MOZZJONI GĦAL RIŻOLUZZJONI dwar l-abbozz ta' regolament ta' implimentazzjoni tal-Kummissjoni li japprova l-carbendazim bħala sustanza attiva eżistenti għall-użu fil-prodotti bijoċidali tat-tipi ta' prodotti 7 u 10
18.11.2020 - (D069099/01 – 2020/2852(RSP))
Kumitat għall-Ambjent, is-Saħħa Pubblika u s-Sikurezza tal-Ikel
Membri responsabbli: Maria Arena, Michèle Rivasi, Anja Hazekamp, Eleonora Evi
B9‑0366/2020
Riżoluzzjoni tal-Parlament Ewropew dwar l-abbozz ta' regolament ta' implimentazzjoni tal-Kummissjoni li japprova l-carbendazim bħala sustanza attiva eżistenti għall-użu fil-prodotti bijoċidali tat-tipi ta' prodotti 7 u 10
(D069099/01 – 2020/2852(RSP))
Il-Parlament Ewropew,
– wara li kkunsidra l-abbozz ta' regolament ta' implimentazzjoni tal-Kummissjoni li japprova l-carbendazim bħala sustanza attiva eżistenti għall-użu fil-prodotti bijoċidali tat-tipi ta' prodotti 7 u 10 (D069099/01),
– wara li kkunsidra d-Direttiva 98/8/KE tal-Parlament Ewropew u tal-Kunsill tas-16 ta' Frar 1998 dwar it-tqegħid fis-suq tal-prodotti bijoċidali[1],
– wara li kkunsidra r-Regolament (UE) Nru 528/2012 tal-Parlament Ewropew u tal-Kunsill tat-22 ta' Mejju 2012 dwar it-tqegħid fis-suq u l-użu tal-prodotti bijoċidali[2], u b'mod partikolari t-tielet subparagrafu tal-Artikolu 89(1) tiegħu,
– wara li kkunsidra l-Artikolu 11 tar-Regolament (UE) Nru 182/2011 tal-Parlament Ewropew u tal-Kunsill tas-16 ta' Frar 2011 li jistabbilixxi r-regoli u l-prinċipji ġenerali dwar il-modalitajiet ta' kontroll mill-Istati Membri tal-eżerċizzju mill-Kummissjoni tas-setgħat ta' implimentazzjoni[3],
– wara li kkunsidra l-Artikolu 112(2) u (3) tar-Regoli ta' Proċedura tiegħu,
– wara li kkunsidra l-mozzjoni għal riżoluzzjoni tal-Kumitat għall-Ambjent, is-Saħħa Pubblika u s-Sikurezza tal-Ikel,
A. billi l-abbozz ta' regolament ta' implimentazzjoni tal-Kummissjoni jfittex li japprova l-carbendazim bħala sustanza attiva eżistenti għall-użu fil-prodotti bijoċidali tat-tip ta' prodott 7 (preservattivi tal-pellikoli) u tat-tip ta' prodott 10 (preservattivi tal-ġebel), għal perjodu ta' tliet snin;
B. billi l-Kummissjoni impenjat ruħha favur ambizzjoni ta' tniġġis żero biex tikseb ambjent ħieles mis-sustanzi tossiċi bl-għan li tgħin biex tipproteġi aħjar liċ-ċittadini u l-ambjent kontra s-sustanzi perikolużi u tinkoraġġixxi l-innovazzjoni għall-iżvilupp ta' alternattivi sikuri u sostenibbli;
C. billi r-rapporti ta' valutazzjoni u l-konklużjonijiet tal-Istat Membru Rapporteur b'rabta mal-carbendazim ġew ippreżentati lill-Kummissjoni fit-2 ta' Awwissu 2013; billi mill-Artikolu 90(2) tar-Regolament (UE) Nru 528/2012 wieħed jista' jinferixxi li s-sustanzi li għalihom l-evalwazzjoni tal-Istati Membri tkun tlestiet sal-1 ta' Settembru 2013 għandhom jiġu evalwati f'konformità mad-dispożizzjonijiet tad-Direttiva 98/8/KE;
