(Approvazzjoni)

Il-Parlament Ewropew,

–  wara li kkunsidra l-proposta għal deċiżjoni tal-Kunsill li tawtorizza kooperazzjoni msaħħa fil-qasam tat-taxxa fuq it-tranżazzjonijiet finanzjarji (COM(2012)0631),

–  wara li kkunsidra t-talba għall-approvazzjoni preżentata mill-Kunsill skont l-Artikolu 329(1) tat-Trattat dwar il-Funzjonament tal-Unjoni Ewropea (C7-0396/2012),

–  wara li kkunsidra l-Artikolu 74g u l-Artikolu 81(1) tar-Regoli ta' Proċedura tiegħu,

–  wara li kkunsidra r-rakkomandazzjoni tal-Kumitat għall-Affarijiet Ekonomiċi u Monetarji (A7-0396/2012),

A.  billi fit-28 ta’ Settembru 2011, il-Kummissjoni adottat proposta għal Direttiva tal-Kunsill dwar sistema komuni ta’ taxxa fuq it-tranżazzjonijiet finanzjarji (TTF) u li temenda d-Direttiva 2008/7/KE(1),

B.  billi dik il-proposta kienet ibbażata fuq l-Artikolu 113 tat-Trattat dwar il-Funzjonament tal-Unjoni Ewropea (TFUE), li jirrikjedi li jiġi kkonsultat il-Parlament u votazzjoni unanima fil-Kunsill,

C.  billi fil-pożizzjoni tiegħu tat-23 ta' Mejju 2012 dwar dik il-proposta, il-Parlament, filwaqt li jaġixxi bi qbil mal-proċedura ta' konsultazzjoni, approva l-proposta tal-Kummissjoni kif emendata,

D.  billi malajr sar ċar li xi Stati Membri kellhom problemi speċifiċi li kienu jagħmluhielhom impossibbli li jaċċettaw id-direttiva proposta;

E.  billi diversi Stati Membri wrew li kienu lesti jikkunsidraw il-possibilità li jistabbilixxu sistema komuni ta' TFF fi ħdan il-qafas tal-kooperazzjoni msaħħa,

F.  billi iktar minn disa' Stat Membru wrew l-intenzjoni tagħhom li jistabbilixxu kooperazzjoni msaħħa bejniethom fil-qasam tal-ħolqien ta' sistema komuni ta' TTF billi ressqu talba lill-Kummissjoni skont l-Artikolu 329(1) tat-TFUE, billi l-Kummissjoni sussegwentement ippreżentat proposta għal deċiżjoni tal-Kunsill li tawtorizza l-kooperazzjoni msaħħa,

G.  billi l-Parlament ivverifika l-osservanza tal-Artikolu 20 tat-Trattat dwar l-Unjoni Ewropea (Trattat UE),

H.  billi l-Parlament, fil-pożizzjoni tiegħu tat-23 ta' Mejju 2012, iddikjara li l-TTF verament se tikseb l-objettivi tagħha jekk tiddaħħal fil-livell globali, u ssottolinja l-importanza tal-Unjoni biex tmexxi l-isforzi sabiex jintlaħaq ftehim dwar it-TTF fil-livell globali permezz tal-istabiliment ta' eżempju għall-introduzzjoni tat-TTF; billi l-kooperazzjoni mtejba x'aktarx ukoll li tagħti eżempju għall-introduzzjoni tat-TTF fil-livell globali,

I.  billi l-Parlament, fil-pożizzjoni tiegħu tat-23 ta' Mejju 2012, iddikjara li l-mudell għat-TTF propost mill-Kummissjoni se jkun bażi xierqa għall-implimentazzjoni fi ħdan grupp ta' Stati Membri jekk dawk jagħżlu li jimxu b'pass iktar imgħaġġel permezz tal-kooperazzjoni mtejba,

J.  billi l-Kummissjoni għandha tikkumplimenta l-valutazzjoni inizjali tal-impatt dwar l-introduzzjoni tat-TTF billi teżamina iktar l-impatt tat-TTF taħt il-kooperazzjoni mtejba fis-suq intern b'mod ġenerali, inklużi l-effetti għall-parteċipazzjoni u n-nuqqas ta' parteċipazzjoni tal-Istati Membri, u għandha tqis ir-riżultati tal-eżami meta tabbozza l-abbozz revedut ta' proposta tagħha,

