MOZZJONI GĦAL RIŻOLUZZJONI
25.3.2009
skont l-Artikolu 103(2) tar-Regoli ta' Proċedura
minn Martin Schulz, Hannes Swoboda, Jan Marinus Wiersma, Helmut Kuhne, Miguel Angel Martínez Martínez, Justas Vincas Paleckis u Józef Pinior
f'isem il-Grupp PSE
dwar il-kuxjenza Ewropea u t-totalitarjaniżmu
B6‑0164/2009
Riżoluzzjoni tal-Parlament Ewropew dwar il-kuxjenza Ewropea u t-totalitarjaniżmu
Il-Parlament Ewropew,
– wara li kkunsidra l-Artikoli 6 u 7 tat-Trattat dwar l-Unjoni Ewropea,
– wara li kkunsidra l-Karta tad-Drittijiet Fundamentali tal-Unjoni Ewropea,
– wara li kkunsidra d-Deċiżjoni Qafas 2008/913/JHA tat-28 ta’ Novembru 2008 dwar il-ġlieda kontra ċerti forom u espressjonijiet tar-razziżmu u l-ksenofobija permezz tal-liġi kriminali,
– wara li kkunsidra l-Artikolu 103(2) tar-Regoli ta' Proċedura tiegħu,
A. billi l-istoriċi jaqblu li interpretazzjonijiet totalment oġġettivi tal-fatti storiċi mhumiex possibbli u narrattivi storiċi oġġettivi ma jeżistux; billi, madankollu, storiċi professjonali jużaw għodod xjentifiċi biex jistudjaw l-imgħoddi, u, b'dan, jippruvaw ikunu imparzjali kemm jista’ jkun,
B. billi l-ebda korp politiku jew partit politiku m’għandu monopolju fuq l-interpretazzjoni tal-istorja u tali korpi u partiti ma jistgħux jippretendu li huma oġġettivi,
C. billi interpretazzjonijiet politiċi uffiċjali tal-fatti storiċi m'għandhomx ikunu imposti permezz ta' deċiżjonijiet bil-maġġoranza fil-parlamenti; billi parlament ma jistax jiddetermina kif il-passat jiġi meqjus permezz tal-leġiżlazzjoni,
D. billi wieħed mill-għanijiet ewlenin tal-proċess ta' integrazzjoni Ewropea huwa li jiġi żgurat rispett għad-drittijiet fundamentali u l-istat tad-dritt fil-futur, u billi l-mekkaniżmi adatti għall-kisba ta' dan il-għan ġew ipprovduti bl-Artikoli 6 u 7 tat-Trattat dwar l-Unjoni Ewropea,
E. billi interpretazzjonijiet ħżiena tal-istorja jistgħu jagħtu lok għal politiki ta’ esklużjoni u b'hekk iqanqlu l-mibegħda u r-razziżmu,
F. billi miljuni ta' vittmi ġew deportati, mitfugħa l-ħabs, ittorturati u maqtula minn reġimi totalitarji u awtoritarji matul is-seklu 20 fl-Ewropa; billi l-istorja tal-Ewropa tas-seklu 20 hija kumplessa ħafna u ambivalenti, kif huma l-memorji tal-popli dwarha,
G. billi, għalkemm sar progress enormi fl-unifikazzjoni tal-Lvant u l-Punent f’termini istituzzjonali u ekonomiċi, l-unifikazzjoni tal-memorja għad trid iseħħ,
H. billi deċiżjonijiet dwar il-kommemorazzjoni ta’ avvenimenti tal-imgħoddi m’għandhomx isiru s-suġġett ta’ argumenti politiċi; billi l-politiċi għandhom jistaqsu lill-istoriċi għal parir indipendenti u għandhom jinkoraġġixxu dibattitu miftuħ dwar interpretazzjonijiet storiċi differenti ta’ ċerti avvenimenti,
I. billi l-esperjenza storika dominanti tal-Ewropa tal-Punent kienet in-Naziżmu, billi l-pajjiżi tal-Ewropa Ċentrali kellhom l-esperjenza miżjuda tal-Komuniżmu, u billi għandha tiġi promossa l-komprensjoni għall-wirt doppju ta’ dittatorjat li għandhom dawn il-pajjiżi,
J. billi l-parti l-kbira tal-istoriċi jaqblu li n-Naziżmu u l-Istaliniżmu kienu essenzjalment differenti, minkejja ċertu xebh, għalkemm mill-perspettiva tal-vittmi ma tagħmilx differenza liema reġim serqilhom il-libertà tagħhom jew ittorturahom jew assassinahom għal kwalunkwe raġuni,
1. Jitlob għall-proklamazzjoni ta' Jum ta’ Tifkira mal-Ewropa kollha għall-vittmi tar-reġimi totalitarji kollha, speċjalment in-Naziżmu u l-Istaliniżmu, li għandu jiġi ċċelebrat b'dinjità u imparzjalità; Jistieden lill-kumitat ta' esperti għal Dar l-Istorja Ewropea biex iressaq proposti għal data xierqa li sservi biex tfakkar lill-ċittadini tal-Ewropa dwar il-perikli ta' totalitarjaniżmu;
2. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, kif ukoll lill-gvernijiet u l-parlamenti tal-Istati Membri.