MOZZJONI GĦAL RIŻOLUZZJONI KONĠUNTA dwar is-sitwazzjoni tal-ġurnalisti u tad-difensuri tad-drittijiet tal-bniedem fil-Messiku
9.3.2022 - (2022/2580(RSP))
li tissostitwixxi l-mozzjonijiet għal riżoluzzjoni li ġejjin:
B9‑0153/2022 (PPE)
B9‑0155/2022 (Verts/ALE)
B9‑0156/2022 (S&D)
B9‑0157/2022 (Renew)
B9‑0158/2022 (ECR)
Leopoldo López Gil, Michael Gahler, David McAllister, Sandra Kalniete, Isabel Wiseler‑Lima, Francisco José Millán Mon, José Manuel Fernandes, Gabriel Mato, Antonio López‑Istúriz White, Paulo Rangel, Luděk Niedermayer, Loránt Vincze, Sara Skyttedal, Tomáš Zdechovský, Janina Ochojska, Christian Sagartz, Arba Kokalari, Loucas Fourlas, Jiří Pospíšil, Peter Pollák, Stanislav Polčák, Elżbieta Katarzyna Łukacijewska, Miriam Lexmann, David Lega, Stelios Kympouropoulos, Seán Kelly, Michaela Šojdrová, Adam Jarubas, Krzysztof Hetman, Ivan Štefanec, Vangelis Meimarakis, Vladimír Bilčík, Romana Tomc, Inese Vaidere, Lefteris Christoforou
f'isem il-Grupp PPE
Pedro Marques, Andrea Cozzolino, Inma Rodríguez‑Piñero
f'isem il-Grupp S&D
Nicolae Ştefănuță, Petras Auštrevičius, Malik Azmani, Izaskun Bilbao Barandica, Olivier Chastel, Dacian Cioloş, Vlad Gheorghe, Klemen Grošelj, Bernard Guetta, Svenja Hahn, Ilhan Kyuchyuk, Javier Nart, Dragoş Pîslaru, María Soraya Rodríguez Ramos, Michal Šimečka, Ramona Strugariu, Dragoş Tudorache, Hilde Vautmans
f'isem il-Grupp Renew
Diana Riba i Giner, Hannah Neumann
f'isem il-Grupp Verts/ALE
Anna Fotyga, Karol Karski, Hermann Tertsch, Raffaele Fitto, Jadwiga Wiśniewska, Eugen Jurzyca, Adam Bielan, Carlo Fidanza, Valdemar Tomaševski, Vincenzo Sofo, Assita Kanko, Veronika Vrecionová, Bogdan Rzońca, Elżbieta Rafalska, Ryszard Czarnecki, Elżbieta Kruk, Ladislav Ilčić, Alexandr Vondra
f'isem il-Grupp ECR
Fabio Massimo Castaldo
Riżoluzzjoni tal-Parlament Ewropew dwar is-sitwazzjoni tal-ġurnalisti u tad-difensuri tad-drittijiet tal-bniedem fil-Messiku
Il-Parlament Ewropew,
– wara li kkunsidra r-riżoluzzjonijiet preċedenti tiegħu dwar il-Messiku,
– wara li kkunsidra l-Ftehim dwar Sħubija Ekonomika, Koordinazzjoni Politika u Kooperazzjoni bejn il-Komunità Ewropea u l-Istati Membri tagħha, min-naħa l-waħda, u l-Istati Uniti Messikani, min-naħa l-oħra[1] (il-Ftehim Globali UE-Messiku), li ilu fis-seħħ mill-2000, u l-ftehim modernizzat,
– wara li kkunsidra d-Djalogi ta' Livell Għoli UE-Messiku dwar id-Drittijiet tal-Bniedem u d-Djalogu ta' Livell Għoli dwar Kwistjonijiet Multilaterali,
– wara li kkunsidra l-Linji gwida tal-UE dwar id-Difensuri tad-Drittijiet tal-Bniedem u dwar il-Libertà tal-Espressjoni Online u Offline,
– wara li kkunsidra d-dikjarazzjoni lokali tal-Unjoni Ewropea, in-Norveġja u l-Iżvizzera tal-15 ta' Frar 2022 dwar il-qtil tal-ġurnalist Heber López Vásquez,
