MOZZJONI GĦAL RIŻOLUZZJONI KONĠUNTA dwar l-Iran, b’mod partikolari l-avvelenament ta’ mijiet ta’ tfal tal-iskola bniet
15.3.2023 - (2023/2587(RSP))
li tissostitwixxi l-mozzjonijiet għal riżoluzzjoni li ġejjin:
B9‑0170/2023 (The Left)
B9‑0172/2023 (Verts/ALE)
B9‑0175/2023 (Renew)
B9‑0177/2023 (PPE)
B9‑0180/2023 (S&D)
B9‑0181/2023 (ECR)
Željana Zovko, David Lega, Michael Gahler, Isabel Wiseler‑Lima, David McAllister, Frances Fitzgerald, Tom Vandenkendelaere, Andrius Kubilius, Antonio López‑Istúriz White, Ivan Štefanec, Peter Pollák, Inese Vaidere, Michaela Šojdrová, Vladimír Bilčík, Vangelis Meimarakis, Stelios Kympouropoulos, Krzysztof Hetman, Tomáš Zdechovský, Eugen Tomac, Sandra Kalniete
f’isem il-Grupp PPE
Pedro Marques, Evin Incir, Dietmar Köster, Alessandra Moretti, Thijs Reuten
f’isem il-Grupp S&D
Samira Rafaela, Abir Al‑Sahlani, Petras Auštrevičius, Nicola Beer, Izaskun Bilbao Barandica, Dita Charanzová, Olivier Chastel, Katalin Cseh, Vlad Gheorghe, Bernard Guetta, Svenja Hahn, Karin Karlsbro, Moritz Körner, Nathalie Loiseau, Karen Melchior, Frédérique Ries, María Soraya Rodríguez Ramos, Michal Šimečka, Ramona Strugariu, Hilde Vautmans
f’isem il-Grupp Renew
Ernest Urtasun, Hannah Neumann
f’isem il-Grupp Verts/ALE
Adam Bielan, Anna Fotyga, Karol Karski, Assita Kanko, Jadwiga Wiśniewska, Denis Nesci, Eugen Jurzyca, Raffaele Stancanelli, Alexandr Vondra, Veronika Vrecionová, Elżbieta Kruk, Waldemar Tomaszewski, Beata Kempa, Joachim Stanisław Brudziński, Ladislav Ilčić, Witold Jan Waszczykowski, Zbigniew Kuźmiuk, Bogdan Rzońca, Elżbieta Rafalska, Ryszard Czarnecki, Sergio Berlato
f’isem il-Grupp ECR
Cornelia Ernst, Marisa Matias
f’isem il-Grupp The Left
Fabio Massimo Castaldo
Riżoluzzjoni tal-Parlament Ewropew dwar l-Iran, b’mod partikolari l-avvelenament ta’ mijiet ta’ tfal tal-iskola bniet
Il-Parlament Ewropew,
A. billi n-nisa u l-bniet fl-Iran mexxew protesti paċifiċi fuq skala kbira li fihom esiġew id-demokrazija u talbu li d-diskriminazzjoni sistemika kontra n-nisa tinġieb fit-tmiem;
B. billi eluf ta’ bniet u ta’ nisa madwar l-Iran ġew attakkati b’sustanzi kimiċi tossiċi minn Novembru 2022 ’l hawn, u dan impedixxa lill-bniet milli jattendu l-iskola;
C. billi dan qed iseħħ fi żmien meta r-repressjoni kontra n-nisa li jeżerċitaw id-dritt tagħhom għal-libertà hija eħrex minn qatt qabel;
1. Jikkundanna, bl-aktar mod qawwi, dan it-tentattiv atroċi biex in-nisa u l-bniet fl-Iran jiġu msikkta; jesprimi s-solidarjetà profonda tiegħu mal-istudenti Iranjani avvelenati fl-inċidenti u mal-familji tagħhom;
2. Jikkundanna għal darb’oħra l-politiki tar-reġim immirati kontra n-nisa u kontra l-bniet u jsostni mill-ġdid l-appoġġ assolut tiegħu għat-talba tan-nisa u tal-bniet Iranjani li tiġi abolita kull diskriminazzjoni sistemika;
