Mozzjoni għal riżoluzzjoni - B8-0473/2018Mozzjoni għal riżoluzzjoni
B8-0473/2018
Parlament Ewropew

MOZZJONI GĦAL RIŻOLUZZJONI dwar il-kontribut tal-UE lil Strument Vinkolanti tan-NU dwar il-korporazzjonijiet transnazzjonali u intrapriżi kummerċjali oħra b'karatteristiċi transnazzjonali fir-rigward tad-drittijiet tal-bniedem

2.10.2018 - (2018/2763(RSP))

imressqa wara l-mistoqsijiet għal tweġiba orali B8-0402/2018, 0403/2018 u B8-0404/2018
skont l-Artikolu 128(5) tar-Regoli ta' Proċedura

Godelieve Quisthoudt-Rowohl, Cristian Dan Preda, Andrzej Grzyb, Bogdan Brunon Wenta f'isem il-Grupp PPE

Proċedura : 2018/2763(RSP)
Ċiklu ta' ħajja waqt sessjoni
Ċiklu relatat mad-dokument :  
B8-0473/2018
Testi mressqa :
B8-0473/2018
Dibattiti :
Votazzjonijiet :
Testi adottati :

B8-0473/2018

Riżoluzzjoni tal-Parlament Ewropew dwar il-kontribut tal-UE lil Strument Vinkolanti tan-NU dwar korporazzjonijiet transnazzjonali u intrapriżi kummerċjali oħra b'karatteristiċi transnazzjonali fir-rigward tad-drittijiet tal-bniedem

(2018/2763(RSP))

Il-Parlament Ewropew,

–  wara li kkunsidra l-Artikoli 2, 3, 21 u 23 tat-Trattat dwar l-Unjoni Ewropea (TUE),

–  wara li kkunsidra l-Artikoli 207 u 208 tat-Trattat dwar il-Funzjonament tal-Unjoni Ewropea (TFUE),

–  wara li kkunsidra l-Qafas Strateġiku tal-UE dwar id-Drittijiet tal-Bniedem u d-Demokrazija kif adottat mill-Kunsill Affarijiet Barranin fil-25 ta' Ġunju 2012, u l-Pjan ta' Azzjoni dwar id-Drittijiet tal-Bniedem u d-Demokrazija 2015-2019 adottat mill-Kunsill fl-20 ta' Lulju 2015,

–  wara li kkunsidra l-Prinċipji Gwida tan-NU dwar in-Negozju u d-Drittijiet tal-Bniedem, approvati mill-Kunsill tad-Drittijiet tal-Bniedem tan-NU fir-riżoluzzjoni 17/4 tiegħu tas-16 ta' Ġunju 2011,

–  wara li kkunsidra l-Istrateġija tal-Kummissjoni "Kummerċ għal Kulħadd",

–  wara li kkunsidra l-Gwidi Settorjali tal-Kummissjoni dwar l-implimentazzjoni tal-Prinċipji Gwida tan-NU dwar in-Negozju u d-Drittijiet tal-Bniedem[1],

–  wara li kkunsidra r-rapport Interim tar-Rapporteur Speċjali dwar il-libertà ta' reliġjon jew ta' twemmin, Heiner Bielefeldt, indirizzat lill-Assemblea Ġenerali tan-NU u ffukat fuq il-mezzi għall-eliminazzjoni tal-intolleranza u d-diskriminazzjoni reliġjużi fuq il-post tax-xogħol[2],

–  wara li kkunsidra d-dokument ta' ħidma tal-persunal tal-Kummissjoni tal-14 ta' Lulju 2015 dwar l-Implimentazzjoni tal-Prinċipji Gwida tan-NU dwar in-Negozju u d-Drittijiet tal-Bniedem – Is-Sitwazzjoni Attwali (SWD(2015)0144),

–  wara li kkunsidra r-riżoluzzjoni tiegħu tal-5 ta' Lulju 2016 dwar l-implementazzjoni tar-rakkomandazzjonijiet tal-2010 tal-Parlament dwar l-istandards soċjali u ambjentali, id-drittijiet tal-bniedem u r-responsabbiltà korporattiva[3],