– wara li kkunsidra d-dikjarazzjoni konġunta tal-Kummissjoni Inter-Amerikana dwar id-Drittijiet tal-Bniedem, ir-Rapporteur Speċjali tagħha għal-Libertà tal-Espressjoni u l-Uffiċċju tal-Messiku tal-Kummissarju Għoli tan-NU għad-Drittijiet tal-Bniedem tat-28 ta' Jannar 2022 li tikkundanna l-qtil ta' María de Lourdes Maldonado López,
– wara li kkunsidra d-dikjarazzjoni tal-Uffiċċju tal-Kummissarju Għoli tan-NU għad-Drittijiet tal-Bniedem tad-19 ta' Ottubru 2020 bit-titolu "Espert tan-NU jħeġġeġ lill-Messiku jżid il-protezzjoni tad-difensuri tad-drittijiet tal-bniedem",
– wara li kkunsidra l-Pjan ta' Azzjoni tan-NU dwar is-Sikurezza tal-Ġurnalisti u l-Kwistjoni tal-Impunità tal-2012,
– wara li kkunsidra l-Patt Internazzjonali dwar id-Drittijiet Ċivili u Politiċi tas-16 ta' Diċembru 1966,
– wara li kkunsidra d-Dikjarazzjoni Universali tad-Drittijiet tal-Bniedem tal-10 ta' Diċembru 1948,
– wara li kkunsidra l-Artikoli 144(5) u 132(4) tar-Regoli ta' Proċedura tiegħu,
A. billi l-vjolenza, il-ksur tad-drittijiet tal-bniedem u l-attakki kontra l-ġurnalisti u d-difensuri tad-drittijiet tal-bniedem, inklużi d-difensuri ambjentali u l-popli u l-komunitajiet indiġeni, u d-difensuri tad-drittijiet tan-nisa qed jiżdiedu b'mod drammatiku fil-Messiku; billi l-vjolenza mifruxa fil-Messiku qed tkompli tiżdied, kif ġie kkonstatat matul l-elezzjonijiet lokali u reġjonali ta' Ġunju 2021, u billi s-sitwazzjoni tal-istat tad-dritt qed tiddeterjora serjament; billi għadd preokkupanti u drammatiku ta' ġurnalisti u difensuri tad-drittijiet tal-bniedem, b'mod partikolari dawk li jinvestigaw il-korruzzjoni li tinvolvi uffiċjali pubbliċi jew li jesponu l-ħidma ta' kartelli kriminali tad-droga, speċjalment f'livell lokali, huma vittmi ta' twissijiet, fastidju, theddid, stupri, attakki, għajbien furzat u saħansitra qtil, u jiġu ssorveljati jew mill-awtoritajiet tal-gvern jew minn gruppi kriminali; billi fis-27 ta' Frar 2022 seħħ qtil tal-massa li fih inqatlu 17-il ruħ;
B. billi l-Messiku ilu għal ħafna żmien l-aktar post perikoluż u fatali għall-ġurnalisti barra żona uffiċjali tal-gwerra skont diversi organizzazzjonijiet mhux governattivi (NGOs) u organizzazzjonijiet internazzjonali; billi skont Reporters Without Borders, għat-tielet sena konsekuttiva fl-2021, il-Messiku kien l-aktar pajjiż perikoluż fid-dinja għall-ġurnalisti u ġie kklassifikat fil-143 post minn 180 pajjiż fl-Indiċi Dinji tal-Libertà tal-Istampa tal-2021;
C. billi l-ewwel xhur tal-2022 huma l-aktar xhur li fihom inqatlu ġurnalisti fil-Messiku, fejn mill-inqas sitt ġurnalisti ġew assassinati; billi l-każijiet ta' qtil ta' María de Lourdes Maldonado López, Margarito Martínez, José Luis Gamboa, Heber López Vásquez u Roberto Toledo huma biss ftit eżempji drammatiċi ta' attakki kontra ġurnalisti u ħaddiema tal-midja; billi l-ġurnalisti qed ikollhom iġarrbu kundizzjonijiet tax-xogħol ħżiena u ħafna minnhom m'għandhomx aċċess għas-servizzi tas-saħħa u tal-kura mentali; billi s-sitwazzjoni marret għall-agħar mill-aħħar elezzjonijiet presidenzjali f'Lulju 2018, u mill-inqas 47 ġurnalist ġew assassinati skont sorsi uffiċjali;
