Tá Parlaimint na hEorpa,

–  ag féachaint do na rúin uaithi roimhe seo maidir leis an Úcráin agus an Rúis ón 1 Márta 2022, go háirithe an rún ón 17 Iúil 2024 maidir leis an ngá atá le tacaíocht leanúnach AE don Úcráin(1),

–  ag féachaint do Chairt na Náisiún Aontaithe, do Choinbhinsiúin na Háige, do Choinbhinsiúin na Ginéive agus do na prótacail bhreise a ghabhann leo agus do Reacht na Róimhe den Chúirt Choiriúil Idirnáisiúnta,

–  ag féachaint do thuarascáil an 14 Feabhra 2024 ón mBanc Domhanda, ó Rialtas na hÚcráine, ón gCoimisiún Eorpach agus ó na Náisiúin Aontaithe, dar teideal Ukraine: Third Rapid Damage and Needs Assessment (RDNA3) February 2022 – December 2023 [An Úcráin: An Tríú Measúnú Mear ar Dhamáiste agus ar Riachtanais (RDNA3) Feabhra 2022 – Nollaig 2023],

–  ag féachaint do Rialachán (AE) 2024/792 ó Pharlaimint na hEorpa agus ón gComhairle an 29 Feabhra 2024 lena mbunaítear an tSaoráid don Úcráin(2),

–  ag féachaint do na Conclúidí ón gComhairle Eorpach agus don Dearbhú Comhpháirteach Tacaíochta don Úcráin an 12 Iúil 2023,

–  ag féachaint do na gealltanais chomhpháirteacha slándála idir an tAontas Eorpach agus an Úcráin ón 27 Meitheamh 2024,

–  ag féachaint do ráiteas ó airí gnóthaí eachtracha na Fraince, na Gearmáine agus na Ríochta Aontaithe an 10 Meán Fómhair 2024 maidir leis haistriú diúracán balaistíoch chuig an Rúis ag an Iaráin,

–  ag féachaint do Choincheap Straitéiseach 2022 ECAT,

–  ag féachaint do Riail 136(2) agus (4) dá Rialacha Nós Imeachta,

A.  de bhrí go bhfuil cogadh foghach neamhdhleathach, gan chúis agus gan údar ar bun ag an Rúis i gcoinne na hÚcráine ón 24 Feabhra 2022, ag leanúint de na hionsaithe a rinneadh roimhe seo ó 2014 i leith lena n-áirítear ionghabháil na Crimé agus forghabháil codanna de réigiúin Donetsk agus Luhansk ina dhiaidh sin, agus go leanann sí de phrionsabail Chairt na Náisiún Aontaithe a shárú go leanúnach trína hionsaithe i gcoinne cheannasacht, neamhspleáchas agus iomláine chríochach na hÚcráine agus an dlí daonnúil idirnáisiúnta a shárú go follasach agus go mór, mar a bunaíodh le Coinbhinsiúin na Ginéive 1949;

B.  de bhrí go ndearna Comhthionól Ginearálta na Náisiún Aontaithe, i rún uaidh an 2 Márta 2022, cogadh na Rúise i gcoinne na hÚcráine a cháiliú láithreach mar ghníomh foghach de shárú ar Airteagal 2(4) de Chairt na Náisiún Aontaithe, agus, i rún uaidh an 14 Samhain 2022, gur aithin sé gur gá Cónaidhm na Rúise a thabhairt chun cuntais as a cogadh foghach, agus an fhreagracht dhlíthiúil agus airgeadais a chur uirthi as a gníomhartha éagóracha idirnáisiúnta, lena n-áirítear trí chúiteamh a dhéanamh as an díobháil agus as an damáiste a rinneadh;

C.  de bhrí gur eisigh an Chúirt Choiriúil Idirnáisiúnta roinnt barántas gabhála d’oifigigh Rúiseacha atá freagrach as coireanna cogaidh a bhaineann le hionsaithe ar réada sibhialtacha a stiúradh, daonra a dhíbirt go neamhdhleathach agus daonra a aistriú go neamhdhleathach ó limistéir na hÚcráine atá faoi fhorghabháil chuig Cónaidhm na Rúise, rud a dhéanann dochar do leanaí na hÚcráine; de bhrí gur theip ar an Mongóil i mí Mheán Fómhair 2024 barántas gabhála na Cúirte Coiriúla Idirnáisiúnta i gcoinne Vladimir Putin a fhorghníomhú;