–  wara li kkunsidra l-Opinjoni tal-Aġenzija tal-Unjoni Ewropea għad-Drittijiet Fundamentali (FRA) bit-titolu "Improving access to remedy in the area of business and human rights at the EU level" (Intejbu l-aċċess għal rimedju fil-qasam tan-negozju u tad-drittijiet tal-bniedem fil-livell tal-UE)[4],

–  wara li kkunsidra r-riżoluzzjoni 26/9 tal-Kunsill tad-Drittijiet tal-Bniedem tan-NU tas-26 ta' Ġunju 2014 li permezz tagħha ddeċieda li jiġi stabbilit grupp ta' ħidma intergovernattiv b'kompożizzjoni miftuħa dwar il-korporazzjonijiet transnazzjonali u intrapriżi kummerċjali oħra fir-rigward tad-drittijiet tal-bniedem, li l-mandat tiegħu jkun it-tfassil ta' strument internazzjonali legalment vinkolanti li jirregola, fid-dritt internazzjonali fil-qasam tad-drittijiet tal-bniedem, l-attivitajiet tal-korporazzjonijiet transnazzjonali u ta' intrapriżi kummerċjali oħra,

–  wara li kkunsidra l-Patt Globali tan-Nazzjonijiet Uniti[5],

–  wara li kkunsidra l-Linji Gwida tal-OECD għall-Intrapriżi Multinazzjonali,

–  wara li kkunsidra l-Gwida tal-OECD dwar id-Diliġenza Dovuta għall-Imġiba Responsabbli fin-Negozju,

–  wara li kkunsidra l-Prinċipji tad-Drittijiet tat-Tfal u tan-Negozju, żviluppati mill-UNICEF,

–  wara li kkunsidra l-konklużjonijiet tal-Kunsill dwar in-Negozju u d-Drittijiet tal-Bniedem adottati fl-20 ta' Ġunju 2016,

–  wara li kkunsidra r-rakkomandazzjoni tal-Kunsill tal-Ewropa lill-Istati Membri dwar id-drittijiet tal-bniedem u n-negozju, adottata fit-2 ta' Marzu 2016,

–  wara li kkunsidra r-riżoluzzjoni tiegħu tat-13 ta' Marzu 2018 dwar l-ugwaljanza bejn il-ġeneri fil-ftehimiet kummerċjali tal-UE[6],

–  wara li kkunsidra r-riżoluzzjoni tiegħu tat-13 ta' Diċembru 2017 dwar ir-Rapport Annwali dwar id-Drittijiet tal-Bniedem u d-Demokrazija fid-Dinja fl-2016 u l-politika tal-Unjoni Ewropea dwar il-kwistjoni[7],

–  wara li kkunsidra r-riżoluzzjoni tiegħu tas-16 ta' Novembru 2017 dwar l-Istrateġija UE-Afrika: spinta għall-iżvilupp[8],

–  wara li kkunsidra r-riżoluzzjoni tiegħu tas-27 ta' April 2017 dwar inizjattiva ewlenija tal-UE għas-settur tal-ħwejjeġ[9],

–  wara li kkunsidra r-riżoluzzjoni tiegħu tal-14 ta' Diċembru 2016 dwar ir-Rapport Annwali dwar id-drittijiet tal-bniedem u d-demokrazija fid-dinja u l-politika tal-Unjoni Ewropea dwar il-kwistjoni 2015[10],

–  wara li kkunsidra r-riżoluzzjoni tiegħu tat-30 ta' Mejju 2018 dwar ir-Rapport Annwali dwar l-implimentazzjoni tal-Politika Kummerċjali Komuni[11],

–  wara li kkunsidra r-riżoluzzjoni tiegħu tat-22 ta' Novembru 2016 dwar it-titjib tal-effikaċja tal-kooperazzjoni għall-iżvilupp[12],

