TUARASCÁIL maidir leis an togra le haghaidh rialachán ó Pharlaimint na hEorpa agus ón gComhairle lena leasaítear Rialachán (AE) Uimh. 1286/2014 a mhéid a bhaineann le síneadh a chur leis an socrú idirthréimhseach do chuideachtaí bainistíochta, do chuideachtaí infheistíochta agus do dhaoine a dhíolann aonaid gnóthas le haghaidh comhinfheistíocht in urrúis inaistrithe (GCUInna) nó neamh-GCUInna nó a thugann comhairle ina dtaobh

29.10.2021 - (COM(2021)0397 – C9‑0326/2021 – 2021/0215(COD)) - ***I

An Coiste um Ghnóthaí Eacnamaíochta agus Airgeadaíochta
Rapóirtéir don tuairim: Jonás Fernández
(Nós imeachta simplithe – Riail 52(2) de na Rialacha Nós Imeachta)

Leasuithe

• 001-004 (PDF - 111 KB)
• 001-004 (DOC - 28 KB)

DRÉACHTRÚN REACHTACH Ó PHARLAIMINT NA hEORPA

maidir leis an togra le haghaidh rialachán ó Pharlaimint na hEorpa agus ón gComhairle lena leasaítear Rialachán (AE) Uimh. 1286/2014 a mhéid a bhaineann le síneadh a chur leis an socrú idirthréimhseach do chuideachtaí bainistíochta, do chuideachtaí infheistíochta agus do dhaoine a dhíolann aonaid gnóthas le haghaidh comhinfheistíocht in urrúis inaistrithe (GCUInna) nó neamh-GCUInna nó a thugann comhairle ina dtaobh

(COM(2021)0397 – C9‑0326/2021 – 2021/0215(COD))

(An gnáthnós imeachta reachtach: an chéad léamh)

Tá Parlaimint na hEorpa,

 

– ag féachaint don togra ón gCoimisiún chuig Parlaimint na hEorpa agus chuig an gComhairle (COM(2021)0397),

– ag féachaint d’Airteagal 294(2) agus d’Airteagal 114 den Chonradh ar Fheidhmiú an Aontais Eorpaigh, ar dá mbun a thíolaic an Coimisiún an togra do Pharlaimint na hEorpa (C9-0326/2021),

– ag féachaint d’Airteagal 294(3) den Chonradh ar Fheidhmiú an Aontais Eorpaigh,

– ag féachaint do thuairim ó Choiste Eacnamaíoch agus Sóisialta na hEorpa an 20 Deireadh Fómhair 2021[1],

– ag féachaint do Riail 59 dá Rialacha Nós Imeachta,

– ag féachaint don tuarascáil ón gCoiste um Ghnóthaí Eacnamaíochta agus Airgeadaíochta (A9-0297/2021),

1. ag glacadh a seasaimh ar an gcéad léamh faoi mar a leagtar amach anseo ina dhiaidh seo é;

2. á iarraidh ar an gCoimisiún an t-ábhar a tharchur chuig Parlaimint na hEorpa arís má dhéanann sé téacs eile a chur in ionad a thogra, má dhéanann sé a thogra a leasú go substaintiúil nó má tá sé ar intinn aige a thogra a leasú go substaintiúil;

3. á threorú dá hUachtarán a seasamh a chur ar aghaidh chuig an gComhairle, chuig an gCoimisiún agus chuig na parlaimintí náisiúnta.

 

Leasú  1

Togra le haghaidh rialacháin

Aithris 4

Téacs arna mholadh ag an gCoimisiún	Leasú
(4) An [IO cuir isteach an dáta], ghlac an Coimisiún Rialachán Tarmligthe (AE) …/2021 ón gCoimisiún14, lena leasaítear Rialachán Tarmligthe (AE) 2017/653 ón gCoimisiún, inter alia, chun go mbeidh sé níos éasca do chuideachtaí bainistíochta, cuideachtaí infheistíochta, agus do dhaoine a dhíolann aonaid GCUInna agus neamh-GCUInna nó a thugann comhairle ina dtaobh úsáid a bhaint as cur i láthair, ábhar agus formáid caighdeánaithe an doiciméid faisnéise bunriachtanaí. Mar sin féin, socraíodh an 1 Iúil 2022 mar dháta chur i bhfeidhm Rialachán Tarmligthe (AE) .../2021 chun a ndóthain ama a thabhairt do chuideachtaí bainistíochta, do chuideachtaí infheistíochta agus do dhaoine a dhíolann aonaid GCUInna agus neamh-GCUInna nó a thugann comhairle ina dtaobh ullmhú do dheireadh an tsocraithe idirthréimhsigh agus don oibleagáid doiciméad faisnéise bunriachtanaí a tháirgeadh dá réir sin. Ós rud é gur socraíodh an 1 Iúil 2022 mar dháta chur i bhfeidhm Rialachán Tarmligthe (AE) .../2021, agus ós rud é go bhfuil gá lena áirithiú go mbeidh deireadh an tsocraithe idirthréimhsigh i gcomhthráth le dáta chur i bhfeidhm Rialachán Tarmligthe (AE) .../2021, is gá síneadh sé mhí a chur leis an socrú idirthréimhseach, i.e. go dtí an 30 Meitheamh 2022.	(4) An [IO cuir isteach an dáta], ghlac an Coimisiún Rialachán Tarmligthe (AE) …/2021 ón gCoimisiún, lena leasaítear Rialachán Tarmligthe (AE) 2017/653 ón gCoimisiún, inter alia, chun go mbeidh sé níos éasca do chuideachtaí bainistíochta, cuideachtaí infheistíochta, agus do dhaoine a dhíolann aonaid GCUInna agus neamh-GCUInna nó a thugann comhairle ina dtaobh úsáid a bhaint as cur i láthair, ábhar agus formáid caighdeánaithe an doiciméid faisnéise bunriachtanaí. Ba cheart a léiriú le dáta chur i bhfeidhm Rialachán Tarmligthe (AE) .../2021 go bhfuil sé riachtanach am leordhóthanach a thabhairt do chuideachtaí bainistíochta, do chuideachtaí infheistíochta agus do dhaoine a dhíolann aonaid GCUInna agus neamh-GCUInna nó a thugann comhairle ina dtaobh ullmhú do dheireadh an tsocraithe idirthréimhsigh agus don oibleagáid doiciméad faisnéise bunriachtanaí a tharraingt suas dá réir sin.
_____________
14 OJ C […], […], p. […].