D. billi l-proprjetajiet perikolużi tal-carbendazim kienu diġà magħrufa fl-2013, meta r-rapporti ta' valutazzjoni ġew ippreżentati mill-Istat Membru Rapporteur; billi għaddew seba' snin bejn il-preżentazzjoni tar-rapporti ta' valutazzjoni u l-abbozz ta' regolament ta' implimentazzjoni tal-Kummissjoni;
Argumenti legali
Riskju inaċċettabbli għall-ambjent
E. billi l-approvazzjoni tal-carbendazim għall-użu fit-tipi ta' prodotti 7 u 10 tista' twassal għal riskji inaċċettabbli għall-ambjent u għas-saħħa tal-bniedem bi ksur tad-Direttiva 98/8/KE;
F. billi l-carbendazim jissodisfa l-kriterji għall-klassifikazzjoni bħala mutaġen tal-kategorija 1B u tossiku għar-riproduzzjoni tal-kategorija 1B f'konformità mar-Regolament (KE) Nru 1272/2008 tal-Parlament Ewropew u tal-Kunsill[4] u tnejn mill-kriterji persistenti, bijoakkumulattivi u tossiċi (PBT), jiġifieri (P and T);
G. billi tqajjem ukoll tħassib f'bosta studji rigward il-potenzjal tal-carbendazim li jfixkel is-sistema endokrinali[5]; billi skont l-opinjonijiet tal-Kumitat dwar il-Prodotti Bijoċidali (BPC) dwar il-carbendazim għat-tipi ta' prodotti kollha 7, 9 u 10[6], ma setgħet issir l-ebda konklużjoni rigward il-proprjetajiet li jfixklu s-sistema endokrinali; billi huwa ta' tħassib kbir li l-Kummissjoni tkompli tinjora l-prinċipju ta' prekawzjoni billi tipproponi li tawtorizza sustanzi attivi bħala riżultat ta' valutazzjonijiet inkonklużivi tal-proprjetajiet tagħhom li jfixklu s-sistema endokrinali abbażi tad-data disponibbli; billi n-nuqqas ta' konklużjoni dwar il-proprjetajiet ta' sustanza li jfixklu s-sistema endokrinali abbażi tad-disponibbiltà limitata tad-data mhuwiex ekwivalenti għall-konklużjoni li dik is-sustanza ma għandhiex proprjetajiet li jfixklu s-sistema endokrinali;
H. billi għalkemm ir-rapporti ta' valutazzjoni b'rabta mal-carbendazim ġew ippreżentati qabel l-1 ta' Settembru 2013, li jfisser li "għalkemm il-carbendazim jissodisfa l-Artikolu 5(1)(b) u (c) tar-Regolament (UE) Nru 528/2012, l-Artikolu 5(2) tar-Regolament (UE) Nru 528/2012 mhuwiex ta' rilevanza għad-deċiżjoni ta' approvazzjoni"[7], il-fatt li l-carbendazim għandu proprjetajiet perikolużi magħrufa ta' tħassib għoli ħafna xorta huwa rilevanti ħafna u ma ġiex ikkunsidrat biżżejjed fl-implimentazzjoni tad-Direttiva 98/8/KE, meta wieħed iqis l-Artikolu 10 moqri flimkien mal-Artikolu 5(1)(b) ta' dik id-Direttiva;
I. billi l-użu tal-carbendazim fit-tipi ta' prodotti 7 u 10 fit-trattament taż-żebgħa ta' barra għall-faċċati biex jiġi evitat it-tkabbir fungali u algali joħloq riskju għoli ta' tniġġis tal-ilma minħabba l-iskular ta' dawk il-bijoċidi mill-faċċati tal-bini kull darba li tagħmel ix-xita;
J. billi studju[8] kkonkluda li, fil-Ġermanja, il-carbendazim instab f'aktar minn 90 % tal-kampjuni minn tankijiet ta' sedimentazzjoni tal-ilma tax-xita u f'aktar minn 50 % tal-kampjuni minn baċiri tat-tifwir tal-ilma tal-maltemp, li jirrilaxxaw l-ilma tax-xita mhux ittrattat f'korpi tal-ilma jew inixxu fl-ilma ta' taħt l-art;
