli u aktar reżiljenti għall-klima, u jiżdied il-ħolqien tal-valur lokali u l-impjieg lokali; iqis li l-UE trid tiżviluppa b'mod sinifikanti l-kooperazzjoni mal-Afrika f'termini tal-prattiki tal-iżvilupp rurali kif ukoll tal-prattiki agroekoloġiċi, bħala s-sies għas-sostenibbiltà ekoloġika, soċjali u ekonomika li tibbenefika lill-bdiewa żgħar u l-komunitajiet billi tagħmilhom aktar awtosuffiċjenti u tagħmel l-agrikoltura Afrikana aktar reżiljenti għat-tibdil fil-klima; jistieden lill-UE u lill-Istati Membri jaħdmu b'mod attiv flimkien mas-sħab Afrikani biex joħolqu sinerġiji, bejn l-istrateġija UE-Afrika, il-politiki dwar il-Patt Ekoloġiku, b'mod partikolari id-dimensjoni esterna tal-Istrateġija mill-Għalqa sal-Platt, u l-politiki kummerċjali, jallinjawhom mal-politika għall-iżvilupp u l-impenji għall-Koerenza tal-Politiki għall-Iżvilup (PCD), u jakkumpanjawhom b'azzjonijiet konkreti, bi qbil mal-Għanijiet ta' Żvilupp Sostenibbli, li attivament jappoġġaw it-tranżizzjoni lejn sistemi agroalimentari sostenibbli, b'attenzjoni fuq l-iżvilupp ta' ktajjen ta' provvista qosra, il-produzzjoni, id-distribuzzjoni u l-konsum lokali, li jibbenefikaw il-persuni, in-natura u l-ekonomija;

3. Jenfasizza l-importanza tas-settur agrikolu u alimentari fl-Afrika biex jipprovdi opportunitajiet ta' impjieg deċenti u sostenibbli f'żoni rurali; jenfasizza l-proporzjon sinifikanti tal-forza tax-xogħol Afrikana, speċjalment tan-nisa u taż-żgħażagħ, li jserrħu fuq il-produzzjoni, l-ipproċessar u d-distribuzzjoni agrikoli alimentari għall-għajxien, l-introjtu u l-impjieg dirett tagħhom; jissottolinja li f'ħafna każijiet dan jirrigwarda azjendi żgħar u azjendi agrikoli tal-familja; jinnota l-importanza li jkunu promossi u msaħħa miżuri u għodda li jappoġġaw il-kwalità miżjuda tal-prodott, id-diversifikazzjoni tal-prodotti, il-modernizzazzjoni tal-prattiki agrikoli, il-kundizzjonijiet sikuri tax-xogħol u l-miżuri li jsaħħu r-reżiljenza tal-bdiewa, partikolarment in-nisa u l-ġenerazzjoni żagħżugħa; jistieden lill-Kummissjoni tiżgura li s-Sħubija UE-Afrika tkun ta' benefiċċju reċiproku għaż-żewġ kontinenti f'termini ta' opportunitajiet tas-suq, skambju tal-għarfien, ktajjen ta' valur ekwi u aċċess u appoġġ għall-għodda u l-miżuri ta' mitigazzjoni u adattament għat-tibdil fil-klima; jistieden lis-Sħubija UE-Afrika tqiegħed enfasi kbira fuq l-iżvilupp agrikolu u rurali sabiex tippromwovi l-istabbiltà ekonomika u l-kwalità tal-ħajja f'żoni rurali;

4. Jissottolinja l-fatt li l-użu tal-pestiċidi fl-agrikoltura intensiva fl-Afrika jista' jkollu impatt fuq is-saħħa tal-ħaddiema li ftit għandhom aċċess għal taħriġ dwar il-protezzjoni tal-pjanti u l-kura tas-saħħa, apparti l-ħsara ambjentali; jitlob li jkun hemm edukazzjoni u taħriġ f'approċċi sostenibbli għall-protezzjoni tal-pjanti u alternattivi għall-pestiċidi kif ukoll il-minimizzazzjoni tal-esponiment għal sustanzi perikolużi; jiddenunzja l-istandards doppji applikati mill-UE fir-rigward tal-pestiċidi meta tiġi permessa l-esportazzjoni ta' sustanzi perikolużi li huma pprojbiti fl-UE lejn pajjiżi Afrikani u pajjiżi terzi oħra; jitlob, għalhekk, il-modifika tar-regoli attwali tal-UE sabiex tiġi eliminata din l-inkonsistenza legali, f'konformità mal-Konvenzjoni ta' Rotterdam tal-1998 u mal-Patt Ekoloġiku;

5. Jenfasizza l-kontributi essenzjali tat-tfajliet u n-nisa għall-ekonomiji agrikoli u rurali fil-kontinent Afrikan kollu; ifakkar li kważi nofs ix-xogħol agrikolu fl-Afrika jsir min-nisa, filwaqt li l-bdiewa nisa huma fil-biċċa l-kbira bdiewa żgħar jew ta' sussistenza li m'għandhomx l-aċċess meħtieġ għall-informazzjoni, il-kreditu u l-art; iqis għalhekk li huwa ta' importanza kruċjali li jiġi appoġġat u msaħħaħ it-tisħiħ tal-pożizzjoni tat-tfajliet u n-nisa fl-Afrika; jistieden lill-UE tappoġġa lill-pajjiżi sħab, b'mod partikolari fit-titjib tal-liġijiet tal-proprjetà tagħhom billi jirrikonoxxu d-dritt universali tan-nisa li jkunu sidien tal-art b'intitolament sħiħ;

6. Jinsab partikolarment imħasseb dwar il-fatt li r-ritmu tad-deforestazzjoni fl-Afrika qed jiżdied: f'Marzu 2020, il-baċin tal-Kongo kien it-tieni reġjun l-aktar deforestat fid-dinja, fejn iż-żona deforestata aktar minn irdoppjat meta mqabbla mas-snin preċedenti; ifakkar li l-qerda tal-foresti tropikali Afrikani tikkostitwixxi telf irriversibbli tal-bijodiversità u tal-bjar tal-karbonju, kif ukoll tal-ħabitats u l-modi ta' għajxien ta' komunitajiet indiġeni li jgħixu fil-foresti; jistieden lill-Kummissjoni tippreżenta, mingħajr dewmien, proposta għal qafas ta' diliġenza dovuta vinkolanti Ewropew ibbażat fuq il-linji gwida tal-OECD u l-Imġiba Responsabbli fin-Negozju; jitlob li l-kumpaniji Ewropej jidentifikaw, jipprevjenu u jirrappurtaw dwar ksur tad-drittijiet tal-bniedem u tad-drittijiet ambjentali fil-ktajjen tal-provvista dinjija, inklużi l-ktajjen ta' sottokuntrattar, applikati għall-atturi ekonomiċi kollha fis-setturi kollha, speċjalment dawk meqjusa bħala ta' riskju għoli fil-pajjiżi li qed jiżviluppaw, bħall-materja prima, il-kakaw, il-kafè u l-forestrija; jitlob li jiġu inklużi dispożizzjonijiet vinkolanti fil-ftehimiet kummerċjali mal-Istati Afrikani; iħeġġeġ lill-UE taħdem flimkien mal-gvernijiet u l-atturi globali permezz ta' ftehimiet ta' sħubija, sabiex trawwem approċċ konsistenti fil-livell globali bil-ħsieb li jiġu żviluppati pjanijiet ta' azzjoni konġunti għall-protezzjoni u t-titjib tal-ġestjoni tal-foresti, l-ilmijiet u l-ekosistemi tal-baħar, skont il-Ftehim ta' Pariġi u l-Għanijiet ta' Żvilupp Sostenibbli;

7. Ifakkar li l-foresti jikkontribwixxu b'mod sinifikanti biex jintlaħqu l-miri klimatiċi, jipproteġu l-bijodiversità u jipprevjenu d-deżertifikazzjoni u l-erożjoni estrema tal-ħamrija; jenfasizza li l-isforzi konġunti mill-UE u l-Afrika għandhom jappoġġaw l-iżvilupp ta' agrikoltura u forestrija reżiljenti għat-tibdil fil-klima, żvilupp rurali sostenibbli u sistemi alimentari sikuri u sostenibbli, li huma kruċjali biex jinqerdu l-faqar, il-ġuħ u l-malnutrizzjoni; jenfasizza l-importanza li tiġi żgurata l-komplementarjetà bejn l-agrikoltura, l-organiżmi selvaġġi u l-konservazzjoni tal-bijodiversità, u jinsisti fuq il-ħtieġa li jiġu promossi prattiki agrikoli sostenibbli bħall-agroforestrija, minflok prattiki monokulturali li jfaqqru l-ħamrija u l-bijodiversità, jużaw aktar art, u jaggravaw il-provvista tan-nutrizzjoni fil-komunitajiet lokali; jenfasizza l-eżistenza ta' skemi ta' konservazzjoni li jinvolvu l-bdiewa li jikru l-art tagħhom għal skopijiet ta' protezzjoni tal-organiżmi selvaġġi, jipprovdu impjiegi lokali u jtejbu l-koeżistenza mal-ispeċijiet selvaġġi; f'dan ir-rigward jilqa' l-inizjattiva NaturAfrika, li għandha l-għan li tipproteġi l-organiżmi selvaġġi u l-ekosistemi filwaqt li toffri opportunitajiet fis-setturi ekoloġiċi għall-popolazzjonijiet lokali;

8. Jenfasizza li l-Unjoni Ewropea għandha tiżgura li għandhom japplikaw l-istess standards għoljin ta' sikurezza u sostenibbiltà fil-produzzjoni tal-ikel, kemm għall-prodott kif ukoll għall-metodu ta' produzzjoni, b'mod partikolari fid-dawl tal-ambizzjoni ogħla tal-Istrateġija Mill-Għalqa sal-Platt u l-Istrateġija għall-Bijodiversità għall-2030;

9. Jiddispjaċih dwar in-nuqqas ta' rikonoxximent tal-importanza strateġika tal-mergħat, li jkopru madwar 43 % tas-superfiċje tal-art Afrikana u għalhekk huma bjar tal-karbonju importanti; jistieden lill-Kummissjoni tiżviluppa, flimkien mal-komunitajiet lokali u l-partijiet ikkonċernati lokali, strateġija biex dan il-potenzjal jiġi ottimizzat permezz tal-ġestjoni sostenibbli tar-ragħa pereżempju bis-saħħa tar-rgħajja;