3. Iħeġġeġ lill-Kunsill tad-Drittijiet tal-Bniedem tan-NU jinkariga lill-Missjoni Internazzjonali Indipendenti ta’ Ġbir ta’ Informazzjoni (IIFFM) b’investigazzjoni indipendenti dwar l-avvelenamenti tat-tfal tal-iskola bniet u jitlob li dawk responsabbli jagħtu rendikont ta’ għemilhom; iħeġġeġ lill-awtoritajiet Iranjani jagħtu aċċess sħiħ lill-IIFFM tan-NU u lir-Rapporteur Speċjali tan-NU dwar is-sitwazzjoni tad-drittijiet tal-bniedem fir-Repubblika Iżlamika tal-Iran;
4. Ifakkar li r-Repubblika Iżlamika tal-Iran għandha responsabbiltà sħiħa għad-dritt fundamentali tan-nisa u tal-bniet Iranjani għall-edukazzjoni u jfakkar li, jekk il-bniet jiġu mċaħħda mill-edukazzjoni, dan ikollu impatt devastanti fuq il-futur tagħhom; iħeġġeġ lill-awtoritajiet Iranjani jiggarantixxu li l-bniet ikollhom aċċess mhux diskriminatorju għall-edukazzjoni u jħeġġiġhom jirrevokaw kwalunkwe leġiżlazzjoni li tiddiskrimina kontra l-bniet u kontra n-nisa;
5. Jikkundanna l-fatt li r-reġim ilu xhur sħaħ jonqos milli jieħu azzjoni dwar rapporti kredibbli ta’ attakki tossiċi sistematiċi kontra t-tfal tal-iskola bniet u joħnoq tali rapporti deliberatament;
6. Jiddenunzja kwalunkwe proċediment legali politikament motivat kontra dawk li jirrapportaw dwar l-avvelenamenti, b’mod partikolari Ali Pourtabatabaei; jinsisti li d-drittijiet tal-Iranjani għal-libertà tal-espressjoni u tal-għaqda paċifika u l-libertà tal-midja jridu jiġu rispettati; jitlob li dawk kollha miżmuma l-ħabs jew imħarrka talli eżerċitaw id-drittijiet fundamentali tagħhom jinħelsu minnufih u mingħajr kundizzjonijiet u li jitwaqqgħu l-akkużi kollha kontrihom;
7. Jistieden għal darb’oħra lill-Kunsill isejjaħ il-Korp tal-Gwardjani tar-Rivoluzzjoni Iżlamika organizzazzjoni terroristika u jespandi l-lista tas-sanzjonijiet tal-UE, inkluż fl-ambitu tal-mekkaniżmi ta’ sanzjonijiet tad-Drittijiet tal-Bniedem Globali tal-UE, b’tali mod li tkopri lil dawk kollha responsabbli għall-ksur tad-drittijiet tal-bniedem fl-Iran, fosthom il-Mexxej Suprem Ali Khamenei, il-President Ebrahim Raisi u l-Prosekutur Ġenerali Mohammad Jafar Montazeri;
8. Jistieden għal darb’oħra lill-Kummissjoni u lill-Istati Membri jżidu l-appoġġ tekniku u ta’ kapaċità għas-soċjetà ċivili Iranjana; iħeġġeġ lill-Istati Membri jagħmluha aktar faċli biex dawk li għandhom bżonn jitilqu mill-Iran, b’mod partikolari n-nisa u l-bniet, jinħarġulhom viżi, jingħataw ażil u jirċievu għotjiet ta’ emerġenza;
9. Jagħti istruzzjonijiet lill-President tiegħu biex tgħaddi din ir-riżoluzzjoni lill-Kunsill, lill-Kummissjoni, lill-VP/RGħ, lill-Assemblea Konsultattiva Iżlamika u lill-Uffiċċju tal-Mexxej Suprem tar-Repubblika Iżlamika tal-Iran.