Il-Parlament Ewropew,

–  wara li kkunsidra r-riżoluzzjonijiet preċedenti tiegħu dwar il-Libja, b'mod partikolari dawk tal-15 ta' Settembru 2011(1), tat-22 ta' Novembru 2012(2), tat-18 ta' Settembru 2014(3) u tal-15 ta' Jannar 2015(4),

–  wara li kkunsidra d-dikjarazzjonijiet tal-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà (VP/RGħ), Federica Mogherini, dwar il-Libja tat-30 ta' April, tas-26 u s-27 ta' Mejju, tat-30 ta' Ġunju, tat-12 ta' Lulju, tas-17 ta' Awwissu 2015, tat-13 u t-22 ta' Settembru, tad-9 ta' Ottubru, u tad-19 u s-26 ta' Novembru 2015, u tas-7 ta' Jannar 2016,

–  wara li kkunsidra r-rimarki tal-VP/RGħ tal-11 ta' Mejju, tal-20 ta' Lulju, tat-12 ta' Ottubru, tal-4 ta' Novembru, tal-14 u s-17 ta' Diċembru 2015, u tat-8 ta' Jannar 2016,

–  wara li kkunsidra dikjarazzjoni tal-VP/RGħ f'isem l-UE dwar l-iffirmar tal-Ftehim Politiku Libjan fis-17 ta' Diċembru 2015,

–  wara li kkunsidra l-konklużjonijiet tal-Kunsill Affarijiet Barranin tat-30 ta' Awwissu, tal-20 ta' Ottubru, tas-17 u t-18 ta' Novembru, u tal-15 ta' Diċembru 2014, tad-19 ta' Jannar, tad-9 ta' Frar, tas-16 ta' Marzu u tat-12 ta' Ottubru 2015, u tat-18 ta' Jannar 2016,

–  wara li kkunsidra d-dikjarazzjoni konġunta dwar il-Libja ta' Franza, il-Ġermanja, l-Italja, Spanja, ir-Renju Unit u l-Istati Uniti tas-17 ta' Frar 2015 u d-dikjarazzjoni konġunta tal-Alġerija, Franza, il-Ġermanja, l-Italja, il-Marokk, il-Qatar, Spanja, it-Tuneżija, it-Turkija, l-Emirati Għarab Magħquda, ir-Renju Unit, l-Istati Uniti u l-VP/RGħ tad-19 ta' Ottubru 2015,

–  wara li kkunsidra r-riżoluzzjonijiet 1970 (2011), 1973 (2011), 2174 (2014) u 2259 (2015) tal-Kunsill tas-Sigurtà tan-Nazzjonijiet Uniti,

–  wara li kkunsidra r-rapport tas-Segretarju Ġenerali tan-NU tas-26 ta' Frar 2015 dwar il-Missjoni ta' Appoġġ tan-NU fil-Libja (UNSMIL),

–  wara li kkunsidra l-Ftehim Politiku Libjan iffirmat fi Skhirat, il-Marokk, fis-17 ta' Diċembru 2015 dwar l-iffurmar ta' Gvern ta' Kunsens Nazzjonali (GNA),

–  wara li kkunsidra r-rapport tal-UNSMIL tal-4 ta' Settembru 2014 dwar is-sitwazzjoni tad-drittijiet tal-bniedem fil-Libja, u l-aġġornamenti tiegħu tas-27 ta' Diċembru 2014 u tat-12 ta' Jannar u s-16 ta' Novembru 2015,

–  wara li kkunsidra l-Konvenzjonijiet ta' Ġinevra tal-1949 u l-Protokolli Addizzjonali tagħhom tal-1977, u l-obbligu tal-partijiet f'kunflitt armat li jirrispettaw u jiżguraw li jiġi rispettat id-dritt umanitarju internazzjonali f'kull ċirkustanza,

–  wara li kkunsidra d-Deċiżjoni tal-Kunsill 2013/233/PESK tat-22 ta' Mejju 2013 li permezz tagħha nħolqot il-Missjoni tal-Unjoni Ewropea ta' Assistenza għall-Ġestjoni Integrata tal-Fruntieri fil-Libja (EUBAM Libya)(5),

–  wara li kkunsidra l-ħatra fl-4 ta' Novembru 2015 ta' Martin Kobler bħala r-Rappreżentant Speċjali tas-Segretarju Ġenerali tan-NU għal-Libja,