10. Jikkundanna l-fatt li l-ħtif tal-art huwa tant komuni fl-Afrika; ifakkar li din hija prattika brutali li ddgħajjef is-sovranità tal-ikel u tipperikola s-sopravivenza tal-komunitajiet rurali Afrikani; jenfasizza li l-kontinent Afrikan, li huwa mistenni li jara tkabbir demografiku sinifikanti b'żieda mistennija fil-popolazzjoni li għandha tilħaq 2.5 biljun sal-2050, għadu l-aktar reġjun milqut mill-malnutrizzjoni; ifakkar li l-aċċess għall-art huwa essenzjali biex tiġi żgurata s-sigurtà tal-ikel; jenfasizza li ż-żieda fil-konċentrazzjoni tal-art spiss twassal għal żieda fl-ispostament u l-ksur tad-drittijiet tal-bniedem, filwaqt li l-isfruttament tal-materja prima fl-Afrika jkompli jaggrava l-kunflitti eżistenti jew joħloq oħrajn ġodda u flimkien mal-ħtif tal-art, iwassal għall-isfruttament u l-oppressjoni tal-popolazzjoni lokali; jappella għal strateġija agrikola fit-tul biex tiġi promossa s-sigurtà alimentari Afrikana u biex l-awtoritajiet nazzjonali, reġjonali u lokali jikkonsolidaw id-drittijiet tal-art u jadottaw prinċipji għal governanza mtejba tal-art; jenfasizza l-ħtieġa li jingħata bidu għal proċess inklużiv fl-iżvilupp, l-implimentazzjoni u l-monitoraġġ tal-politiki u l-azzjonijiet relatati mal-ħtif tal-art, bil-parteċipazzjoni effettiva tal-atturi lokali u tal-organizzazzjonijiet tas-soċjetà ċivili; jitlob li l-linji gwida tal-VGGT jiġu osservati fil-proġetti kollha li jippromwovu l-protezzjoni tad-drittijiet tal-art, inkluż fil-kummerċ, kif ukoll miżuri li jiżguraw li l-proġetti ma jipperikolawx id-drittijiet tal-art tal-bdiewa fuq skala żgħira;

11. Jinnota, pereżempju, li d-drittijiet għall-mergħat u l-mergħat komunitarji huma drittijiet tal-użu tal-art tradizzjonali bbażati fuq id-dritt komuni u mhux fuq drittijiet titolizzati tas-sjieda; jenfasizza, madankollu, l-importanza ewlenija tal-protezzjoni ta' dawn id-drittijiet komuni għall-popolazzjoni rurali;

12. Iħeġġeġ lill-Istati Membri u lill-UE jżidu b'mod konsiderevoli l-ammont ta' għajnuna pubblika għall-iżvilupp allokata lill-pajjiżi Afrikani u mmirata lejn għanijiet tal-iżvilupp soċjali, ekonomiku u ambjentali u r-riċerka u t-taħriġ agrikolu, u filwaqt li jqisu b'mod partikolari l-preservazzjoni tal-bijodiversità u l-politiki ta' adattament għat-tibdil fil-klima sabiex jgħinu lill-bdiewa fl-Afrika fl-adattament meħtieġ tagħhom għall-kriżi klimatika; jitlob li l-agroekoloġija tiġi rikonoxxuta bħala l-bażi għal sistemi agrikoli u alimentari sostenibbli u li jiġu żviluppati infrastruttura u ktajjen ta' valur aħjar għall-bdiewa lokali; jenfasizza wkoll il-possibbiltajiet u l-potenzjal ta' sħubiji mas-settur privat biex jinkisbu dawn l-għanijiet; jenfasizza li s-sħubijiet ma' atturi privati jridu jkunu soġġetti għal kriterji tal-għażla preċiżi, monitoraġġ pubbliku, proċessi ta' evalwazzjoni u mekkaniżmi indipendenti tal-ilmenti; jenfasizza, barra minn hekk, li l-appoġġ għas-settur privat irid jingħata bil-kundizzjoni tar-rispett għad-drittijiet tal-bniedem u r-rikonoxximent tad-dritt għall-ikel; jenfasizza li trid tiġi eskluża l-għajnuna marbuta li tippromwovi l-aċċess għal dan il-finanzjament mill-kumpaniji Ewropej; jenfasizza li s-sħubija l-ġdida bejn l-UE u l-Afrika għandha tirrikonoxxi r-rwoli u l-kontributi multipli tal-atturi lokali u l-organizzazzjonijiet tas-soċjetà ċivili, u għalhekk il-ħtieġa li dawn jiġu involuti fil-livelli kollha tad-djalogu politiku u tal-politika u fit-tħejjija, il-monitoraġġ u l-evalwazzjoni tal-pjanijiet ta' implimentazzjoni; jirrimarka li l-bidla fl-Afrika tinkiseb bl-aħjar mod meta l-governanza tajba u d-distribuzzjoni trasparenti tal-għajnuna jiġu ppremjati, waqt li l-abbuż jiġi kkastigat;

13. Jilqa' l-proposta tat-Task Force għall-Afrika Rurali li jiġi stabbilit programm ta' Ġemellaġġ bejn l-Ewropa u l-Afrika, estiż biex jorbot il-korpi agrikoli tal-Istati Membri tal-UE mal-pajjiżi sħab fl-Afrika, bħal organizzazzjonijiet u kooperattivi tal-bdiewa, organizzazzjonijiet rurali tan-nisa u taż-żgħażagħ fost oħrajn, bil-għan li jiġu kondiviżi l-aħjar prattiki u jitrawmu relazzjonijiet bejn sħab involuti ħafna u simili; jenfasizza li fl-2018, it-Task Force konġunta UE-Afrika dwar l-Afrika Rurali ħejjiet lista ta' miżuri biex tiżdied il-produzzjoni alimentari tal-Afrika stess, u din il-lista għadha bażi rilevanti għas-Sħubija UE-Afrika li tenfasizza r-rwol importanti li l-organizzazzjonijiet tal-bdiewa u l-kooperattivi fl-Afrika jista' jkollhom biex itejbu s-setgħa tan-negozjar tal-bdiewa u l-introjtu tagħhom, jiffaċilitaw l-aċċess għat-tagħmir u s-servizzi u jnaqqsu r-riskji assoċjati mal-kummerċjalizzazzjoni tal-prodotti; iqis li l-iskambju ta' esperjenzi fost l-organizzazzjonijiet Afrikani u Ewropej jippreżenta benefiċċji reċiproċi;

14. Jinkoraġġixxi lill-organizzazzjonijiet agrikoli professjonali Afrikani u Ewropej jikkooperaw sabiex jippromwovu r-rwoli tagħhom b'reazzjoni għall-isfidi komuni tas-sostenibbiltà agrikola, u biex jiżviluppaw skambji ta' prattiki dwar l-organizzazzjoni tal-ktajjen tal-valur u l-produzzjoni;

15. Jistieden lis-Sħubija UE-Afrika tiffoka l-isforzi tagħha fil-qasam tal-agrikoltura fuq is-salvagwardja tad-dritt tal-pajjiżi Afrikani għas-sovranità tal-ikel, fuq iż-żieda tas-sigurtà alimentari tagħhom bħala prijorità, kif ukoll fuq il-kapaċità tagħhom li jissodisfaw il-ħtiġijiet nutrittivi tal-popolazzjonijiet tagħhom, b'mod partikolari fir-rigward tal-proteini, u fuq il-promozzjoni tal-biedja agroekoloġika lokali, fuq skala żgħira u tal-familja li tiggarantixxi s-sigurtà alimentari u nutrizzjonali għal kulħadd u reżiljenza aħjar għall-kriżijiet, b'mod partikolari l-kriżi klimatika, b'enfasi fuq il-produzzjoni alimentari sostenibbli u b'saħħitha u l-benesseri soċjali u ekonomiku u l-għajxien tal-bdiewa; jitlob li l-ftehimiet ta' kooperazzjoni tal-UE jerġgħu jitfgħu l-enfasi fuq l-appoġġ għall-iżvilupp sostenibbli tal-agrikoltura u fuq li l-bdiewa minn pajjiżi terzi jsiru awtosuffiċjenti; jenfasizza l-importanza li jinħolqu swieq reġjonali u lokali fl-Afrika sabiex in-networks tad-distribuzzjoni lokali u s-sigurtà alimentari jsiru aktar reżiljenti; ifakkar li t-tmiem tal-malnutrizzjoni fil-forom kollha tagħha u l-SDG 2 (Żero Ġuħ) għandhom jitqiesu bħala prijoritajiet fis-sħubija l-ġdida; jenfasizza li l-ħolqien ta' sistemi agrikoli u alimentari sikuri u sostenibbli għandu jiġi promoss permezz ta' politiki agrikoli reġjonali, prattiki tal-biedja li ma jagħmlux ħsara lill-ambjent, produzzjoni lokali, żoni rurali intatti u l-protezzjoni tal-bijodiversità u r-riżorsi naturali kif ukoll l-introduzzjoni ta' standards sanitarji u fitosanitarji; jinnota li kemm f'termini tal-ispejjeż tal-produzzjoni tal-bdiewa kif ukoll tan-nefqa pubblika fuq il-politika agrikola, l-iffrankar u l-iskambju ta' varjetajiet ta' żrieragħ lokali huma l-aktar mod irħis, rapidu u effettiv biex il-varjetajiet jadattaw għat-tibdil fil-klima, u b'hekk tiġi evitata d-dipendenza fuq l-inputs u tiġi żgurata l-awtonomija għall-bdiewa u aktar sigurtà alimentari;

16. Jenfasizza r-riskju li xi eċċessi tal-produzzjoni agrikola, bħat-trab tal-ħalib, iġġenerati matul il-kriżi tal-COVID-19, jiġu esportati lejn pajjiżi inqas żviluppati, u b'hekk jikkompetu mal-produzzjoni lokali u joħolqu ħsara kollaterali għall-produtturi; jitlob għalhekk lill-Kummissjoni tirrifletti dwar strateġija ta' tneħħija tal-istokk sabiex jiġi evitat effett negattiv fuq l-azjendi agrikoli żgħar lokali fil-pajjiżi l-fqar;

17. Jisħaq fuq il-fatt li n-nisa li jaħdmu fl-agrikoltura ta' sussistenza jħabbtu wiċċhom ma' aktar diffikultajiet biex iżommu s-sovranità tal-ikel minħabba l-protezzjoni qawwija tal-varjetajiet il-ġodda tal-pjanti min-naħa tal-Konvenzjoni Internazzjonali għall-Protezzjoni ta' Varjetajiet Ġodda ta' Pjanti (UPOV) fil-ftehimiet kummerċjali;


INFORMAZZJONI DWAR L-ADOZZJONI
FIL-KUMITAT LI JINTALAB JAGĦTI OPINJONI

Data tal-adozzjoni

7.9.2020

 

 

 

Riżultat tal-votazzjoni finali

+:

–:

0:

43

1

4

Membri preżenti għall-votazzjoni finali

Mazaly Aguilar, Clara Aguilera, Atidzhe Alieva-Veli, Álvaro Amaro, Eric Andrieu, Attila Ara-Kovács, Carmen Avram, Adrian-Dragoş Benea, Mara Bizzotto, Daniel Buda, Asger Christensen, Angelo Ciocca, Ivan David, Paolo De Castro, Jérémy Decerle, Salvatore De Meo, Herbert Dorfmann, Luke Ming Flanagan, Cristian Ghinea, Dino Giarrusso, Martin Häusling, Martin Hlaváček, Krzysztof Jurgiel, Jarosław Kalinowski, Elsi Katainen, Gilles Lebreton, Norbert Lins, Chris MacManus, Marlene Mortler, Ulrike Müller, Maria Noichl, Juozas Olekas, Pina Picierno, Maxette Pirbakas, Bronis Ropė, Bert-Jan Ruissen, Anne Sander, Petri Sarvamaa, Simone Schmiedtbauer, Annie Schreijer-Pierik, Veronika Vrecionová, Juan Ignacio Zoido Álvarez

Sostituti preżenti għall-votazzjoni finali

Manuel Bompard, Anna Deparnay-Grunenberg, Tilly Metz, Christine Schneider, Marc Tarabella, Thomas Waitz

 


VOTAZZJONI FINALI B'SEJĦA TAL-ISMIJIET
FIL-KUMITAT LI JINTALAB JAGĦTI OPINJONI

43

+

EPP

Álvaro Amaro, Daniel Buda, Salvatore De Meo, Herbert Dorfmann, Jarosław Kalinowski, Norbert Lins, Marlene Mortler, Anne Sander, Petri Sarvamaa, Simone Schmiedtbauer, Christine Schneider, Annie Schreijer-Pierik, Juan Ignacio Zoido Álvarez

S&D

Clara Aguilera, Eric Andrieu, Attila Ara-Kovács, Carmen Avram, Adrian-Dragoş Benea, Paolo De Castro, Maria Noichl, Juozas Olekas, Pina Picierno, Marc Tarabella

Renew

Atidzhe Alieva-Veli, Asger Christensen, Jérémy Decerle, Cristian Ghinea, Martin Hlaváček, Elsi Katainen, Ulrike Müller

Greens/EFA

Anna Deparnay-Grunenberg, Martin Häusling, Tilly Metz, Bronis Ropė, Thomas Waitz

ECR

Mazaly Aguilar, Krzysztof Jurgiel, Bert-Jan Ruissen, Veronika Vrecionová

EUL/NGL

Manuel Bompard, Luke Ming Flanagan, Chris MacManus

NI

Dino Giarrusso

 

1

-

ID

Ivan David

 

4

0

ID

Mara Bizzotto, Angelo Ciocca, Gilles Lebreton, Maxette Pirbakas

 

Tifsira tas-simboli użati:

+ : favur

- : kontra

0 : astensjoni


 

OPINJONI TAL-Kumitat għall-Kummerċ Internazzjonali (4.9.2020)

għall-Kumitat għall-Iżvilupp

dwar Strateġija ġdida UE-Afrika - sħubija għal żvilupp sostenibbli u inklużiv

(2020/2041(INI))

Rapporteur għal opinjoni(*): Joachim Schuster

 

(*) Kumitat assoċjat – l-Artikolu 57 tar-Regoli ta' Proċedura

 

 

SUĠĠERIMENTI

Il-Kumitat għall-Kummerċ Internazzjonali jistieden lill-Kumitat għall-Iżvilupp, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Jenfasizza li s-sħubija futura bejn l-Unjoni Ewropea u l-Unjoni Afrikana għandha tkun waħda li tinbena fuq valuri komuni fir-rigward tad-drittijiet tal-bniedem u l-governanza t-tajba; jisħaq fuq il-fatt li Afrika b'saħħitha hija fl-interess tal-Unjoni Ewropea u għalhekk l-UE trid li flimkien mas-sħab Afrikani, telabora pjanijiet ambizzjużi u adegwati għal tkabbir Afrikan u għal żvilupp li jiddiversifikaw l-ekonomija fil-kontinent u li jżidu n-negozju intra-Afrikan;

2. Jisħaq fuq il-fatt li l-UE, flimkien mal-Istati Membri tagħha, tikkostitwixxi l-akbar sieħba tal-Afrika f'termini ta' kummerċ, investiment, ta' għajnuna uffiċjali għall-iżvilupp (ODA) u sigurtà;

3. Jenfasizza li filwaqt li hemm għadd ta' pajjiżi dinamiċi bi dħul medju fil-kontinent Afrikan, l-iżvilupp ekonomiku tiegħu għadu relattivament dgħajjef meta mqabbel ma' partijiet oħra tad-dinja; jisħaq fuq il-fatt li bosta pajjiżi Afrikani għalhekk se jiffaċċjaw sfidi li kważi ma jistgħux jingħelbu kaġun tal-kriżi tal-COVID-19 u tal-effetti tat-tibdil fil-klima, fosthom tibdiliet demografiċi enormi, b'migrazzjoni xprunata mill-klima, mill-ekonomija u mmexxija mill-kunflitt, kif ukoll sfidi oħrajn bħal telf qawwi tal-bijodiversità u l-kummerċ illegali tal-armi; jenfasizza li s-sitwazzjoni ekonomika f'bosta pajjiżi Afrikani kkawżata minn, inter alia, tnaqqis fid-domanda u minn xokk fil-provvista kontinentali li impedixxa t-trażżin tal-COVID-19; jissottolinja li l-kriżi aktarx li jkollha impatt diżastruż fuq is-sistemi tas-saħħa diġà batuti tal-kontinent; jisħaq fuq il-fatt li jeħtieġ li l-UE tappoġġa l-pajjiżi Afrikani fl-iżvilupp ta' ekonomiji reżiljenti u ta' programmi soċjali, kif ukoll is-sistemi tas-saħħa u edukattivi tagħhom; iqis, għalhekk, li l-effetti tal-pandemija, kemm fuq il-perjodu qasir u fuq il-perjodu twil, jeħtieġu li jiġu inkorporati fl-Istrateġija UE-Afrika;

4. Jenfasizza l-importanza ta' relazzjonijiet kummerċjali ekoloġikament u soċjalment sostenibbli mal-kontinent Afrikan; jissottolinja li l-kumpaniji Afrikani huma responsabbli mill-ktajjen ta' provvista tagħhom; jistieden lill-Kummissjoni tipproċedi bi proposta leġiżlattiva ambizzjuża dwar drittijiet tal-bniedem, drittijiet soċjali u obbligi ta' diliġenza dovuta għall-kumpaniji tal-UE; iħeġġeġ lill-Kummissjoni, sabiex fl-iżvilupp ta' proposti simili, tiżgura li jkunu japplikaw għall-katina ta' provvista kollha u jissodisfaw il-linji gwida tal-OECD dwar ir-responsabbiltà soċjali u d-drittijiet tal-bniedem fil-kummerċ u jkunu kompatibbli mad-WTO, u biex wara valutazzjoni attenta, il-proposti jinstabu li jkunu funzjonali u applikabbli għall-atturi kollha fuq is-suq, inklużi l-SMEs u jinkludu dispożizzjonijiet li jippermettu r-rikors għall-ġustizzja lill-partijiet li jġarrbu ħsara; jenfasizza f'dan il-kuntest li l-UE trid, fuq terminu qasir, tipprovdi miżuri ta' għajnuna immedjati bħall-akkwist ta' testijiet u tagħmir tal-laboratorju u li jiffaċilitaw l-esportazzjoni ta' apparat mediku u ta' tagħmir protettiv personali, li għandhom jiġu segwiti minn miżuri għall-prevenzjoni tal-pandemija permezz tal-iżvilupp ta' infrastruttura ta' laboratorji, l-iffinanzjar tal-miżuri ta' taħriġ mediku, kampanji tal-informazzjoni u pjanijiet nazzjonali ta' rispons għall-pandemija; jissottolinja li b'kunsiderazzjoni tad-daqs tas-settur informali, l-impatt ekonomiku tal-lockdown se jaffettwa b'mod qawwi ħafna lill-kontinent Afrikan; jisħaq fuq il-fatt li l-għan fit-tul tas-sħubija bejn l-UE u l-Afrika jrid ikun ir-reżiljenza tal-ekonomiji Afrikani, kif ukoll l-awtonomija ekonomika li tippermetti l-indipendenza mill-għajnuna u mid-dejn u li għandu jwassal għal żieda fir-reżiljenza tas-settur tas-saħħa bħala konsegwenza;

5. Jilqa' pożittivament it-tħabbira mill-G20 dwar moratorju temporanju fuq il-ħlasijiet lura tad-dejn għall-pajjiżi fil-fażi tal-iżvilupp l-aktar dgħajfa; jinnota, madankollu, li l-ħelsien mid-dejn jirrappreżenta biss terz tat-telf fiskali previst fuq terminu qasir; itenni li t-tnaqqis tad-dejn u t-tħassir tad-dejn mhumiex imsemmija fil-verżjoni kurrenti tal-istrateġija għall-Afrika, filwaqt li dawn huma paljattivi importanti fil-kriżi tal-COVID-19 u miżuri meħtieġa għall-wara l-pandemija, peress li se jikkontribwixxu għall-ispazju ta' politika tal-pajjiżi Afrikani, li attwalment jintuża biex jitħallas lura d-dejn; jistieden, għalhekk, lill-Kummissjoni, lid-donaturi internazzjonali u lill-Istati Membri biex jagħmlu aktar u jikkunsidraw l-estensjoni tal-moratorju kemm fid-durata u fl-ambitu, biex il-pajjiżi Afrikani jkunu jistgħu jiġġieldu l-impatt fit-tul u medju tal-COVID-19; jesprimi t-tħassib tiegħu dwar in-nuqqas ta' azzjoni miftiehma kontra l-flussi finanzjarji illeċiti li jiswew tnax-il darba ċ-ċifra annwali għall-ODA, u jitlob lill-awtoritajiet Afrikani u Ewropej jiġġieldu l-fenomeni finanzjarji illeċiti, fost l-oħrajn il-ħarba tal-kapital, l-iskemi ta' evitar tat-taxxa u t-telf tal-introjtu nazzjonali minħabba tnaqqis fit-tariffi; itenni t-talba tiegħu lill-kredituri privati biex jipparteċipaw fl-inizjattiva fuq termini kumparabbli, u jħeġġeġ lill-G20 u lill-FMI u lill-Bank Dinji, kif ukoll lill-banek tal-iżvilupp multilaterali, biex jaħdmu aktar fuq il-ħelsien mid-dejn u biex jesploraw aktar is-sospensjoni tal-pagamenti tas-servizz tad-dejn, sabiex jiżguraw inter alia li ssir provviżjoni għall-bżonnijiet umani bażiċi taċ-ċittadini; jistieden lill-Istati Membri tal-UE jirrispettaw l-impenn fit-tul u ripetut tagħhom li jiddedikaw 0,7 % tal-PDG tagħhom lill-ODA;

