Il-Parlament Ewropew,

–   wara li kkunsidra l-proposta għal rakkomandazzjoni lill-Kunsill magħmula minn Martine Roure f'isem il-grupp PSE dwar l-iżvilupp tan-negozjati rigward id-deċiżjoni kwadru dwar il-ġlieda kontra r-razziżmu u l-ksenofobija (B6-0076/2007),

–   wara li kkunsidra l-pożizzjoni tiegħu ta' l-4 ta' Lulju 2002 dwar il-ġlieda kontra r-razziżmu u l-ksenofobija(1),

–   wara li kkunsidra l-azzjoni komuni 96/443/JHA tal-15 ta' Lulju 1996 adottata mill-Kunsill skond l-Artikolu K.3 tat-Trattat ta' l-Unjoni Ewropea, dwar l-azzjoni kontra r-razziżmu u l-ksenofobija(2) (minn hawn 'il quddiem imsejjħa "l-azzjoni komuni"),

–   wara li kkunsidra l-proposta ta' deċiżjoni kwadru mill-Kunsill lill-Kummissjoni dwar il-ġlieda kontra r-razziżmu u l-ksenofobija (COM(2001)0664)(3),

–   wara li kkunsidra d-deċiżjoni kwadru tal-Kunsill ta' l-2005 bit-titolu "Il-Kompromess ta' Lussemburgu"(4),

–   wara li kkunsidra d-deċiżjoni kwadru tal-Kunsill ta' Jannar 2007(5),

–   wara li kkunsidra l-Patt internazzjonali dwar id-drittijiet ċivili u politiċi tas-16 ta' Diċembru 1966, u b'mod partikulari l-Artikolu 20(2) tiegħu,

–   wara li kkunsidra l-Konvenzjoni internazzjonali dwar l-eliminazzjoni ta' kull forma ta' diskriminazzjoni razzjali tal-21 ta' Diċembru 1965,

–   wara li kkunsidra l-protokoll addizzjonali tal-Konvezjoni dwar il-kriminalità fuq l-internet tat-28 ta' Jannar 2003, rigward l-inkriminazzjoni ta' atti ta' natura razzista u ksenofobika mwettqa permezz ta' sistemi informatiċi(6),

–   wara li kkunsidra l-Artikolu 114 (3) u l-Artikolu 94 tar-Regoli ta' Proċedura tiegħu,

–   wara li kkunsidra r-rapport tal-Kumitat għal-Libertajiet Ċivili, il-Ġustizzja u l-Intern (A6-0151/2007),

A.   billi r-rapporti annwali taċ-Ċentru Ewropew ta' Monitoraġġ dwar ir-Razziżmu u l-Ksenofobija, ir-rapporti komparattivi tiegħu dwar ir-reati ta' natura razzista, u ż-żewġ rapporti reċenti tiegħu dwar l-antisemitiżmu u l-islamofobija wrew li r-reati ta' natura razzista huma problema persistenti u kostanti fl-Istati Membri kollha; wieħed jista' jikkalkula li aktar minn 9 miljun persuna sfaw vittmi ta' reati ta' natura razzista fl-2004,

B.   billi s-sena 2007 ġiet iddikjarata s-Sena Ewropea ta" l-Opportunitajiet Indaqs għal Kulħadd, u li jaqbel li matul din is-sena ssir enfasi partikulari fuq il-ġlieda kontra kull tip ta' diskriminazzjoni,

C.   billi jeħtieġ li jinżamm il-bilanċ bejn ir-rispett tal-libertà ta' l-espressjoni u l-ġlieda kontra r-razziżmu u l-ksenofobija,

D.   billi, anke jekk politika kriminali tkun xierqa f'dan il-qasam, din trid tqis il-fatt li f'kultura bbażata fuq il-libertà u d-drittijiet, il-liġi kriminali hija dejjem l-aħħar rikors li għandu jintuża mill-inqas; billi l-politika leġiżlattiva f'dan il-qasam trid tkun imsejsa fuq il-valuri kollha konċernati u b'mod partikulari fid-dawl tal-kunflitt bejn il-libertà ta' l-espressjoni u d-dritt ta' kull bniedem għal kunsidrazzjoni u rispett ugwali,

