Rapporti verbatim tad-dibattiti

L-Erbgħa, 16 ta' Settembru 2020 - Brussell

L-Istat tal-Unjoni (dibattitu topiku) (tkomplija tad-dibattitu)

  Josianne Cutajar (S&D), bil-miktub. – Huma sinjali sbieħ li rċevejna f’dan l-indirizz storiku. Hija sensazzjoni tassew pożittiva li tara empatija mill-Kummissjoni Ewropea lejn dawk iċ-ċittadini li sofrew l-aktar fl-aħħar xhur f'’din is-sitwazzjoni bla preċedent u lejn dawk iċ-ċittadini li anke l-qadi ta’ dmirijiethom kien jitlob aktar kuraġġ. Nisslet sensazzjoni pożittiva wkoll il-viżjoni, imma fuq kollox ir-rieda, li qed naraw biex nattwaw il-miri iebsa li poġġejna quddiemna biex nimmodernizzaw u niddiġitalizzaw l-industrija u l-ekonomija, biex nagħmluhom iktar nodfa, aħjar għal saħħitna u għad-dinja tagħna stess. Imma meta nħares madwari nara mkejjen tal-Unjoni li jinsabu fi stat differenti minn oħrajn. Nara mwiet iseħħu b’regolarità fl-ibħra li jdawruna. Nara ċrieki kriminali jużaw l-istess sistema li din l-Unjoni ddefendiet għal tant snin. Ma narax solidarjetà biex din l-isfida komuni, kif issejħilha l-President, nindirizzawha b’mod konġunt. Aħna nafu li hija sfida Ewropea u ilna nafu sew. Sar wisq ħin biex nistennew għas-solidarjetà. Intilfu wisq ħajjiet. Iċ-ċittadini fil-pajjiżi tal-fruntieri ma jistgħux jistennew iżjed sa ma l-Ewropej l-oħra tniggiżhom il-kuxjenza. Sforz fir-ripatrijazzjoni ta’ min ma jikkwalifikax għal protezzjoni huwa punt bażiku li tajjeb nitilqu minnu, iżda l-Patt il-ġdid dwar il-Migrazzjoni jrid jinkludi pjan ta’ rilokazzjoni mandatorja biex verament nibdew naraw u nemmnu fil-ġustizzja.