D. billi skont il-Ministeru tal-Intern, minn Diċembru 2018 'l hawn inqatlu mill-inqas 68 difensur tad-drittijiet tal-bniedem fil-Messiku; billi l-livell ta' vjolenza kontra n-nisa u l-għadd ta' femminiċidji huma għoljin u minkejja li ttieħdu xi passi istituzzjonali, l-għadd ta' persuni li għebu huwa estremament allarmanti;
E. billi l-President López Obrador spiss uża r-retorika populista fil-laqgħat għall-istampa ta' kuljum biex jiddenigra u jintimida ġurnalisti, sidien tal-midja u attivisti indipendenti; billi r-retorika ta' abbuż u stigmatizzazzjoni toħloq atmosfera ta' preokkupazzjoni kontinwa għall-ġurnalisti indipendenti; billi bl-iskuża tal-ġlieda kontra l-aħbarijiet foloz, il-Gvern Messikan ħoloq pjattaforma tal-istat biex jiddenunzja, jistigmatizza u jattakka l-istampa kritika; billi fi Frar 2022 il-ġurnalisti organizzaw protesti fi 13 mit-32 stat Messikan, fejn talbu aktar sigurtà u investigazzjonijiet dwar l-attakki kontra l-ġurnalisti;
F. billi minn Jannar 2022, il-Mekkaniżmu Federali ta' Protezzjoni għad-Difensuri tad-Drittijiet tal-Bniedem u l-Ġurnalisti kellu fis-seħħ miżuri ta' protezzjoni għal 1 518-il persuna – 1 023 difensur tad-drittijiet tal-bniedem u 495 ġurnalist; billi l-mekkaniżmu huwa mxekkel minn nuqqasijiet serji f'termini tal-ammont ta' finanzjament u tal-għadd ta' persunal disponibbli, nuqqas ta' akkumpanjament adegwat, nuqqas ta' koordinazzjoni mal-gvernijiet tal-istati u dewmien fit-twettiq tal-miżuri ta' protezzjoni, li spiss jiswew il-ħajjiet; billi mill-inqas disa' benefiċjarji fil-programm ta' protezzjoni nqatlu;
G. billi l-Istat Messikan qed jaħdem fuq il-ħolqien ta' sistema nazzjonali ta' prevenzjoni u protezzjoni għad-difensuri tad-drittijiet tal-bniedem u l-ġurnalisti li se tkun ibbażata fuq Att Ġenerali ta' Prevenzjoni u Protezzjoni kontra l-Attakki fuq id-Difensuri tad-Drittijiet tal-Bniedem u l-Ġurnalisti u se tinkludi l-adozzjoni ta' mudell nazzjonali ta' prevenzjoni, il-ħolqien ta' rekords nazzjonali dwar l-attakki, u l-implimentazzjoni ta' protokoll nazzjonali ta' protezzjoni;
H. billi l-korruzzjoni istituzzjonalizzata u mifruxa, imħeġġa minn sistema ġudizzjarja inadegwata, qed tikkawża problema endemika ta' impunità, u 95 % tal-każijiet ta' qtil ta' ġurnalisti ma jiġux ikkastigati; billi, kif indika l-Uffiċċju tar-Rapporteur Speċjali għal-Libertà tal-Espressjoni tal-Kummissjoni Inter-Amerikana dwar id-Drittijiet tal-Bniedem, din l-impunità twassal messaġġ li l-vjolenza hija permissibbli, filwaqt li tinkoraġġixxi t-twettiq ta' reati ġodda u tiġġenera effett ta' awtoċensura; billi l-Gvern Messikan ma wettaqx kif xieraq ir-riformi meħtieġa biex jitnaqqsu l-vjolenza u l-impunità, inkluż għal reati kontra ġurnalisti u difensuri tad-drittijiet tal-bniedem;
