Valutazzjoni tal-miżuri tal-Unjoni għas-settur tat-turiżmu tal-UE hekk kif joqrob tmiem l-istaġun tas-sajf
14.7.2021
Mistoqsija għal tweġiba orali O-000054/2021
lill-Kummissjoni
Artikolu 136 tar-Regoli ta' Proċedura
Karima Delli
f'isem il-Kumitat għat-Trasport u t-Turiżmu
Is-settur tat-turiżmu tal-UE ntlaqat severament mill-kriżi tal-COVID-19. Huwa rreġistra nuqqas ta' investiment ta' EUR 161 biljun fl-2020, b'konsegwenzi negattivi jinfirxu mal-ekosistema kollha tat-turiżmu, speċjalment għas-27 miljun ħaddiem impjegat direttament u indirettament mis-settur tat-turiżmu.
Hekk kif jintemm l-istaġun tas-sajf tal-2021, wasal iż-żmien li ssir valutazzjoni preliminari tal-miżuri fis-seħħ li tippermetti approċċ koordinat tal-UE lejn il-ftuħ mill-ġdid sikur tal-ivvjaġġar fl-Unjoni, kif ukoll lejn u minn pajjiżi mhux tal-UE: l-ewwel nett, l-implimentazzjoni taċ-Ċertifikat COVID diġitali tal-UE, bil-għan li jiġu ffaċilitati t-tneħħija tar-restrizzjonijiet fuq l-ivvjaġġar u għall-prevenzjoni ta' azzjonijiet unilaterali minn Stati Membri individwali, u t-tieni, il-ħolqien tas-Siġill tas-Sikurezza Ewropew kontra l-COVID-19 għat-Turiżmu.
- 1.F'dan l-istadju, x'riżultati tista' tressaq il-Kummissjoni fir-rigward tal-introduzzjoni taċ-Ċertifikat COVID diġitali tal-UE, f'termini tal-effetti tiegħu fuq is-settur tat-turiżmu matul l-istaġun tas-sajf tal-2021? Meta wieħed iħares lejn is-sena ta' qabel, huwa possibbli li jiġi kkwantifikat is-suċċess taċ-ċertifikat billi jitqies l-għadd globali ta' vjaġġi? X'diffikultajiet esperjenzaw l-Istati Membri u l-vjaġġaturi? Il-Kummissjoni sabet differenzi ġeografiċi notevoli bejn l-Istati Membri u r-reġjuni f'termini ta' kif iċ-ċertifikati affettwaw is-settur tat-turiżmu?
- 2.Tista' l-Kummissjoni tipprovdi ħarsa ġenerali tal-introduzzjoni tas-Siġill tas-Sikurezza Ewropew kontra l-COVID-19 għat-Turiżmu? Kemm-il negozju relatat mat-turiżmu ngħata s-siġill? Il-Kummissjoni kif appoġġjat l-implimentazzjoni tas-siġill fost in-negozji relatati mat-turiżmu f'termini ta' finanzjament u għarfien espert tekniku? X'inizjattivi hemm fis-seħħ biex jiġi ppubbliċizzat is-siġill u jsir magħruf aħjar?
- 3.Wara r-riżultati miksuba wara li reġa' beda l-ivvjaġġar matul is-sajf, x'azzjonijiet biħsiebha tieħu l-Kummissjoni biex tappoġġja l-ekosistema tat-turiżmu, b'mod partikolari biex jiġu evitati l-inċertezzi li jiffaċċjaw in-negozji relatati mat-turiżmu u l-vjaġġaturi fir-rigward tar-restrizzjonijiet fuq l-ivvjaġġar?
- 4.Tista' l-Kummissjoni tipprovdi ħarsa ġenerali tal-appoġġ mogħti s'issa, f'konformità mal-Patt Ekoloġiku, lill-intrapriżi relatati mat-turiżmu minħabba l-pandemija, u l-ammont globali tiegħu? Kif nistgħu niffaċilitaw l-aċċess għall-finanzjament tal-UE għall-mikrointrapriżi u l-SMEs? Fejn tinsab ir-rata tal-qgħad attwali fis-settur, u kemm-il persuna tilfet xogħolha matul il-pandemija?
Imressqa: 14.7.2021
Skadenza: 15.10.2021