Leasú 2

Togra le haghaidh rialacháin

Aithris 4 a (nua)

Téacs arna mholadh ag an gCoimisiún	Leasú
	(4a) Chun a áirithiú go gcomhlíonfar an riachtanas maidir le ham leordhóthanach a bheith ann chun ullmhú don oibleagáid maidir le doiciméad faisnéise bunriachtanaí a tháirgeadh, ní mór síneadh 12 mhí a chur le fad an tsocraithe idirthréimhsigh, is é sin go dtí an 31 Nollaig 2022.

Leasú  3

Togra le haghaidh rialacháin

Aithris 5 a (nua)

Téacs arna mholadh ag an gCoimisiún	Leasú
	(5a) Is é is aidhm do Rialachán (AE) Uimh. 1286/2014 cur ar chumas infheisteoirí miondíola cinntí infheistíochta eolasacha níos fearr a dhéanamh. In ainneoin dea-rúin an rialacháin sin, rinneadh roinnt gearán ó glacadh é nach mór aghaidh a thabhairt orthu chun muinín infheisteoirí miondíola as na margaí airgeadais a fheabhsú, ar mhaithe le cuideachtaí atá ar lorg cistiú agus ar mhaithe le tairbhe fhadtéarmach na n-infheisteoirí. Áirítear ar na teorainneacha atá ann cheana, i measc nithe eile, an gá le sainmhíniú níos soiléire a thabhairt ar infheisteoirí miondíola, raon táirgí an Rialacháin maidir le PRIIPanna, deireadh a chur le páipéar trí réamhshocrú i gcás ina dtairgtear PRIIP ar bhonn aghaidh ar aghaidh, coincheap na n-idirbheart comhleanúnach, soláthar faisnéise réamhchonarthaí d’infheisteoirí gairmiúla. An gá atá le hathbhreithniú níos leithne, leagadh amach cheana sin i Rialachán (AE) Uimh. 1286/2014 agus níl aon athrú tagtha ar an bpráinn a bhaineann leis. Ar bhonn athbhreithniú den sórt sin i gcomhréir le Rialachán (AE) Uimh. 1286/2014, táthar ag dréim go gcuirfidh an Coimisiún, mar ábhar práinne, tuarascáil faoi bhráid Pharlaimint na hEorpa agus na Comhairle, a mbeidh togra ag gabháil leis i gcás inarb iomchuí, chun aghaidh a thabhairt ar na teorainneacha atá ann cheana.

Leasú 4

Togra le haghaidh rialacháin

Airteagal 1 – mír 1

Rialachán (AE) Uimh. 1286/2014

Airteagal 32 – mír 1

Téacs arna mholadh ag an gCoimisiún	Leasú
In Airteagal 32(1) de Rialachán (AE) Uimh. 1286/2014, cuirtear an dáta ‘an 30 Meitheamh 2022’ in ionad ‘an 31 Nollaig 2021’.	In Airteagal 32(1) de Rialachán (AE) Uimh. 1286/2014, cuirtear an dáta ‘an 31 Nollaig 2022’ in ionad ‘an 31 Nollaig 2021’.

 

NÓS IMEACHTA – COISTE FREAGRACH

Teideal	Leasú a dhéanamh ar Rialachán (AE) Uimh. 1286/2014 a mhéid a bhaineann le síneadh a chur leis an socrú idirthréimhseach do chuideachtaí bainistíochta, do chuideachtaí infheistíochta agus do dhaoine a dhíolann aonaid gnóthas le haghaidh comhinfheistíocht in urrúis inaistrithe (GCUInna) nó neamh-GCUInna
Tagairtí	COM(2021)0397 – C9-0326/2021 – 2021/0215(COD)
Dáta tíolactha chun PE	15.7.2021
An Coiste Freagrach  Dáta a fógraíodh sa suí iomlánach	ECON 13.9.2021
Coistí ar iarradh tuairim orthu  Dáta a fógraíodh sa suí iomlánach	IMCO 13.9.2021
Gan tuairim a thabhairt  Dáta an chinnidh	IMCO 1.9.2021
Rapóirtéirí  Dáta an cheapacháin	Jonás Fernández 1.9.2021
Nós imeachta simplithe - dáta an chinnidh	27.9.2021
Pléite sa choiste	27.9.2021
Dáta an ghlactha	25.10.2021
Dáta don chur síos	3.11.2021

 

 

• [1] Nár foilsíodh fós san Iris Oifigiúil.