–  wara li kkunsidra r-riżoluzzjonijiet tiegħu tat-12 ta' Marzu 2015 dwar ir-Rapport annwali dwar id-drittijiet tal-bniedem u d-demokrazija fid-dinja fl-2013 u l-politika tal-UE dwar il-kwistjoni(6), tas-17 ta' Diċembru 2015 dwar ir-Rapport annwali dwar id-drittijiet tal-bniedem u d-demokrazija fid-dinja fl-2014 u l-politika tal-UE dwar il-kwistjoni(7), u tad-9 ta' Lulju 2015 dwar l-isfidi fir-rigward tas-sigurtà fil-Lvant Nofsani u fl-Afrika ta' Fuq u l-prospettivi ta' stabbiltà politika(8),

–  wara li kkunsidra l-Komunikat ta' Ruma tat-13 ta' Diċembru 2015 b'appoġġ għall-Gvern ta' Kunsens Nazzjonali bħala l-uniku gvern leġittimu tal-Libja,

–  wara li kkunsidra l-Artikolu 123(2) tar-Regoli ta' Proċedura tiegħu,

A.  billi l-Ftehim Politiku Libjan jirrappreżenta opportunità unika biex tibda tiġi indirizzata s-sitwazzjoni insostenibbli fil-Libja u t-tbatija tal-poplu tagħha, u biex jinbena stat ċivili demokratiku permezz ta' kunsens nazzjonali;

B.  billi l-perkors politiku tad-djalogu Libjan involva membri ewleni tal-proċess ta' demokratizzazzjoni tal-Libja, b'mod partikolari membri tal-Kamra tad-Deputati, tal-Kungress Nazzjonali Ġenerali u tal-Kunsill Transizzjonali Nazzjonali, billi partijiet ikkonċernati indipendenti oħra bħall-kunsilli muniċipali, il-partiti politiċi, il-mexxejja tribali u l-organizzazzjonijiet tan-nisa kkontribwew għall-promozzjoni ta' rikonċiljazzjoni ġenwina;

C.  billi l-Ftehim Politiku Libjan għandu l-għan li jiżgura d-drittijiet demokratiċi tal-poplu Libjan, jistabbilixxi gvern kunsenswali msejjes fuq il-prinċipju tas-separazzjoni tal-poteri, u jagħti s-setgħa lill-istituzzjonijiet tal-Istat bħall-Gvern ta' Kunsens Nazzjonali biex jindirizzaw l-isfidi kollha li qed iħabbtu wiċċhom magħhom il-Libja u l-poplu Libjan;

D.  billi r-riżoluzzjonijiet rilevanti tal-Kunsill tas-Sigurtà tan-NU kklassifikaw lil Daesh, Ansar Al Sharia u Al-Qaeda, li kollha huma preżenti fil-Libja, bħala organizzazzjonijiet terroristiċi;

E.  billi l-governanza tal-Istat, id-drittijiet tal-bniedem u s-sitwazzjoni umanitarja fil-pajjiż iddeterjoraw filwaqt li qed tiżdied il-vjolenza u li l-ambjent politiku qed isir dejjem aktar volatili; billi f'Jannar 2016 l-Aġenzija għar-Rifuġjati tan-NU (UNHCR) stmat li madwar 435 000 ruħ ġew spostati madwar il-Libja kollha; billi, barra minn hekk, il-Libja għadha tospita mijiet ta' eluf ta' rifuġjati u persuni li jfittxu l-asil ta' nazzjonalitajiet differenti, li ħafna minnhom qed jgħixu f'kundizzjonijiet prekarji; billi l-Libja saret pajjiż ta' transitu għat-traffikar tal-bnedmin, u dan wassal biex mietu eluf ta' persuni huma u jippruvaw jaqsmu l-Mediterran biex jaslu l-Ewropa;

F.  billi l-Libja għadha mdaħħla f'każijiet ta' vjolenza, f'diversi kunflitti armati, fi gwerer ta' intensità baxxa u fi gwerer li fihom parti waħda tiġġieled f'isem ħaddieħor, li qed jaffettwaw lil diversi reġjuni u qed jikkontribwixxu għal deterjorament ġenerali tal-ordni pubbliku; billi l-ksur tad-dritt internazzjonali dwar id-drittijiet tal-bniedem u tad-dritt umanitarju internazzjonali, l-abbużi mifruxa, bħal eżekuzzjonijiet sommarji u qtil ieħor, id-detenzjoni arbitrarja, it-tortura u trattament krudili, inumani jew degradanti ieħor, għadhom jitwettqu u jistgħu biss idewmu l-implimentazzjoni tal-ftehim u jikkompromettu t-transizzjoni demokratika;

