An bhréagaisnéis agus ról na n-ardán sóisialta

9.9.2021

Ceist i gcomhair freagra ó bhéal  O-000060/2021
ar an gCoimisiún
Riail 136
Raphaël Glucksmann
thar ceann an An Coiste Speisialta um an Trasnaíocht Eachtrach ar na Próisis Dhaonlathacha Uile san Aontas Eorpach, lena n-áirítear Bréagaisnéis

Tá méadú ag teacht ar na bagairtí ar an daonlathas san Aontas Eorpach trí mhaoiniú eachtrach ceilte, trí ionramháil faisnéise agus trí chur isteach eile ar líne. Cé go bhfuil ardáin ar líne – de bhua samhlacha gnó atá ag iarraidh aird a tharraingt – tar éis rochtain níos leithne a thabhairt ar uirlisí faisnéise agus cumarsáide, lena n-áirítear d’easaontaigh agus do sceithirí, is é an toradh atá ar a gcleachtais ná leathadh na bréagaisnéise, cur chun cinn na fuathchainte, ciapadh, an freasúra a chur ina thost, spiaireacht, cur isteach ar thoghcháin agus gníomhaíochtaí coiriúla nó urchóideacha eile. Maidir le saincheisteanna a bhaineann leis an gcomhrac i gcoinne na bréagaisnéise, córais fógraíochta a úsáid, ciapadh ar líne agus cur isteach eile ar líne, is faoi shainchúram na soláthraithe ardán a bhí siad den chuid is mó mar gheall ar easpa rialála cuí ar leibhéal an Aontais. Tá sé léirithe anois go bhfuil teorainneacha le prionsabal na féinrialála. Táthar ag súil go rachaidh pacáiste na hIonstraime um Sheirbhísí Digiteacha atá beartaithe i ngleic le cuid den fhadhb ar a laghad trí cheanglais threisithe maidir le hardáin ar líne. Mar sin féin, ní hamháin go n-éilítear leis sin reachtaíocht éifeachtach, ach freisin cur chuige straitéiseach ar an leibhéal institiúideach, comhordú polaitiúil, ionstraimí inchreidte agus frithbhearta:

• 1.Cén comhordú polaitiúil thar earnálacha agus cén cineál leagan amach institiúideach laistigh den Aontas atá á bheartú ag an gCoimisiún chun na bearnaí reachtacha atá á ndúshaothrú ag gníomhaithe mailíseacha a dhúnadh agus frithbhearta comhchoiteanna a chomhordú?
• 2.Cén bhaint atá ag leibhéal AE le leibhéal na mBallstát agus leis an bplé ar dhea-chleachtais ar an leibhéal náisiúnta agus ar an leibhéal réigiúnach, e.g. bosca uirlisí a fhorbairt chun cur i gcoinne cur isteach agus tionchar ón gcoigríoch, maoiniú eachtrach a rialáil agus ionstraimí nua a thabhairt isteach lena bhféadfar costais a fhorchur ar dhéantóirí coireanna?
• 3.Cén tuairim atá ag an gCoimisiún ar na tograí reachtacha atá ann cheana maidir leis an gcomhrac éifeachtach i gcoinne na bréagaisnéise agus na fuathchainte i ngach teanga agus cad leis a bhfuil an Coimisiún ag súil ón gCód Cleachtais nuashonraithe maidir le bréagaisnéis agus bearta eile?
• 4.Cad a mheasann an Coimisiún faoi na ceanglais amhail trédhearcacht agus rialáil ar úsáid algartam agus fógraíocht pholaitiúil sa chomhthéacs sin? Cad iad na pleananna atá aige chun déileáil le fadhbanna a bhaineann le bróicéireacht sonraí, a bhfuil i gceist leis sonraí pearsanta ó fhoinsí éagsúla a bhailiú agus a chur le chéile agus na sonraí comhiomlánaithe sin a dhíol le tríú páirtithe?
• 5.Ar deireadh, cad é seasamh an Choimisiúin maidir le litearthacht sna meáin agus tírdhreach éagsúil meán a chur chun cinn, lena n-áirítear earnáil phoiblí láidir, foinsí iontaofa faisnéise cruinne agus tacaíocht d’ábhar meán atá údarásach agus d’ardcháilíocht?

Curtha síos: 9.9.2021

Spriocdháta i gcomhair freagra: 10.12.2021