I. billi hemm indikazzjonijiet qawwija li l-Istat Messikan uża għodod ta' hacking tat-telefons maħsuba biex jikkumbattu t-terroriżmu u l-kartelli, inkluż is-software ta' spjunaġġ Pegasus, kontra ġurnalisti u difensuri tad-drittijiet tal-bniedem;
J. billi f'Novembru 2020, il-Messiku rratifika l-Ftehim ta' Escazú, li jinkludi miżuri msaħħa ta' protezzjoni għad-difensuri ambjentali; billi l-Messiku għandu jipprijoritizza l-implimentazzjoni tiegħu;
K. billi reċentement il-Kungress irċieva proposta leġiżlattiva inkwetanti li tfittex li twaqqaf lil kwalunkwe NGO li tirċievi finanzjament barrani milli tipprova tinfluwenza l-leġiżlazzjoni jew tipparteċipa f'litigazzjoni strateġika;
L. billi diversi riformi kostituzzjonali tas-sistemi elettorali u ġudizzjarji – mibdija mill-amministrazzjoni ta' López Obrador – iqajmu dubji dwar l-istabbiltà tal-istat tad-dritt u ċ-ċertezza tad-dritt;
M. billi s-sħubija strateġika bejn l-UE u l-Messiku ppermettiet li jkun hemm kooperazzjoni iktar mill-qrib bejn l-UE u l-Messiku dwar kwistjonijiet ta' importanza globali, u b'mod partikolari djalogu msaħħaħ, koordinazzjoni u skambji f'oqsma bħalma huma s-sigurtà, id-drittijiet tal-bniedem, ir-riforma elettorali, l-iżvilupp reġjonali u l-politiki regolatorji u dawk kummerċjali; billi l-Messiku u l-Unjoni Ewropea jikkondividu valuri komuni;
N. billi l-Ftehim Globali bejn l-UE u l-Messiku jinkludi klawżoli dwar id-drittijiet tal-bniedem u d-demokrazija, speċjalment fl-Artikoli 1 u 39; billi d-Djalogu ta' Livell Għoli bejn l-UE u l-Messiku dwar id-Drittijiet tal-Bniedem li sar fl-2020 irriżulta fi ftehim dwar ħidma konġunta fil-Messiku biex tiżdied il-protezzjoni għad-difensuri tad-drittijiet tal-bniedem;
1. Jikkundanna t-theddid, il-fastidju u l-qtil ta' ġurnalisti u difensuri tad-drittijiet tal-bniedem fil-Messiku, inklużi d-difensuri ambjentali u l-popli u l-komunitajiet indiġeni; jistieden lill-awtoritajiet jinvestigaw il-każijiet ta' qtil fil-pront, bir-reqqa u b'mod indipendenti u imparzjali u, fil-każ tal-ġurnalisti u l-ħaddiema tal-midja, bi qbil mal-protokoll approvat għall-investigazzjoni ta' reati kontra l-libertà tal-espressjoni;
2. Jesprimi s-simpatija, is-solidarjetà u l-kondoljanzi l-aktar profondi tiegħu lill-vittmi u l-familji tagħhom kollha; itenni t-tħassib tiegħu dwar il-klima ta' insigurtà u ostilità li jiffaċċjaw id-difensuri tad-drittijiet tal-bniedem u l-ġurnalisti u jappoġġjahom b'sens ta' solidarjetà;