K. billi l-opinjoni tal-BPC għat-tip ta' prodott 9 (preservattivi għal fibra, ġilda, gomma u materjali polimerizzati) ikkonkludiet li l-carbendazim ma kienx approvat għar-raġuni li l-lissija tal-carbendazim minn superfiċji ttrattati bl-ilma tax-xita tirriżulta f'riskji inaċċettabbli fil-kompartimenti tal-ilma tas-superfiċje u tas-sediment u li ma tkun disponibbli l-ebda miżura adegwata ta' mmaniġġjar tar-riskji;
L. billi l-opinjonijiet tal-BPC għat-tipi ta' prodotti 7 u 10 ikkonkludew li l-użi fuq barra tal-carbendazim, inklużi ż-żebgħa (it-tip ta' prodott 7) u l-ġibs (it-tip ta' prodott 10), joħolqu riskju inaċċettabbli fil-kompartimenti tal-ilma tas-superfiċje u tas-sediment, minħabba li ma hemm disponibbli l-ebda miżura adegwata ta' mitigazzjoni tar-riskji biex jiġu evitati rilaxxi fid-drenaġġ tul il-ħajja tas-servizz (ħames snin għat-tip ta' prodott 7 u 25 sena għat-tip ta' prodott 10) ta' oġġetti ttrattati;
M. billi l-approvazzjoni tal-carbendazim għall-użu fit-tipi ta' prodotti 7 u 10, anki għal perjodu qasir ta' tliet snin, għalhekk tirriżulta fi skariku dirett ta' carbendazim fl-ambjent mill-ilma tax-xita għal perjodu massimu ta' 25 sena;
N. billi l-Iżvezja ddikjarat fl-opinjoni minoritarja tagħha lill-BPC li l-lissija matul il-ħajja fis-servizz ta' prodotti applikati u oġġetti ttrattati (eż. żebgħa u ġibs) għall-użi kollha fuq barra toħloq riskji inaċċettabbli għall-ambjent, u li dan ir-riskju ma jistax jittaffa skont ir-rapport ta' valutazzjoni;
O. billi l-fatt li l-opinjonijiet tal-BPC jikkonkludu li l-użu tal-carbendazim fit-tipi ta' prodotti 7, 9 u 10, rispettivament, jippreżenta l-istess riskji inaċċettabbli kellu jwassal għal deċiżjoni li l-carbendazim ma jiġix approvat għal dawn l-użi kollha fuq barra, u mhux biss għat-tip ta' prodott 9;
P. billi l-użi fuq ġewwa tal-carbendazim jistgħu jippreżentaw ukoll riskji inaċċettabbli, minħabba li l-istudji[9] qajmu tħassib li l-okkorrenza ta' carbendazim fl-ilma tas-superfiċje tiġi prinċipalment mill-iskariku ta' ilma mormi domestiku u industrijali ttrattat, minkejja l-konklużjoni tal-opinjonijiet tal-BPC li r-riskji għall-ambjent mill-użi fuq ġewwa tal-carbendazim huma aċċettabbli;
Kundizzjonijiet tal-approvazzjoni li jonqsu milli jtaffu r-riskji
Q. billi, fid-dawl tar-riskji għall-ambjent identifikati għall-użi vvalutati, skont l-abbozz ta' regolament ta' implimentazzjoni tal-Kummissjoni, il-carbendazim jista' jiġi approvat, sakemm ikunu osservati ċerti speċifikazzjonijiet u kundizzjonijiet dwar l-użu tiegħu, b'mod partikolari li l-valutazzjoni tal-prodott għandha "tagħti attenzjoni partikolari" lill-ilma tas-superfiċje, is-sediment, il-ħamrija u l-ilma ta' taħt l-art għal prodotti użati fiż-żebgħa jew fil-ġibs li huma maħsuba biex jintużaw fuq barra;
