Ċiklu ta' ħajja waqt sessjoni
Ċiklu relatat mad-dokument : RC-B6-0066/2008

Testi mressqa :

RC-B6-0066/2008

Dibattiti :

PV 19/02/2008 - 4

Votazzjonijiet :

PV 21/02/2008 - 4.5
CRE 21/02/2008 - 4.5
Spjegazzjoni tal-votazzjoni
Spjegazzjoni tal-votazzjoni

Testi adottati :


MOZZJONI GĦAL RIŻOLUZZJONI KONĠUNTA
PDF 114kWORD 83k
19.2.2008
PE401.062v01-00}
PE401.063v01-00}
PE401.064v01-00}
PE401.064v01-00}
PE401.067v01-00}
PE401.068v01-00} RC1
 
B6‑0066/2008}
B6‑0067/2008}
B6‑0068/2008}
B6‑0069/2008}
B6‑0071/2008}
B6‑0072/2008} RC1
imressqa skond l-Artikolu 103(4) tar-Regoli ta' Proċedura minn
   João de Deus Pinheiro, Rodi Kratsa-Tsagaropoulou, Edward McMillan-Scott u Tokia Saïfi, f'isem il-Grupp PPE-DE
   Pasqualina Napoletano, Thijs Berman, Véronique De Keyser, Richard Howitt, Jamila Madeira, Béatrice Patrie u Hannes Swoboda, f'isem il-Grupp PSE
   Annemie Neyts-Uyttebroeck, Philippe Morillon u Elizabeth Lynne, f'isem il-Grupp ALDE
   Brian Crowley, Cristiana Muscardini, Roberta Angelilli, Adam Bielan, Konrad Szymański, Ryszard Czarnecki, Eugenijus Maldeikis u Hanna Foltyn-Kubicka, f'isem il-Grupp UEN
   Daniel Cohn-Bendit, Caroline Lucas, Margrete Auken, Jill Evans, David Hammerstein, Johannes Voggenhuber, Angelika Beer, Hélène Flautre, Cem Özdemir u Pierre Jonckheer, f'isem il-Grupp Verts/ALE
   Francis Wurtz, Luisa Morgantini u Kyriacos Triantaphyllides, f'isem il-Grupp GUE/NGL
li tieħu post il-mozzjonijiet għal riżoluzzjoni mressqa mill-gruppi li ġejjin:
   ALDE (B6‑0066/2008)
   UEN (B6‑0067/2008)
   Verts/ALE (B6‑0068/2008)
   PSE (B6‑0069/2008)
   PPE-DE (B6‑0071/2008)
   GUE/NGL (B6‑0072/2008)
dwar il-Qagħda fil-Medda ta' Gaża

Ir-riżoluzzjoni tal-Parlament Ewropew dwar il-Qagħda fil-Medda ta' Gaża 

Il-Parlament Ewropew,

–  wara li kkunsidra r-riżoluzzjonijiet preċedenti tiegħu dwar il-Lvant Nofsani, b'mod partikolari dawk ta' l-1 ta' Ġunju 2006 rigward is-sitwazzjoni umanitarja fit-territorji Palestinjani u l-irwol ta' l-UE, tas-16 ta' Novembru 2006 dwar is-sitwazzjoni fil-Medda ta' Gaża, tal-21 ta' Lulju 2007 dwar il-MEDA u l-għajnuna finanzjarja għall-Palestina - evalwazzjoni, implimentazzjoni u kontroll, tat-12 ta' Lulju 2007 dwar il-Lvant Nofsani u tal-11 ta' Ottubru 2007 dwar is-sitwazzjoni umanitarja f'Gaża,

–  wara li kkunsidra r-Riżoluzzjonijiet 242 (1967) u 338 (1973) tal-Kunsill tas-Sigurtà tan-NU,

–  wara li kkunsidra r-Raba' Konvenzjoni ta' Ġinevra (1949),

–  wara li kkunsidra d-Dikjarazzjoni ta' Annapolis tas-27 ta' novembru 2007,

–  wara li kkunsidra l-konklużjonijiet tal-Kunsill tar-Relazzjonijiet Esterni tat-28 ta' Jannar 2008,