–  wara li kkunsidra r-riżoluzzjoni tiegħu tal-25 ta' Ottubru 2016 dwar ir-responsabbiltà tal-kumpaniji għal abbużi serji tad-drittijiet tal-bniedem f'pajjiżi terzi[13],

–  wara li kkunsidra r-riżoluzzjoni tiegħu tal-5 ta' Lulju 2016 dwar il-ġlieda kontra t-traffikar tal-bnedmin fir-relazzjonijiet esterni tal-UE[14],

–  wara li kkunsidra l-istudju kkummissjonat mis-Sottokumitat tiegħu għad-Drittijiet tal-Bniedem dwar "L-implimentazzjoni tal-Prinċipji Gwida tan-NU dwar in-Negozju u d-Drittijiet tal-Bniedem"[15],

–  wara li kkunsidra l-mistoqsijiet lill-Viċi President tal-Kummissjoni/Rappreżentant Għoli tal-Unjoni għall-Affarijiet Barranin u l-Politika ta' Sigurtà, lill-Kummissjoni u lill-Kunsill dwar il-kontribut tal-UE għal Strument Vinkolanti tan-NU dwar korporazzjonijiet transnazzjonali u intrapriżi kummerċjali oħra b'karatteristiċi transnazzjonali fir-rigward tad-drittijiet tal-bniedem (O-000074/2018 – B8-0402/2018, O-000075/2018 – B8-0403/2018 and O-000078/2018 – B8-0404/2018),

–  wara li kkunsidra l-Artikoli 128(5) u 123(2) tar-Regoli ta' Proċedura tiegħu,

A.  billi l-UE hija bbażata fuq il-valuri tar-rispett għad-dinjità tal-bniedem, il-libertà, id-demokrazija, l-ugwaljanza, l-istat tad-dritt u r-rispett għad-drittijiet tal-bniedem; billi l-azzjoni tagħha fix-xena internazzjonali (inklużi l-politiki ta' żvilupp u kummerċjali tagħha) jeħtiġilha tkun gwidata minn dawn il-prinċipji;

B  billi r-rispett għad-dritt tal-bniedem għal-libertà tal-ħsieb, tal-kuxjenza u tar-reliġjon jimplika li l-etos ta' korporazzjonijiet immexxija minn organizzazzjonijiet ibbażati fuq il-fidi għandu jiġi rispettat u protett, u li l-ebda rekwiżit ma għandu jiġi impost fuqhom li jikkontradixxi jew jimmina l-valuri ewlenin u l-prinċipji etiċi tagħhom; billi dan ir-rispett jimplika wkoll li l-korporazzjonijiet immexxija minn organizzazzjonijiet għandhom ikunu intitolati li jirrikjedu lill-ħaddiema u lill-fornituri ta' servizzi tagħhom jirrispettaw il-valuri ewlenin u l-prinċipji etiċi tagħhom u mhux li jimminawhom, u lanqas li jikkawżawlhom xi ħsara fix-xogħol jew fl-attivitajiet professjonali tagħhom;

C.  billi l-kummerċ ħieles u l-investiment urew li jikkontribwixxu b'mod sinifikanti għat-tnaqqis fil-faqar;

D.  billi l-iżvilupp għandu jimxi id f'id mal-progress soċjali u l-governanza tajba, u billi l-iżvilupp, il-kummerċ ħieles u d-drittijiet tal-bniedem jista' jkollhom impatt fuq xulxin u saħansitra jsaħħu lil xulxin;

E.  billi l-Istati għandhom jistabbilixxu b'mod ċar l-aspettattiva li l-intrapriżi kummerċjali kollha jirrispettaw id-drittijiet bażiċi tal-bniedem matul l-attivitajiet tagħhom;

F.  billi l-Patt Globali tan-NU jitlob lill-korporazzjonijiet jaċċettaw, jappoġġjaw u jattwaw, fl-isfera ta' influwenza tagħhom, ġabra ta' valuri fundamentali fl-oqsma tad-drittijiet tal-bniedem, tal-istandards tax-xogħol, tal-ambjent u tal-ġlieda kontra l-korruzzjoni, billi jimpenjaw ruħhom favur dawk il-valuri u jintegrawhom fl-operazzjonijiet kummerċjali tagħhom fuq bażi volontarja;