1.  Jilqa' l-iffirmar tal-Ftehim Politiku Libjan dwar l-iffurmar tal-Gvern ta' Kunsens Nazzjonali bħala l-uniku gvern leġittimu tal-Libja, li jikkonsisti mill-Kunsill Presidenzjali – immexxi minn Fayyez al-Sarraj – u l-Kabinett, appoġġat mill-istituzzjonijiet l-oħra tal-istat, inklużi l-Kamra tad-Deputati u l-Kunsill tal-Istat;

2.  Iħeġġeġ lill-Kamra tad-Deputati u lill-Presidenza tagħha juru spirtu ta' kompromess u jkomplu jiddiskutu l-lista tal-Kabinett bl-għan li jiġi approvat il-Gvern ta' Kunsens Nazzjonali kif previst fil-Ftehim Politiku Libjan;

3.  Jissottolinja s-sjieda Libjana tal-Ftehim Politiku Libjan; jisħaq fuq l-importanza tal-implimentazzjoni tiegħu in buona fede, b'rieda politika soda u b'inklużività; jinnota li l-implimentazzjoni sħiħa tiegħu tipprovdi l-għodod meħtieġa biex jiġu indirizzati l-isfidi urġenti tar-riforma u l-bini tal-istituzzjonijiet tal-istat, tal-konsolidazzjoni tal-istat tad-dritt, tal-ġlieda kontra t-terroriżmu, tat-titjib tas-sitwazzjoni tad-drittijiet tal-bniedem, tal-indirizzar tal-fenomenu tal-migrazzjoni, tal-ġlieda kontra t-traffikanti u tal-istimular tat-tkabbir ekonomiku;

4.  Jappoġġa bis-sħiħ l-isforzi ta' medjazzjoni mwettqa mir-Rappreżentant Speċjali tas-Segretarju Ġenerali tan-NU għal-Libja, Martin Kobler, bl-għan li tiġi ffaċilitata soluzzjoni politika mmexxija mil-Libja billi jintlaħaq ftehim innegozjat li jirrisolvi l-kriżi u jiżgura l-għaqda, il-governabilità, l-istabilità u l-paċi; jemmen, f'dan ir-rigward, li proċess ta' rikonċiljazzjoni nazzjonali huwa essenzjali għal soċjetà futura paċifika, demokratika u inklużiva fil-Libja, u jinkoraġġixxi lill-komunità internazzjonali, b'mod partikolari lin-NU, b'appoġġ effettiv mill-UE, biex tmexxi dak il-proċess; jitlob lill-UE timponi sanzjonijiet immirati bħal projbizzjonijiet tal-ivvjaġġar u ffriżar tal-assi kontra individwi u organizzazzjonijiet li jibbojkottjaw il-Ftehim Politiku Libjan;

5.  Jesprimi s-solidarjetà tiegħu mal-poplu Libjan u jikkundanna bil-qawwa l-vjolenza u l-attakki terroristiċi kollha, fosthom dawk l-aktar reċenti, u l-ksur u l-abbużi tad-drittijiet tal-bniedem li jirriżultaw mill-ġlied u l-operazzjonijiet militari; jesprimi t-tħassib serju tiegħu dwar it-tbatija tal-popolazzjoni ċivili Libjana u tal-migranti, il-persuni espatrijati u r-rifuġjati kollha maqbuda fil-Libja; jinnota li l-ġlied fil-Libja wassal biex mietu mijiet ta' ċivili, għal spostamenti tal-massa u għal kundizzjonijiet umanitarji terribbli; itenni l-appoġġ tiegħu għall-ħidma tal-Qorti Kriminali Internazzjonali (QKI) bħala għajnuna biex tinbena mill-ġdid is-sistema tal-ġustizzja u jesprimi r-rieda tiegħu li jikkoopera magħha biex tintemm l-impunità għad-delitti l-aktar serji; huwa tal-fehma li huwa kruċjali li l-atturi rilevanti kollha fil-Libja jikkooperaw mal-QKI;