6. Jenfasizza li l-Unjoni Ewropea għandha rabtiet ekonomiċi importanti mal-istati Afrikani, u dawn ir-rabtiet għandhom jissaħħu aktar fil-futur biex tiġi żgurata trasformazzjoni produttiva tar-reġjun u l-bini ta' reżiljenza; jinnota li ċ-Ċina intensifikat il-preżenza tagħha fl-Afrika, filwaqt li l-Istati Membri wrew biss interess selettiv ħafna fil-kummerċ mal-istati Afrikani u fl-investiment fihom, li jispjega għalfejn il-volum ta' kummerċ bejn l-UE u ħafna stati Afrikani jibqa' relattivament baxx; jissottolinja li l-UE teħtieġ bażi kompletament ġdida għas-sħubija ekonomika tagħha mal-Afrika, li jfisser li teħtieġ tasal għal realtà ġdida fejn l-UE u l-Afrika jiżviluppaw sħubija sostenibbli ta' benefiċċju komuni, isawru mill-ġdid ir-relazzjonijiet ekonomiċi, kummerċjali u ta' negozju diretti lejn is-solidarjetà u l-kooperazzjoni kif ukoll biex jiġi żgurat negozju ġust u etiku; jissottolinja li din is-sħubija għandha bħala prerekwiżit l-iżvilupp sostenibbli sostanzjali ulterjuri fl-istati Afrikani kollha; f'dan il-kuntest, jisħaq fuq il-bżonn li jiġi pprovdut investiment u jingħata appoġġ immirat u biex tiġi rispettata l-koerenza politika għall-iżvilupp;

7. Jissottolinja li r-rwol ta' ħafna stati Afrikani fid-diviżjoni internazzjonali tax-xogħol kif ukoll fil-ktajjen ta' provvista globali internazzjonali huwa dgħajjef minħabba, inter alia, il-produttività baxxa, li fost l-oħrajn hija wirt tal-passat, kif ukoll in-nuqqas ta' investiment immirat u ta' forza tax-xogħol b'ħiliet u l-fatt li l-iżvilupp sostenibbli mhuwiex qiegħed jiġi propost sakemm l-istati Afrikani jkomplu jesportaw materja prima u xi kumditajiet agrikoli mhux ipproċessati, filwaqt li l-UE tesporta prodotti manifatturati, servizzi u sovrakapaċitajiet agrikoli; jinsisti li l-UE trid toħloq strateġija li tassisti lin-nazzjonijiet Afrikani billi tistabbilixxi u tiddiversifika l-ktajjen tal-valur intrakontinentali u tnaqqas l-ostakli eżistenti għall-kummerċ, bil-għan li jiġi ġġenerat aktar valur miżjud fi ħdan l-istati Afrikani nfushom permezz ta' investiment immirat f'infrastrutturi mtejba u l-iżvilupp ta' provvista tal-enerġija sostenibbli, kif ukoll permezz ta' trattament speċjali u differenzjat; jissottolinja li l-investiment dirett Ewropew għandu wkoll jappoġġa aħjar l-infrastrutturi reġjonali; jistieden lill-Kummissjoni tiffaċilita, permezz tal-kanali għad-dispożizzjoni tagħha, l-iżvilupp tal-ktajjen ta' valur reġjonali, peress li n-negozju intrareġjonali fuq il-kontinent Afrikan jibqa' wieħed marġinali u jħalli ħafna opportunitajiet mhux użati, filwaqt li jibqa' prerekwiżit għall-iżvilupp sostenibbli kif ukoll għall-indipendenza ekonomika fit-tul;

8. Jinnota li l-pajjiżi Afrikani, għalkemm jirrappreżentaw aktar minn 50 % tal-benefiċjarji tal-Iskema Ġenerali ta' Preferenzi (SĠP), jirrappreżentaw biss anqas minn 5 % tal-importazzjonijiet tal-SĠP tal-UE; jistieden lill-Kummissjoni tassisti lill-atturi tal-benefiċjarji, inter alia dwar l-aderenza mar-regoli tal-oriġini u l-ostakli tekniċi; jiddispjaċih li l-SĠP s'issa ma kkontribwixxietx għad-diversifikazzjoni ekonomika tal-pajjiżi benefiċjarji Afrikani; itenni t-talba tiegħu lill-Kummissjoni biex tikkunsidra li tespandi l-lista ta' prodotti koperti mir-Regolament SĠP;

9. Jisħaq fuq il-fatt li l-UE u l-Unjoni Afrikana jikkondividu interess komuni f'sistema kummerċjali multilaterali stabbli u bbażata fuq ir-regoli li hija ċċentrata fuq l-Organizzazzjoni Dinjija tal-Kummerċ (WTO);

10. Jistieden lill-Kummissjoni tirrevedi b'mod xieraq il-prijoritajiet tagħha stabbiliti fil-komunikazzjoni "Lejn strateġija komprensiva mal-Afrika", qabel is-summit ippjanat bejn l-UE u l-UA u bil-ħsieb li jiġu indirizzati l-kawżi fundamentali tad-dgħufijiet ekonomiċi, soċjali u tas-saħħa fil-pajjiżi u r-reġjuni Afrikani, fid-dawl tal-kriżi attwali tas-saħħa u dik ekonomika iżda wkoll fir-rigward tar-riskju ta' theddid imminenti għas-sigurtà tal-ikel; jinnota li l-pjan komuni għall-irkupru ekonomiku kif ukoll l-Istrateġija mġedda UE-Afrika jeħtieġ li jibqgħu f'konformità mal-Għanijiet ta' Żvilupp Sostenibbli (SDGs) u mal-Ftehim ta' Pariġi; jistieden lill-Kummissjoni tikkunsidra li b'mod temporanju tippermetti lill-pajjiżi Afrikani jimponu taxxi fuq l-esportazzjoni fuq il-prodotti bażiċi sabiex itaffu l-impatti tal-kriżijiet multipli u jippreparaw l-irkupru tagħhom;

11. Jistieden lill-Kummissjoni tappoġġa lill-Afrika fl-ambizzjonijiet tagħha għal żona ta' kummerċ ħieles kontinentali billi tagħmel l-aġġustamenti meħtieġa biex timplimenta l-Ftehimiet ta' Sħubija Ekonomika (FSEs) sabiex ikunu jistgħu jikkostitwixxu element kostitwenti għal dan il-proġett endoġenu u awtodeterminat, bl-għoti ta' appoġġ tekniku biex isiru l-aġġustamenti fiskali meħtieġa għall-abolizzjoni tad-dazji doganali, kif ukoll biex tingħata għajnuna fl-implimentazzjoni ta' sistemi fiskali reżiljenti li jistgħu jindirizzaw il-problema tal-evażjoni tat-taxxa u jnaqqsu d-dipendenza fuq ir-rimessi; jissottolinja l-ħtieġa li tiġi implimentata assistenza teknika dwar il-kooperazzjoni fuq il-fruntieri u kwistjonijiet tekniċi oħra għall-finijiet tal-iżvilupp tal-katina tal-valur reġjonali; ifakkar fl-importanza ta' żona kummerċjali integrata għall-Afrika li tiffaċilita l-kummerċ internazzjonali u l-iżvilupp inklużiv;

12. Jenfasizza li l-FSEs u l-SĠP huma strumenti importanti fir-relazzjoni kummerċjali bejn l-UE u l-Afrika; jissottolinja li s'issa, l-implimentazzjoni tal-FSEs ma rriżultatx fil-progress mixtieq fl-appoġġ tal-integrazzjoni reġjonali, l-assistenza teknika, il-bini tal-kapaċità dwar il-kooperazzjoni fuq il-fruntieri, il-ġestjoni tal-għarfien u tad-data u l-kooperazzjoni biex tittejjeb il-klima tal-investiment u tissaħħaħ il-governanza tajba; jitlob lill-Kummissjoni, bħala kwistjoni ta' prijorità, biex tħaffef l-implimentazzjoni ta' dawn l-aspetti vitali; jistieden lill-Kummissjoni tkompli tgħin lill-pajjiżi Afrikani f'dawn iż-żoni mingħajr ma din l-għajnuna ssir kompletament kundizzjonali fuq l-implimentazzjoni tal-FSEs; jappella għall-inklużjoni sistematika ta' mekkaniżmi vinkolanti u infurzabbli għall-implimentazzjoni tal-kapitoli dwar il-Kummerċ u l-Iżvilupp Sostenibbli (TSD) dwar id-drittijiet tal-bniedem, l-istandards tax-xogħol u ambjentali fl-FSEs kollha nnegozjati bħalissa u fil-futur, filwaqt li jenfasizza li l-ftehimiet jeħtieġ li jkunu koerenti mal-politiki tal-iżvilupp u mal-SDGs, speċjalment fir-rigward tal-impatt tagħhom fuq id-deforestazzjoni, it-tibdil fil-klima u t-telf tal-bijodiversità; jinsisti fuq l-appoġġ lejn l-integrazzjoni tal-ekonomiji Afrikani fuq skala reġjonali sabiex dawn isiru aktar b'saħħithom fil-livell internazzjonali;

13. Jappella għal proposta konkreta li tistabbilixxi inizjattivi komuni dwar il-provvista ta' enerġija rinnovabbli fil-kontinent Afrikan u l-promozzjoni tal-innovazzjoni mmirata lejn dan, li tkun tinkludi kemm pjan konkret għall-finanzjament pubbliku ta' dawk l-inizjattivi kif ukoll pjan dwar kif tinkiseb kooperazzjoni aktar mill-qrib fir-rigward tal-użu komuni futur tal-enerġija rinnovabbli li tirriżulta filwaqt li jitneħħew gradwalment l-investimenti kollha fi proġetti relatati mal-karburanti fossili; itenni li l-iżvilupp sostenibbli mingħajr aċċess komprensiv għall-enerġija mhuwiex possibbli, u jħeġġeġ lill-Kummissjoni toħroġ bi pjan ambizzjuż għall-implimentazzjoni ta' din is-sħubija għall-enerġija sostenibbli; jissottolinja f'dan il-kuntest l-importanza vitali li jintlaħqu l-għanijiet stabbiliti mill-ftehim ta' Pariġi dwar il-klima; jappella għall-aggregazzjoni tal-privattivi u t-trasferiment tat-teknoloġija biex tiġi solvuta l-kriżi tas-saħħa virulenti, filwaqt li jiġu rrispettati d-drittijiet tal-proprjetà intellettwali fil-qafas tad-Dikjarazzjoni TRIPS tad-WTO tal-2003 dwar is-Saħħa Pubblika; jistieden lill-Kummissjoni tagħmel il-kisba tal-SDGs il-prinċipju gwida fil-politiki kollha tagħha rigward il-kontinent Afrikan; barra minn hekk, iħeġġeġ lill-Kummissjoni tagħti kunsiderazzjoni sħiħa lil dawn l-għanijiet meta tinnegozja l-ftehim ta' wara Cotonou sabiex tiżgura kummerċ bilanċjat, ħieles u ġust mal-kontinent Afrikan;

