MOZZJONI GĦAL RIŻOLUZZJONI dwar is-sitwazzjoni fin-Nikaragwa wara l-elezzjonijiet tas-7 ta' Novembru
8.12.2021 - (2021/3000(RSP))
skont l-Artikolu 132(2) tar-Regoli ta' Proċedura
Pedro Marques, Javi López
f'isem il-Grupp S&D
Ara wkoll il-mozzjoni għal riżoluzzjoni komuni RC-B9-0581/2021
B9‑0585/2021
Riżoluzzjoni tal-Parlament Ewropew dwar is-sitwazzjoni fin-Nikaragwa wara l-elezzjonijiet tas-7 ta' Novembru
Il-Parlament Ewropew,
– wara li kkunsidra r-riżoluzzjonijiet preċedenti tiegħu dwar in-Nikaragwa, b'mod partikolari dik tat-8 ta' Lulju 2021 dwar is-sitwazzjoni fin-Nikaragwa[1],
– wara li kkunsidra d-dikjarazzjonijiet dwar in-Nikaragwa mill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà (VP/HR) f'isem l-UE, b'mod partikolari dik tat-8 ta' Novembru 2021 dwar l-elezzjonijiet reċenti,
– wara li kkunsidra l-Ftehim li jistabbilixxi Assoċjazzjoni bejn l-Unjoni Ewropea u l-Istati Membri tagħha, minn naħa waħda, u l-Amerka Ċentrali, min-naħa l-oħra[2] (il-Ftehim ta' Assoċjazzjoni bejn l-UE u l-Amerka Ċentrali),
– wara li kkunsidra r-regolamenti u d-deċiżjonijiet tal-Kunsill dwar miżuri restrittivi kontra ksur u abbużi serji tad-drittijiet tal-bniedem fin-Nikaragwa u d-Deċiżjoni tal-Kunsill (PESK) 2021/1800 tal-11 ta' Ottubru 2021 li temenda d-Deċiżjoni (PESK) 2019/1720 dwar miżuri restrittivi fid-dawl tas-sitwazzjoni fin-Nikaragwa, li ġeddet is-sanzjonijiet sal-15 ta' Ottubru 2022[3],
– wara li kkunsidra r-riżoluzzjoni tal-Organizzazzjoni tal-Istati Amerikani (OAS) tal-20 ta' Ottubru 2021 dwar is-sitwazzjoni fin-Nikaragwa,
– wara li kkunsidra l-azzjoni presidenzjali mill-President Biden tal-Istati Uniti tas-16 ta' Novembru 2021 bit-titolu "Proklamazzjoni dwar is-Sospensjoni tad-Dħul bħala Immigranti u Mhux Immigranti ta' Persuni Responsabbli għal Politiki jew Azzjonijiet Li Jheddu d-Demokrazija fin-Nikaragwa",
– wara li kkunsidra d-dikjarazzjoni tal-Kummissjoni Inter-Amerikana dwar id-Drittijiet tal-Bniedem tal-20 ta' Novembru 2021 li tafferma mill-ġdid il-ġuriżdizzjoni kompetenti tagħha fuq in-Nikaragwa u jesprimi d-dispjaċir tiegħu għad-deċiżjoni tan-Nikaragwa li tiddenunzja l-Karta tal-OAS f'kuntest ta' ksur serju tad-drittijiet tal-bniedem,
– wara li kkunsidra l-Artikolu 132(2) tar-Regoli ta' Proċedura tiegħu,
A. billi fis-7 ta' Novembru 2021, saru elezzjonijiet presidenzjali u leġiżlattivi farsa fin-Nikaragwa fost allegazzjonijiet ta' frodi; billi minn Ġunju 2021, ir-reġim ta' Ortega żamm 50 mill-aktar avversarji politiċi prominenti tiegħu fil-ħabs, inklużi prekandidati presidenzjali; billi l-Kunsill Elettorali Suprem immexxi mir-reġim (el Consejo Supremo Electoral) irrevoka l-personalità ġuridika tal-partiti indipendenti kollha tal-oppożizzjoni, inklużi seba' prekandidati presidenzjali;
B. billi bi kważi nofs il-voti magħduda, il-Kunsill Elettorali Suprem irrapporta li Daniel Ortega kien rebaħ ir-raba' elezzjoni mill-ġdid konsekuttiva tiegħu b'75 % tal-vot popolari u b'parteċipazzjoni ta' 65 %: billi 75 mill-91 siġġu fl-assemblea nazzjonali se jkunu kkontrollati mill-FSLN (el Frente Sandinista de Liberación Nacional); billi Walter Espinoza tal-Partido Liberal Constitucionalista, b'14 % tal-vot u 10 siġġijiet, huwa l-figura tal-oppożizzjoni ewlenija fil-leġiżlatura; billi l-osservazzjonijiet imwettqa mill-organizzazzjonijiet tas-soċjetà ċivili tan-Nikaragwa qiesu li l-parteċipazzjoni kienet ħafna aktar baxxa, u b'hekk ir-rata ta' astensjoni kienet ta' madwar 81.5 %;