D.  de bhrí gur léirigh an Úcráin agus a saoránaigh buandiongbháilteacht agus a dtír á cosaint acu go rathúil, d’ainneoin an chostais mhóir a bhain le taismigh shibhialtacha agus mhíleata; de bhrí go leanann fórsaí na Rúise d’ionsaithe córasacha agus neamh-idirdhealaitheacha a dhéanamh ar limistéir chónaithe agus ar bhonneagar sibhialtach san Úcráin, rud a fhágann go bhfaigheann na mílte sibhialtach de chuid na hÚcráine bás, go ndéantar díbirt éigeantach agus fuadach forfheidhmithe, lena n-áirítear leanaí, mar aon le príosúnú neamhdhleathach agus céasadh shaoránaigh na hÚcráine, sibhialtaigh, saighdiúirí agus príosúnaigh chogaidh a chur chun báis, agus gníomhartha sceimhlitheoireachta ar fud na tíre, lena n-áirítear foréigean gnéasach agus olléigniú a úsáid mar arm cogaidh; de bhrí go leantar de na milliúin Úcránach a easáitiú laistigh den Úcráin agus lasmuigh di, tar éis dóibh teitheadh ó fhogha na Rúise;

E.  de bhrí, ón 24 Lúnasa 2024 i leith, go bhfuil an feachtas aerthuairgneála is déine a bhí aici go dtí seo á dhéanamh ag an Rúis i gcoinne na hÚcráine, trí líon mór diúracán balaistíoch, buamaí faoileoireachta, agus dróin agus airm eile a lainseáil i gcoinne Kharkiv, Chív, Poltava, Sumy, Odesa, agus Lviv, inar maraíodh seachtar sibhialtach in ionsaí dróin agus diúracáin le déanaí díreach 70 km ó theorainn na Polainne; de bhrí go bhfuil damáiste nó scrios déanta go héifeachtach ag an Rúis do suas le 80 % de bhonneagar fuinnimh na tíre, rud a d’fhéadfadh géarchéim dhaonnúil thromchúiseach a chruthú san Úcráin le linn mhíonna an gheimhridh atá le teacht; de bhrí gur coireanna cogaidh iad na hionsaithe córasacha sin faoin dlí idirnáisiúnta;

F.  de bhrí gur fhógair Uachtarán na hÚcráine Volodymr Zelenskyy gur bhuail diúracán Rúiseach bulc-iompróir a raibh cruithneacht á hiompar aige sa Mhuir Dhubh agus a bhí ar a bhealach go dtí an Éigipt an 12 Meán Fómhair 2024, rud a d’fhág gur sprioc athnuaite í an tslándáil bia; de bhrí go bhfuil dróin agus diúracáin na Rúise atá dírithe ar an Úcráin ag sárú aerspás AE agus ECAT níos mó agus níos mó, rud a chuireann saoránaigh inár réigiúin thoir i mbaol;

G.  de bhrí go bhfuil an staid dhaonnúil san Úcráin, go háirithe gar do na línte tosaigh, ag éirí níos criticiúla; de bhrí, de réir na Náisiún Aontaithe, gur fhág na hionsaithe a rinne an Rúis le déanaí ar bhonneagar sibhialtach criticiúil na mílte Úcránach gan seirbhísí bunriachtanacha agus go mbeidh cabhair dhaonnúil de dhíth ar níos mó ná 14.6 milliún duine, thart ar 40 % de dhaonra na hÚcráine, in 2024; de bhrí go raibh an chogaíocht níos déine i réigiún Kharkivska i mí na Bealtaine ina cúis leis an easáitiú is mó san Úcráin ó 2023; de bhrí, mar gheall ar easnamh cistiúcháin, go dtuairiscíonn na Náisiúin Aontaithe nach bhfuil oibrithe cabhrach daonnúla in ann freastal go hiomlán ar riachtanais chriticiúla sa tír faoi láthair; de bhrí go mbeidh riachtanais phráinneacha ag leanúint ar aghaidh agus ag dul in olcas sna míonna amach romhainn mar thoradh ar fhadú na coinbhleachta; de bhrí go bhfuil iarmhairtí tubaisteacha ag scriosadh an bhonneagair san Úcráin do shláinte na mban, ar mná iad a dhéanann an obair altranais, leighis agus chúraim go minic;

H.  de bhrí gur eisigh Rialtas na hUngáire foraithne de shárú ar an Treoir um Chosaint Shealadach(3), lena gcuirtear ar ceal dídean státmhaoinithe do dhídeanaithe ó iarthar na hÚcráine, lena bhfágtar go leor daoine, an tromlach acu mná agus leanaí, gan dídean;

I.  de bhrí gurb é an meastachán is déanaí sa Mheasúnú Mear ar Dhamáiste agus ar Riachtanais (RDNA3) a d’eisigh Rialtas na hÚcráine, Grúpa an Bhainc Dhomhanda, an Coimisiún agus na Náisiúin Aontaithe ón 31 Nollaig 2023 gurb ionann costas iomlán na hatógála agus an téarnaimh san Úcráin agus USD 486 bhilliún ar a laghad sna deich mbliana amach romhainn, suas ó USD 411 bhilliún a measadh bliain ó shin;