14. Jenfasizza l-ħtieġa għal investiment sostenibbli sostanzjali, possibbilment fil-forma ta' sħubijiet ta' investiment f'setturi ewlenin fir-rigward tal-infrastruttura, settur agrikolu sostenibbli u provvista komprensiva tal-enerġija minn sorsi rinnovabbli, filwaqt li jissaħħu wkoll is-saħħa pubblika u l-edukazzjoni pubblika, l-infrastruttura u l-provvista tal-ilma nadif, l-infrastrutturi tat-trasport u tal-enerġija, u li dawn jiġu esklużi minn kull privatizzazzjoni; jissottolinja l-ħtieġa ta' politiki u proġetti ta' innovazzjoni sostenibbli li jippermettu "qabża" li jkollha l-għan speċifiku ta' sostenibbiltà ekoloġika u soċjali, u f'dan ir-rigward jitlob li ssir investigazzjoni dwar kif il-qabża tista' tikkontribwixxi għal dawn l-għanijiet fl-istati Afrikani; jissottolinja li l-UE teħtieġ li tfittex investimenti pubbliċi fl-iżvilupp ta' infrastrutturi ġenerali u speċifikament ta' infrastrutturi transfruntiera, sabiex tiffaċilita l-kummerċ reġjonali u b'hekk id-diversifikazzjoni tal-ktajjen tal-valur; jenfasizza li l-promozzjoni tal-investiment barrani dirett fost programmi oħra mill-Pjan ta' Investiment Estern għandha tkun marbuta mal-intraprenditorija lokali, billi tingħata attenzjoni speċifika għall-għoti tas-setgħa lill-SMEs, lill-agrikoltura fuq skala żgħira, lis-settur tas-servizzi lokali u lill-industrija tal-manifattura lokali, kif ukoll lil proġetti ta' innovazzjoni sostenibbli, sabiex tiġi ffaċilitata d-diversifikazzjoni tal-ktajjen tal-valur fil-kontinent kif ukoll sabiex jinħolqu opportunitajiet ġodda ta' impjieg deċenti filwaqt li jiġu evitati dipendenzi ġodda;

15. Jisħaq fuq ir-rwol vitali tat-trasformazzjoni diġitali u d-diġitalizzazzjoni għall-iżvilupp sostenibbli u r-reżiljenza tas-soċjetajiet, kif kien evidenti speċjalment fis-sitwazzjoni globali kurrenti kaġun tal-kriżi tal-COVID-19; jappella għal kooperazzjoni kontinwa, imsaħħa, sistematika u ta' benefiċċju reċiproku mal-Istati Afrikani dwar id-diġitalizzazzjoni u t-teknoloġiji u s-soluzzjonijiet innovattivi fil-livelli kollha tas-soċjetà, inkluż dwar il-governanza elettronika, il-kummerċ elettroniku, il-ħiliet diġitali u ċ-ċibersigurtà, bi qbil mal-approċċ tad-Diġitalizzazzjoni għall-Iżvilupp (D4D);

16. Jinsab imħasseb li kif irrappurtat mill-Forum tas-Soċjetà Ċivili Afrika-UE, l-ispazju għas-soċjetà ċivili naqas u l-viżibbiltà tiegħu tibqa' dgħajfa; jissottolinja li l-għoti tas-setgħa lis-soċjetà ċivili, u b'hekk l-inklużjoni ta' kontroparti soċjali fl-investiment, huwa aspett vitali tal-politiki tal-UE eżistenti lejn u mal-Istati Afrikani. jitlob, għalhekk, lill-Kummissjoni tinkludi lis-soċjetà ċivili fil-livelli kollha tad-djalogu politiku, speċjalment meta jitħejjew, jiġu mmonitorjati u evalwati l-ftehimiet kummerċjali; jappella għal rwol akbar għas-soċjetà ċivili fis-sistema tal-Għajnuna għall-Kummerċ;

17. Jirrikonoxxi r-rwol kritiku tan-nisa u l-bniet fit-tkabbir u l-iżvilupp sostenibbli; jenfasizza li l-emanċipazzjoni tan-nisa u l-bniet trid tiġi integrata tul l-implimentazzjoni kollha tal-Istrateġija UE-Afrika; jissottolinja li l-indipendenza ekonomika tan-nisa trid titrawwem permezz tal-promozzjoni tal-intraprendituri nisa; ifakkar li l-pożizzjoni tan-nisa fil-ftehimiet kummerċjali, tista' tissaħħaħ bl-użu ta' dispożizzjonijiet b'saħħithom dwar il-ġeneru u l-kummerċ; jistieden, f'dan ir-rigward, lill-Kummissjoni tassisti lill-Unjoni Afrikana fl-implimentazzjoni tal-Istrateġija għall-Ugwaljanza bejn il-Ġeneri u t-Tisħiħ tal-Pożizzjoni tan-Nisa tagħha, u biex timplimenta miżuri li jikkontribwixxu għall-kisba tal-ugwaljanza bejn il-ġeneri fil-ftehimiet kummerċjali tagħha mal-pajjiżi Afrikani; jappella favur l-introduzzjoni ta' perspettiva ċara dwar il-ġeneru sabiex jiġu indirizzati l-impatti differenzjati tal-kriżi kif ukoll tal-irkupru, kif ukoll ir-rwoli u l-piżijiet differenti tal-irġiel u n-nisa fil-kriżi kurrenti;

18. Jissottolinja li l-kontinent Afrikan għandu l-aktar popolazzjoni żagħżugħa fid-dinja, u għalhekk jitlob lill-Kummissjoni biex tintegra b'mod sod l-interessi tat-tfal u ż-żgħażagħ fil-pjan ta' implimentazzjoni għall-Istrateġija Afrikana, u tiżgura li jsiru investimenti sostanzjali fil-bini tal-għarfien espert taż-żgħażagħ, b'kunsiderazzjoni tar-rwol kritiku tagħhom fl-iżvilupp ulterjuri ta' strateġiji għal futur ekoloġikament, soċjalment u ekonomikament sostenibbli għall-kontinent tagħhom; jistieden lill-Kummissjoni tassisti liż-żgħażagħ Afrikani bi programmi edukattivi ddedikati, taħt, pereżempju, ERASMUS+, u biex iżżid il-mobilità edukattiva u professjonali permezz ta' strateġija ddedikata f'kooperazzjoni mal-Unjoni Afrikana, is-settur privat u l-istituzzjonijiet finanzjarji (pereżempju billi tagħmel disponibbli mikrokreditu għal negozji ġodda), bil-għan li jittejbu l-opportunitajiet ekonomiċi u ta' negozju;

19. Jenfasizza l-importanza li jingħata appoġġ lill-kapaċità tal-pajjiżi Afrikani li jżidu l-mobilizzazzjoni tar-riżorsi domestiċi, bil-għan li jiżdied l-investiment fis-servizzi pubbliċi bażiċi universali; jistieden lill-UE tappoġġa lill-pajjiżi Afrikani billi tiġġieled il-flussi finanzjarji illeċiti u l-evażjoni tat-taxxa minn kumpaniji u kumpaniji multinazzjonali tal-UE, u tiżgura li t-taxxi jitħallsu fejn jiġu ġġenerati l-profitti u l-valur ekonomiku reali, sabiex jintemmu l-erożjoni tal-bażi u t-trasferiment tal-profitt;

20. Jinsab imħasseb dwar l-esportazzjoni Ewropea tat-trab tal-ħalib appoġġata mill-PAK lejn l-Afrika tal-Punent, b'kunsiderazzjoni tal-fatt li t-triplikar tal-esportazzjonijiet minn mindu l-UE neħħiet il-kwoti tal-ħalib fl-2015 kellu konsegwenzi diżastrużi fuq ir-rgħajja u l-bdiewa, li ma jistgħux jikkompetu; jistieden lill-Kummissjoni taħdem fuq soluzzjonijiet mal-gvernijiet u l-partijiet interessati Afrikani;

21. Jesprimi t-tħassib tiegħu dwar l-għadd dejjem akbar ta' każijiet ta' Soluzzjoni ta' Tilwim bejn Investituri u Stati (ISDS) li saru kontra stati Afrikani, speċjalment minn kumpaniji Ewropej; jistieden lill-gvernijiet u lill-kumpaniji fl-UE jżommu lura milli jużaw l-ISDS, u jtemmu l-għadd kbir ta' każijiet ISDS li saru kontra pajjiżi Afrikani;

22. Jistieden lill-Kummissjoni taħdem fuq soluzzjonijiet mal-gvernijiet u l-partijiet interessati Afrikani u biex timplimenta r-rakkomandazzjonijiet tat-Task Force għall-Afrika Rurali (TFRA); huwa tal-fehma li investiment stabbli u riżorsi umani nisa u rġiel għall-iżvilupp ta' katina alimentari Afrikana għal ċirkwiti reġjonali taħt sjieda Afrikana jistgħu jikkontribwixxu bl-aħjar mod biex jiżdiedu s-saħħa u l-benessri tal-poplu Afrikan;

23. Jissottolinja li fid-deċennji li ġejjin, l-Afrika, u b'mod partikolari l-Afrika sub-Saħarjana, se jkollha l-ogħla tkabbir tal-popolazzjoni fid-dinja; jistieden, f'dan ir-rigward, lill-UE timxi fuq il-konklużjonijiet tat-TFRA dwar il-ħtieġa ta' investiment fil-ktajjen alimentari Afrikani, b'enfasi fuq il-prodotti bażiċi b'valur miżjud;

24. Jenfasizza li l-UE u l-Istati Membri tagħha flimkien jibqgħu l-akbar donaturi tal-Afrika b'31 % tal-għajnuna totali; ifakkar fl-importanza ta' bidla fundamentali fil-politika Ewropea għall-iżvilupp lejn riformi strutturali orjentati lejn is-suq u l-governanza tajba;

25. Jistieden lill-Kummissjoni, fid-dawl tar-riskju dokumentat dejjem akbar tat-tixrid ta' patoġeni żoonotiċi fl-Afrika, biex tippromwovi standards aktar stretti fil-pajjiżi Afrikani f'termini ta' miżuri sanitarji u fitosanitarji (SPS) u ta' trattament xieraq tal-annimali, permezz ta' djalogu u ta' kooperazzjoni regolatorja;


INFORMAZZJONI DWAR L-ADOZZJONI
FIL-KUMITAT LI JINTALAB JAGĦTI OPINJONI

Data tal-adozzjoni

3.9.2020

 

 

 

Riżultat tal-votazzjoni finali

+:

–:

0:

33

2

7

Membri preżenti għall-votazzjoni finali

Barry Andrews, Anna-Michelle Asimakopoulou, Tiziana Beghin, Geert Bourgeois, Saskia Bricmont, Udo Bullmann, Jordi Cañas, Daniel Caspary, Anna Cavazzini, Miroslav Číž, Arnaud Danjean, Paolo De Castro, Emmanouil Fragkos, Raphaël Glucksmann, Markéta Gregorová, Enikő Győri, Roman Haider, Heidi Hautala, Danuta Maria Hübner, Herve Juvin, Karin Karlsbro, Maximilian Krah, Danilo Oscar Lancini, Bernd Lange, Margarida Marques, Gabriel Mato, Emmanuel Maurel, Maxette Pirbakas, Carles Puigdemont i Casamajó, Samira Rafaela, Inma Rodríguez-Piñero, Massimiliano Salini, Helmut Scholz, Liesje Schreinemacher, Sven Simon, Dominik Tarczyński, Mihai Tudose, Kathleen Van Brempt, Marie-Pierre Vedrenne, Jörgen Warborn, Iuliu Winkler, Jan Zahradil

 


 

VOTAZZJONI FINALI B'SEJĦA TAL-ISMIJIET
FIL-KUMITAT LI JINTALAB JAGĦTI OPINJONI

33

+

GUE/NGL

Emmanuel Maurel, Helmut Scholz

NI

Tiziana Beghin, Carles Puigdemont i Casamajó

PPE

Anna-Michelle Asimakopoulou, Daniel Caspary, Arnaud Danjean, Enikő Győri, Danuta Maria Hübner, Gabriel Mato, Massimiliano Salini, Sven Simon, Jörgen Warborn, Iuliu Winkler

RENEW

Barry Andrews, Jordi Cañas, Karin Karlsbro, Samira Rafaela, Liesje Schreinemacher, Marie-Pierre Vedrenne

S&D

Udo Bullmann, Miroslav Číž, Paolo De Castro, Raphaël Glucksmann, Bernd Lange, Margarida Marques, Inma Rodríguez-Piñero, Mihai Tudose, Kathleen Van Brempt

VERTS/ALE

Saskia Bricmont, Anna Cavazzini, Markéta Gregorová, Heidi Hautala

 

2

-

ECR

Emmanouil Fragkos, Dominik Tarczyński

 

7

0

ID

Roman Haider, Herve Juvin, Maximilian Krah, Danilo Oscar Lancini, Maxette Pirbakas

ECR

Geert Bourgeois, Jan Zahradil

 

Tifsira tas-simboli użati:

+ : favur

- : kontra

0 : astensjoni

 

 


 

OPINJONI TAL-KUMITAT GĦAL-LIBERTAJIET ĊIVILI, IL-ĠUSTIZZJA U L-INTERN (23.9.2020)

għall-Kumitat għall-Iżvilupp

dwar Strateġija ġdida UE-Afrika - sħubija għal żvilupp sostenibbli u inklużiv

(2020/2041(INI))

Rapporteur għal opinjoni: Juan Fernando López Aguilar

 

 

SUĠĠERIMENTI

Il-Kumitat għal-Libertajiet Ċivili, il-Ġustizzja u l-Intern jistieden lill-Kumitat għall-Iżvilupp, bħala l-kumitat responsabbli, biex jinkorpora s-suġġerimenti li ġejjin fil-mozzjoni għal riżoluzzjoni tiegħu:

1. Jisħaq fuq il-bżonn urġenti ta' sħubija fit-tul, aktar b'saħħitha, ekwa, ambizzjuża, sostenibbli u multidimensjonali, ibbażata fuq id-djalogu politiku, is-sjieda konġunta, is-solidarjetà u l-fiduċja reċiproka, bil-għan li nindirizzaw l-isfidi komuni tagħna u nilħqu l-għanijiet komuni;

2. Ifakkar fir-rabtiet storiċi partikolarment stretti bejn l-Unjoni Ewropea (UE) u l-Afrika, u l-kontribut sinifikanti tal-UE kemm għall-għajnuna għall-iżvilupp[14], kif ukoll għall-funzjonament tal-Unjoni Afrikana (UA)[15]; josserva li l-UE hija d-donatur ewlieni fid-dinja tal-għajnuna għall-iżvilupp u dik umanitarja; ifakkar li, jekk minn naħa l-UE hija l-akbar investitur u l-akbar donatur għall-iżvilupp fl-Afrika, li għal dan il-għan l-UE u l-Istati Membri tagħha jallokaw kważi EUR 20 biljun fis-sena, min-naħa l-oħra l-Afrika sub-Saħarjana għadha r-reġjun fid-dinja bl-aktar indiċi tal-iżvilupp tal-bniedem baxx; ifakkar fl-importanza tal-migrazzjoni Afrikana intrareġjonali; jitlob il-finalizzazzjoni tal-proġetti l-kbar għall-iżvilupp tal-kontinent Afrikan, pereżempju l-ġlieda kontra l-korruzzjoni, id-diġitalizzazzjoni, l-iżvilupp sostenibbli, it-tisħiħ tal-istat tad-dritt, il-protezzjoni tal-minoranzi u l-persuni l-aktar vulnerabbli, b'mod partikolari t-tfal, l-ugwaljanza bejn il-ġeneri u l-opportunitajiet indaqs għal kulħadd;

3 Jissottolinja l-fatt li l-faqar fil-kontinent Afrikan jibqa' wieħed mill-fatturi ewlenin tal-migrazzjoni; iqis li l-UE tista' tagħmel użu aħjar u aktar effiċjenti mill-istrumenti tagħha bħall-Fond Fiduċjarju tal-UE għall-Afrika, u tista' żżid il-finanzjament tal-programm Erasmus+ għall-edukazzjoni taż-żgħażagħ;

4. Jisħaq fuq il-kontributi kulturali u ekonomiċi importanti tad-dijaspora Afrikana għall-UE, u fuq l-importanza tar-rimessi għall-iżvilupp tal-pajjiżi Afrikani u għall-irkupru mill-kriżijiet;

5. Ifakkar li skont il-prinċipji tas-sjieda nazzjonali, il-politiki u l-programmi ta' żvilupp jistgħu jirnexxu biss jekk jitmexxew mill-pajjiżi li qed jiżviluppaw, u jekk ikunu mfassla għas-sitwazzjonijiet u l-ħtiġijiet speċifiċi ta' kull pajjiż; jenfasizza l-bżonn, f'dan ir-rigward, ta' kollaborazzjoni mas-soċjetà ċivili u mal-komunitajiet lokali biex jiġi żgurat li l-bżonnijiet u l-vulnerabbiltajiet tan-nies jiġu indirizzati;

6. Jistieden lill-UE u lill-Istati Membri tagħha jpoġġu r-rispett u l-promozzjoni tad-drittijiet tal-bniedem fil-qalba tal-Istrateġija l-ġdida UE-Afrika; jisħaq, barra minn hekk, fuq l-importanza tad-demokrazija, tal-ugwaljanza, tas-solidarjetà, tad-drittijiet tan-nisa u tal-minoranzi, tal-governanza tajba fir-relazzjonijiet UE-Afrika, b'mod partikolari permezz tat-tisħiħ u s-sostenn tar-rabtiet mas-soċjetà ċivili fil-pajjiżi Afrikani, il-paċi u s-sigurtà, kif ukoll tal-klima, tal-ambjent u tal-bijodiversità inkwantu pedamenti neċessarji għal Sħubija sostenibbli, inklużiva u ta' benefiċċju reċiproku bejn l-UE u l-Afrika;

7. Jisħaq b'mod partikolari fuq il-ħtieġa li d-drittijiet tal-bniedem tar-rifuġjati u tal-migranti jitpoġġew fil-qalba tas-sħubija tagħha dwar il-migrazzjoni mal-Afrika, u jitlob li tintemm il-kriminalizzazzjoni tal-migranti u tar-rifuġjati;

8. Ifakkar fl-importanza li titfassal is-sħubija strateġika mal-Afrika billi jissaħħu r-rabtiet stabbiliti mal-UA, kif ukoll permezz tal-iżvilupp tal-kooperazzjoni reġjonali u tad-djalogu trilaterali UE-UA-NU;

9. Jitlob li jsiru aktar sforzi favur il-ġlieda kontra l-korruzzjoni, li tikkostitwixxi ostaklu kbir għall-iżvilupp effettiv u timpedixxi lill-popli tal-Afrika milli jibbenefikaw bis-sħiħ mill-effetti ta' politiki konġunti UE-UA;

10. Jitlob l-iżvilupp ta' mekkaniżmu ta' monitoraġġ, kif ukoll trasparenza u obbligu ta' rendikont sħaħ tal-finanzjamenti tal-UE;

11. Jirrakkomanda li l-UE u l-UA jimplimentaw u jinfurzaw aħjar l-istrumenti nazzjonali u internazzjonali eżistenti kontra l-korruzzjoni, u jagħmlu użu tat-teknoloġiji l-ġodda u tas-servizzi diġitali; jistieden lill-UE tadotta qafas regolatorju strett dwar il-korruzzjoni;

12. Ifakkar li l-flussi finanzjarji illeċiti jikkostitwixxu problema sostanzjali għall-pajjiżi li qed jiżviluppaw; jipproponi li l-allokazzjoni tal-fondi Ewropej tissaħħaħ permezz ta' organizzazzjonijiet internazzjonali fuq il-post favur il-benefiċjarji diretti;

13. Jisħaq fuq l-importanza li fl-Istrateġija l-ġdida jiġu inklużi azzjonijiet konkreti mmirati li jirresponsabilizzaw lill-gruppi ta' migranti u tad-dijaspora sabiex jikkontribwixxu għat-tfassil, l-implimentazzjoni u l-monitoraġġ tal-Istrateġija l-ġdida; jissottolinja l-bżonn li jiżdied l-involviment tas-soċjetà ċivili tal-UE u dik Afrikana, inklużi l-NGOs, fit-tfassil tal-Istrateġiji u fil-monitoraġġ tal-implimentazzjoni tagħha; jenfasizza r-rwol ċentrali li tiżvolġi s-soċjetà ċivili fid-dinja kollha fl-appoġġ għad-demokrazija u fil-konsolidament tad-djalogu politiku;

14. Iqis li hemm bżonn djalogu bejn l-UE, l-UA u l-Istati Afrikani dwar it-tema tal-migrazzjoni, li ilha żmien twil kwistjoni prijoritarja fir-relazzjonijiet UE-Afrika;

15. Huwa tal-fehma li għandna niżviluppaw kooperazzjoni b'saħħitha fil-qasam tal-migrazzjoni, stabbilita fuq il-prinċipji ta' solidarjetà, responsabbiltà kondiviża u rispett tad-drittijiet tal-bniedem; jissottolinja l-importanza li jiġu żgurati l-effikaċja, l-ekwità u l-proċess ġust fil-ħruġ tal-laissez-passers konsulari u fil-konklużjoni ta' ftehimiet ta' riammissjoni, billi tingħata preferenza lir-ritorn volontarju, u jiġi żgurat li d-drittijiet u d-dinjità tal-individwi jkunu protetti u rrispettati bis-sħiħ;