R. billi l-opinjonijiet tal-BPC għat-tipi ta' prodotti 7 u 10 jindikaw riskji inaċċettabbli fil-kompartimenti tal-ilma tas-superfiċje u tas-sediment, kif ukoll jindikaw li, għall-użi vvalutati, ma hemm disponibbli l-ebda miżura adegwata ta' mmaniġġjar tar-riskji biex jiġu evitati rilaxxi fis-sistema tad-drenaġġ;
S. billi t-talba tal-Kummissjoni għal "speċifikazzjonijiet u kundizzjonijiet" mehmuża mal-awtorizzazzjoni hija estremament vaga u mhijiex biżżejjed biex ittaffi t-tħassib ta' riskji inaċċettabbli; billi l-abbozz ta' regolament ta' implimentazzjoni tal-Kummissjoni ma jirrikjedix li l-Istati Membri jippreskrivu miżuri adegwati ta' mitigazzjoni tar-riskji, iżda sempliċement li jagħtu attenzjoni lir-riskji; billi l-abbozz ta' regolament ta' implimentazzjoni tal-Kummissjoni ma jqisx il-fatt li d-dokumenti ta' sostenn ikkonkludew li ma hemmx miżuri adegwati ta' mmaniġġjar tar-riskji disponibbli;
Koerenza bejn id-deċiżjoni tal-immaniġġjar tar-riskji u l-evidenza xjentifika li hija bbażata fuqha
T. billi, u kif ikkonfermat mill-Qorti tal-Ġustizzja tal-Unjoni Ewropea ("il-Qorti"), meta tiġi adottata miżura ta' mmaniġġjar tar-riskji, id-deċiżjoni meħuda mill-Kummissjoni trid tkun koerenti mal-evidenza xjentifika li hija bbażata fuqha; billi l-Kummissjoni tista' tinjora opinjoni xjentifika mogħtija matul il-proċess tat-teħid tad-deċiżjonijiet, iżda mbagħad trid tipprovdi raġunijiet speċifiċi għas-sejbiet tagħha, ta' valur xjentifiku ekwivalenti, meta mqabbla ma' dawk mogħtija fl-opinjoni; billi d-dikjarazzjoni tar-raġunijiet tagħha trid tispjega għaliex qed tinjora l-opinjoni[10];
U. billi d-deċiżjoni li l-carbendazim jiġi approvat bħala sustanza attiva eżistenti għall-użu fil-prodotti bijoċidali tat-tipi ta' prodotti 7 u 10 tikkontradixxi b'mod sinifikanti l-konklużjoni tal-opinjonijiet tal-BPC li l-użi fuq barra tal-carbendazim fiż-żebgħa (it-tip ta' prodott 7) u fil-ġibs (it-tip ta' prodott 10) joħolqu riskji inaċċettabbli fil-kompartimenti tal-ilma tas-superfiċje u tas-sediment meta wieħed iqis l-Artikolu 10 tad-Direttiva 98/8/KE moqri flimkien mal-Artikolu 5(1)(b) ta' dik id-Direttiva;
V. billi r-raġunijiet għat-tbegħid mill-konklużjoni tal-opinjonijiet tal-BPC li l-Kummissjoni tipprovdi fl-abbozz ta' regolament ta' implimentazzjoni tagħha huma limitati għall-argumenti li l-awtorizzazzjoni sħiħa tal-prodotti bijoċidali tirrikjedi pass addizzjonali fil-livell tal-Istati Membri u li r-rieżami skont ir-Regolament (UE) Nru 528/2012 se jitwettaq dalwaqt;
W. billi dawk ir-raġunijiet ma jispjegawx għaliex il-Kummissjoni qieset li l-carbendazim ma jippreżentax riskju inaċċettabbli għall-użi fit-tipi ta' prodotti 7 u 10 skont id-Direttiva 98/8/KE, b'mod partikolari minħabba li l-użu tal-istess sustanza attiva fit-tip ta' prodott 9 tqies li jippreżenta riskju inaċċettabbli, li wassal għad-deċiżjoni li ma tingħatax awtorizzazzjoni għal dak it-tip ta' prodott;
X. billi dikjarazzjoni tar-raġunijiet għat-tbegħid mill-konklużjonijiet tal-opinjonijiet tal-BPC mhijiex indispensabbli biss għall-kontroll tal-Qorti, iżda wkoll, b'mod aktar speċifiku, għall-Parlament biex ikun jista' jeżerċita s-setgħa ta' skrutinju tiegħu kif suppost;