6.  Ifakkar li l-partijiet kollha fil-Libja jridu jimpenjaw ruħhom favur il-protezzjoni taċ-ċivili f'kull ħin, u li d-detenuti kollha għandhom jiġu ttrattati b'konformità mad-dritt internazzjonali dwar id-drittijiet tal-bniedem u d-dritt umanitarju internazzjonali; ifakkar li l-attakki intenzjonalment diretti kontra l-persunal involut fl-assistenza umanitarja jew f'missjoni ta' żamma tal-paċi b'konformità mal-Karta tan-NU u intiża għall-protezzjoni taċ-ċivili jew ta' beni ċivili skont id-dritt internazzjonali dwar il-kunflitt armat, jikkostitwixxu delitti tal-gwerra skont l-Istatut ta' Ruma tal-QKI;

7.  Jistieden lill-pajjiżi tal-viċinat u lill-atturi reġjonali ma jiħdux azzjonijiet li jistgħu jaggravaw diviżjonijiet u jikkompromettu t-transizzjoni demokratika tal-Libja, u jappoġġjaw bis-sħiħ lill-Gvern ta' Kunsens Nazzjonali bħala l-uniku gvern leġittimu tal-Libja; jirrimarka li l-persuni li attivament qed joħolqu ostakli għal Gvern ta' Kunsens Nazzjonali qed jiksru r-riżoluzzjonijiet tal-Kunsill tas-Sigurtà tan-NU dwar il-Libja u jridu jiffaċċjaw il-konsegwenzi tal-azzjonijiet tagħhom; jemmen li l-UE għandha tuża l-għodod tad-diplomazija u tal-politika barranija tagħha, fl-ambitu tal-Politika ta' Sigurtà u ta' Difiża Komuni (PSDK) u politiki oħra bħal dawk dwar il-kummerċ u l-kooperazzjoni, biex tinkoraġġixxi lil pajjiżi fil-Lvant Nofsani u fl-Afrika ta' Fuq jinvolvu ruħhom b'mod pożittiv fil-proċess ta' transizzjoni fil-Libja; jemmen, ukoll, li l-UE u l-Istati Membri tagħha m'għandhomx jibqgħu siekta rigward l-appoġġ provdut minn xi atturi fir-reġjun lil fazzjonijiet fi gwerra fil-Libja u lil gruppi terroristiċi li jużaw it-territorju Libjan għall-gwerer li fihom parti waħda tiġġieled f'isem ħaddieħor; jilqa' r-rwol ta' faċilitazzjoni tal-Alġerija, it-Tuneżija u l-Marokk, u jfakkar fl-importanza ta' Libja stabbli għall-istabilità u s-sigurtà tar-reġjun kollu;

8.  Jitlob lill-Istati Membri kollha jappoġġaw bis-sħiħ l-isforzi tal-VP/RGħ u jaħdmu mal-awtoritajiet Libjani, l-UE u l-UNSMIL biex jiżviluppaw pakkett koordinat ta' miżuri b'appoġġ għall-Gvern ta' Kunsens Nazzjonali, filwaqt li jirrispettaw il-prijoritajiet u t-talbiet tal-Libja; jistieden ukoll lill-Istati Membri ma jimplimentawx politiki u attivitajiet nazzjonali fil-Libja li b'xi mod jistgħu jmorru kontra l-isforzi tal-UE u dawk internazzjonali; huwa tal-fehma li l-UE ġġorr responsabilità kbira vis-à-vis r-riabilitazzjoni, ir-rikostruzzjoni u t-transizzjoni demokratika tal-Libja, u jemmen li huwa biss permezz ta' strateġija Ewropea miftiehma, magħquda u mfassla b'attenzjoni li l-UE tkun tista' tikkontribwixxi b'mod konsistenti u pożittiv għall-paċi u l-istabilità fil-Libja; jinnota, f'dan ir-rigward, li l-appoġġ għar-Riforma tas-Settur tas-Sigurtà (RSS) huwa kruċjali biex tiġi żgurata governanza demokratika, u li l-Istati Membri jridu jkunu lesti jimpenjaw ruħhom li jappoġġaw bis-sħiħ dan l-isforz fil-post fuq talba tal-awtoritajiet Libjani; jinnota li dan huwa kompletament konformi mal-ħtiġijiet u l-interessi ta' sigurtà tal-Unjoni stess;