G.  billi l-korporazzjonijiet huma fost l-atturi ewlenin tal-globalizzazzjoni ekonomika, tas-servizzi finanzjarji u tal-kummerċ internazzjonali, u huma meħtieġa jikkonformaw mal-liġijiet applikabbli u t-trattati internazzjonali kollha fis-seħħ, kif ukoll jirrispettaw id-drittijiet tal-bniedem; billi dawn l-intrapriżi kummerċjali jistgħu xi drabi jikkawżaw, jew jikkontribwixxu għal ksur tad-drittijiet tal-bniedem, filwaqt li jista' jkollhom ukoll rwol importanti huma u joffru inċentivi pożittivi f'termini ta' promozzjoni tad-drittijiet tal-bniedem, tad-demokrazija, tal-istandards ambjentali u tar-responsabbiltà soċjali korporattiva;

H.  billi li l-UE kellha rwol ewlieni fin-negozjar u fl-implimentazzjoni ta' numru ta' inizjattivi għar-responsabbiltà globali li jmorru id f'id mal-promozzjoni u mar-rispett tal-istandards internazzjonali fir-rigward tan-negozju u tad-drittijiet tal-bniedem;

I.  billi huwa rikonoxxut l-impatt pożittiv fit-tul fuq id-drittijiet tal-bniedem tan-negozji Ewropej li joperaw fuq livell globali u jmexxu bl-eżempju permezz ta' kultura korporattiva nondiskriminatorja;

J.  billi studju tal-2017 bit-titolu "Implimentazzjoni tal-Prinċipji Gwida tan-NU dwar in-Negozju u d-Drittijiet tal-Bniedem", u kkummissjonat mis-Sottokumitat tiegħu għad-Drittijiet tal-Bniedem, juri b'mod ċar li l-Istati Membri tal-UE huma l-aktar avvanzati fil-kuntest globali fl-implimentazzjoni tal-Prinċipji Gwida tan-NU dwar in-Negozju u d-Drittijiet tal-Bniedem, bl-ogħla għadd ta' Pjanijiet ta' Azzjoni Nazzjonali li għaddejjin;

K.  billi sistema tar-responsabbiltà korporattiva għall-ksur tad-drittijiet tal-bniedem attwalment qed tiġi nnegozjata fin-NU;

1.  Jinnota li l-globalizzazzjoni u ż-żieda fl-internazzjonalizzazzjoni tal-attivitajiet kummerċjali u tal-katini tal-provvista jżidu l-importanza tar-rwol li jiżvolġu l-kumpaniji fl-iżgurar tar-rispett tad-drittijiet tal-bniedem u joħolqu sitwazzjoni li fiha n-normi u r-regoli internazzjonali huma kruċjali biex ikun evitat il-ksur tad-drittijiet tal-bniedem fil-pajjiżi terzi;

2.  Jemmen bis-sħiħ li s-settur privat huwa sieħeb importanti fil-ksib tal-Għanjiet ta' Żvilupp Sostenibbli (SDGs) u fil-mobilizzazzjoni ta' riżorsi addizzjonali għall-iżvilupp; jisħaq fuq il-fatt li, meta jitqies ir-rwol dejjem akbar fil-kooperazzjoni għall-iżvilupp, l-atturi tas-settur privat jeħtiġilhom jikkonformaw mal-prinċipji tal-effikaċja tal-iżvilupp u jirrispettaw il-prinċipji tar-responsabbiltà korporattiva matul iċ-ċiklu sħiħ tal-ħajja tal-proġetti;