Kunsiderazzjoni tal-alternattivi disponibbli
Y. billi skont l-opinjoni tal-BPC għat-tip ta' prodott 7, il-carbendazim huwa maħsub biex jintuża bħala fungiċida fi prodotti bijoċidali għal preservattivi tal-pellikoli li jiġu applikati jew inkorporati f'applikazzjonijiet finali bħal żebgħa; billi skont l-opinjoni tal-BPC għat-tip ta' prodott 10, il-carbendazim huwa maħsub biex jintuża bħala fungiċida fi preservattivi tal-materjal tal-kostruzzjoni li jiġu applikati jew inkorporati fi prodotti finali bħal ġibs;
Z. billi l-Kummissjoni kkonkludiet li ma hemm l-ebda alternattiva xierqa disponibbli għall-carbendazim abbażi biss ta' ħdax-il kontribuzzjoni mhux kunfidenzjali minn partijiet terzi, kollha kemm huma kumpaniji jew assoċjazzjonijiet industrijali, u li jmorru lura għall-2014; billi, jekk ikun hemm informazzjoni oħra disponibbli biex tappoġġja d-deċiżjoni tal-Kummissjoni, din għandha tkun disponibbli għall-Parlament biex ikun jista' jeżerċita bis-sħiħ is-setgħa ta' skrutinju tiegħu;
AA. billi, skont l-opinjonijiet tal-BPC, il-biċċa l-kbira tal-kontribuzzjonijiet ma għamlux differenza bejn l-użi tal-carbendazim fit-tipi ta' prodotti 7, 9 u 10, u b'hekk ma ppermettewx lill-Kummissjoni tivvaluta kif suppost id-disponibbiltà ta' alternattivi għal kull wieħed mit-tipi ta' prodotti u użi separati;
AB. billi l-informazzjoni pprovduta fil-kontribuzzjonijiet ċertament mhijiex dettaljata u aġġornata biżżejjed biex jiġi konkluż li hemm nuqqas ta' alternattivi xierqa għall-carbendazim għall-użu fil-prodotti bijoċidali tat-tipi ta' prodotti 7 u 10;
AC. billi, b'mod partikolari għat-tip ta' prodott 7, il-kontributuri ddikjaraw li sostituzzjoni tal-carbendazim fiż-żebgħa hija teknikament possibbli, għalkemm qiesu li din tieħu wisq żmien u tiġi tiswa wisq;
AD. billi, b'mod partikolari għat-tip ta' prodott 10, il-kontributuri ddikjaraw li sostituzzjoni tal-carbendazim fiż-żebgħa hija teknikament possibbli, għalkemm qiesu li din tieħu wisq żmien u tiġi tiswa wisq; billi, skont l-opinjoni tal-BPC, minħabba l-għadd baxx ħafna ta' sustanzi attivi approvati għal dak it-tip ta' prodott, l-informazzjoni disponibbli għall-BPC bħalissa mhijiex biżżejjed biex jiġi deċiż jekk hemmx xi sustanza attiva oħra li tista' tipprovdi alternattiva għall-użu tal-carbendazim bħala preservattiv fil-ġibs ikkaratterizzat minn valur għoli ta' pH;
AE. billi l-biċċa l-kbira tal-kontribuzzjonijiet ippreżentati lill-Kummissjoni fl-2014 ikkonkludew li s-sejba ta' alternattivi għall-carbendazim għat-tipi ta' prodotti 7 u 10, għalkemm mhux mingħajr diffikultajiet, kienet possibbli;
AF. billi l-applikanti kellhom seba' snin biex jinvestigaw alternattivi potenzjali għall-carbendazim, li l-proprjetajiet ta' ħsara tiegħu huma magħrufa sewwa;