K.  billi, skont l-Artikolu 20 tat-Trattat UE, minimu ta' disa' Stati Membri jistgħu jistabbilixxu l-kooperazzjoni mtejba bejniethom fi ħdan il-qafas tal-kompetenzi mhux esklużivi tal-Unjoni, filwaqt li jużaw l-istituzzjonijiet tagħhom u jeżerċitaw dawk il-kompetenzi billi japplikaw id-dispożizzjonijiet tat-Trattati b'mod iktar konsistenti legalment,

L.  billi tali kooperazzjoni mtejba fir-rigward tat-TTF tista' tiqeis bħala li qed iżżid l-objettivi tal-Unjoni, tipproteġi l-interessi tagħha u ssaħħaħ il-proċess ta' integrazzjoni tagħha fi ħdan it-tifsira tal-Artikolu 20 tat-Trattat UE,

M.  billi r-rekwiżiti tal-Artikoli 326 sa 334 TFUE wkoll huma ssodisfati,

N.  billi l-kooperazzjoni msaħħa se tirrispetta d-drittijiet, il-kompetenzi u l-obbligi tal-Istati Membri mhux parteċipanti, sakemm il-possibilità li tinħoloq TTF armonizzata fit-territorji tal-Istati Membri parteċipanti ma taffettwa la l-abilità tal-Istati Membri mhux parteċipanti li jżommu jew idaħħlu tassazzjoni simili fil-livell nazzjonali, u lanqas il-kundizzjonijiet għall-ħolqien ta' tali taxxi fit-territorji tagħhom,

O.  billi l-Artikolu 328(1) tat-TFUE jipprevedi li l-kooperazzjoni msaħħa għandha tkun miftuħa f’kull mument għall-Istati Membri kollha li jixtiequ jipparteċipaw; billi l-Kummissjoni u l-Istati Membri li qed jipparteċipaw fil-kooperazzjoni msaħħa għandhom jippromwovu u jħeġġu, mill-bidu nett u fuq bażi kontinwa, il-parteċipazzjoni tal-ogħla numru ta’ Stati Membri possibbli,

P.  billi l-leġiżlazzjoni eżistenti tal-Unjoni, b'mod partikolari d-Direttiva tal-Kunsill 2008/7/KE, għandha tiġi osservata,

Q.  billi l-approvazzjoni tal-Parlament fir-rigward tal-proposta tal-Kummissjoni tikkonċerna l-kooperazzjoni mtejba u ma tiġġudikax minn qabel liema Stati Membri se jipparteċipaw,

R.  billi l-Artikolu 333(2) tat-TFUE jippermetti lil dawk l-Istati Membri li jipparteċipaw fil-kooperazzjoni mtejba li jadottaw deċiżjoni li tistipula li l-Kunsill se jaġixxi skont il-proċedura leġiżlattiva ordinarja, iktar milli l-proċedura leġiżlattiva speċjali prevista fl-Artikolu 113 tat-TFUE, skont liema l-Parlmament sempliċiment jiġi kkonsultat,

S.  billi l-Kummissjoni għandha timmoniterja mill-qrib l-implimentazzjoni tat-TTF fir-rigward tal-Artikoli 326 u 327 tat-TFUE u għandha tirrapporta b'mod regolari lura lill-Parlament u lill-Kunsill,

1.  Jagħti l-approvazzjoni tiegħu għall-proposta ta' deċiżjoni tal-Kunsill, bla preġudizzju għal liema Stati Membri jipparteċipaw;

2.  Jistieden lill-Kunsill biex jadotta deċiżjoni b'konformità mal-Artikolu 333(3) tat-TFUE, li tistipula li, fir-rigward tal-proposta għal direttiva tal-Kunsill li timplimenta l-kooperazzjoni mtejba fil-qasam tat-TTF skont l-Artikolu 113 tat-TFUE, se jaġixxi skont il-proċedura leġiżlattiva ordinarja;

3.  Jagħti istruzzjonijiet lill-President tiegħu sabiex jgħaddi l-pożizzjoni tal-Parlament lill-Kunsill u lill-Kummissjoni.

(1) Direttiva tal-Kunsill 2008/7/KE tat- 12 ta’ Frar 2008 dwar it-taxxi indiretti fuq il-ġbir tal-kapital (ĠU L 46, 21.2.2008, p. 11).