16. Jitlob li r-ritorn u r-reintegrazzjoni sostenibbli jkunu akkumpanjati minn politiki sodi u fit-tul li jappoġġaw il-persuni rimpatrijati u li jindirizzaw kwistjonijiet strutturali fil-pajjiżi ta' oriġini, inklużi strutturi ekonomiċi sostenibbli u ġusti, il-governanza tajba u l-istat ta' dritt u r-rispett tad-drittijiet tal-bniedem u tal-ugwaljanza bejn il-ġeneri;

17. Jiġbed l-attenzjoni fuq il-fatt li 17 % tal-popolazzjoni tad-dinja, 1,3 biljun ruħ, bħalissa tgħix fl-Afrika; jinnota li, skont tbassir, sal-2050 il-popolazzjoni tal-Afrika sub-Saħarjana mistennija tirdoppja u li aktar minn nofs it-tkabbir demografiku tad-dinja sal-2050 se jseħħ fl-Afrika[16]; ifakkar li sa 80 % tal-migranti internazzjonali kollha li joriġinaw mill-pajjiżi Afrikani qed jiċċaqilqu ġewwa il-kontinent Afrikan, u b'hekk jikkontribwixxu għall-iżvilupp, il-prosperità u l-integrazzjoni tal-Afrika;

18. Jisħaq fuq il-bżonn li tissaħħaħ il-kooperazzjoni internazzjonali fil-ġlieda kontra t-traffikar tal-bnedmin; jitlob, f'dan ir-rigward, li jsir sforz komprensiv u multidixxiplinari u koordinament fil-livelli kollha, f'kooperazzjoni mal-gvernijiet lokali, inkluża l-kooperazzjoni internazzjonali bejn l-awtoritajiet inkarigati mill-infurzar tal-liġi; iqis li l-ġlieda kontra l-faċilitaturi u t-traffikanti tal-bnedmin għandha ssir b'mod konġunt miż-żewġ partijiet, u bl-appoġġ ta' Europol, fost oħrajn;

19. Jitlob li l-UE u n-nazzjonijiet Afrikani jikkollaboraw biex joħolqu kampanja ta' informazzjoni effikaċi u wiesgħa rigward ir-riskji u l-perikli tat-traffikar ta' bnedmin u l-faċilitazzjoni ta' immigrazzjoni illegali sabiex jipprevjenu lill-individwi milli jipperikolaw ħajjithom biex jidħlu fl-UE b'mod irregolari;

20. Jindika li ċerti Stati Afrikani ma għandhomx reġistri tal-istat ċivili affidabbli, u b'hekk bosta ċittadini huma miċħuda mill-eżistenza legali u, għalhekk, mid-drittijiet ċivili tagħhom, minn aċċess għall-espressjoni demokratika u mid-dritt tal-vot; jisħaq li dan in-nuqqas iwassal għal nuqqas ta' affidabbiltà u rilevanza tal-istatistika demografika;

21. Jissottolinja l-ħtieġa li jiġu ggarantiti proċeduri ġusti u aċċessibbli ta' asil għal persuni li jeħtieġu protezzjoni internazzjonali kemm fl-UE kif ukoll fil-pajjiżi Afrikani; jistieden lill-UE tagħti assistenza diretta u indiretta lill-migranti u lir-rifuġjati viċin id-djar li ħarbu minnhom;

22. Josserva li l-pajjiżi Afrikani jilqgħu fihom proporzjon tat-total tar-rifuġjati u tal-persuni spostati internament (IDPs) tad-dinja, li s-sitwazzjoni vulnerabbli tagħhom kompliet tiġi aggravata mill-kriżi tal-COVID-19; jitlob qsim tar-responsabbiltà globali għar-rifuġjati f'konformità mal-Patt Globali dwar ir-Rifuġjati, inkluż permezz taż-żieda ta' appoġġ finanzjarju, risistemazzjoni u l-ħolqien ta' kurituri umanitarji u l-ħruġ ta' viżi umanitarji;

23. Ifakkar fil-bżonn urġenti li jiġu żviluppati perkorsi sikuri u legali għal nies li jeħtieġu protezzjoni kif ukoll il-faċilitazzjoni tal-viża tax-xogħol biex jidħlu fl-UE fil-livelli kollha tal-ħiliet u b'miżuri ta' protezzjoni soċjali ekwivalenti għal dawk li jgawdu minnhom iċ-ċittadini tal-UE; jistieden lill-UE u lill-Istati Membri tagħha jżidu l-kontribut tagħhom għall-bżonnijiet ta' risistemazzjoni globali, u jiffaċilitaw ir-riunifikazzjoni tal-familji taċ-ċittadini ta' pajjiżi terzi;

24. Jistieden lill-UE u lill-pajjiżi Afrikani jespandu kanali ta' migrazzjoni sikuri u regolari bejn l-Ewropa u l-Afrika, kif ukoll mobilità regolari fil-kontinent Afrikan, sabiex jitnaqqsu l-ksur tad-drittijiet tal-bniedem u l-imwiet ta' migranti fuq perkorsi migratorji perikolużi u biex jiġu massimizzati l-benefiċċji tal-migrazzjoni f'konformità mal-Patt Globali għal Migrazzjoni Sikura, Ordnata u Regolari; jistieden, f'dan il-kuntest, lill-Kummissjoni tiżgura u tissorvelja li l-kooperazzjoni fil-ġestjoni tal-migrazzjoni ma taffettwax il-mobilità intra-Afrikana;

25. Ifakkar fil-ħtieġa li tiġi stabbilita operazzjoni speċifika u komuni ta' tiftix u salvataġġ ċivili fil-livell Ewropew, sabiex ma jintilfux aktar ħajjiet fuq il-baħar;

26. Jisħaq fuq l-importanza li tiġi żviluppata politika tal-migrazzjoni ċirkolari vera u proprja li tippermetti lill-ħaddiema kwalifikati u mhux kwalifikati jibbenefikaw minn skambju ta' għarfien professjonali u mill-mobilità bejn l-UE u l-Afrika, li tippermetti lin-nies jirritornaw fil-pajjiżi ta' oriġini tagħhom u, b'hekk, jippromwovu "kisba ta' mħuħ"; ifakkar li l-eżodu ta' mħuħ huwa problema li jeħtieġ li tiġi indirizzata bl-akbar attenzjoni sabiex titfassal sħubija strateġika ġenwina u sostenibbli mal-Afrika; jappoġġa d-definizzjoni fi prijoritajiet tal-applikazzjonijiet eleġibbli għal permessi tax-xogħol mill-pajjiżi ta' oriġini u ta' tranżitu lejn l-UE (pereżempju, permezz ta' ambaxxati jew online) sabiex jiskoraġġixxu lill-migranti milli jirrikorrru għal rotot migratorji irregolari, u jtaffu l-piż fuq is-sistema tal-migrazzjoni u tal-asil;

27. Iqis li l-frammentazzjoni tar-regolamenti nazzjonali dwar il-migrazzjoni tal-ħaddiema fl-Unjoni, kif ukoll il-kumplessità u n-natura burokratika ħafna tal-proċeduri, jiskoraġġixxu l-użu ta' rotot migratorji legali fl-Unjoni; jirrakkomanda l-ħolqien ta' proċedura Ewropea ta' applikazzjonijiet armonizzata u mhux burokratika fil-qafas tas-Sħubija UE-Afrika;

28. Jappoġġa d-diġitalizzazzjoni u l-modernizzazzjoni tal-amministrazzjoni pubblika tal-Istati Afrikani, b'mod partikolari biex jiġu żviluppati reġistri tal-istati ċivili affidabbli, dokumenti tal-identità sikuri, u biex jiġu promossi l-iskambji ta' data; jenfasizza li d-data kollha skambjata għandha tkun suġġetta għal-liġijiet rilevanti fil-qasam tal-protezzjoni tad-data u tal-privatezza; jistieden lill-UE taħdem id f'id man-nazzjonijiet Afrikani sabiex taħdem favur standards globali fil-qasam tal-protezzjoni tad-data li, imbagħad, se jgħinu biex jiġu indirizzati l-kriminalità u t-tisħiħ tal-ekonomiji ta' xulxin;

29. Jissottolinja r-riskji ta' użu ħażin ta' dawn is-sistemi min-naħa tal-gvernijiet li jwettqu prosekuzzjoni fil-konfront tal-avversarji jew tad-difensuri tad-drittijiet tal-bniedem; jinsisti li din id-data ma għandhiex tiġi trasferita lill-pajjiżi terzi, inklużi l-UE u l-Istati Membri tagħha, fi kwalunkwe mod li jmur lil hinn minn kwalunkwe ftehim internazzjonali;

30. Jinnota l-enfasi qawwija fuq l-ekonomija diġitali fl-Istrateġija l-ġdida UE-Afrika; jenfasizza li t-tifqigħa tal-COVID-19 turi l-vulnerabbiltajiet tal-Afrika marbuta, fost kawżi oħra, ma' diversifikazzjoni ekonomika skarsa, dipendenza għolja mill-esportazzjoni ta' materja prima, nuqqas ta' kopertura universali tas-saħħa u nuqqas ta' aċċess universali għall-enerġija, l-ilma u s-sanità; iqajjem dubji, fid-dawl ta' dak li ntqal hawn fuq, dwar l-iffissar ta' prijoritajiet bħala parti mill-Istrateġija UE-Afrika; itenni li, speċjalment f'kuntest ta' restrizzjonijiet finanzjarji, l-iżvilupp tat-teknoloġiji diġitali ma għandux jipprevali fuq sfidi aktar urġenti fl-Afrika, inkluż is-sodisfazzjon tal-bżonnijiet bażiċi tal-bniedem bħall-aċċess għall-elettriku, l-edukazzjoni u s-sanità; jappoġġa aġenda tad-diġitalizzazzjoni għas-Sħubija UE-Afrika li tiżgura aċċess ugwali, użu u ħolqien ta' teknoloġija diġitali, biex jitnaqqas id-distakk diġitali, inkluż id-distakk diġitali bejn il-ġeneri;

31. Itenni li l-ġlieda kontra t-terroriżmu hija prijorità komuni; jistieden lill-UE tkompli bl-isforzi tagħha u toffri assistenza aktar komprensiva lis-sħab Afrikani fir-reġjuni li li jintlaqtu mit-terroriżmu;

32. Jilqa' b'sodisfazzjon it-tkabbir ekonomiku sostnut tal-Afrika, u josserva li n-nazzjonijiet Afrikani huma ċentri ta' innovazzjoni, imprenditorjalità u ta' impriżi żgħar u ta' daqs medju, fatt li għandu jippermettilhom jiggarantixxu futur dinjituż liż-żgħażagħ tagħhom, li jikkostitwixxu l-mutur prinċipali għall-iżvilupp tal-kontinent[17] u b'hekk jiskoraġġixxu lill-minorenni mhux akkumpanjati milli jitilqu, u jikkooperaw mar-riammissjoni tal-persuni eleġibbli għar-ritorn; jitlob investiment sostanzjali fl-iżvilupp uman tal-ġenerazzjonijiet żgħażagħ permezz tal-iżgurar ta' aċċess għad-drittijiet, inklużi l-edukazzjoni, l-ikel nutrittiv, il-kura tas-saħħa, inklużi s-servizzi tal-kura tas-saħħa sesswali u riproduttiva u d-drittijiet relatati u r-rispett tad-drittijiet tal-bniedem;