9.  Jilqa' l-pakkett ta' għajnuna ta' EUR 100 miljun imħabbar mill-UE; jenfasizza, madankollu, l-importanza li jiġu rduppjati l-fondi umanitarja biex jiġu ssodisfati l-ħtiġijiet l-aktar urġenti ta' dawk li ġew affettwati serjament mill-kunflitt fil-Libja; jissottolinja l-ħtieġa li jiġu pprovduti fondi biex jgħinu lill-organizzazzjonijiet umanitarji jivvalutaw aħjar is-sitwazzjoni u jtejbu r-rispons tagħhom għall-ħtiġijiet fil-post; jirrimarka li, ladarba fil-poter, il-Gvern ta' Kunsens Nazzjonali għandu l-leġittimità li jirkupra l-assi Libjani li nżammu barra l-pajjiż mill-perjodu ta' Gaddafi 'l hawn;

10.  Ifakkar fir-rwol ċentrali tad-dimensjoni parlamentari fir-rigward ta' soluzzjoni politika għall-kriżi; jenfasizza li l-korpi tal-Parlament Ewropew u l-membri tiegħu jistgħu jaqsmu l-esperjenza istituzzjonali tagħhom ma' atturi Libjani sabiex jappoġġawhom fil-ħidma tagħhom favur djalogu politiku inklużiv;

11.  Jesprimi tħassib serju dwar it-theddida li qed tikber minn gruppi terroristiċi għas-sovranità, l-unità nazzjonali u t-transizzjoni demokratika tal-Libja; itenni l-kundanna qawwija tiegħu tal-estremiżmu, it-terroriżmu u l-vjolenza fil-forom u l-manifestazzjonijiet kollha tagħhom u irrispettivament mill-motivazzjonijiet għalihom; jenfasizza l-ħtieġa ta' assistenza lill-Gvern ta' Kunsens Nazzjonali fir-rispons għat-theddid għas-sigurtà Libjana u ta' appoġġ lill-gvern il-ġdid biex jegħleb lil Daesh, Ansar al-Sharia u l-gruppi kollha assoċjati ma' Al-Qaeda li qed joperaw fil-Libja; jilqa' d-deċiżjoni li jitwaqqaf Kumitat ta' Sigurtà Temporanju biex jiffaċilita l-implimentazzjoni tal-arranġamenti ta' sigurtà definiti fil-Ftehim Politiku Libjan;

12.  Għadu mħasseb dwar il-proliferazzjoni ta' armi, munizzjon u splussivi u l-kuntrabandu tal-armi, li joħolqu riskju għall-popolazzjoni u għall-istabilità tal-Libja u tar-reġjun; jinnota bi tħassib kbir it-tisħiħ ta' ċentru terroristiku fin-Nofsinhar tal-Libja u r-riskju li dan jista' jġib miegħu bħala bażi ta' taħriġ għal Daesh jekk ma jittiħdux miżuri immedjati; jinnota li huwa fl-interess tas-sigurtà tal-Ewropa stess li tappoġġa lill-awtoritajiet Libjani fl-eradikazzjoni tat-terroristi minn arthom, fit-twaqqaf tal-fluss ta' armi, fid-dekummissjonar tal-armi kollha f'idejn gruppi privati, u fiż-żarmar tal-gruppi armati jew in-netwerks kriminali kollha li joperaw fil-Libja jew permezz tagħha;

13.  Jissottolinja l-ħtieġa li jittieħdu passi immedjati biex jiġu żarmati l-gruppi armati kollha, jitnaqqas il-fluss ta' armi fil-pajjiż u jiġu affrontati b'mod aktar dirett l-atturi reġjonali li qed jikkontribwixxu għall-kunflitt billi jipprovdu armi jew appoġġ militari ieħor; jesprimi t-tħassib kbir tiegħu dwar il-fatt li konsenji ta' armi lil-Libja jistgħu jispiċċaw f'idejn il-persuni ħżiena; jafferma mill-ġdid li l-Gvern ta' Kunsens Nazzjonali jrid ikun l-uniku korp awtorizzat li jimporta armi u munizzjon, b'konformità mal-obbligi internazzjonali tal-Libja, inklużi r-riżoluzzjonijiet rilevanti tal-Kunsill tas-Sigurtà tan-NU; jenfasizza l-ħtieġa ta' armata unika, robusta nazzjonali li tkun taħt il-kontroll tal-Gvern ta' Kunsens Nazzjonali u tkun kapaċi tikkontrolla t-territorju kollu tal-Libja u l-ilmijiet tagħha, tiggarantixxi s-sigurtà tal-fruntieri tagħha u tiġġieled kontra theddid intern u estern;