–  wara li kkunsidra d-dikjarazzjoni mill-Assemblea Parlamentari Ewro-Mediterranja dwar l-Affarijiet Politiċi, is-Sigurtà u d-Drittijiet tal-Bniedem tat-28 ta' Jannar 2008 dwar is-sitwazzjoni f'Gaża,

–  wara li kkunsidra r-riżoluzzjoni tal-Kunsill għad-Drittijiet tal-Bniedem tan-NU fl-24 ta' Jannar 2008 dwar il-ksur tad-drittijiet tal-bniedem fil-Medda ta' Gaża,

–  wara li kkunsidra l-Artikolu 103(4) tar-Regoli ta' Proċedura tiegħu,

A.  billi minħabba l-embargo fuq iċ-ċaqliq tan-nies u tal-prodotti, iċ-ċaħda parzjali għall-aċċess ta' l-ilma li jista' jinxtorob, l-ikel u l-elettriċità, u n-nuqqas ta' prodotti u servizzi essenzjali, is-sitwazzjoni umanitarja fil-Medda ta' Gaża kompliet tmur lura,

B.  billi l-fruntieri li minnhom tista' toħroġ jew tidħol ġo Gaża ilhom magħluqin għal xhur sħaħ, u billi l-embargo fuq iċ-ċaqliq tal-persuni u l-prodotti kompla jipparalizza aktar l-ekonomija fil-Medda ta' Gaża,

C.  billi setturi ewlenin tas-servizz pubbliku, inklużi s-sistemi tas-saħħa u ta' l-edukazzjoni, qed jiffaċċjaw nuqqasijiet kbar minħabba nuqqas ta' materjali bażiċi meħtieġa għat-tħaddim tagħhom, u billi n-nuqqas ta' mediċini u ta' fjuwil biex jaħdmu l-ġeneraturi fl-isptarijiet fil-Medda ta' Gaża qed jipperikolaw il-ħajja tal-Palestinjani,

D.  billi mijiet ta' eluf ta' Palestinjani qasmu l-fruntiera bejn il-Medda ta' Gaża u l-Egittu, wara li ġġarraf il-ħajt tal-fruntiera, sabiex isibu prodotti essenzjali għall-bżonnijiet bażiċi tagħhom, u billi l-forzi Eġizzjani gradwalment reġgħu ħadu l-kontroll tas-sitwazzjoni u għalqu mill-ġdid il-fruntiera fit-3 ta' Frar 2008, li wassal għat-tmiem tal-libertà ta' moviment tal-Palestinjani, kif mitlub mill-awtoritajiet Iżraeljani,

E.  billi t-tkissir ta' parti mill-ħajt tal-fruntiera u taċ-ċint huma konsegwenza diretta tal-kriżi umanitarja estremament serja f'Gaża, li wasslet lill-poplu Palestinjan biex jipprova jikseb il-bżonn vitali tiegħu għal-libertà ta' moviment,

F.  billi, wara perjodu twil mingħajr azzjonijiet bħal dawn, attakk terroristiku suwiċidali f'Dimona qatel u weġġa' membri tal-popolazzjoni ċivili Iżraeljana; billi kompla l-isparar ta' rokits mill-milizzja Palestinjana mill-Medda ta' Gaża għal ġot-territorju Iżraeljan, u billi fil-Medda ta' Gaża komplew l-operazzjonijiet militari li qatlu u poġġew fil-periklu l-popolazzjoni ċivili u l-qtil extraġudizzjarju mmirat min-naħa ta' l-armata Iżraeljana,

G.  billi s-sitwazzjoni u l-iżviluppi riċenti fil-Medda ta' Gaża jheddu li jfixklu n-negozjati li għaddejjin bħalissa bejn l-Iżraeljani u l-Palestinjani, kif ukoll l-isforzi biex jintlaħaq ftehim sa l-aħħar ta' l-2008, kif iddikjarat mill-partijiet waqt il-Konferenza ta' Annapolis,

