Il-kontribut tal-UE għat-trasformazzjoni tas-sistemi tal-ikel globali biex jintlaħqu l-Għanijiet ta' Żvilupp Sostenibbli
14.6.2021
Mistoqsija għal tweġiba orali O-000043/2021
lill-Kummissjoni
Artikolu 136 tar-Regoli ta' Proċedura
Tomas Tobé
f'isem il-Kumitat għall-Iżvilupp
Norbert Lins
f'isem il-Kumitat għall-Agrikoltura u l-Iżvilupp Rurali
Is-Summit dwar is-Sistemi tal-Ikel tan-NU se jsir f'Settembru 2021 bħala parti mid-Deċennju ta' Azzjoni għat-twettiq tal-Aġenda 2030 għall-Iżvilupp Sostenibbli, li tinkludi l-Għanijiet ta' Żvilupp Sostenibbli (SDGs). Is-sistemi tal-ikel – jiġifieri l-produzzjoni, id-distribuzzjoni u l-konsum tal-ikel – jaffettwaw is-17-il SDG kollha u huma kruċjali biex jintlaħqu. Is-summit huwa maħsub bħala opportunità biex jitnedew azzjonijiet ġodda biex is-sistemi tal-ikel dinjija jsiru aktar tajbin għas-saħħa, aktar sostenibbli u ekwi. L-UE kkontribwiet b'mod attiv għall-preparazzjoni tal-Aġenda 2030. Hija impenjat ruħha wkoll li tagħmel l-SDGs prinċipju gwida fil-politiki kollha tagħha u li tippromwovihom mas-sħab tagħha.
Sfortunatament, l-indikaturi disponibbli kollha jindikaw il-fatt li m'aħniex fit-triq it-tajba biex niksbu dinja mingħajr ġuħ sal-2030. Barra minn hekk, il-pandemija tal-COVID-19 enfasizzat il-fraġilitajiet tas-sistemi tal-ikel u aggravat l-inugwaljanzi.
F'dan il-kuntest, huwa meħtieġ b'mod urġenti impenn imġedded u msaħħaħ tal-UE biex jinkiseb żero ġuħ u d-dritt għal ikel adegwat.
- 1.Il-Kummissjoni kif se tiżgura li l-UE tkun tista' tieħu rwol ta' tmexxija biex jintlaħaq l-SDG 2 (Żero Ġuħ), inkluż billi tieħu impenji finanzjarji għan-nutrizzjoni skont il-baġit tal-UE għall-2021-2027, minħabba d-diskrepanza enormi attwali fil-finanzjament globali?
- 2.Il-Kummissjoni kif biħsiebha tuża l-politika kummerċjali tal-UE biex tappoġġja t-tranżizzjoni globali lejn sistemi agroalimentari sostenibbli, f'konformità mal-Istrateġija "Mill-Għalqa sal-Platt"?
- 3.X'miżuri biħsiebha tipproponi l-Kummissjoni biex tappoġġja lill-pajjiżi sħab u lill-bdiewa, lis-sajjieda, lill-forestiera u lill-produtturi tal-ikel lokali tagħhom biex jimxu lejn prattiki aktar sostenibbli f'oqsma ewlenin bħall-benessri tal-annimali, l-użu tal-pestiċidi u l-ġlieda kontra r-reżistenza għall-antimikrobiċi?
Imressqa: 14.6.2021
Skadenza: 15.9.2021