Dikjarazzjoni tal-Parlament Ewropew tal-5 ta' Lulju 2012 dwar l-edukazzjoni dwar l-iżvilupp u ċ-ċittadinanza globali attiva
Il-Parlament Ewropew,
– wara li kkunsidra l-Kunsens Ewropew dwar l-Iżvilupp, li jenfasizza li “l-UE se tagħti attenzjoni partikolari lill-edukazzjoni dwar l-iżvilupp u lit-tqajjim ta' kuxjenza”,
– wara li kkunsidra l-konklużjonijiet tad-Djalogu Strutturat dwar ir-rwol tas-soċjetà ċivili u l-awtoritajiet lokali fl-iżvilupp, li jistieden “lill-Istati Membri tal-UE u lill-Kummissjoni Ewropea [sabiex] jsaħħu l-istrateġiji tagħhom għall-Edukazzjoni dwar l-Iżvilupp u għat-Tqajjim ta' Kuxjenza”,
– wara li kkunsidra l-Artikolu 123 tar-Regoli ta' Proċedura tiegħu,
A. billi l-edukazzjoni dwar l-iżvilupp u t-tqajjim ta' kuxjenza huma ċentrali għall-politiki tal-iżvilupp Ewropej, kif inhu enfasizzat fil-Kunsens Ewropew dwar l-Edukazzjoni dwar l-Iżvilupp (“Il-Kunsens Ewropew dwar l-Iżvilupp: Il-Kontribut tal-Edukazzjoni dwar l-Iżvilupp u t-Tqajjim ta' Kuxjenza”);
B. billi, minkejja li hija waħda mill-ikbar finanzjaturi tal-edukazzjoni dwar l-iżvilupp fl-Ewropa, l-Unjoni Ewropea m'għandhiex strateġija ddedikata f'dan il-qasam;
C. billi, matul il-perjodi mmarkati b'awsterità, kriżijiet u l-qawmien ta' movimenti nazzjonalisti u populisti, huwa partikolarment importanti li tiġi appoġġjata ċ-ċittadinanza globali attiva;
1. Jistieden lill-Kummissjoni u lill-Kunsill sabiex jiżviluppaw strateġija Ewropea trans-settorjali għal perjodu twil għall-edukazzjoni dwar l-iżvilupp, it-tqajjim ta' kuxjenza u ċ-ċittadinanza globali attiva;
2. Jistieden lill-Istati Membri sabiex jiżviluppaw u jsaħħu l-istrateġiji nazzjonali għall-edukazzjoni dwar l-iżvilupp;
3. Jagħti istruzzjonijiet lill-President tiegħu sabiex jgħaddi din id-dikjarazzjoni, flimkien mal-ismijiet tal-firmatarji(1), lill-Kummissjoni, lill-Kunsill u lill-parlamenti tal-Istati Membri.