H.  billi, fl-aħħar snin, l-Unjoni Ewropea pprovdiet appoġġ finanzjarju kbir lill-Palestinjani; billi l-Mekkaniżmu Internazzjonali Temporanju ta' l-UE u l-iffinanzjar ta' proġetti kellhom irwol importanti biex jevitaw traġedja umanitarja fil-Medda ta' Gaża u fix-Xatt tal-Punent; billi l-Kummissjoni, il-UNDP, il-UNWRA u l-Bank Dinji kellhom jissospendu bosta proġetti ta' infrastruttura minħabba li ma jistgħux jimportaw materja prima; billi dawn l-uffiċċji, l-aġenziji u l-organizzazzjonijiet umanitarji, komplew l-attivitajiet tagħhom fuq livell limitat minkejja x-xkiel kollu; billi l-Unjoni Ewropea tkompli tipprovdi għajnuna umanitarja lill-poplu Palestinjan u sussidji diretti lill-impjegati ta' l-Awtorità Palestinjana fil-Medda ta' Gaża; billi l-PEGASE se jikkostitwixxi mekkaniżmu finanzjarju ġdid għall-UE u għajnuna internazzjonali oħra għat-Territorji Palestinjani,

I.  billi fil-konferenza internazzjonali li saret f'Annopolis il-partijiet kollha esprimew ix-xewqa tagħhom għal bidu ġdid tan-negozjati bil-għan li jinħoloq Stat Palestinjan sovran u vijabbli, flimkien ma' Stat Iżraeljan sikur,

J.  billi l-parteċipanti fil-Konferenza Internazzjonali tad-Donaturi għall-Istat Palestinjan, li saret f'Diċembru 2007 f'Pariġi, twiegħdu total ta' 7.4 biljun Dollaru Amerikan f'appoġġ għall-bini ta' l-istituzzjonijiet u rkupru ekonomiku Palestinjan għat-tliet snin li ġejjin,

K.  billi l-Mibgħut Speċjali għall-Kwartett identifika erba' proġetti ta' prijorità għall-iżvilupp ekonomiku u l-bini ta' l-istituzzjonijiet għat-Territorji Palestinjani, inkluż ir-restawr ta' l-impjant għat-trattament tad-dranaġġ ta' Beit Lahia fit-tramuntana ta' Gaża,

1.  Itenni t-tħassib kbir tiegħu rigward il-kriżi umanitarja u politika fil-Medda ta' Gaza u dwar il-konsegwenzi ulterjuri possibbli tagħha; iqis l-iżviluppi riċenti f'Rafah, inklużi l-avvenimenti paċifiċi u l-atti vjolenti, bħala r-riżultat ta' din il-kriżi fil-Medda ta' Gaża;

2.  Jesprimi l-ikbar simpatija tiegħu għall-popolazzjoni ċivili affetwata mill-vjolenza f'Gaża u fin-nofsinhar ta' l-Iżrael;

3.  Itenni t-talba tiegħu għal waqfien immedjat ta' l-atti kollha ta' vjolenza; jitlob lill-Iżrael biex iwaqqaf l-azzjonjiet militari li qed joqtlu u jipperikolaw il-popolazzjoni ċivili u l-qtil immirat mhux ġudizzjarju; jistieden lill-Hamas, wara l-ħakma illegali tal-Medda ta' Gaża, biex iwaqqfu l-isparar ta' rokits mill-milizzja Palestinjana, mill-Medda ta' Gaża għal ġot-territorju Iżraeljan;

4.  Jemmen li l-politika ta' l-iżolament tal-Medda ta' Gaża falliet kemm fuq il-livell politiku kif ukoll fuq dak umanitarju; itenni t-talba tiegħu lill-partijiet kollha biex jirrispettaw b'mod sħiħ il-liġi internazzjonali, u b'mod partikulari l-liġi umanitarja internazzjonali;

5.  Jikkunsidra bħala pożittiva, ir-reazzjoni ta' l-Eġittu għall-problemi f'Rafah, li ppermettiet li bosta familji Palestinjani jkollhom aċċess għall-prodotti essenzjali għall-ħtiġijiet bażiċi tagħhom; iħeġġeġ lill-gvern ta' l-Eġittu biex ikompli bl-irwol attiv tiegħu biex jinżammu l-paċi u l-istabilità fiż-żona;

