Smachtbhannaí na Stát Aontaithe agus an smacht reachta
2.9.2021
Ceist i gcomhair freagra ó bhéal O-000057/2021
ar an gCoimisiún
Riail 136
Juan Fernando López Aguilar
thar ceann an Choiste um Shaoirsí Sibhialta, um Cheartas agus um Ghnóthaí Baile
An 2 Meitheamh 2021, d’fhógair riarachán na Stát Aontaithe go raibh smachtbhannaí curtha i bhfeidhm ag a Roinn Státchiste ar thriúr agus a líonraí sa Bhulgáir ar fhorais dul i mbun éillithe. Creideann riarachán na Stát Aontaithe go bhfuil an t-éilliú ina riosca don smacht reachta, don fhás eacnamaíoch, do na hinstitiúidí daonlathacha agus do chearta an duine. Go sonrach, eascraíonn na smachtbhannaí sin ón nGníomh Domhanda Magnitsky um Chuntasacht i ndáil le Cearta an Duine[1]. Ina theannta sin, ar an dáta céanna, d’ainmnigh Roinn Stáit SAM triúr (iar-)oifigeach poiblí eile de bhun Ordú Feidhmiúcháin 13818, rud a chiallaíonn nach féidir leo dul isteach sna Stáit Aontaithe[2].
Dá thoradh sin, ardaítear ceisteanna suntasacha maidir leis na hiarmhairtí smachtbhannaí SAM sin ar chur chuige an Aontais i réimsí an daonlathais, an smachta reachta agus na gceart bunúsach. Bhí cruinnithe ag an nGrúpa Faireacháin um an Daonlathas, um an Smacht Reachta agus um Chearta Bunúsacha de Choiste na Parlaiminte um Shaoirsí Sibhialta, um Cheartas agus um Ghnóthaí Baile agus ghlac siad páirt i malartuithe i scríbhinn le húdaráis náisiúnta agus le hinstitiúidí AE, agus is minic a thugann an grúpa le fios go bhfuil easpa práinne ann chun aghaidh a thabhairt ar dhúshláin.
I bhfianaise na bhforbairtí sin:
- 1.Conas a bhraitheann an Coimisiún go bhfuil tír neamh-AE, a mheastar a bheith ina comhghuaillí, ag gníomhú i gcoinne éillithe i mBallstát? Cén chaoi a ndéanfaidh an méid sin athrú ar mheasúnú an Choimisiúin i leith a chur chuige reatha, agus go sonrach ar an meastóireacht ar a chuid gníomhaíochtaí go dtí seo sa chás seo?
- 2.Cad iad na gníomhaíochtaí atá beartaithe ag an gCoimisiún le haghaidh cur chuige láidir i leith an éillithe ar leibhéal an stáit? An mbeidh an Coimisiún níos réamhghníomhaí chun an t-éilliú agus bagairtí ar an smacht reachta ar fud na mBallstát a lua agus gníomhú ina leith? Go háirithe, ós rud é nach bhfoilsíonn an Coimisiún tuarascálacha frith-éillithe a thuilleadh, an dtreiseoidh sé déine an fhaireacháin ar éilliú agus an dtiocfaidh sé ar chonclúidí agus an gcuirfidh sé moltaí san áireamh ina thuarascálacha ar an smacht reachta? Conas a chuideoidh feidhmiú Oifig an Ionchúisitheora Phoiblí Eorpaigh chuige sin? An bhforbróidh an Coimisiún straitéis chomhchoiteann frith-éillithe san Aontas?
Curtha síos: 2.9.2021
Spriocdháta i gcomhair freagra: 3.12.2021