Tnaqqis fil-baġit f'Malta
15.3.2012
Mistoqsija għal tweġiba bil-miktub E-002901/2012
lill-Kummissjoni
Artikolu 117 tar-Regoli ta’ Proċedura
Edward Scicluna (S&D)
Fis-6 ta’ Jannar 2012, il-Gvern ta’ Malta ħabbar tnaqqis fil-baġit ekwivalenti għal 0.59 % tal-Prodott Domestiku Gross (PDG), jiġifieri, madwar EUR 40 miljun. Dan it-tnaqqis ġie allokat mill-gvern kif ġej: salarji (0.1 % tal-PDG), sahra (0.04 % tal-PDG), nefqa operazzjonali u għal manutenzjoni (0.07 % tal-PDG), programmi u inizzjattivi (0.21 % tal-PDG) u entitajiet tal-gvern (0.17 % tal-PDG).
Fil-prattika dan wassal għal tnaqqis ta’ EUR 805 000 mill-kontribuzzjonijiet lill-entitajiet tal-gvern inklużi l-Appoġġ, is-Sapport u s-Sedqa, li jipprovdu servizzi ta’ appoġġ essenzjali lin-nies l-aktar vulnerabbli fis-soċjetà (li jinkludu assistenza lill-persuni b’dipendenzi fuq id-droga u l-alkoħol, servizzi ta’ ħarsien tat-tfal, appoġġ għall-vittmi ta’ vjolenza domestika u bosta servizzi oħra bbażati fil-komunità).
Fid-dawl tal-ittra ta' twissija bikrija tal-Kummissjoni mibgħuta lill-Gvern Malti f’Novembru 2011 fejn titlob evidenza konvinċenti li turi li se jintlaħqu l-miri tad-defiċit, u tad-dikjarazzjoni sussegwenti li saret fil-11 ta' Jannar ta' din is-sena dwar il-fatt li Malta ħadet azzjoni effettiva f'dan ir-rigward:
- 1.Għaliex il-Baġit ta’ Malta għall-2012 ma kkonvinċiex lill-Kummissjoni li l-miri stabbiliti mill-Gvern ser jintlaħqu?
- 2.Il-Kummissjoni għamlet kuntatt mal-Gvern rigward il-valutazzjoni u l-konklużjoni tagħha?
- 3.Il-Kummissjoni tat suġġerimenti lill-Gvern dwar it-tnaqqis meħtieġ?
- 4.Il-Kummissjoni ssuġġeriet b’mod speċifiku l-ammonti ta’ tnaqqis li għandhom isiru?
- 5.Il-Kummissjoni ssuġġeriet id-dettalji ta’ kif u fejn għandu jsir it-tnaqqis?
- 6.Il-Kummissjoni insistiet dwar il-fatt li n-nefqa kapitali għandha tiġi eskluża minn dan it-tnaqqis?
ĠU C 117 E, 24/04/2013