Implimentazzjoni tal-leġiżlazzjoni tal-UE dwar l-ilma

7.12.2020

Mistoqsija għal tweġiba orali  O-000077/2020
lill-Kunsill
Artikolu 136 tar-Regoli ta' Proċedura
Christophe Hansen, Sara Cerdas, Nicolae Ştefănuță, Marco Dreosto, Martin Häusling, Joanna Kopcińska, Malin Björk, Eleonora Evi
f'isem il-Kumitat għall-Ambjent, is-Saħħa Pubblika u s-Sikurezza tal-Ikel

Il-Parlament jilqa' l-konklużjoni tal-Kummissjoni li d-Direttiva Qafas[1] dwar l-Ilma hija adattata għall-iskop tagħha, iżda jqis li l-implimentazzjoni tagħha jeħtieġ li tittejjeb u titħaffef. Għalkemm id-Direttiva Qafas dwar l-Ilma rnexxielha tistabbilixxi qafas ta' governanza għall-ġestjoni integrata tal-ilma għal mijiet ta' eluf ta' korpi tal-ilma fl-UE, tnaqqas ir-rata ta' deterjorament tal-istat tal-ilma u tnaqqas it-tniġġis kimiku, inqas minn nofs il-korpi tal-ilma tal-UE huma kklassifikati bħala li jinsabu fi stat tajjeb minkejja l-iskadenza tal-2015. Barra minn hekk, wieħed biss mill-erba' indikaturi tal-ilma ħelu wera progress matul l-aħħar 10-15-il sena, u kien hemm għadd ta' kwistjonijiet relatati mal-implimentazzjoni tal-leġiżlazzjoni dwar l-ilma, l-aktar minħabba l-finanzjament inadegwat u l-integrazzjoni insuffiċjenti tal-objettivi ambjentali fil-politiki settorjali. F'dan il-kuntest, nilqgħu tweġibiet mingħand il-Kunsill għall-mistoqsijiet li ġejjin:

• 1.Il-Kunsill kif se jinkorpora l-konklużjonijiet tal-kontroll tal-idoneità riċenti tal-leġiżlazzjoni dwar l-ilma u x'azzjoni konkreta se jieħdu l-Kunsill u l-Istati Membri biex jiżguraw li l-objettivi ambjentali tad-Direttiva Qafas dwar l-Ilma jintlaħqu malajr kemm jista' jkun u sa mhux aktar tard mill-2027?
• 2.Peress li waħda mill-kwistjonijiet ewlenin fl-ilħuq tal-objettivi tal-leġiżlazzjoni kienet il-finanzjament insuffiċjenti, l-Istati Membri kif se jiżguraw il-finanzjament meħtieġ biex jimplimentaw il-miżuri meħtieġa biex l-ilmijiet Ewropej jiksbu status tajjeb?
• 3.L-Istati Membri kif se jtejbu l-integrazzjoni tal-objettivi ambjentali tad-Direttivi fil-politiki settorjali, b'mod partikolari fis-setturi tal-agrikoltura, tal-enerġija u tat-trasport?
• 4.Il-Kontroll tal-Idoneità identifika varjazzjonijiet konsiderevoli fl-implimentazzjoni tad-Direttivi bejn Stat Membru u ieħor, pereżempju f'dak li għandu x'jaqsam mas-sustanzi li jniġġsu li qed jiġu monitorjati u mal-livelli limitu stabbiliti fid-Direttiva dwar l-Ilma ta' Taħt l-Art[2]. L-Istati Membri kif se jfittxu li tirnexxi implimentazzjoni aktar armonjuża?
• 5.Il-Kunsill iqis li ġie allokat biżżejjed finanzjament għad-Direttiva Qafas dwar l-Ilma fil-proposta reċenti għall-qafas finanzjarju pluriennali?
• 6.L-Istati Membri liema miżuri addizzjonali se jieħdu sabiex jirnexxilhom jimplimentaw bis-sħiħ l-irkupru tal-ispejjeż tas-servizzi tal-ilma (l-Artikolu 9 tad-Direttiva Qafas dwar l-Ilma), b'mod partikolari rigward l-applikazzjoni sħiħa tal-prinċipji "min juża jħallas" u "min iniġġes iħallas"?
• 7.L-Istati Membri kif qed jippjanaw li jnaqqsu l-użu tal-eżenzjonijiet għad-Direttiva Qafas dwar l-Ilma fit-tielet ċiklu tal-pjanijiet ta' mmaniġġjar tal-baċini tax-xmajjar?

Imressqa: 07/12/2020

Skadenza: 08/03/2021

• [1] Id-Direttiva 2000/60/KE tal-Parlament Ewropew u tal-Kunsill tat-23 ta' Ottubru 2000 li tistabbilixxi qafas għal azzjoni Komunitarja fil-qasam tal-politika tal-ilma, ĠU L 327, 22.12.2000, p. 1.
• [2] Id-Direttiva 2006/118/KE tal-Parlament Ewropew u tal-Kunsill tat-12 ta' Diċembru 2006 dwar il-protezzjoni tal-ilma ta' taħt l-art kontra t-tniġġis u d-deterjorament, ĠU L 372, 27.12.2006, p. 19.