TUARASCÁIL maidir leis an iarraidh go ndéanfaí díolúine Ioannis Lagos a tharscaoileadh
22.4.2021 - (2020/2219(IMM))
An Coiste um Ghnóthaí Dlíthiúla
Rapóirtéir: Angel Dzhambazki
TOGRA LE hAGHAIDH CINNEADH Ó PHARLAIMINT NA hEORPA
maidir leis an iarraidh go ndéanfaí díolúine Ioannis Lagos a tharscaoileadh
Tá Parlaimint na hEorpa,
– ag féachaint don iarraidh go ndéanfaí díolúine Ioannis Lagos a tharscaoileadh, a chuir an tIonchúisitheoir i gCúirt Uachtarach na Gréige ar aghaidh an 2 Deireadh Fómhair 2020 i ndáil le cúisimh choiriúla a bhí curtha ina leith ag Ionchúisitheoir na Cúirte Céadchéime san Aithin (comhad an cháis: ABM RB2020/65), agus a fógraíodh sa suí iomlánach an 19 Deireadh Fómhair 2020,
– tar éis di éisteacht a thabhairt do Ioannis Lagos i gcomhréir le hAirteagal 9(6) dá Rialacha Nós Imeachta,
– ag féachaint d’Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh agus d’Airteagal 6(2) d’Ionstraim maidir le toghadh fheisirí Pharlaimint na hEorpa trí vótáil chomhchoiteann dhíreach an 20 Meán Fómhair 1976,
– ag féachaint do na breithiúnais a thug Cúirt Bhreithiúnais an Aontais Eorpaigh an 21 Deireadh Fómhair 2008, an 19 Márta 2010, an 6 Meán Fómhair 2011, an 17 Eanáir 2013 agus an 19 Nollaig 2019[1],
– ag féachaint do Riail 5(2), Riail 6(1) agus Riail 9 dá Rialacha Nós Imeachta,
– ag féachaint don tuarascáil ón gCoiste um Ghnóthaí Dlíthiúla (A9-0135/2021),
A. de bhrí go bhfuil iarraidh go ndéanfaí díolúine pharlaiminteach Ioannis Lagos a tharscaoileadh tíolactha ag an Ionchúisitheoir i gCúirt Uachtarach na Gréige ar bhonn gníomhartha áirithe a rinne Ioannis Lagos le linn óráid os comhair Pharlaimint na hEorpa an 29 Eanáir 2020;
B. de bhrí go bhfuil sé curtha i leith Ioannis Lagos gur mhaslaigh sé siombail náisiúnta na Tuirce le linn díospóireachta i suí iomlánach an 29 Eanáir 2020 faoi chúrsaí imirce ag an teorainn idir an Ghréig agus an Tuirc agus faoi fhreagairt choiteann an Aontais ina leith;
C. de bhrí gur cion é siombail náisiúnta a mhaslú de réir Airteagal 1(1) de Dhlí 927/1979, arna chur chun feidhme le Dlí 4284/2014, agus de réir Airteagal 155 i dteannta Airteagail 1, 12, 14, 26, 27, 51, 53, 57 agus 79 de Chód Coiriúil na Gréige;
D. de bhrí nach pribhléid phearsanta d’Fheisire í an díolúine pharlaiminteach, ach is ráthaíocht í ar neamhspleáchas na Parlaiminte ina hiomláine agus a cuid Feisirí.
E. de bhrí, ar an gcéad dul síos, nach féidir le Parlaimint na hEorpa ról cúirte a ghlacadh, agus, ar an dara dul síos, i gcomhthéacs nós imeachta le haghaidh díolúine a tharscaoileadh, nach féidir a mheas gur ‘cúisí’ é Feisire de Pharlaimint na hEorpa[2];
F. de bhrí go sonraítear in Airteagal 8 de Phrótacal Uimh. 7 ar Phribhléidí agus Díolúintí an Aontais Eorpaigh nach mbeidh ‘comhaltaí Pharlaimint na hEorpa inchurtha faoi aon saghas fiosrúcháin, coinneála ná imeachtaí dlíthiúla i leith tuairimí a thug siad nó vótaí a chaith siad ag comhlíonadh a ndualgas dóibh’;
G. de bhrí go ndearna Ioannis Lagos a chuid gníomhartha le linn seisiún iomlánach de Pharlaimint na hEorpa, laistigh de na limistéir ina raibh an suí iomlánach féin á reáchtáil, ag comhlíonadh a dhualgas dó mar Fheisire de Pharlaimint na hEorpa;
H. de bhrí go ndearna Ioannis Lagos a chuid gníomhartha i gcomhthéacs a chuid dualgas mar Fheisire de Pharlaimint na hEorpa agus a chuid oibre inti;
1. á chinneadh gan díolúine Ioannis Lagos a tharscaoileadh;
2. á threorú dá hUachtarán an cinneadh seo agus tuarascáil a coiste fhreagraigh a chur ar aghaidh láithreach chuig údarás inniúil na Poblachta Heilléanaí agus chuig Ioannis Lagos.
FAISNÉIS MAIDIR LE GLACADH SA CHOISTE FREAGRACH
Dáta arna glacadh |
22.4.2021 |
|
|
|
Dáta na vótála críochnaithí |
+: –: 0: |
23 1 0 |
||
Comhaltaí a bhí i láthair ag an vótáil chríochnaitheach |
Pascal Arimont, Gunnar Beck, Geoffroy Didier, Pascal Durand, Angel Dzhambazki, Ibán García Del Blanco, Jean-Paul Garraud, Esteban González Pons, Mislav Kolakušić, Sergey Lagodinsky, Gilles Lebreton, Karen Melchior, Jiří Pospíšil, Franco Roberti, Marcos Ros Sempere, Stéphane Séjourné, Raffaele Stancanelli, Adrián Vázquez Lázara, Axel Voss, Marion Walsmann, Tiemo Wölken, Lara Wolters, Javier Zarzalejos |
|||
Na comhaltaí ionaid a bhí i láthair ag an vótáil chríochnaitheach |
Heidi Hautala, Emmanuel Maurel, Nacho Sánchez Amor |
|||
-
[1] Breithiúnas ón gCúirt Bhreithiúnais an 21 Deireadh Fómhair 2008, Marra v De Gregorio agus Clemente, C-200/07 agus C‑201/07, ECLI:EU:C:2008:579; breithiúnas ón gCúirt Ghinearálta an 19 Márta 2010, Gollnisch v Parlaimint na hEorpa, T‑42/06, ECLI:EU:T:2010:102; breithiúnas ón gCúirt Bhreithiúnais an 6 Meán Fómhair 2011, Patriciello, C-163/10, ECLI:EU:C:2011:543; breithiúnas ón gCúirt Ghinearálta an 17 Eanáir 2013, Gollnisch v Parlaimint na hEorpa, T-346/11 agus T-347/11, ECLI:EU:T:2013:23; breithiúnas ón gCúirt Bhreithiúnais an 19 Nollaig 2019, Junqueras Vies, C‑502/19, ECLI:EU:C:2019:1115.
- [2] Breithiúnas ón gCúirt Ghinearálta an 30 Aibreán 2019, Briois v Parlaimint na hEorpa, T‑214/18, ECLI:EU:T:2019:266.