C. billi skont l-organizzazzjonijiet tas-soċjetà ċivili, ġew irreġistrati 285 att ta' vjolenza politika u atti ta' koerċizzjoni elettorali f'jum l-elezzjoni, inklużi atti ta' intimidazzjoni, fastidju, theddid u rikatt li prinċipalment kienu mmirati lejn il-ħaddiema tal-istat, l-impjegati tas-settur pubbliku, l-istudenti u l-persunal mediku biex iġegħluhom jivvutaw; billi l-Gvern tan-Nikaragwa ċaħħad lill-poplu tan-Nikaragwa mid-drittijiet ċivili u politiċi tiegħu u mil-libertajiet tal-espressjoni, tal-assoċjazzjoni u tal-assemblea paċifika, ipprojbixxa għexieren ta' organizzazzjonijiet tas-soċjetà ċivili u ma rrispettax l-impenji tiegħu dwar id-drittijiet tal-bniedem u l-libertajiet fundamentali skont il-Kostituzzjoni tan-Nikaragwa, il-Karta Demokratika Inter-Amerikana u l-patti internazzjonali li l-pajjiż huwa parti minnhom;
D. billi l-Gvern tan-Nikaragwa adotta liġijiet dejjem aktar restrittivi f'dawn l-aħħar ftit snin, li jistituzzjonalizzaw ir-repressjoni u jillegalizzaw l-atti li twettqu fil-pajjiż sa mill-adozzjoni tagħhom; billi n-Nikaragwa nbidlet f'repubblika ta' biża', b'aktar minn 140 000 ċittadin obbligati jfittxu rifuġju fl-eżilju; billi matul l-2020, 47 % tan-Nikaragwani fil-Costa Rica kienu qed jgħixu fil-faqar, b'aktar minn tliet kwarti minnhom li setgħu jieklu biss darba kuljum, 41 % ma kellhom l-ebda sors stabbli ta' dħul, u wieħed minn kull ħamsa ma kellu l-ebda abitazzjoni sigura għax-xahar li jmiss;
E. billi r-rapport tal-Kummissjoni Inter-Amerikana dwar id-Drittijiet tal-Bniedem tal-25 ta' Ottubru 2021 bit-titolu "In-Nikaragwa: Il-Konċentrazzjoni tas-Setgħa u l-Imminar tal-Istat tad-Dritt" iddikjara li fin-Nikaragwa, kien ġie stabbilit stat tal-pulizija permezz tar-repressjoni, il-korruzzjoni, il-frodi elettorali u l-impunità strutturali mfassla mill-gvern biex jikseb il-"perpetwazzjoni indefinita tiegħu fis-setgħa u ż-żamma tal-privileġġi u l-immunitajiet";
F. billi aktar minn 40 pajjiż esprimaw diżapprovazzjoni qawwija għall-elezzjonijiet tan-Nikaragwa u rrifjutaw li jirrikonoxxuhom bħala demokratiċi; billi fl-Assemblea Ġenerali tal-OAS ġie adottat abbozz ta' riżoluzzjoni fl-10 ta' Novembru 2021 li jgħid li l-elezzjonijiet tan-Nikaragwa ma kellhomx "leġittimità demokratika"; billi b'ritaljazzjoni, il-Gvern tan-Nikaragwa ħabbar li se jibda l-proċess ta' sentejn ta' rtirar mill-OAS;
G. billi matul il-perjodu elettorali, seba' outlets tal-media internazzjonali ma tħallewx jidħlu fil-pajjiż biex jirrappurtaw dwar l-elezzjonijiet; billi l-assoċjazzjonijiet tal-ġurnaliżmu indipendenti ddenunzjaw mill-anqas 52 attakk kontra ġurnalisti indipendenti li seħħew bejn il-25 ta' Ottubru u s-7 ta' Novembru 2021; billi fis-7 ta' Novembru ġew akkreditati biss outlets tal-media uffiċjali, bi ksur tad-dritt għall-informazzjoni u l-libertà tal-espressjoni;
