Il-prezzijiet jiżdiedu tal-enerġija u l-manipulazzjoni tas-suq fis-suq tal-gass
3.3.2022
Mistoqsija għal tweġiba orali O-000007/2022
lill-Kummissjoni
Artikolu 136 tar-Regoli ta' Proċedura
Cristian-Silviu Buşoi
f'isem il-Kumitat għall-Industrija, ir-Riċerka u l-Enerġija
Il-prezzijiet tal-gass fossili laħqu l-ogħla livell f'Diċembru 2021 meta kienu 4 darbiet u nofs ogħla minn dawk ta' Jannar 2021, u kienu mmexxija mid-dinamika globali tal-provvista u d-domanda, u aggravati minn fatturi marbuta mal-pandemija u mat-tensjonijiet ġeopolitiċi, flimkien ma' importazzjonijiet anqas milli mistennija ta' gass fossili fl-Ewropa, speċjalment mir-Russja. Dan wassal biex il-ħażna tal-gass fossili laħqet livelli aktar baxxi mill-medja u prezzijiet għoljin tal-enerġija, li rriżultaw f'rati dejjem jiżdiedu ta' inflazzjoni madwar l-Unjoni.
Hekk kif l-ekonomija qed tibda tirkupra mill-pandemija, l-UE u l-Istati Membri jeħtiġilhom isibu soluzzjonijiet strutturali biex jipproteġu u jappoġġaw lill-unitajiet domestiċi kif ukoll lill-industriji u l-intrapriżi tal-UE, speċjalment l-SMEs u l-mikrointrapriżi. Għal dan il-għan, it-tħassib dwar l-esponiment kbir tal-Unjoni għas-swieq internazzjonali tal-gass, għal uħud mill-fornituri, u għal tentattivi ta' manipulazzjoni tas-suq jew spekulazzjonijiet foloz, jeħtieġ li jiġu indirizzati.
- 1.X'inhuma s-sejbiet preliminari tal-investigazzjoni tal-Kummissjoni dwar imġiba antikompetittiva possibbli fis-suq tal-gass u meta se jsiru pubbliċi dawk il-konklużjonijiet?
- 2.Twettqet valutazzjoni dwar l-effettività tal-Artikolu 11 tad-Direttiva 2009/73/KE u tad-Deċiżjoni relatata mal-każ AT.39816 fit-tnaqqis tar-riskji għas-sigurtà tal-provvista tal-enerġija tal-Istati Membri?
- 3.Il-livelli attwali tal-ħażna tal-gass fossili jaggravaw il-vulnerabbiltà tal-UE għall-pressjonijiet esterni fiż-żmien qasir? Hemm definiti limiti speċifiċi għal-livelli tal-ħażna?
- 4.X'bidliet konkreti fl-istruttura tas-suq fil-livell tal-UE jistgħu jippermettu lill-Istati Membri jipproteġu lill-konsumaturi mill-volatilità tas-suq internazzjonali tal-gass fil-futur?
- 5.X'azzjonijiet konkreti se tieħu l-Kummissjoni biex tinforma aħjar liċ-ċittadini tal-UE dwar il-kawżi taż-żieda drammatika fil-prezzijiet tal-enerġija li qed ibatu minnha?
Imressqa: 3.3.2022
Skadenza: 4.6.2022