E.   billi l-libertà ta' l-espressjoni u ta' l-assoċjazzjoni għandhom jitħarsu, ħlief meta dawn jintużaw biex iwasslu għall-użu tal-forza, il-vjolenza u l-mibgħeda, jew meta għandhom l-għan li jwasslu għal atti illegali jew li jipprovokawhom, jew meta huwa probabbli li dawn jipprovokaw atti bħal dawn,

F.   billi, għalkemm l-Istati Membri kollha għandhom leġiżlazzjoni bil-għan li jiġġieldu kontra r-razziżmu u l-ksenofobija, jeżistu diverġenzi importanti bejn dawn il-leġiżlazzjonijiet; billi din id-diversità turi l-ħtieġa ta' ċertu livell ta' armonizzazzjoni fuq livell Ewropew bil-għan li tiggarantixxi l-effikaċja tal-ġlieda transkonfinali u fl-Ewropa inġenerali kontra r-razziżmu u l-ksenofobija,

G.   billi jeħtieġ li r-razziżmu u l-ksenofobija jiġu miġġielda b'mod enerġetiku madwar l-Unjoni Ewropea kollha, l-ewwelnett permezz ta' l-edukazzjoni u permezz ta' argumenti soċjali u politiċi bla heda, li jesponu l-argumenti favurihom u jiżolaw lil min ixerridhom,

H.   billi, wara sitt snin ta' negozjati, il-Kunsill wasal għal ftehima politika dwar proġett ta' deċiżjoni ta' qafas dwar il-ġlieda kontra r-razziżmu u l-ksenofobija matul il-Kunsill għall-Ġustizzja u l-Intern tad-19 ta' April 2007,,

I.   billi din il-ftehima politika hija frott ta' bosta snin ta' negozjati u għandu jkun il-punt tat-tluq sabiex titwaqqaf leġiżlazzjoni Ewropea b'appoġġ akbar f'dan il-qasam,

J.   filwaqt li jfakkar li l-Parlament Ewropew adotta l-pożizzjoni tiegħu fl-4 ta' Lulju 2002, li din il-pożizzjoni kienet ibbażata, madankollu, fuq il-proposta inizjali tal-Kummissjoni ta' l-2001, u li l-ftehima politika tad-19 ta' April 2007 hija frott ta' negozjati diffiċli u għalhekk immodifikat b'mod sostanzjali t-test inizjali tal-Kummissjoni; billi, għaldaqstant, il-Parlament għandu jerġa' jiġi kkonsultat fuq il-bażi ta' dan it-test ġdid,

K.   filwaqt li jfakkar li l-adozzjoni ta' din id-deċiżjoni kwadru se twassal għall-abrogazzjoni ta' l-azzjoni komuni u li għalhekk jaqbel li din id-deċiżjoni ma tkunx anqas importanti mill-azzjoni komuni,

1.   billi titqies il-proposta ta' deċiżjoni ta' qafas li kienet is-suġġett ta' ftehima politika matul il-Kunsill għall-Ġustizzja u l-Intern tad-19 ta' April 2007, jindirizza dawn ir-rakkomandazzjonijiet lill-Kunsill::

2.  Jagħti istruzzjoni lill-President tiegħu sabiex jgħaddi din ir-rakkomandazzjoni tal-parlament lill-Kunsill u, għall-informazzjoni, lill-Kummissjoni, kif ukoll lill-parlamenti u l-gvernijiet ta' l-Istati Membri.

(1) ĠU C 271 E, 12.11.2003, p. 558. (2) ĠU L 185, 24.7.1996, p. 5. (3) ĠU C 75 E, 26.3.2002, p. 269. (4) Dokumenti 8994/1/05 REV 1 DROIPEN 24; 8994/1/05 REV ADD 1 DROIPEN 24. (5) Dokument 5118/07 DROIPEN 1. (6) Sensiela ta' trattati tal-Kunsill ta' l-Ewropa, ETS nru 189. (7) ĠU L 180, 19.7.2000, p. 22.