TAIRISCINT I gCOMHAIR RÚIN maidir le Brexit: tréigean an nós imeachta um shárú agus leanúint den chaibidlíocht leis an Ríocht Aontaithe
5.10.2020
Julie Lechanteux
B9‑0337/2020
Tairiscint i gcomhair rún ó Pharlaimint na hEorpa maidir le Brexit: tréigean an nós imeachta um shárú agus leanúint den chaibidlíocht leis an Ríocht Aontaithe
Tá Parlaimint na hEorpa,
– ag féachaint do Riail 143 dá Rialacha Nós Imeachta,
A. de bhrí gur sheol an Coimisiún litir fógra fhoirmiúil chuig an Ríocht Aontaithe an 1 Deireadh Fómhair inar líomhnaíodh gur sháraigh an Ríocht Aontaithe a cuid oibleagáidí faoin gComhaontú um Tharraingt Siar agus de bhrí go bhfuil tús á chur le nós imeachta foirmiúil um shárú mar thoradh ar an mbeart sin;
B. de bhrí, dar leis an gCoimisiún, gur sárú é Bille na Ríochta Aontaithe um an Margadh Inmheánach, “United Kingdom Internal Market Bill” an 9 Meán Fómhair, ar Airteagal 5 den Chomhaontú um Tharraingt Siar ina leagtar síos go ndéanfaidh an tAontas Eorpach agus an Ríocht Aontaithe “gach beart iomchuí, bíodh sé ginearálta nó sonrach, chun a áirithiú go gcomhlíonfar na hoibleagáidí a eascraíonn ón gComhaontú seo agus staonfaidh siad ó aon bheart a d’fhéadfadh gnóthú chuspóirí an Chomhaontaithe seo a chur i mbaol”:
1. den tuairim nach féidir a mheas gur “beart” é an “Internal Market Bill” de réir bhrí Airteagal 5, toisc gur togra é “Bill” nach bhfuil éifeacht cheangailteach leis, murab ionann agus “Act”, ar reacht lánfheidhme é;
2. á mheas go bhfuil an nós imeachta foirmiúil um shárú in aghaidh na Ríochta Aontaithe geall le “dlíthíocht chráiteach”;
3. ag tathant ar an gCoimisiún an nós imeachta um shárú a thréigean agus leanúint den chaibidlíocht leis an Ríocht Aontaithe.