14.  Ifakkar fl-impenn qawwi tal-UE favur is-sovranità, l-indipendenza, l-unità u l-integrità territorjali tal-Libja; ifakkar fir-riżoluzzjonijiet 2174 (2014) u 2213 (2015), li jwessgħu s-sanzjonijiet internazzjonali eżistenti kontra l-Libja biex jinkludu r-responsabbiltà kriminali ta' persuni li jinvolvu ruħhom fi, jew jappoġġaw, atti li "jheddu l-paċi, l-istabilità jew is-sigurtà tal-Libja, jew li jxekklu jew jikkompromettu t-tlestija b'suċċess tat-transizzjoni politika tagħha";

15.  Jenfasizza l-ħtieġa li jiġu żgurati n-newtralità u l-indipendenza tal-istituzzjonijiet finanzjarji u petroliferi, taħt l-awtorità tal-Gvern ta' Kunsens Nazzjonali, u b'mod partikolari tal-Bank Ċentrali tal-Libja (CBL), il-Kumpanija Nazzjonali taż-Żejt (NOC) u l-Awtorità tal-Investiment Libjana (LIA); jenfasizza l-ħtieġa li jiġi żgurat li dawn l-istituzzjonijiet joperaw b'mod trasparenti u responsabbli, anke fir-rigward tal-irkupru ta' assi misruqa tal-istat għall-benefiċċju tal-Libjani kollha u tal-gvern demokratiku;

16.  Itenni t-talba tiegħu lill-VP/RGħ biex tirrieżamina l-mandat tal-Missjoni tal-UE ta' Assistenza fil-Fruntieri (EUBAM) fil-Libja, li attwalment hija sospiża u stazzjonata fit-Tuneżija, sabiex titqies is-sitwazzjoni li qed tinbidel fil-pajjiż u bil-ħsieb li titfassal missjoni tal-PSDK koordinata sew biex topera flimkien mal-Gvern ta' Kunsens Nazzjonali, in-NU u sħab reġjonali; huwa tal-fehma li missjoni tal-PSDK għandu jkollha l-għan li tappoġġa l-implimentazzjoni tal-Ftehim Politiku Libjan, għandha tagħti prijorità lir-Riforma tas-Settur tas-Sigurtà (RSS) u lid-Diżarm, Demobilizzazzjoni u Reintegrazzjoni (DDR), u għandha tirrispondi għal ħtiġijiet urġenti oħra relatati mal-governanza inklużiva;

17.  Jesprimi l-ħtieġa li jintgħażlu oqsma ta' nfiq b'attenzjoni, fid-dawl tal-instabilità li tikkaratterizza lil ħafna pajjiżi tan-Nofsinhar tal-Mediterran, u tar-reviżjoni tal-Politika Ewropea tal-Viċinat (PEV); jesprimi l-fehma li l-Istrument Ewropew tal-Viċinat (ENI) 2014-2020 għandu jinkludi, bħala prijoritajiet, attivitajiet bl-għan li jappoġġaw il-kundizzjonijiet soċjoekonomiċi għat-transizzjoni, inklużi l-ħolqien ta' impjiegi u t-taħriġ vokazzjonali għaż-żgħażagħ u n-nisa Libjani, id-djalogu interkulturali u interreliġjuż, u l-kompetenza teknika għal monitoraġġ aħjar tal-fruntieri;

18.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà, lill-Gvern ta' Kunsens Nazzjonali tal-Libja, lis-Segretarju Ġenerali tan-NU, lill-Lega Għarbija u lill-Unjoni Afrikana.

(1) ĠU C 51 E, 22.2.2013, p. 114. (2) ĠU C 419, 16.12.2015, p. 192. (3) Testi adottati, P8_TA(2014)0028. (4) Testi adottati, P8_TA(2015)0010. (5) ĠU L 138, 24.5.2013, p. 15. (6) Testi adottati, P8_TA(2015)0076. (7) Testi adottati, P8_TA(2015)0470. (8) Testi adottati, P8_TA(2015)0271.