Introjtu minimu xieraq li jiżgura inklużjoni attiva

23.11.2022

Mistoqsija għal tweġiba orali  O-000050/2022
lill-Kunsill
Artikolu 136 tar-Regoli ta' Proċedura
Dragoş Pîslaru, Krzysztof Hetman, Estrella Durá Ferrandis, Lucia Ďuriš Nicholsonová, Sara Matthieu, Giuseppe Milazzo, Özlem Demirel
f'isem il-Kumitat għall-Impjiegi u l-Affarijiet Soċjali

Il-kapaċità li persuna tgħix fid-dinjità hija dritt tal-bniedem. Fl-2021, 95,4 miljun ruħ fl-UE, li jirrappreżentaw 21,7 % tal-popolazzjoni tal-UE[1], kienu fir-riskju ta' faqar u esklużjoni soċjali.

Il-pandemija tal-COVID-19 u l-għoli tal-ħajja li qed jiżdied qed jirriskjaw li jkomplu jaggravaw is-sitwazzjoni diffiċli ta' individwi u unitajiet domestiċi f'sitwazzjonijiet soċjoekonomiċi prekarji.

L-Iskemi ta' Introjtu Minimu jservu bħala xibka ta' sikurezza soċjali li tiggarantixxi livell minimu ta' għajxien u d-dritt għad-dinjità fl-istadji kollha tal-ħajja. Għall-persuni li ma għandhomx biżżejjed riżorsi u impjieg deċenti u stabbli, l-aċċess għal introjtu minimu adegwat għandu rwol essenzjali fit-tnaqqis tal-faqar, l-esklużjoni soċjali u l-inugwaljanzi. Tali skemi għandhom jiġu kkombinati ma' inċentivi u miżuri li jippermettu l-attivazzjoni tas-suq tax-xogħol għal persuni li huma kapaċi jaħdmu.

Il-Kumitat għall-Impjiegi u l-Affarijiet Soċjali jixtieq jistaqsi lill-Kunsill:

• 1.Il-Kunsill kif se jinkoraġġixxi lill-Istati Membri biex jistabbilixxu gradwalment l-Iskemi ta' Introjtu Minimu tagħhom għal mill-inqas il-livell tal-limitu nazzjonali tagħhom tar-riskju ta' faqar filwaqt li jipprovdu inċentivi biex jintegraw (mill-ġdid) fis-suq tax-xogħol lill-persuni li jistgħu jaħdmu? L-Istati Membri kif se jiżguraw li l-benefiċjarji tal-Iskemi ta' Introjtu Minimu ma jiġux imġiegħla jaċċettaw impjiegi prekarji? Il-Kunsill kif biħsiebu jtejjeb il-kopertura tal-Iskemi ta' Introjtu Minimu nazzjonali eżistenti?
• 2.L-Istati Membri kif se jindirizzaw il-problema tan-nuqqas ta' adozzjoni? X'mekkaniżmi se jistabbilixxu biex iqajmu kuxjenza u jiżguraw li dawk eliġibbli biex jirċievu sostenn verament jibbenefikaw minnu?
• 3.L-Istati Membri kif se jiżguraw li l-Iskemi ta' Introjtu Minimu ma jissostitwixxux miżuri ta' politika soċjali f'oqsma oħra bħall-akkomodazzjoni, il-kura tas-saħħa, l-appoġġ għad-diżabilità jew l-integrazzjoni fis-suq tax-xogħol?
• 4.L-Istati Membri kif qed jikkooperaw mas-sħab soċjali, is-soċjetà ċivili, u partijiet ikkonċernati oħra rilevanti fid-disinn, l-implimentazzjoni u l-monitoraġġ tal-Iskemi ta' Introjtu Minimu u fejn jaraw li hemm lok għal titjib?

Imressqa: 23.11.2022

Skadenza: 24.2.2023

• [1] https://ec.europa.eu/eurostat/statistics-explained/index.php?title=Living_conditions_in_Europe_-_poverty_and_social_exclusion#:~:text=In%202021%2C%2095.4%20million%20people,21.7%20%25%20of%20the%20EU%20population.