Mozzjoni għal riżoluzzjoni - B9-0117/2019Mozzjoni għal riżoluzzjoni
B9-0117/2019
Parlament Ewropew

MOZZJONI GĦAL RIŻOLUZZJONI dwar is-sitwazzjoni attwali tal-proposta għal direttiva tal-Parlament Ewropew u tal-Kunsill li temenda d-Direttiva 2013/34/UE fir-rigward tad-divulgazzjoni tal-informazzjoni dwar it-taxxa fuq l-introjtu minn ċerti intrapriżi u fergħat (2016/0107(COD)), magħrufa bħala rapportar pubbliku għal kull pajjiż

21.10.2019 - (2019/2882(RSP))

imressqa wara d-dikjarazzjoni tal-Kunsill
skont l-Artikolu 132(2) tar-Regoli ta' Proċedura

Markus Ferber, Axel Voss, Sirpa Pietikäinen, Jiří Pospíšil
f'isem il-Grupp PPE
Jonás Fernández, Tiemo Wölken, Evelyn Regner, Ibán García Del Blanco
f'isem il-Grupp S&D
Luis Garicano, Karen Melchior, Stéphane Séjourné
f'isem il-Grupp Renew
Sven Giegold, Marie Toussaint, Heidi Hautala, Ernest Urtasun, Rasmus Andresen, Jutta Paulus, Damien Carême, Bronis Ropė
f'isem il-Grupp Verts/ALE
Angel Dzhambazki, Raffaele Stancanelli
f'isem il-Grupp ECR
José Gusmão, Manon Aubry, Marc Botenga, Dimitrios Papadimoulis, Emmanuel Maurel, Alexis Georgoulis, Martin Schirdewan, Anne‑Sophie Pelletier, Manuel Bompard, Younous Omarjee
f'isem il-Grupp GUE/NGL

Proċedura : 2019/2882(RSP)
Ċiklu ta' ħajja waqt sessjoni
Ċiklu relatat mad-dokument :  
B9-0117/2019
Testi mressqa :
B9-0117/2019
Dibattiti :
Votazzjonijiet :
Testi adottati :

B9‑0117/2019

Riżoluzzjoni tal-Parlament Ewropew dwar is-sitwazzjoni attwali tal-proposta għal direttiva tal-Parlament Ewropew u tal-Kunsill li temenda d-Direttiva 2013/34/UE fir-rigward tad-divulgazzjoni tal-informazzjoni dwar it-taxxa fuq l-introjtu minn ċerti intrapriżi u fergħat (2016/0107(COD)), magħrufa bħala rapportar pubbliku għal kull pajjiż

(2019/2882(RSP))

Il-Parlament Ewropew,

– wara li kkunsidra l-proposta għal direttiva tal-Parlament Ewropew u tal-Kunsill li temenda d-Direttiva 2013/34/UE fir-rigward tad-divulgazzjoni tal-informazzjoni dwar it-taxxa fuq l-introjtu minn ċerti intrapriżi u fergħat (COM(2016)0198)[1], kif ippreżentata mill-Kummissjoni Ewropea fit-12 ta' April 2016, magħrufa bħala rapportar pubbliku għal kull pajjiż (CBCR pubbliku),

– wara li kkunsidra l-emendi li adotta fl-4 ta' Lulju 2017 dwar il-proposta għal direttiva tal-Parlament Ewropew u tal-Kunsill li temenda d-Direttiva 2013/34/UE fir-rigward tad-divulgazzjoni tal-informazzjoni dwar it-taxxa fuq l-introjtu minn ċerti intrapriżi u fergħat[2],

– wara li kkunsidra r-riżoluzzjoni leġiżlattiva tiegħu tas-27 ta' Marzu 2019 dwar il-proposta għal direttiva tal-Parlament Ewropew u tal-Kunsill li temenda d-Direttiva 2013/34/UE fir-rigward tad-divulgazzjoni tal-informazzjoni dwar it-taxxa fuq l-introjtu minn ċerti intrapriżi u fergħat[3],

– wara li kkunsidra l-Artikolu 294(2) u (3) kif ukoll l-Artikolu 50(2) tat-Trattat dwar il-Funzjonament tal-Unjoni Ewropea (TFUE), skont liema artikoli l-Kummissjoni ppreżentat il-proposta lill-Parlament (C8-0146/2016),

– wara li kkunsidra l-opinjoni tal-Kumitat għall-Affarijiet Legali dwar il-bażi ġuridika proposta kif maħruġa f'Jannar 2017,

– wara li kkunsidra l-mistoqsija tiegħu għal tweġiba orali lill-Kunsill tas-6 ta' Frar 2018[4],