33. Jisħaq fuq l-importanza li jiġu żviluppati politiki sodi għal aċċess ugwali għal edukazzjoni ta' kwalità, programmi inklużivi ta' tagħlim tal-ħiliet għat-tfal kollha, u l-ħolqien ta' opportunitajiet transsettorjali għal progress soċjali u tkabbir ekonomiku; jisħaq li dawn l-azzjonijiet huma ċentrali biex in-nies u ż-żgħażagħ joħorġu mill-faqar;

34. Jilqa' pożittivament l-isforzi li għamlu ċerti mexxejja Afrikani biex jiżviluppaw u jippromwovu leġiżlazzjoni li tiġġieled kontra l-vjolenza sesswali u domestika, il-fastidju sesswali, iż-żwieġ prekoċi, l-istupru fiż-żwieġ u kull tip ta' abbuż, u jisħaq fuq il-ħtieġa ta' aktar kooperazzjoni f'dawn il-kwistjonijiet; jisħaq li l-emanċipazzjoni femminili u l-ħarsien tan-nisa u l-bniet mit-traffikar ta' bnedmin, mill-vjolenza u mill-isfruttament iridu jkunu prijorità fil-kooperazzjoni tagħna man-nazzjonijiet Afrikani; jinnota li dan jista' jiġi megħjun bl-iskambju tal-aħjar prattiki u inizjattivi speċifiċi tal-UE dwar l-edukazzjoni u s-saħħa għan-nisa u l-bniet; jisħaq li l-iżgurar tal-ugwaljanza, tad-drittijiet fundamentali u tal-libertà tan-nisa u l-bniet, huwa komponent essenzjali fil-ġlieda kontra l-kriminalità u t-tisħiħ tal-ekonomija Afrikana;

35. Jirrimarka li perspettiva tal-ġeneru għandha tiġi integrata fl-Istrateġija kollha, flimkien ma' miżuri speċifiċi u allokazzjoni baġitarja speċifika għad-drittijiet tan-nisa, li jinvolvu organizzazzjonijiet taż-żgħażagħ, femministi u mmexxija min-nisa; jenfasizza li l-Istrateġija għandha tiggarantixxi s-saħħa sesswali u riproduttiva u d-drittijiet relatati kif ukoll il-protezzjoni u l-promozzjoni tad-drittijiet tal-persuni LGBTI;

36. Ifakkar li għandhom jittieħdu azzjonijiet speċifiċi biex il-migranti jiġu protetti mill-mewt, l-għajbien, is-separazzjoni tal-familja u l-ksur ta' drittijiethom, inkluż il-prinċipju ta' non-refoulement u l-aħjar interessi tat-tfal;

37. Jenfasizza l-importanza ta' sħubijiet ekonomiċi bejn l-impriżi Ewropej u Afrikani, b'mod partikolari l-SMEs, biex jagħtu spinta lill-opportunitajiet ekonomiċi fiż-żewġ kontinenti;

38. Jitlob li jitqiesu s-sigurtà u l-interessi tal-kontinent Ewropew u dak Afrikan kif ukoll taċ-ċittadini tagħhom, anki bis-saħħa tal-parteċipazzjoni diretta tal-organizzazzjonijiet tas-soċjetà ċivili fil-proċess tas-Sħubija UE-Afrika; jirrikonoxxi r-rabtiet mill-qrib bejn ir-reżiljenza, is-sigurtà, il-paċi u l-governanza; jisħaq fuq l-importanza li ssir enfasi fuq is-sigurtà tal-bniedem, billi jiġu indirizzati l-kawżi profondi tal-kunflitt u jiġi żgurat li kwalunkwe impenn tal-UE jkun sensittiv għall-kunflitti u bbażat fuq il-ħtiġijiet u l-inizjattivi tal-popolazzjonijiet lokali, b'mod partikolari l-inizjattivi tas-soċjetà ċivili għall-paċi u d-demokrazija;

39. Jirrimarka l-ħtieġa li tingħata prijorità lis-sistemi tas-saħħa pubbliċi taż-żewġ partijiet biex ikun iggarantit aċċess universali għas-servizzi tas-saħħa, inklużi r-riċerka u l-iżvilupp tas-saħħa globali.

 


INFORMAZZJONI DWAR L-ADOZZJONI
FIL-KUMITAT LI JINTALAB JAGĦTI OPINJONI

Data tal-adozzjoni

22.9.2020

 

 

 

Riżultat tal-votazzjoni finali

+:

–:

0:

47

13

7

Membri preżenti għall-votazzjoni finali

Magdalena Adamowicz, Malik Azmani, Katarina Barley, Pernando Barrena Arza, Pietro Bartolo, Nicolas Bay, Vladimír Bilčík, Vasile Blaga, Ioan-Rareş Bogdan, Patrick Breyer, Saskia Bricmont, Joachim Stanisław Brudziński, Jorge Buxadé Villalba, Damien Carême, Anna Júlia Donáth, Lena Düpont, Cornelia Ernst, Laura Ferrara, Nicolaus Fest, Jean-Paul Garraud, Maria Grapini, Sylvie Guillaume, Andrzej Halicki, Balázs Hidvéghi, Evin Incir, Sophia in ‘t Veld, Lívia Járóka, Marina Kaljurand, Assita Kanko, Fabienne Keller, Peter Kofod, Moritz Körner, Alice Kuhnke, Jeroen Lenaers, Juan Fernando López Aguilar, Nuno Melo, Roberta Metsola, Nadine Morano, Javier Moreno Sánchez, Maite Pagazaurtundúa, Nicola Procaccini, Paulo Rangel, Diana Riba i Giner, Ralf Seekatz, Michal Šimečka, Birgit Sippel, Sylwia Spurek, Tineke Strik, Ramona Strugariu, Annalisa Tardino, Tomas Tobé, Dragoş Tudorache, Milan Uhrík, Tom Vandendriessche, Bettina Vollath, Jadwiga Wiśniewska, Elena Yoncheva

Sostituti preżenti għall-votazzjoni finali

Delara Burkhardt, Gwendoline Delbos-Corfield, Kostas Papadakis, Kris Peeters, Anne-Sophie Pelletier, Sira Rego, Rob Rooken, Paul Tang, Tomáš Zdechovský

Sostituti (skont l-Artikolu 209(7)) preżenti għall-votazzjoni finali

Isabel Benjumea Benjumea

 


VOTAZZJONI FINALI B'SEJĦA TAL-ISMIJIET
FIL-KUMITAT LI JINTALAB JAGĦTI OPINJONI

47

+

PPE

Magdalena Adamowicz, Vasile Blaga, Ioan-Rareş Bogdan, Lena Düpont, Andrzej Halicki, Lívia Járóka, Jeroen Lenaers, Nuno Melo, Roberta Metsola, Kris Peeters, Paulo Rangel, Ralf Seekatz, Tomas Tobé, Tomáš Zdechovský

S&D

Katarina Barley, Pietro Bartolo, Delara Burkhardt, Maria Grapini, Sylvie Guillaume, Evin Incir, Marina Kaljurand, Juan Fernando López Aguilar, Javier Moreno Sánchez, Birgit Sippel, Sylwia Spurek, Paul Tang, Bettina Vollath, Elena Yoncheva

RENEW

Anna Júlia Donáth, Sophia In ‘T Veld, Fabienne Keller, Moritz Körner, Maite Pagazaurtundúa, Michal Šimečka, Ramona Strugariu, Dragoş Tudorache

VERTS/ALE

Patrick Breyer, Saskia Bricmont, Damien Carême, Gwendoline Delbos-Corfield, Alice Kuhnke, Diana Riba I Giner, Tineke Strik

ECR

Joachim Stanisław Brudziński, Assita Kanko, Jadwiga Wiśniewska

NI

Laura Ferrara

 

13

-

PPE

Balázs Hidvéghi, Nadine Morano

ID

Nicolas Bay, Nicolaus Fest, Jean-Paul Garraud, Peter Kofod, Annalisa Tardino, Tom Vandendriessche

ECR

Jorge Buxadé Villalba, Nicola Procaccini, Rob Rooken

NI

Kostas Papadakis, Milan Uhrík

 

7

0

PPE

Isabel Benjumea Benjumea, Vladimír Bilčík

RENEW

Malik Azmani

GUE/NGL

Pernando Barrena Arza, Cornelia Ernst, Anne-Sophie Pelletier, Sira Rego

 

Tifsira tas-simboli użati:

+ : favur

- : kontra

0 : astensjoni

 

 


INFORMAZZJONI DWAR L-ADOZZJONI FIL-KUMITAT RESPONSABBLI

Data tal-adozzjoni

27.1.2021

 

 

 

Riżultat tal-votazzjoni finali

+:

–:

0:

20

2

3

Membri preżenti għall-votazzjoni finali

Anna-Michelle Asimakopoulou, Hildegard Bentele, Dominique Bilde, Udo Bullmann, Catherine Chabaud, Antoni Comín i Oliveres, Gianna Gancia, Charles Goerens, Mónica Silvana González, Pierrette Herzberger-Fofana, György Hölvényi, Rasa Juknevičienė, Beata Kempa, Erik Marquardt, Norbert Neuser, Janina Ochojska, Jan-Christoph Oetjen, Michèle Rivasi, Christian Sagartz, Marc Tarabella, Tomas Tobé, Miguel Urbán Crespo, Chrysoula Zacharopoulou, Bernhard Zimniok

Sostituti preżenti għall-votazzjoni finali

Patrizia Toia

 


 

VOTAZZJONI FINALI B'SEJĦA TAL-ISMIJIET FIL-KUMITAT RESPONSABBLI

20

+

NI

Antoni Comín i Oliveres

PPE

Anna‑Michelle Asimakopoulou, Hildegard Bentele, György Hölvényi, Rasa Juknevičienė, Janina Ochojska, Christian Sagartz, Tomas Tobé

RENEW

Catherine Chabaud, Charles Goerens, Jan‑Christoph Oetjen, Chrysoula Zacharopoulou

S&D

Udo Bullmann, Mónica Silvana González, Norbert Neuser, Marc Tarabella, Patrizia Toia

VERTS/ALE

Pierrette Herzberger‑Fofana, Erik Marquardt, Michèle Rivasi

 

2

-

ID

Dominique Bilde, Bernhard Zimniok

 

3

0

ECR

Beata Kempa

ID

Gianna Gancia

The Left

Miguel Urbán Crespo

 

Tifsira tas-simboli użati:

+ : favur

- : kontra

0 : astensjoni

 

Aġġornata l-aħħar: 1 ta' Marzu 2021
Avviż legali - Politika tal-privatezza