J.  de bhrí gur ranníoc AE agus a Bhallstáit níos mó ná EUR 100 billiún go dtí seo i gcúnamh airgeadais, daonnúil, dídeanaithe agus míleata don Úcráin; de bhrí gur chuir AE os cionn EUR 25 bhilliún de thacaíocht mhacrairgeadais ar fáil don Úcráin in 2022 agus 2023 agus gur bhunaigh sé an tSaoráid don Úcráin, ionstraim airgeadais thiomnaithe a chuirfidh ar a chumas suas le EUR 50 billiún de thacaíocht airgeadais intuartha agus sholúbtha a chur ar fáil don Úcráin ó 2024 go 2027; de bhrí go ndearna AE a chéad íocaíocht rialta de thart ar EUR 4.2 billiún faoin Saoráid nuabhunaithe don Úcráin i mí Iúil 2024; de bhrí go leanann an íocaíocht sin an tacaíocht droichid agus réamh-mhaoinithe a bhí ann roimhe seo, arb ionann é agus beagnach EUR 14 billiún san iomlán ó bunaíodh an tSaoráid i mí an Mhárta 2024;

K.  de bhrí go bhfuil méadú suntasach déanta ag an Rúis ar a caiteachas míleata agus ar a táirgeadh míleata féin in 2024; de bhrí go bhfuil stoc-charn arm na Bealarúise á úsáid ag an Rúis freisin agus go bhfuil sí ag brath ar thacaíocht mhíleata ó roinnt tíortha, go príomha an Iaráin agus an Chóiré Thuaidh; de bhrí go bhfuil tuarascálacha ann ina léirítear go bhfuil an tSín ag tabhairt cúnamh suntasach don Rúis chun a cumais mhíleata a neartú, ag leathnú thar theicneolaíochtaí dé-úsáide; de bhrí, de réir foinsí rialtais, gur aistrigh an Iaráin lastais diúracán balaistíoch neasraoin Fath-360 chuig an Rúis le déanaí; de bhrí gur fhógair an Fhrainc, an Ghearmáin agus an Ríocht Aontaithe sraith nua smachtbhannaí i gcoinne na hIaráine;

L.  de bhrí go leanann AE agus a Bhallstáit, in éineacht le comhpháirtithe idirnáisiúnta agus comhghuaillithe ECAT, de thacaíocht mhíleata a chur ar fáil don Úcráin chun cabhrú léi a ceart dlisteanach féinchosanta i gcoinne chogadh foghach na Rúise a fheidhmiú i gcomhréir le hAirteagal 51 de Chairt NA; de bhrí go bhfuil oiliúint curtha ag Misean um Chúnamh Míleata an Aontais Eorpaigh mar thaca leis an Úcráin (EUMAM Ukraine) go dtí seo ar thart ar 60 000 comhalta d’Fhórsaí Armtha na hÚcráine in oiliúint comh-arm agus in oiliúint speisialaithe araon; de bhrí go n-áiritheoidh ECAT ranníocaíocht airgeadais bhliantúil EUR 40 billiún leis an Úcráin;

M.  de bhrí go bhfuil leibhéal íseal cabhrach míleata fós ann ó thaobh cáilíochta agus cainníochta de agus moill ar sheachadadh iarbhír arm agus armlóin chuig an Úcráin tar éis cinntí seachadta a dhéanamh; de bhrí nach bhfuil a ngealltanais á gcomhlíonadh ag go leor Ballstát agus gur fhógair roinnt príomhranníocóirí fiú pleananna chun a ranníocaíochtaí le cabhair mhíleata don Úcráin in 2025 a laghdú go suntasach; de bhrí gur chinn AE brabúis amhantair ó shócmhainní reoite Bhanc Ceannais na Rúise a úsáid chun tacú leis an Úcráin, go háirithe le haghaidh cúnamh míleata breise; de bhrí nár bunaíodh aon chreat dlíthiúil chun gnóthachain chaipitiúla ó shócmhainní reoite na Rúise a ghabháil agus a athdháileadh go héifeachtach;

N.  de bhrí, ina theannta sin, go bhfuil an Ungáir ag cur bac ar an gCiste Cúnaimh don Úcráin (UAF), ar ciste nuabhunaithe ar fiú EUR 5 bhilliún é, a bunaíodh i mí an Mhárta 2024 laistigh den tSaoráid Eorpach Síochána (EPF) agus ar an ochtú tráinse d’aisíocaíochtaí EPF do na Ballstáit a sheachaid cabhair mhíleata chuig an Úcráin thar thréimhse níos faide ná 18 mí;

O.  de bhrí, ó mhí Feabhra 2022, go bhfuil 14 phacáiste smachtbhannaí Eorpacha glactha ag AE arb é is aidhm dóibh an bonn a bhaint ó chumas na Rúise a cogadh foghach neamhdhleathach a fhearadh;