AG. billi l-Kummissjoni, għalhekk, naqset milli tirrispetta d-dmir tagħha li tikkunsidra d-disponibbiltà ta' sustanzi alternattivi xierqa f'konformità mal-Artikolu 10(5) tad-Direttiva 98/8/KE; billi ma ngħatat l-ebda spjegazzjoni biex jiġi speċifikat fid-dettall fuq liema bażi l-Kummissjoni kkonkludiet li ma kienx hemm sustanzi alternattivi xierqa u suffiċjenti disponibbli; billi dettalji bħal dawn huma ta' importanza kbira għall-eżitu tal-awtorizzazzjoni preżenti meta wieħed iqis il-profil tossikoloġiku tas-sustanza;
AH. billi l-użi tal-carbendazim fit-tip ta' prodott 9 ma ngħatawx approvazzjoni; billi l-ebda informazzjoni riċevuta u msemmija fl-opinjoni tal-BPC ma kienet speċifika għat-tip ta' prodott 9; billi l-istess tħassib tqajjem minn kontributuri terzi rigward l-għadd limitat ta' alternattivi disponibbli, kif ukoll iż-żmien u l-ispejjeż meħtieġa għall-iżvilupp ta' alternattiva b'livell ekwivalenti ta' effettività għall-carbendazim għat-tip ta' prodott 9 bħal dawk għat-tipi ta' prodotti 7 u 10;
AI. billi, skont l-opinjonijiet tal-BPC għat-tipi ta' prodotti 7 u 10, il-kontributuri indikaw li huwa diffiċli li tiġi vvalutata d-disponibbiltà tal-alternattivi, minħabba li ħafna minnhom għad iridu jiġu rieżaminati skont ir-Regolament (UE) Nru 528/2012; billi mhuwiex aċċettabbli li d-dewmien fit-twettiq tal-programm ta' rieżami għandu jservi bħala ġustifikazzjoni biex ixekkel il-ħarsien tas-saħħa tal-bniedem u tal-ambjent;
Argumenti politiċi
AJ. billi huwa inaċċettabbli li l-Kummissjoni tiddeċiedi li tipposponi n-nuqqas ta' approvazzjoni ta' sustanzi li jippreżentaw riskju inaċċettabbli għas-saħħa tal-bniedem u għall-ambjent, bis-sempliċi ġustifikazzjoni li r-Regolament (UE) Nru 528/2012 se jgħin biex tali nuqqas ta' approvazzjoni jsir aktar sistematiku permezz ta' rieżamijiet futuri;
AK. billi l-abbozz ta' regolament ta' implimentazzjoni tal-Kummissjoni jistabbilixxi li skont il-punt 10 tal-Anness VI tar-Regolament (UE) Nru 528/2012, l-awtoritajiet kompetenti tal-Istati Membri għandhom jevalwaw jekk il-kundizzjonijiet tal-Artikolu 5(2) ta' dak ir-Regolament jistgħux jiġu ssodisfati fit-territorji tagħhom sabiex jiddeċiedu jekk prodott bijoċidali li jkun fih il-carbendazim jistax jiġi awtorizzat;
AL. billi l-Kummissjoni ma għandhiex tkun qed tiddelega r-responsabbiltà għar-rifjut tal-kummerċjalizzazzjoni tal-prodotti bijoċidali li jkun fihom il-carbendazim lill-Istati Membri, abbażi tal-argument li l-informazzjoni riċevuta matul il-konsultazzjoni pubblika għall-kandidati potenzjali għas-sostituzzjoni hija ta' kwalità baxxa;
AM. billi, kif propost mill-Kummissjoni, fuq l-oġġetti ttrattati se tkun meħtieġa biss tikketta li tipprovdi informazzjoni limitata u dik it-tikketta ma tkunx soġġetta għal skrutinju regolatorju qabel ma l-oġġett jitqiegħed fis-suq u jiġi nnegozjat bejn l-Istati Membri; billi, ladarba mhija meħtieġa l-ebda awtorizzazzjoni tal-prodott, mhux se jkun hemm evalwazzjoni ta' jekk l-effikaċja tal-prodott taqbilx mad-dikjarazzjonijiet tat-tikketta;
