(Proċedura leġislattiva ordinarja: l-ewwel qari)

Il-Parlament Ewropew,

–  wara li kkunsidra l-proposta tal-Kummissjoni lill-Parlament Ewropew u lill-Kunsill (COM(2008)0664),

–  wara li kkunsidra l-Artikolu 251(2) u l-Artikolu 95 tat-Trattat KE, skont liema artikoli l-Kummissjoni ppreżentat il-proposta lill-Parlament (C6-0515/2008),

–  wara li kkunsidra l-Komunikazzjoni mill-Kummissjoni lill-Parlament Ewropew u lill-Kunsill bl-isem “Konsegwenzi tad-dħul fis-seħħ tat-Trattat ta' Lisbona fuq il-proċeduri interistituzzjonali ta' teħid ta' deċiżjonijiet li għaddejjin bħalissa” (COM(2009)0665),

–  wara li kkunsidra l-Artikolu 294(3) u l-Artikoli 114 u 168(4)(c) tat-Trattat dwar il-Funzjonament tal-Unjoni Ewropea,

–  wara li kkunsidra l-opinjoni tal-Kumitat Ekonomiku u Soċjali Ewropew tal-10 ta' Ġunju 2009(1),

–  wara li kkunsidra l-opinjoni tal-Kumitat tar-Reġjuni tas-7 ta' Ottubru 2009(2),

–  wara li kkunsidra l-impenn meħud mir-rappreżentant tal-Kunsill, permezz tal-ittra tat-23 ta' Ġunju 2010, li japprova l-pożizzjoni tal-Parlament Ewropew, skont l-Artikolu 294(4) tat-Trattat dwar il-Funzjonament tal-Unjoni Ewropea,

–  wara li kkunsidra l-Artikolu 55 tar-Regoli ta' Proċedura tiegħu,

–  wara li kkunsidra r-rapport tal-Kumitat għall-Ambjent, is-Saħħa Pubblika u s-Sikurezza tal-Ikel u l-opinjonijiet tal-Kumitat għall-Industrija, ir-Riċerka u l-Enerġija u tal-Kumitat għas-Suq Intern u l-Ħarsien tal-Konsumatur (A7–0153/2010),

1.  Jadotta l-pożizzjoni fl-ewwel qari hekk kif stabbilita hawn taħt;

2.  Japprova d-dikjarazzjoni tal-Kummissjoni mehmuża ma' din ir-riżoluzzjoni;

3.  Jitlob lill-Kummissjoni biex terġa' tirreferi l-kwistjoni lill-Parlament jekk ikollha l-ħsieb li temenda l-proposta b'mod sustanzjali jew li tibdilha b'test ġdid;

4.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill, lill-Kummissjoni u lill-parlamenti nazzjonali.

(1) ĠU C 306, 16.12.2009, p. 22. (2) ĠU C 79, 27.3.2010, p. 50.

(Peress li ntlaħaq ftehim bejn il-Parlament u l-Kunsill, il-pożizzjoni tal-Parlament jaqbel ma' l-att leġislattiv finali, r-Regolament (UE) Nru 1235/2010.)

Dikjarazzjoni mill-Kummissjoni

Wara t-talba mill-Parlament Ewropew u l-Kunsill dwar il-gradazzjoni tal-kap tal-Aġenzija Ewropea għall-Mediċini, sabiex ma ddewwimx l-adozzjoni ta' din il-proposta importanti l-Kummissjoni timpenja ruħha li tippubblika mill-ġdid in-nota tal-post battal għall-kap li jmiss tal-Aġenzija Ewropea għall-Mediċini bil-grad AD15 minflok AD14.

Il-Kummissjoni tikkunsidra li l-post it-tajjeb biex tiġi indirizzata din il-kwistjoni huwa d-diskussjoni orizzontali kontinwa dwar ir-rwol tal-aġenziji tal-UE fi ħdan il-grupp ta' ħidma Interistituzzjonali dwar l-aġenziji. Id-diskussjoni fuq dan l-aspett hija miftuħa fil-grupp ta' ħidma interistituzzjonali, u jekk din id-diskussjoni twassal għal konklużjonijiet differenti dwar il-livell ta' pubblikazzjoni xieraq, din il-gradazzjoni tkun tista' titqies mill-ġdid għal pubblikazzjonijiet futuri.