2. Kompożizzjoni tal-Parlament

Ġie nnutat it-tibdil li ġej fil-kompożizzjoni tal-Parlament wara l-aħħar sessjoni parzjali tal-Parlament uxxenti li saret mill-15 sat-18 ta' April 2019.

Teresa Jiménez-Becerril Barrio u Sergio Gutiérrez Prieto ġew eletti deputati fil-parlament nazzjonali (Congreso de los Diputados) ta' Spanja, liema kariga hija inkompatibbli ma' dik ta' Membru tal-Parlament Ewropew, u, f'konformità mal-Artikolu 4(1) u (4) tar-Regoli ta' Proċedura, is-siġġijiet tagħhom ġew vakati b'seħħ mill-21 ta' Mejju 2019.

L-awtoritajiet kompetenti Spanjoli kkomunikaw l-elezzjoni fil-Parlament Ewropew ta' Pablo Arias Echeverría minflok Teresa Jiménez-Becerril Barrio bħala Membru tal-Parlament, li tiddekorri mid-data 21 ta' Mejju 2019.

Jeppe Kofod inħatar bħala Ministru tal-Affarijiet Barranin tal-Gvern tad-Danimarka, liema kariga hija inkompatibbli ma' dik ta' Membru tal-Parlament Ewropew, u, f'konformità mal-Artikolu 3(2)(2) u mal-Artikolu 4(1) tar-Regoli ta' Proċedura, is-siġġu tiegħu ġie vakat b'effett mis-27 ta' Ġunju 2019.