P.  de bhrí go leanann Ballstáit AE de bhreoslaí iontaise agus úráiniam a cheannach ón Rúis, rud a chuireann le geilleagar na Rúise agus a threisíonn a ciste cogaidh; de bhrí gur sháraigh díolacháin bhreoslaí iontaise na Rúise le AE ó thosaigh an cogadh foghach iomlán i gcoinne na hÚcráine EUR 200 billiún, arb ionann é agus dhá oiread an chistithe iomláin a cuireadh ar fáil don Úcráin sa tréimhse chéanna; de bhrí gur dheonaigh AE díolúine d’amhola na Rúise a allmhairítear trí phíblíne Druzhba chuig an Ungáir, chuig an tSlóvaic agus chuig an tSeicia; de bhrí gur cúis imní iad allmhairí méadaithe gáis na Rúise ag an Asarbaiseáin i leith ról na hAsarbaiseáine mar sholáthróir malartach gáis in ionad na Rúise, ós rud é go bhféadfadh Baki, mura bhfuil sé in ann freastal ar éileamh na hEorpa, gás na Rúise a athlipéadú mar ghás na hAsarbaiseáine do thomhaltas na hEorpa; P.de bhrí go leanann Ballstáit AE de bhreoslaí iontaise agus úráiniam a cheannach ón Rúis, rud a threisíonn geilleagar agus ciste cogaidh na Rúise; de bhrí gur sháraigh díolacháin bhreoslaí iontaise na Rúise le AE ó thosaigh an cogadh foghach iomlán i gcoinne na hÚcráine EUR 200 billiún, arb ionann é agus dhá oiread an chistithe iomláin a cuireadh ar fáil don Úcráin sa tréimhse chéanna; de bhrí gur dheonaigh AE díolúine d’amhola na Rúise a allmhairítear trí phíblíne Druzhba chuig an Ungáir, chuig an tSlóvaic agus chuig an tSeicia; de bhrí gur cúis imní iad allmhairí méadaithe gáis na Rúise ón Asarbaiseáin faoi ról na hAsarbaiseáine mar sholáthróir malartach gáis seachas an Rúis, ós rud é go bhféadfadh Baku, nach bhfuil in ann freastal ar éileamh na hEorpa, gás na Rúise a athlipéadú mar ghás Asarbaiseánach do thomhaltas na hEorpa; de bhrí go bhfuil scáthchabhlach tancaer ola Rúiseach atá guaiseach ó thaobh an chomhshaoil de agus nach bhfuil faoi árachas fós ag feidhmiú i Muir Bhailt agus ag dul timpeall ar an gcóras smachtbhannaí;

1.  ag cáineadh, go neamhbhalbh, chogadh foghach leanúnach na Rúise i gcoinne na hÚcráine, agus rannpháirtíocht na Bealarúise sa chogadh sin, agus á éileamh go gcuirfidh an Rúis deireadh láithreach le gníomhaíochtaí míleata uile san Úcráin, go dtarraingeoidh sí na fórsaí agus an trealamh míleata uile siar gan choinníoll ó chríoch iomlán na hÚcráine a aithnítear go hidirnáisiúnta agus go gcúiteoidh sí an Úcráin as an damáiste a rinneadh dá muintir, dá talamh, dá nádúr agus dá bonneagar;

2.  á chur in iúl a dlúthpháirtíocht iomlán le muintir na hÚcráine, mar aon lena tacaíocht iomlán do neamhspleáchas, ceannasacht agus iomláine chríochach na hÚcráine laistigh dá teorainneacha a aithnítear go hidirnáisiúnta, agus á chur i bhfios go láidir gur sárú follasach agus mínáireach ar Chairt NA agus ar bhunphrionsabail an dlí idirnáisiúnta é an cogadh foghach sin; á athdhearbhú go dtacaíonn sí le gealltanais AE agus a Bhallstát cúnamh daonnúil, tacaíocht mhíleata, cabhair eacnamaíoch agus airgeadais agus tacaíocht pholaitiúil a chur ar fáil ar gach bealach is féidir go dtí go mbuafaidh an Úcráin chun deireadh a chur le cogadh foghach na Rúise ar deireadh agus chun lamháil don Úcráin a muintir uile a shaoradh agus smacht iomlán a athbhunú laistigh dá teorainneacha a aithnítear go hidirnáisiúnta; á chur i bhfáth gurb é an sprioc dheiridh i gcónaí síocháin chóir agus bhuan a bhaint amach san Úcráin ar théarmaí na hÚcráine, lena n-áiritheofar sábháilteacht agus dínit a muintir laistigh d’Eoraip shíochánta agus chobhsaí;