3.  Jappoġġja l-implimentazzjoni sħiħa tal-Prinċipji Gwida tan-NU dwar in-Negozju u d-Drittijiet tal-Bniedem, u jistieden lill-Istati kollha jelaboraw u jadottaw pjanijiet ta' azzjoni nazzjonali għall-implimentazzjoni rapida, effikaċi u komprensiva tal-prinċipji msemmija;

4.  Jinnota li approċċ globali dwar il-mod li bih il-korporazzjonijiet transnazzjonali jikkonformaw mal-leġiżlazzjoni fil-qasam tad-drittijiet tal-bniedem għadu nieqes;

5.  Jafferma mill-ġdid il-ħtieġa urġenti li tittieħed azzjoni b'mod effikaċi u koerenti fil-livelli kollha, inklużi dawk nazzjonali, Ewropej u internazzjonali, sabiex jiġi indirizzat b'mod effikaċi l-ksur tad-drittijiet tal-bniedem minn korporazzjonijiet transnazzjonali u l-problemi legali li jirriżultaw mid-dimensjoni extraterritorjali;

6.  Jinnota l-ħidma mibdija fin-Nazzjonijiet Uniti permezz ta' Grupp ta' Ħidma Intergovernattiv biex jinħoloq strument potenzjalment vinkolanti tan-NU dwar il-korporazzjonijiet transnazzjonali u intrapriżi kummerċjali oħra fir-rigward tad-drittijiet tal-bniedem, u jqis li dan huwa pass 'il quddiem fil-promozzjoni u l-protezzjoni tad-drittijiet tal-bniedem; jisħaq li r-responsabbiltà għad-drittijiet tal-bniedem u għall-ksur tagħhom ma għandhiex tiddependi mill-forma ġuridika jew mit-tip ta' sjieda tal-intrapriża; jisħaq li kwalunkwe dazju addizzjonali impost legalment fuq l-intrapriżi għandu jiġi adattat skont id-daqs u l-kapaċità tagħhom li jlaħħqu;

7.  Jinnota li diversi pajjiżi mhumiex qed jieħdu sehem fil-proċess; jisħaq li l-UE u l-Istati Membri tagħha għandhom jaderixxu biss mal-istrument potenzjalment legalment vinkolanti ġdid jekk il-bini bażiku tiegħu jkun inkorporat kif xieraq; jisħaq, barra minn hekk, li biex tali trattat vinkolanti jkun globalment effikaċi, maġġoranza kbira tal-Istati jeħtieġu li jirratifikawh u jirrispettawh;

8.  Iqis li l-adeżjoni tal-UE għall-istrument legalment vinkolanti tan-NU tirrikjedi li dan l-istrument ma jmurx lil hinn minn dak li huwa stabbilit legalment fl-UE;

9.  Itenni għal darb'oħra l-appell tiegħu sabiex l-UE u l-Istati Membri tagħha jinvolvu ruħhom b'mod ġenwin u kostruttiv f'dan il-proċess intergovernattiv;

10.  Jistieden lill-Istati Membri tan-NU jiżguraw li n-negozjati li jwasslu għat-trattat ikunu mmexxija b'mod trasparenti u informattiv, b'konsultazzjoni ma' firxa wiesgħa ta' partijiet ikkonċernati li potenzjalment jintlaqtu mit-trattat;

11.  Jappella lill-UE biex tiżgura li kwalunkwe reviżjoni jew dokument ta' strateġija futur li għandu x'jaqsam mal-Qafas Strateġiku tal-UE u mal-Pjan ta' Azzjoni tal-UE dwar id-Drittijiet tal-Bniedem u d-Demokrazija jinkludi objettivi ċari u punti ta' riferiment li jistgħu jitkejlu għall-parteċipazzjoni tal-UE fin-negozjati tat-trattat tan-NU;

12.  Jiddeċiedi li jkompli jsegwi mill-qrib il-proċess tan-negozjati tal-Grupp ta' Ħidma Intergovernattiv;

13.  Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni u lis-Servizz Ewropew għall-Azzjoni Esterna.

 

 

Aġġornata l-aħħar: 3 ta' Ottubru 2018
Avviż legali - Politika tal-privatezza