MOZZJONI GĦAL RIŻOLUZZJONI KONĠUNTA
20.5.2008
- –Georg Jarzembowski, Jacek Saryusz-Wolski, José Ignacio Salafranca Sánchez-Neyra, Laima Liucija Andrikienė, Cornelis Visser, Jas Gawronski, f'isem il-Grupp PPE-DE
- –Hannes Swoboda, Pasqualina Napoletano, Alexandra Dobolyi, f'isem il-Grupp PSE
- –Dirk Sterckx, Thierry Cornillet, Marielle De Sarnez, f'isem il-Grupp ALDE
- –Daniel Cohn-Bendit, Raül Romeva i Rueda, Monica Frassoni, Hélène Flautre, Helga Trüpel, Claude Turmes, Milan Horáček, f'isem il-Grupp Verts/ALE
- –Adam Bielan, Hanna Foltyn-Kubicka, f'isem il-Grupp UEN
- –Jiří Maštálka, Gabriele Zimmer, f'isem il-Grupp GUE/NGL
- –PPE-DE (B6‑0242/2008)
- –UEN (B6‑0250/2008)
- –Verts/ALE (B6‑0251/2008)
- –GUE/NGL (B6‑0252/2008)
- –ALDE (B6‑0253/2008)
- –PSE (B6‑0270/2008)
Riżoluzzjoni tal-Parlament Ewropew dwar id-diżastru naturali fiċ-Ċina
Il-Parlament Ewropew,
– wara li kkunsidra l-konklużjonijiet tal-Kunsill ta’ l-UE tat-13 ta’ Mejju 2008 u d-dikjarazzjoni mill-Kummissjoni dwar is-sitwazzjoni fil-Provinċja ta’ Sichuan fiċ-Ċina,
– wara li kkunsidra l-Artikolu 103(4) tar-Regoli ta' Proċedura tiegħu,
A. billi terremot qawwi b’intensità ta’ 7.8 gradi laqat il-lbiċ taċ-Ċina fit-12 ta’ Mejju 2008,
B. billi t-terremot qatel għexieren ta’ eluf ta’ nies, speċjalment fil-Provinċja ta’ Sichuan, u ħafna nies għadhom ma nstabux,
C. billi l-ħidma ta’ salvataġġ hija diffiċli minħabba l-kundizzjonijiet ġeografiċi fil-Provinċja ta’ Sichuan,
D. billi l-Gvern Ċiniż bagħat riżorsi u persunal ta’ emerġenza eċċezzjonali, inklużi suldati u staff mediku, li qed jaħdmu fiz-zona milquta,
E. billi l-Federazzjoni Internazzjonali tas-Salib l-Aħmar u tan-Nofs Qamar Aħmar ħarġet appell urġenti għall-għajnuna,
1. Jagħti l-għomor u s-soldarjetà tiegħu lill-poplu taċ-Ċina u lill-għadd kbir ta’ vittmi; huwa mnikket għal dawk kollha li qed ibatu l-konsegwenzi tat-terremot;
2. Jilqa’ b’sodisfazzjon ir-reazzjoni immedjata għad-diżastru mill-awtoritajiet Ċiniżi permezz ta’ l-operazzjoni ta’ emerġenza tagħhom;
3. Jinnota b’apprezzament li ċ-Ċina kienet lesta taċċetta għajnuna barranija; jistieden lill-Gvern Ċiniż biex jiffaċilita l-ħidma ta’ l-għajnuna umanitarja u ta’ l-organizzazzjonijiet tal-voluntiera fit-tqassim ta’ l-għajnuna, u biex jiggarantixxi l-aċċess għall-għajnuna għal kull min hu fil-bżonn;
4. Iħeġġeġ lill-Kunsill u lill-Kummissjoni biex jagħtu għajnuna urġenti, assistenza teknika u għajnuna għar-rikostruzzjoni liz-zona milquta;
5. Jisħaq fuq l-urġenza tal-forniment ta' għajnuna umanitarja ewlenija permezz tal-programm ECHO, bl-appoġġ ta' baġit kbir u xieraq; jinnota l-wasla f’Chengdu ta’ l-espert tal-Kummissjoni dwar l-għajnuna umanitarja biex jevalwa x’inhuma l-ħtiġijiet;
6. Jappoġġja l-kontribut li qed jagħtu l-Istati Membri ta’ l-UE permezz tal-‘Mekkaniżmu tal-Protezzjoni Ċivili’, ikkoordinat mill-Kummissjoni Ewropea, kif ukoll il-kontribuzzjonijiet l-oħra lill-isforzi ta’ għajnuna mill-komunità internazzjonali;
7. Jilqa’ b’sodisfazzjon il-fatt li l-midja Ċiniża u barranija qed jitħallew jagħtu informazzjoni dettaljata u eżatta dwar id-diżastru;
8. Jisħaq fuq l-importanza ta’ governanza tajba fil-prevenzjoni u t-tħejjija għal diżastri naturali li jistgħu jseħħu; jitlob li tkun żviluppata t-teknoloġija għal sistema komprensiva u effettiva ta’ twissija bikrija sabiex il-popolazzjonijiet ikunu lesti għat-terremoti u għal diżastri naturali oħra;
9. Jilqa’ b’sodisfazzjon l-isforzi tal-komunità internazzjonali biex jagħtu l-aqwa prattika tagħhom fir-rigward tal-ħidma f'emerġenzi ċivili u ta' għajnuna għad-diżastri sabiex tgħin liċ-Ċina u lill-poplu tagħha li ntlaqtu mit-terremot; jistieden lill-organizzazzjonijiet involuti biex jipprovdu għajnuna finanzjarja biżżejjed biex jitwettqu l-impenji;
10. Jagħti istruzzjonijiet lill-President tiegħu biex jgħaddi din ir-riżoluzzjoni lill-Kunsill, lill-Kummissjoni, lill-gvernijiet ta' l-Istati Membri u lill-Gvern taċ-Ċina.