Mozzjoni għal riżoluzzjoni - B7-0227/2011Mozzjoni għal riżoluzzjoni
B7-0227/2011
Parlament Ewropew

MOZZJONI GĦAL RIŻOLUZZJONI dwar l-abbozz ta' regolament tal-Kummissjoni dwar l-awtorizzazzjoni u ċ-ċaħda tal-awtorizzazzjoni ta’ ċerti indikazzjonijiet dwar is-saħħa fuq il-prodotti tal-ikel u li jirreferu għall-iżvilupp u s-saħħa tat-tfal

24.3.2011

skont l-Artikolu 88(2) u (4)(b) tar-Regoli ta' Proċedura
Kumitat għall-Ambjent, is-Saħħa Pubblika u s-Sikurezza tal-Ikel

Proċedura : 2011/2549(RPS)
Ċiklu ta' ħajja waqt sessjoni
Ċiklu relatat mad-dokument :  
B7-0227/2011
Testi mressqa :
B7-0227/2011
Dibattiti :
Votazzjonijiet :
Testi adottati :

B7‑0227/2011

Riżoluzzjoni tal-Parlament Ewropew dwar l-abbozz ta' regolament tal-Kummissjoni dwar l-awtorizzazzjoni u ċ-ċaħda tal-awtorizzazzjoni ta’ ċerti indikazzjonijiet dwar is-saħħa fuq il-prodotti tal-ikel u li jirreferu għall-iżvilupp u s-saħħa tat-tfal

Il-Parlament Ewropew,

–   wara li kkunsidra r-Regolament (KE) Nru 1924/2006 tal-Parlament Ewropew u tal-Kunsill[1] tal-20 ta' Diċembru 2006 dwar indikazzjonijiet dwar in-nutrizzjoni u s-saħħa mogħtija fuq l-ikel,

–   wara li kkunsidra l-abbozz ta' regolament tal-Kummissjoni dwar l-awtorizzazzjoni u ċ-ċaħda tal-awtorizzazzjoni ta’ ċerti indikazzjonijiet dwar is-saħħa fuq il-prodotti tal-ikel u li jirreferu għall-iżvilupp u s-saħħa tat-tfal,

–   wara li kkunsidra l-Artikolu 5a(3)(b) tad-Deċiżjoni tal-Kunsill 1999/468/KE tat-28 ta’ Ġunju 1999 li tipprovdi l-proċeduri għall-eżerċizzju tas-setgħat tal-implimentazzjoni konferiti fuq il-Kummissjoni[2],

–   wara li kkunsidra l-Artikolu 88(2) u (4)(b) tar-Regoli ta' Proċedura tiegħu,

A. billi dikjarazzjonijiet li jirreferu għall-iżvilupp u s-saħħa tat-tfal fit-tikkettar tal-prodotti tal-ikel jistgħu jiġu awtorizzati bi qbil mal-proċedura stipulata fl-Artikoli 15, 16, 17 u 19 tar-Regolament (KE) Nru 1924/2006, sakemm ikunu jissodisfaw ir-rekwiżiti stipulati, fost l-oħrajn, fl-Artikoli 3, 5 u 6 ta’ dak ir-Regolament,

B.  billi, kif spjegat fil-Premessa 10 tar-Regolament (KE) Nru 1924/2006, ikel li jiġi promoss permezz ta' indikazzjonijiet jista' jidher li għandu vantaġġ nutrittiv, fiżjoloġiku jew vantaġġ ieħor ta' saħħa fuq prodotti simili jew prodotti oħrajn li m'għandhomx dawn in-nutrijenti u sustanzi oħra miżjuda, u dan jista' jħeġġeġ lill-konsumaturi biex jagħmlu għażliet li jinfluwenzaw direttament il-konsum totali tagħhom ta' nutrijenti individwali jew ta' sustanzi oħra b'mod li jmur kontra l-parir xjentifiku,