– wara li kkunsidra s-seduti ta' smigħ tal-Viċi Presidenti Eżekuttivi nnominati tal-Kummissjoni Ewropea, Valdis Dombrovskis[5] u Margrethe Vestager[6],

– wara li kkunsidra d-Direttiva 2013/36/UE tal-Parlament Ewropew u tal-Kunsill tas-26 ta' Ġunju 2013 dwar l-aċċess għall-attività tal-istituzzjonijiet ta' kreditu u s-superviżjoni prudenzjali tal-istituzzjonijiet ta' kreditu u tad-ditti tal-investiment, li temenda d-Direttiva 2002/87/KE u li tħassar id-Direttivi 2006/48/KE u 2006/49/KE, magħrufa bħala r-raba' Direttiva dwar ir-Rekwiżiti ta' Kapital (CRD IV)[7],

– wara li kkunsidra l-Artikolu 132(2) tar-Regoli ta' Proċedura tiegħu,

A. billi l-Artikolu 50(1) tat-TFUE jikkostitwixxi l-bażi ġuridika għall-proposta għal direttiva tal-Parlament Ewropew u tal-Kunsill li temenda d-Direttiva 2013/34/UE fir-rigward tad-divulgazzjoni tal-informazzjoni dwar it-taxxa fuq l-introjtu minn ċerti intrapriżi u fergħat (2016/0107(COD)), magħruf bħala CBCR pubbliku;

B. billi l-Parlament diġà adotta l-mandat tiegħu fl-4 ta' Lulju 2017 biex ir-rapporteurs jidħlu f'negozjati interistituzzjonali ta' "trilogu" abbażi ta' rapport konġunt tal-Kumitat għall-Affarijiet Ekonomiċi u Monetarji u l-Kumitat għall-Affarijiet Legali;

C. billi test ta' kompromess teknikament matur għadu ma laħaqx il-livell tal-COREPER, minkejja 18-il laqgħa tal-Gruppi ta' Ħidma tal-Kunsill u tal-Attachés waqt il-presidenzi preċedenti tal-Kunsill; billi l-Kunsill, għalhekk, s'issa għadu ma daħalx f'negozjati ta' trilogu;

D. billi l-Parlament finalment adotta l-pożizzjoni tiegħu fl-ewwel qari qabel it-tmiem tal-mandat leġiżlattiv preċedenti fis-27 ta' Marzu 2019;

E. billi l-Artikolu 89 tad-Direttiva CRD IV adottat mill-Parlament Ewropew u mill-Kunsill fl-2013 introduċa l-obbligu fuq l-Istati Membri li jeżiġu li l-istituzzjonijiet ta' kreditu u d-ditti ta' investiment jiddivulgaw kull sena, filwaqt li jispeċifikaw, skont l-Istat Membru u skont il-pajjiż terz li fih għandhom stabbiliment, informazzjoni bħan-natura u l-post ġeografiku tal-attivitajiet, il-fatturat, in-numru ta' impjegati, il-profitt jew it-telf qabel it-taxxa, it-taxxa fuq il-profitt jew it-telf kif ukoll is-sussidji pubbliċi li jirċievu, fuq bażi konsolidata għal kull sena finanzjarja;

1. Jistieden b'urġenza lill-Istati Membri biex iwaqqfu l-imblokk fi ħdan il-Kunsill u biex jikkonkludu l-ewwel qari tagħhom dwar il-proposta għal CBCR pubbliku u biex jidħlu f'negozjati interistituzzjonali mal-Parlament sabiex jiffinalizzaw il-proċess leġiżlattiv malajr kemm jista' jkun u biex jirrispettaw il-prinċipju ta' kooperazzjoni sinċiera kif stabbilit fl-Artikolu 4(3) tat-Trattat dwar l-Unjoni Ewropea (TUE);

2. Jappella b'urġenza lill-presidenza Finlandiża biex terġa' tibda u tipprijoritizza l-ħidma dwar il-proposta għal CBCR pubbliku abbażi tal-pożizzjoni tal-Parlament fl-ewwel qari sabiex tkun tista' tiġi kkunsidrata l-proposta fil-COREPER;

3. Jilqa' l-fatt li l-Kummissjoni li jmiss tenniet l-appoġġ sħiħ tagħha għal adozzjoni fil-pront tal-proposta għal CBCR pubbliku;

4. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, u lill-gvernijiet u l-parlamenti tal-Istati Membri.

 

Aġġornata l-aħħar: 23 ta' Ottubru 2019
Avviż legali - Politika tal-privatezza