3. Jenfasizza li sabiex demokrazija b'saħħitha tiffunzjona, il-libertà tal-kelma online u offline, il-libertà tal-istampa u l-libertà tal-għaqda huma mekkaniżmi fundamentali; jistieden lill-awtoritajiet Messikani jieħdu l-passi kollha meħtieġa biex jiżguraw il-protezzjoni u l-ħolqien ta' ambjent sikur għall-ġurnalisti u d-difensuri tad-drittijiet tal-bniedem f'konformità mal-istandards internazzjonali stabbiliti, inkluż billi jindirizzaw kemm fil-livell statali kif ukoll f'dak federali l-kwistjoni tal-korruzzjoni mifruxa, it-taħriġ u r-riżorsi inadegwati, il-kompliċità ta' xi uffiċjali u sistemi ġudizzjarji mhux adegwati, li jwasslu għal rati tant għoljin ta' impunità;
4. Jinnota bi tħassib il-kritika sistematika u iebsa użata mill-ogħla awtoritajiet tal-Gvern Messikan kontra l-ġurnalisti u x-xogħol tagħhom u jikkundanna l-attakki frekwenti fuq il-libertà tal-midja u b'mod partikolari fuq il-ġurnalisti u l-ħaddiema tal-midja; itenni li l-ġurnaliżmu jista' jitwettaq biss f'ambjent ħieles minn theddid, aggressjoni fiżika, psikoloġika jew morali, jew atti oħra ta' intimidazzjoni u fastidju, u jistieden lill-awtoritajiet Messikani jiddefendu u jissalvagwardjaw l-ogħla standards għall-protezzjoni tal-libertà tal-kelma, il-libertà tal-għaqda u l-libertà tal-għażla;
5. Jistieden lill-awtoritajiet, u b'mod partikolari l-ogħla awtoritajiet, joqogħdu lura milli joħorġu kwalunkwe komunikazzjoni li tista' tistigmatizza d-difensuri tad-drittijiet tal-bniedem, il-ġurnalisti u l-ħaddiema tal-midja, taggrava l-atmosfera kontrihom jew tgħawweġ il-linji ta' investigazzjoni tagħhom; jistieden lil dawk l-awtoritajiet jenfasizzaw pubblikament ir-rwol ċentrali li għandhom id-difensuri tad-drittijiet tal-bniedem u l-ġurnalisti fis-soċjetajiet demokratiċi;
6. Iħeġġeġ lill-Gvern tal-Messiku jieħu miżuri konkreti, fil-pront u effettivi biex isaħħaħ l-istituzzjonijiet nazzjonali, statali u lokali u jimplimenta sett ta' strateġiji urġenti, komprensivi u koerenti għall-prevenzjoni, il-protezzjoni, ir-riparazzjonijiet u l-obbligu ta' rendikont sabiex jiżgura li d-difensuri tad-drittijiet tal-bniedem u l-ġurnalisti jkunu jistgħu jkomplu l-attivitajiet tagħhom mingħajr biża' ta' rappreżalji u mingħajr restrizzjonijiet, f'konformità mar-rakkomandazzjonijiet tal-Kummissarju Għoli tan-NU għad-Drittijiet tal-Bniedem u tal-Kummissjoni Inter-Amerikana dwar id-Drittijiet tal-Bniedem; jirrakkomanda li l-Messiku jintegra perspettiva tal-ġeneru meta jindirizza s-sikurezza tal-ġurnalisti u tad-difensuri tad-drittijiet tal-bniedem;
7. Iħeġġeġ lill-Mekkaniżmu Federali ta' Protezzjoni għad-Difensuri tad-Drittijiet tal-Bniedem u l-Ġurnalisti jwettaq il-wegħda tiegħu li jżid il-finanzjament u r-riżorsi tiegħu u jistabbilixxi proċessi aktar rapidi biex jinkludi d-difensuri u l-ġurnalisti bħala benefiċjarji bil-għan li jiġu salvati l-ħajjiet u tiġi garantita s-sikurezza tal-persuni mhedda, inkluż jingħataw miżuri ta' sigurtà lill-familji, lill-kollegi u lill-avukati tagħhom; jissottolinja li l-politiki ta' protezzjoni pubblika għandhom jinvolvu b'mod effettiv il-korpi governattivi u l-istituzzjonijiet ta' kull stat u l-livell lokali;