C. billi l-Premessa 14 tar-Regolament (KE) Nru 1924/2006 tindika li jeħtieġ li jiġi żgurat li s-sustanzi li dwarhom issir indikazzjoni jkunu ġew ippruvati li għandhom effett nutrittiv jew fiżjoloġiku li huwa ta' benefiċċju; billi l-Premessa 17 ta’ dak ir-Regolament tiddikjara għaldaqstant li indikazzjoni għandha tkun xjentifikament fondata billi tiġi kkunsidrata t-totalità tad-'data' xjentifika disponibbli, u billi titqies l-evidenza,

D. billi l-Premessa 23 tar-Regolament (KE) Nru 1924/2006 tagħmilha ċara li indikazzjonijiet dwar is-saħħa għandhom jiġu awtorizzati għall-użu fil-Komunità biss wara valutazzjoni xjentifika tal-ogħla standard possibbli,

E.  billi r-rekwiżiti stipulati, fost l-oħrajn, fl-Artikoli 3, 5 u 6 tar-Regolament (KE) Nru 1924/2006 huma imposti biex jinġiebu 'l quddiem dawk l-objettivi; billi l-proċedura stipulata, fost l-oħrajn, fl-Artikolu 17 tar-Regolament (KE) Nru 1924/2006 hi mfassla biex tiżgura li r-rekwiżiti eżistenti jiġu sodisfatti,

F.  billi Artikolu 3(a) tar-Regolament (KE) Nru 1924/2006 jistipula li l-indikazzjonijiet dwar in-nutrizzjoni u s-saħħa m'għandhomx ikunu qarrieqa,

G. billi l-Artikolu 5 tar-Regolament (KE) Nru 1924/2006 jipprovdi li għandu jkun muri li nutrijent jew sustanza oħra li fir-rigward tagħhom tkun saret l-indikazzjoni għandhom effett nutrittiv jew fiżjoloġiku ta' benefiċċju, kif stabbilit minn evidenza xjentifika [aċċettata] b'mod ġenerali; billi l-Artikolu 6 ta’ dak ir-Regolament jipprovdi li indikazzjonijiet dwar in-nutrizzjoni u s-saħħa għandhom ikunu bbażati u ssostanzjati minn evidenza xjentifika aċċettata b'mod ġenerali,

H. billi l-Artikolu 17(1) jesiġi li l-Kummissjoni, meta tkun qed tiddeċiedi dwar l-inklużjoni possibbli ta’ indikazzjoni fil-lista tal-Unjoni ta' indikazzjonijiet dwar is-saħħa permessi, tqis l-opinjoni tal-Awtorità Ewropea dwar is-Sigurtà fl-Ikel (EFSA), kwalunkwe dispożizzjoni tal-liġi tal-Unjoni u fatturi leġittimi oħrajn li jkunu rilevanti għall-kwistjoni li tkun qed tiġi kkunsidrata,

I.   billi l-abbozz ta' Regolament tal-Kummissjoni dwar l-awtorizzazzjoni u ċ-ċaħda ta’ awtorizzazzjoni ta’ ċerti dikjarazzjonijiet tas-saħħa magħmula dwar il-prodotti tal-ikel u li jirreferu għall-iżvilupp u s-saħħa tat-tfal jipprovdi dwar id-dikjarazzjonijiet tas-saħħa stipulati fl-Anness I tiegħu li għandu jiżdied mal-lista tal-Unjoni ta’ dikjarazzjonijiet tas-saħħa permessi annessa mar-Regolament (KE) Nru 1924/2006,

J.   billi d-dikjarazzjoni tas-saħħa ‘it-teħid tal-aċdu dokosaeżaenojku (DHA) jikkontribwixxi għall-iżvilupp viżiv normali tat-trabi sal-età ta’ 12-il xahar’ hija fost id-dikjarazzjonijiet li għandhom jiżdiedu mal-lista tal-Unjoni ta’ dikjarazzjonijiet permessi skont l-abbozz ta' Regolament tal-Kummissjoni,

K. billi evidenza xjentifika aċċettata b’mod ġenerali turi li d-DHA fil-ħalib tal-omm jikkontribwixxi għall-iżvilupp viżiv tat-trabi,

