Artikolu 158 : Adozzjoni tal-Aġenda u emendi għall-Aġenda
1. Fil-bidu ta' kull sessjoni parzjali, il-Parlament għandu jadotta l-aġenda tiegħu. Emendi għall-aħħar abbozz tal-aġenda jistgħu jkunu proposti minn xi kumitat, minn grupp politiku jew minn għadd ta' Membri li jilħqu tal-anqas il-limitu baxx. Kwalunkwe proposta tali trid tiġi riferuta lill-President mhux anqas minn siegħa qabel il-ftuħ tas-sessjoni parzjali. Il-President jista' jagħti l-kelma lil min iressaq l-emenda, u lil kelliem wieħed kontra, u f'kull każ għal mhux iżjed minn minuta.
2. Malli tiġi adottata, l-aġenda ma tistax tiġi emendata, ħlief skont l-Artikoli 163, 197, 198, 199, 200 jew 201, jew fuq proposta mill-President.
Jekk mozzjoni ta' proċedura sabiex tiġi emendata l-aġenda tiġi miċħuda, ma tistax terġa' titqiegħed fuq il-Mejda fl-istess sessjoni parzjali.
L-abbozzar jew l-emenda tat-titolu ta' riżoluzzjoni sottomessa sabiex tikkonkludi dibattitu abbażi tal-Artikoli 32, 136 jew 144 ma jikkostitwixxux modifika għall-aġenda, dment li t-titolu jibqà fi ħdan l-iskop tas-suġġett li qed jiġi diskuss.
3. Qabel ma jagħlaq is-seduta, il-President għandu jħabbar id-data, il-ħin u l-aġenda għas-seduta li jkun imiss.