3.  á iarraidh ar AE agus ar a Bhallstáit oibriú go gníomhach chun an tacaíocht idirnáisiúnta is leithne is féidir don Úcráin a choinneáil agus a bhaint amach agus chun réiteach síochánta ar an gcogadh a shainaithint, ar réiteach é nach mór a bheith bunaithe ar lánurraim do neamhspleáchas, do cheannasacht agus d’iomláine chríochach na hÚcráine, ar phrionsabail an dlí idirnáisiúnta, ar chuntasacht as coireanna cogaidh agus as coir an fhogha arna dhéanamh ag an Rúis, agus ar chúiteamh na Rúise agus ar íocaíochtaí eile as an damáiste ollmhór a rinneadh san Úcráin; á iarraidh go mbeadh rannpháirtíocht ghníomhach AE ann maidir le Plean Síochána na hÚcráine a chur chun feidhme agus forais a chruthú chun an dara Cruinniú Mullaigh Síochána a thionól;

4.  á iarraidh ar an gCoimisiún cúnamh airgeadais fadtéarmach a mholadh go tapa chun an Úcráin a atógáil i gcomhar le tíortha comhpháirtíochta, go háirithe trí chur chun feidhme tapa na Saoráide don Úcráin a áirithiú agus trí chur léi chun tacaíocht leanúnach ar leibhéil leormhaithe agus acmhainní don atógáil i gcomhréir lenár dtacaíocht pholaitiúil don Úcráin a áirithiú;

5.  á iarraidh ar na Ballstáit uile a gcistiú don Úcráin a mhéadú agus staonadh óna ranníocaíochtaí a laghdú; ag athdhearbhú a tuairime daingne nach mór don Rúis cúiteamh airgeadais a thabhairt as an damáiste ollmhór atá déanta aici san Úcráin; á chur in iúl gur geal léi an cinneadh ón gComhairle ioncam urghnách a eascraíonn as sócmhainní blocáilte stáit na Rúise a dhíriú ar Chiste Cúnaimh don Úcráin agus ar an tSaoráid don Úcráin, chomh maith le cinneadh G7 iasacht USD 50 billiún a thairiscint don Úcráin arna hurrú trí shócmhainní blocáilte stáit na Rúise; á iarraidh go ndéanfaí dul chun cinn tapa maidir le cinneadh G7 a chur chun feidhme, ar cinneadh é iasacht USD 50 billiún a thairiscint don Úcráin arna hurrú trí shócmhainní blocáilte stáit na Rúise, chun eisíocaíocht thráthúil cistí leis an Úcráin a áirithiú; á iarraidh ar AE an obair a thabhairt chun cinn, i gcomhar le comhpháirtithe atá ar aon intinn leis, trí reachtaíocht smachtbhannaí a oiriúnú de réir mar is gá agus trí chóras fónta dlí a bhunú chun sócmhainní na Rúise atá faoi úinéireacht stáit agus arna reo ag AE a choigistiú;

6.  á iarraidh go ndéanfaí méadú suntasach ar chabhair dhaonnúil AE chun a áirithiú go leanfar de thacaíocht iomlán a thabhairt don Úcráin in 2025; ag tabhairt dá haire gur dócha go leanfaidh an gá atá le tacaíocht dhaonnúil ar aghaidh ar feadh na mblianta atá le teacht agus á chur i bhfáth gur gá do AE a bheith ullamh chun freastal ar na riachtanais sin le pleanáil fhadtéarmach agus le cistí leormhaithe; á iarraidh ar stáit neodracha a gcabhair dhaonnúil don Úcráin a mhéadú;

7.  á athdhearbhú go bhfuil ceart dlisteanach féinchosanta ag an Úcráin, mar íospartach ionsaithe, i gcomhréir le hAirteagal 51 de Chairt NA; á mheabhrú go bhfuil an cúnamh míleata suntasach a chuireann an tAontas, na Stáit Aontaithe agus comhpháirtithe atá ar aon intinn leo ar fáil, cé nach leor fós é, ceaptha chun go mbeidh an Úcráin ábalta í féin a chosaint go héifeachtach ar stát ionsaitheora agus smacht iomlán a athbhunú ar a críoch iomlán a aithnítear go hidirnáisiúnta;

8.  á iarraidh ar na Ballstáit deireadh a chur láithreach leis na srianta ar úsáid chórais arm an iarthair a seachadadh chuig an Úcráin i gcoinne spriocanna míleata dlisteanacha ar chríoch na Rúise, ós rud é go gcuireann sé sin bac ar chumas na hÚcráine a ceart féinchosanta a fheidhmiú go hiomlán faoin dlí poiblí idirnáisiúnta agus go bhfágann sé an Úcráin gan chosaint ar ionsaithe ar a daonra agus ar a bonneagar;