8. Iħeġġeġ lill-Gvern Messikan jieħu azzjoni biex isaħħaħ l-istituzzjonijiet tal-istat u jikkonsolida l-istat tad-dritt bil-għan li jiġu indirizzati wħud mill-problemi strutturali li huma l-kawża tal-ksur tad-drittijiet tal-bniedem u jitlob li l-organizzazzjonijiet ċivili li jaħdmu fil-qasam tad-drittijiet tal-bniedem ikunu involuti f'dan il-proċess; jilqa' l-ħolqien tal-Kummissjoni Nazzjonali tat-Tiftix (KNT) bil-għan li tfittex oqbra tal-massa madwar il-pajjiż u tieħu passi biex tiddetermina u tippubblika l-għadd veru ta' persuni li għebu;
9. Jistieden lill-Gvern Messikan jikkoopera bis-sħiħ mal-korpi tan-NU u jagħmel stedina permanenti għaż-żjara tal-proċeduri speċjali kollha tal-Kunsill tad-Drittijiet tal-Bniedem tan-NU, b'mod partikolari r-Rapporteur Speċjali tan-NU għal-Libertà tal-Opinjoni u l-Espressjoni, u jikkoopera magħhom b'mod proattiv;
10. Jilqa' ż-żjara reċenti tal-Kumitat tan-NU dwar l-Għajbien Furzat fil-Messiku u l-fatt li l-gvern irrikonoxxa l-ġuriżdizzjoni tal-kumitat biex jikkunsidra każijiet mill-Messiku, li jippermetti lill-familji tal-vittmi jressqu każijiet quddiem il-kumitat ladarba jkunu eżawrew ir-rikors legali tagħhom domestikament;
11. Jistieden lill-Istati Membri kollha, lis-Servizz Ewropew għall-Azzjoni Esterna u lid-Delegazzjoni tal-UE fil-Messiku jqajmu tħassib dwar id-drittijiet tal-bniedem mal-kontropartijiet Messikani tagħhom u jqiegħdu l-protezzjoni tal-ġurnalisti u tad-difensuri tad-drittijiet tal-bniedem fiċ-ċentru tad-djalogi bejn l-UE u l-Messiku; iħeġġeġ lid-Delegazzjoni tal-UE u lill-Istati Membri jimplimentaw bis-sħiħ il-Linji Gwida tal-UE dwar id-Difensuri tad-Drittijiet tal-Bniedem u dwar il-Libertà tal-Espressjoni Online u Offline sabiex jipprovdu l-appoġġ xieraq kollu għall-ħidma tad-difensuri tad-drittijiet tal-bniedem u l-ġurnalisti;
12. Jissottolinja l-importanza tal-Messiku bħala sieħeb strateġiku; ifakkar fl-importanza ta' relazzjoni b'saħħitha u qawwija bejn l-UE u l-Messiku u jafferma mill-ġdid l-impenn tiegħu li jrawwem ir-relazzjonijiet permezz tal-Ftehim Globali mmodernizzat bejn l-UE u l-Messiku, li jkompli jsaħħaħ id-dispożizzjonijiet dwar id-drittijiet tal-bniedem u jippermetti lill-UE u lill-Messiku jiddiskutu firxa ta' kwistjonijiet bħad-drittijiet tal-bniedem mas-soċjetà ċivili, inklużi l-ġurnalisti, id-difensuri tad-drittijiet tal-bniedem u oħrajn f'livell multilaterali;
13. Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-Viċi President tal-Kummissjoni / Rappreżentant Għoli tal-Unjoni għall-Affarijiet Barranin u l-Politika ta' Sigurtà, lill-Istati Membri, lill-Presidenza pro tempore tal-Komunità ta' Stati tal-Amerika Latina u tal-Karibew, lis-Segretarju Ġenerali tal-Organizzazzjoni tal-Istati Amerikani, lill-Assemblea Parlamentari Ewro-Latino-Amerikana, u lill-President, il-Gvern u l-Kungress tal-Messiku.
- [1] ĠU L 276, 28.10.2000, p. 45.