6.  Itenni t-talba tiegħu biex jintemm l-imblokk u għall-ftuħ mill-ġdid ikkontrollat tal-qsim 'il ġewwa u 'l barra minn Gaża; jitlob lill-Iżrael biex jiżgura li jkun hemm ċaqliq ta' nies u prodotti f'Rafah, Karni u postijiet oħra ta' qsim tal-fruntiera b'konformità mal-Ftehima dwar Moviment u Aċċess; jitlob li terġa' tibda l-Missjoni għall-Għajnuna mal-Fruntieri ta' l-UE f'Rafah; jilqa' d-dikjarazzjoni tar-Rappreżentant Għoli Solana li għandu jitqies mandat ġdid tal-Kunsill għall-Missjoni; jitlob għal preżenza internazzjonali ikbar fiż-żona fi ħdan dan il-kuntest;

7.  Jilqa' b'sodisfazzjon il-proposta ta' l-Awtorità Palestinjana biex tieħu l-kontroll tal-punti tal-qsim, fuq il-bażi ta' ftehim li jinvolvi lill-Eġittu, lill-Iżrael u lill-Awtorità Palestinjana, u jappoġġja r-riżoluzzjoni reċenti tal-Lega Għarbija f'dan ir-rigward; madankollu, jistieden lill-Awtorità Palestinjana, biex tgħin sabiex jiġu stabbiliti l-kundizzjonijiet neċessarji għall-involviment tal-partijiet interessati kollha fil-Medda ta' Gaża f'dan ir-rigward;

8.  Jemmen li l-popolazzjoni ċivili għandha tkun ħielsa minn kwalunkwe azzjoni militari u minn kwalunkwe kastig kollettiv; Jistieden lill-Iżrael biex iwettaq l-obbligi internazzjonali tiegħu, bħala forza ta' okkupazzjoni fil-Medda ta' Gaża; jitlob lill-Iżrael biex ikompli jiggarantixxi għajnuna umanitarja kontinwa u suffiċjenti, assistenza umanitarja u prodotti u servizzi essenzjali, inkluż il-forniment ta' fjuwil u enerġija, lejn il-Medda ta' Gaża jesprimi tħassib serju rigwrad id-deċiżjoni ta' l-Iżrael li jintroduċi qtugħ progressiv ta' ħamsa fil-mija kull ġimgħa fil-provvista ta' l-enerġija lejn il-Medda ta' Gaża, li ma tistax titqies konsistenti ma l-issodisfar tal-bżonnijiet umanitarji minimi; jilqa' b'sodisfazzjon il-petizzjoni minn 10 organizzazzjonijiet għad-drittijiet tal-bniedem Iżraeljani kontra l-qtugħ tal-forniment tal-fjuwil u tad-dawl fil-Medda ta' Gaża;

9.  Jistieden li, minkejja l-imblokk politiku, it-tħaddim ta' l-istituzzjonijiet pubbliċi li jipprovdu servizzi essenzjali u l-operazzjonijiet ta' l-uffiċċji umanitarji internazzjonali, l-agenziji u l-organizzazzjonijiet li jfittxu li jtejbu l-kundizzjonijiet tal-Palestinjani li jgħixu fil-Medda ta' Gaża jirrikjedu djalogu bejn l-Awtorità Palestinjana u l-Hamas;

10.  Jenfasizza l-importanza kbira ta' konnessjoni ġeografika u kummerċjali permanenti u r-rijunifikazzjoni paċifika fit-tul bejn il-Medda ta' Gaża u x-Xatt tal-Punent, u jistieden lill-Hamas biex tirrevedi l-pożizzjoni tagħha f'konformità mal-prinċipji tal-Kwartett u ma' l-obbligi internazzjonali mifthiema qabel, u biex tappoġġja l-proċess tal-paċi u n-negozjati li għaddejjin;

11.  Itenni t-talba tiegħu għall-ħelsien immedjat ta' Gilad Shalitt, suldat Iżraeljan, li jiġi kkunsidrat bħala att ta' rieda tajba min-naħa tal-Hamas, u ta' l-eks-ministri, il-leġiżlaturi u s-sindki Palestinjani kollha li qegħdin fil-ħabs; jirrikonoxxi l-importanza tar-rilaxx tad-detenuti biex tinħoloq fiduċja fil-kuntest tat-taħditiet ta' paċi attwali;