9.  á chur i bhfios go láidir go bhfuil baol ann go ndéanfadh seachadtaí neamhleora armlóin agus arm, agus srianta ar a n-úsáid, an bonn a bhaint ó na hiarrachtaí a rinneadh go dtí seo agus á chur in iúl gur saoth léi go mór an laghdú atá ag teacht ar mhéid airgeadais na cabhrach míleata déthaobhaí don Úcráin ó na Ballstáit in ainneoin na ráiteas láidir a rinneadh ag tús na bliana seo; á iarraidh an athuair ar na Ballstáit, dá bhrí sin, a ngealltanas ó mhí an Mhárta 2023 a chomhlíonadh, eadhon milliún urchar armlóin a sheachadadh chuig an Úcráin, agus dlús a chur le seachadtaí arm, go háirithe seachadtaí córas aerchosanta nua-aimseartha agus arm agus armlón eile mar fhreagairt ar riachtanais arna sainaithint go soiléir, lena n-áirítear diúracáin Taurus; á iarraidh go ndéanfaí na gealltanais a tugadh i ngealltanais chomhpháirteacha slándála idir an tAontas Eorpach agus an Úcráin a chur chun feidhme go pras; ag athdhearbhú a seasaimh gur cheart do Bhallstáit uile an Aontais agus do chomhghuaillithe ECAT, i dteannta a chéile agus ar a gconlán féin, geallúint a thabhairt go dtacóidh siad, ar bhealach míleata, leis an Úcráin trí mhéid nach lú ná 0.25 % dá OTI in aghaidh na bliana;

10.  á chur i bhfios go láidir go bhfuil gá le comhar aerchosanta treisithe a bheith á dhéanamh idir na Ballstáit chun a áirithiú go mbeadh cosaint ann ar bhagairtí in aerspás AE agus in aerspás ECAT;

11.  á iarraidh ar an gCoimisiún cumarsáid straitéiseach a dhéanamh sna Ballstáit chun míniú a thabhairt ar a thábhachtaí atá cosaint na hÚcráine i gcás chobhsaíocht na hEorpa trí chéile agus chun a áirithiú go mbeidh saoránaigh AE ar an eolas faoina shuntasaí atá an cúnamh sin, ó thaobh cheannasacht na hÚcráine de agus ó thaobh na síochána agus na slándála ar fud an Aontais de; á chur in iúl gur geal léi agus gur díol sásaimh di na hiarrachtaí atá an pobal a dhéanamh agus na tionscnaimh shluachistiúcháin ó na saoránaigh i roinnt Ballstát a bhfuil sé d’aidhm acu soláthar seasta arm don Úcráin a áirithiú; ag moladh, thairis sin, go ndéanfaí tionscnaimh chomhchosúla ar fud AE chun dlúthpháirtíocht a chothú agus chun ról a thabhairt don phobal sa chúis fhíorthábhachtach sin;

12.  á iarraidh go ndéanfadh an tAontas agus Ballstáit an Aontais gealltanais Dhearbhú Versailles, 2022, a chomhlíonadh agus dlús a chur le cur chun feidhme iomlán an Chompáis Straitéisigh trí threisiú leis an gcomhar míleata Eorpach ar an leibhéal tionsclaíoch agus ar leibhéal na bhfórsaí armtha, chun gur láidre agus gur cumasaí an soláthraí slándála a bheadh san Aontas agus chun gur soláthraí slándála idir-inoibritheach a bheadh comhlántach le ECAT é; á chur i bhfáth gur cheart céimeanna nithiúla a ghlacadh d’fhonn an Úcráin a chomhtháthú i mbeartais agus cláir cosanta agus cibearshlándála AE le linn phróiseas aontachais AE; ag tathant ar institiúidí AE dlús a chur le glacadh na Straitéise um Thionscal Cosanta na hEorpa chun infhaighteacht agus soláthar tráthúil táirgí cosanta a áirithiú, rud a d’fhágfadh go bhféadfaí tacaíocht mhíleata a thabhairt don Úcráin ar bhealach tráthúil; á iarraidh ar na Ballstáit seasamh leis an ngealltanas a thugadar, eadhon go mbunóidís táirgeadh míleata ar chríoch na hÚcráine; á chur i bhfáth a thábhachtaí atá sé comhar a dhéanamh le tionscal cosanta na hÚcráine agus é a chomhtháthú, i bhfad na haimsire, i mbonn tionsclaíoch agus teicneolaíoch cosanta AE;

13.  ag moladh an Ghrúpa Teagmhála um Chosaint na hÚcráine as ról ríthábhachtach a ghlacadh i ndáil le tacaíocht idirnáisiúnta a chomhordú agus ag tathant ar Bhallstáit AE a ranníocaíochtaí a mhéadú chun cumais chosanta na hÚcráine a neartú;

