Az ülések szó szerinti jegyzőkönyve

2019. április 17., Szerda - Strasbourg

9.3. Piacfelügyelet és termékmegfelelőség (A8-0277/2018 - Nicola Danti)

Oral explanations of vote

  Marlene Mizzi (S&D). – Sur President, meta l-konsumaturi jixtru prodotti ġodda, bħal artikli elettroniċi, ġugarelli u kożmetiċi, huma jistennew li dawn ikunu sikuri. Sfortunatament dan mhux dejjem il-każ, u ħafna mid-drabi, il-prodotti li jitqiegħdu fuq is-suq ma jkunux sikuri, iżda perikolużi u ta' ħsara.

Prodotti sikuri huma l-uniku prodotti li għandhom jinbigħu fuq is-suq, irrispettivament jekk jinbigħux b'mod tradizzjonali jew b'mezzi online, u ma jimpurtax jekk humiex manifatturati fl-Unjoni jew le.

Għaldaqstant għandna bżonn regoli ta' sorveljanza u infurzar xieraq ta' dawn ir-regoli, flimkien ma' atteġġjament xieraq mill-manifatturi u l-kummerċjanti, li jikkonformaw mar-regoli u l-istandards li diġà jeżistu. Fuq kollox, għandna bżonn leġiżlazzjoni Ewropea li hija kapaċi tipproteġi l-konsumaturi minn prodotti li jistgħu jkunu perikolużi.

Illum ivvotajt favur leġiżlazzjoni li ħa twassal għal bosta titjib importanti għas-sorveljanza tas-suq f'dak li għandu x'jaqsam ma' prodotti u sigurtà tal-konsumaturi, sabiex ikollna Suq Uniku aktar ġust. Ir-regoli l-ġodda se jipproteġu l-interessi ta' saħħa u ambjentali, flimkien mas-sigurtà tal-konsumaturi.