L.  billi d-DHA sintezizzat miżjud mal-ħalib tal-formula u prodotti tal-ikel oħra maħsuba għat-trabi huwa, madankollu, f’ambjent bijoloġiku differenti mill-ħalib tal-omm, li huwa speċifiku għall-ispeċi, sustanza ħajja bil-koenżimi u kofatturi li jħallu x-xaħmijiet jaħdmu bl-aħjar mod,

M. billi l-opinjonijiet ikkomunikati mill-EFSA lill-Kummissjoni jiddikjaraw li l-bord ma setax jasal għall-konklużjoni li hemm relazzjoni ta' kawża u effett bejn it-teħid ta’ formula tat-trabi u ta' formula ta' prosegwiment supplimentati bid-DHA u l-funzjoni viżiva mingħajr kunsiderazzjoni tal-istudji li l-applikant asserixxa li huma proprjetà privata[3],

N. billi ma ġie ppreżentat lill-EFSA l-ebda studju li jinvestiga l-effetti tas-supplimentazzjoni bid-DHA fuq il-funzjoni viżiva li tibda mill-età ta’ sitt xhur fit-trabi li jirċievu formula mhux supplimentata mit-twelid[4],

O. billi r-reviżjoni sistematika tal-evidenza rigward id-DHA u l-iżvilupp newroloġiku fit-tfal ippubblikata mill-Cochrane Library fl-2008[5] sabet li l-għoti ta’ formula tal-ħalib b’kontenut għoli ta’ DHA u aċidi oħrajn tax-xaħam simili b’katina twila lil trabi mwellda wara ġestazzjoni sħiħa ma kellu l-ebda benefiċċju ppruvat rigward il-viżjoni, il-konjizzjoni jew l-iżvilupp fiżiku,

P.  billi r-rapport ippubblikat fil-British Medical Journal minn Kathy Kennedy et al. f’Ġunju 2010[6] sab li għaxar snin wara li bdew jingħataw formula msaħħa bid-DHA, il-bniet kienu ġeneralment itqal u kellhom pressjoni tad-demm ogħla,

Q. billi hemm bżonn ta’ aktar riċerka dwar l-effetti possibbli, kemm ta’ benefiċċju kif ukoll ta’ dannu, tas-supplimentazzjoni bid-DHA qabel ma jkun jista' jingħad li l-użu tad-DHA fil-formuli ta' prosegwiment u l-prodotti tal-ikel għat-trabi huwa ta’ benefiċċju,

R.  billi d-dikjarazzjoni tas-saħħa dwar id-DHA u l-iżvilupp viżiv imsemmija fl-abbozz ta' Regolament tal-Kummissjoni tista', għalhekk, tqarraq u b’hekk tmur kontra l-Artikolu 3(a) tar-Regolament (KE) Nru 1924/2006 fid-dawl tal-objettivi stipulati fil-Premessa 10 ta’ dak ir-Regolament,

S.  billi m’hemmx kunsens xjentifiku ċar dwar l-effett li jkollhom il-formuli msaħħa bid-DHA fuq it-trabi, li jmur kontra r-rekwiżiti stipulati fl-Artikoli 5 u 6 tar-Regolament (KE) Nru 1924/2006 fid-dawl tal-objettivi stipulati fil-Premessi 10, 14, 17 u 23 ta’ dak ir-Regolament,

1.  Iqis li l-abbozz ta' Regolament tal-Kummissjoni dwar l-awtorizzazzjoni u ċ-ċaħda ta’ awtorizzazzjoni ta’ ċerti dikjarazzjonijiet tas-saħħa magħmula dwar il-prodotti tal-ikel, u li jirreferi għall-iżvilupp u s-saħħa tat-tfal mhuwiex kompatibbli mal-għan u l-kontenut tar-Regolament (KE) Nru 1924/2006,

2.  Jopponi l-adozzjoni tal-abbozz ta' Regolament tal-Kummissjoni;

3.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet u lill-parlamenti tal-Istati Membri.

Avviż legali - Politika tal-privatezza