14.  ag tathant ar na Ballstáit brú gníomhach a chur ar Rialtas na hUngáire deireadh a chur lena imshuí ar an tSaoráid Eorpach Síochána, lena n-áirítear Ciste Cúnaimh nuabhunaithe don Úcráin, agus, ar an gcaoi sin, na gealltanais a rinneadh ó mhí Feabhra 2022, agus lenar chomhaontaigh na Ballstáit uile, a choinneáil;

15.  ag cáineadh go láidir úsáid an fhoréigin ghnéasaigh agus inscnebhunaithe mar arm cogaidh agus á chur i bhfáth gur coir chogaidh é sin; á iarraidh ar na tíortha óstacha agus na tíortha idirthurais rochtain ar sheirbhísí sláinte gnéis agus sláinte atáirgthe agus na cearta a bhaineann leo a ráthú, go háirithe frithghiniúint éigeandála, próifiolacsas iartheagmhála agus cúram ginmhillte, lena n-áirítear do mharthanóirí éignithe;

16.  á iarraidh an athuair ar an Aontas dlús a chur leis na hiarrachtaí atáthar a dhéanamh ar aghaidh a thabhairt ar staid thubaisteach na ndaoine a díbríodh go héigeantach chun na Rúise agus na leanaí a uchtaíodh go héigeantach sa Rúis, lena n-áirítear trí smachtbhannaí a chur ar na daoine a bhí freagrach go díreach as aistriú éigeantach agus coinneáil gan údar leanaí Úcránacha, agus a raibh baint acu leis sin;

17.  ag tathant ar Rialtas na hUngáire an fhoraithne lena gcealaítear dídean státchistithe do dhídeanaithe ó iarthar na hÚcráine a tharraingt siar agus seasamh lena freagrachtaí faoi Threoir an Aontais um Chosaint Shealadach;

18.  á iarraidh ar an gComhairle a beartas smachtbhannaí i gcoinne na Rúise agus na Bealarúise, agus i gcoinne thíortha agus eintitis neamh-AE a mbíonn teicneolaíochtaí agus trealamh míleata agus dé-úsáide á soláthar acu do choimpléasc míleata na Rúise, a choinneáil agus a leathnú agus fós faireachán agus athbhreithniú a dhéanamh ar éifeachtacht agus tionchar an bheartais sin mar aon lena fheabhsú; á chur in iúl gur saoth léi gur aistrigh an Iaráin diúracáin bhalaistíocha chuig an Rúis le déanaí; ag tathant ar na Ballstáit an córas smachtbhannaí i gcoinne na hIaráine agus na Cóiré Thuaidh a leathnú agus a neartú tuilleadh i bhfianaise thacaíocht mhíleata na dtíortha sin do chogadh foghach na Rúise i gcoinne na hÚcráine, agus breis eintitis Shíneacha agus breis Síneach a chur le liosta smachtbhannaí AE as tacú le hearnáil cosanta agus slándála na Rúise; á chur i bhfios go láidir gur gá cosc a chur ar chomhpháirteanna criticiúla a tháirgtear i dtíortha AE dul i tionscal míleata na Rúise a shroicheadh agus á mheas go bhfuil sé ríthábhachtach na rialuithe ar onnmhairiú agus ar chothabháil trealaimh ardteicneolaíochta a tháirgtear in AE a neartú, chomh maith le bearta forfheidhmithe dlí agus comhar a mhéadú chun cosc a chur ar theacht timpeall ar smachtbhannaí; á iarraidh ar an gComhairle dul i ngleic, ar bhealach córasach, le smachtbhannaí a bheith á seachaint ag cuideachtaí atá bunaithe san Aontas, ag tríú páirtithe agus ag stáit nach Ballstáit de chuid an Aontais iad; á iarraidh ar an gComhairle córas smachtbhannaí cothrománach nua a cheapadh chun an tseachaint sin a chomhrac, a mbeidh gá le hionstraim, a bheidh níos ginearálta agus a fhéadfar a chur i bhfeidhm ar bhealach níos iomlánaíche, a bheith ina cuid de, chun díriú ar sheachaint sna córais uile arna gcur chun feidhme ag an Aontas; á iarraidh ar an gComhairle agus ar na Ballstáit aghaidh a thabhairt, go háirithe, ar shaincheist na gcomhpháirteanna de dhearadh an Iarthair atá á n-úsáid in airm agus i dtrealamh míleata na Rúise;

19.  á chur i bhfáth go mbeidh níos lú tionchair ag na smachtbhannaí atá ann cheana, agus níos lú tacaíochta airgeadais agus mhíleata ann don Úcráin, fad a cheadóidh an tAontas breoslaí iontaise Rúiseacha a bheith á n-allmhairiú; á iarraidh go gcuirfí toirmeasc ar ghrán, potais agus leasacháin Rúiseacha a allmhairiú, agus ar amhábhair Rúiseacha a allmhairiú freisin, lena n-áirítear alúmanam, táirgí cruach, úráiniam, tíotáiniam, nicil, adhmad agus táirgí adhmaid, agus gás agus ola; á iarraidh ar AE agus ar na Ballstáit toirmeasc iomlán a chur ar tháirgí ola scagtha Rúiseacha arna n-ath-onnmhairiú; á iarraidh, thairis sin, go ndéanfaí doiciméadacht maidir le ‘rialacha tionscnaimh’ a chur chun feidhme, lena n-áiritheofaí fíorthionscnamh táirgí ola a allmhairítear chuig AE;

