Riail 194 : Mínithe ar vótáil

1.   Féadfaidh aon Fheisire míniú ó bhéal a thabhairt ar an vótáil aonair agus/nó vótáil chríochnaitheach a rinneadh ar aon mhír a cuireadh faoi bhráid na Parlaiminte ar feadh tréimhse nach faide ná aon nóiméad amháin. Tabharfar mínithe den sórt sin ar an vótáil ag deireadh an tsuí ar lena linn a rinneadh an vótáil lena mbaineann, mura rud é go gcinneann an tUachtarán ar bhonn eisceachtúil í a chur siar go dtí tráth níos déanaí sa pháirtseisiún. Féadfaidh gach Feisire uasmhéid de thrí mhíniú ó bhéal ar an vótáil a thabhairt in aghaidh an pháirtseisiúin.

Ar vóta den sórt sin, féadfaidh aon Fheisire míniú i scríbhinn ar an vótáil a thabhairt isteach nach faide ná 200 focal agus cuirfear an ráiteas sin san áireamh ar leathanach an Fheisire ar shuíomh gréasáin na Parlaiminte.

Féadfaidh aon ghrúpa polaitiúil míniú nach mairfidh níos faide ná dhá nóiméad a thabhairt ar an vótáil.

A luaithe atá tús curtha leis an gcéad mhíniú ar vótáil ar an gcéad mhír, ní ghlacfar le haon iarraidh eile ar mhínithe a thabhairt ar vótáil.

2.   Ní bheidh mínithe ar vótáil inghlactha i gcás vótáil le ballóid rúnda nó vótáil ar ábhair nós imeachta.

3.   I gcás ina mbeidh mír gan leasuithe nó gan díospóireacht san áireamh ar chlár oibre na Parlaiminte, ní fhéadfaidh Feisirí ach mínithe i scríbhinn ar vótáil a thíolacadh i gcomhréir le mír 1.