H. billi bejn it-3 u s-7 ta' Novembru 2021, ġew irrapportati 35 detenzjoni arbitrarja fil-pajjiż; billi disgħa biss mill-priġunieri ġew meħlusa u 26 għadhom miżmuma l-ħabs; billi dan jammonta għal total ta' 170 persuna f'detenzjoni arbitrarja, inklużi s-seba' prekandidati presidenzjali; billi dan il-ksur tad-drittijiet tal-bniedem, allegatament imwettaq l-aktar mill-uffiċjali tal-pulizija, mill-uffiċjali muniċipali, mill-aġenti parastatali u mill-membri tal-gvern u dawk li jappoġġjawh, żdied fil-jiem qabel l-elezzjonijiet frawdolenti;
I. billi f'Ottubru 2021, 5 % biss tal-popolazzjoni fin-Nikaragwa kienet kompletament imlaqqma; billi jekk issegwi din ix-xejra, in-Nikaragwa mhux se tilħaq immunità mifruxa qabel l-2023;
1. Jikkundanna l-proċess elettorali mhux demokratiku fin-Nikaragwa li kiser l-istandards demokratiċi internazzjonali kollha għal elezzjonijiet kredibbli, inklużivi, ġusti u trasparenti; jirrifjuta l-leġittimità tar-riżultati tal-elezzjonijiet illegali; jappoġġja dikjarazzjonijiet li jaffermaw li dawn l-elezzjonijiet itemmu l-konverżjoni tan-Nikaragwa f'reġim awtokratiku;
2. Itenni s-solidarjetà tiegħu mal-popolazzjoni tan-Nikaragwa u jikkundanna bil-qawwa l-azzjonijiet ripressivi kollha min-naħa tal-awtoritajiet tan-Nikaragwa kontra l-partiti tal-oppożizzjoni demokratika u l-membri tagħhom, ġurnalisti u ħaddiema oħra tal-media, studenti, popli indiġeni, difensuri tad-drittijiet tal-bniedem u membri ta' organizzazzjonijiet tas-soċjetà ċivili, kif ukoll il-membri tal-familji tagħhom, u b'mod partikolari l-imwiet ikkawżati; jappella għall-waqfien immedjat mill-impożizzjoni ta' miżuri restrittivi, ir-repressjoni u l-ksur tad-drittijiet tal-bniedem, u jappella sabiex jittieħed l-obbligu ta' rendikont għall-ksur serju mwettaq mill-Gvern tan-Nikaragwa sa mill-2018;
3. Itenni li l-unika soluzzjoni għall-kriżi politika profonda fin-Nikaragwa hija djalogu nazzjonali inklużiv u sinifikattiv, u jesprimi dispjaċir għad-diżimpenn ripetut tar-reġim tan-Nikaragwa u n-nuqqas ta' rieda tiegħu li jibda proċess bħal dan; ifakkar fil-pożizzjonijiet preċedenti tiegħu li jistabbilixxu l-prekundizzjonijiet bażiċi għal djalogu nazzjonali inklużiv u sinifikattiv li għandu jitnieda mill-gvern: jistieden lill-Gvern tan-Nikaragwa biex minnufih jerġa' jistabbilixxi l-istat tad-dritt u l-libertajiet fundamentali fil-pajjiż u biex itemm l-istat ta' repressjoni u biża'; jappella għall-ħelsien immedjat u mingħajr kundizzjonijiet tal-priġunieri politiċi kollha miżmuma b'mod arbitrarju u r-ritorn tal-eżiljati mingħajr eċċezzjoni u b'garanziji sħaħ, u għar-ritorn ta' korpi internazzjonali tad-drittijiet tal-bniedem lejn il-pajjiż; jappella lill-UE u lill-Istati Membri tagħha jappoġġjaw l-isforzi attwali u futuri tas-soċjetà ċivili biex jinħolqu l-kundizzjonijiet għal djalogu li jwassal għal tranżizzjoni demokratika, f'konformità ma' dak li ġie stabbilit fil-ftehimiet ta' Marzu 2019;
4. Jappella li jsiru elezzjonijiet f'konformità mal-istandards internazzjonali u l-Karta Demokratika Inter-Amerikana biex jiġi żgurat li jitwettqu l-aspirazzjonijiet demokratiċi tal-poplu tan-Nikaragwa, u li l-organizzazzjonijiet internazzjonali u l-organizzazzjonijiet tas-soċjetà ċivili jingħataw aċċess immedjat għall-pajjiż mingħajr restrizzjonijiet;