20.  á iarraidh ar thíortha G7 an chaidhp phraghais arna forchur ar ola mhuiriompartha na Rúise a fhorfheidhmiú ar bhealach níos éifeachtaí agus a bheith níos déine ar na lúba ar lár a úsáideann an Rúis chun a hola a athphacáistiú agus a dhíol ar phraghsanna an mhargaidh; á iarraidh go ndéanfadh AE agus Ballstáit AE dianrialú ar scáthfhlít na Rúise, ós rud é go mbíonn smachtbhannaí AE agus G7 a sárú aige, agus, sa bhreis air sin, gur bagairt éiceolaíoch ollmhór ar an éiceachóras é toisc easnaimh theicniúla a bheith ann agus toisc é a bheith ag cliseadh go minic;

21.  á iarraidh go gcuirfí trádbhac iomlán ar ghás nádúrtha leachtaithe na Rúise agus go gcuirfí smachtbhannaí ar Gazprom agus ar chuideachtaí ola Rúiseacha; á iarraidh go ndéanfadh AE ceanglas a fhorchur lena leagfaí síos go ndéanfaí soithí aicme oighir Arc-7 a onnmhairíonn gás nádúrtha leachtaithe na Rúise a áireamh ar liosta smachtbhannaí Oifig na Stát Aontaithe um Rialú Sócmhainní Eachtracha agus ar liosta smachtbhannaí AE, rud a d’fhágfadh nach mbeidís in ann rochtain a fháil ar chalafoirt ná ar sheirbhísí muirí an Iarthair; á iarraidh ar AE agus ar Bhallstáit AE smachtbhannaí spriocdhírithe a fhorchur ar shoithí muirí arna n-úsáid ag an Rúis chun teacht timpeall ar smachtbhannaí ar a honnmhairí ola agus gáis agus seirbhísiú a tionscadal fuinnimh san Artach;

22.  á iarraidh go gcuirfí smachtbhannaí ar earnáil núicléach na Rúise agus go gcuirfí smachtbhannaí spriocdhírithe orthusan a dhéanann sáruithe ar an tsábháilteacht agus an tslándáil núicléach ag Gléasra Cumhachta Núicléiche Zaporizhzhia;

23.  á chur in iúl gur saoth léi go bhfuil ionsaithe hibrideacha á ndéanamh mó sa mhó ag an Rúis i gcoinne an Aontais agus i gcoinne Bhallstáit an Aontais, agus é d’aidhm acu sin tacaíocht na hEorpa don Úcráin a lagú trí ionramháil ar fhaisnéis, sabaitéireacht, iarrachtaí díchobhsaithe ceilte, agus éilliú; á iarraidh ar AE agus ar Bhallstáit an Aontais oibriú go straitéiseach agus go réamhghníomhach chun bagairtí hibrideacha a chomhrac, chun cumarsáid straitéiseach AE a neartú agus chun cosc a chur ar an Rúis an bonn a bhaint ó phróisis pholaitiúla, toghcháin agus dhaonlathacha eile in AE agus sna tíortha máguaird;

24.  á threorú dá hUachtarán an rún seo a chur ar aghaidh chuig ag an gComhairle, chuig an gCoimisiún, chuig Leas-Uachtarán an Choimisiúin / Ardionadaí an Aontais do Ghnóthaí Eachtracha agus don Bheartas Slándála, chuig rialtais agus parlaimintí na mBallstát, chuig Uachtarán, Rialtas agus Verkhovna Rada na hÚcráine, chuig Rialtas na Rúise agus na rialtais eile lena mbaineann, agus chuig na Náisiúin Aontaithe.

(1) Téacsanna arna nglacadh, P10_TA(2024)0003. (2) IO L, 2024/792, 29.2.2024, ELI: http://data.europa.eu/eli/reg/2024/792/oj. (3) Treoir 2001/55/CE ón gComhairle an 20 Iúil 2001 maidir le caighdeáin íosta le cosaint shealadach a thabhairt i gcás mórphlódú isteach de dhaoine easáitithe agus maidir le bearta lena gcuirtear cothromaíocht chun cinn idir iarrachtaí idir Ballstáit i dtaca leis na daoine sin a ghlacadh agus le hiarmhairtí an ghlactha sin a iompar (IO L 212, 7.8.2001, lch. 12, ELI: http://data.europa.eu/eli/dir/2001/55/oj).