Cur chuige domhanda i leith taighde agus nuálaíochta: Straitéis na hEorpa don chomhar idirnáisiúnta i saol athraitheach
28.3.2022
Ceist i gcomhair freagra ó bhéal O-000013/2022
ar an gCoimisiún
Riail 136
Cristian-Silviu Buşoi
thar ceann an Choiste um Thionsclaíocht, um Thaighde agus um Fhuinneamh
Ghlac an Coimisiún a theachtaireacht maidir le cur chuige domhanda i leith taighde agus nuálaíochta an 18 Bealtaine 2021. Is é is aidhm don straitéis atá beartaithe ná cur chun cinn a dhéanamh ar rialacha atá bunaithe ar iltaobhachas, ar oscailteacht chómhalartach agus ar bhunluachanna le tríú tíortha ar mhaithe le réitigh nuálacha ar dhúshláin ghlasa, dhigiteacha, sláinte agus nuálaíochta a sholáthar. Is den bhunriachtanas é go mbeidh na comhpháirtíochtaí sin bunaithe ar mhachaire comhréidh agus ar urraim don tsaoirse acadúil agus go mbeidh siad i gcomhréir le cearta an duine agus leis an dlí idirnáisiúnta.
I bhfianaise an mhéid thuas, iarraimid ar an gCoimisiún na ceisteanna seo a leanas a fhreagairt:
- 1.An aithníonn an Coimisiún go bhfuil an tsaoirse acadúil agus neamhspleáchas institiúideach faoi bhrú, laistigh de AE agus ar fud an domhain araon?
- 2.An aontaíonn an Coimisiún go gcaithfear an tsaoirse acadúil agus an neamhspleáchas institiúideach a urramú go hiomlán chun go dtacóidh AE go hinchreidte leis na prionsabail sin ar fud an domhain? An eiseoidh an Coimisiún togra le haghaidh chosaint dhlíthiúil na saoirse acadúla in AE?
- 3.Cén chaoi a dtabharfaidh an Coimisiún aghaidh ar an tsaoirse acadúil i gcomhaontuithe nua comhlachais agus conas a dhéanfaidh sé urraim don tsaoirse acadúil a chur chun cinn i dtíortha a bhfuil baint acu cheana le Fís Eorpach?
- 4.An aontaíonn an Coimisiún gur cheart roghanna a fhiosrú chun clár comhaltachta Eorpach a chur ar bun do thaighdeoirí atá i mbaol?
- 5.Conas a dhéanfaidh an Coimisiún cómhalartacht agus machaire comhréidh a áirithiú chun dlús a chur le forbairt inbhuanaithe agus chuimsitheach agus leis an aistriú chuig sochaithe agus geilleagair athléimneacha agus eolasbhunaithe i dtíortha ísealioncaim agus meánioncaim?
Curtha síos: 28.3.2022
Spriocdháta i gcomhair freagra: 29.6.2022