MOZZJONI GĦAL RIŻOLUZZJONI dwar il-promozzjoni ta' nutrizzjoni bnina għat-tfal iż-żgħar fl-iskejjel

24.9.2010

imressqa skont l-Artikolu 120 tar-Regoli ta' Proċedura

Daciana Octavia Sârbu

B7‑0532/2010

Mozzjoni ta' riżoluzzjoni tal-Parlament Ewropew dwar il-promozzjoni ta' nutrizzjoni bnina għat-tfal iż-żgħar fl-iskejjel

Il-Parlament Ewropew,

–   wara li kkunsidra l-Iskema tal-UE dwar il-Frott fl-Iskejjel,

–   wara li kkunsidra l-kampanja tal-UE dwar l-ikel bnin bl-isem ‘The Tasty Bunch’,

–   wara li kkunsidra l-Artikolu 120 tar-Regoli ta' Proċedura tiegħu,

A.  billi d-dieta għandha effett profond fuq il-benesseri fiżiku u mentali u fuq is-saħħa fit-tul,

 

B.   billi l-għoti ta' ikel bnin fl-iskejjel hu ta' benefiċċju sostanzjali għat-tfal iż-żgħar u jagħti kontribut siewi għall-iżvilupp tagħhom,

 

C.  billi l-edukazzjoni sa minn età żgħira dwar l-importanza ta' ikel bnin tgħin biex tinkoraġġixxi stil f'saħħtu ta' ħajja kif ukoll biex jittieħdu deċiżjonijiet bil-ħsieb dwar is-saħħa għall-ħajja kollha kemm hi twila,

 

D.  billi l-kura preventiva tas-saħħa ftit li xejn tfixkel lill-pazjenti u hija aktar rħisa għall-fornituri tas-servizzi tas-saħħa mill-kura tal-problemi tas-saħħa malli jitfaċċaw,

 

1.   Jistieden lill-Kummissjoni tkompli tniedi inizjattivi dwar l-ikel bnin b'enfasi fuq l-edukazzjoni tat-tfal iż-żgħar;

 

2.  Jistieden lill-Istati Membri jiżguraw li jingħata ikel bnin fl-iskejjel u jagħtu prijorità lill-edukazzjoni dwar l-importanza ta' dieta bnina u r-rabta bejn id-dieta u s-saħħa fiżika u mentali.