AN. billi din is-sitwazzjoni ma tipprovdix livell għoli biżżejjed ta' ħarsien tas-saħħa tal-bniedem u tal-ambjent, u lanqas ma tipprovdi kundizzjonijiet ekwi għall-kumpaniji tal-Unjoni u dawk ta' pajjiżi terzi;
1. Iqis li l-abbozz ta' regolament ta' implimentazzjoni tal-Kummissjoni mhuwiex konsistenti mad-dritt tal-Unjoni, fis-sens li mhuwiex kompatibbli mal-għan u l-kontenut tad-Direttiva 98/8/KE jew tar-Regolament (UE) Nru 528/2012;
2. Iqis, fid-dawl
a. tal-proprjetajiet perikolużi tal-carbendazim,
b. tad-destin ambjentali tiegħu, kif ukoll tan-nuqqas ta' miżuri ta' mmaniġġjar tar-riskji ddikjarati fid-dokumenti ta' sostenn,
c. tan-nuqqas ta' data li tikkonkludi b'mod deċiżiv dwar in-nuqqas ta' alternattivi xierqa,
d. tal-perjodu ta' seba' snin li jkun għadda mill-preżentazzjoni tar-rapporti ta' valutazzjoni, u
e. tan-nuqqas ta' koerenza bejn id-deċiżjonijiet tal-Kummissjoni dwar l-użi tal-carbendazim fit-tipi ta' prodotti 7, 9 u 10,
li l-abbozz ta' regolament ta' implimentazzjoni tal-Kummissjoni li japprova l-carbendazim bħala sustanza attiva eżistenti għall-użu fil-prodotti bijoċidali tat-tipi ta' prodotti 7 u 10, anki għal perjodu qasir ta' tliet snin, mhuwiex proporzjonat fid-dawl tar-riskji inaċċettabbli li joħloq għas-saħħa tal-bniedem u għall-ambjent, u kellu jwassal lill-Kummissjoni għall-konklużjoni ta' riskji inaċċettabbli, minħabba li l-użu tal-carbendazim fi prodott għadu jagħti lok għal tħassib;
3. Iqis li l-informazzjoni pprovduta mill-Kummissjoni fl-abbozz ta' regolament ta' implimentazzjoni tagħha mhijiex biżżejjed biex il-Parlament ikun jista' jeżerċita s-setgħa ta' skrutinju tiegħu kif suppost;
4. Jistieden lill-Kummissjoni tirtira l-abbozz ta' regolament ta' implimentazzjoni tagħha u tippreżenta abbozz ġdid lill-kumitat, li jipproponi li l-carbendazim ma jiġix approvat bħala sustanza attiva għall-użu fil-prodotti bijoċidali tat-tipi ta' prodotti 7 u 10;
5. Itenni li, għalkemm ir-rapporti ta' valutazzjoni ġew ippreżentati qabel l-1 ta' Settembru 2013, l-awtorizzazzjoni ta' sustanza kklassifikata bħala mutaġen tal-kategorija 1B u tossika għar-riproduzzjoni tal-kategorija 1B, u bi proprjetajiet li potenzjalment ifixklu s-sistema endokrinali toħloq riskji inaċċettabbli għas-saħħa tal-bniedem b'rabta ma' użi bħal dawk ikkunsidrati;
°
° °
6. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill u lill-Kummissjoni, kif ukoll lill-gvernijiet u lill-parlamenti tal-Istati Membri.
- [1] ĠU L 123, 24.4.1998, p. 1.
- [2] ĠU L 167, 27.6.2012, p. 1.
- [3] ĠU L 55, 28.2.2011, p. 13.
- [4] Regolament (KE) Nru 1272/2008 tal-Parlament Ewropew u tal-Kunsill tas-16 ta' Diċembru 2008 dwar il-klassifikazzjoni, l-ittikkettar u l-imballaġġ tas-sustanzi u t-taħlitiet, li jemenda u jħassar id-Direttivi 67/548/KEE u 1999/45/KE, u li jemenda r-Regolament (KE) Nru 1907/2006 (ĠU L 353, 31.12.2008, p. 1).
