MOZZJONI GĦAL RIŻOLUZZJONI

25.3.2009

imressqa wara l-mistoqsija li titlob tweġiba orali B6-0226/2009
skont l-Artikolu 108(5) tar-Regoli ta' Proċedura, minn

• –Doris Pack, f’isem il-Grupp PPE-DE
• –Christa Prets, f'isem il-Grupp PSE
• –Hannu Takkula u Grażyna Staniszewska, f'isem il-Grupp ALDE

dwar l-irwol tal-kultura fl-iżvilupp tar-reġjuni Ewropej

Ara wkoll il-mozzjoni għal riżoluzzjoni komuni RC-B6-0166/2009

B6‑0166/2009

Riżoluzzjoni tal-Parlament Ewropew dwar l-irwol tal-kultura fl-iżvilupp tar-reġjuni Ewropej

Il-Parlament Ewropew,

–  wara li kkunsidra l-Konvenzjoni tal-UNESCO dwar il-Protezzjoni u l-Promozzjoni tad-Diversità tal-Espressjonijiet Kulturali,

–  wara li kkunsidra l-Konklużjonijiet tal-Kunsill tal-24 ta’ Mejju 2007 dwar il-kontribut tas-settur kulturali u dak kreattiv għat-temma tal-objettivi ta’ Liżbona,

–  wara li kkunsidra l-azzjoni fil-qasam tal-kultura, fil-kuntest tal-programm Kultura 2007 (2007-2013),

–  wara li kkunsdra r-riżoluzzjoni tiegħu tal-10 ta' April 2008 dwar aġenda Ewropea tal-kultura fl-era tal-globalizzazzjoni[1],

–  wara li kkunsidra r-riżoluzzjoni tiegħu tal-10 ta' April 2008 dwar l-industriji kulturali fl-Ewropa[2],

–  wara li kkunsidra l-Artikolu 108(5) tar-Regoli ta' Proċedura tiegħu,

A.   billi r-"ruħ" kulturali tal-Ewropa qed issir dejjem aktar importanti bħala mezz biex l-Ewropej jersqu lejn xulxin,

B.   billi l-kulturi tal-Ewropa huma fatturi strateġiċi fl-iżvilupp tal-Ewropa fuq il-livelli lokali, reġjonali u nazzjonali, kif ukoll fil-livell tal-istituzzjonijiet ċentrali Ewropej,

C.   billi l-bliet u reġjuni qegħdin isiru atturi Ewropej hekk kif jagħmlu tagħhom l-idea tal-Ewropa u jikkontribwixxu għall-iżvilupp tal-Unjoni Ewropea,

D.   billi proġetti kulturali msejsa fuq inizjattivi tas-soċjetà ċivili jidhru li huma effettivi fit-tisħiħ u l-iżvilupp tar-reġjuni,

E.   billi l-konferenzi reġjonali huma mod eċċellenti li permezz tiegħu gruppi ta' inizjattiva ċivika jistgħu jressqu proġetti u proposti, jaqsmu l-aħjar prattiki u jmexxu djalogu bejn il-partijiet responsabbli,

1.   Jitlob lill-Kummissjoni biex tippreżenta l-Green Paper b'għażla ta' miżuri possibbli għall-attivitajiet kulturali kontemporanji mmirati biex isaħħu l-iżvilupp fir-reġjuni Ewropej;

2.   Jitlob lill-Kummissjoni biex tappoġġa l-konferenzi reġjonali, flimkien mal-awtoritajiet reġjonali u s-soċjetà ċivili lokali;

3.   Jitlob azzjoni u kampanji ta' informazzjoni dwar l-irwol tal-proġetti kulturali għall-iżvilupp reġjonali;

4.   Jitlob lill-partijiet ikkonċernati sabiex jaħdmu għall-implimentazzjoni bil-ħeffa u effiċjenti ta' proġetti bħal dawn;

5.   Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kummissjoni u lill-Kumitat tar-Reġjuni.

• [1]  Testi adottati, P6_TA(2008)0124
• [2]  Testi adottati, P6_TA(2008)0123.