MOZZJONI GĦAL RIŻOLUZZJONI dwar il-proċedimenti ta' ksur imnedija mill-Kummissjoni fil-konfront tal-Ungerija, ir-Repubblika Ċeka u l-Polonja b'rabta mal-politiki migratorji tagħhom
23.6.2017
Marie-Christine Arnautu
B8-0441/2017
Mozzjoni għal riżoluzzjoni tal-Parlament Ewropew dwar il-proċedimenti ta' ksur imnedija mill-Kummissjoni fil-konfront tal-Ungerija, ir-Repubblika Ċeka u l-Polonja b'rabta mal-politiki migratorji tagħhom
Il-Parlament Ewropew,
– wara li kkunsidra l-proċediment ta' ksur mibdi mill-Kummissjoni fl-10 ta' Diċembru 2016, u kkonfermat fis-17 ta' Mejju 2017, fil-konfront tal-Ungerija dwar il-leġiżlazzjoni tagħha f'dak li għandu x'jaqsam mal-asil,
– wara li kkunsidra l-proċediment ta' ksur imniedi mill-Kummissjoni, fl-14 ta' Ġunju 2017, kontra r-Repubblika Ċeka, l-Ungerija u l-Polonja minħabba nuqqas ta' konformità mal-obbligi tagħhom skont id-deċiżjonijiet tal-Kunsill rigward ir-rilokazzjoni, adottati fl-2015,
– wara li kkunsidra l-Artikolu 133 tar-Regoli ta' Proċedura tiegħu,
A. billi, minkejja t-theddid tal-Kummissjoni, il-Gvern Ungeriż beħsiebu jżomm kontroll effettiv fuq il-fruntieri tiegħu, li huma wkoll il-fruntieri esterni tal-UE;
B. billi anke l-President tar-Repubblika Franċiża ammetta li s-sistema Ewropea ta' protezzjoni tal-fruntieri mhix se tlaħħaq mal-mewġiet migratorji li jmiss[1];
C. billi l-mexxejja tan-nazzjonijiet Ewropej għandhom id-dmir li jipproteġu l-identità, il-kultura u l-prosperità tal-popli rispettivi tagħhom;
1. Jesiġi li l-Kummissjoni twaqqaf minnufih il-proċedimenti tagħha fil-konfront tal-Istati Membri msemmija hawn fuq;
2. Jistieden lill-Istati Membri jappoġġjaw lill-pajjiżi membri tal-Grupp ta' Visegrad u jadottaw politiki migratorji simili għal tagħhom.
- [1] Intervista ma' Emmanuel Macron f'Le Figaro: "L'Europe n'est pas un supermarché" (L-Ewropa mhijiex supermarket) (ħarġa tal-21 ta' Ġunju 2017).