- [5] Morinaga, H. et al., "A Benzimidazole Fungicide, Benomyl, and Its Metabolite, Carbendazim, Induce Aromatase Activity in a Human Ovarian Granulose-Like Tumor Cell Line (KGN)", Endocrinology 2004, 145(4):1860–1869; Kim, D-J. et al., "Benomyl induction of brain aromatase and toxic effects in the zebrafish embryo", Journal of Applied Toxicology 2009, 29:289–294; Goldman, J.M. et al., "Effects of the benomyl metabolite, carbendazim, on the hypothalamic-pituitary reproductive axis in the male rat", Toxicology 1989, 57(2): 173-182; Jiang, J. et al, "Carbendazim has the potential to induce oxidative stress, apoptosis, immunotoxicity and endocrine disruption during zebrafish larvae development", Toxicology in Vitro 2015, 29(7):1473-1481; Singh, S., Singh, N., Kumar, V. et al., "Toxicity, monitoring and biodegradation of the fungicide carbendazim", Environmental Chemistry Letters 2016, 14: 317–329; Jin, C., Zeng, Z., Wang, C., Luo, T., Wang, S., Zhou, J., Ni, Y., Fu, Z., Jin, Y., "Insights into a Possible Mechanism Underlying the Connection of Carbendazim-Induced Lipid Metabolism Disorder and Gut Microbiota Dysbiosis in Mice", Toxicological Sciences 2018, 166(2): 382-393; Durand, P., Martin, G., Blondet, A., Gilleron, J., Carette, D., Janczarski, S., Christin, E., Pointis, G., Perrard, M.H., "Effects of low doses of carbendazim or iprodione either separately or in mixture on the pubertal rat seminiferous epithelium: An ex vivo study", Toxicology In Vitro 2017, 45(3):366-373; Jin, Y., Zeng, Z., Wu, Y., Zhang, S., Fu, Z., "Oral Exposure of Mice to Carbendazim Induces Hepatic Lipid Metabolism Disorder and Gut Microbiota Dysbiosis", Toxicological Sciences 2015, 147(1):116-26; Rama, E.M., Bortolan, S., Vieira, M.L., Gerardin, D.C., Moreira, E.G., "Reproductive and possible hormonal effects of carbendazim", Regulatory Toxicology and Pharmacology 2014, 69(3):476-486.
- [6] Opinjoni tal-BPC tal-10 ta' Diċembru 2019 dwar l-applikazzjoni għall-approvazzjoni tas-sustanza attiva: Carbendazim, Tip ta' prodott: 7; Opinjoni tal-BPC tas-27 ta' Frar 2019 dwar l-applikazzjoni għall-approvazzjoni tas-sustanza attiva: Carbendazim, Tip ta' prodott: 9; Opinjoni tal-BPC tal-10 ta' Diċembru 2019 dwar l-applikazzjoni għall-approvazzjoni tas-sustanza attiva: Carbendazim, Tip ta' prodott: 10; https://echa.europa.eu/regulations/biocidal-products-regulation/approval-of-active-substances/bpc-opinions-on-active-substance-approval?diss=true&search_criteria_ecnumber=234-232-0&search_criteria_casnumber=10605-21-7&search_criteria_name=Carbendazim
- [7] Opinjonijiet tal-BPC għat-tipi ta' prodotti 7 u 10, p. 14.
-
[8] https://www.umweltbundesamt.de/sites/default/files/medien/479/ publikationen/texte_169-2020_belastung_der_umwelt_mit_bioziden_realistischer_erfassen_-_schwerpunkt_eintraege_ueber_klaeranlagen.pdf
- [9] Merel, S., Benzing, S., Gleiser, C., Di Napoli-Davis, G., Zwiener, C., "Occurrence and overlooked sources of the biocide carbendazim in wastewater and surface water", Environmental Pollution 2018, 239:512-521.
- [10] Ara l-Kawża T‑837/16, L-Iżvezja vs. Il-Kummissjoni, ECLI:EU:T:2019:144, il-paragrafu 69.