5. Jappoġġja d-dikjarazzjoni tal-VP/HR li qed jikkunsidra l-istrumenti kollha għad-dispożizzjoni tal-UE bil-għan li jieħu miżuri addizzjonali, inklużi dawk li jistgħu jmorru lil hinn mir-restrizzjonijiet individwali, filwaqt li fl-istess ħin jimmira li jevita kwalunkwe miżura li tista' potenzjalment iżżid mat-tbatija tal-poplu tan-Nikaragwa;
6. Jappella lill-UE u lill-Istati Membri tagħha jkomplu l-kooperazzjoni umanitarja tagħhom biex jappoġġjaw lil dawk l-aktar vulnerabbli, filwaqt li jesploraw miżuri alternattivi biex jindirizzaw il-korruzzjoni mifruxa u jiżguraw li l-fondi tal-UE allokati lin-Nikaragwa, inkluż permezz ta' istituzzjonijiet multilaterali u finanzjarji, ma jintużawx biex isaħħu r-reġim korrott;
7. Jesprimi dispjaċir għad-denunzja tal-Karta tal-OAS maħruġa fid-19 ta' Novembru 2021 mill-Ministru tal-Affarijiet Barranin tan-Nikaragwa, u jenfasizza li din id-deċiżjoni se tagħlaq l-aċċess tal-pajjiż għall-finanzjament mill-Bank għall-Iżvilupp Inter-Amerikan u jimplika li n-Nikaragwa se tirtira mill-mekkaniżmi reġjonali tal-OAS għall-protezzjoni tad-drittijiet tal-bniedem;
8. Ifakkar fil-fatt li, fid-dawl tal-Ftehim ta' Assoċjazzjoni bejn l-UE u l-Amerka Ċentrali, in-Nikaragwa jeħtiġilha tirrispetta u tikkonsolida l-prinċipji tal-istat tad-dritt, tad-demokrazija u tad-drittijiet tal-bniedem; itenni t-talba tiegħu li, fid-dawl taċ-ċirkostanzi attwali, tiġi skattata l-klawżola demokratika tal-Ftehim ta' Assoċjazzjoni;
9. Jitlob il-ġustizzja u l-obbligu ta' rendikont għall-vittmi kollha, f'konformità mal-liġijiet, mal-impenji u mal-obbligi internazzjonali tan-Nikaragwa, permezz ta' investigazzjonijiet imparzjali, bir-reqqa u indipendenti; jistieden lill-UE u lill-Istati Membri tagħha jappoġġjaw il-ħolqien ta' investigazzjoni u mekkaniżmu ta' obbligu ta' rendikont fi ħdan il-Kunsill tan-NU għad-Drittijiet tal-Bniedem;
10. Jistieden lill-UE u lill-Istati Membri tagħha jimmonitorjaw mill-qrib is-sitwazzjoni fuq il-post permezz tar-rappreżentanti u tal-ambaxxati tagħhom fin-Nikaragwa, inkluż permezz ta' monitoraġġ tal-proċess u billi jżuru kritiċi u mexxejja tal-oppożizzjoni li jinsabu l-ħabs jew taħt detenzjoni domiċiljari, u biex jiġi ffaċilitat il-ħruġ ta' viżi ta' emerġenza u jiġi pprovdut rifuġju temporanju għal raġunijiet politiċi fl-Istati Membri; jitlob li s-Servizz Ewropew għall-Azzjoni Esterna jsaħħaħ id-djalogu regolari tiegħu mal-organizzazzjonijiet tas-soċjetà ċivili u mad-difensuri tad-drittijiet tal-bniedem u jsaħħaħ il-mekkaniżmi biex jappoġġja l-ħidma indispensabbli tagħhom;
11. Itenni s-sejħa tiegħu għall-estradizzjoni immedjata ta' Alessio Casimirri lejn l-Italja;
12. Jagħti istruzzjonijiet lill-President tiegħu sabiex jgħaddi din ir-riżoluzzjoni lill-Kunsill, lill-Kummissjoni, lill-gvernijiet u lill-parlamenti tal-Istati Membri, lis-Segretarju Ġenerali tal-Organizzazzjoni tal-Istati Amerikani, lill-Assemblea Parlamentari Ewro-Latin-Amerikana, lill-Parlament tal-Amerka Ċentrali, u lill-Gvern u l-Parlament tar-Repubblika tan-Nikaragwa.
- [1] Testi adottati, P9_TA(2021)0359.
- [2] ĠU L 346, 15.12.2012, p. 3.
- [3] ĠU L 361, 12.10.2021, p. 52.