12.  Ifakkar lill-partijiet dwar l-impenji tagħhom li ħadu f'Annapolis biex isiru negozjati in bona fide sabiex, sa l-aħħar ta' l-2008, jiġi konkluż trattat ta' paċi li jsolvi l-kwistjonijiet pendenti kollha, inklużi l-kwistjonijiet ewlenin kollha, mingħajr eċċezzjoni, kif speċifikat fi ftehimiet preċedenti; iħeġġeġ liż-żewġ partijiet biex jissodisfaw l-obbligi tagħhom skond il-Pjan Direzzjonali;

13.  Jistieden lill-Kunsill u lill-Kummissjoni biex ikomplu jiggarantixxu, flimkien mal-komunità internazzjonali, għajnuna umanitarja essenzjali għall-Palestinjani li jgħixu fil-Medda ta' Gaża, b'kunsiderazzjoni speċjali għall-bżonnijiet ta' gruppi partikularment vulnerabbli; jenfasizza l-importanza tal-PEGASE, il-mekkaniżmu finanzjarju l-ġdid; madankollu, jesprimi t-tħassib serju tiegħu għall-qerda ta' faċilitajiet iffinanzjati fi ħdan il-kuntest ta' għajnuna umanitarja jew taħt finanzjament ta' proġetti mill-Unjoni Ewropea, li tfixkel l-effiċjenza ta' l-għajnuna ta' l-UE u taffettwa s-solidarjetà tal-pubbliku fl-Istati Membri;

14.  Jilqa' b'sodisfazzjon ir-riżultat tal-Konferenza Internazzjonali tad-Donaturi għall-Istat Palestinjan li saret f'Diċembru li għadda, jiġifieri l-wegħdiet ta' aktar minn USD 7.4 biljuni, u jistieden lid-donaturi kollha biex iwettqu l-wegħdiet tagħhom b'appoġġ għall-isforzi biex jinbena l-Istat Palestinjan futur skond il-Pjan ta' Riforma u Żvilupp ippreżentat mill-Prim Ministru Fayyad;

15.  Jesprimi tħassib serju dwar il-konsegwenzi ekoloġiċi u l-konsegwenzi għas-saħħa tal-bniedem jekk ma jsirx xogħol ta' manutenzjoni fil-faċilità għat-trattament tad-drenaġġ, u b'mod partikolari jitlob lill-partijiet kollha biex jiffaċilitaw l-aċċess għall-prodotti meħtieġa għat-tiswija u r-rikostruzzjoni ta' l-impjant Beit Lahia, kif identifikat mill-Mibgħuta Speċjali għall-Kwartett;

16.  Jitlob li jkun hemm proġett urġenti u eżemplari għall-enerġija għall-Gaża, possibilment f'Rafah, għall-garanzija ta' awtonomija u awtosuffiċjenza fil-produzzjoni ta' l-elettriku u d-desalinazzjoni għall-popolazzjoni;

17.  Jistieden lill-Grupp ta' Ħidma tiegħu dwar il-Lvant Nofsani biex jeżamina, b'koperazzjoni mal-Kummissjoni u ma' l-organizzazzjonijet konċernati, il-konsegwenzi tal-qerda ta' l-infrastruttura fil-Medda ta' Gaża, b'attenzjoni speċjali għall-faċilitajiet iffinanzjati fi ħdan il-kuntest ta' għajnuna umanitarja jew taħt finanzjament ta' proġetti pprovduti mill-Unjoni Ewropea;

18.  Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lir-Rappreżentant Għoli għall-Politika Barranija u ta' Sigurtà Komuni, lill-gvernijiet u lill-parlamenti ta' l-Istati Membri, lis-Segretarju Ġenerali tan-NU, lill-Mibgħut Speċjali għall-Kwartett għal-Lvant Nofsani, lill-President ta' l-Assemblea Parlamentari Ewro-Mediterranja, lill-President ta' l-Awtorità Palestinjana, lill-Kunsill Leġiżlattiv Palestinjan, lill-Gvern Iżraeljan, lill-Knesset, u lill-Gvern u l-Parlament Eġizzjan.

Avviż legali - Politika tal-privatezza